Tala a Ricardo

Tala Patino a Ricardo

Ricardo: O lo’u igoa o Ricardo. O a’u o se tagata o le Au Paia o Aso e Gata Ai. O a’u o se tama o se fanau e toaono, ma ou te tosina atu i alii. E ao ona ou faapea atu o lo’u olaga atoa sa taumafai lava e tau faavasega le anoa’i o mea. Ou te manatua a o ou tamaitiiti, sa tata’i pea lava au i le tusiata; o le mea lena ou te toomaga i ai: o le fatufatuina lea o ni mea. O uo na ou iloaina po o tamaiti i le a’oga e taaalo soka po o mea faapena, ae ou te le’i lagonaina lava so’u fia auai atu iai. Sa ou manatua moni lava le uluai taimi na faatonu ai au e lo’u tama ou te alu atu i lona potumoe ma sa ia fai mai ai, “Vaai au aga. E tatau ona e faatamatane atili i lau tautala. E tatau ona e faia isi mea ia e fai e tama.” Ma ina ua uma ona talanoa mai o ia ia te au, sa ou alu loa i lo’u potu ma amata ona ou tagi. Ou te lei malamalama pe o le a lava le leaga o lo’u ituaiga o tagata.

Sa ou faia mea e tatau ona faia e tama uma o le Au Paia o Aso e Gata Ai: e te maua le perisitua, e te tufaina le faamanatuga, e te alu i se misiona. Sa ou faia mea na, ae ou te le’i lagonaina moni lava se tulaga o se atoatoa. Ina ua uma ona ou faia se misiona mo le Ekalesia mo le lua tausaga, sa ou sau i le Iunaite Setete e sue so’u faailoga i mamanu faakarafi, ma i le taimi lena, na ou feiloai ai i lo’u toalua, ma mai le aso muamua sa ou tosina faamaoni i taimi uma ia te ia.

Elisapeta: O le taimi muamua sa ou feiloai ai ia Ricardo o la faatoa ou tapena i se falemautotogi. O lo’u tausaga sinia i le kolisi, ma ou te lei mafaufau lava i se mea, ae sa ia talosaga mai ma te o e tafafao ma na amata mai iina ona ma faagasolo i luma.

Ricardo: Sa i ai se mea moni manaia lava e uiga ia te ia, ma sa ou fiafia i o’u lagona ia te ia. Sa ou mafaufau ia te au lava, ou te fia manao i le mea lena; ou te fia lagonaina ia lagona i taimi uma. Ma a o amata ona ma eva atili faamasani, sa ou lagonaina e taua le faasoa atu ia te ia e i ai ou mafaufauga ma faananauga mo alii, ae ou te lei matuai tautino sa’o ia te ia faapea, “Ou te tosina atu i alii.” Sa ou matua fefe e ta’u atu ia te ia lena mea.

Elisapeta: Ioe, o se mea e ofo ai; o se mea faate’iloto. Ou te le’i faamoemoeina lena mea. Ou te le iloa pe i ai se isi e manatu i se mea faapena, ae ua ou iloa lona ituaiga o tagata, ma e le’i suia ai o’u faalogona mo ia. Sa ou alofa pea lava ia te ia ma mana’o pea lava e faaauau la ma mafutaga.

Ricardo: Ou te iloa e ono fesili le toatele o tagata, “Ia, e faapefea ona e fai mai e te tosina atu i lou toalua, ae na e te faapea mai e te tosina atu foi i alii?” E tatau ona ou fai atu e le o i ai sa’u faamalamalamaga tonu mo lena mea; pau le mea e mafai ona ou fai atu, o lo’u lava lea ituaiga. I ni nai tausaga talu ai, sa faafaigaluega ai au o se faatonusili mo fatufatuga mo le Ekalesia, ma i se fonotaga i le galuega sa ou feiloai ai i se uso faigaluega iina e lei natia lona faafafine. Ma sa matuai uunaia fiafia lava au i lona talitonuga mautinoa sa talatalanoa ai i lona tosina atu i le itupa tutusa e aunoa ma sona maasiasi. Ou te manatua na ma o e aai i le aoauli ma sa amata ai ona ou faasoa atu ni mea ia te ia, ma sa matuai manaia lava le mafai ona talanoa i se tasi e mafai ona ou fesootai i ai—se tasi e mafai ona fesoasoani mai ia te au ma maua ai se lagolago ma se tasi o le a fesoasoani ia te au ia malamalama atili e uiga ia te au lava aua ua oo foi o ia i le mea lava lea e tasi.

Sa ou oo i lena fagua atoatoa o lo’u agaga ma lo’u loto, ma a o ou feagai pea ma lenei aafiaga, sa amata ona ou tuufaatasia fasimea i lenei ata, o lo’u olaga lava lea, ma sa amata ai ona ou faamaopoopoina se vaega tele o ni uo ma fesoasoani.

Elisapeta: Sa amata ona fai ana uo ma alu i faeasaite, ma e foi mai ua matuai fiafia lava ma faamalosia ma ia fai mai ai faapea, ua amata ona ia lagona atili ua paleni, ae e oo atu i le taumafanafana pei ua fai si o’u fiu. Sa faatele ona auina atu ana feau tusitusia ma fuafuaina ni mea, lea na lelei mo ia, ma sa ou fiafia mo ia, ae o le taimi foi lea sa ou lagona ai ua le o numera tasi au ia te ia.

Ricardo: Sa ia fai mai o la sa fiafia ona ua faateleina lo’u lagona mautinoa, ua tele lo’u toafimalie, tele le toafilemu, ae sa ia lagonaina moni ua pei o ia o se tina nofofua aua ua tele itula ou te faigaluega ai, alu atu i le fale, ona vili mai lea o ana uo pe tesi mai po o le a lava, ae o la na te manaomia lo’u taimi ma lo’u gauai atu, ma sa ou le mailoaina le tele o le taimi na aveeseina mai lo’u aiga ma lo’u toalua. Ma te lei savavali faatasi i lenei faigamalaga, ma o le mea sa ou ioe e fai o le taunuu atu i le fale ma tuu ese lau telefoni feavea’i, tuuto atu lo’u taimi i tamaiti ma ia, ma sa fesoasoani tele lena mea.

