“O Le Tala a le Aiga o Mackintosh,” Tosina Atu i le Itupa e Tasi: Tala a Tagata o le Ekalesia (2020)
“O Le Tala a le Aiga o Mackintosh,” Tosina Atu i le Itupa e Tasi: Tala a Tagata o le Ekalesia
O Le Tala a le Aiga o Mackintosh
Tala a Becky
Sa alofa lava ia Becky i lana tama o Xian. Ina ua faailoa ane o ia o se faafafine, sa faasolosolo malie ona aoaoina atili e Becky ni mea e uiga i le alofa sa ia manatu e matua le mafai ona faatino—aemaise e faapea o le alofa le faatuaoia e le faapea ua tuusaoloto Sa musu o ia e faafitia lona faatuatua, ma sa musu o ia e faafitia lona alofa i lana tama.
O a’u o se tagata o le Au Paia o Aso e Gata Ai, ma e i ai sa’u tama e faafafine. Ou te alofa ia te ia ma lo’u loto atoa, malosi atoa ma le agaga atoa. . Ma ou te alofa i la’u tapuaiga ma lo’u loto atoa, malosi atoa, ma le agaga atoa. O le fatu o lo’u faasinomaga. O le a ou le mafai, le mafai, le mafai ona fulitua lava i la’u tama, ma o le a ou le mafai, le mafai, le mafai ona liliuese lava mai lo’u faatuatuaga faalelotu. Ioe. Sa fesiligia a’u pe faapefea ma pe aisea foi. Ona sa faamanino mai e le Atua ia te au e ao ona ou alofa i la’u tama o Xian ma le le faatuaoia.
Ou te ta’u sa’o atu sa fai si umi faatoa ou malamalama moni i le uiga o le ‘alofa le faatuaoia.’ Sa ou faaluafesasia le “alofa” ma le “le amanaiaina.” Ae o le taimi lava na ou faavasegaina ai le uiga moni o le alofa le faatuaoia, sa sautuaselau le tupu o lo’u fatu—e le gata mo la’u tama ae faapea foi mo tagata uma i soo se mea. E loloto o’oo’o lo’u faatuatua. E le mafai ona ou faafitia. Ma o le a ou le faafitia lava foi lo’u alofa loloto mo la’u tama.
A o ou tomanatu i le ma malaga, e mafai ona ou vaaia mea e tele sa aoao mai e le Atua ia te au e ala ia Xian. Sa meme’i lo’u faatuatua i ni ala sa ou lei mafaufauina e mafai ona o’o i ai. Sa Ia aoao mai a’u i le uiga moni o le agaalofa, malamalama i lagona o isi, ma le alofa faamaoni. Ina ua fai mai Xian ia te au, “Mama, ou te le iloa pe o le a lo’u lumanai, ae e foliga mai e le mafai ona faaipoipo atu i se teine,” sa faigata ona faalogo atu i ai, aemaise ua iloa o la’u tama ua agai ese mai le Ekalesia. Ma o lea ua i ai nei o ia i se sootaga, ma sa aoaoina e lo matou aiga ia faalautele la matou li’o o le alofa. O le fulitua ia i latou o le a le ogatusa ma mea o loo aoao mai e le Faaola.
E ono foliga mai le alofa o se fesili i tulaga e pei ona matou iai, ae o le mea moni, o le tali lea. Sa ou aoaoina o a’u faatinoga, lea sa faatautaia e ala i le tatalo, sa aofia ai le aloaiaina o i latou matou te masani atonu foi o mafatia. Sa ou galue malosi tele e avea le alofa ma so’u faasinomaga. Sa ou aoaoina afai ou te taulai atu i itu aoga ma taumafai e foia tulaga faigata ma le alofa, ona ou iloaina lea o le matagofie ma le ofoofogia nai lo mala ma le lototiga.
