Epektibo nga Koordinasyon uban sa mga Misyonaryo

Ang mga Kapangulohan sa Korum sa mga Elder ug Relief Society mangulo sa pagtabang sa pagdasig sa mga miyembro sa paghigugma sa mga anak sa Dios, sa pagpaambit sa ebanghelyo, ug sa pagdapit sa uban nga modawat sa mga panalangin sa Manluluwas (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 23.5.2, Librarya sa Ebanghelyo). Isip mga lider, hibaloi nga ang inyong mga paningkamot molambo pag-ayo kon ang mga miyembro ug mga misyonaryo magsabot sa ilang mga paningkamot sa pagdala sa mga tawo ngadto kang Kristo.

Usa sa labing maayong mga paagi sa pagpahiuyon sa mga paningkamot sa pagdala sa uban ngadto ni Kristo mao ang pagpahigayon og mubo, dili pormal nga sinemana nga mga miting diin ang mga “lokal nga mga lider ug [mga misyonaryo] magsabot sa mga paningkamot sa pagpakigbahin sa ebanghelyo ug sa pagpalig-on sa bag-o ug mibalik nga mga miyembro” (Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo [2023], 255).

Ang sinemana nga miting sa pakigsabot kinahanglan nga magtutok sa mga indibidwal ug matubag kining upat ka pangutana gikan sa Isangyaw ang Akong Ebanghelyo:

1. Sa unsang paagi nga kita makatabang niadtong gitudloan?

2. Sa unsang paagi nga kita makatabang niadtong bag-ohay lang nabunyagan?

3. Sa unsang paagi nga kita makatabang sa mibalik nga mga miyembro?

4. Unsaon nato pagpangita og mga tawo nga katudloan?

Ang sinemana nga miting sa pakigsabot mao usab ang maayong panahon sa paghunahuna mahitungod sa panginahanglan sa komunidad nga ang mga kapanguhaan sa Simbahan makatabang sa pagtubag. Kini nga mga miting usa usab ka panahon sa pagpalig-on sa mga paagi nga ang mga miyembro mipakigbahin na sa ebanghelyo ug mahibalo sa mga kalihokan sa ward o stake nga ang mga miyembro mahimong makadapit sa mga higala ug mga tawo sa komunidad aron sa pagtambong.