Elisapeta: Ou te manatu pe a ma le fa masina ina ua matuai tatala mai o ia ma faamaoni i mea uma ma lona aofia atili ai i le faiga o ni sootaga lelei faatamatane ma isi alii, ae sa na ona ou manaomia lava o se paleni i o ma olaga.

Ricardo: O lo’u toe manatua ai o ni ata uma na fau ai lo’u olaga, sa amata loa ona ou vaai atili ai i se ata ua tau manino lelei mai. Pe a oo ina mafai ona ou vaai i le Atua i le totonugalemu o lena ata, ma mafai ona ou vaaia a’u lava o aapa atu, matuai aapa atu lava mai meatalatala faaleagaga sa ou oo i ai muamua. O lenei ata atoa o le avea o se faafafine ma se uso o le Au Paia o Aso e Gata Ai ua matuai ese lava se uiga mo a’u i le taimi nei. O le taimi muamua, o si mea moni e faapea sa ia te au na tosinaga, na oo mai ni lagona o le le fesootai moni ai lava ma le Atua ma le Faaola, ae sa na o so’u lava manatu ia te au lava ma la’u sootaga i le Faaola. Ou te le’i lagonaina atoatoa lava muamua se agavaa faapea mo Ia. O le vaega tuufaasaoloto lena: o le mafai ona talanoa i tagata ou te alofa i ai e ugia i lenei mea, ia maua mai la latou lagolago, o le talanoa atu i lo’u toalua; o le tau lava ina avea a’u ma a’u lava, o le mea sa aupito ofoofogia lea. E le tuli ia ou atoatoa, e mafai lava ona ou faailoa moni se tosinaga ma agai pea i luma i lo’u olaga, ae e i ai le mana i le aveesea mai o mea mai le pogisa ma tuu atu i le malamalama o Keriso e pa’i atu i ai ma faamaloloina ai. E faapei o le faamaeaina o le ata; e faapei o le aapa atu, ma agaigai atu ai i le malamalama. E le o se faigamalaga e ausage. Ou te faapea atu o se faigamalga a se aiga; o se faigamalaga a se nuu. O le lagolagosua mai lo’u epikopo, o lo’u toalua, le lagolagosua mai a’u uo vavalalata i le galuega ma e matou te faigaluega faatasi, a o ou lagonaina lo latou alolofa ma le lagolago i lo’u olaga e ala mai ia te i latou, ou te lagonaina le alofa ma le lagolagosua mai le Atua.

O le a le te’a ese lava ia tosinaga. O le a i ai pea lava i lo’u olaga atoa, ae ou te le o lagonaina o i ai se mea o toesea mai lo’u olaga. Ia te au lava, o le ola le faauigalua lena; o le mauaina o lena fiafia autu i lou loto. Ma ia te au lava, e taua le faaogatusa o lena fiafia autu ma o’u talitonuga faapea le talalelei. O le mea lena na aoga mo au.

O Loo Faaauau Pea Le Tala a Ricardo

O le tatala atu e le faigofie pea. E lavelave, ma e manaomia ai le tele o le lototoa e tuu atu ai oe lava faapena. Sa tulaga ese tele lenei tausaga aua sa iu ina ou faailoa aloaia atu ai ou te tosina atu i alii. Sa ou lagonaina pea lava lena mea, ae ou te lei malamalama lelei i ai, ou te lei iloa foi pe faapefea ona ou ola ai e faatatau moni i ia lagona. O le taliaina o lena mea e ono faigata mo nisi Au Paia o Aso e Gata Ai ona malamalama ai. E mafai ona foliga mai e pei o le taliaina o le tosina atu i le itupa e tasi, ua ou solia ai se poloaiga. Ia te au lava ia, e leai se mea e mafai ona ‘ese mai le mea moni. O lena malamalama ma le faatuatuaina ua aumaia ai le toafilemu i lo’u olaga.

Se’i o’u faasoa atua ia te outou la’u tala e faapupula ai pe na faapefea ona liua lo’u TIT [Tosina Atu i le Itupa e Tasi] mai se mea tiga ma le faalumaluma e avea o se faamanuiaga. Ioe, o se faamanuiaga!

Ua ou fiafia i lo’u iloa ai i lo’u loto e faapea o lo’u TIT e le ta’uilogaina ai a’u o se tagata po o se atalii o le Atua. Ua aumaia ai ia te a’u ni meafaigaluega ia ua mafai ai ona faamanuiaina isi a o ou mulimuli atu i le Faaola.

Na amata la’u malaga ina ua fa o’u tausaga. Sa ou fanau ma ola ae i le Aai o Mekisiko, o le ulumatua o tamaiti e toalima. Sa ou ola ae i se nofoaga tumu tumu, e tau leai ni avanoa paganoa, ma le mau aiga potopoto ma tagata asiasi fegasoloa’i.

E toalua ni alii na matou nonofo faatasi na sauaina feusuai a’u e ala i le faia faafoliga o loo faataalo se tamaitiiti. I lena matua o o’u tausaga, sa ou le malamalama i le mea sa tupu. Sa na ona ou manatuaina le faananau atu ia i la’ua e ala i lagona sa la faaosofia i totonu ia te au. Sa matuai malolosi lava ma fenumiai mo a’u. Sa le’i faia faamalosi; ae i lona tuufaafeagai, sa la aumai ia te au ni lole ma le la gaua’i mata’itu.

O le gauai mata’itu mai o se mea lea sa ou naunau i ai ma talia. Ae paga lea, sa o se mea na fesuia’ia ai lo’u agaga ma sa aafia ai lo’u fesootai atu ma vaai atu i alii i lo’u olaga atoa. Ou te le o mautinoa pe o lea mea o le faapogai lea o o’u tosinaga faaletino i alii, ae na saofaga i faalogona ma mausa ia na aafia leaga ai a’u i tausaga mulimuli ane.

O le feteenai ai i le faapogai o o’u lagona e le afaina lea ia te a’u. O le mea taua ia te a’u, ua mafai nei ona ou malamalama i le ala na avea ai lenei aafiaga ma mea na aafia ai le ala na ou vaai ifo ai ia te au lava o se alii ma o se atalii o le Atua.

