Teuteu Fakafaifekaú Ko e Fakaangaanga ki he Moʻui Fakafaifekaú
Ko e konga ko ʻení ko ha fakanounou ia ʻo e fakamatala naʻá ke maʻu he ʻinitanetí kimuʻa peá ke hū ki he MTC.
ʻOku angamaheni ʻaki ʻi he kau faifekau foʻoú ke nau maʻu ha faʻahinga tuʻunga loto mafasia pe taʻe-fakafiemālie ʻi he taimi ʻoku nau mavahe ai mei he fāmilí, ngaahi kaungāmeʻá, mo e ngaahi meʻa naʻa nau anga ʻi hono faí. Ko e ngaahi fehikitaki angamahení, ngaahi hoa foʻoú, mo e ngāue foʻou ʻoku vahé ʻe toe fie maʻu ai ke fai ha fakaangaanga. Kātaki ʻi hoʻo feinga ke fakatokangaʻi e ngaahi tāpuaki ʻo e līʻoa kakato ange hoʻo moʻuí ki he Fakamoʻuí. Manatuʻi, ʻe ʻiate koe ʻa e Laumālié ʻi hoʻo fai ʻa e liliu ko ʻení mo tokoni ʻi he fakaangaanga ki ho ngaahi fatongia fakafaifekau foʻoú.
Ko e Fakaangaanga ki he Ngaahi Aʻusia Foʻoú
ʻOku faʻa foua ʻe he kau faifekaú ha tuʻunga pe tūkunga ʻe fā, ʻi heʻenau liliu fakaelotó ʻi he taimi ʻoku nau hū ai ki he MTC pea mo e taimi ʻoku nau hū ai ki he malaʻe ʻo e ngāue fakafaifekaú, ʻo tatau mo ha tokolahi ʻoku nau aʻusia ha tuʻunga foʻou:
Tuʻunga ʻe Fā ʻo e Fakaangaangá
|
1 Ko e ʻAmanakí |
2 Ko e ʻilo ʻo e Taʻe-ʻamanekiná |
3 “Te u Lava ʻo Fai ʻEni” |
4 Moʻui Fakafalala Fakaeloto pē Kiate Koe |
|---|---|---|---|
|
Mahalo te ke ongoʻi vēkeveke ʻi he tukupaá (vakai, 1 Nīfai 3:7). Mahalo te ke ongoʻi lahi ange e taumuʻá mo tukupā ki he Tamai Hēvaní (vakai, 3 Nīfai 5:13). Mahalo te ke ongoʻi fiefia mo ʻamanaki atu ke fetaulaki mo ha kakai foʻou mo aʻusia ha ngaahi feituʻu foʻou. |
Mahalo te ke kamata manatu ki ʻapi, fāmilí, mo e ngaahi kaungāmeʻá pea aʻu ʻo ke kamata fehuʻia hoʻo fili ke ngāué (vakai, ʻAlamā 26:27). Te ke ala fakatokangaʻi ha ngaahi fōtunga ʻo e mafasia fakaesinó, hangē ko e ʻikai mohe maʻú, mole ʻo e uʻá, pe ʻitangofuá. Te ke toki ala fakatokangaʻi hake ʻokú ke fakaanga mo ʻikai fakamaʻumaʻu ʻi he ngaahi tuʻutuʻuní mo e ngaahi meʻa ʻoku fie maʻú. |
ʻOku kamata ke tupulaki hoʻo poto fakafaiakó mo e lea fakafonuá. ʻOkú ke ako ke talangofua fiemālie ki he ngaahi tuʻutuʻuni mo e ngaahi fie maʻu ʻo e misioná. Te ke fakafōtunga ha faʻa kātaki ʻi hoʻo ako ʻa e “fekau ki he fekau” (vakai, ʻĪsaia 28:10; Mōsaia 4:27). ʻE kamata mōlia atu e ngaahi fakaʻilonga hoʻo lotomafasia fakaetuʻasinó, kapau naʻe ʻi ai. |
Te ke ongoʻi nonga ʻi hoʻo fakahoko e ngaahi ngāue fakaʻahó. Te ke fakatokangaʻi ho ngaahi mālohinga fakatāutahá mo e fakalakalaká. ʻE mahino kiate koe ʻa e ʻuhinga ʻo e fai e meʻa ʻe taha ʻi he taimi ʻe taha ʻi he moʻuí (vakai, T&F 98:12). Te ke fakatupulaki ha loto lahi mo ha holi lahi ange ke ngāue. |
Ngaahi Meʻa Te ke Lava ʻo Fai he Taimi Ní
-
Kumi ha ngaahi founga ke ke tokoniʻi ai ha niʻihi kehe. Ko e ngāue fakafaifekaú ko ha ui ia ke ngāue. ʻOua te ke nofotaha ki hoʻo ngaahi ongoʻi taʻe-fiemālié kae tokoni kiate kinautolu ʻoku nau fie maʻu ha lea ʻofa, ha tōʻonga ʻofa, pe anga fakakaumeʻá. (Vakai, Malangaʻaki ʻEku Ongoongoleleí, 202–03.)
