Tala a Tonya

Tala Patino a Tonya

Tonya: Ua na o ni taga nei o lisi o meaai ma sitika po o kata faapisinisi, ua na o ni nofoaga sa matou o i ai pe sa nonofo ai foi. O lea la, pei o le faletuuapa o le Spam; sa masani ona matou nonofo e 40 minute mai nei falemataaga o le Spam.

Andy: Ma le falegaosimea?

Tonya: I Minesota i le mea latou te ofo atu ai “spam-tofo.” O lo’u igoa o Tonya Baker Miller. Sa ou maua lo’u faailoga i le poto faapitoa i le mataupu o saienisi faaleaiga. Sa pei o se ono masina fiafia ma faate’ia mulimuli ane, ae sa le na o le fulū sa ou maua ai. Ia, lelei, o le tala lenei.

Dylan: O a’u o Dylan Miller. O a’u o le tama o Andy ma o le tane a Tonya. E ofoofogia tele ia Andy. E faamaoni o ia; e atamai; e agalelei; sa avea lava o ia ma se tasi e ono manao i ai soo se matua.

Tonya: O se mea fiafia ia te a’u le avea ai ma tina o Andy. E maoae lava o ia. E tafatolu ana matata sa a’oga ai o pisinisi faavaomalo, pulega tau vaalele, ma le faaSipaniolo, ma e faigaluega tumau. E i ai o ia i le au peresitene o la matou korama a toeaina, ma o ia o le uso matua aupito sili. E ofoofogia lava o ia.

Andy: O lo’u igoa o Andy Miller. Ua 21 o’u tausaga, ma o a’u o se tagata o le Ekalesia i lo’u olaga atoa, ma o a’u foi o se faafafine. Ou te le fia fai atu e faapea e le o se ta’u lea e faitauina ai a’u, aua o le mea moni lava lena. O se vaega tele o se mea e faitauina ai a’u; ae e faapei o se isi lava tagata—faafafine, lē faafafine po o le a lava le ituaiga—e tele naua isi mea sili atu e uiga ia te a’u nai lo le faafafine. O le faailoa atu faalauaitele i isi, o se faagasologa, ma e tau foliga faapena se manatu sa ia te a’u. Sa leai ni faiga faalauiloa, leai se fonotaga ma le au tusitala.

Tonya: O le faailoa mai e Andy sa o se faatinoga tatau. O le mea lava ia, sa na ona manao o ia e tuu lo’u vina soo atu e alu e eva faamasani. Ma o lea sa matou tietie taavale ai i se tasi po, ma sa ia fai se tala na mafua ai ona ou fai atu, “Oi, e te faafafine?” Ma sa fai mai o ia, “Ioe.”

Andy: Ma sa na o sina sekone ae malamalama o ia i la’u tala.

Tonya: Sa ou fai atu, “Ua lelei la.”

Andy: Sa ou vaai faalemafaufau i le maofa tele ma le, manaia o le taimi lea sa ia fusi ai au ma fai mai e alofa o ia ia te au.

Tonya: Sa ou fai atu, “Ia, e te iloa oe, ae faapefea la teine la sa pei sa e lata lava i ai?”

Andy: O lana tali e le o le mea lea sa ou manatu ai.

Tonya: O le tina matua sili le maoae lenei, a ea?

Andy: O le faailoa faalauaitele atu o se mea e tele ina le manaia, e leai se auala lelei e faatino ai.

Tonya: Ua folaloa e la’u tama lona agaga i lenei mea e taufaamata’u pea ia te ia, ae o sona lava lena uiga.

Andy: Ioe, ona uma lea o lena, o loo i ai le fesili o le, “E faapefea ona aafia lo’u olaga i lenei mea?” Ma sa leai se isi o i ma’ua na i ai se tali lelei i lena taimi. O le mea moni e uiga i lona lei iloaina, i so’u manatu, na avea o sina faafefefefe ia te a’u.

Tonya: Ua leva ona ma fuafuaina olaga o le ma fanau ao lei fananau mai, e sa’o lea? O le a latou faia lea mea ma lea mea ma lea mea, ona i ai lea o se mea e faate’ia ai oe mai i soo se tamaitiiti. Ona e faapea lea, “Oi, faatali la. Ou te le aia i ai, pe sa’o?” Na pau le mea e mafai ona e avatu ia i latou o le alofa. E le o ia te a’u ni tali. Ou te manao ia i latou. Ou te fesili i taimi uma, “O lea, le Tama Faalelagi e, o le mea lea ou te fia iloa i le aso.” I le va o Andy ma Dylan ma a’u, ua matou aoaoina ia tau lava o le talie, ma ua fesoasoani lena mea, e matuai aoga lava.

Andy: E manaomia ai se faatuatua tele e tuu ai lou ola i aao o le Atua ma fai atu, “Ou te faatuatuaina oe; taiala le mea nei e pei ona manaomia ai.”

Tonya: Ou te le iloa pe i ai lava se tasi e le faafafine ona manatu faalemafaufau i le tiga o se tagata e pei o Andy, o se e i ai se molimau, e le mafai ona ia faatulaga sa’o ona lagona, ma e faapefea la ona ou faasagatonuina lena mea? Sa ou toe alu i le malumalu ma toe alu ma toe alu ma saga alu pea, ae o le tele lava o taimi e aunoa lava se tali. Leai ni faaaliga patino, ae sa tumau pea le malosi o la’u molimau. Ma sa ou manatu ai o le meaalofa autu lena mo au mai lena taimi.