A o tuputupu ae Xian, sa ou taumanatunatu e uiga ia te ia. Sa le o se mea sa mafai ona ou faaupuina, ma sa ou le mana’o e mafaufau tele i ai. Sa ou tafiesea o’u mafaufauga i lo’u fai ifo ia te au lava sa na ona ia le manao lava e fai sana teine a o lei alu i lana misiona. Sa ou matuai fiafia ona sa mana’o lava ia e auauna atu i se misiona, ma sa ia faia lava. Sa ia auauna atu i se misiona faamamaluina i le misiona a Detroit, Michigan. Ina ua ia toe taliu mai lana misiona, sa alu o ia i le aoga i le BYU-Hawaii, mo lona faailoga i galuega faaagafesootai. Ona oo lea i le tuuaga ia Tesema o lona tausaga sinia i le kolisi, sa ia auina mai ia te au se feau sa aofia ai le faamatalaga “Mama, o a’u o le faafafine.” Na ou lagonaina sa saunia a’u e le Alii mo lena mea.
I ni masina o lumanai lona ta’uina mai ia i matou, sa ou mauaina ai ni nai uunaiga malolosi faapea o Xian o le faafafine. O le mea sa ou fefe i ai o le a avea lea ma mea moni. Ae tusa lava, sa ou le manao e talitonu i ai. E oo lava foi ina ua uma ona ou faitauina upu, “Mama, o a’u o le faafafine,” sa ou tau le talitonu i ai muamua. O se mea na ou matua tei ai. A o magoto ifo i totonu le mea moni, sa saputu mai i lo’u mafaufau le mau fesili. O le a sa’u mea sese na fai? O le a se mea sa ao ona ou faia ise isi auala? E mafai faapefea ona ou fofo lona faafitauli? O a ni manatu o tagata?
O lena po muamua a o o’u nofonofo ma la’u tama i luga o le nofoa ma faalogologo, ma taumafai e faasagatonu i mea sa ou faalogo i ai, sa ou lagonaina lona tiga, ona faanoanoaga, ma lona faamoemoe mo se lumanai manuia. Sa ou ta’u atu i ai ou te alofa ia te ia ma o le a le suia lava lo’u alofa. Ona oo lea, ou te musu e ta’utino atu, ae sa amata ona ou avatu ia te ia ni fautuaga—e peiseai sa ou iloaina se mea e tasi lava e uiga i le mea ua feagai ma ia. Sa ou faasoa atu mea sa ou manatu o upu o le faamafanafana ma le faamoemoe e tusa ai ma le talalelei, ma lo’u le iloaina o ni pelu lava ia na tuia ai pea lava pea le loto o la’u tama. O mea ia ua uma ona ia iloa aua sa faalogo i ai faafiaselau a o tuputupu ae. E i ai nisi taimi, sa amata ai ona ou iloa sa manaomia a’u e Xian e faalogo atu ma alofa ia te ia, e faapei e leai se mea na suia. O le mea moni, o le tamaitiiti lava lea sa ou iloa ma alofa i ai.
Maimau pe a na mafai ona ou fai atu sa faigofie ma o se mea masani ia te au le na ona faalogo ma alofa. Ou te lei malamalama moni seia vagana se taimi ua leva mulimuli ane. Sa ou manatu o la sa ou faalogo ma alofa i lena po, ae sa ou iloaina sa mafai ona sili atu se mea ou te faia. Ou te faafetai mo se atalii onosai. Sa tele ona tagi o ia, ma sa ou le mautinoa pe aisea. Sa ou ta’u atu pea ia te ia ou te alofa ia te ia, ae sa tele naua loimata.
Ina ua toe foi o ia i le kolisi, sa ou taulai atu i le taumafai e “toe faufau” o ia nai lo le gaualofa ia te ia. E sili atu nai lo se isi lava mea, sa ou manao e faalogo ia te ia o fai mai e ui lava o ia o se faafafine, ae e tumau pea lona ta’utino atu i le talalelei. I lena auala, e mafai ai ona toafilemu lo’u loto ma o le a lelei mea uma. Ou te auina atu imeli ia te ia e tumu i mau ma saunoaga e sii mai taitai o le Ekalesia sa ou manatu o le a ia maua ai le mafanafana ma fesoasoani ai ia te ia e toe foi ane i le ala sa’o. Sa na ona atili ai ona faigata mea mo ia ma taumamao ai ma la ma mafutaga.