Sa ou lagonaina pea lava le feteenai ma o’u lagona o lo’u tulaga agavaa. Sa ola a’e ma le maasiasi mo le silia ma le 40 tausaga o lo’u olaga. O le mea e lelei ai, sa ou ola a’e i totonu o se aiga alolofa. Sa ou toaga pea lava i le Ekalesia. Sa fesoasoani moni lena mea ia te au ma ou maua ai le faamoemoe. O le ta’ua ai o lena mea, sa ou lagonaina lava i taimi uma lo’u le agavaa mo le Faaola.

I lo’u ola a’e ai, sa ou lagonaina e pei sa ese la’u vaai atoa ma le taliaina o le tele o mea. Sa ou fiafia e tusiata, fatufatu mea fou, ma malamalama ma talisapaia le matagofie ma le mananaia o mea uma sa siomia ai a’u. Ou te manatua sa ou faia ofu mo pepe taalo a o’u tuafafine ia sa ou mamanuina e faaaoga ai solopepa. Sa la fiafia i ai! E moni, sa ou faia e aunoa ma le vaai i ai o lo’u tama. E sillia ma le faatasi na fai mai ai lo’u tama ia te au ia ou tautala faatamatane, e taalo soka, e fai sa’u uo teine, ma ia ou fiafia i mea e fai e tama. E tele ina maligi ai ou loimata i lena mea, aua sa ou le malamalama pe aisea lava ua avea ai lea mea o se mea mamafa. Ou te le o faamanu’alia ai se tasi. Ou te iloa na ia ta’u mai nei mea ona o le alofa, ae o ana tala na atili ai lo’u maasiasi ma afua ai ona atili ese o’u lagona. Ou te manatu o le mea lena ou te lei lagonaina ai lava se to’amalie e talanoa ai ma ia e uiga i o’u lagona TIT vagana ai i le taimi nei. O lo’u tama e ese le loto alofa ma o loo faapena lava, ae ou te lei lagonaina lava se sootaga malosi ma ia, o se mea o loo ma galulue nei i ai.

I le aoga ou te matauina ai ni tama aulelei faapea foi ni nai teine, ae peitai o lea feteenaiga sa faapologaina ai a’u. O se feteenaiga sa ou teu faaliloliloina, sa nana i atufola o puipui sa ou fauina e puipuia ai a’u lava.

O se tasi o na atufola puipui, o meaai. I se tasi taimi i lo’u olaga, o lo’u mamafa sa silia ma le 300 pauna. Ou te lei lagonaina ou te aulelei pe lagona mautinoa foi faatasi ai ma ou lagona le mautonu i a’u sootaga ma alii ma tamaitai. O lea tauiviga sa faamanualia ai foi lo’u agaga. Sa ou iloa na i ai le Faaola iina mo a’u, ae sa ou le iloaina pe faapefea ona aapa atu ia te Ia. Na pau le mea na ou maua ai le lototele o le vaai faalemafaufau lea ia te a’u lava o tauaveina e le Faaola.

Sa ou a’oga i le kolisi i le I.S., ma sa ou tauivi iina ia iloa le mea sa ou lagonaina, aemaise mo isi alii sa matou masani. O se tasi o ia alii iloga, na matua ootia ai lo’u agaga ina ua alu i sana misiona. Ou te manatua lo’u mafaufau ma fai ifo ia te a’u lava, “O le a ea le mea lea e tupu ia te au? Aisea ua faapenei ai o’u lagona?” Sa ou iloa na ou manaomia se fesoasoani, ae ou te le’i iloa po o gafea e amata ai. Sa ou maua le lototele e talanoa ai i se faufautua faasoifua manuia. Sa ia fesoasoani mai ia te au i le sauaga faalefeusuaiga, lea sa faigata tele, ae ou te lei saunia e talanoa i ai e uiga i lo’u tosina atu i le itupa e tasi.

E oo ane i le taimi ua 27 o’u tausaga, sa amata ona ou lagonaina ua ou manaomia se faamoemoega sili atu i le olaga. Sa ou matuai fefe lava e oo lava i le mafaufau e faaipoipo. Sa ou manatu moni lava o le a ou nofofua e faavavau. Sa ou ole atu i le Tama Faalelagi e fesoasoani mai ia ou mulimuli i le Agaga ma faailoa le tagata e tatau ona ou faaipoipo i ai. E lei pine ona mavae atu lena, ae ou feiloai i lo’u toalua. Ou te manatuaina lelei lava le aso na ma feiloai ai. Sa ou lagonaina le tosina atu ia te ia mai lava i le aso muamua. Sa foliga fiafia o ia, lalelei, ma mautinoa. Sa i ai foi le toafilemu i ona foliga; sa ou manao foi i lena toafilemu i lo’u olaga.

Sa amata ona ma eva faamasani. Sa i ai taimi sa faigata ai lava faalelagona le faatasi ma la’u uo teine i se nofoaga faitele ae ou vaaia ai ni alii e aulelei. Sa ou inoino i na lagona. Sa ou lagonaina le toilalo, ma le le agavaa mo ia ma le Atua. Ina ua amata ona ma faaaloa’ia ma la’u manamea la ma sootaga, sa ou faamatala atu ia te ia e uiga i le sauaina faalefeusuai o a’u ma o’u lagona mo alii. O le taimi lena, sa leai ni a’u upu po o ni meafaigaluega e faamatala lelei ai mea sa ou lagonaina.

Sa ia fai mai sa faanoanoa ona o lo’u feagai ma nei mea na o a’u, ae sa lei aafia ai ona lagona mo au. Peitai, na te le’i iloaina pe o le a le tulaga na oo i ai lo’u aafia i le TIT. Sa ia fai mai e alofa o ia ia te au e tusa ma lo’u tulaga o i ai, ma sa faamautu atu e le Agaga ia te ia e ala i faaaliga patino o a’u le alii e tatau ona faaipoipo i ai. Sa ma faamau ma sa ma faaipoipo i le Malumalu o Oakland Kalefonia.

E mafai ona ou fai atu o lo’u olaga atoa, sa ou lagonaina ai pea lava e tatau ona ou mafuta atu ma le Alii i le mea sili ou te mafaia. Sa ou lagonaina, i le ta’ele o lo’u loto, e i ai se faamoemoega o lo’u olaga tusa lava po o a ni o’u tofotofoga. O le talitonu ai i lenei faamoemoega na aumaia ai le faamoemoe ia te a’u. Ae e lei tupu vagana ua aulia le 40 ma ona tupu o o’u tausaga na amata ai le faagasologa o lo’u faamalologa.

