Fakataha Fika Onó
Fakatupulaki e Nofo-malí
Ngaahi Taumuʻa ʻo e Fakatahá
Lolotonga e fakataha ko ʻení, tokoni kiate kinautolu ʻoku kau he kalasí:
-
Ke mahino ko e taʻetokangá mo e siʻisiʻi e fakatupulaki maʻu peé ʻoku kaunga ia ki he ola kovi ʻo e nofo-malí.
-
Ke nau ako e ngaahi tefitoʻi moʻoni mo e ngaahi ʻekitivitī mahuʻinga te nau fakatupulaki e nofo-malí.
-
Faʻu ha palani te ne fakatupulaki ʻena nofo-malí.
Ke Feʻofaʻaki mo Fetauhiʻaki
Ne fakapapauʻi mai ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻa e uho mahuʻinga ʻo e nofo-malí mo e moʻui fakafāmilí ʻi he palani ʻa e Tamai Hēvaní maʻa ʻEne fānaú. Naʻa nau pehē: “ʻOku ʻi ai ha fatongia toputapu ʻo e husepānití mo e uaifí ke na feʻofaʻaki mo fetauhiʻaki.”1 Ne akonaki ʻaki ʻe Palesiteni Poiti K. Peeka ʻo e Kōlomu ʻo e Toko Hongofulu Mā Uá ʻo pehē: “ʻOku ʻikai ha toe feohi ia te ne maʻu ha mālohi ke ne hakeakiʻi ʻa e tangatá mo e fefiné ka ko e fuakava ʻo e malí. ʻOku ʻikai ha toe fatongia ʻi he Siasí pe sosaietí ʻe laka hake hono mahuʻingá.”2
ʻOku ʻikai lava ʻe he husepānití mo e uaifí ke liʻaki hona vā fetuʻutaki ʻi he nofo-malí. Meʻapango, ʻoku fai ia ʻe he tokolahi. Naʻe fakamatala ʻa Palesiteni Sēmisi E. Fausi ʻi heʻene hoko ko e mēmipa ʻo e Kau Fitungofulú, ki he ngaahi meʻa ʻoku nau fakatupu e vete malí ʻo fakatefito ʻi he meʻa pau pē ʻe taha,:
[“ʻIate kinautolú ni ʻoku kau ai e … siokitá, ʻikai ke matuʻotuʻa feʻungá, siʻisiʻi e tukupaá, siʻisiʻi e fetuʻutakí, ʻikai ke faivelengá; pea mo e ngaahi meʻa peheé, ʻa ia ʻoku mahino pē mo ʻilo lahiá.
“ʻOku ʻi ai ha ʻuhinga ʻe taha ʻi he meʻa kuó u aʻusiá ʻoku hangē ʻoku ʻikai fuʻu mahinó ka ʻoku muʻomuʻa mo ne fālute kotoa e toengá. Ko e siʻisiʻi hono fakatupulaki maʻu pē ʻo e nofo-malí. Ko e mole ʻa e meʻa mahulu atú ko ia ʻokú ne ʻai ke mahuʻinga, makehe, mo fakaʻofoʻofá, lolotonga ko iá ʻoku fakapōpula, faingataʻa pea ʻikai ke manakoa.”3
Lolotonga e kei faikaumeʻa ʻa e ongomeʻa malí, ʻoku lahi e taimi ʻokú na faʻa feohi fakataha aí. ʻOku tukutaha ʻena tokangá ʻi hona vā fetuʻutakí mo na feinga ke fakahoko ʻena ngaahi fie maʻú. ʻOkú na faʻa fakahaaʻi ʻa e ʻofá ʻaki ʻena fakahaaʻi e angaʻofá mo e fefakaʻapaʻapaʻakí, loto fie foakí, fevahevaheʻaki e ngaahi taumuʻá mo e ngaahi meʻa ʻokú na mahuʻingaʻia aí, fakamoleki ha taimi ke na feohi ai, fai e ngaahi fakahīkihikí, talanoa mo fakafanongo, foaki meʻaʻofa, fakamanatu e ngaahi meʻa makehe ne hokó, pea ʻave ha fanga kiʻi tohi ʻofa, fai tohi, mo e kaati.
