Ngaahi Maʻuʻanga Tokoni ki hono Mapuleʻi e Ngaahi Fie maʻu Fakalaumālié

Ko ha meʻa angamaheni ʻoku fai ʻi he kau faifekaú, he taimi ʻoku tōtuʻa ai ʻa e loto mafasiá, ko e fehuʻia e mālohi ʻo ʻenau fakamoʻoní pe ko e moʻoni ʻo e ongoongoleleí. ʻOku faʻa tupu ʻa e fefaʻuhi ko ʻení mei he siʻi ʻo e ngaahi maʻuʻanga tokoni ke mapuleʻi ʻa e tōtuʻa ʻo e loto mafasiá kae ʻikai ko e hala ha fakamoʻoní. Kapau ʻokú ke maʻu ha ngaahi faingataʻaʻia pehē, ʻahiʻahi fai e ngaahi fokotuʻu ʻi lalo ʻe ngali feʻunga kiate koé. Toe vakai foki ki he konga ʻo e “Ngaahi Tefitoʻi Moʻoni Fakalūkufua ki hono Mapuleʻi e Loto Mafasiá” ʻi he peesi 17–22 ke maʻu ha ngaahi fakakaukau lahi ange.

A

Ko e Ako ke Fakamālohia ʻEku Fakamoʻoní

• Fakatokangaʻi ʻoku lelei ke fehuʻi. Naʻe maʻu ʻe Siosefa Sāmita ha ngaahi fakahā lahi ko ha tali ʻo ʻene ngaahi fehuʻi fakamātoató. ʻE lava ʻa e ngaahi folofolá, kau faiakó, mo e ʻuhingá ke tokoni ʻi ha ngaahi fehuʻi ʻe niʻihi, ka ko e Laumālié pē taha te ne lava ʻo fakamoʻoniʻi ʻoku moʻui ʻa e ʻOtuá, ko Sīsū ʻa e Kalaisí, pea ʻoku moʻoni ʻa e Siasí.

• ʻIloʻi pe ko e hā ʻa e tui. Ke maʻu ʻa e tuí, kuo pau ke ke falala ki he lelei, ʻofa, poto, mo e angatonu haohaoa ʻa e ʻEikí, neongo ʻoku ʻikai makupusi ʻe heʻetau fakakaukaú. ʻOku akoʻi ʻe ʻAlamā “ʻoku ʻikai ko e tuí ʻa e maʻu ha ʻilo haohaoa ki he ngaahi meʻá; ko ia, kapau ʻoku mou maʻu ʻa e tuí, ʻoku mou ʻamanaki lelei ki he ngaahi meʻa ʻoku ʻikai ke mamata ki ai, ʻa ia ʻoku moʻoni” (ʻAlamā 32:21). ʻOku ʻikai ke ke fie maʻu ʻa e “ʻilo haohaoá” ke toki maʻu e tuí. Ako ʻa e ʻAlamā 32 ke maʻu ha tokoni ʻi hono langaki hake hoʻo tuí. (Vakai, Malangaʻaki ʻEku Ongoongoleleí, 140.)

• Faʻa-kātaki. ʻE tokoni e taimí mo e aʻusiá ke ʻuhingamālie kiate koe ha niʻihi ʻo e ngaahi meʻa ʻoku ʻikai mahino he taimi ní. Manatuʻi e fakamatala ʻa Nīfaí: “ʻOku ou ʻilo ʻoku ʻofa [ʻa e ʻOtuá] ki heʻene fānaú; ka neongo ia, ʻoku ʻikai te u ʻiloʻi hono ʻuhinga ʻo e meʻa kotoa pē” (1 Nīfai 11:17). Tānaki atu ki he meʻa ʻokú ke ʻilo ʻi he Laumālié ʻoku moʻoní kau ki he ʻOtuá. (Vakai, Malangaʻaki ʻEku Ongoongoleleí, 143.)