O se fonotaga i le galuega e faapea o le a suia ai lo’u olaga mo le lelei sili atu. Sa ta’ua e se uso faigaluega lona aafiaga i le tosina atu i le itupa e tasi, i le taimi o la matou fono. Ou te manatuaina le vaaia ma le lagonaina o le talitonu mautinoa tele na susulu mai ia te ia. Sa leai sona tau faalalolalo mai pe maasiasi foi i lena mea. Sa tautala o ia ma le lagona mautinoa e faapei e le o se mea matuia. Sa ou vaaia se toafilemu tele i ona foliga, ma sa ou mafaufau ai, “Ou te fia manao i lena toafilemu. Ou te fia manao i lena saolotoga ou te avea ai a’u o a’u lava ma ia le tau faalalolalo fua mo se mea ou te lei filifilia.”

Mo le uluai taimi i lo’u olaga, sa ou saofai ai faafesagai ma se tasi sa mafai ona tutusa ni o ma lagona. Sa ma o fai se ma vai’aiga o le aoauli, ma o se mea fiafia le talanoa ma se tasi e malamalama i le mea sa feagai ma au. Sa ma amataina se faigauo a o faagasolo malie ona ou amata tatala atu la’u talanoa ma lagonaina lana lagolagosua.

Sa o se mea taufaafefefefe le soona tautala atu e uiga i se mea sa ou teu lilo i lo’u olaga atoa. Ae ina ua oo ina faatuatuaina tele au, sa matuai faateleina foi lo’u lagona mautinoa. O le tali mai o tagata sa matou fegalegalea’i sa latou alofagia, lagolagosua, ma malamalama. O nisi na oo ina faaalia se manao faamaoni e aoao atili.

Ua oo ina ou iloaina a o ou faasoa atu la’u tala, o loo i ai le Agaga iina na te molimauina. E foliga mai e tuia ai loto ma mafaufau ina ua oo ina malamalama o i tatou uma o fanau a le Atua. Po o a lava mea o tatou feagai, tatou te agavaa uma lava mo le Togiola. Mo lena mea ua matua faamanuiaina ai lava au.

O le lagolagosua a lo’u toalua sa taua tele i lo’u alualu i luma. O lea faapupulaga fou ma le faatuatuaina ua suia ai felavasaiga o la ma faaipoipoga. Sa faigata tele i nisi o taimi. Sa ao ai ina ma aoao ia faaleleia atili a ma feutagaiga. Sa ma iloaina e leai se tasi o i ma’ua e mafai ona faatinoina manaoga uma o le tasi ma le isi. Sa avea o se fetuunaiga mo i ma’ua uma ina ua ou atiina a’e ni faigauo e lagolagoina ai a’u i la’u malaga. Ua fiafia o ia ona ua ia te a’u se lagona mautinoa sili atu ae sa ia faamanatu mai ai foi ia te au e manao na te iloaina o ia e numera tasi i lo’u olaga. Ou te le’i iloa ua matuai tele naua lo’u suiga e ala i lenei aafiaga.

Sa ou matuai manao lava e fesoasoani ia te ia e auai faatasi ma a’u i la’u malaga ma ia mautinoa na te lagonaina e alofagia o ia, e manaomia, e lalelei, ma malu puipuia.

O lo’u toalua, o lo’u lagolago aupito sili lea ma le fatu o lo’u olaga. Ua na o ia lava ua ou fausiaina ai faatasi se sootaga faavavau e le gausia, ma e leai lava se tasi e mafai ona ia motusia. E manaomia galuega, feutagaiga, femalamalamaa’iga, ma le paleni a o ma savavali faatasi ai i lenei malaga. O la ma faaipoipoga o loo gasolosolo lelei pea; ma te fefaamalosiaua’i o le tasi i le tasi e ala i le faatuatuaina ma le faamaoni atili. O le ki i le malosiaga o la ma faaipoipoga o le avea o le Faaola ma totonugalemu o o ma’ua olaga.

E faaauau pea la’u malaga. Ou te lei faavasegaina tonu mea uma, ae ou te iloa o lenei faapupulaga fou, o lo’u faatuatuaina, ma la’u sootaga ma le Faaola ua fesoasoani lea ia i ma’ua. E logomalie tele le agavaa mo le Togiola a le Faaola ma le le toe lagonaina o se faapologa o lo’u tosina atu i le itupa tutusa. Ua mafai ona ou vaai ia te au lava i lo’u faasinomaga: o se atalii o le Atua, o se alii mao’i e agavaa mo faamanuiaga o le ola e faavavau. Ua ou iloaina nei e leai se mea o faaletonu pe le o atoatoa pe manaomia ona toefauina i lo’u loto ma lo’u agaga.

Ua mafai ona ou fai atu ua taunuu ia te a’u le folafolaga na faia ia Moronae i le Eteru 12:27: “Ma afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalalo ai i latou; ma ua lava lou alofa tunoa mo tagata uma o e e latou te faalotomaualalaloina i latou lava i ou luma; aua afai latou te faalotomaualalaloina i latou lava i ou luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou.”

Ou te fiafia pea lava pea i lena mau ma ou te matuai manao ai lava e faaaoga i lo’u olaga, ae sa le mafai ona ou faavasegaina pe faapefea ona faaliliu lenei vaivaiga e avea ma ni faamanuiaga. Ua ou malamalama nei o lo’u TIT e le tau avea o se vaivaiga.

Ua ou malamalama nei e talu ai o nei aafiaga, ua ou tuputupu ae ai ma ua mafai ona fesoasoani e faatupulaia ai le galuega a le Alii. E i ai pea lava pea Lona Agaga faatasi ma au.

Sa aoga lava le i ai o le lototoa e tatala ai la’u faailoa. E matuai moni lava!