Ka, ʻi he hili e mali ʻa e ongomeʻá, ʻoku kamata ke fakafonu ʻaki ʻena moʻuí ʻa e akó, ngāué, fānaú mo e ngāue tokoní. ʻOku lahi e ngaahi fie maʻú ki hona taimí, kau ai e ngāué, fāmilí, ngaahi ʻekitivitī fakatāutahá, mo e ngaahi ngāue tokoni fakasiasi mo fakakoló. ʻI he fakaʻau ke lahi e ngaahi fatongiá, ʻoku faʻa siʻisiʻi leva ʻa e fengāueʻaki ʻa e niʻihi ʻo e ngaahi hoa-malí pea siʻisiʻi ange ʻene toutou hokó. ʻOku ʻalu pē taimí mo e fuʻu lahi ange e kau ʻa e husepānití mo e uaifí ʻi he ngaahi ʻekitivitī kehé; pea ʻikai leva ke toe mahuʻinga ʻa e nofo-malí ʻo hangē ko e kimuʻá, pea uesia leva e vā fetuʻutakí. ʻOku holo e ngaahi ngāue ʻofá pe ʻikai pē ke toe hoko, tātātaha mo taʻeoli e fetuʻutakí, pea mole mo hono fakahā ʻo e ʻofá. ʻOku kamata ke taʻe tokanga ʻa e ongomeʻa malí ʻi heʻena fetalanoaʻakí mo hona ʻulungāangá. ʻOku mole atu ʻa e ongoʻi feʻofaʻakí pea kamata ke vaivai ʻa e vā fetuʻutaki ʻi he nofo-malí.
Naʻe fakatokanga ʻa ʻEletā Mālini K. Senisoni ʻo e Kau Fitungofulú ʻoku fai ʻe he tēvoló ha ngāue ʻi hono toʻo e ngaahi meʻa ʻoku totonu ke fakamuʻomuʻá mei he nofo-malí: “ʻE ongo mai kiate kitautolu ha ngaahi leʻo fakatauele ki he ngaahi lavameʻa mo e ngaahi ikuna fakamāmani te nau takiakiʻi kitautolu ki he ngaahi hala fakatuʻutāmaki ʻa ia te tau toki lava pē ke foki mei ai ʻaki ha feinga lahi. Ko e fanga kiʻi fili iiki ʻoku ngali taʻe mahuʻinga ʻi he hala fonongá, ʻoku ʻi ai honau ngaahi nunuʻa te nau fakapapauʻi hotau ikuʻanga fakaʻosí.”4 ʻOku faʻa hoko ʻa e hanga ʻe he houʻeiki tangata mo fafiné ʻo fakafetongi ʻa e ngaahi talaʻofa ʻo e melinó, fiefiá mo e moʻui taʻengatá ʻaki ha faingamālie ki he ongoongoa taimi nounoú, mālohí, mo e hīkisiá. ʻOku tātānaki e fanga kiʻi fili īkí kae ʻoua kuo toki ʻā hake ʻa e kakai ʻe niʻihi ʻo ʻilo kuo mole ʻa e meʻa ne nau mahuʻingaʻia taha aí.
Fakahoko ha Faikehekehe
Naʻe fakamatalaʻi ʻe Palesiteni Sipenisā W. Kimipolo ʻa e palopalemá ni ʻo pehē: “Ko e kakai tokolahi … kuo nau fakaʻatā ke hōloa mo vaivai pea maʻamaʻa ʻenau nofo-malí. … ʻE lelei ange ki he kakai ko ʻení ke nau toe fakafuofuaʻi, fakafoʻou ʻenau faikaumeʻá, fakahā ʻenau ʻofá, fakahaaʻi e manavaʻofá, pea ʻai ke toe lahi ange ʻenau faʻa fakaʻatuʻí koeʻuhí ke toe fakaʻofoʻofa, fiefia, mo tupulaki ʻenau nofo-malí.”5 Ke fakafepakiʻi ʻa e fakasiʻisiʻiʻi ko ʻeni ʻo e nofo-malí, naʻá ne akonaki ke ngāue fakataha ʻa e ongomeʻa malí ke fakatupulaki ʻena ʻofá: “Ko e ʻofá … ʻoku ʻikai ha ʻamanaki ke tolonga ʻo taʻengata kae ʻoua kuo tanumaki maʻu pē ʻaki ʻa e ʻofá, ʻa e fakahā ʻo e fakaʻapaʻapá mo e houngaʻiá, ʻa e fakahā ʻo e fakamāloó, mo e fakakaukau taʻe siokitá.”6
Kuo fanongonongo ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ko e “fāmilí ko e uho ia ʻo e palani ʻa e Fakamoʻuí ki he ikuʻanga taʻengata ʻo ʻEne fānaú.”7 ʻOku fakapapauʻi mai ʻe he folofolá, “Ko ia [ʻe] tuku ange ai ʻe ha tangata ʻa ʻene tamaí mo ʻene faʻeé, pea te ne pīkitai ki hono uaifí” (Mōsese 3:24). Talu mei he hoko ʻa e fāmilí ko e uho ʻo e palani ʻa e Tupuʻangá, ko kinautolu ʻoku nau fie talangofua kiate Iá ʻoku nau ʻai ke hoko ʻenau nofo-malí mo honau ngaahi fāmilí ko e uho ia ʻenau moʻuí. Neongo ʻoku mahuʻinga ʻa e ngaahi ʻekitivitī kehe lahi ʻo e moʻuí, ʻoku totonu ke ʻoua te nau fuʻu mahuʻinga ke nau taʻofi ai ha ongomeʻa mali mei hono kumi ha taimi faingamālie mo ha ivi ke fakatupulaki hona vā fetuʻutakí. ʻI he taimi ʻoku fakamuʻomuʻa ai ʻe he husepānití mo e uaifí kinaua mo ʻena nofo-malí, ʻokú na aʻusia ha fiefia mo ha melino pea iku ki heʻena maʻu ha vā fetuʻutaki ʻo e nofo-mali taʻengatá.
