Punaoa mo le Puleaina o Manaoga Faalelagona
O lagona malolosi e pei o le faanoanoa po o le popolevale e fesoasoani ia i tatou e iloa ai ua tatou soona atuatuvale lava. Faitau le “Mataupu Faavae Lautele mo le Puleaina o le Atuatuvale” i le itulau 17–22 mo ni fautuaga atoa. E faaopoopo atu, o fautuaga o i lalo e mafai ona fesoasoani i lagona patino.
A
Lagonaina o le Ma’i Manatu
-
Ia faapisi oe. E taatele le ma’i manatu, aemaise pe afai e te lei alu ese soo ma le aiga. Ia tuu oe lava ia faanoanoa mo ni nai minute, ona e tu lea i luga ma faapisi oe. O le ala sili lava e faafetaiaia ai o le aveese o oe lava ia mai le popole po o le le fiafia e ala i le faapisiina o oe ma le auauna atu i isi.
-
Lau ese mea mai lau ato ma faamautu loa. Aua e te faaaogaina mea mai lau atopau. Faatulaga lou avanoa patino. Tuu i luga se ata e fesoasoani ia te oe ia lagonaina le Agaga ma manatua ai pe aisea ua e manao ai e auauna i le Alii. Faamama ese lapisi tuai, ma fai lou fale mautotogi o “lau oe lava ia fale.” Fai meaai e te fiafia ai.
-
Fai se lisi umi o mea e le o suia e uiga ia te oe. Mafaufau i au sootaga, ou malosiaga, ma isi mea o loo tumau pea, e ui lava ua suia le tele o mea. Faataitaiga: “E i ai sou agamalie: e alolofa ou matua ia te au; ou te fia auauna atu.” Faaopoopo i ai mea e ao lava ona e faia pea pe ana faapea o loo e i ai i le fale: “E ao ona ou faia pea ni faaiuga; e ao ona ou fegalegaleai pea ma isi; e ao ona ou galue malosi pea.”
-
Iloilo au mafuaaga mo lou sau ai i se misiona. Ia manatunatu lelei e ofo atu lau misiona o se meaalofa o le faafetai i le Faaola, ma lisi ou faamanuiaga. Faamanatu ia te oe lava po o a mea o le a tau atu ia te oe e taitai lagolagosua po o e pele o i le fale e uiga i lau auaunaga.
-
Talosaga mo se faamanuiaga faaleperisitua.
-
Aveese ia ata na ua fai ma faalavelave. Tuu ese soo se ata ua faalavelave ia te oe mai le lagonaina o le Agaga pe o loo mafua ai le ma’i manatu. E mafai ona e filifili e toe aumai nisi o na ata i le taimi ua e masani atili ai [i le galuega]. Uunaia lou aiga e tusitusi atu e na o le faatasi i le vaiaso ina ia e mafai ai, e pei o soo anamua o Iesu, ona lafoai ese lau “neti” (tagai Mataio 4:18–22) ma taulai atu i le galuega.
-
Ia onosai. E masani lava ona alu ai pe a ma le ono vaiaso e amata ai ona tau faamasani i se siosiomaga fou. Faataatia ese soo se faaiuga, ae tuu atu ia te oe se taimi e faamasani ai. Ia faasolosolo lelei i le tasi le aso i le taimi. (Tagai Talai La’u Talalelei, 129.)
E
Lagonaina o le Faanoanoa ma le Lotovaivai
-
Iloilo ia mau ma tala musuia. Ao mai ia mau, aafiaga patino, upusii, ma tala faaleaiga ia e uunaia ai ma musuia oe. A e faitauina nei tala, mafaufau i lou igoa i na tala. (Faataitaiga: 2 Nifae 4; Mosaea 24:13–14; Alema 36:3; MF&F 4; 6; 31; Faataoto 3:5–6; Helamana 5:12; ma le “Faigata” i le Faamaoni i le Faatuatua.)