Tala a Elisapeta: Le Toalua o Ricardo

Sa iloa e Elisapeta o Ricardo o se alii lea sa tatau ona ia faaipoipo atu i ai. Sa lei atoatoa la la’ua faaipoipoga, ae ua taufai lelei atili i la’ua ona o le la mafutaga. O se tasi o a la tauiviga o le aafiaga o Ricardo i le tosina atu lea i le itupa e tasi. O le faagasologa faigata o le malamalama ai pe faapefea ona faasili le alofa ma le lagolagosua o le tasi i le isi o ni taimi pagatia tele na, ae o le faalagolago i le Togiola ma le faamatalaina pea o laina o fesootaiga, na la tuputupu a’e ai faatasi.

Sa ou fanau ma ola a’e i Kalefonia i se aiga o le Au Paia o Aso e Gata Ai. Sa ou ola a’e faatasi ma ni tuagane e toalima. A o ou laitiiti lava, sa ou iloaina a oo i le taimi ou te faaipoipo ai, ou te lei manao e faaipoipo i se tasi e faamanatu mai ai ia te au ou tuagane. E le faamanatu mai ia Ricardo se tasi o o’u tuagane.

Sa ma feiloai ma Ricardo i le taumafanafana o le 1997. Sa amata lo’u tausaga sinia i le kolisi faatasi ai ma la’u sini ou te faauu i le tautotogo e sosoo ai i le matata o faamaumauga faafuainumera. Sa ou matuai taulai atu lava i lo’u faauuga ma ina ua ou feiloai ia Ricardo, ou te lei mafaufau moni lava i se mea. Sa na o ia lava o se uo a la’u paaga na ma potu faatasi. I se tasi po na sau ai o ia e vaai la’u paaga, o ia o se teine a’oga faavaomalo, e pei foi o Ricardo. Sa ou i le umukuka e saunia la’u meaai o le afiafi ma sa ‘ou nofo i le laulau o le umukuka e galue i la’u numera na aumai e fai i le fale. Talu ai ona sa ma talanoa muamua i nisi o taimi, sa ou lagona le taugamalie e nofo mai, ma sa ou valaaulia o ia ma te aai i lena po. Sa manaia le ma talanoaga ma faamasani atili le tasi i le isi. O lena afiafi a o talanoa mai Ricardo, sa ou maua ai se aafiaga uiga ese lava. Sa ou mauaina se faaaliga patino mai lo tatou Tama o i le Lagi o Ricardo o le alii lea e tatau ona ou faaipoipo atu i ai.

Ou te le’i oo muamua lava i se mea e ese le maoae i lo’u olaga. O le taimi lena, ou te lei talanoa atu lava i se tasi i se mea. O le po lena, sa aioi mai ai Ricardo ma te o i le ma uluai evaga faamasani. Ina ua mavae lena po, sa ou tilotilo atu ia te ia i se vaaiga fou atoa.

Sa faagasolo malie ona ma iloa o le tasi ma le isi i le gasologa o lena taumafanafana. E oo atu i le amataga o le semesa o le Tautoulu, ua avea i ma’ua o se uo tama ma se uo teine. E lei leva ona aloaia le ma faigauo, ae fai mai Ricardo e manao o ia e ta’u mai se mea taua ia te au a o ma saunia le ma ‘aiga o le afiafi i lo’u potu. O iina na ia faamatala mai ai e uiga i le sauaga faalefeusuai na o’o i ai a o tamaitiiti, i le va o le fa po o le lima o ona tausaga. Na te lei auiliiliina i le taimi lena. Na pau lana tala e faapea e i ai ona mafaufauga ma faalogona ma o nisi taimi o miti taufaamata’u. Sa ou lagona le faanoanoa mo ia ona o lenei mea na tupu. E lei suia e lena mea o’u lagona mo ia. Sa ou faailoa atu lo’u lotofaavauvau ma faamautinoa atu ia te ia o lona faasoa maia o le mea na tupu ia te ia e lei suia ai o’u lagona mo ia. Na te lei faaalia mai nisi auiliiliga, ma ou te lei fesiligia foi. Sa ou maua le lagona faagaeetia ona o le lava o lona taugalemu e masua mai ai ia te au se mataupu maaleale ma le faigata.

Na vave ona aafia le faaipoipoga ia ma talatalanoaga. Sa faamalamalama mai Ricardo ia te au i se tasi po i le faaiuiuga o Ianuari o le 1998. Sa ma faamau mo le tusa ma le ono ma le afa masina. O le taimi lena, sa ave ai le ma vasega sauniuni mo faaipoipoga i le BYU, sa ou faauu, ma sa ia faamaeaina lana polokalama faata’ita’i mo galuega pe tusa o le lua masina i le Aai o Niu Ioka. Sa faamauina i ma’ua i le Malumalu o Oakland Kalefonia i le faaiuiuga o lena taumafanafana.

Sa vave ona amata lo ma aiga ma ua toaono nei le ma fanau aulelei lava. I le aluga o nei tausaga, sa leai ma so’u iloa e uiga i ona tosinaga i le itupa tutusa, ma ou te lei faalogo foi i lena faaupuga. Sa i ai aluga uumi o taimi e le talanoa ai o ia i na mafaufauga ma lagona sa ia ta’ua i le amataga o la ma mafutaga. Atonu e i ai ni taimi na te ta’ua ai faapea sa faia sana miti leaga, ae na pau ai lava lena. Sa ou matuai le iloaina lava se tele o le maasiasi sa ia lagonaina i na tausaga uma. Sa ma toaaga pea lava i le lotu ma pisi e tausi lo ma aiga. Soo se taimi ma te o ai i le malumalu, e fai mai ai lava o le a ou mauaina le malo selesitila, ae o ia e leai. Sa ou le malamalama po o fea e o mai ai na faamatalaga.

E ese le alofa ma galue malosi ma sa ia faatinoina e le aunoa ona tiute o se tane ma se tama. Sa ou matuai le iloa se mea e uiga i lona tosina atu i le itupa e tasi ma le maasiasi na ia lagonaina ona o na tosinaga.

Sa ou manatu e le tatau ona ia maua ia lagona faavaivailoto. Soo se taimi na te faaleoina mai ai lena popolega, sa ou fai atu ai ia te ia, e le o sona sese na afua ai le sauaina, o le mea lea, i lo’u lava manatu, o na mafaufauga ma lagona e le ona o sona sese.