O lo’u aafiaga o la’u lava lena, ae o aafiaga foi o isi o a latou foi lava na. Ma mo a’u lava ia, e ‘auga lava i le mauaina o le malamalama i le Togiola i se auala ou te lei mafaufauina lava muamua. O la ma sootaga ma Keriso ua matuai totino atili e ala i lenei aafiaga.

Dylan: O le mau i le Faataoto e uiga i le “faalagolago ia Ieova ma lou loto atoa” na avea ma a ma anavatau, ma o le iloa ai e faapea sa le ia i ma’ua tali uma ma atonu o le a le maua uma tali i lenei lalolagi ae tausisi i mea ua ma iloa, o le mea lava lea, e ma te alolofa i le ma atalii, ma sa ma iloaina e alofa le Tama Faalelagi ia Andy.

Tonya: Sa ou alu e le aunoa i le malumalu, ma o le fesili sa ou alu ma a’u i taimi uma o le: “Aisea? Aisea? Aisea? Aisea? Aisea?” Ma sa iu ina ou aoaoina, “E le o le fesili.” O le fesili e mafai ona e fesili ai, lea e mafai ona fesoasoani ia te oe,” mai le Agaga Paia sa ta’uina mai ia te au le mea lenei, o le “E mafai faapefea ona avea au ma tina e manaomia e lenei atalii o le Atua?” O tagata taitasi uma, o tamaiti taitasi uma, ua i ai se fuafuaga mo ia, ma ou te le iloa ia tali, ae na o le Atua na te silafia. Ma ina ua ou taunuu i lena tulaga lea sa mafai ona ou taulimaina, “Ua lelei, o le faaleagaga faalemanino lelei o le a ou nopia’i ai.” Ma a oo ina ou i ai iina, e mafai ona faapea atu, “E faapefea? E mafai faapefea ona ou fesoasoani?”

Andy: E onomea mo i tatou uma le alofa o le tasi ma le isi ma le lagolagosua, ma ia te au lava ia, o foliga na o le a i ai le Ekalesia a Keriso, ae le na o mea e faatatau i faafitauli o le LGBTQ ae faapena foi i isi. O le taulimaina o mea taitasi i le aso, ae le o le taulai atu mo a taeao, aua e le mafai ona tatou iloaina pe o a foliga o mea a taeao—pe o a o tatou lagona, po o a faamatalaga o le a tatou maua ae tatou te le o mauaina nei. Po o le a lava le mea, tau lava ina aumaia ai se filemu tele ma ia mafai ai e oe ona maua le mea aupito sili mai i le taimi nei. O le taulai atu i le mea e mafai ona ou puleaina, le mea e sili lo’u iloa i ai, e sili atu ai ona lelei mea i lona taunuuga.

Tonya: O le taimi nei la ua 21 ia Andy. E malosi i le Ekalesia. O le taimi nei e le o fuafua o ia e suia lena mea. Ua lava foi lona poto e faapea atu ai, “O loo ou faia lenei mea i lea aso ma lea aso,” ma faapea mai, “E te iloa, ou te le iloa pe o fea o le a ou i ai i le isi 20 tausaga.” E faapei lava o i tatou uma e le iloa. O la’u galuega o se matua o le alofa lea i la’u fanau E leai ni noataga. O le mea lava lena. E leai se mea e mafai ona suia ai lena mea.

Dylan: O loo ma tatalo e le aunoa e uiga i lenei mea, ma o le a faaauau pea. E mafai ona ou faapea atu o le a ou alofa pea lava ia te ia ma ou te manao i mea aupito sili mo ia.

Tonya: Ma te alolofa ma Dylan ia te ia; e leai se mea e uiga i lena mea o le a suia. O le a faavasega e ia ma le Tama Faalelagi ia auiliiliga o lana misiona i le lalolagi, ma ua na ona ma i ai iinei e lagolagosua atu i ai ma alolofa ia te ia i lea aso ma lea aso. E na ona ma faia lava i aso taitasitasi.

Tala a Tonya: Faaauau

E tusa ai ma le tala a Tonya Miller, o le sau ma talanoa mai o se faagasologa, ae le o se mea e tupu. Pau o lea, o le mea lena sa ia molimauina i lana tama o Andy. Ma e ui i le faaluafesasi faaleagaga o loo siomia ai pea le avea o se tagata faafafine o le Au Paia o Aso e Gata Ai, o le mea taua o le lagonaina e Andy o lona saogalemu i lona lava tagata—o se mea na te le’i iloaina muamua.

O la’u tama o Andy ua faailoaina o se faafafine o le Au Paia o Aso e Gata Ai. Semanu e faigofie pe ana mafai ona ou tusia lo’u aafiaga o le avea ai ma tina o Andy e faapei o se tala na faamatalaina ma le poto ina ua malamalama ai ma le aoga o le faaiuga. Peitai, e faigata ona tusia se tala o mea na tutupu, mafaufauga, ma lagona e matuai loloto le piitaga i itu uma o lo’u olaga. Ona o lea, o le mea e soo ua na o ni nai ata na pueina mai se tala o le faavavau o loo auauai mai pea.

Sa tele taimi i le olaga o Andy, e oo lava i le taimi o lona pepe meamea, ina ua ou maua se uunaiga malosi o ia o se faafafine.