-
Iloilo lou faamanuiaga faapeteriaka mo se taitaiga. Tagai mo ni auala e mafai ona saofaga ai au meaalofa ma malosiaga i le galuega.
-
Aua le faatuutuu. O le tolopo o mea e mafai ona oo atu ai i le faanoanoa. Talepe i lalo galuega tetele i ni nai galuega laiti. Ia amataina, i le faamanatu ia te oe lava ia, “E na o le pau le mea e ao ona ou faia i le taimi nei o le ______” po o le “O le a tau na ona ou faia le mea lenei mo ni nai minute ona malolo ai pe a ou manao i ai.”
-
Faalogologo i musika ua faamaonia pe usu se pese. Filifili musika e toafilemu ma mālū pe afai o loo e popole, po o musika e faavavevave ma faafiafiaina pe afai o e lagonaina le faanoanoa.
-
Aua nei faaputuputuina lou ita. Afai e te lagonaina le ita i se mea, fesili mo se fesoasoani i le foiaina o le faafitauli e aunoa ma le faitio pe tuuaia fua isi. Afai e te le fia talanoa i lena mea, ia aua la nei faatagaina oe lava e ita.
-
Seti ni sini e mafai ona ausia, ma faia ni fuafuaga patino mo le auala o le a ausia ai na mea. Foia mea o loo e tiga ai ia taitasi i le taimi. E tali lelei mai le faanoanoa i sini ma fuafuaga. (Tagai Talai La’u Talalelei, 158.)
-
Ia lafoai mea e le mafai ona e puleaina. O mea ua tuanai, o le faitalia o isi, o tulafono, o le tau, pulega o malo, o le aganuu, o mea e faatapulaa ai oe, po o uiga faaletagata o isi faifeautalai, o mea ia e le mafai ona e puleaina. Taulai atu i mea e mafai ona e faia i ai se mea, e pei o lau amio, o lau vaega i se mafutaga, o au filifiliga o loo i ai i le taimi nei, ma ou uiga.
-
Talia le moni o nisi o faiga masani e ‘iva pe le faafiafiaina. E le o mea uma o le olaga e matua anoa ma faafiafiaina. Aloese mai le faia o se mea e tosina atu i ai tagata, faalialiavale, po o se feteenaiga e taulima ai le le fiafia. Ae, ia talisapaia ma olioli i le lelei o siomia ai oe, ma tagai mo ni auala e faaleleia ai ma auauna atu ai.
-
Saili ni mea e fiafia i ai. A o faaaloalogia ai le malualii o lou valaauga, toe mauaina o le aga malie, faamemelo i le matagofie o le lalolagi, ia matau foi le agalelei o isi, ma fiafia i le mafutaga a le Agaga.
-
Ia fai mea faavae: tatalo, suesue i tusitusiga paia, ma auauna atu. Taulai atu i le loto faafetai. Pe a faitau i tusitusiga paia, ia taulai atu ma le faaeteete i vaega ia e sili ona faatatau ia te oe. Mo se faataitaiga, aua e te soona taulai atu i le toasa o le Atua i tagata agasala pe afai o loo e naunau ia avea o se tagata atoatoa. (Tagai Talai La’u Talalelei, viii.)
-
Faitau le Alema 26 ma iloa mea na faia e Amona ina ua ia lotovaivai. Ia faitau foi le Mataupu Faavae ma Feagaiga 127:2 ma matau le auala na taumamao ai Iosefa Samita mai le lotovaivai. Aua nei faanoanoa ona ua faanoanoa, ona e fatuina ai se tulaga e leai sona taunuuga lelei. O se mea masani lava le i ai o ni aso tatou te lagonaina ai le lotovaivai, atuatuvale, po o le ma’i manatu. O le tele lava o le taimi o le a mou atu ai.