• Tauhi ʻa e ngaahi fekaú. ʻOku tau maʻu ha falala ki he ʻEikí ʻi heʻetau ako ʻi he aʻusia tonu e mahuʻinga ʻo ʻEne ngaahi akonakí. “Pea ko ia ia ʻe fai ki hono finangaló, te ne ʻilo ʻa e akonakí, pe ʻoku ʻi he ʻOtuá ia, pe ko ʻeku lea ʻiate au pē” (Sione 7:17).

“Fekumi faivelenga, lotu maʻu ai pē, pea loto-tui, pea ʻe fengāueʻaki fakataha ʻa e ngaahi meʻa kotoa pē koeʻuhi ko hoʻomou leleí, ʻo kapau te mou ʻaʻeva angatonu pea manatuʻi ʻa e fuakava kuo mou fefuakavaʻaki aí.”

—Tokāteline mo e Ngaahi Fuakava 90:24

E

Ko e Ako ke Fakatomalá

• Lea totonu ki hoʻo palesiteni fakamisioná. Kapau ʻoku fie maʻu ke ke fakatomala mei ha ngaahi angahala mamafa kuo teʻeki ke ke ngāueʻi, talanoa tauʻatāina mo moʻoni mo hoʻo palesiteni fakamisioná. ʻE tokoni atu ke fakatonutonu ʻa e ngaahi meʻa ko ʻení.

• Fakamolemoleʻi koe ʻi he hili e fakatomalá. Kapau naʻá ke ʻosi fakatomala kae kei ongoʻi halaia mo mā, manatuʻi ʻoku tau fakameʻapangoʻia kotoa ʻi he ngaahi angahala mo e fehalaaki ʻo e kuo hilí. Falala ʻoku feʻunga pē e Fakalelei ʻa Kalaisí, ʻo aʻu kiate koe. Manatuʻi ko e fakatomalá ʻoku ʻikai ko ha palani talifaki pē. Ko e fakatomalá ko e palani ia ʻo e fiefiá ki he taha kotoa. Fakapapauʻi ko e ngaahi meʻa ʻokú ke hohaʻa taha ki aí ko e ngaahi meʻa ia ʻoku mātuʻaki mahuʻinga (hangē ko ʻení, ko e fakalakalaka hoʻo kau fiefanongó), ka ʻoku ʻikai ko ha ngaahi meʻa pē fekauʻaki mo e ngeia fakatāutahá (hangē ko e fakakaukau ʻa e niʻihi kehé kiate koé).

  

• ʻIloʻi e fatongia ʻo e vetehiá. Kapau ʻokú ke ongoʻi ʻoku fie maʻu ke ke vete ha ngaahi angahala ʻoku ʻikai fuʻu mamafa pe toutou vetehia, tatau ai pē kapau kuo ʻosi fakapapauʻi atu ʻe he kau taki lakanga fakataulaʻeikí kuo feʻunga hoʻo vetehiá, mahalo ʻokú ke fakaʻuhingaʻi hala ʻa e vetehiá. ʻOku angamaheni pē ʻa e kei ongoʻi halaia mo mamahi fekauʻaki mo e ngaahi angahala he kuo hilí ka ʻoku ʻikai ʻuhinga ia ʻoku fie maʻu ke ke toe vetehia. Afeʻi koe mei he faʻahinga fakakaukau mo e ngaahi ʻekitivitī peheé, ka ke fili he taimi pē ko iá ke tui ki he fakamolemole ʻa e ʻEikí. Tukunoaʻi ʻa e ʻahiʻahi ke loto hohaʻa pe maá.

• Talanoa mo hoʻo palesiteni fakamisioná kapau ʻokú ke kei faingataʻaʻia.