O le malamalama faapenei e le mautonu, ma o lea sa ou faia ai le mea e faia e le toatele o tagata i uunaiga e tele ina faaluafesasi nai lo se faaaliga i le taimi e maua ai, o le taumafai lea e faagalogalo.

O le sau e faamatala mai o se faagasologa, e le o se mea e tupu.

Na sau Andy ia te au i le taumafanafana i le va o le faauuga a le aoga maualuga ma le sii atu e a’oga i le BYU. Sa ia fai mai ia te au o ia e faafafine i se tasi po, ina o ma tietie atu na o ia lava ma a’u i se tasi nofoaga. O lana faaiuga e faia lena mea sa matuai atamai lava; sa ia faamoemoe o le a tuu ai lo’u fai soo atu ia te ia e saga eva faamasani pea, Ou te le manatuaina nisi mau faamatalaga o lena talanoaga patino. O le toe manatunatu i ai, ou te iloa sa ou fai atua ni mea sa soona lafo ma atonu sa leai se uiga Ae e oo i le taimi na uma ai le ma talanoaga ma le ma tietiega i lena po, sa iloa e Andy e aunoa ma se masalosalo ou te alofa ia te ia ma o lo’u alofa e leai ni noataga. O le avea ma ona tina sa aumaia ai ma e aumaia ai pea le olioli ia te au.

A o ma feoai ma Andy ma talanoa i lena po, sa ou tauto ifo ia te au lava o le a ou le faatagaina lava Andy e vaai mai ia te a’u o o’u tagi e uiga i lona faafafine. O le mea la lea, ioe, o le taimi lava na ma taunuu ai i le fale, sa ou oso i lo’u moega ma amata ona tagi masusu. Sa momoe tagata uma i le taimi na ma taunuu ai i le fale. Sa ala mai Dylan, lo’u toaua, ma fesili pe o lelei mea uma.

tamaloloa e toalua o loo tutu i autafa o le puipui

O A’u: “Na e iloaina e faafafine ia Andy?”

Dylan: “E leai.”

O A’u: “Ia, e faafafine. Faatoa ia ta’u maia.

Dyland: “OK. E i ai se mea e tatau ona ou faia i ai i le po nei?”

O A’u: “Pe tau lava ina e alu e fai i ai ua uma ona ou ta’u atua ia te oe?”

O lea na tu ai i luga Dylan, alu i lalo, tu’itu’i le faitotoa o Andy, ma fai i ai sei alu atu i totonu. Sa ia fusi atu ia te ia ma fai atu, “Na ta’u mai e lou tina. Ou te alofa ia te oe.” Ona ia toe sau ai lea i luga ma sa moe loa i le tolu minute mulimuli ane. E faamatalaina e Andy lena mea o se tasi o aafiaga aupito faamomoiloto lea o lona olaga.

Ua ou ta’ua lenei tala lona lua ona e lagolago ai lo’u talitonuga loloto o Andy o lo ma atalii e ala i se fuafuaga faalelagi. O Dylan o se saienitisi, o se fomai, na aoaoina faamasani ia vave ona iloa fai ni faaiuga ma le sa’o lelei. Na te malamalama i itu e sili ona taua o le tele o tulaga toetoe o le taimi lava lea. O a’u i se isi itu, o se tagata faigaluega faaleagafesooai, o se tagata fofō faapitoa. Ou te taulimaina faafitauli mai le atulasi o itu ma le atulasi o mea moni e lagolago ai ala o togafitiga. Ou te manao e vailiili itu taitasi o se faafitauli, tusa lava po o le a le atagia mai o sona aoga i se taunuuga lelei, ona mo le manuia o le faagasologa o le togafitiga lava ia. O tala uma e mamana ia te au. O le mea moni faapea sa mafai e i ma’ua ma Dylan ona avatu le feau e tasi o le alofa atoatoa ia Andy i lena lava po i a ma’ua ala tulaga ese, sa o se molimau e le aunoa ia te au na taialaina e le Alii i ma’ua mai le aso muamua i lenei malaga fai faatasi.

E ui i le mea moni e faapea o lo’u alofa mo Andy e lei suia ina ua uma ona ia faamatala mai ia te au, ae sa ou lagonaina lava le fememea’i faaleagaga.

Sa tele naua ni a’u fesili ma le mau loimata. O la’u auala sa maua ai le filemu ma tali sa ou sailia o le alu lea i le malumalu—pea lava pea. O le fesili sa ou aveina i le malumalu o le fesili lava e tasi i taimi uma.

Sa ou manao i le Tama Faalelagi e aoao mai au pe faapefea ona ou fesoasoani ia Andy ia manuia lana misiona i le lalolagi.

