Nuhnak in Ahkwoyelah Lutlut luhn Sucu Lom an ke Ma Suhmuhslah

Ke sucu uh lutlutkihn ma suhmuhslah pacl nuhkwewa el sie inkacnek in kahsruh sucu lom an in lotwelah wosasuc. Puhtahkah ac luhpahkah pacl kom rit ekihn sie sucu uh tiacna yohk srihpac oacna ke kom sikaleni in oruh pacl nuhkwewa. Ke kom oruh lutlut ke ma suhmuhslah an in sie ip yohk srihpac sin sucu lom an, kom fah kahsruh mwet in sucu lom an in fototoyang nuh yurun Jisus Kraist ac muhsaheack luhlahlfongi lalos ke pwelucng luhn kahs Lal.

Nuhnkuh ke kihsensiyuck ten inge:

• Kom ac ahkkweye fuhkah mwet in sucu lom an in sifacna lutlutkihn ma suhmuhslah?

• Meac kom kuh in oruh in ahkkweye mwet in sucu lom an in akacsruhi ke ma elos lotwelah?

• Kom ac ahkyohkye fuhkah ip yohk ma kom lutlutkihn ke ma suhmuhslah ke pacl fal in lutiyuck ke pengana lwen?

Esam lah lohm uh pa acn wo se emet in lutlut ac luti ke wosasuc. Kom kuh in lotwelah ac luti ke wosasuc ke lohm an ke ohiyac ma tiac kuh in orek ke kuhlahs ke Alu uh. Oruh in utuftuf ke kom motko ke inkacnek in kahsruh sucu lom an in lutlut ke ma suhmushlah. Motkoelah kuhtuh sin nuhnak ten inge in ahkyohkye lutlut luhn sucu lom an ke ma suhmuhslah.

Orekmakihn On

Onkihn on ma ahkkweye ip yohk ma lutiyuck ke ma suhmuhslah an.

Akacsruhi ke Ma Suhmuhslah Yohk Kalmac

Sang pacl nuh sin mwet ke sucu lom an in akacsruhi ke pohloh kahs ke ma suhmuhslah suc elos sokwack muh yohk kalmac nuh selos ke pacl in lutlut lalos sifacna.

Orekmakihn Kahs Lom Sifacna

Suli mwet in sucu an in fahk ahkfototoye ke kahs lalos sifacna lah meac elos lotwelah ke ma suhmuhslah ma kowos lutlut kac.

Orekmakihn Ma Suhmuhslah nuh ke Moul Lom an

Tukun riti sie pohlohkahs ke ma suhmuhslah, siyuck sin mwet in sucu an in akacsruhi ke ohiyac ma pohlohkahs sacn falyang nuh ke moul lalos an.

Siyuck sie Kihsensiyuck

Suli mwet ke sucu an in siyuck sie kihsensiyuck ke wosasuc, na sang sie pacl an in suk fuhs ma kuh in kahsruh tohpohklah kihsensiyuck sacn.

Oruh in Liyeyuck Ma Suhmuhslah

Sulaclah sie fuhs ma kom liye muh yohk srihpac, na kom likiyac ke acn ma mwet ke sucu an e kwacna liye. Suli mwet ke sucu an in kais sie sulaclah sie ma suhmuhslah an in likiyac in liyeyuck.

Oraclah sie Tahk ke Ma Suhmuhslah

Ekihn sie sucu, sulaclah ekahsr fuhs ma kom ke sramsramkihn ke wik fahsruh uh.

Esamyac Ma Suhmuhslah

Sulaclah sie pohlohkahs ke ma suhmuhslah ma yohk kalmac nuh sin sucu lom an, ac suli mwet ke sucu an in esamyac ke kalweni lwen nuhkwewa kuh sritaclkihn sie sritacl in esamyac.

Akacsruhi ke Lesin ma Orekmakihn Ma uh

Sokwack kain in ma suc falyang nuh ke sapta ac fuhs ma kowos suculac riti. Suli mwet ke sucu an in sramsramkihn lah kain in ma inge kuhpahsryang fuhkah nuh ke luti ke ma suhmuhslah an.

Sulaclah sie Sifac an

Lwelah mwet ke sucu an in kais sie sulaclah sie sifac ma sucu an ac tuhkweni lutlut kac. Orekmakihn Topical Guide, Kalmen Kutu Kas In Bible, kuh Guide to the Scriptures (scriptures.ChurchofJesusChrist.org) in sokwack pohlohkahs ke ma suhmuhslah ke sifac an.

Sruhlwaclah Petsac se

Suculac riti kuhtuh fuhs an, na fah sang pacl luhn mwet ke sucu an in sruhlwaclah ma suc kuhpahsryang nuh ke ma kowos riti. Pakiyac pacl in sramsramkihn kais sie sroal luhn sie sin sie.

Srihke Atacn Sramsram soko

Tukun riti sramsram soko, suli mwet ke sucu an in srihke atacn sramsram soko an. Tohkoh, sramsramkihn lah sramsram soko ingacn kuhpahsryang fuhkah nuh ke ma kowos kais sie puhlakihn ac kuh suculac puhlakihn.

Elder David A. Bednar el luti lah kais sie pacl in pruhe luhn sucu, kais sie pacl in suculac lutlut ke ma suhmuhslah, ac kais sie ekuh luhn sucu lohm ah pa sie tul in sroal nuh ke mwe sruhlwaclah ke nguhnasr. Wacngihn sie ma sikyak ma oacna in muh ma arulacna fwefwelac se kuh ma esamyuck se. Tuhsruhk oacna ke tul in sroal rangrang ac kol ac sruhsrah fohkfohk uh ahkkahtoye sie sin sie ac oraclah sie sroal na kahto wo, ohinge ke kuht sikaleni in oruh ma srihsrihk uh kuh in kol nuh ke ma yohk luhn nguhn (“More Diligent and Concerned at Home,” Liahona, Nohfohmpuh 2009, 19–20).