E tele taimi sa ma taumafai ai i ni upu taufaapipii, ae sa lei taugamalie lava. O le faaupuga faafafine sa tele ona faauigaga le lelei i le tele o faatuatuaga faaKerisiano, e faapei foi o le faaupuga tosina i itupa uma e lua. I le amataga o le 2015, sa feiloai ai Ricardo ma se paaga faigaluega o le sa tatala mai lana talanoa e uiga i le TIT ma sa faaipoipo ma le fiafia ma ua toafa lana fanau. O iina na aapa atu ai Ricardo i se vaega lagolagosua ma sa amataina ai ni faiga uo fou. O nei mafutaga, sa mafai ai e ia ona lagonaina le aoga o le Togiola i lona olaga. Ua ia le toe lagonaina le masiasi pe a oo i taimi e talanoaina ai ona tosinaga i le itupa tutusa.

Ua ou matua fiafia lava ua iu ina ia lgoanina le atoatoa ma ua mafai ona ia iloa le mea e fetaui mo ia i le fuafuaga e faavavau a le Atua mo ia ma i matou o se aiga.

O le ta’ua ai o na mea, o lea faguga fou ia Ricardo na aumaia ai foi ni nai feteenaiga i la ma’ua mafutaga. Sa tofu i ma’ua ma le mau fesili ma sa lagonaina foi e lei ia i ma’ua tali uma. Sa amata e Ricardo ona faia ni uo fou, aemaise i latou e feagai ma le TIT. Sa amata lelei lava ae sa avea o se malaga faigata mo i ma’ua uma.

O se mea e tasi na fesoasoani moni ia te au e lagolagosua ai ia Ricardo ina ua amata lana malaga, o le fautuaga a o’u matua, ina o o’u tuputupu ae, ia ou faaipoipo atu i la’u uo aupito mamae.

O lea a oo ina ma talanoa ma Ricardo e uiga i faafitauli eseese e faatatau i lona TIT, ou te taumafai lava e faalogologo o a’u o lana uo aupito mamae ae le o se ava fuā. Sa ma taumafai foi e fatufatu se siosiomaga toafimalie mo i ma’ua ma te talanoa ai e uiga i o ma mafaufauga ma lagona.

Ou te fiafia e faalogo e aunoa ma le faamasinosino i faamatalaga taitasi. Ua ou iloa e taua mo ia le faaleo mai o ona manatu, aafiaga, atugaluga, tosinaga, ma mafaufauga ia te au ina ia mafai ai ona agai atu i isi autu. E tele taimi e na ona manao ai o ia ou te faalogo atu, ma ou te le tau foiaina se mea.

O se mea e tasi na ou faalogo ai i la ma vasega sauniuni mo faaipoipoga i le kolisi e faapea, o le a ou manatuaina pea, “o se toalua sili e mafai ona faataunuuina na o le 80 pasene o manaoga o a la’ua soa.” Ua fesoasoani lena mea ia te au faapea e le tau avea a’u o se tagata poto faapitoa po o se faufautua faalesoifua manuia. E tau lava ina ou faaali atu ia te ia le alofa ma le faaaloalo.

Mo se vaitaimi sa ou lagonaina ai lo’u aofia ai i le malaga a Ricardo. Ae a o faagasolo pea taimi, sa amata ona ou lagona ua suitulagaina a’u. Sa tele ona auina atu ana feau tusitusia pe a sau i le fale i le po i le mavae ai ona alu mo le 10 itula i le galuega. A le o a’u e vave alu ese pe a uma se ‘aiga faatopetope o le afiafi e faataunuu lo’u valaauga faale-Ekalesia, o ia ua tatau ona alu e faataunuu foi lona valaauga faale-Ekalesia. Mo ni nai masina sa alu ai o ia i se vaega lagolagosua e ta’itasi i le vaiaso. O lea la, e oo ane i le Aso Faraile, ua ou vaivai ma ua ou saunia mo sina mapusaga. Sa faigata mo au ona o ona taulaiga uma i nei uo fou o le TIT. Sa ou lagonaina e pei ua le o i ai o ia mo a’u, ma tamaiti foi, pe a sau i le fale. O nisi taimi sa ou lagonaina ai ua pei o se tina nofofua, e fafaguina tamaiti e toaono ma tapena mo le aoga—ave i latou i mea e tatau ona i ai, galue i le Sikauti a Tamaiti Laiti ma le Faatuatua i le Atua, ma ia mautinoa ua fai a latou meaa’oga e aumai e fai i le fale, fai le tagamea, kuka ma faamama, ma sauniuni i latou e momoe. Sa faifai pea lava lea faataamilosaga e le aunoa, ma sa lei lava sa’u moe. O lea sa tele ina ou tagi pe a o tagata uma i le a’oga ae alu Ricardo e faigaluega. I se tasi taimi sa i’u ina ia “maua le fe’au” aua sa ou imeli ia te ia a’o faatasi ma ana uo. Sa tele ni itula sa ma talanoa ai, ma sa ia fai mai o le a ia lafoa’i mea uma mo a’u. Sa manaomia ai ni talanoaga se tele, malamalama, aotauina o i ma’ua lava, fesoasoani ia te ia ia aveesea le maasiasi sa ia te ia i lona olaga atoa, faia ni tautinoga ma, o le mea aupito sili o mea uma, o le fefaasoaai o mea uma ma le tasi ma le isi.

Mulimuli ane na i’u ina ou lagonaina e pei o a’u lava le numera tasi ia te ia. Ina ua ia malie e tuu ese lana telefoni feavea’i pe a sau i le fale mo ni nai itula ma o le a ia nofo mai mo tamaiti ma a’u, o iina na tele se eseesega na maua ai. Sa ia folafola mai foi e tuu mai mo a’u le 10 minute o lana gauai mataitu pe a momoe tamaiti. O loo galue ai pea o ia i lena mea. E pisi tele le olaga mo i ma’ua e toalua, ae ua ou vaaia ua ia faia se taumafaiga ia ou lagonaina ai le saogalemu, alofaina, lalelei, ma taua i lona olaga. Ma te talanoa ma feutagai pea e le aunoa. Matou te le tuuina atu lava se mea i fematea’iga.

I se tasi taimi, a o ou talanoa i le ava a se alii TIT i le nuu, sa ia fai mai ia te au, e sili atu ia te ia ona talanoa atu lana tane ia te ia nai lo se isi tagata e uiga i lona TIT ona o le a ia sailia ai se tasi e talanoa i ai ma maua mai ai se lagolagosua.

