Young men at church meeting

Mga Ideya alang sa Leksiyon sa Ikalima nga Dominggo

Ang mga leksiyon sa ikalimang Dominggo maghatag og nindot nga mga oportunidad sa pagdasig sa mga miyembro nga magpuyo sa mga baroganan sa “paghigugma, pagpakigbahin, ug pagdapit” ug maila ang hingpit nga kalipay ug mga panalangin nga nagagikan sa pagpaambit sa ebanghelyo ni Jesukristo. Usa sa mga katuyoan sa leksiyon sa ikalimang Dominggo mao ang pagtabang sa matag miyembro nga mopakigbahin sa ebanghelyo ni Jesukristo sa normal ug natural nga mga paagi pinaagi sa pagbuhat sa mga baroganan sa “paghigugma, pagpakigbahin, ug pagdapit.”

Sunda ang paggiya sa Espiritu samtang mangandam kamo. Motudlo sa paagi nga makadasig sa mga miyembro sa inyong ward o branch, ilabi na sa kabatan-onan nga moapil sa panaghisgotan. Ang mosunod nga mga ideya ug mga kapanguhaan mahimong moabag ninyo sa inyong mga paningkamot.

Mga Konsepto nga Hunahunaon

Ang mga panalangin ug hingpit nga kalipay sa pagpaambit sa ebanghelyo mahimong makab-ot alang sa matag usa kanato. Ang tanang miyembro sa Simbahan mapanalanginan samtang kita mohigugma sa Dios ug sa atong mga silingan; mopaambit sa ebanghelyo isip kabahin sa atong personal, pangpamilya, ug pangsimbahan nga kinabuhi, ug modapit sa uban nga moduol ug motan-aw, moduol ug motabang, ug moduol ug mopahisakop.

Ang pagpaambit sa ebanghelyo magdala og hingpit nga kalipay kanato, sa Ginoo, ug sa uban. Kini usab nagdala sa gahom sa Espiritu ug sa Dios sa mas buhong nga paagi ngadto sa atong kinabuhi (tan-awa sa Mosiah 18:10; Juan 15:4–5), nagpanalipod kanato batok sa tentasyon (tan-awa sa 3 Nephi 18:24–25), ug nagdala ug pagkaayo ug kapasayloan sa mga sala (tan-awa sa Doktrina ug mga Pakigsaad 62:3).

Pagpakigbahin sa mga Kapanguhaan sa Ebanghelyo

Ang mga kapanguhaan nga nakalista sa ubos makatabang kaninyo nga makasabot sa mga paagi aron matabangan ang mga miyembro sa Simbahan sa pagpaambit sa ebanghelyo pinaagi sa pagbuhat sa mga baroganan sa “paghigugma, pagpakigbahin, ug pagdapit.”

• Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo

• Gary E. Stevenson, “Paghigugma, Pagpaambit, Pagdapit,” Liahona, Mayo 2022, 84–87

• Marcus B. Nash, “Ipakita Ninyo ang Inyong Kahayag,” Liahona, Nob. 2021, 71–73

• Pagpakigbahin sa Ebanghelyo: Mga Baroganan sa Paghigugma, Pagpakigbahin, ug Pagdapit

• Unsaon sa Pagsugod sa Pagpakigbahin sa Mga Kapanguhaan sa Simbahan

• Pagpakigbahin sa mga Importanteng Panghitabo sa Ebanghelyo nga Sibya

• 2022 Pagpaambit sa Ebanghelyo: Usa ka Sibya alang sa mga Lider

Posibleng mga Pangutana nga Pagahisgotan

• Sa unsang paagi nga ang pagpaambit sa ebanghelyo mas makapaduol kanato ngadto ni Jesukristo?

• Unsaon nato sa pagpaapil sa uban sa atong nakasentro ni Kristo nga kinabuhi sa normal ug natural nga mga paagi?

• Sa unsang mga paagi nga kita nagpakigbahin sa ebanghelyo sa natural nga paagi? Unsaon nato sa pagpalambo niadto nga mga paningkamot?

• Unsaon sa atong ward sa paghimo og sitwasyon diin mas sayon ang paghigugma, pagpakigbahin, ug pagdapit?

• Unsaon nato sa pagsugod sa pagpakigbahin sa mga kapanguhaan sa Simbahan?