Talateu

ʻOku ʻikai fiemaʻu ke hoko hoʻo taimi ʻi he ʻapi pōpulá ko e aʻusia ia ke ne faʻu ʻa e halanga ʻo hoʻo moʻuí. ʻOku taʻengata ho tuʻunga ko e fānau ʻa e ʻOtuá, neongo hoʻo ngāue pōpulá. ʻE tokoni hoʻo laka atu ʻi he tui mo e falala kia Sīsū Kalaisí ke ke aʻusia ai ʻa e tuʻunga ʻokú Ne finangalo ke ke aʻusiá. Te Ne tokoniʻi koe ke ke maʻu ha moʻui fiefia mo mahuʻingamālie.

ʻE lava ke faingataʻa ʻa e moʻuí ʻi he lolotonga mo e hili ʻa e ngāue pōpulá. ʻE lava ke faingataʻa hono kumi ha ngāue maʻuʻanga moʻui, fale nofoʻanga, fakamālohia ʻo e ngaahi vā fetuʻutakí, mo e ngaahi tafaʻaki lahi kehe ʻo e moʻui fakaʻahó, tuʻunga ʻi ha lekooti faihia. Neongo ʻa e ngaahi faingataʻá ni, ka ʻoku ʻikai ke ke tuenoa. ʻI hoʻo muimui ki he ngaahi akonaki ʻa Kalaisí, te ke lava ʻo fakatupulaki koe pea siʻaki ho ngaahi momeniti ʻo e vaivaí, ngaahi fili taʻe-fakapotopotó, mo e ngaahi aʻusia faingataʻa ʻi he kuohilí. He ʻikai teitei liʻaki koe ʻe he ʻOtuá. ʻE lava ke hoko ʻEne ʻofa, ngaahi tāpuaki, mo ʻEne falala kiate koé ko ha maʻuʻanga ivi fakaʻaho lolotonga ha faʻahinga faingataʻa pē (vakai, Mātiu 11:28–29).

Makehe mei he ʻOtua ko e Tamaí mo Sīsū Kalaisi, ʻe lava ke hoko ho fāmilí, kaungāmeʻá, mo e Siasí ko ha maʻuʻanga tokoni. ʻOku tokolahi foki mo ha kakai lelei kuo nau fokotuʻutuʻu ha ngaahi maʻuʻanga tokoni fakakolo mo fakakautaha ʻoku fakataumuʻa ki hoʻo lavameʻa ʻi he taimi lōloá. Ka neongo ia, manatuʻi ʻe makatuʻunga maʻu pē ʻiate koe ke ke fai ha ngaahi fili lelei te ne tokoniʻi koe ke ke fakalakalaka.

Ko ha ngaahi ʻulungaanga ʻeni ʻe niʻihi te ne tokoniʻi koe ke ke ngāue fakataha mo e Fakamoʻuí ke liliu mo fakalakalaka aí:

• Nofo ofi ki he ʻOtuá ʻi he lotu, ako folofola, mo e fakalaulauloto. ʻE ueʻi koe ʻe he fanga kiʻi ngāue faingofua ko ʻení ke ke fai ha ngaahi fili ʻoku leleí mo tokoni ke mahino kiate koe mo ke falala kia Sīsū Kalaisi ko ho Fakamoʻui mo e kaungāmeʻa.

• Fokotuʻu ha fehokotaki ki he Siasí. Fetuʻutaki ki he kau taki fakalotofonua ʻo e Siasí hangē ko e pīsopé, palesiteni fakakoló, palesiteni ʻo e kōlomu ʻo e kaumātuʻá (maʻá e houʻeiki tangatá), pe palesiteni Fineʻofá (maʻá e houʻeiki fafiné). Vahevahe mo kinautolu hoʻo moʻuí, kau ai hoʻo uluí mo hoʻo ngaahi ʻamanaki ki he kahaʻú. ʻE lava ke tokoniʻi koe ʻe he kau taki ko ʻení ke ke maʻu ha maʻuʻanga moʻui mo kau ki he ngaahi meʻa ʻi he Siasí.

• Hokohoko atu hoʻo talangofua ki he ngaahi fatongia fakalaó, ngaahi fakangatangatá, mo e ngaahi nunuʻá. ʻOua naʻá ke kau ʻi ha faʻahinga ngāue te ne lava ʻo maumauʻi ʻa e ngaahi tuʻutuʻuni ki hono tukuange koé, maluʻi ki tuʻá, maluʻi angaleleí pe iku ki ha toe ngāue pōpula. Fetuʻutaki maʻu pē mo e kau maʻu mafai tokangaʻí fekauʻaki mo hoʻo fakalakalaká, ngaahi fiemaʻú, mo e ngaahi fakaʻamú.

• Fakaʻehiʻehi mei he ngaahi kaungāmeʻa, feituʻu, pe tōʻonga moʻui ʻe lava ke iku ki ha ngāue pōpulá. Kumi ha ngaahi kaungāmeʻa te nau poupouʻi koe ʻi hoʻo feinga ke fai ha ngaahi liliu lelei ʻi hoʻo moʻuí. Kumi ha ngāue maʻuʻanga moʻui mo ha fale nofoʻanga ʻi ha konga ho koló te ke lava ai ʻo muimui ki hoʻo ngaahi taumuʻa ke fakalakalaká pea fenāpasi mo hoʻo ngaahi fiemaʻu fakalaó. Fakaʻaongaʻi ʻa e taimi ko ʻeni ʻo hoʻo moʻuí ke palaniʻi ho kahaʻú. Kumi faleʻi mei hoʻo kau taki ʻi he Siasí fekauʻaki mo e ngaahi feituʻu ʻoku ala nofoʻí mo e ngaahi ʻātakai fakasōsiale ʻoku malú.

Manatuʻi—ʻoku ʻofa ʻa e ʻOtuá ʻiate koe, pea te Ne ueʻi fakalaumālie koe, foaki atu ha mālohi ke ngāue, mo tataki koe kiate kinautolu ʻe lava ke tokoní (vakai, 1 Nīfai 17:3).