Punaoa mo le Puleaina o Manaoga Faaleagafesootai

O sootaga e mafai ona avea uma ma se punavai o le atuatuvale ma se punaoa faamanuiaina mo le taulimaina o le atuatuvale. A tatou soona atuatuvale, e mafai ona mafatia ai sootaga. Mafaufau i fautuaga nei mo le fausiaina o sootaga lelei. Ia tagai foi i le vaega o le “Mataupu Faavae Lautele mo le Puleaina o le Atuatuvale” i le itulau 17–22 mo nisi manatu faaopoopo.

A

Talanoa i Tagata e Le Masani ai

• Faailoa ma faaaoga ou malosiaga. O nisi tagata e lagonaina le malosi pe a talanoa i tagata; a o isi e lagonaina lelava. O ia ituaiga uma o tagata e mafai ona avea ma ni faifeautalai mataalia. Afai o oe o se tagata e lelava pe a talanoa i tagata e le masani ai, aua nei fiu e taumafai. O loo i ai isi ou malosiaga e saofaga ai i le galuega faafaifeautalai, e pei o le avea ma se uo lelei ia i latou e te iloaina lelei, mauaina o ni manatu fatufatuai, o le malamalama lelei i tagata, po o le lelei tele i le faia o fuafuaga. Atonu e te manatu i isi e le fiafia ia te oe, e ui lava latou te fiafia moni ia te oe. Saili atu i musumusuga ma faalogo i le Agaga e fesoasoani ai ia te oe e faaaoga ou malosiaga i Lana galuega ma atiae atili ai ia uiga o Keriso ia e te mauaina o se faifeautalai. O loo avea oe ma sui o Iesu Keriso, ae le o se sui mo oe lava ia.

• Aoao e fai atu ni fesili musuia. Aoao ma faataitai ni fesili ina ia mafai ai ona faatalanoa isi tagata. Fesili atu i tagata e uiga i a latou galuega, o mea e fiafia i ai, o aiga, po o talafaasolopito patino. Fesili i ai po o a mea e sili ona taua ia i latou, o a mea o loo latou naunau i ai pe o popole i ai. Faalogo mo ni avanoa e molimau atu ai e uiga i se mataupu faavae o le talalelei o le a fitoitonu ia i latou. Faaali atu i ai lou naunau ma le faamaoni. Ia naunau foi e tali a latou fesili e uiga ia te oe, ma ia faatumauina le taulaiga i o latou manaoga ma lau savali. (Tagai Talai La’u Talalelei, 198–200.)

• Saili ni auala faigofie e faagauai mai ai isi. Faataitai ona ataata, pupula sa’o i fofoga o le tagata, talotalo, faatalofa i ai, faamalo atu ia i latou, ofo atu se fesoasoani, pe fai atu ni fesili e amata i le o ai, o le a, o anafea, o fea, aisea, po o le faapefea.

• Aoao i le auala e faamuta ai ni talanoaga. Pe a uma ona e talanoaina mea na e lagonaina ma ni fesili talafeagai mo tagata faasino mai, faataitai le, “Matagofie lava le feiloai ma oe (po o le talanoa ma oe). Ua tatau ona ma ______ (tuumuli, toe faaauau le galuega, pue le pasi, sue Uso Samita a o lei alu ese). Tatou te toe feiloai pea!”

• Fai se sini ia masani i se tagata fou se toatasi i sauniga uma e te auai. Faaaoga le igoa muamua o le tagata i le minute muamua ma le taimi e te faamaea ai le talanoaga. Tusi i lalo le igoa e fesoasoani ai ia te oe e manatua.

• Faataitai i fonotaga faaleitu. O se faatulagaga sili lea e faataitai ai ni tomai faaleagafesootai e pei o le faalogologo atu ma tali ni fesili.

• Fesili i ai mo ni manatu faaalia. E le o tagata uma e lelei i le “iloaina” o mea e mafaufau ma lagona e isi tagata. Fesili atu i lau soa mo se fesoasoani pe afai na tau atu ia te oe o loo i ai ni faafitauli i lou matauina o le taimi e le toafimalie ai pe le o fia naunau mai ai isi tagata.