I
Lagonaina o le Faitioina o Oe Lava Ia
-
Taulai atu i mea sa’o e te faia, ma aloese mai le faatusatusa o oe lava ia i isi. O tagata e i ai ni faamoemoega maualuluga tele e foliga mai e soona taulai atu i o latou vaivaiga ma toilalo. Nai lo le faaleleia la, latou te ono lagonaina le leai o se faamoemoe. A faitauina tusitusiga paia, ia taulai atu i vaega e sili ona faatatau ia te oe o se auauna pele a le Atua. Tagai mo ni faamaoniga o le onosai, alofa tunoa, faamoemoe, ma le alofa mutimutivale o le Atua ia i latou o e e alolofa ma mananao e auauna atu ia te Ia. (Tagai Talai La’u Talalelei, 10–11.)
-
Talanoa i tulaga lelei ia te oe lava ia. Tagai “Talanoa Atu i Mafaufauga Le Lelei” i le itulau 21.
-
Ia iloa o mea uma e te faia e le mafai ona i luga atu ma mea e masani ai. E te fia manao pea e galue malosi ina ia faaleleia, ae po o le a lava lou lelei i se mea ua e oo i ai, o le a e faatinoa lava se mea i lalo ifo ma le mea patino e te masani ai i nisi o taimi. E le o se mafuaaga lea e popole ai.
-
Tago e tuu ia te oe nisi togi faaopoopo mo le faia o se mea e te le fiafia i ai pe e le lelei ona e faia. Aua e te fai ia te oe lava ia e faato’a taulia lava pe afai ua e fiafia i ai pe sa atoatoa foi ona e faia.
-
Galue i ni sini tetele se tasi pe lua foi i le taimi e tasi. Aloese mai faiga masani o le taumafai e faaleleia le tele naua o mea i le taimi e tasi; e ono lofituina lenei mea ma ono oo ai i le toilalo.
-
Faalogo atu i le Agaga, ae le o mea le lelei. Afai e te maua i mafaufauga faatauemu, faifai, ita, faalumaluma, muimui, faitio, po o le valaau i ni igoa le lelei, e le mai le Alii na mafaufauga. Ia taofi.
-
Saili atu i fautuaga lelei. Talosaga atu i lou peresitene o le misiona ma isi e fesoasoani atu ia te oe ia iloa pe o loo e taumafai malosi pe ua soona taumafai foi, ma talia a latou fautuaga. E toatele tagata e faitio ia i latou lava e le lelei tele i le iloaina o lenei eseesega.
O
Lagonaina o le Popole po o le Le Atoatoa
-
Ia olioli i le avea ai ma se tagata faato’a amata i le taimi e te fou ai i se mea. E le o faamoemoeina oe ia avea ma se tagata tomai silisili. Ua lava lava le fiailoa, gauai, lotomaualalo, ma le naunautai e taumafai. Ia olioli ai!
-
Ia fai ma le fiafia mea e te mafaia, ma tuu atu i le Atua e faaatoa le eseesega. O nisi taimi e lagona ai e faifeautalai le le aoga po o le maasiasi pe a foliga mai ua faamanuiaina tele isi. A faaosooso oe e Satani ia e masalosalo ia te oe lava pe faatusatusa oe lava ia i isi, ia manatua o le galuega lenei a le Atua, ma Na te filifilia ē vaivai ma faatauvaa e faataunuuina. Ua Ia filifilia oe! Faalagolago ia te Ia. Na te faatuatuaina oe!
-
Vaai mamao i le manuia. O le popole e mafai ona avea ma se auala faalemafaufau e faatino ai le toilalo. Nai lo le faataitaia o mea e mafai ona sese pe popole soo i le “ae a pe afai,” ia faataitai i le mafaufau i ni taunuuga lelei ma faia ni fuafuaga e ausia ai na mea. Ma afai e le sologa lelei ni mea e pei ona e faamoemoe i ai, mafaufau i le aoaoina o oe lava ia mai se faafitauli ma agai i luma.
-
Aua nei taumafai e pulea mea e te le mafaia. O le taumafai e pulea mea e le mafai ona e puleaina o le a na ona e lagona atili ai lava o le le puleaina, ma faateleina ai lou atuatuvale. Faaalu lou malosi i mea e mafai ona e faia i ai se mea.
