Ngaahi Maʻuʻanga Tokoni ki hono Mapuleʻi e Ngaahi Fie maʻu Fakaʻatamaí

ʻOku kehe e tokoniʻi kitautolu ʻe he ngaahi fie maʻu fakaʻatamaí. ʻE feʻunga pē ivi ʻoku tau maʻu ke fakahoko e ngāue ʻa e ʻOtuá kapau te tau falala kiate Ia ke ne fakaʻosi e toenga hotau potó mo e meʻa ʻoku fie maʻú. ʻE ala tokoni atu e ngaahi fokotuʻu ʻi laló ʻi ha ngaahi palopalema ʻe niʻihi. Toe vakai foki ki he konga ʻo e “Ngaahi Tefitoʻi Moʻoni Fakalūkufua ki hono Mapuleʻi e Loto Mafasiá” ʻi he peesi 17–22 ke maʻu ha ngaahi fakakaukau lahi ange.

Ko e Ako ʻo e Lea Fakafonuá

Ako ʻa e vahe 7 ʻo e Malangaʻaki ʻEku Ongoongoleleí. Fakaʻaongaʻi ʻi he faʻa lotu ʻa e vahé ni, “ʻE Anga Fēfē Haʻaku Ako Lelei Ange e Lea Fakafonua ʻEku Misioná?”
Ngāue mālohi maʻu pē. Falala ki he ʻEikí ke ne tāpuakiʻi koe ʻaki e meʻafoaki ʻo e lea he ngaahi lea kehekehé he ʻokú ke fie maʻu ia ke fakahoko e meʻa ʻOkú Ne fie maʻú. Manatuʻi, ʻoku tokosiʻi pē ha kau faifekau ʻoku nau lea lelei ʻaupito ʻi ha lea fakafonua foʻou. ʻOku ʻafioʻi koe ʻe he ʻEikí, uiuiʻi koe, pea te ne fakaʻaongaʻi ho ngaahi mālohingá ke tāpuakiʻi ha niʻihi kehe. Te ne fakakakato ho ngaahi vaivaí. Foaki e ngaahi meʻafoaki kotoa ʻokú ke maʻú.
Maʻu ha fiefia ʻi hoʻo lea fakafonua foʻoú. ʻOku faingofua ange he taimi ʻe niʻihi ke lea ʻaki ha lea fakafonua foʻou ʻi he taimi ʻoku ʻikai ke tau ʻamanaki ai ke tau hoko ko ha kau mataotaó.

Ko e Ngāueʻi Maau e Ngaahi Taumuʻá mo e Palaní

Fakaʻaongaʻi ʻa e meʻangāue ki he fakataimi-tēpile kuo ʻoatu ʻi he Malangaʻaki ʻEku Ongoongoleleí. Ako ʻa e vahe 8, “ʻE Founga Fēfē Haʻaku Fakaʻaongaʻi Fakapotopoto ʻa e Taimí?” Kuo fokotuʻutuʻu lelei ʻa e ngaahi meʻangāué ni maʻá e kau faifekaú pea ʻe tokoni atu ke ke lavaʻi hoʻo taumuʻá. Tokanga ki he meʻa pē ʻe taha ʻi ha taimi, pea ʻoua naʻa ʻai ke ke fuʻu mafaisa.
ʻOua te ke fakafalala ʻataʻatā pē ki hoʻo manatú. Hiki e ngaahi hingoá, tuʻasilá, ngaahi aleá, ngaahi palani ʻo e lēsoní, mo e ngaahi taumuʻá. Fokotuʻu ha fanga kiʻi tohi fakamanatu ʻo e ngaahi meʻa mahuʻingá ʻi he matapaá, ʻi he ʻaisí, ʻi ho veʻe mohengá, pe ʻi hoʻo tohi palaní.

Tuku e ngaahi meʻa kotoa pē te ke fie maʻu he ʻaho hono hokó ʻi ha feituʻu pau peá ke toki ʻalu ʻo mohe. He ʻikai ngalo heni ha faʻahinga meʻa mahuʻinga. Tuku ʻa e ngaahi meʻa mahuʻingá ʻi he feituʻu tatau ke ʻoua te ke toe mole taimi hono kumi kinautolú.
Ka tohoakiʻi hoʻo tokangá ʻe ha meʻa, toe fakafoki mai leva hoʻo tokangá ki hoʻo ngāué. Fakahoko ʻeni ki he tuʻo lahi taha te ke fie maʻú.
Tekaki ho ʻahó ki he ʻEikí. Hili hono fai e meʻa te ke malava ke palani leleí, kole kiate Ia ke fakahoko ʻa e meʻa kotoa pē ki hoʻo leleí. Anga fakafaingofua mo ongoʻingofua ʻa e Laumālié.

Ko e Ongoʻi ʻIkai Poto Tatau pe Ivi Tatau mo e Niʻihi Kehé

Kapau ʻoku faingataʻa kiate koe ʻa e lautohí, akó, pe ako maʻulotó, kātakiʻi pē. Toutou fai ha fanga kiʻi mālōlō nounou ʻi he kamataʻangá; pea hoko atu ʻo ako ʻo kiʻi lōloa ange. Hiki ha fakamatala ʻo e meʻa ʻokú ke laú ke tokoni ke ke manatuʻi. Lau leʻo lahi (leʻo siʻi) kapau ʻoku tokoni. Feinga ke ako maʻuloto ʻaki hano (1) toe lau leʻo lahi e ngaahi meʻá, (2) toutou lau pe toutou hiki ʻa e ngaahi meʻá, pe (3) ʻunu holo mo fakatātaaʻi ʻa e ngaahi meʻá he lolotonga hoʻo akó. Vakaiʻi pe ko e fē founga ʻoku ngāue lelei taha kiate koé. Fakaʻaongaʻi ha toe ngaahi mālohinga ʻokú ke maʻu, hangē ko e fetuʻutaki ki ha niʻihi ʻe ala hoko ko ha kau fiefanongo, kau fai fakahinohino, pe loto fiefia maʻu pē.
Pukepuke hoʻo poto he huá ʻi he taimi ʻokú ke fai ai ha fehalākí. Peá ke toe feinga pē.
Kumi ʻa e mālohingá ʻi ha vaivaiʻanga. Ko e taimi ʻe niʻihi ʻoku akoʻi mai ʻe he ʻi ai ʻo e vaivaí ha ngaahi mālohinga hangē ko e ʻofá, loto ʻofá, faʻa kātakí, loto fakatōkilaló, mo e falala ki he ʻEikí. Taimi ʻe niʻihi ʻoku ʻi ai ha mālohinga ʻo ha vaivai ʻanga (hangē ko e afeʻi ngofuá) ʻoku ʻalu fakataha mo ia (hangē ko e fakatokangaʻi e ngaahi meʻa ʻoku ʻikai fakatokangaʻi ʻe he niʻihi kehé). Fakatokangaʻi e ngaahi mālohinga ʻe ala maʻu mei ho ngaahi vaivaí.
Kapau ʻokú ke ongoʻi meheka ʻi ha taukei ʻo ha taha, fakafoki hoʻo tokangá ki ho misiona fakatāutahá. Tuku ho iví ki hono fakatupulaki ho ngaahi [mālohingá] pea foaki kinautolu ki he ngāué. Ko ho misioná ʻeni. (Vakai, Malangaʻaki ʻEku Ongoongoleleí, 11–12.)