A o ou suia la’u taulaiga i le alofa ia Xian, matuai alofa moni ia te ia, po o le a lava, ma faalogo ia te ia, matuai faalogo moni ia te ia, sa toe faaleleia la ma mafutaga. Sa faaitiitia foi loimata.
Sa le gata o le alofa o le tali lea, ae o se filifiliga malamalama, o se filifliga e finagalo le Alii e tatou te fai. A o ou taumafai malosi ia faasilia le alofa, na faaatoatoa e le Alii mea na avanoa—faapea ma nisi foi mea.
E leai se tasi e atoatoa, ae e mafai ona ou atoatoa i le taumafai ia agalelei atoatoa, alofa atoatoa, ma tali atu mai i tulaga o le alofa.
A o o’u tatalaina faalautele atu lo’u loto ma o’u lima nai lo le mea sa ou mafaufau ou te mafaia, sa sautuaselau le faatuputeleina o lo’u fatu. E matala lo’u faitotoa i tagata uma ma soo se tasi.
E lei tuuina mai e le Atua ia te au o tali uma. O le a matua faigofie tele lena mea. Ae ui i lena, sa Ia tali mai i a’u tatalo lea e na o se Tama Faalelagi alofa lava e na te mafaia ona fai. Ina ua ou liliu atu ia te Ia mo se malamalama ma se taitaiga, sa Ia tuuina mai ia te au isi mau mafuaaga e faatuatuaina ai o Ia ma faalagolago atu ia te Ia. Sa Ia tuuina mai foi ia te au isi mau mea e aoao iai.
Atonu sa tatau ona ou faapupuu ma tagi ma mafaufau, “O le a le mea ua tupu i lo’u aiga faavavau?” Peitai sa ou aoaoina le taua o le faamatuu ese atu. Sa ou lafoina atu ma saga lafo atu pea mea uma i aao o le Faaola. Ona ou lagonaina ai lea ua matuu ese atu lenei avega tele, ma ua ou maua le toafilemu.
“Ou te tuuina atu ia te outou le manuia, o lo’u manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).
Sa faaauau pea ona ou faalagolago ma tuu atu i le Agaga e taialaina au, ma manatua e alofa o Ia ia tatou fanau e sili mamao atu nai lo le mea tatou te mafaia. E mananao tagata uma ina ia alofaina ma taliaina, faaaloalogia ma faatuatuaina, ma tauaogaina i o latou tulaga masani. O tatou uma o uso ma tuafafine. Ua ou lagona le faamanuiaina i le iloa ai o loo i ai so tatou Tama Faalelagi alofa, o lo tatou Faaola, o Iesu Keriso e galue e ala mai i se perofeta soifua o loo taialaina ma faatonutonu i tatou ma o le a le taitai seseina lava i tatou. A o ou mulimuli i Lana fautuaga ma le taitaiga, ma manatua o le aiga e totonugalemu i le ata o le faaolataga, ua mafai ona ou alofa pea ma tausisia ona tatala alafua o feutagaiga.
Ua saunoa mai Elder Richard G. Scott: “E avea oe o se meafaigaluega e mafai ai e le Alii ona faamanuia se tasi. O le a tuu atu e le Agaga oe ia lagonaina le popolega ma le naunau atu o le Faaola, ona sosoo ai lea ma le mafanafana ma le malosi o Lona alofa” (“To Be Healed,” Ensign, Me 1994, 9
Ua ou iloaina le moni o lenei mea, ina ua ou taumafai malosi ia avea o se meafaigaluega i aao o le Alii. Ou te talitonu a ou alofa ia Xian ma a’u fanau uma ma isi ma le atoatoa, o le a sologa lelei mea uma e tusa ai ma le faamasinoga tonu a le Atua.
Ou te faamoemoe e mafai e i tatou uma ona aapa atu i le alofa ma le agalelei i o tatou tuaoi TIT/LGBT, tagata o aiga, ma uo. E mafai ona tatou fesoasoani le tasi i le isi, ia malamalama, ma faaali atu le alofa, e faapei lava ona faia e lo tatou Faaola mo i tatou. E mafai ona tatou aapa atu, auina atu se feau tusitusia, opo atu, ave se ipu kuki, auina atu ni fugalaau, pe valaaulia se tasi i se taumafataga o le afiafi. O le alofa o le tali lava lea. O le agalelei o le ala lea—o le ala a le Faaola.
