Folasaga

I le avea ai ma se faifeautalai, ua valaauina oe e fai ma sui o Iesu Keriso e auauna atu i fanau a le Tama Faalelagi. E alofa le Faaola ia te oe, ma o le a Ia fesoasoani atu ina ia e manuia. Ua Ia folafola mai: “O le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga” (MF&F 84:88).

A e faaaogaina lou faatuatua ma faatino e tusa ma le faaiuga ua e faia e fai le galuega a le Alii, o le a e atiaeina ni tomai, o meaalofa, ma malosiaga e te manaomia vave atili. O le a e lagonaina Lana fesoasoani ma tuputupu ae i le talitonuga maumaututu i lou gafatia e auauna atu i le Alii.

E oo lava i se folafolaga o le fesoasoani a le Alii, e toatele lava faifeautalai aupito silisili i le talafaasolopito na faamaumauina e faapea na latou puapuagatia ma tauivi i a latou galuega faafaifeautalai. O Amona ma ona uso sa “mafatia tele, i le tino ma le mafaufau, e pei o le fia aai, fia inu ma le le lavava, ma le tele foi o tauiviga i la le agaga” (Alema 17:5). Sa i ai taimi, na atagia mai ai lo latou mananao e toe foi i le fale. “O lenei ina ua vaivai o tatou loto, ma toetoe a tatou toe foi i tua, faauta, sa faamafanafanaina i tatou e le Alii, ma fetalai mai: O atu i totonu o o outou uso, o sa Lamanā, ma tauave ma le onosai ou puapuaga, ma o le a ou tuu atu ia te outou le manuia” (Alema 26:27).

E Faapefea Ona Amataina

1. Faitau le “Malamalama i le Atuatuvale”

   Ina ia amata, faitau le “Malamalama i le Atuatuvale” o loo i le itulau 3–10 e maua ai se malamalamaaga lautele e uiga i le natura o le atuatuvale, o manaoga o le galuega faafaifeautalai lea e ono mafua ai, atoa ai ma punaoa o loo maua e puleaina ai nei manaoga.

2. Faatumu le Iloiloga Faaletagata Lava Ia

   Faaaoga le Faamaumauga o le Iloiloga Faaletagata Lava Ia o loo i le itulau 11–13 e fuafua ai pe o ni atugaluga patino po o ni manaoga o le galuega faafaifeautalai o loo ono mafua ai se faigata i le taimi nei.

3. Tagai i Fautuaga ma Meafaigaluega Talafeagai

   A uma loa ona e faailoaina ni atugaluga, tagai i itulau o punaoa ua faailoga ia o loo sosoo ma vaega taitasi i le iloiloga. O nei fautuaga o le a fesoasoani ia te oe e aoao ai e puleaina lou atuatuvale. E mafai ona fesoasoani atu isi faifeautalai ma taitai misiona ia te oe e faaaoga nei meafaigaluega ma fautua atu nisi manatu.

4. Toe fai pe a manaomia

   Toe fai le iloiloga faaletagata lava ia pe a manaomia i le aluga atoa o lau misiona. Toe foi i le tusi lenei mo nisi manatu i soo se taimi lava e te manaomia ai.

O le tele o le mealilo i le taulimaina o le lotovaivai ma le atuatuvale lea e taatele i le galuega faafaifeautalai o le toe faafouina lea i le Alii o lau faaiuga e auauna atu. Na faamatala e Peresitene Gordon B. Hinckley lona aafiaga i le taimi muamua na faatoa amata ai lana misiona i Egelani.

“Sa ou ma’i i le taimi na ou taunuu ai. O nai uluai vaiaso na, ona o le ma’i ma ni mea faafeagai na ma lagonaina, sa ou loto vaivai ai. Sa ou tusi atu i lou aiga i lou tama lelei ma fai i ai sa ou lagonaina o loo ou faamaumauina lo’u taimi ma ana tupe. O ia o lou tama ma o la’u peresitene foi o le siteki, ma o ia o se tamalii atamai ma musuia. Sa ia tusi mai se tusi puupuu lava ia te au lea sa faapea mai, “Le Pele Gordon, ua ou mauaina lau tusi talu ai nei. E na o le tasi lava la’u fautuaga: faagalo oe lava ia ae alu e galue.’ I le vaveao o lena aso i le ma vasega o tusitusiga paia sa ma faitau ai ma la’u soa i afioga nei a le Alii: ‘Aua ai se fia faasaogalemuina lona ola, e maumau ai ia te ia; a o le faamaumau lona ola ona o au ma le talalelei, e faasaoina e ia.’ (Mareko 8:35.)

“O na upu a le Matai, lea na sosoo ai ma le tusi a lo’u tama faatasi ma lana fautuaga ina ia faagalo au lava ia ae alu e galue, sa goto ifo i lou lava tagata. Faatasi ai ma le tusi a lou tama i lou lima, sa ou alu atu ai i le potumoe i le fale i le 15 Wadham Road, lea sa ma nonofo ai, ma tootuli ai ma faia se tautinoga i le Alii. Sa ou osifeagaiga ai o le a ou taumafai e faagalo au lava ma faamaumau au lava i Lana galuega.

“I lena aso ia Iulai i le 1933 o se aso o la’u faaiuga. Sa oo mai se malamalama fou i lou olaga ma se olioli fou i lou loto. Sa foliga mai na matafi ese atu le puao o Egelani, ma ou vaaia ai le sulu o le la. Sa ou maua se aafiaga faamauoaina ma le ofoofogia i le misiona, lea ou te faafetai ai pea” (“Aveina Atu o le Talalelei i Peretania:O Se Tautinoga i Le Lalolagi,” Liahona, Novema 1987, 6).

Na faamanuiaina Peresitene Hinckley i le taulimaina o lona lotovaivai a o ia faafouina lana faaiuga e auauna atu i le Alii. Mulimuli ane na ia fai mai: “O le vaifofo silisili ua ou iloa mo le popole o le galue. O le vailaau silisili mo le faanoanoa o le auauna atu. O le vaifofo silisili mo le vaivai o le luitau lea o le fesoasoani atu i se tasi o loo sili atu ona vaivai” (Words of the Prophet: Put Your Shoulder to the Wheel,” New Era, July 2000, 7).

Faaaogaina o Lenei Tamaitusi

O le galuega faafaifeautalai e mafai ona faafiafiaina ma faaatuatuvaleina. O lenei tamaitusi o le a fesoasoani ia te oe ia malamalama atili ai i le atuatuvale ma le auala e aafia ai oe, ae e le o faamoemoe ina ia faitauina uma i le taimi e tasi. O le faaaogaina o faatonuga o loo lisiina i le itulau 1, o le a taitai atu ai oe i fautuaga e uiga i autu ua e filifilia. O nei manatu o le a fesoasoani foi ia te oe a o e auauna atu ma tautuaina lau soa ma isi faifeautalai.