F

Ko e Ako ke Mahuʻingamālie e Lotú

• Feinga ke lotu leʻo lahi, tatau ai pē kapau ʻoku fai ia ʻi he fanafana. Feinga ke teuteu ki he lotú ʻaki haʻo hiki hoʻo ngaahi fehuʻí pe ngaahi meʻa ʻokú ke tokanga ki aí. Sioloto ʻoku ofi ʻa e ʻEikí. Fehuʻi ki he ʻOtuá pe ko e hā te ke lava ʻo fai Maʻana he ʻaho ní; hili ia pea ngāueʻi e ngaahi fakakaukau ʻoku haʻu ki ho ʻatamaí. Fakaʻaongaʻi hoʻo lotú he taimi ʻe niʻihi ke fakamālō ʻataʻatā pē ki he ʻOtuá ʻi he ngaahi meʻa lelei lahi kuó Ne tāpuakiʻi ʻaki koé.

• Ako ʻa e “Lotu ʻi he Tui” ʻi he Malangaʻaki ʻEku Ongoongoleleí. ʻOku ʻomi ʻe he konga ko ʻení, ʻoku maʻu he peesi 108–10, ha ngaahi fokotuʻu fekauʻaki mo e lotú.

H

Ko e Ako ke Saiʻia ʻi he Folofolá

• Lotua tāfataha pē ha tokoni ke mahino mo ke saiʻia ʻi he folofolá. Ngāue ʻaki ha niʻihi ʻo ho taimi akó ke hiki hoʻo ngaahi ongó mo e tōʻongá, meʻa ʻokú ke akó, pe ngaahi ongo fakalaumālie ʻokú ke maʻú.

• Toe fakamanatu ʻa e “Ngaahi Fakakaukau mo e Ngaahi Fokotuʻu ki he Akó” ʻi he Malangaʻaki ʻEku Ongoongoleleí. ʻOku ʻomi ʻe he konga ko ʻení, ʻa ia ʻoku maʻu he peesi 22–25, ha ngaahi fokotuʻu ki ha ako folofola ola lelei ange.

[Nonga, ʻe hoku loto: ʻOku ngāue ʻa e ʻOtuá]

[Ke taki ʻa e kahaʻú hangē ko e kuo hilí].

[ʻOua naʻa uesia hoʻo ʻamanakí, falalá, ʻe ha meʻa];

[ʻE māmangia ʻa e meʻalilo kotoa he taimí ni].

[Nonga ʻe hoku loto: ʻOku ʻilo ʻe he peaú mo e matangí]

[ʻOku puleʻi ʻe Hono leʻó lolotonga ʻEne ʻi māmaní].

—Hymns, no. 124

I

Ko e Ako ke Falala ki he Laumālié

• Akoako fakahoko ʻi he faʻa kātaki. ʻOku meimei tatau ʻa e ako ke fakatokangaʻi ʻa e leʻo ʻo e Laumālié mo e ako ʻo ha lea fakafonua—ʻoku fie maʻu ke akoako fakahoko, faʻa kātaki, loto fakatōkilalo, mo loto fiemālie ke ako mei he ngaahi fehalākí ʻo ʻikai foʻi.

• Ako mei he ngaahi konifelenisi lahí. Ke maʻu ha ngaahi fakakaukau ki he founga hono tanumaki e fakahā fakatāutahá, ako e ngaahi lea he konifelenisi lahí ʻi he tefito ko ʻení.

• Ako ʻa e Malangaʻaki ʻEku Ongoongoleleí. Peesi 110–15, ʻoku ʻi ai ha ngaahi fokotuʻu lahi ange ki hono fakatokangaʻi mo falala ki he Laumālié.

Ngaahi Maʻuʻanga Tokoni Fakafolofolá

Ako ʻa e ngaahi fakamatala ʻi he ʻū peesi hoko maí ke fakamālohia hoʻo tui ʻe foaki atu ʻe he ʻOtuá ʻi he fiemālie mo e tokoni. ʻI hoʻo manatuʻi ʻa e Fakamoʻuí, ʻe lava ke “ʻiate [koe] ʻa hono Laumālié” (T&F 20:79).