Tala a Scott
Sa mafaufau Scott o le avea o se faafafine o se filifiliga, e ui lava ina ua uma ona faailoa mai i lona atalii. O lana tali muamua o le ita, ae sa ia taofiofi. Mulimuli ane sa faamautinoa atu e lona atalii ia te ia e le o se filifiliga. O iina na iloa ai e Scott le mea moni, ma faaali atu lona alofa, ma faatoese atu mo ana faamatalaga matuia sa ia faia i le taimi ua sola.
Ua silia ma le 30 tausaga talu ona ma faaipoipo ma Becky, ma e toafitu le ma fanau. I ni nai tausaga ua mavae, a o ma faafaileleina lo ma’ua aiga i le Ekalesia, sa ma faia ma le manatu o loo lelei mea uma. Ona sau ai lea o Xian, le ma atalii ogatotonu, i le fale mai le kolisi i le tuuaga o le Kerisimasi, ma auina mai ia te au ma lo’u toalua le feau faapito lenei i le Facebook:
“Ei, o le a le tau faa’alo’aloa tele se faamatalaga. O le a tau ina ou ta’u atu ia te oulua se mea lea ou te mautinoa ua uma ona oulua iloa. Pe atonu foi ua tau faafia i ai o oulua mafaufau. O a’u e faafafine. Ou te talitonu e le o se tala aupito sili lea e mafai ona faalogo i ai se matua, ae ua ou lagona e le sa’o ia te au lo’u le talanoa atu ia te oulua e uiga i se mea e matua moni lava ia te au. Ou te manao ia oulua iloa o a’u lava lea e tasi, le Xian uiga ese, haha. Ou te alofa tele ia te oulua, ma o oulua o matua aupito sili ona lelei e mafai e se tamaitiiti ona momoo i ai. O le mea lea na umi ai tele faatoa mafai ai ona ou ta’u atu ia te oulua. E le afaina ia te au le tiga e mafai ona oo mai ai, i nisi taimi, ae sa ou le manao e faatiga ia te oulua aua e le o se taui e tatau mo oulua. Ou te toe fai atu, ou te alofa tele ia te oulua. Ou te manao e faapuupuu aua ou te talitonu e sili ia te oulua lo tatou talanoa faafesagai ma e 100% lena ia te a’u. Ou te lei ta’uina lava i se tasi muamua, leai. Sa ou manao o oulua tagata muamua ia iloaina.”
Sa ou faitauina ma faapea ifo ia te au lava, “Leai, ou te lei iloaina lena mea, ma ou te lei mafaufauina foi. Aisea o le a ou fia mafaufau ai fua i lena mea?” O le mea moni faapea na sau o ia ma ta’u mai ia i ma’ua i se feau i luga o le Facebook, o se mea na matua iso ai lo’u mafaufau. Ae i le toe manatu atu i ai, o se tasi lena o mea sa sili ona ma’ema’e na ia faia. Aua na ou maua ai le taimi e tau mafaufau ai ma tali atu e aunoa ma lona i ai iina, e faate’a ese ai lo’u ita. Masalo semanu ou te fai atu ni mea ia te ia ou te toe salamo mulimuli ane ai.
Ona ou alu loa lea ia Becky, sa i le isi potu, e vaai pe na ia maua lea lava feau i le Facebook Sa matuai ou ita tele. Sa ou le malamalama pe aisea lava o le a filifili ai e Xian se mea e pei o le faafafine aua, o le taimi lena, sa ou faapea ai lava e filifili e tagata lena mea. Ma sa ou fai atua ni tala matuitui. Ua ou fiafia sa na o Becky na faalogo i ai.
E oo ane i le taimi na toe fo’i mai ai Xian i lo matou fale i lena po, ua ou alu ou te moe. Ae sa ala Becky, ma o lea sa ia talanoa atu ai ia te ia. Ina ua toe sau Becky i le potu, sa ou fai atu, “O fea sa e i ai?”