O o’u aafiaga i le malumalu i lena taimi na faamautuina ai lo’u faatuatua i le Togiola a Iesu Keriso. Sa faamausaliina ai foi lo’u malamalama e silafia lelei e le Tama Faalelagi Ana fanau taitoatasi ma e alofa ia i tatou uma taitoatasi, e sili atu le loloto nai lo le mea e mafai ona tatou malamalama ai. E tele taimi sa ou tuua ai le malumalu ma le lagona le fiafia ona sa le’i i ai ni a’u “faaaliga” patino. Ae o se tasi o mea sa ou aoaoina i lena taimi e faapea, e tele ina oo mai tali i fesili faaleagaga i le na o le taimi e mae’a ai ni mau galuega faaleagaga. O le ulu atu i le malumalu i vaiaso taitasi sa na o le pau lea o le vaega o le taumafaiga na manaomia e atina’e le mafutaga sa ou manaomia ma le Faaola e taialaina ai au.

tamaitai talavou o loo faitauina ia tusitusiga paia

O le taimi lenei, e tele ina ou lagonaina le faaesea ma le faanoanoa. Sa ou popole ne’i avea lo’u faanoanoa-e afua i le faamaualuga i le le mafai ona ou maua se aiga masani faigofie ma atoatoa o le Au Paia o Aso e Gata Ai, e faalavefau ai i lo’u gafatia ona maua o le taitaiga. Sa tafili saunoa Satani ia te au. O a’u fesili uma e uiga i “Le Fuafuaga” na faavaivaia ai lo’u mautinoa. Sa pe o la ou te femoumouai faalelagona ma faaleagaga. Sa ou fesuisuiai pea lava i le va o le lelei ma le leaga faalelagona. Ua ou iloa nei o na aafiaga sa matua taua ia mafai ai ona maua ma faasoa atu le filemu sa iu ina ou maua.

O se tasi o meaalofa faaletalalelei na ou mauaina i lena vaitau o lo’u olaga o le mafai lea ona ola ai ma le fenumiai faaleagaga, ona o le le leai o se vaitau sili atu.

E le o ia te au tali uma i fesili faaleagaga o loo siomia ai le tosina atu i le itupa tutusa. Ou te manao i tali, ae e le mafai ona ou maua i le taimi nei.

O le taunuu ai i le itu lena, lea sa lei faapopoleina ai lo’u faatuatua i le fememeai, sa tatau ai ona sailia le filemu sa ou manaomia.

Sa faasoa atu e Andy lona tulaga faalefeusuaiga i ona taitai perisitua a o lei auina atu ona pepa o le misiona. E lima masina na auauna atu ai o ia i lana misiona i Iurukuei a o lei faamaloloina ma le mamalu. O le taimi o lana misiona na ia oo ai i se loto popole loloto ma le atuatuvale matuia. I le avea ai o se vaega faagasolo o le faamalologa mai le ma’i faalemafaufau, sa tonu ai ia Andy e manao ia mafai ona ia ola faamaoni i ona faananauga ma faailoa atu faalauaitele o ia o se faafafine o le Au Paia o Aso e Gata Ai.

O Tonya o loo opoina Andy

Sa ma talosaga ma Dylan ia Andy e faatali aua le ta’uina i isi seia vagana ua mafai ona ma faasoa atu ona aafiaga i tagata o le aiga, lea sa ia malie lelei i ai. O le tauolioli e faamatala i ona tei na faatumulia ai i ma’ua i le popole. O Andy o le ulumatua o le ma fanau e toafa; o lona tuafafine laitiiti sa 16, ma o ona uso laiti sa 11 ma le 7 i le taimi lea. O le 11 tausaga e i ai ni luitau ma manaoga faapitoa. I le mavae ai o le mau mafaufauga ma tatalo, sa tonu ia i ma’ua e talanoaina i se afiafi faaleaiga. Sa amataina faapenei, i le talanoaga sa fua aga’i atu i uso laiti o Andy:

Dylan: “Pe ua oulua faalogo i upu o le faatauatane po o le faafafine po o le lesipiane?”

Uso e toalua: “Ioe!”

O A’u: “E te lua iloa le uiga?”

11-tausaga le matua: “Ou te manatu o lona uiga o le ‘aivao’--pei e oofu lanuuli ma e tatui le tele o vaega o o latou tino.”

O A’u: “Ia, ua lelei, ou te talitonu e i ai faatauatane o ni ‘aivao’ foi.”

Dyland: “Faatauatane o lona uiga ua tosina se tagata i se tasi o lana lava itupa. O lona uiga o se alii faafafine e tosina i alii, a o se lesipiane e tosina i tamaitai.”

O A’u: “E te lua iloaina se tasi o se faafafine?”

Tamaiti uma e toalua: “Oi leai.”

O A’u: “O le mea moni lava ia, e te lua iloaina.” O le a ou avatua ni nai faa’ite’ite, ma ia oulua ta’u maia pe a oulua mateina. O le lanu e fiafia lava i ai lenei tagata o le lanumoana. O le meaai e fiafia lava i ai o le ravioli. E tautala faaSipaniolo. E fiafia o ia i vaalele.”

11-tausaga: “O Andy?!” (Na sosoo ai ma ni talieega leotele.)

7-tausaga: “Oi, e a ea, o lona uiga e i ai se tatou uso faafafine?!” (Sosoo ma le fe’atai tautalaiti.)

Dylan: “Sa na ona ma mananao ia oulua iloa lena mea ali’i. Atonu e i ai ni a lua fesili, ma e mafai ona tatou talanoaina i soo se taimi. E le o se mea natia po o le a lava se isi mea. E le o se mea leaga. Pe o i ai ni a tou fesili i le taimi nei?

11-tausaga: “E i ai la’u fesili. Pe mafai ona tatou toe o i lalo e taalo Nintendo ai?”