-
Fesili, “O le a le mea e sili ona leaga e mafai ona tupu?” Afai o le taunuuga sili ona leaga e mafai ona tupu o se mea lea e mafai ona e taulimaina po o se mea foi e mafai e le Faaola ona fesoasoani ai ia te oe e faatoilaloina, ia agai i luma e aunoa ma le fefe.
-
Taumafai e faifai lemu i le 10 pasene pe afai ua e naunau e faatatope. Atonu e sili atu ona e mataalia pe a e lagonaina atili le toafilemu.
-
Auauna atu. A o e auauna atu i lau soa, tagata sailiili, tagata o le au paia, tuaoi, po o tagata matitiva ma lē tagolima, o le a itiiti ifo lou manatu ia te oe lava ia ma fiafia atili ai. (Tagai Talai La’u Talalelei, 182–83.)
U
Lagonaina o le Maitaita po o le Faalii
-
Tuu atu se taimi i lou mafaufau e pulea ai ou lagona. O le vaega o lou mafaufau e mafai ona fetuutuunai ma faaaoga faaiuga lelei e lemu atu i lo le vaega o lou mafaufau e maitaita. Ia liliu ese mai le tulaga mo ni nai minute, ma fai ni mānava tetele i totonu ina ia tuu atu ai i lou mafaufau atamai se taimi e fesootai ai.
-
Aua nei fafagaina le ita. O tagata e foliga mai e lagonaina le ita pe a latou filifili e vaai atu i isi o ni tagata (1) taufaamatau, (2) le faamaoni, po o le (3) le faaaloalo. Ae, vaai pe mafai ona e mafaufau i se faamalamalamaga sili atu ona agalelei mo a latou amioga. Mo se faataitaiga, masalo ua latou lelavava, lei faailoaina atu [se mea] ia i latou, le mautonu, po o le mafaufau o loo latou fesoasoani mai. Fai le filifiliga e aua nei faatupuina le ita.
-
Ia toafilemu, fia iloa, ma agaalofa. Ia fia iloa i mea o loo mafaufau ma lagonaina e isi. Fai ni fesili, faalogo i ai ma le totoa, tau atu i le isi tagata mea e te manatu sa e faalogo i ai, ma fesili i ai pe o sa’o lou malamalama i ai. A leai, toe taumafai.
-
Tetee atu i le uiga o le tuuaia po o le faamaasiasi o isi po o oe lava ia. Ae, fuafua po o le a le faafitauli ma fesili atu i le isi tagata mo se fesoasoani i le foiaina, e tusa lava po o ai e sese.
-
Ia i ai le loto e faatoese atu ma talosaga atu po o le a se mea e mafai ona e faia ia toe faasa’o ai ni mea sese. O le faatoese o se faailoga o le malosiaga faaleagaga, e le o se faailoga o le vaivai.
-
Ia mata fiafia ma naunau e ataata ia te oe lava ia. Tagai i le faaata e vaai i ai pe faape’i ou foliga pe a e ita.
-
Auauna atu ia i latou e te le fiafia lava i ai. Faaaoga le fautuaga a le Faaola ia “alolofa i o outou fili, faamanuia atu ia i latou o e e fetuu mai ia te outou, fai mea lelei ia i latou o e e inoino mai ia te outou, ma tatalo mo i latou o e latou te faaaoga outou ma le inoino ma sauaina outou” (3 Nifae 12:44).
-
Ia tausia lelei oe lava ia. Ia mautinoa o loo lelei lau tausami, moe, faamalositino, ma le tatalo ina ia lava au punaoa faalelagona mo le taulimaina o le le fiafia.
F
Lagonaina o le Lelava po o le Paie
-
Taulai atu i ou malosiaga. O a ni tulaga faatauaina, taleni, aafiaga, ma ni meaalofa ua e aumaia i le misiona? E mafai faapefea ona e faaaogaina na malosiaga i ni auala fatufatuai i lenei vaiaso? Afai e i ai se faafitauli i lou iloaina o ou malosiaga, fesili atu i isi mo se fesoasoani.