“Sa ma talanoa ma Xian i lalo.”
“OK, na a la?”
“Na sologa lelei lava.”
O lea na ou tu ai i luga ou te alu e talanoa ia te ia, ae sa fai mai Becky, “Ia e onosa’i. Faamolemole ia e onosa’i.” E faanoanoa ona sa ia manatu e ao ona ia ta’u mai ia te au lena mea. Sa ou alu ifo i lalo ma opo mau atu ia Xian. Ona ou fai atu lea, “Ou te alofa ia te oe.”
Sa matuai faafetaia e Xian. Ona ia fai mai lea, “Tama, e te iloa e tiga tele nisi o mea na e fai mai ai i le tele o tausaga.” Na sa’o o ia. I lo’u mafaufau, sa ou manatu o tagata e faafafine na latou filifiliina. Ma afai sa latou filifiliaina, ona onomea lea mo i latou soo se mea le lelei lava e mafai ona ou avatu i ai.
Sa ou matua le iloa se tala e toe fai atu ia te ia. Na pau lava le mea sa mafai ona ou fai atu ai o le, “E, ta o e fai sina moe se’i ta toe talanoa i se taimi.” Na toe foi Xian i le kolisi ma na tonu ia te au o le a ou taumafai e “toe faufau” o ia. Sa ou faitauina mea uma sa mafai ona ou maua e uiga i le mataupu mai le tulaga o le Ekalesia ma auina atu ia Xian e faitau ai. Ona ia auina mai lea ia te au o se isi faauigaga, e tusia mai lana foi vaaiga. Sa faatumauina lo’u mafaufau le fetalaa’i. Sa matuai tumau pea lo’u faamoemoe, o le a alu ese, e faapei ua na o se laasaga le tumau ua feagai ma ia.
Ina ua mavae ni nai tausaga o alua’i faapena, sa toe foi mai Xian i le fale mai le kolisi ma fai mai, “Tama, sa ou manatu o le a ta talanoa. O lona uiga, ia ta matuai talanoa malamalama.”
Sa vave ona ou tali atu, “Ua lelei, ta talanoa.” Sa amata ona ou luai uma atu lo’u ita sa faaputuputu. “Xian, aisea o le a e filifilia ai lenei mea? Aisea?” Ae sa na ona ia tilotilo mai ia te au ma ata faamimigi. E le o se ituaiga ‘ata faafiaula Sa na o si ataata lava. Ou te talitonu ua faalogo soo o ia i lena mea, ma ua foliga mai o se mea noa.
Ona ia fai mai lea, “Tama, ou te lei filifiliaina lenei mea. Aisea o le a filifili ai e se tasi lenei mea?”
O le taimi la lena na taia ai loa a’u. O tiga uma ma mafatiaga mai talasua sa ou fai atu ia te ia, o faamatalaga faatiga uma, o taimi uma sa ou fai atu ai se mea taufaaleaga e uiga i se isi tagata i le aiga atoa ao nofonofo ai o ia iina ma mafaufau, “E le iloa e lo’u tama o a’u lea e fai iai ana tala uma nei.” Na toe lolofi mai na taimi uma ia te au. O le tiga na oo i ai si o’u atalii. O se taimi tonu lea mo au e suia ai. Ma o iina na amata soloa’i mai ai musumusuga.
Sa ou manatuaina se tala sa ou faalogo ai i tausaga ua te’a. Sa tofia se tusitala o taaloga e tusia tala o le Olimipeka—o alogavaa, o tuuga paopao, ma faaseega vaa. Sa ia faatalanoaina se tasi o kapeteni o ‘au ma fesili, “Ae faapefea le matagi? Ae faapefea le timu? Ae faapefea faagalugalu mai i isi vaa?”
Sa tali ane pea le kapeteni o le auvaa, “O mea na e i fafo atu o lo’u vaa.” Ina ua fesili le tusitala pe o le a le uiga o lena mea, ae sa ia fai mai, “O mea na e le mafai ona ou puleaina. O lea la e leai sona aoga ia te a’u e popole ai fua i ai. Ou te taulai i mea o loo i totonu o lo’u vaa.”