Ma na pau ai lena.

tamaiti o loo taaalo taaloga vitio

Ina ua uma ona ta’u atu i isi a ma fanau, sa ma auina atu se imeli i o ma matua ma o ma tei sa faaulutalaina “Faailoaina ma lona Uiga”, na faamalamalama atu ai ni nai mea e uiga i aafiaga o Andy o se faafafine o le Au Paia o Aso e Gata Ai ae o le tele lava na faamatala atu ai lo ma alolofa mo ia ma se fiafiaga ua ia aumaia i o ma olaga. Sa leai se faasilasilaga i agafesootai faasalalau, leai se itulau patino i upega tafailagi sa faalealea ai. Sa le o toe avea o se mealilo.

Na iu lava ina ma faamatalaina i tagata uma i i ma o. O le taimi lea e leai se tasi o i matou na matuai mautinoa po o ai ua iloaina ae po o ai foi e le i iloaina.

O le mea taua o le lagonaina e Andy o le saogalemu i lona lava faasinomaga, o se mea na te lei oo i ai muamua.

E atili momomo lo’u loto i le matauina o ia o faatautaia le olaga i ana lava tuutuuga fai, ma le lagonaina mautinoa pe o ai ia, ma le mea e manao o ia e aga’i i ai ma le ituaiga tagata o le a ia i’u i ai.

Ou te manatua i se tasi aso, e lei leva ona sau Andy ma ta’u mai ia te au, ina o o’u taumanatunatu ia te au lava, “pe tau lava ina mafai ona ou iloa pe faape’i pe a o a’u o ia, atonu o le a sili atu ona ou malamalama lelei. Atonu o le a faaitiitia ai lo’u popole mo ia.” Sa tulei manino mai le Agaga ia te au i lena taimi, ma aoao mai ai a’u e faapea sa ou faia se fesili e leai se uiga. O le fesili e tatau ona ou faia o le “E mafai faapefea ona avea au ma tina o loo ia moomia?”

Ou te talitonu o le fesili lena e tatau ai mo tagata taitasi o le Ekalesiia e mafai ona fesili ai e tusa ai ma lenei mataupu: “E mafai faapefea ona avea au ma uso po o se tuafafine i le talalelei o loo manaomia e lenei tagata?” O tali o le a fitoitonu taitoatasi e faapei ona taitoatasi o fanau taitasi a le Atua. Ae e mafai ona ou faapea atu, e aunoa ma se masalosalo, o le malaga faaleagaga e mafai e lea fesili ona fesoasoani ai ia i tatou e matagofie, faamautinoa, faalototele, ma atagia ai a tatou tautinoga faaletagata lava ia o ni soo o Keriso.

Tala a Andy: Atalii o Tonya

I lona tuputupu ae, sa malamalama lelei Andy Miller o le avea o se faafafine e matuai leaga lava. Sa lei talanoaina lava lenei mataupu i se tulaga lautele, po o se ala faagaeetia. A o amata ona ia iloaina ona faalogona faananau mo alii, sa ia lagona ua ia utia i le gaogao ii loloto tele i le va o ana aga e faaali atu i fafo ma ona lagona i totonu ia te ia lava. Ina ua ia mafai ona malamalama i le faiā a nei faalogona ma amata ona ola tausisi iai, sa ia maua ai loa le toafilemu

se alii o loo tilotilo atu i mauga

O se faaupuga masani e faapea o le tagata muamua lava e te “faailoa atu i ai” o oe lava lea. I lo’u ola a’e ai, sa ou iloa e fai lava si ese o a’u mai le toatele o a’u tupulaga. O le avea ai o se faafafine sa le o se mea sa talanoa i ai—o le uiga o la’u tala o le talanoa moni lava e faatatau i ai, i ni auala lelei, ma le le taufaaufiufia. I se faiga masani sa na ona ta’ua lava faasamasamanoa, ma i se aotelega o faaupuga faitio faatasi ai ma ni faauigaga taufaifai pe a talafeagai. O le taunuuga la, sa itiiti lava se mea sa ou iloa i le uiga moni o le avea ai o se faafafine pe o le a foi sona faafoliga mai, ae sa ou malamalama o se mea e matuai leaga lava. O le le lava o le a’otauina e uiga i ai na oo mai ai le le iloa o se mea e tapa i ai mo tali po o se fesoasoani.

O le mea e laki ai, sa i ai ni mea na ese ai totonu o lo matou aiga. E ave la’u faamua i lo’u lototele, loto mautinoa, ma le iloaina o a’u lava ia, i le faafaileleina lea o a’u. Sa fesoasoani nai o’u matua alolofa ia te au i mea uma sa ou fiafia i ai ma mea uma sa ou tulitulimata’ia, ma sa lei i ai se taimi na ou popole ai faapea o le a ou le toe mauaina lea fesoasoaniga. I lo’u ta’ua ai o na mea, sa lei tele foi ni a matou talatalanoaga i lo matou aiga e uiga i le mataupu—e le ona o le popole pe ona o le fia tausisia o le amiotonu a’ia’i ae ona sa lei alia’e mai lava.

alii ma se tamaitai o loo tilotilo i atumauga

O le toe tepa la i tua, ua faigofie ona ou iloa ai le ala na avea ai lea laasaga o le faafitia, o se faapogai taua i la’u fagamalaga-tiutalaloa. Na mafua ai ona ou faia e peiseai o la na lelei lava mea uma, a o ou galue ai e faavasega mea e tusa ai ma a’u lava fuafuaga seia oo ina lava lo’u talitonu mautinoa i lo’u faasinomaga e faasoa atu ai i isi. Peitai, i se tulaga moni lava, sa sili atu ona fai si faalemanuia. O lea faiga fai auaua’i e tauivi ai ma lo’u tulaga moni, sa pei o se auala tau lava ina ia ola ai faalautagitagi nai lo se faatinoga moni lavea’i. Sa utia a’u i le gaogao ii ua matuai loloto, o se feteenaiga i le va o a’u aga i fafo atu ma o’u lagona i totonu.