ʻOku tokoniʻi ʻe he ongoongolelei ʻo Sīsū Kalaisí ʻa e kakaí ke nau fakamuʻomuʻa ʻenau nofo-malí. ʻI he lau ki he ngaahi meʻa ke fakamuʻomuʻá, ʻoku fika ua pē ʻa e nofo-malí ki he ʻofa ki he ʻOtuá. Naʻe manatu ʻa Sisitā Māsili P. Hingikelī ki he ngaahi meʻa naʻe fakamuʻomuʻa ʻe he tangata naʻá ne mali mo iá: “ʻI he ofi ange ke ma malí, ne u ongoʻi falala moʻoni naʻe ʻofa ʻa Kōtoni ʻiate au. Ka neongo ia ne u ʻiloʻi he ʻikai ke u fika ʻuluaki kiate ia. Ne u ʻiloʻi te u fika ua ʻi heʻene moʻuí pea ʻe fika ʻuluaki ʻa e ʻEikí. Pea naʻe sai pē ia.”8
ʻI he taimi ʻoku ʻofa ai ha husepāniti mo ha uaifi ki he ʻOtuá mo tauhi ʻEne ngaahi fekaú, te na feʻofaʻaki mo mahuʻingaʻia ʻiate kinaua takitaha mo fetauhiʻaki ʻi he fakaʻapaʻapa. ʻOkú na tauhi e ngaahi fuakava ne na fakahokó. Ko e ʻofa mo e tauhi ki he ʻOtuá ʻa e ʻuluaki meʻa ʻokú na fakamuʻomuʻá; ko hono ʻofaʻi mo tokoni ki hono malí ʻoku fika ua ofi ʻaupito pe tatau mo e konga ʻo hono fakahoko ʻo e ʻuluaki meʻa ʻoku fakamuʻomuʻá. ʻI heʻena ʻofa foki ki he ʻOtuá, ʻoku tupulaki ai ʻa ʻena feʻofaʻakí, pea taʻeueʻia ʻena nofo-malí ʻi heʻena tukupā ke angatonu ʻi heʻena nofo-malí.
Ko hano taki heeʻi ʻe he ngaahi fili īkí ʻa e niʻihi fakafoʻituituí mei heʻenau nofo-malí, ʻoku pehē pē ʻa e lava ke fakamoʻui ʻe he fanga kiʻi ngāue ngali iiki mo taʻemahuʻinga ʻo e angaʻofá, ʻofa faka-Kalaisí, mo e ʻofá, ʻa e ngaahi kafo fakaelotó mo fokotuʻu ha fakavaʻe mālohi ʻo e ngaahi vā fetuʻutaki lelei mo fakafiefiá.
Naʻe akonaki ʻa Palesiteni Fausi: “ʻI he fakatupulaki ʻo e nofo-malí ko e ngaahi meʻa lalahí ʻa e fanga kiʻi meʻa īkí. Ko ha fefakahoungaʻiʻaki maʻu pē mo ha fakatātaaʻi lelei ʻo e fakamāloó. Ko e fepoupouʻaki mo e fetokoniʻaki ke na tupulaki. Ko e nofo-malí ko ha fekumi ʻoku fakahoko fakataha ki he leleí, fakaʻofoʻofa mo hono fakalangí.”9
ʻE fakatupulaki ʻe he husepānití mo e uaifi ʻena nofo-malí ʻi heʻena fakatefito hona vā fetuʻutakí ʻi he ongoongoleleí, tuku ha taimi ke na feohi ai, pea fiefia fakataha, toutou talanoa lelei, pea fakahoko ha ngaahi ngāue ʻo e ʻofá.