O lea a o ou nofo iina ma talanoa ia Xian, sa ou iloaina ai sa ou taumafai e “toe faufau” o ia, ae le o sa’u galuega lena. Sa le’i i ai i totonu o lo’u vaa. Sa ou iloaina foi sa ou faamasinosino. Ae o le avea ai o ni Kerisiano, tatou te talitonu o Keriso o le faamasino lea. O lea sa ou tuuina ai loa lena mea i totonu o le vaa o Keriso. O le mea na tuua mo a’u, i totonu o lo’u vaa, o le ia ou alofa lea E manaomia e la’u fanau uma lo’u alofa—le alofa moni o se tama. E le tatau ona fulitua i se tasi o i latou.
Ma e le tatau foi ona faafitia lo’u faatuatua i le talalelei. E taufai pele ia ma’ua ma Becky le talalelei, ma e ese lo’u fiafia ua ou faaipoipo i se tamaitai e tutusa ni o ma talitonuga. E manatu nisi tagata faapea talu ai ma te alolofa i lo ma atalii faafafine, o lona uiga ‘ai ua ma taumamao ese ma le Ekalesia. O le mea moni, o le ola ai i le talalelei o le mea aupito sili lea e mafai ona ma faia mo lo ma’ua aiga. Sa ou fai atu ia Xian ma te le tuua lava le Ekalesia ona o ia, ma sa ia fai mai na te le o faamoemoe foi ma te faia lena mea.
O le alofa le faatuaoia e le faapea e tuua ai le Ekalesia ona o se mea o feagai ma se tamaitiiti. Sa ma faalogo ma Becky i taitai o le Ekalesia i konafesi, ma ma te faafetai lava i le tautalagia ai o lenei mataupu. E manaia le maitau atu ua latou agai atu i se tulaga e mafai ai ona tatou talanoa saoloto ma le agaalofa e uiga iai.
O Le Tala a le Aiga o Mackintosh
Scott Mackintosh: O a’u o Scott Mackintosh. Sa ou faaipoipo i se tamaitai talavou lalelei e igoa ia Becky. Ou te fiafia e taavao, tolauapiga, ma fanafanaga; ou te fiafia i ai faatasi ma lo’u aiga.
Becky Mackintosh: O a’u o Becky Mackintosh, ma ou te nofo i Lehi, Utah. E toafitu la’u fanau ma a latou fanau e toafitu foi.
Xian Mackintosh: O lo’u igoa o Xian Mackintosh; faatoa ou faauu talu ai nei i lo’u faailoga i mataupu tau soifua maloloina faalemafaufau.
Becky Mackintosh: Xian, o se atali’i fai tala malie, e fiafia o ia e faatalie tagata.
Scott Mackintosh: E fiafia o ia i meaola. Sa iai a matou hedgehogs; sa iai a matou ferrets; sa iai a matou ‘oti ma e sa matou tatauina le susu i aso uma mo le fitu tausaga, ma sa lotolotoi ai o ia.
Becky Mackintosh: Ina ua faailoa mai e Xian ia i ma’ua, sa ia auina mai se fe’au faalilolilo i le Facebook, i lona tama ma a’u.
Xian Mackintosh: Sa ou tietie atu i la’u taavale i Sate Leki e faatofa i nisi o a’u uo e nonofo ai iina, ma sa ou iloaina e tatau ona ou faia lenei mea ma e tatau ona ou faia nei loa.
Scott Mackintosh: “Ei, o le a le tau faa’alo’aloa se faamatalaga; ua na ona moomia ona ou ta’u atu ia te oulua o a’u e faafafine.
Xian Mackintosh: Ma sa ou ta’u atu ia o la iloa o a’u e faafafine, ma o le taimi muamua lena sa ou ta’u sao atu ai ma tusia na upu i se tasi.
Scott Mackintosh: Atonu o se mea na e mafaufau i ai pe taumanatunatu foi i ai.
Xian Mackintosh: O a’u lava lea e tasi o so oulua atalii; ou te alofa tele ia te oulua. Sa ou le manao lava e faatiga ia te oulua.
Scott Mackintosh: Sa ou tilotilo atu i ai, ma, oi leai, ou te lei mafaufau lava i ai; aisea o le a ou mafaufau ai i lena mea?