“Ua soona tele lava lo’u olioli, ua oo lava i le mitamita i lo’u Atua; Ona ua ia te ia le mana uma, ma le poto uma, ma le malamalama uma; ua silafia e ia mea uma, ma o ia o se Tagata alofa mutimutivale, e oo i le olataga, o i latou o e e salamo ma talitonu i lona suafa. O lenei afai o le mitamitavale lea, o le a faapea lava ona ou mitamita; ona o lo’u ola ma lo’u sulu lea, o lo’u olioli ma lo’u olataga, ma lo’u togiola lea mai le malaia tumau-faavavau. Ioe, ia faamanuina lava le suafa o lo’u Atua.”

—Alema 26:35–36

• Tuu ia te oe lava ia se faatagaga e iloa ai le mautinoa, e tusa lava pe e te le lagonaina. O le fautuaga a Peresitene Hinckley na maua mai i lona tama e mafai foi ona faatatau ia te oe:“Faagalo oe lava ia ae alu e galue” (Liahona, Novema 1987, 7). E mafai ona tatou faia le mea lenei e ala i le faagalo o lo tatou fefe e uiga i la tatou lava faatinoga ma toe faataulai atu i lo tatou valaauga e auauna atu i isi ma talai atu le talalelei.

• Taulai atu i le fesoasoani ma le auauna atu i isi. A liliu atu lou gauai i manaoga o isi, o le a e lagonaina lou le manatu tele i ou lava manaoga po o ou le atoatoa (tagai Mosaea 2:17).

E

Manao Ina Ia Tuuatoatasi

• Fatu se lagona o le faia o mea na o oe lava ia mai lea taimi i lea taimi e ala i le tusitusi, tatalo, faitau, po o le faia o fuafuaga. E ui lava e manaomia lou nofo faatasi ma lau soa i taimi uma, ae mafai lava ona e faaaluina ni nai minute e moeiini ai ma filemu.

• Talosaga sa’o [i lau soa] mo sina taimi paganoa e te mafaufau ai. Toe faamautinoa atu i lau soa e te le o le fiafia. Faaauau pea ona e saofaga i le lua sootaga ma ia fesootai ma le agalelei.

• Vaevae lou aso. Aua nei fai se ituaiga se tasi o gaoioiga mo se taimi umi i le taimi e tasi. Ia faaeseese ituaiga o galuega e te faia. Ia faafefiloi au gaoioiga fuafuaina i ni nai taimi o le toafilemu ma le lotofaafetai; ona toe foi lea i galuega masani.

I

Ia Matala Fesootaiga ma se Soa

• Faalogo muamua. A oulua nonofo faatasi ma se tagata i le ao ma le po [24/7], o le a e matauina ni mea e te le fiafia ai. E eseese talaaga po o siosiomaga e te lua o mai ai ma e i ai faamoemoega eseese ma ni “tulafono” mo mea e talafeagai pe masani ai. O amioga a lau soa e sa’o atoatoa ia te ia, e tusa lava pe le sa’o ia te oe. I taimi o iloiloga o le sootaga faalesoa, ia saili ia iloa atili le auala na te vaai ai i mea e ala i le faia o ni fesili ma faalogo atu ma le totoa. (Tagai Talai La’u Talalelei, 200–01.)

• Ia faamalamalama atu ma le faaaloalo se mea o loo e atugalu ai. Afai e te faitio pe ita, o le a faapena foi ona faatautee mai lau soa nai lo le galulue faatasi. Faamatala i ai lou faafitauli ma le mea e te manaomia nai lo le faitioina o le amio faapalopalo a lau soa. Mo se faataitaiga, “Ou te le fiafia i ni ipu palapala, ae ou te le fiafia foi e fufuluina na o au. Ou te fia iloa pe mafai ona ta faatulagaina se auala e tausoa faatasi ai lenei galuega.” Po o le, “Ou te popole o loo e ita ia te au pe a e matua filemu lava. E mafai ona e tau mai ia te au se mea o e mafaufau i ai?”

• Ia tuusao ou manatu ma agalelei. Aloese mai ni upu soona lafo po o ni faaiuga le lelei. Aua nei faamamafaina lou tulaga i ni lisi uumi o ni mea sese a lau soa. Taumafai e faatumau se leo tutusa e le ita pe le fiafia (tagai Efeso 4:29–32).

• Aua nei amanaiaina ni mea sese. Faaaoga ia fautuaga, e tusa lava pe na tuu atu i se tulaga le migao, i le tele o le alofatunoa ma le agamalie e mafai ona e taulimaina ai.

• Faamalo soo atu i lau soa. Faafetai atu ia te ia mo mea ua e talisapaiaina.