ʻĪsaia 41:10	“ʻOua naʻá ke manavahē; he ʻoku ou ʻiate koe: ʻoua ʻe loto vaivai; he ko au ko ho ʻOtuá, te u fakamālohi koe; ʻio, te u poupou hake koe ʻaki ʻa e nima toʻomataʻu ʻo ʻeku angatonú.”
Sione 14:27	“ʻOku ou tuku ʻa e melinó kiate kimoutolu, ko ʻeku melinó ʻoku ou foaki kiate kimoutolu: ʻoku ʻikai hangē ko e foaki ʻa māmaní, ʻa ʻeku foaki kiate kimoutolú. ʻOua naʻa mamahi homou lotó, pea ʻoua naʻa manavahē ia.”
2 Tīmote 1:7	“He naʻe ʻikai foaki ʻe he ʻOtuá kiate kitautolu ʻa e laumālie ʻo e manavasiʻí; ka ko e mālohi, mo e ʻofa, mo e loto fakapotopoto.”
1 Nīfai 1:20	“ʻOku ʻi he kakai kotoa pē kuo fili ʻe he ʻEikí ʻa ʻene ngaahi ʻaloʻofa ongongofuá, koeʻuhí ko ʻenau tuí, ke fakaiviʻi ʻa kinautolu ʻo aʻu ki heʻenau maʻu ʻa e mālohi ʻo e fakahaofí.”
Sēkope 3:1	“Te ne fakafiemālieʻi ʻa kimoutolu ʻi homou ngaahi faingataʻaʻiá, pea te ne taukapoʻi ʻa kimoutolu.”
Sēkope 4:7	“Ka neongo ia, ʻoku fakahā kiate kimautolu ʻe he ʻEiki ko e ʻOtuá ʻa homau vaivaí koeʻuhí ke mau ʻiloʻi ko e meʻa ia ʻi heʻene ʻaloʻofá mo ʻene afeitaulalo lahi ki he fānau ʻa e tangatá, ʻoku mau maʻu ai ʻa e mālohi ke fai ʻa e ngaahi meʻa ko ʻení.”
Mōsaia 4:27	“Pea tokanga ke fai ʻa e ngaahi meʻá ni kotoa pē ʻi he fakapotopoto mo e maau; he ʻoku ʻikai fie maʻu ke lele ʻa e tangatá ʻo vave ange ʻi he mālohi ʻokú ne maʻú.”
Mōsaia 24:13–14	“Hanga hake homou ʻulú pea fiemālie he ʻoku ou ʻiloʻi ʻa e fuakava kuo mou fai kiate aú; pea te u fuakava mo hoku kakaí pea fakahaofi ʻa kinautolu mei he nofo pōpulá. Pea te u fakamaʻamaʻa foki ʻa e ngaahi kavenga kuo hilifaki ki homou ngaahi umá, ke ʻoua naʻa mou ongoʻi ia ʻi homou tuʻá, lolotonga hoʻomou ʻi he nofo pōpulá; pea te u fai ʻeni koeʻuhi ke mou tuʻu ko e kau fakamoʻoni kiate au ʻamui, pea ke mou ʻiloʻi fakapapau ko au ko e ʻEiki ko e ʻOtuá, ʻoku ou tāpuakiʻi hoku kakaí ʻi honau ngaahi faingataʻaʻiá.”
ʻAlamā 7:12	“Pea te ne toʻo kiate ia honau ngaahi vaivaí, koeʻuhí ke fonu hono lotó ʻi he ʻaloʻofa, ʻo fakatatau ki he kakanó, koeʻuhí ke ne ʻafioʻi ʻo fakatatau ki he kakanó ʻa e founga ke tokoniʻi ai ʻa hono kakaí ʻo fakatatau ki honau ngaahi vaivaí.”