Xian Mackintosh: E lei foliga mai o le ala masani lea e ta’u mai ai.
Scott Mackintosh: O le mea moni faapea na sau o ia ma ta’u mai ia i ma’ua i se feau i luga o le Facebook, o se mea na matua faateia ai ma faigata ona malamalama i ai.
Xian Mackintosh: Ae i o’u matua lava ia, ou te lagona o le ala aupito sili lena. E mafai ona la faitauina, o le a mafai ona la mafaufau i ai ma fai a la’ua tali i ai e aunoa ma lo’u vaai tino i ai.
Scott Mackintosh: Pe a ou toe tomanatu i ai, o se tasi lena o mea sa sili ona ma’ema’e na ia faia, aua na ou maua ai le taimi e tau mafaufau loloto i ai ma faate’aese ai lou ita atoa.
Becky Mackintosh: Ma sa vave ona ou viliina o ia ma fai atu i ai, “Ua ou maua lau feau. Sau vave i le fale ina ia mafai ona tatou talanoa.”
Xian Mackintosh: Sa ou taunuu i le fale, ma sa ma talanoa ai ma lo’u tina.
Becky Mackintosh: Sa amata ona ou avatu ia te ia fautuaga uma.
Xian Mackintosh: Ou te manatua le mea muamua sa ia faia. Sa faapea ona lima, ma sa ia fai mai, “Ok, o le a la le mea o le a tatou faia e uiga i lenei mea?” Sa ou le iloa moni pe faapefea ona tali atu i ai, ma sa ia fai mai, “Ia, o le mea moni e tatau ona inu ni au fualaau faatupu mone o totoga feusuai; faatamatane, masalo e le o sagatonu le maualuga o ou mone.” Sa na ona ou mafaufau, “Mama, e le o lena.”
Scott Mackintosh: Sa ou fai atu, “O fea la sa e i ai?” Sa ia fai mai, “Sa ma talanoa ma Xian i lalo.” Sa ou fai atu, “OK, na a la?” Ma sa ia fai mai, “O la na sologa lelei.” Ma sa ia fai mai, “Tau lava ina e onosa’i; faamolemole ia e onosa’i.” E faanoanoa ona sa ia manatu sa ao ona ia ta’u mai ia te au lena mea.
Xian Mackintosh: Sa leai moni ni upu fetalia’i nai lo lona tago opomau a’u ma fai mai, “Ou te alofa ia te oe.” O lona uiga, o se mea lea na matua sili ona taua ia te a’u, e ui sa ia te ia nei lagona uma i lona ulu ma sa lei malamalama foi o ia i ai, ma ou te talitonu foi sa ia te ia le ita. O le mea muamua na pa’ū mai lona gutu o le mea sa manaomia ona ou faalogo atu iai.
Scott Mackintosh: Mo nisi tausaga na sosoo ai, sa na ona matou onosaia lava. Sa na ona ou faamoemoe lava o le a te’a ese, sa na o se laasaga e le tumau o loo feagai ma ia.
Xian Mackintosh: O le uluai tali a lo’u tina ma lo’u tama, e le’i matua lelei tele, e ui ina sa la ta’u mai ia ou iloa e alolofa ia te au . Sa lei malamalama i la’ua sa ou ola ai ma lenei mea mo le 24 tausaga.
Scott Mackintosh: Sa ou matuai taumafai lava e taufōfō mea uma mo tausaga muamua e lua.
Xian Mackintosh: O lo’u tama o se tagata lelei tele, o se tagata maoae tele, ae o se tagata foi e faatamatane na’ua. Ia te ia la, o le ia te ia o se atalii e faafafine e le gata, ina ou lagona, o se matua luma mo ia, ae o se mea o le a le mafai ona ia taliaina.
Scott Mackintosh: I lo’u manatu sa latou filifiliaina lenei mea ma afai sa latou filifilia, ua onomea mo i latou mea faataumaoi uma e mafai ona ou avatu iai.