E foliga e toetoe ina faavalevalea i le taimi nei i lo’u mafaufau i lo’u tulaga faalefeusuai faapea e le manino, talu ai sa matua iloagofie lava i lena taimi. O le mea moni lava, o la’u faafitiga sa le na o uiga e faaali atu i fafo. Sa ou talitonu moni lava a’u i ai. Ou te lei manatu o le a ou suia, ae sa tatau ona ou mautinoa e le gata ina sa ou iloaina le tosina atu i le itupa tutusa ae sa matuai le mafai foi ona ou lagonaina le tosina atu i le itupa faafeagai i lea taimi i lo’u olaga.

alii o loo soisoi

Na ou taunuu i lena tulaga i le taimi o lo’u tausaga sinia o le aoga maualuga. O le taimi lena ua oo mai le tulaga faaletagata matua. Sa lei suia o’u lagona o le tosina atu—ae o le mea moni lava ia, ua matua malolosi atu nai lo se isi lava taimi—ma sa oo ina ou iloaina e matuai leai moni lava se gafatia ia te au e maua ai se sootaga moni, atoatoa ma se tamaitai. Sa faasolosolo lemu ona ou aga atu i lenei tulaga le maalofia ma sa ou aoao e sailia ni auala e mafai ona ou maua se olaga nofotoatasi fiafia ma le anoa. Sa ou fetuutuunaia o’u faamoemoega mo le lumanai, ma nai lo le taulai atu i se faaipoipoga ma amata se aiga, sa ou taulai i la’u aoga, lo’u aiga patino, ma le faimalaga. O le tele o lo’u fesiitai solo a o ou tuputupu ae, ua uma ona ou aoaoina ai ni mea aua lo’u feagai ai ma le tuuatoatasi ma le ola fiafia o a’u lava ia. O aafiaga o le lagona o le tuuatoatasi ma le le faalagolago i isi e aumaia ai le atoatoaga o ‘ausiaga i lo’u olaga, sa fesoasoani ou te latalata atili ai i lo’u Faaola ma atina’e se faautautaga malosi o a’u lava ia. Sa ou iloaina e ui atonu o le a ou le faaipoipo lava i lo’u olaga atoa, ae o le a le tuulafoaiina lava au. O lena mea na ou maua ai le mafanafana tele.

O lo’u tausaga muamua i le BYU sa faigata tele. I le tulaga faaleagafesootai, sa ou tauivi e sue la’u anavatau. Sa amata ona ou feagai ma le mau faafitauli faalemafaufau i le amataga, lea na faaauau pea i le aluga o le tausaga a’oga ma sa matuai aafia mamafa ai o’u togi. E ui e le o le taunuuga nei o a’u tauiviga ma le avea o se faafafine Mamona, ae o le mea moni na atili ai ona faigata le taulimaina o na faafitauli.

E lei leva ona uma le tausaga faaleaoaoga, sa valaauina au e galue i le Misiona a Iurukuei Montevideo Sisifo. Sa tatau ona ou lipoti i le MTC i Atenitina, Buenos Aires, i le faaiuga o Aukuso 2013. Peitai, o le taimi lea na matua taia leaga ai lo’u ola maloloina faalemafaufau, ma sa faamalolo faamamaluina a’u ma toe auina ai i le fale ina ua mavae le lima masina o la’u auaunaga.

Ina ua ou toe foi ane mai la’u misiona, sa ou amatamata malie ona ou faailo atu i nisi tagata. E mafai ona ou fai atu ma le faamaoni o lo’u faailoa atu e na o se taimi e faigofie ai, ae oo lava foi i lena taimi e itiiti lava. Ou te le faalauaiteleina tele lo’u faafafine; pau lava le taimi ou te ta’ua ai pe afai e tatau ai. Po o le a lava, o le faia o lea mea sa faaauau ai pea ona aumaia le filemu ma le fiafia i lo’u olaga a o faatagaina a’u e ola atili ai ma le le taumatemate.

tamaloa o loo mafaufau loloto

Ina ua tele ina ou tatala atu a’u lava e uiga i o’u lagona, sa ou maitauina o’u manao ua i se tulaga matua ma ua atili ona tumau ma lelei. Ina ua ou tuputupu ae, sa ou iloaina ua atili ona papa’u o’u tosinaga, sili ona faaletino, ma sili ona faigata ona puleaina. Ae ui o lea, ina ua amata ona ou ola faatuatuaina, sa ou maitauina ia o’u manaoga e oo lava i a’u tosinaga ua sui a o amata ona ou iloa atili le mea o le a ou maua ai le fiafia moni tumau. Ou te faalogo i le tele o tagata e faauigaina le tosina atu i le itupa tutusa o se faaosoosoga. O lo’u aafiaga e faapea, o lea manatu o se soona faafaigofieina, e faapei ona i ai pe ana faaaoga e faamatala ai le tosina atu i le itupa faafeagai. E masani lava, e i ai faaosoosoga e omai faatasi ai, ae o lea mea e le o se faaosoosoga i sona uiga tuma’oti. Na pau le eseesega o loo i totonu o le ‘auga o le faagau alofa. O le tosina atu i le itupa tutusa e le o se ma’i foi.