Fai se Lisi

O mea o loo ou aoaoina e fiafia ai i le aganuu, talafaasolopito, ma ituaiga o olaga o tagata ou te auauna i ai:

• Fesili atu i lau soa mo ni fautuaga i ni auala e mafai ai ona faaleleia oe. Ia ole atu foi i le Alii e fesoasoani atu ia te oe ia e iloaina ou vaivaiga (tagai Eteru 12:27).

• Taumafai e fai se mea lelei mo lau soa i aso uma. Fai sana meaai, faalogo i ai, faaiila ona seevae, teu faalelei lona moega, ataata i ai, tautau lona solo taele, teu ia ipu, tusi se tusi faafetai i ona matua, auli sona ofutino, faamalo atu ia te ia .

“O le mea lea, ou uso pele e, ia outou tatalo atu i le Tamā ma le malosi atoa o le loto, ina ia faatumulia outou i lenei alofa, lea ua ia faaee mai i luga o i latou uma o e o soo moni o lona Alo, o Iesu Keriso; ina ia mafai ona avea o outou ma atalii o le Atua; a oo ai ina afio mai o ia o le a tatou faapei o ia, ona o le a tatou vaai ia te ia e pei ona i ai o ia; tau ina ia tatou maua lenei faamoemoe; tau ina ia mafai ona faamamaina i tatou e pei lava ona mama o ia.”

—Moronae 7:48

O

Alofa i Tagata

• Aoao e uiga i le aganuu, talafaasolopito, ma ituaiga o olaga o tagata e te auauna i ai. Tausi se lisi o mea e te fiafia i ai ma talisapaia.

• Tatalo mo le meaalofa o le alofa mama. Ia faia “ma le malosi atoa o le loto” (Moronae 7:48). Ole atu mo mata e vaai atu ai i isi e pei ona silasila atu i ai le Atua.

• Auauna atu i tagata o le Ekalesia, tagata sailiili, ma isi. Fai atu ia i latou ni fesili e uiga i o latou olaga, talitonuga, ma aafiaga seia oo ina e lagonaina le talafeagai o a latou amioga ia te oe.

• Tatalo mo tagata. Faaaofia i au tatalo i latou e teenaina oe ma faatiga ia te oe (tagai 3 Nifae 12:44).

U

Fegalegaleai ma Taitai Misiona

• Ia lotomaualalo (tagai MF&F 112:10). O le lotomaualalo o le vaipuna lea o le mama uma. Fesili atu i ou taitai mo ni fautuaga i ni auala e mafai ai ona faaleleia oe. Ia loto e faaaoga fautuaga, ma tuu atu ia latou iloaina e mafai ona latou faatuatuaina oe. Faafetai atu i ou taitai mo la latou auaunaga, i se talanoaga pe tusi i ai se tusi. (Tagai Talai La’u Talalelei, 129–.)

• Talosaga atu i se taitai po o se faiaoga mo se fesoasoani ma le onosai. O nisi faifeautalai e le faatuatuaina tagata o le pulega pe faigata foi ona talia faatonuga ona ua latou masani lava i le avea o i latou ma o latou lava pule. O isi e lagonaina le fiatautava i taitai talavou [latou te tupulaga]. Faailoa atu i taitai pe afai e te maua i nei luitau. Tatalo mo le lotomaualalo ina ia avea ma se tagata lelei e mulimuli i le taitai.

• Tatalo mo ou taitai. Tatalo faapitoa lava mo soo se tasi o loo i ai ni ou lagona le lelei.

• Ia iloa o tagata soifua foi ia taitai. Afai tatou te manatu o taitai e tatau ona matua sili atu ona lelei nai lo isi tagata, o le a tatou le fiafia ma faitio ai pe a latou faia ni mea sese, le onosai ai, faia ai ni faaiuga le lelei, pe tatou te malamalama sese ai. Ia faamoemoeina ni le atoatoa, ma tagai mo ni uiga lelei (tagai Mamona 9:31).

• Aoao mai malosiaga ma mea sese a ou taitai. Fai se lisi o uiga e te manao e faataitai i ai pe aloese mai ai pe a oo i lou taimi e taitai ai.

