Nuhnak in Ahkwoyelah Lutlut Lom Sifacna ke Ma Suhmuhslah

Pa inge kuhtuh inkacnek in ahkyohke lutlut lom ke kahs luhn God ke ma suhmuhslah.

Pruhe in Mokleyuck

Ma suhmuhslah uh nein kahs luhn God. Ke kuht lutlutkihn, siyuck sin Pahpah tomom Inkuhsrao nuh ke kolyuck Lal ac eis Nguhn Lal in kahsrwekom in kahlwem kac.

Suk Ma Pwacye kacl Jisus Kraist

Ma suhmuhslah uh luti kuht lah ma nuhkwewa fahkwack kacl Kraist (liye 2 Nephi 11:4; Moses 6:63), ohinge Sokol ke ma sikyak, sramsram, ac lutlut luhn ma suhmuhslah. Nuhnkuh in suhmuhslah kuh mahkiyac fuhs ma luti ke Mwet Lahngo ac [kuht] in fahsr Tohkohl fuhkah.

Suk Kahs ac Pohlohkahs ma Mokle [Kuht]

Kom kuh in sokwack lah kuhtuh kahs ac pohlohkahs ke ma suhmuhslah uh kahyac insiom, oacna in muh elos sihmlac yohkna nuh sum. Ma inge sahp kom sifacna puhlakihn muh fal nuh sum, mokle ac ahkkweye kom. Nuhnkuh in mahkiyac ma inge ke ma suhmuhslah nuhtum kuh sihmihs ma inge ke sie mwe sihm nuhtum an.

Suk Ma Pwacye ke Wosasuc

Kuhtuh pacl uh ma pwacye ke wosasuc (kwacna pahngpahng mwe luti kuh ip yohk) uh fwack kahlwem, ac kuhtuh pacl uh elos touyak ke sie mwe srihkasrak kuh sramsram. Siyuck sum sifacna, “Ma pwacye ke wosasuc uh lutiyuck ke fuhs inge?”

Porongo Nguhn

Lihksreni lohacng nuh ke nuhnak ac puhla lom an, finne oacna in muh elos tiacna kuhpahsr nuh ke ma kom riti an. Ma puhlakihnyuck ingacn sahp kuh in ma suc Pahpah Tomom Inkuhsrao El kena kom in lotwelah ac puhla.

Luhmuh Ma Suhmuhslah uh nuh ke Moul Lom an

Motko lah sramsram ac mwe luti ma kom riti an fal nuh ke moul lom an. In mwe srihkasrak, kom kuh in siyuck sum sifacna, “Ma sikyak fuhkah nuh sihk oacna ma nga riti uh?” kuh “Ngac ukwe fuhkah mwe srihkasrak luhn mwet se inge ke ma suhmuhslah?”

Siyuck Kihsen Siyuck an

Siyuck kihsen siyuck ke wosasuc uh kuh in kahsrwekom in sulaclah lah meac kom ac lutlutkihn. Ke kom lutlutkihn ma suhmuhslah, kihsen siyuck uh kuh pac in mayak ke nuhnak lom an. Kihsen siyuck inge kuh in kuhpahsr nuh ke ma kom riti kuh nuh ke moul lom an. Motko kihsen siyuck inge, ac suk topukyac ke kom fahfahlac na ke lutlut ke ma suhmuhslah. Tukun lutlut lom an, siyuck lah meac pac God El kena kom in lotwelah, ac lohacng suk nuh ke topukyac ke ao ekahsr ac lwen ekahsr fahsruh uh.

Orekmakihn Mwe Kahsruh in Lutlut ke Ma Suhmuhslah

In eis kuhtuh pac etwacack ke fuhs ma kom riti, orekmakihn mwe kahsruh ahkuhtweyac e ten an, Topical Guide, Bible Dictionary, Guide to the Scriptures (Scriptures.ChurchofJesusChrist.org), ac mwe kahsruh lutlut sahyac.

Motko Koanon Ma Sruhmuhnyuck ke Ma Suhmuhslah

Kom kuh in sokwack etwacack ma yohk kalmac ke sie ma suhmuhslah kom fin motko ke koanon ma sruhmuhnyuck an—ke ohiyac kuh ohiyacn ma suhmuhslah. In mwe srihkasrak, in etuh ke sramsram ac luhlahlfongi luhn mwet ma mwet pahluh se sramsram nuh se uh kuh in kahsrwekom in kahlwem ke srihpac luhn pweng se lal an.

Suhmuhslah Nuhnak ac Puhla Lom an

Oasr inkacnek puhs in suhmuhslah nuhnak ma tuhkuh nuh sum ke kom lutlut uh. In mwe srihkasrak, ke kom mahkiyac kahs kuh pohlohkahs yohk kalmac se ac suhmuhslah nuhnak lom kac an ke ma suhmuhslah nuhtum an. Kom kuh pac in oraclah sie mwe sihm ke etwacack, ma puhlakihnyuck, ac nuhnak ma kom eis. Kuh sahp kom kuh in suhmuhslah kihsen siyuck ma kom siyuck met liki kom muhtwacwacack lutlut lom an, na tok kom suhmuhslah top ma kom kolyucklac nuh kac.

Lutlut ke Kahs luhn Mwet Pahluh ac Mwet Sap ke Lwen-sahflah

Riti ma suc mwet pahluh ac mwet sap ke lwen-sahflah tuh luti ke ip yohk ma kom sokwack ke ma suhmuhslah. Pweng lalos an oasr ke “Toeni Luhlahp,” “Magazines,” ac kuhtuh un mwe kahsruh sahyac ke Gospel Library.

Riti Sramsram an

Riti sramsram ke ma suhmuhslah, suk in kahlwem ke koano an (pacl, acn, mwet sramsram, ac mwet el sramsram nuh se an). Sramsram ma petsaclah ke ma suhmuhslah uh pa sie mwe kahsruh yohk nuh ke ma inge, yohkna nuh sin tuhlihk srihsrihk ac mempucr ma tiacna arulacna kahlwem ke ma suhmuhslah uh.

Akacsruhi ke Nuhnak an

Sramsramkihn nuhnak tuhkuh ke lutlut lom sifacna an pa sie inkacnek wo in luti mwet sahyac ac kahsruh ahkkweye etatwen lom ke ma kom ritelah.

Muhta na ke Ma Kom Lotwelah

Lutlut ke ma suhmuhslah uh kuh in mokle kom ac kol kuht in ekuhllah ohiyan moul lasr uh. Porongo ma Nguhn uh mokle kom in oruh ke kom rit, ac na otwelah in mukwikwi ke mokleyuck ingacn.