O le luitau muamua ma le aupito tele ua feagai ma au ae ou te lei “faailoaina” ma ina ua uma foi, o le lototiga i ona mau ituaiga eseese. O se tasi ituaiga o le lagona o le tuuatoatasi. O le taimi muamua sa fai lava si o’u tautino atu i le manatu faapea o le a ou ola i se olaga e le faito’alua, talu ai o le mea lena o le a manaomia ina ia tausisia ai le faatumauina o faamanuiaga uma o le talalelei. E oo ane i le taimi lea, sa tele ina na o le tosinaga faaletino sa ou iloaina. Peitai, ina ua tuu lo’u taofiofia o o’u faalogona ma amata ona mafaufau i le mea ou te manao moni i ai i le olaga, sa oo ina ou vaaia le ituaiga o olioli e mafai ona lagonaina i le faasoa atu o lo’u olaga i se tasi ou te alofa moni i ai. E faigofie atu i nisi aso nai lo isi ona faafesagai ma le manatu faivavale faapea o le a ou ola i lenei olaga e aunoa ma lo’u faaipoipo atu i se tasi.

I le tulaga taualuga o mea, na ou iloa e mafai ona ou ola i se olaga fiafia ma le faamanuiaina o se tagata nofofua. Peitai, e ui o lea, atonu o le a ou lagonaina pea se moomoo mo lena ituaiga o mafutaga ma se tasi.

E ui i tofotofoga ua ou faatoilaloina ma luitau o loo ou feagai ai, o le avea o se tagata o le Au Paia o Aso e Gata Ai ma se faafafine ua aoao mai ai ni lesona ia te au i auala maoae semanu ou te le ono mafaufau lava i ai. Atonu o le mea sili aupito taua, o amioatua o le faatuatua, faamoemoe, ma le alofa mama. O o’u aafiaga o se faafafine o le Au Paia o Aso e Gata Ai na faamalosia ai lo’u faatuatua a o ou aoao e ola faatasi ma tulaga le mautinoa, aoao ia iloa le Agaga, ma aoao e tuu lo’u faatuatuaga i le Alii ma Lana lava taimi.

O se tasi o lesona aupito matagofie sa ou aoaoina o le faamoemoe. Ou te le iloa pe o le a mafai pe leai ona ou maua se tasi ou te mafuta atu i ai i lo’u olaga. O le mea moni, e le tele naua ni avanoa. E ui i na mea, e taua ia te au le tauivi ia maua lea mea, faamoemoe iai, ma ia talitonu i ai. E faapena foi i le talalelei. E leai sa tatou auala e tino mai ai le faamaoniga faapea o le tele o mea tatou te faamoemoe iai o le a taunuu, ae tatou te tau faasagatau i le mau gaogaosa, mo na mea aua e taua. Ma le mea mulimuli, ua ou aoaoina le alofa mama a o ou onosaia ai a’u lava tauiviga ma matau isi i le onosaia ai foi o o latou luitau.

Ua ou malamalama ai i le taua o le alofa mama a’ia’i o Keriso. Ou te iloa o loo soifua le Atua ma e alofa ia i tatou. Na te silafia atoatoa i tatou taitoatasi aua na Ia faia i tatou. Ou te iloa na togiolaina e Keriso e le gata mo a tatou agasala ae faapea foi o tatou tiga ma puapuaga i le olaga nei. E i ai lo’u faatuatuaga o loo tatou malu i Ona aao, o le a sologa lelei mea uma mo mea aupito silisili, aua o Lana mamanu faalelagi lena. E i ai la’u molimau i le mana ma le matagofie o le alofa mama. Ou te alofa i lo’u Faaola ma lo’u Tama o i le Lagi, ma ou te faafetai lava i aso uma mo faamanuiaga ma aafiaga na tuuina mai ia te au i lenei olaga.

Tala a Robin: Epikopo o Tonya

E vaai Robin ia Andy e faapei foi ona tagai soo se epikopo i se tagata faamaoni o se aulotu. E tofu tagata uma ma luitau; na pau lava o Andy e ola ma le tosina atu i le itupa e tasi. Peitai, e le taofia ai o ia mai le umiaina o se valaauga ma le auauna atu i lona aiga faaleuarota. E tusa ai ma le tala a Robin, o le i ai o Andy o se faamanuiaga i la latou uarota.

Atapue o Robin

O lo’u aofia ai i le olaga o Andy ma le au Millers e aunoa lea ma ni faaletonu. Sa leai ni laveaiga faalelagona po o ni faatalanoaga uumi, ogaoga ma Andy e tusa ai i la’u matafaioi. E lei talosagaina e Andy se gauai atu faapitoa mo ia, ma ua tele naua le sao o ia ma lona aiga i la matou uarota talu lava ona latou taunuu mai. Ua ou fai atu lenei mea aua e foliga mai e le’i manao lava Andy e faatupu se vevesi i lona tulaga faalefeusuaiga.

E manao ia faia o ia e faapei ona faia i isi tagata uma. Ae aisea e le faapea ai ona fai? E le ese o ia nai lo se isi o i tatou. E tofu uma i tatou ma aafiaga ma’oti, ma e tatou te aufaatasi e lagolago le tasi i le tasi.