Ou te manatu i le avea ai ma ava a tane o loo feagai ma le TIT, ua iai ia i matou se tulaga e le aumaua. E mafai ona avea i matou a le o ni lagolagosua lelei ma fesoasoani i a matou tane ia maua se faavae mautu ia Keriso, pe e mafai foi ona matou taumamao ese i matou lava ma le maua ai se avanoa e aumaia ai a matou faaipoipoga, o matou taitoalua, ma i matou lava faatasi ai ma lo tatou Faaola.

O se aafiaga faalotomaualaloina moni lava. E le sili a’e so matou lelei nai lo a matou tane, ma e le sili a’e foi so latou lelei nai lo i matou.

E le afaina lava pe o a tulaga po o faigata matou te feagai. E leai se faaipoipoga o le a mafai ona lauusiusi sei vagana ua mafai e se ulugalii ona tutufaatasi ma le alofa ma le tautinoga atoatoa i na matafaioi paia na faia i le malumalu.

E gauai tele Ricardo i le faaleoina mai ia te au i aso taitasi le tele o lona alofa ia te au. E lei faapea ua ou taumateina lava poo a ni ona lagona. Ou te lagonaina lava lo’u faamanuiaina i le i ai o se tane e pei o ia.

Ou te iloaina mo a’u ma mo ia foi, e lauusiusi la ma’ua faaipoipoga pe a maua lo ma taimi o le-tasi-mo le-tasi ma tausisia le tatala o a ma’ua laina o fesootaiga faatasi, ai ma tautinoga o le alofa. Ou te alofa ia te Ia!

Tala a Mark: Epikopo o Ricardo

O Mark sa le na o se epikopo o Ricardo; o ia foi o se uo ma se e talitonuina, o le mea lea e matuai faafetai ai lava o ia ona sa lava le mautinoa o Ricardo e faasoa ane ai lana tala e uiga i le tosina atu i le itupa tutusa ia te ia.

E toatele tagata lelei na ou maua le avanoa e auauna faatasi ai i le tele o tausaga. O i latou uma lava na fesoasoani ia te au ia ou iloa le agalelei ma le alofa moni o loo i ai i tagata taitoatasi, e faaalia manaoga faavae ia alofagia ai ma alofa atu ai i isi. O Ricardo Rosas o se tasi o na tagata.

E oo lava foi a o lei valaauina a’u o se epikopo, sa ma galulue ai ma Ricardo i le tele o valaauga. Na ma vaai i tauiviga ma tulaga manuia o le tasi ma le isi. O nisi taimi e faigata mo tagata ona talanoa tatala mai i se epikopo po o se uo mafana e uiga i mea, aua e fefefe ina ne’i faate’ia pe le fiafia foi pe afai latou te faailoa atu ni faamatalaga totino faaletagata lava ia. Peitai, ou te faafetai ona sa lava le mautinoa ia Ricardo e faasoa mai ai ia te a’u lana tala e uiga i lona tosina atu i le itupa e tasi. Sa fesoasoani lea ia i ma’ua uma e aoao ai ni lesona semanu ma te le iloaina.

Sa foliga sa fai si musu teisi o Ricardo i le taimi muamua. Peitai, ou te faafetaia pea i latou o e naunau e sailia le lagolago pe a latou lagona le faanoanoa, tuuatoatasi, loto popole, le mafaamagaloina, po o le fememea’i. E le gata sa o se avega mamafa ua sii ese mai ona tau’au, ae o se mea foi na pupula ai o’u mata. Sa ou iloaina ai atonu e i ai foi isi o loo i ai i le tulaga lava lea e tasi, pe o i ai foi isi atugaluga ma atonu o loo tanutanumia lava foi i totonu.

O le faaalia mai o le tosina atu i le itupa tutusa, sa lei avea ma mea e suia ai lo’u faaaloalo mo Ricardo. E lei suia ai foi o’u mafaufauga e faatatau i lona tomai e auauna ai, alofa, ma fesoasoani i isi.

Sa faaauau pea ona ia auauna atu i valaauga eseese, tausisia se faaipoipoga matagofie i le malumalu, faatumauina le agavaa mo le malumalu, ma tausia lona aiga i le amiotonu. O nisi i totonu o le Ekalesia atonu e aloese mai le talanoa e uiga i o latou lava tosinaga i le itupa e tasi ona e fefefe i tagata nei vaai atu ia i latou faapea e “leaga” pe “le agavaa.” Ua ou molimauina le faafeagai ia Ricardo. E le leaga nei tagata o le ekalesia. E alofaina i latou, ma e tutusa lava lo latou aafia ai i le olaga ma ona tulaga luga ma lalo e pei o isi tagata uma.

E faaosoosoina i tatou uma i auala eseese. E oo lava i le Faaola sa faaosoosoina.

Afai na o faaosoosoga e faitauina ai le natura faaleagaga o le tagata, o le a matua leai lava so tatou faamoemoe.

E manatua ai se mau ou te fiafia i ai e tusa ai ma Ricardo. I le Tusi a Mamona, o loo faaalia mai ai e le Alii se aoaoga faavae maoae i le perofeta o Moronae. Eteru 12:27 e faitauina: “Ma afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalalo ai i latou; ma ua lava lou alofa tunoa mo tagata uma o e e latou te faalotomaualalaloina i latou lava i ou luma; aua afai latou te faalotomaualalaloina i latou lava i ou luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou.”

Ua faaliliuina e Ricardo se vaivaiga, pe o le mea sa ia manatu ai o se vaivaiga, i se malosiaga e ala i lona sau i le Alii, faalotomaualaloina ia lava, ma sailia le malamalama e ala i le Agaga.

Ua manao o ia e faasoa atu i isi lana tala—e le mo se aloaiaina faaletagata ae ia ta’u atu ai i isi ia iloa o loo i ai le faamoemoe, e ala i le Togiola a Iesu Keriso; ia maua le fiafia i lenei olaga ma le isi.

E tele naua isi mea i le tala a Ricardo, ae o le mea lena a ia e faasoa atu. Ou te iloa o ia o se tagata ua matua faamaonia le sili ona lelei. Ua ma taufai maua se malamalamaaga sili atu nai lo le mea sa i ai muamua e uiga i le agaalofa, lototoa, malamalama, ma le faatuatua i le Alii o Iesu Keriso.