Xian Mackintosh: Sa ou sau i le fale i le tuuaga o le Kerisimasi, ma e matou te lei talanoa e uiga i ai. Sa fai moni lava a matou talatalanoaga e ugia i isi mea uma, ae sa lei faia se matou talanoaga e uiga i le mea moni faapea o a’u e faafafine.
Scott Mackintosh: Ma sa ia fai mai, “Tama, faapea lava au o le a ta talanoa, o le uiga ta matuai talanoa.” Ua lelei, ta talanoa.
Xian Mackintosh: Sa ou fefe foi, ma ou te talitonu sa faapea foi ona popole o ia.
Scott Mackintosh: O lea sa ou amata ai na faamasua uma atu ia te ia o lo’u ita sa faaputuputu. Sa ou faataio atu loa, “Xian, aisea na e filifilia ai lenei mea? Aisea?” Ma sa na o le tilotilo mai ia te au ma ata faamimigi, e le o se ata faafiaula, ae na ona ata lava. Sa malie tele ia te ia lena mea, ma sa ia fai mai, “Tama, ou te lei filifiliaina lenei mea.”
Xian Mackintosh: Aisea o le a filifili ai e se tasi lenei mea? Ou te manatu o le taimi lena na amata ai ona ia malamalama.
Scott Mackintosh: Ma o le taimi lava na taia ai a’u i lena mea—o tiga uma ma mafatiaga mai talasua sa ou fai atu ia te ia, o faamatalaga sauā uma, o taimi uma sa ou fai atu ai se mea taufaaleaga e uiga i se isi tagata i le aiga atoa ao nofonofo o ia i le nofoa i tua ma mafaufau, “E le iloa e lo’u tama o la e tautala e uiga ia te au”—na toe soloa’i mai uma na taimi ia te au, o tiga na feagai ma lo’u atalii. Mai lava i lena taimi sa na o suiga lava. O se matua suiga lava, ma sa ou opoina loa lo’u atalii ma le alofa tele ia te ia.
Becky Mackintosh: O lea la, i le lua tausaga mulimuli ane, sa ia fai mai ia te au, “Mama, ou te le iloa po o le a lo’u lumanai, ae ou te le iloa pe mafai ona ou faaipoipo atu i se teine.”
Xian Mackintosh: E ui i le tele o tausaga ma tausaga o taumafai, faaali mai se teine e mafai ona ou fiafia iai, ma sa na ona ou iloaina lava mulimuli, e le o se mea lea o le a tupu mo au.
Becky Mackintosh: O se mea faigata tele, le iloa ai ua ia alu ese mai i le Ekalesia.
Xian Mackintosh: Sa faasolosolo malie ona ou oo mai i le mea ua ou i ai nei i le aso—o le faafafine le maalofia.
Scott Mackintosh: O le vaai atu i lo’u atalii o i ai ise sootaga ma se isi tamaloa, OK, e le ogatusa lelei lena ma mea sa ma aoaoina .
Becky Mackintosh: Sa tatou ona ou faapupuu, ma tagi ma mafaufau, “O le a le mea ua tupu i lo’u aiga faavavau?” O le taimi lava e faamatuu atu ai, e pei ua ou lafo atu lena mea i aao o le Faaola, e faapei ua lafotu ese atu lena avega tele ma ua e maua le toafilemu.
Xian Mackintosh: O le mea e manaomia ona ou iloa o loo alofa pea lava o ia ia te au, aua o lo’u popolega lena.
Becky Mackintosh: O le a matala pea lo’u faitotoa i tagata uma ma soo se tasi.
Xian Mackintosh: Ma o se mea tele lena ia te au ua ou iloa, e ono i ai o tatou feeseeseaiga, ae i le taualuga lava o mea, o i tatou lava pea o se aiga. Ou te taualoaina tagata, ma o lo’u faaaloalo mo isi, e tele lava ina faapogai i lo’u ola ae ai ma faafaileleina i le talalelei.
Scott Mackintosh: Ou te lagona e faatagaina e le Faaola i tatou ia i ai mea i o tatou olaga o le a faamalolosia ai i tatou. Ou te le iloa ae ou te manatu o lagona na o le Faaola mo Xian. Ou te le iloa ae ou te lagonaina e loloto le alofa o le Faaola mo ia.