O le tama o Andy, o Dylan, o le matou peresitene o Alii Talavou O lona tina o Tonya, o se faiaoga o Aoaoga Faavae o le Talalelei. O lona tuafafine ma ona uso laiti e toaaga ia latou vasega ma korama. O Andy o se fesoasoani i le korama a toeaina. E lagolagosua o ia i lona peresitene ma auauna atu ma le faamaoni.

Sa matou vaavaai atu ma o’u fesoasoani ia Andy i le vaaiga lava e tasi e pei ona matou vaavaai atu i soo se isi tagata o le uarota, ia po o se tagata foi o le nuu o le vaaiga lava e tasi. Na te lei faia lava se mea sese e faapea ua ou iloaina. E ui e moni e le atoatoa o ia, ae e leai lava se tasi o i tatou foi e atoatoa. Tatou te faamoemoe uma ia faamanuiaina i tatou mai le faaleleiga ma le Alii lea e mafai e ala i le Togiola a Iesu Keriso.

Ua uma ona auina atu e Andy ana pepa o le misiona a o nofo ai i le siteki ma le uarota na i ai muamua. O le mea moni faapea sa manao Andy e auauna atu, e ta’u mai ai sa i ai sana molimau, se talitonuga i lo tatou Faaola ma i le Toefuataiga o le talalelei. Ina ua taunuu mai lona valaauga o le misiona, sa iloa e Andy ma lona aiga sa tofia o ia e auauna atu i Iurukuei. Sa valaaulia au ou te auai faatasi ma le aiga a o vaetofiaina ia Andy e Peresitene Crandall. Sa tutusa lava le faatulagaga e pei o isi foi vaetofiaga sa ou i ai. Sa tuu atu i le aiga le avanoa e faasoa ai o latou lagona ma fautuaga; sa latou talie ma fetagisi. Sa faia e Andy se taumafaiga lototoa e auauna atu ai i se misiona tala’i. Peitai e mo mafuaaga atonu e faiā, pe leai foi, i lona tosina atu i le itupa e tasi, sa le mafai ai ona faamaea lana misiona talai, ma sa vave faamalolo ai. Ou te manao e faamamafa atu, e le faapea ona o le leai o se naunautaiga o le peresitene o le misiona e faaauau le auaunaga a Andy, ae, ona o ni faigata tau le soifua maloloina faalemafaufau na oo i ai Andy i le taimi lena.

O Andy o loo talanoa ia Robin

Ina ua ia toe taunuu mai i le matou uarota, ou te iloa sa le fiafia Andy i le le mafai ona faamaeaina lana misiona. I se ma faatalanoaga, sa ia faaalia mai ai lona manao e tumau i le faatuatua ma auauna atu i le Alii i isi auala. I lo’u iloa, e lei maluelue lava le faatuatua o Andy.

E lei leva le toe foi mai o Andy, sa talosaga mai le peresitene o le korama a toeaina ia tofia Andy e avea ma se tasi o ona fesoasoani. Sa matou talanoaina lenei mea o se au epikopo ma lagonaina ai o le valaauga o le a aoga mo Andy ma uso o le korama. Sa matou lagonaina o le valaauga o se mea musuia, ma sa matou fautuaina atu i le peresitene o le siteki. Matou te lei lagonaina se mafuaaga e le tatau ai lea avanoa mo Andy. Talu mai lena taimi, sa auauna lelei atu o ia ma le faamaoni. E auai o ia i fonotaga a le au peresitene, asiasi i tagata o le korama ma isi uso o le au peresitene, ma faatinoina mea uma e faapei ona tatau ai i se fesoasoani lelei. A le avanoa le peresitene o le korama a toeaina, ona auai atu lea o Andy i le aufono a le matou uarota ma fonotaga a le komiti faapitoa a le au perisitua.

O le taimi o auai i le matou uarota, sa taliaina ia Andy e le aulotu. E toatele e le iloaina le tosina atu o Andy i le itupa e tasi. O i latou e iloa, e latou te talia Andy ma le alofa ma le faaaloalo e tatau ai mo soo se tasi o fanau a lo tatou Tama. E faafaigofie e Andy lea tulaga e ala i lona toe faaali atu o le tausaafia ma le faauo.

E na o Andy e mafai ona ta’u maia ia i matou pe faape’i mo ia le ola ai i se siosiomaga o le Au Paia o Aso e Gata Ai a o aafia i le tosina atu i le itupa tasi Ae mai i la’u vaai, e ui ina filemu ma le tautala, ae e fiafia o ia ma fetuutuunai lelei foi. E i ai lona aiga e ese le lagolagosua ma ni tuaoi ma uo e talileleia o ia ma le agalelei ma le alofa. O lona auai ai o se faamanuiaga i la matou uarota.

Ou te talitonu e alofa laugatasia le Faaola ia i tatou uma ma ua Ia ofoina mai Ia lava e faatauina i se tau mo fanau uma a le Tama. E le faailoga tagata o Ia ma e valaaulia i tatou uma ia mauaina o fua o Lana Togiola. Ou te talitonu e malamalama o Ia ma loto faavauvau i luitau eseese tatou te feagai, e le afaina po o a lava ituaiga.

Ou te talitonu Na te malamalama e uiga ia Andy, silafia o ia i lona igoa, ma e alofa ia te ia e aunoa ma se faatuai, e faapei lava ona matou faia i la matou uarota.