Fakatefito Hoʻo Nofo-malí ʻi he Ongoongolelei ʻo Sīsū Kalaisí
Naʻe pehē ʻe Palesiteni Fausi, [“ʻOku ʻi ai e meʻa fakatupulaki makehe ʻe taha, ʻa ia ʻoku mahulu atu ʻi he meʻa kotoa pē te ne fakatahaʻi ha tangata mo ha fefine ʻi ha ongo mātuʻaki moʻoni ʻaupito, toputapu, mo fakalaumālie. Ko e faka-ʻOtua ʻa e nofo-malí.”]10
Naʻe akonaki ʻa Palesiteni Sipenisā W. Kimipolo ʻo pehē ʻe maʻu ʻe he ngaahi hoa-malí ha fiefia lahi ange ʻi he taimi ʻoku nau ʻofa ai ki he ʻEikí mo e niʻihi kehé ʻo lahi ange ia ʻi heʻenau ʻofa kiate kinautolú mo e taimi ʻoku nau toutou ʻalu ai ki he temipalé, lotu fakataha, maʻu ʻenau ngaahi fakataha faka-Siasí, tauhi ke maʻa kakato ʻenau moʻuí, pea ngāue fakataha ke langa hake ʻa e puleʻanga ʻo e ʻOtuá. 11
ʻI he taimi ʻoku fakatefito ai ʻe he uaifí mo e husepānití hona vā fetuʻutakí ʻi he ongoongolelei ʻo Sīsū Kalaisí, ʻe fakalakalaka ʻena nofo-malí mo ʻena moʻui fakatāutahá. ʻOku totonu ke lotu fakataha ʻa e ongomeʻa malí he pongipongi mo e efiafi, ako e folofolá, pea fakahoko ha efiafi fakafāmili ʻi ʻapi fakauike.
ʻOku akoʻi ʻe he ongoongoleleí ʻa e niʻihi fakafoʻituituí ke ʻofa mo fetokoniʻaki pea ke “fefuaʻaki ʻa hoʻomou ngaahi kavengá” (Mōsaia 18:8). ʻI he taimi ʻoku toʻo ai ʻe ha niʻihi fakafoʻituitui kiate kinautolu ʻa e huafa ʻo Kalaisí, ʻoku nau fuakava ke ʻofa ki he niʻihi kehé ʻi he founga ko ʻení. ʻOku hanga ʻe he ngaahi ʻulungāanga mo e ngaahi ngāue faka-Kalaisí ʻo lehilehiʻi mo fakamālohia e ngaahi vā fetuʻutaki ʻo e nofo-malí ʻi hono tauhi ʻe he ngaahi hoa-malí ʻenau ngaahi fuakavá.
Naʻe ʻiloʻi ʻe Palesiteni Fausi ko e taha ʻo e ngaahi maʻuʻanga fiefia maʻongoʻonga tahá “ko hono maʻu e takaua mo e fiefia ʻi he ngaahi fua ʻo ha Tokotaha Māʻoniʻoni mo Faka-ʻOtuá. … Ko e taulá ʻa e taha faka-Laumālié.” Naʻá ne pehē: “ʻOku fakautuutu ʻa e vete malí koeʻuhí he ʻoku siʻisiʻi hono fakatupulaki e uouangatahá ʻi he ngaahi meʻa lahi ʻoku hokó ʻa ia ʻoku maʻu mei he tāpuaki ʻo hono fakamāʻoniʻoniʻí ʻaki hono tauhi e ngaahi fekau ʻa e ʻOtuá. Ko ha siʻisiʻi ia ʻo e meʻakai fakalaumālié.”12
Tuku ha Taimi Ke Na Feohi Ai
Kuo pau ke fekumi fakamātoato ʻa e husepānití mo e uaifí ki he ngaahi founga ke lehilehiʻi ʻaki hona vā fetuʻutakí. Taimi lahi, ʻoku lelei ʻa e ngaahi ʻekitivitī ʻoku nau toʻo ʻa e taimí mo e iví. ʻOku feʻauhi kotoa ʻa e fakakakato e akó, lavameʻa ʻi ha ngāue maʻuʻanga moʻuí, ʻohake ʻo e fānaú, fakahoko e ngaahi uiuiʻi faka-Siasí, mo hono fakalāngilangiʻi ʻo e ngaahi fatongia fakapuleʻanga mo fakakautaú mo e taimi ki he nofo-malí mo e fāmilí.