F

Puleaina o Lagona Feusuai pe Faamamai

• Ia iloa le loto pulea. O mafaufauga ma lagona feusuai ma faamama’i o ni lagona masani ma e aumai i le Atua. A tatou tausia a tatou sootaga ma amioga i totonu o tuaoi ua faatulaga e le Alii mo i tatou o ni faifeautalai, o le a tatou tuputupu ae i le malosi ma maua faamanuiaga silisili. Ia fausia lou naunautaiga e faia lea mea e ala i le suesueina ma le agaga tatalo o le Mataupu Faavae ma Feagaiga 121:45; 1 Korinito 9:24–27; Mosaea 3:19; ma le Alema 38:12. Saili ia upu o le “mama,” “loto pulea,” ma le “faapalepale” i le Taiala i Tusitusiga Paia. Lisi ia faamanuiaga ma tulaga lelei o le a oo atu ia te oe i le taimi nei ma le lumanai pe a e atiaeina nei uiga.

• Aveese se mafaufauga. Nai lo le atuatuvale i mafaufauga ma lagona feusuai ma faamama’i, ia faapisiina oe lava; fai se malologa ma faaaofia oe i se isi mea. Usu ni viiga. Tauloto ni mau ma toe faamatala. Taulai i mea o loo e faafetai ai. Mafaufau i fuafuaga mo le aso. Faamalositino. Toetuuto atu i lau galuega. Ia fiafia ma ia fatufatuai.

• Aloese mai faaosoosoga. Aloese mai nofoaga, tulaga, talanoaga, po o tagata e faaosoina ia faaosoosoga. Afai ua e vaai i se ata pe mafaufau i se manatu taufaaosooso, aua nei nofoa’i ai i lena mea. Sui nisi mea e te mafaufau i ai, ma alu ese mai le faafitauli i le vave e te mafai ai. (Tagai Talai La’u Talalelei, 127.)

• Faaauau pea i le faamoemoe ma le faatuatua. Afai o loo e tauivi e pulea ou lagona feusuai ma le talafeagai, e finagalo le Alii ia e iloaina e alofa pea o Ia ia te oe. Aua lava nei lafoaia le lua sootaga ma le Atua ona ua e lagonaina lou le agavaa. E ui atonu o loo e tauivi e pulea nei lagona, ae o le a Ia le teena lava oe. E sili atu i lo se tasi lava, e malamalama o Ia i mea o loo e feagai ai ma faatauaina au taumafaiga e tetee atu i faaosoosoga, aoao mai mea sese, ma salamo. Saili atu i le fautuaga a lou peresitene o le misiona, ma faaauau pea ona tauivi e faatoilalo nei luitau. (Tagai Talai La’u Talalelei, 124–25.)

• Aua nei e soona matelaina, tuuatoatasi, lelava, paie, po o le atuatuvale. O nei mea uma e mafai ai ona faafaigata atili ona teenaina ia faaosoosoga. Aumai sina meaai mama, fai sina malologa puupuu mai au gaoioiga, pe sui lau gaoioiga, faia se talanoaga lelei, pe faataitai ia faamalositino e faatoafilemu ai le mafaufau (tagai itulau 19).

• Tausia lou lava saogalemu. Manatua ia e faatasi ma lau soa i taimi uma ma aua lava nei tuua na o oe faatasi ma se tagata o le isi itupa. Afai e te lagonaina lou tosina atu i se tagata, faafesootai le peresitene o le misiona ma saili atu i lana fautuaga. Afai e te lagonaina o loo taumafai se tasi e faatafai mai ia te oe, fai atu i lau soa e fesoasoani atu ia te oe. Valaau atu i le peresitene o le misiona e faailoa i ai le mea ua e lagonaina.

• Anapogi ma tatalo mo le malamalama ma le malosi. A tatou anapopogi, tatou te le amanaiaina lo tatou fiaai faalesoifua maloloina e masani ai mo meaai mo se taimi patino ina ia mafai ai ona saili atu i le malosiaga faaleagaga ma atiae ai ni tomai e pei o le lotopulea, agaalofa mo i latou o e fiaaai, ma le nofouta i le Agaga. O nei tomai lava e tasi e mafai ona fesoasoani ia i tatou ia le amanaiaina lagona feusuai malolosi pe faamama’i e masani ai o se faifeautalai. O le anapogi o le a le tineia ai lagona feusuai, ae o le anapogi faalemasina e mafai ona fesoasoani ia i tatou ia maua le malosi, loto pulea, ma le uunaiga e pulea ai nei lagona ma le tatau. (Tagai Talai La’u Talalelei, 98–99.)