-
Ia fai le laasaga e tasi i le taimi. Faamanatu ia te oe lava, “E na o le pau le mea e ao ona ou faia i le taimi nei o le ______.”
-
Fai ia faafiafiaina! I le faaaloalogia ai o le malualii o lou valaauga, ia seti ni sini faafiafiaina mo oe lava ia, ma faia ia pei o se taaloga e te fiafia i ai ina ia ausia ai. Ia fatufatuai ma faamalo ia te oe lava ia mo le manuia [o au taumafaiga].
-
Aua nei lofituina oe lava ia i le anoanoai o le mau sini patino i le taimi e tasi. Seti se sini patino se tasi pe lua i le taimi e tasi (e pei o le fiafia atili po o le faatulaga lelei atili). Aua nei e faamoemoe e atoatoa, ma ia faaaofia ai se fuafuaga i le auala o le a e toe foi ai i le ala lea pe a faaletonu lou aso. Ia faamanatu soo ia te oe lava pe aisea e te manao ai ia sui.
-
Ia faasoa atu au sini i lau soa ma le peresitene o le misiona. E mafai ona la fesoasoani ia te oe ma ofo atu ni manatu aoga.
-
Ia iloa o le uunaiga e sosoo ai ma le faatinoga. O le amataina e masani lava o le vaega lea e aupito sili ona faigata. Tau ia te oe lava ia, “Tau ina faia mo le 10 minute” pe a manaomia ona e amataina se mea e te le fia manao e fai. O le taimi lava e te amata ai, o le a e lagonaina le uunaiaina atili.
G
Popole i E Pele o i le Aiga
-
Suesue le Mataupu Faavae ma Feagaiga 31:1–6. Mai uluai taimi o le Ekalesia, ua valaauina pea faifeautalai e tuua e pele i ni tulaga faigata. Tatalo ina ia faapaiaina ia faamanuiaga o lau auaunaga i le tulaga e manuia e pele ia te oe. Faamamalu i latou e ala i le auauna atu i le Alii ma lou loto atoa. Faalagolago atu i le Alii e faamanuia i latou ma oe, e tusa ai ma Lana lava taimi ma Lona finagalo.
-
Tusi atu i lou aiga i vaiaso taitasi. Faasoa atu lau molimau ma ni aafiaga ma ni tala lelei. Faamatala soo ia i latou taimi e te vaaia ai le aao o le Alii i lou olaga. Tatalo mo i latou. Ia manatua aso fanau ma aso faapitoa.
-
Ia faamoemoeina ni luitau e oo atu i e pele ia te oe. O le tele o nei mea e tutupu e tusa lava pe e te auauna atu i se misiona pe leai. O loo i ai i e pele ia te oe le faitalia ma e ono faia ni faaiuga e te popole ai, aemaise lava pe afai na masani ona avea oe ma se taitai po o se faatupu filemu i le aiga. Atonu e faamanuiaina ai o latou olaga i le taulimaina o luitau e i latou lava. Ia faaaloalo i a latou filifiliga, ma faaauau pea ona faailoa atu lou alofa ma le talitonuga.
L
Lagonaina o le Tuuatoatasi
-
Ia fia iloa e uiga i isi. Fesili i ai pe faapefea ona latou taulimaina le lagonaina o le tuuatoatasi. Fesili i ai i o latou aafiaga ma lagona ina ia e malamalama atili ai ia i latou.
-
Faasoa atu atili. Tatou te lagonaina le tuuatoatasi pe a tatou le lagonaina le iloaina ma le faatauaina po o ai moni i tatou.
-
Tusitusi i lau api talaaga.E fesoasoani tele le lagonaina o lou malamalama ia te oe lava ia.
-
Faamalamalama po o le a le uiga ia te oe o le “tuuatoatasi.” Faamalamalama po o a lagona, mafaufauga, ma amioga e o faatasi ai mo oe. Ona talanoaina patino lea o nei mea.