Naʻe fakatokanga ʻa Palesiteni Kōtoni B. Hingikelī ʻi heʻene lea ki he kau taki ʻo e Siasí: “ʻOku mahuʻinga ke ʻoua naʻa mou taʻe tokanga ki homou fāmilí. ʻOku ʻikai ha meʻa te mou maʻu ʻe mahuʻinga ange ai. … He ʻo ka hili hono lea ʻaki mo hono fai ʻo e meʻa kotoa pē, ko ʻetau fetuʻutaki fakafāmilí te tau ʻalu mo ia ki he moʻui ka hoko maí.”13
Taimi ʻe niʻihi kuo pau ke fakahoko ʻe he niʻihi fakafoʻituituí ha ngaahi fili faingataʻa. ʻI he taimi ʻoku tuʻu fakatuʻutāmaki ai ʻa e fiefiá mo e maʻumaʻuluta ʻo e nofo-malí, te na ala fie maʻu ke feilaulauʻi ʻena ngaahi ngāue fakatupu paʻangá, ngaahi ngāue maʻuʻanga moʻui ʻokú na fakamoleki lahi hona taimí ki aí mo fakatatali e ngaahi taumuʻa fakapaʻanga mo fakatāutahá. ʻE aʻu pē ki hano fie maʻu ke fakasiʻisiʻi ʻa e lahi ʻo e taimi ʻoku fakamoleki ki hono tokoniʻi e niʻihi kehé ke fakaʻatā ha taimi ki he vā fetuʻutaki toputapu taha ko ʻení.
Naʻe akonaki ʻa Palesiteni Hingikelī ʻo pehē: “Fakakaukauʻi fakataha mo [ho fāmilí] hono lahi ʻo e taimi ke te feohi ai mo kinautolú, pea mo e taimi ke fai ai iá. Hili iá pea mou tauhi pau ki ai. Feinga ke ʻoua naʻa mou tuku ha faʻahinga meʻa ke ne maumauʻi ia. Mou lau ʻoku toputapu ia. Mou lau ko ha meʻa ia ʻoku mou haʻisia ki ai. Mou lau ko ha taimi ia kuo mou ngāueʻi ʻa ia ʻoku totonu ke mou fiefia ai.
“Tauhi ʻa e pō Mōnité ke toputapu ki he efiafi fakafāmili ʻi ʻapí. ʻAi ha efiafi ke ke feohi toko ua pē ai mo ho uaifí. Fokotuʻu ha taimi ke mou ʻalu ai mo e fāmilí kotoa ʻo mālōlō ki ha feituʻu.” 14
ʻAi ke Na Fiefia Fakataha
Kuo ako ʻaki atu ʻe he kau taki ʻo e Siasí ʻoku fakamālohia ʻe he meʻa fakafiefiá ʻa e moʻui ʻa e fāmilí. Naʻe fakakau mai ʻe he Kau Palesitenisī ʻUluakí mo e Kōlomu ʻo e Toko Hongofulu Mā Uá e “ngaahi ʻekitivitī ʻoku fakatupulakí” ko e taha ia ʻo e ngaahi tefitoʻi moʻoni ola lelei he nofo-malí mo e fāmilí.15
Naʻe fakatokangaʻi ʻe he kau mataotao ki he ʻatamaí ko Hauati Maakameni, Sikoti Sitenilī, mo Sūsana Palamapeki ko e ngaahi hoa-mali ʻoku maumau honau ngaahi vā fetuʻutakí ʻoku ʻikai ke fakafokifā pē ʻenau ʻilo ʻoku ʻikai ke nau femanakoaʻakí. Ko hono moʻoní, “ko e ʻuhinga lahi taha ʻo e mole ʻa e femanakoʻakí ko e liʻaki ʻe he ongomeʻa malí ʻa e ngaahi meʻa mahuʻinga naʻá ne langaki mo pukepuke hake ia ʻi he ʻuluaki taimí, ko e anga fakakaumeʻá mo e fiefiá.”16 Naʻa nau fokotuʻu mai ke tuku makehe ʻe he ongomeʻa malí ha taimi ke na fiefia ai pea ʻoua naʻa feinga ke fakaleleiʻi ha ngaahi palopalema lolotonga e taimi ko iá.17
Naʻe ʻilo ʻe he tokotaha faʻu tohi ko Sūsana Pēsí “ko e kau saienisi fakasōsiale kuo nau ako kau ki he taimi mālōloó kuo nau poupouʻi ʻa e aofangatuku ko ia ne u aʻu ki ai ʻi heʻeku ngaahi ʻinitaviú [mo e ngaahi hoa-mali ʻoku nau fāifeingá]: ko e husepāniti mo e uaifi ʻokú na fakamoleki fakataha hona ngaahi taimi mālōloó ʻokú na fiemālie ange ʻi heʻena nofo-malí ʻiate kinautolu ʻoku ʻikaí.”18