Tala a Nick: Uo se Paaga Faigaluega a Ricardo

O le faigauo a Ricardo na lu’iina ai le ala na manatu ai Nicholas i le nuu o LGBT, aemaise le au faafafine o le Au Paia o Aso e Gata Ai Ae o le mea moni, aisea e le tatau ai ona faatagaina se tagata lelei o le Au Paia o Aso e Gata Ai ona feagai ma le tosina atu i le itupa e tasi ma i ai pea sana molimau ma le faatuatua ma ola agavaa?

O faigauo sa lei faigofie i taimi uma ona ou maua. A o o’u tuputupu a’e, sa tele ina fesiitai solo lo’u aiga. E ui ina sa ou maua ai avanoa e tele e feiloai ai ma tagata fou ma maua ni uo fou, ae na toetoe ina le mafai ai ona faia ni faigauo uumi ma le aoga. Sa foliga mai e soo se taimi lava sa tau amata ai ona ou faia ni fesootaiga, e siitia ese ai foi lo’u aiga i se nuu fou mo se faamoemoega fou. Ona o le ituaiga olaga na ou ola a’e ai, o i latou na ou ta’ua o a’u uo sa foliga e toaitiiti ma tuuvava.

O le ola a’e ai faapea, na afua ai ona ou tomanatunatu tele i lo’u olaga; sa tuua ai au ma se manao ia maua ni uo e mafai ona ou fesootai i ai ma faasoa atu i ai aafiaga patino—uo e mafai ona ou ta’ua “o uo mo le olaga atoa.”

O le aso, e mafai ona ou fai atu ma le faamaoni ua ou mauaina se na uo. Sa ma faigaluega faatasi ma Ricardo mo se taimi umi ae ma te lei faia se sootaga. I le tauanauina lemu ai e uunaiga a le Agaga ma, mulimuli ane, o uunaiga faamalosi a lo’u toalua (o le e lelei tele i agafesootai), sa tonu ai ia te au e fesili ia Ricardo pe manao e faatasitasi o ma aiga. Sa peiseai na alu ai ni nai masina o fai fuafuaga ma seti se aso e mafai ona feiloai ai o ma aiga.

A o lei faia lenei faatasiga fegalegaleai, sa fesili mai lo’u toalua e uiga ia Ricardo. Sa ou faamatala atu ia te ia ni nai mea sa ou iloaina e uiga ia te ia: e sau mai Mekisiko, o ia o se faatonusili o fatufatuga i le galuega, e agalelei, ma e i ai lana fanau pe talitutusa lava ma le matutua o le ma fanau. Ona, pei lea e talasua ai, na ou fai atu ai i lo’u toalua, “Ana faapea e le faigaluega i le Ekalesia, ma fai sona aiga, semanu ou te manatu o ia o se faafafine.”

Ou te manatuaina patino lenei talanoaga aua i se taimi mulimuli ane, ina ua talitonuina a’u e Ricardo, atonu e mafai ona outou tomanatu i ai, na lu’itauina ai le ala na ou maitauina ai le tele o mea, e pei o lo’u malamalama e uiga i tagata LGBT ma o’u manatu faivavale e uiga i isi. Sa lei faigata ona taliaina o ia i lona lava faasinomaga, o ia o la’u uo, ma o le a le suia lava lena mea. O le mea na to’atuga ai au o lo’u faapea ane lea o se “Mamona lelei” e le mafai ona feagai ma le tosina atu i le itupa e tasi.

Na vave ona oo mai ia te au le manatu “Aisea e le tatau ai ona faatagaina se tagata Mamona lelei ona taulimaina lenei mea ae i ai pea lava se molimau ma le faatuatua ma ola agavaa?”

Ina ua uma ona faamatala mai e Ricardo ia te au o ia o se faafafine, sa avea atili i ma’ua o se uo ua sili atu ona mamae. E tele taimi ma te o ai ma aai i le aoauli talu mai lena taimi ma faia ni talatalanoaga aoga se tele. E tele mea ma te fiafia i ai ma o ma manatu e tutusa sa ma fefaasoaai ai. O le faatuatuaga na tuu mai e Ricardo ia te au ma lana “matega” sa na ona faateleina ai o lo’u faatuatuaina o ia. Ua faagaeetia lava au ona sa mafai ona faigofie lona faasoaina mai ai o lena vaega o lona olaga ia te au; aua semanu e le faigofie.

E i ai taimi sa tauivi ai Ricardo i le faatautaiga pe faapefea ona ia vaai ifo ia te ia lava ma pe faapefea foi ona ia vaai atu i manatu o isi e uiga ia te ia. O nisi aso sa sili atu le faigata mo ia nai lo isi foi aso. I le avea ai o sana uo, sa ou iloa gofie ma sa faigata mo au le vaai atu o loo tauivi o ia e faavasega ni mea. O nisi taimi e faale-tausaafia ai tagata pe a fegalegaleai ma le faalapotopotoga o LGBT. I se tasi taimi, sa matuai iloga le le fiafia o Ricardo. Sa ma talanoa mo ni nai minute e uiga i le aluga o mea. Sa amata ona ia faalalolalo mai i le avea ai o se uo e mana’otele faapea ma lona matua “nutimomoia.” Na faateia ai a’u i lena mea. Ou te le talitonu e mafai, pe e nutimomoia lava foi tagata. E moni, o nisi o i tatou e eseese mea tatou te faafeagai, a o nisi foi taimi atonu tatou te lagona ai faapena, ae e le faapea ua nutimomoia i tatou.

Sa ou tautino atu ia Ricardo lena mea, o ia o la’u uo, ma sa ou opo atu ia te ia.

Fai mai Ricardo ua ou fesoasoani atu ia te ia i le tele o mea. Peiseai e sili atu ona moni ua ou aoao mai ia te ia ma sa fesoasoani o ia ia te au i le tele o mea nai lo lo’u fesoasoani atu ia te ia. Ou te faafetai lava i le avea ai o Ricardo o se uo i lo’u olaga ma o le a ou tu atu ma le faamaoni i lena alofa ma le faigauo i le umi e naunau ai o ia ou te tu atu i ona autafa.