-
Talanoa mo ha niʻihi fekauʻaki mo e liliu ko ʻení. Fakaʻataʻatā ha taimi ke aleaʻi ai ʻa e ngaahi fehuʻi ko ʻení mo e mātuʻá, kau taki lakanga fakataulaʻeikí, pe ngaahi kaungāmeʻa ʻosi ngāue fakafaifekaú:
-
Ko e hā e meʻa te tau lava ʻo ako mei he ngaahi sīpinga fakafolofola ʻo e fie maʻu ʻe he ʻOtuá ke fai ʻe he kakaí ʻo mahulu atu mei he meʻa ʻoku nau pehē ʻoku nau malavá? (Vakai, ʻEkesōtosi 4:10–12; Selemaia 1:6–9; ʻAlamā 17:10–12; 26:27; ʻEta 12:23–27; Mōsese 6:31–32.)
-
Ko e hā ʻoku mahuʻinga ai ke mohe pea mo ʻā taimi totonú, maʻu e meʻatokoni fakatupu moʻui leleí, fakamālohisino maʻu pē, pea mo lotu fakatāutahá?
-
ʻE tokoni fēfē ʻa e tohi ʻi ha tohinoá kiate kitautolu he lolotonga ʻo e ngaahi aʻusia faingataʻá?
-
Ko e hā te tau fai ʻi he taimi ʻoku palopalema ai ʻa e ngaahi fakakaukaú pe ʻikai mahuʻi atu e ngaahi ongó?
-
-
Lau ʻa e fakamatala “Ko e Teuteu Fakaeloto ki he Ngāue Fakafaifekaú” fai ʻe Robert K. Wagstaff (ʻi he Ensign, Mar. 2011, 22–26; ʻoku maʻu he ʻInitanetí ʻi he LDS.org).
-
Nofotaha ʻi he fakamālohia ho vā fetuʻutaki mo hoʻo Tamai Hēvaní. Fekumi ki Hono Laumālié ʻi he lotu fakatāutahá, ako folofolá, ngaahi fasi langaki moʻuí, lau ho tāpuaki fakapēteliaké, mo ha ngaahi founga kehe kuó ke maʻu ʻoku ʻaonga.
-
Angaʻofa kiate koe pea ki he niʻihi kehé. Fai kiate koe ʻa e ngaahi lea fakafiemālie mo angaʻofa te ke fakakaukau ʻoku fakaʻaongaʻi ʻe he Fakamoʻuí. Manatuʻi, ʻoku ʻikai mei he ʻEikí ʻa e ngaahi fakakaukau tuenoá, siva ʻo e ʻamanakí, pe fakamalaʻiaʻi fefeká.
-
ʻOua ʻe mūnoa. He ʻikai tatau hoʻo aʻusia ʻi hoʻo hoko ko e faifekaú mo ha taha kehe. He ʻikai hoko ʻa e meʻa kotoa pē ʻo hangē ko ia ne palaní pe ko ia naʻá ke pehē ʻe hokó. ʻE tokoni haʻo vakavakaiʻi e ngaahi meʻa naʻá ke ʻamanaki ki aí ke ke loto tauʻatāina mo talingofua e liliú.
Fakamatala fakanounou
ʻI hoʻo ngāue fakafaifekaú, mateuteu ke tali e liliú. ʻOku ngalingali ko e moʻui ʻi hoʻo hoko ko e faifekaú ʻe kehe ia mei ha toe meʻa kuó ke aʻusia, ka, kapau te ke haʻu mo ha loto hangamālie, ʻo tui ki he ʻEikí, mo sioloto ki he fie maʻu ke ke faʻa kātaki mo kātakiʻi ʻa e niʻihi kehé, ʻe fakapaleʻi mo tāpuakiʻi koe ʻe he ʻEikí. Manatuʻi e faleʻi naʻe fai ki he Palōfita ko Siosefa Sāmitá ʻi ha taimi mātuʻaki faingataʻa ʻi heʻene moʻuí: “Ke ke ʻiloʻi, ʻe hoku foha, ʻe foaki ʻe he ngaahi meʻá ni kotoa pē ʻa e poto kiate koe, pea ʻe hoko ia ʻo ʻaonga kiate koe” (T&F 122:7).