Naʻe pehē ʻe Peesi ko e ngaahi hoa-mali naʻá ne ʻinitaviú ʻoku nau fai fakataha ʻa e ngaahi meʻa lahi: “ʻOku nau hulohula; lele pe ngāue ʻi tuʻa; lue lalo; sikī; vaʻinga volipolo; … kai ʻi ha feituʻu; ʻalu ʻo sio faiva, fale faiʻanga faiva, pe koniseti; fakafiefiaʻi e kaungāmeʻá; fai e fanga kiʻi vaʻinga he loki talanoá, mo e alā meʻa peheé.” Naʻá ne toe pehē ko e “mamata he TV ʻoku ʻikai lau ia he ko e tokolahi taha ʻo e ngaahi hoa-malí ko ha taimi vaʻinga ia kiate kinautolu, tuku kehe haʻanau mamata fakataha ʻi ha polokalama makehe.”19
Naʻe fakahā ʻe Maakameni, Sitenilī, mo Palamapeki ha ngaahi ʻekitivitī hangē ko e fakamālohisinó, kaukau tahí, lue laló, fai e faʻahinga fakamālohisino tangutú, malemalé, feimeʻatokoni, tānaki ngeʻesi fingota, sio faiva, inu sota, mo e talanoa (ʻo vahevahe e ngaahi taumuʻá, fakaʻānauá, palaní, ʻamanakí mo e talamonuú).20 ʻOku ʻikai ke mahuʻinga ʻa e ngaahi ʻekitivitií ʻo hangē ko e mahuʻinga ʻo e ʻulungāanga ʻo e ongomeʻa mali ʻokú na fakahoko kinautolú. ʻOku lava ke fakafiefia ʻa e ngāue fakatahá ʻi he ngaahi ngāue fakaʻapí. ʻOku faʻa siʻi taha pē e fakamole ki he ngaahi ʻekitivitī ʻoku fakafiefia tahá.
ʻI hono fakakaukauʻi ʻe he ongomeʻa malí ʻa e ngaahi ʻekitivitī te na lava ke fakahoko fakatahá, fakamanatu ange kiate kinaua ʻoku totonu ke ʻoua te na fakakaukauʻi pē ʻa e ngaahi ʻekitivitī te na fakatou fiefia aí. Kapau ʻe fetongitongi ʻe he ongomeʻa malí hono fili e ngaahi ʻekitivitií mo vahevahe e ngaahi meʻa ʻokú na manako aí, te na lava ʻo femahinoʻaki lelei ange, pea mahalo te na fakatupulaki ha ngaahi meʻa foʻou te na manako ai. ʻE fakatupulaki ʻena nofo-malí ʻe heʻena loto fiemālie ke na ʻahiʻahiʻi e ngaahi ʻekitivitī foʻoú mo fepoupouʻakí. ʻOku ʻikai fie maʻu ke siʻaki ʻe he husepānití mo e uaifí ʻa e ngaahi meʻa lelei ʻokú na faí; ʻe lava ke na kamata vahevahe ʻa e ngaahi ʻekitivitī lahi ko iá peá na kau fakataha ai.
Naʻe fakamahinoʻi ʻe Palesiteni ʻEselā Tafu Penisoni ko e efiafi fakafāmili ʻi ʻapí ko e taimi lelei ia ke fiefia ai ʻa e fāmilí: “ʻOku totonu ke fakataimi-tēpileʻi ʻa e efiafi fakafāmili ʻi ʻapí ke tuʻo taha he uike ko ha taimi ia ʻo e mālōlō, ngāue he ngaahi poloseki, fakatātaaʻi ha talanoa, hiva fakataha mo e pianó, fai ha fanga kiʻi vaʻinga, fanga kiʻi fakaneifua, mo e lotu fakafāmili. Hangē ko e fehokotaki ʻa e ukameá ʻi ha sēiní, ʻe pehē pē hono haʻi fakataha e fāmilí ʻe hono fai ʻení ʻi he ʻofa, laukau, tukufakaholo, mālohi, mo e faivelenga.”21
Talanoa Lelei Maʻu Pē
Naʻe fakamamafaʻi ʻe ʻEletā Lāsolo M. Nalesoni ʻo e Kōlomu ʻo e Toko Hongofulu Mā Uá ʻa e mahuʻinga ʻo e toutou fetuʻutakí: “ʻOku ʻi ai e ngaahi hoa-mali ʻe niʻihi ʻoku ʻikai ke nau fanongo ki honau malí. ʻOku mahuʻinga ke ʻi ai ha taimi ke fai ai ha talanoa ke kei tauhi e laine fetuʻutakí ke ʻoua naʻa motu. Kapau ko e nofo-malí ko ha vā fetuʻutaki tefito ia ʻi he moʻuí, ʻoku totonu ke ʻi ai hano taimi pau! Kae kehe ʻoku faʻa fakamuʻomuʻa e ngaahi meʻa ʻoku ʻikai ke loko mahuʻingá, kae tuku pē e kiʻi toenga taimí ke fanongo ki he ngaahi hoa ʻofaʻangá.”22
Naʻe fakapapauʻi mai ʻe Palesiteni Fausi: “ʻOku lava ʻo fakatupulaki e ngaahi vā ʻo e nofo-malí ʻe he fetuʻutaki ʻoku lelei angé. … ʻOku tau fetuʻutaki ʻi he ngaahi founga kehekehe ʻe lauiafe, hangē ko ha foʻi malimali, kiʻi helu e ʻulú, kiʻi amohi, mo hono manatuʻi he ʻaho takitaha ke lea ʻo pehē ʻʻOku ou ʻofa ʻiate koe’ pea ke lea ʻa e husepānití ʻo pehē ʻʻOkú ke fakaʻofoʻofa.’ Ko e ngaahi lea mahuʻinga kehe ke lea ʻaki, ʻi he taimi totonú, ko e ʻʻOku ou kole fakamolemole atu.’ Ko e fakafanongó ko ha founga fetuʻutaki fisifisimuʻa ia.23
ʻOku ʻuhinga ʻa e fakataha fika 2 ki he ako naʻe fakahoko ʻe Sione Kotimaní (John Gottman), ʻa ia naʻá ne ʻiloʻi ko e hoa-mali lavameʻá ʻokú na fengāueʻaki lelei ʻaki ʻena fakahaaʻi ʻena fetokangaʻakí, feʻofaʻakí, fakahoko ha ngaahi ngāue fakapotopoto, houngaʻia, fakahaaʻi e tokangá mo e kaungāongoʻí, tali e kehekehe ʻo e fakakaukau ʻa e malí, manako ke vaʻinga, mo vahevahe e fiefiá ʻi he taimi ʻoku maʻu ai ha taimi leleí.24
ʻI he fakatotolo ʻa Sūsana Peesi ki he ngaahi nofo-mali ʻoku ola lelei mo fiefiá, naʻá ne ʻiloʻi ai ʻoku mahuʻinga ʻa e fetuʻutaki leleí. Ko ha ongomeʻa mali ne ola lelei ʻena nofo-malí “ne siʻisiʻi ʻaupito hano fakangatangata ʻena fetuʻutakí; naʻe faingofua ʻena talanoa ki he ngaahi kaveinga ne faingataʻá; ne na ongoʻi naʻá na femahinoʻaki; naʻe siʻisiʻi ʻaupito e meʻa naʻe ʻikai tala ki he tokotahá; pea naʻá na falala te na malava ke fakaleleiʻi e ngaahi fepakipakí.” Naʻe ʻiloʻi ʻe Peesi ne ʻi ai ha ngaahi hoa-mali ʻe niʻihi ne teʻeki ai pē ke akoʻi kiate kinautolu ʻa e ngaahi lao ʻo e fetuʻutakí ka naʻe hangē ne nau muimui taʻe fakakaukau peé. Ne ako ʻe he niʻihi e ngaahi taukeí mei he ngaahi tohi, fakamatala, fakataha ako, ngaahi lea, pe kau faifaleʻi.25
Fakahoko ha Ngaahi Ngāue ʻOfa
Naʻe fakamamafaʻi ʻe Palesiteni Kōtoni B. Hingikelī ʻa e mahuʻinga ʻo e angaʻofa ʻoku totonu ke fefakahaaʻiʻaki ʻe he uaifí mo e husepānití : “Kapau ʻe feinga ʻa e husepāniti mo e uaifi kotoa ke na fai maʻu pē ʻa e meʻa ʻe ala fai ke fakafiemālieʻi mo fakafiefiaʻi ai hono hoá, ʻe siʻisiʻi pe ʻe ʻikai pē hoko ha vete mali ia. He ʻikai toe ongona ʻa e fakakikihí. He ʻikai fai ha fetūkuaki. He ʻikai hoko ha lea ʻita. Ka ʻe fetongi ʻa e ngaohikoviá mo e angakoví ʻe he ʻofá mo e tokangá.”
Naʻe fakalotolahiʻi ʻe Palesiteni Hingikelī ʻa e houʻeiki tangata ʻi he Siasí ke nau tokoni ki he kakai fefiné ke nau fakahaaʻi mo fakatupulaki honau ngaahi talēnití mo e ngaahi mālohinga kehé ʻi heʻenau moʻuí: “Ko e kakai fefine ʻi heʻetau moʻuí … kuo fakakoloa ʻaki kinautolu ha ngaahi ʻulungāanga pau, ʻa ia ko ha ngaahi ʻulungāanga faka-ʻOtua, ʻoku tupu ai ʻenau lava ʻo tokoni ʻofa ki he kakai ʻoku nau feohí. Te tau lava ʻo poupouʻi ʻenau feinga ko iá ʻo kapau te tau ʻoange ha faingamālie ke nau fakatupulaki honau ngaahi talēnití mo e ngaahi ongo fakanatula ʻoku ʻi honau lotó. ʻI heʻema toulekeleká ni naʻe pehē ʻe hoku hoa ʻofeiná ʻi ha efiafi ʻe taha, “Naʻá ke tuku mai ke u tauʻatāina maʻu pē, pea naʻá ku ʻofa ai ʻiate koe ʻi hoʻo fai iá.’”26
Ko e faikaumeʻa ʻoku hoko kimuʻa he malí ʻoku toe mahuʻinga ange ia ʻi he hili ʻa e malí. ʻOku fetokoniʻaki ʻa e husepānití mo uaifí ke na talanoa ki he ngaahi faingataʻa ʻo e moʻuí ʻi he taimi ʻokú na fakahaaʻi ai ʻa e fefakaʻapaʻapaʻakí, feangaʻofaʻakí, mo e feʻofaʻaki moʻoní. ʻOku uesia lahi ʻaupito ʻa e ngaahi vā fetuʻutakí ʻi he taimi ʻoku mole ai ʻa e ngaahi meʻá ni. ʻOku fakatupu ʻe he ngaahi ngāue ʻofá mo e fakahaaʻi maʻu ai pē ʻo e ʻofá ha ngaahi haʻi mālohi mo tuʻuloa ʻi he vā ʻo e husepānití mo e uaifí.
Ko e Fiefia ʻi he Nofo-malí
ʻE ola lelei ʻa e nofo-malí ʻi he taimi ʻoku fakahaaʻi ai ʻe he husepānití mo e uaifí ʻa e feʻofaʻakí mo e fefakahoungaʻiʻakí. Ko e meʻa mahuʻinga ʻa e ngaahi ngāue ʻoku fai ʻi he ʻofá, fakaʻatuʻí, mo e kaungāongoʻí. ʻI he taimi ʻoku maʻu ai ʻe he niʻihi fakafoʻituituí ʻa e ngaahi meʻá ni, ʻoku nau ongoʻi longomoʻui pea fakaʻaiʻai ai kinautolu ke nau aʻu ki he tuʻunga māʻolunga taha te nau malavá. ʻOku ʻikai totonu ke ʻamanaki e husepānití mo e uaifí ʻe lelei maʻu pē e meʻa kotoa. Ka ʻo kapau te na feʻofaʻaki mo fefakaʻapaʻapaʻaki, te na maʻu ʻa e fiemālie lahi ʻi he nofo-malí. Hangē ko e meʻa ne lea ʻaki ʻe Palesiteni Fausí, [“ʻOku lava ke laka hake ʻi he liunga tahaafé ʻa e fiefia ʻi he nofo-malí mo e hoko ko ha mātuʻá ʻi ha toe faʻahinga fiefia kehe.”]27
ʻE maʻu ʻe he hoa-malí ʻa e fiefia lahi ʻi heʻenau moʻui ʻaki e ongoongoleleí, pīkitai ki he ngaahi akonaki kuo ueʻi fakalaumālie e kau taki ʻo e Siasí ke nau faí, pea fakaʻaongaʻi e ngaahi tefitoʻi moʻoni mo e ngaahi taukei ʻo e vā fetuʻutaki ʻoku leleí. ʻE ʻi ai ʻa e ngaahi faingataʻa. Neongo ia, ʻe lava ke maʻu ʻe he ngaahi hoa-malí ha ʻamanaki lelei ʻi he fanongonongo naʻe fai ʻe Palesiteni Sipenisā W. Kimipoló: [“ʻOku taʻe malava ke lavaʻi e ngaahi faingataʻá kapau ʻoku ʻikai ke hokohoko atu ʻa hoʻo feingá!”]28 ʻE ʻomi ʻe he vilitakí ʻa e pale ne talaʻofa ʻakí ʻa ia ko e fiefia lahi ange ʻi he moʻuí ni mo e moʻui fakafāmili taʻengata ʻi he maama ka hokó.
“ʻI he fakatupulaki ʻo e nofo-malí ʻoku hoko ʻa e fanga kiʻi meʻa īkí ko e ngaahi meʻa ia ʻoku lalahi. …Ko e malí ko ha kaungā fekumi ki he leleí, ki he fakaʻofoʻofá, mo e meʻa fakalangí.”
Palesiteni James E. Faust