ʻAlamā 26:27	“Ko ia ʻi he mafasia ʻa hotau lotó, ʻo tau meimei fokí, vakai naʻe fakafiemālieʻi ʻa kitautolu ʻe he ʻEikí, ʻo ne folofola mai: … kātakiʻi ʻi he faʻa kātaki ʻa hoʻomou ngaahi mamahí, pea te u tuku ke mou lavaʻi ʻa e ngāué.”
ʻAlamā 38:5	“ʻE fakatatau ki hoʻo falala ki he ʻOtuá ʻa hono fakahaofi koe mei ho ngaahi ʻahiʻahiʻí, mo ho ngaahi faingataʻaʻiá, pea mo ho ngaahi fakamamahiʻí.”
ʻEta 12:27	“Pea kapau ʻe haʻu kiate au ʻa e tangatá te u fakahā kiate kinautolu ʻa honau vaivaí. ʻOku ou foaki ki he tangatá ʻa e vaivaí koeʻuhi ke nau loto-fakatōkilalo; pea ʻoku feʻunga ʻa ʻeku ʻofá ki he tangata kotoa pē ʻoku nau fakavaivaiʻi ʻa kinautolu ʻi hoku ʻaó, he kapau te nau fakavaivaiʻi ʻa kinautolu ʻi hoku ʻao, pea tui kiate au, te u liliu ʻa e ngaahi meʻa vaivaí ko e mālohi kiate kinautolu.”
Tokāteline mo e Ngaahi Fuakava 6:32–36	“ʻOku pehē pē ʻeku ʻi homou lotolotongá. … Ko ia, ʻoua ʻe manavahē, ʻe tākanga tokosiʻi; fai lelei; tuku ke kau fakataha ʻa māmani mo heli ke tauʻi ʻa kimoua, he kapau kuo langa ʻa kimoua ki heʻeku maká, ʻe ʻikai te nau lava ʻo ikuna. Vakai, ʻoku ʻikai te u fakahalaiaʻi ʻa kimoua. … Sio pē kiate au ʻi he fakakaukau kotoa pē; ʻoua ʻe tālaʻa, ʻoua ʻe manavahē.”
Tokāteline mo e Ngaahi Fuakava 58:2–4	“[Ko ia ia] ʻokú ne faivelenga ʻi he faingataʻá, ʻoku lahi ange ʻa ʻene totongí ʻi he puleʻanga ʻo e langí. “ʻOku ʻikai te mou lava ʻo mamata ʻaki homou mata fakanatulá, ʻi he taimí ni, ki he finangalo ʻo homou ʻOtuá ʻo kau ki he ngaahi meʻa ko ia ʻe hoko mai ʻamuí, pea mo e nāunau ʻe hoko mai hili ʻa e faingataʻa lahí. He ʻe hoko mai ʻa e ngaahi tāpuakí hili ʻa e ngaahi faingataʻa lahi.”
Tokāteline mo e Ngaahi Fuakava 122:7–9	“ʻE foaki ʻe he ngaahi meʻá ni kotoa pē ʻa e poto kiate koe, pea ʻe hoko ia ʻo ʻaonga kiate koe. Naʻe ʻalu hifo ʻa e Foha ʻo e Tangatá ʻo māʻulalo ange ʻiate kinautolu kotoa pē. … Ko ia, nofo maʻu ʻi ho halá.”
Ko e Fakahinohino ki he Ngaahi Folofolá, “Manavahē”	“Ko e ʻuluaki nunuʻa ʻo e angahala ʻa ʻĀtamá ko ʻene manavahē (Sēnesi 3:10). … Talu mei he Hingá, mo hono akoʻi ʻe he ʻOtuá ʻa e tangatá ke ʻoua ʻe manavahē, kae kole ʻi he loto mamahi ha fakamolemole ʻi he falala kakato te ne maʻu ia.”
Ngaahi maʻuʻanga tokoni fakafolofola kehe: