Fakataha Fika Faá
Ko Hono Ikunaʻi e ʻItá
Ngaahi Taumuʻa ʻo e Fakatahá
Lolotonga e fakataha ko ʻení, tokoni ki he faʻahinga ʻoku kau he kalasí ke:
-
Mahino ʻa e ngaahi palopalemá mo e ngaahi nunuʻa fakatāutaha ʻo e ʻitá.
-
Mahino ʻa e ngaahi moʻoniʻi meʻa fakaeloto mo fakanatula ʻokú ne tākiekina e ʻitá.
-
Mahino e ngaahi founga ke ikunaʻi ʻaki e ʻitá.
Ko e Palopalema ʻo e ʻItá
Naʻe ako ʻaki ʻe Palesiteni Kōtoni B. Hingikelī “ko e loto ʻitá ko ha meʻa kovi mo fakatuʻutāmaki ia ʻokú ne fakaʻauha ʻa e manavaʻofá pea toʻo mo e ʻofá.”1
ʻOku pehē ʻe he kakai ʻe niʻihi ko e fakahaaʻi ko ia ʻenau ʻitá ʻoku fakafiemālie mo fakafiefia. ʻOku nau ongoʻi mālohi mo māʻolunga ʻi he taimi ʻoku nau fakailifiaʻi ai ʻa e niʻihi kehé. Neongo ia, ʻoku fakaʻauha ʻe he ʻitá ʻa kinautolu ʻoku nau moʻulaloa ki aí. Ko e kakai tokosiʻi pē ʻoku nau saiʻia ke feohi mo kinautolu ʻoku ʻitá.
ʻOku fakatokanga mai ʻa e folofolá kau ki he ʻitá. Naʻe fakahinohinoʻi ʻe Tēvita ʻa e kau ʻIsilelí ke “tukuange ʻa e ʻitá, pea liʻaki ʻa e lilí” (Saame 37:8). ʻI he Lea Fakatātaá, ʻoku akoʻi ai “ko ia ʻoku fakatotoka ki he ʻitá ʻoku lelei hake ia ʻi ha taha ʻoku mālohi; pea pehē foki ia ʻoku faʻa pule ki hono lotó ʻi ha taha ʻoku hamu ha kolo” (Lea Fakatātā 16:32). Naʻe tohi ʻe he tangata naʻá ne faʻu ʻa e Tohi ʻa e Tangata Malangá, “ʻOua naʻá ke ʻita vave ʻi ho laumālié: he ʻoku nofo ʻa e ʻitá ʻi he fatafata ʻo e kau valé” (Tangata Malanga 7:9).
Lolotonga e ngāue fakafaifekau ʻa e Fakamoʻuí ʻi he matelié, naʻá Ne kikiteʻi ʻe aʻu ki he ngaahi ʻaho fakaʻosí “ko e tokolahi … ʻe fetaufehiʻaʻaki” pea “ko e meʻa ʻi he lahi ʻaupito ʻo e angahalá ʻe momoko ai ʻa e ʻofa ʻa e tokolahi” (Mātiu 24:10, 12). Naʻá Ne akoʻi ʻa e kau Nīfaí:
“Ko e laumālie ʻo e fakakikihí … ʻoku ʻo e tēvoló ia, ʻa ia ko e tamai ʻa e fakakikihí, pea ʻokú ne ueʻi hake ʻa e loto ʻo e kakaí ke fefakakikihiʻaki ʻi he ʻita, ʻiate kinautolu.
“Vakai ʻoku ʻikai ko ʻeku tokāteliné ʻeni, ke ueʻi ʻa e loto ʻo e kakaí ke feʻiteʻitani; ʻiate kinautolu; ka ko ʻeku tokāteliné ʻeni ke fakangata hono fai ʻo e ngaahi meʻa peheé” (3 Nīfai 11:29–30).
Naʻe kikite ʻa Nīfai ʻe “tekelili [ʻa Sētane ʻi hotau ʻahó] ʻi he loto ʻo e fānau ʻa e tangatá, pea ueʻi hake ʻa kinautolu ke nau ʻita ki he meʻa ʻoku leleí” (2 Nīfai 28:20). ʻOku tau sio ki he konga hono fakahoko ʻo e kikite ko iá ʻi he ngaahi tōʻonga ngaohikovia ʻoku fakahoko ʻe he husepānití ki he uaifí, uaifí ki he husepānití, mo e mātuʻá ki he fānaú.
Ko e nunuʻa moʻoni ʻo e ʻita ki he ngaahi kaungāmeʻá, kau mēmipa ʻo e fāmilí, mo e niʻihi kehé ʻoku lahi ange ia ʻi he meʻa ʻoku faʻa fakakaukau ki ai ʻa e kakaí. Naʻe fakamatalaʻi ʻe ʻEletā Lini G. Lōpini ʻo e Kau Fitungofulú ʻa e ʻitá ko e “angahala ia ʻi he fakakaukaú ʻoku fakatau atu ki he ongoʻi tāufehiʻá mo e ʻitá. Ko e tupuʻanga ia ʻo e ʻita he hala puleʻangá, mo e kē ʻi he ngaahi malaʻe sipotí, pea mo e kē ʻi he ngaahi ʻapí.”2
Naʻe toutou valokiʻi ʻe Palesiteni Hingikelī ʻa e kāingalotu ʻo e Siasí, tautefito ki he kau maʻu lakanga fakataulaʻeikí, ke mapuleʻi ʻenau ʻitá, mo fakatokanga ʻe mole ʻa e mālohi fakalaumālié meiate kinautolu ʻoku ʻikai lava ʻo mapuleʻi ʻenau ʻitá: “Ka ai ha tangata ʻoku anga fakamālohi ʻi hono ʻapí ʻoku ʻikai feʻunga ia mo e lakanga fakataulaʻeikí. ʻE ʻikai te ne lava ʻo hoko ko ha meʻangāue feʻunga ʻi he toʻukupu ʻo e ʻEikí ʻo kapau ʻoku ʻikai te ne fakahā ha fakaʻapaʻapa mo angaʻofa pea ʻofa ki hono hoa kuó ne filí. ʻOku pehē foki mo hano toʻo atu ʻo e mālohi ʻo e lakanga fakataulaʻeiki ʻo ha tangata … ʻoku ʻikai te ne mapuleʻi hono lotó.” 3
ʻE ala tokoni ʻa e ʻitá ki he fakafoʻituituí ke ne maʻu ha taumuʻa vave, ka ʻe kovi ange ʻa e ngaahi nunuʻa taimi-lōloá ia ʻi ha faʻahinga lelei ʻe maʻu. ʻOku kau ʻi he ngaahi nunuʻá ʻa e ngaahi meʻá ni:
-
Mole ʻa e Laumālié
-
Mole ʻa e fakaʻapaʻapá (kiate kita pea mei he niʻihi kehé) pea mo e ngaahi kaungāmeʻá mo e fengāueʻaki mo e niʻihi kehé
-
Mole ʻete falala kiate kitá
-
Ongoʻi halaia
-
Liʻekina
-
Ngaahi vā fetuʻutaki ʻoku fakatupu lotomoʻuá
-
Maumau fakaesino, fakaeloto, mo fakalaumālie kiate kita mo e niʻihi kehé
-
Fānau ʻoku ʻikai ke nau kei tui ki he meʻa ʻoku akoʻi ʻe he mātuʻá
-
Ngāue fakalao pea mole e tauʻatāina fakatāutahá
-
Vete mali
-
Mole e ngāue maʻuʻanga moʻuí
ʻOku fakatupu pe fakakoviʻi foki ʻe he ʻitá ʻa e ngaahi palopalema ki he moʻuí hangē ko e pala ngākaú, langa ʻulú, palopalema ki he mafú, langa tuʻá, mo e toto māʻolungá. ʻOku faʻa hoko e ngaahi palopalema ko ʻeni ki he moʻuí ʻi he taimi ʻoku fakahoko ai ʻe he kakaí ʻa e ʻitá ʻi he ngaahi founga taʻefakapotopoto ʻi ha ngaahi taimi lōloa.
Faʻahinga, Tupuʻanga, mo e Fakahāʻanga ʻo e ʻItá
ʻOku fakaʻaongaʻi ʻe he niʻihi fakafoʻituitui ʻa e ʻitá ke fakailifiaʻi mo puleʻi ʻaki e niʻihi kehé, ke nau ongoʻi māʻolunga ai, pea ke fakaʻehiʻehi mei hono fakaleleiʻi e ngaahi palopalemá mo e ngaahi fatongiá. ʻE ala tupu ʻa e ʻitá mei he hīkisiá mo e siokitá, hangē ko e ʻikai ke lava ʻe ha taha ke fai ki hono lotó, pea mei ha siʻisiʻi ʻa e angamaluú pe faʻa kātakí ʻi ha fakaʻitaʻi kita ʻe ha taha. ʻOku ʻita ʻa e niʻihi fakafoʻituitui ʻi he taimi ʻoku nau ongoʻi lotomamahi aí, loto lavea, pe taʻe fiemālié.
ʻOku ʻita ʻa e niʻihi fakafoʻituitui ʻo ʻikai fakakaukauʻi ha tali ki ha meʻa fakatupu ʻita ʻokú ne sio ki ai. ʻOku faʻa faingataʻa ke mapuleʻi ʻa e faʻahinga ʻita pehení koeʻuhí he ʻoku fuʻu vave ʻene hokó. ʻI he ngaahi tuʻunga kehé, ʻoku māmālie e langaki ʻo e ʻitá ʻo hangē ko e ʻilo ʻe he fakafoʻituituí ʻa e ngaahi fakamanamana taʻe tukú, taʻe faitotonú, pe ngaohikoviá pe ko e aʻusia ha ngaahi meʻa fakatupu ʻita hokohoko. Mahalo ʻe fakatuʻasino pe fakaeloto ha fakamanamana. Hangē ko ʻení, ʻe ala manavasiʻi ha taha ki ha ngaohikovia fakaesino, fakamāʻulaloʻi, pe mole hono fakaʻapaʻapaʻi iá pe niʻihi kehé. Kātoa ʻo e ngaahi meʻá ni, ko hoʻo fili pē ke ke ʻita.
ʻOku faʻa fakakeheʻi pe ʻai ke ngali fakatuʻutāmaki, fakalahiʻi, pe fakakaukau loto ki he ngaahi meʻa ʻoku pehē ko ha fakamanamana. ʻOku fuʻu lahi e hoko ʻa e ʻitá ʻi he taimi ʻoku fakamāuʻi hala ai ʻa e taumuʻa ʻa e niʻihi kehé: “ʻOkú ne feinga ke fakamamahiʻi au”; “ʻOkú ne taʻofi au mei hono maʻu e meʻa ʻoku ou fie maʻú”; “ʻOku ʻikai ke ne tokanga ki heʻeku ngaahi ongó”; “ʻOkú ne ngāue ʻaki pē au.”
ʻI he taimi ʻoku ʻilo ai ʻe ha niʻihi fakafoʻituituí ha fakamanamana peá ne fakahaaʻi ki ha taha ʻaki ʻa e ʻitá, ʻoku teuteu honau sinó ki he fepaki. ʻOku māʻolunga honau totó, fefeka honau uouá, tautaʻa, pea tuku taha ʻenau fakakaukaú ke toʻo ʻa e fakamanamaná pe ngaohikoviá. Ko e tuʻunga mateuteu ko ʻení ʻe ala fakahaaʻi ia ʻi hano fakafepakiʻi lea pe fakatuʻasino ʻo e fakamanamana kuo fakatokangaʻí. Pe ʻe ala tupulaki ʻa e ngaahi fakakaukau fakatupu ʻitá ʻi ha vahaʻataimi ʻo aʻu ki ha ʻikai toe lava ke mapuleʻi ʻa e ʻita ʻa e tokotaha ko iá, taimi ʻe niʻihi naʻe tupu pē mei he kiʻi meʻa siʻisiʻi pe ko ha meʻa ne hoko ka naʻe ʻikai ke ne faʻa tokanga ki ai.
ʻOku faʻa fakahaaʻi ʻa e ʻitá ʻi he ngaahi founga fakatuʻutāmaki ʻe tolu–fakafou he ʻulungāanga fakaaoaó, tukulotoʻí, heliakiʻi ʻo e ʻitá.
Fakaaoaó. ʻOku fakahaaʻi e ʻitá ʻi he:
-
Anga fītaʻa fakasinó (tā, uʻu, ʻaka, haʻaki, fusi e ʻulú, laʻu, hapoʻi, haveki e koloá).
-
Ngaohikovia fakaeloto mo e leakovi (kaikaila, ui ʻaki ha hingoa, kapekape, fakamanamanaʻi, tukuakiʻi, manukiʻi, fakakikihi, fakaʻitaʻi, fakailifiaʻi, kākaaʻi, tuku hifoʻi).
-
Ngaohikovia fakasekisuale (tohotoho, hia fakamalaʻia, ala kovi, fakamālohi fakasekisuale).
Tukulotoʻí. ʻOku faʻa tō ʻete ʻitá kiate kita, ʻo fakaiku ki heʻete tuku hifoʻi pē kitá, loto mamahí, pe ngaahi ngāue fakatupu ʻauha kiate kita (inu kava mālohí, fakaʻaongaʻi e faitoʻo kona tapú, feinga taonakitá, fakalaveaʻi pē kitá).
Heliaki ʻo e ʻitá. ʻOku ʻikai fakahaaʻi fakahangatonu ʻa e ʻitá (tōmui, taʻe falalaʻanga, taʻe fie auna, fakaʻaluma, taʻe faitotonu, fakatupu ʻita, taʻe fiemālie, fakaanga, fakatoloi).
ʻOku ʻomi e ngaahi kī mahuʻinga ki hono mapuleʻi ʻo e ʻitá ʻe hono ʻiloʻi ko ia ʻo e ngaahi fakakaukau kuo fehālākí mo e ngaahi liliu fakatuʻasino ʻoku nau fekauʻakí. Ko e taimi lelei taha ki ha taha ke ne motuhi e siakale ʻo e ʻitá ko ʻene fuofua ʻiloʻi ko ia e fakautuutu ʻa e lotomoʻuá. ʻOku lava leva e taha ko iá ke fekumi ki ha toe fakahinohino ki he fakamanamana pe fakamaau taʻe totonu ʻoku fakakaukau loto ki aí pea kamata leva ke mahino lelei ange ki ai. .
ʻE lava ke fakasiʻisiʻi ʻa e fakakaukau fakatuʻutāmakí ʻi he maʻu ha mahino ʻoku lelei angé, fakasiʻisiʻi ʻa e malava ko ia ke hoko ha ʻitá. Kimuʻa ke fakalalahi e lotomoʻuá, ʻe lava ke fakakaukauʻi ʻe he taha ko iá ha ngaahi founga ʻoku ola lelei angé ke tali ʻaki e fakamanamaná pe fakamaau taʻe totonú, ko ha tali te ne fakaleleiʻi e palopalemá kae ʻikai ke ne fakatupu ke lahi ange.
ʻE lava foki ke fakaʻehiʻehi ha taha ʻoku lotomoʻua mei he ngaahi tuʻunga ʻokú ne fakalahi e lotomoʻuá kae ʻoua kuó ne fiemālie ange mo lava ʻo mapuleʻi. Pea ʻe toki lava leva ke ne feinga ke fakaleleiʻi ʻa e tuʻunga ko iá ʻo ʻikai ke ʻita.
Moʻui ʻo ʻikai ke ʻIta
Naʻe fakamatalaʻi ʻe ʻEletā Ueini S. Pitasoni ʻo e Kau Fitungofulú ʻa e founga ʻoku hanga ai ʻe he sīpinga ʻa e Fakamoʻuí ʻo ueʻi e kāingalotu ʻo e Siasí ke nau mapuleʻi ʻenau ʻitá mo e ngaahi ongo fakaeloto kehé
“Naʻe tā ʻe Kalaisi ha sīpinga haohaoa ʻo e mapuleʻi ʻo e lotó ʻi he meʻa kotoa pē. ʻI hono ʻave Ia ki he ʻao ʻo Kaiafasi mo Pailató, naʻe ʻanuhia, tukiʻi, sipiʻi mo taukaeʻi ia ʻe kinautolu ne nau fakamamahiʻi Iá (vakai, Mātiu 26; Luke 23). Ko e meʻa ongo tahá ko ʻenau tuku hifo honau Tupuʻangá, ʻa Ia naʻá Ne mamahi koeʻuhí ko ʻEne ʻofa ʻiate kinautolú.
“ʻI he tōʻonga fakamamahi mo taʻetotonu ko ʻení, naʻe kei pukepuke pē ʻe Sīsū ʻEne mapuleʻi Iá, ʻo fakafisi ke anga taʻeʻofa. Pea aʻu ki Heʻene ʻi he funga kolosí, ʻi he uhouhonga ʻo e mamahi fakalilifú, naʻá Ne kei tautapa pē, ‘ʻE Tamai, fakamolemoleʻi ʻa kinautolu; he ʻoku ʻikai te nau ʻilo ʻa ia ʻoku nau faí’ (Luke 23:34).
“Ko Hono finangaló ke tau fai e meʻa tatau. Naʻá Ne folofola ki he niʻihi ʻe muimui kiate Iá ʻo pehē, ‘ʻI he meʻá ni ʻe ʻilo ai ʻe he kakai kotoa pē ko ʻeku kau ākonga ʻa kimoutolu, ʻo kapau te mou feʻofaʻaki kiate kimoutolu’ (Sione 13:35).”4
Kuo tokoniʻi e kakai tokolahi ʻe he ngaahi tefitoʻi moʻoni ko ʻení ke nau ikunaʻi e ngaahi palopalema ʻo e ʻitá.
ʻIloʻi Ho Siakale ʻItá
ʻOku fakahehema ʻa e ʻulungāanga ʻitá, anga fītaʻá ke takai hangē ha siakalé, pea ʻoku toutou hoko pē ʻa e siakalé. Kuo ʻomi ʻe he kau mataotao ki he ʻatamaí ha ngaahi hingoa kehekehe ki he ngaahi tūkunga ʻo e siakale ʻitá, ka ʻoku tatau pē hono ngaahi ʻelemēniti tefitó. Kuo fakamatalaʻi ʻe Mula Kuleni mo Lōpeti Filimeni-Longo ko e ongo mataotao pule fekauʻaki mo e ʻitá, ʻa e siakale ʻoku fakanounouʻi atu ʻi laló.5 ʻOku ola lelei taha pē ki he kakaí ʻa e feinga ke mapuleʻi ʻa e ʻitá lolotonga e ʻuluaki hā mai pē ʻa e siakale ʻo e ʻitá, teʻeki ke hoko ha meʻa ki he sinó.
Konga ʻo e Fakangalingali ʻOku Sai Peé. ʻOku lele lelei pē e moʻuí, ka ʻoku toitoi pē ʻi lalo ʻa e ʻitá, ʻo ne uesia e founga moʻui mo e fakakaukau ʻa ha taha. ʻOku fakatupu ʻe he ngaahi meʻa ʻoku hokó pe ngaahi tūkunga ʻo e moʻuí ʻa e ngaahi sīpinga ʻulungāanga, mo hono fakakeheʻi ʻo e fakakaukaú. ʻOku fakakaukauʻi ʻe he tokotahá e ngaahi meʻa ko ʻeni kuo fakakeheʻí peá ne pehē ʻoku totonu pē ia.
Konga Kamakamata ʻo e ʻItá. ʻI he tukutaha e tokanga ʻa ha taha ʻi he ngaahi fakakaukau kuo fakahalaʻí, ʻokú ne ongoʻi manavasiʻi fakatuʻasino mo fakaeloto pea kamata ke ne fakaʻita. ʻOku toutou haʻu ki heʻene fakakaukaú ʻa e ngaahi fakakaukau angamaheni hangē ko e “ʻOkú ne fuʻu fie pule” pe “ʻOku ou fai kotoa e ngaahi ngāue hení.” ʻOku fakahaaʻi ʻe he ngaahi fakaʻilonga fakatuʻasinó ʻa e kamata ke ʻita ʻa e tokotaha ko iá (loto moʻua, loto fefeka, loto taʻe fie auna, loto ʻoho, vave e mānavá, taʻe fiemālie e keté, pe ongoʻi vela pe kula). ʻOku fakakaukau loto e tokotahá mo faʻu ha ngaahi palani ke fakahaaʻi ai ʻene ʻitá pea ʻe ala ʻefihia ʻi ha ʻulungāanga maʻunimā te ne tafunaki e ʻitá (ngāue hala ʻaki e faitoʻo kona tapú, kai lahí, mo e tōtuʻa e ngāué).
Konga Hono Fakahokó. ʻOku fakahaaʻi e ʻita ki he niʻihi kehé ʻi hono kaikailaʻi, fakamaaʻi, pe fakamamahiʻi fakatuʻasino pe fakasekisuale kinautolu. Pe ko ʻene mafuli ʻo fakafisingaʻi pē ia, feinga tāonakita, pe ngāue hala ʻaki ʻa e ʻolokaholó pe faitoʻo konatapú.
Konga ʻo e Holo Māmālie ʻa e ʻItá. ʻOku ongoʻi halaia mo mā ʻa e tokotahá. ʻOku ʻasi mai ʻa e feinga ke tulitonuhiá, pea ʻoku feinga ʻa e tokotahá ke fakapuliki ʻene ʻitá ʻaki ʻene fakahoko ha meʻa ʻoku leleí ke fakamoʻoniʻi ko e tokotaha lelei ia. ʻOku feinga ʻa e tokotahá ke mapuleʻi ʻene ʻitá. ʻI he taimi kuo ʻosi ai ʻa e ʻitá, ʻoku toe foki leva ʻa e tokotahá ki he “konga ʻo e fakangalingali-ʻoku-sai-peé.”
Tauhi ha Lekooti ʻo e ʻItá
ʻI hono vakaiʻi fakaikiiki ʻe he fakafoʻituituí ʻa e ngaahi tūkunga ʻoku nau ʻita aí pea mo e founga ʻoku nau fakahaaʻi ai ʻa e ʻita ko iá, te nau lava ʻo ako ke fakaleleiʻi ange ʻa e ʻita ko iá. Ko e founga ʻe taha te nau lava ʻo ako ai kau ki heʻenau ʻitá ko e tauhi ha lekooti ʻo e ʻitá. Hili ha vahaʻataimi ʻo e ʻitá, te nau lava ʻo hiki ʻa e meʻa pe tokotaha naʻá ne fakatupu ʻa e ʻitá, ʻaho, mo e lahi ʻo ʻenau ʻitá ʻi ha meʻafua ʻoku kamata mei he 1 ki he 10, ko e 1 ko e kiʻi ʻita siʻisiʻi pē pea ko e 10 ko e fuʻu tōtuʻa ia ʻa e ʻitá. ʻOku totonu foki ke nau lekooti ʻa e ngaahi fakakaukau ʻokú ne tafunaki ʻenau ʻitá, founga ʻoku nau fai ki heʻenau ʻitá (ko e ngaahi ola lelei pe kovi ʻi hono mapuleʻi iá), ko e hā e meʻa ne ngalingali ke tokoní, pea ko e hā e meʻa te nau fai ke lelei ange he kahaʻú. ʻI heʻenau tauhi ha lekooti ʻo e ʻitá, ʻe tupulaki ʻenau ʻilo ki heʻenau siakale ʻitá. Te nau lava ʻo fakangata ʻa e ʻitá ʻi heʻene kamatá pē ʻaki hano fakaʻaongaʻi ʻo e ngaahi tefitoʻi moʻoni ʻoku akoʻi ʻi he fakatahá ni. 6
Fakaleleiʻi e Ngaahi Fakakaukau ʻOku Fakatupu ʻItá
Kuo toutou fakamamafaʻi ʻe he kau mataotao ki he ʻatamaí ʻoku ʻikai ko e ngaahi meʻa ʻoku hoko he moʻuí ʻokú ne uesia ʻa e kakaí ʻi he founga ʻoku ʻikai ke leleí; ka, ko e founga fakakaukau ʻa e kakaí kau ki he ngaahi meʻa ne hokó ʻokú ne fakatupu ʻa e ola ʻoku ʻikai ke leleí. ʻOku uesia ha niʻihi fakafoʻituitui tokolahi koeʻuhí ko ʻenau fakakaukau ki he ngaahi faingataʻa ʻo e moʻuí ʻi he ngaahi founga hala mo ʻikai ke leleí. Hangē ko ʻení, ʻoku fai ʻe ha taha ha fakamatala mahuʻinga ʻoku fakataumuʻa ke tokoni. ʻOku fakaʻuhingaʻi hala ʻi ha founga fakatuʻutāmaki ʻe he tokotaha ʻoku fanongó ʻa e fakamatalá: “ʻOkú ne fakakaukau ʻoku ou vale. ʻOkú ne feinga ke tukuhifoʻi au mo ʻai ke u hā kovi. He ʻikai ke u teitei tuku ke ne fai ia.” ʻOku fakatupu ʻe he ngaahi fakakaukaú ʻa e ngaahi ongó, pea ʻoku tākiekina ʻe he ngaahi ongó ʻa e ʻulungāangá. ʻOku fakamamahiʻi pē ʻe he niʻihi fakafoʻituituí kinautolu pea nau mamahi lahi koeʻuhí ko e fakakaukau halá.
ʻI he tohi ko e The Feeling Good Handbook ʻoku fakamahinoʻi ʻe he mataotao ki he ʻatamaí ko Tēvita Peni ʻa e ngaahi founga angamaheni ʻoku fakakaukau hala ai ʻa e kakaí.7 ʻOku kau ai ʻa e:
-
Fakakaukau ʻoku lelei ʻaupito pe kovi ʻaupito ʻa e kakaí pe ko ha meʻa. (“Ne u faʻa fakakaukau ko e tangata ʻulungāanga lelei ia. Ka ko e ʻaho ní, kuó ne fakahaaʻi hono ʻulungāanga totonú.”)
-
Fakamāuʻi ʻo makatuʻunga ʻi he kiʻi fakamoʻoni siʻisiʻi. (“ʻOku tokanga pē ia kiate ia. ʻOku ʻikai ke mahuʻinga ʻeku ngaahi ongo ia ʻaʻakú.”)
-
ʻIkai lau e ngaahi meʻa lelei ne aʻusiá kae nofo pē he ngaahi meʻa ʻoku ʻikai ke leleí. (“Naʻá ke sio ki he anga ʻene fakafepaki kiate aú? Hili ange e ngaahi meʻa ne ma foua fakatahá. ʻOku ʻikai ke tokanga mai ia kiate au.”)
Ko ha kaveinga angamaheni ʻi he ngaahi sīpinga ko ʻení ko e fakakaukau halá ʻa ia ʻokú ne fakatupu e mamahi fakaelotó mo e ʻitá. Ke mapuleʻi ʻe ha niʻihi fakafoʻituitui ʻenau ʻitá, ʻe lava ke nau fekumi ki ha ngaahi fakamatala te nau fakafetongi ʻa e ngaahi meʻa ʻokú ne fakatupu ʻenau ʻitá. Te nau lava ʻo fakafepakiʻi ʻa e fakakaukau halá ʻaki ha feinga ke ʻilo ʻa e meʻa ʻokú ne fakatupu ʻa e ʻitá ʻo hangē pē ko ha ʻilo ia ʻe ha tokotaha ʻoku ʻikai ke kau aí. Ko e hā ha meʻa ʻe lekooti ʻe ha meʻa faitā kau ki he meʻa naʻá ne fakatupu e ʻitá? ʻE tauhi nai ʻe ha meʻa faitā ha fakamatala taʻe ʻofa ʻo e ngaahi meʻa ne fakahoko ʻe he tokotaha ʻitá? ʻI he angamahení ʻe ʻikai.
Ko ha founga ʻe taha ke fakafepakiʻi ʻaki e fakakaukau halá ko e feinga ke vakaiʻi ʻa e tūkungá mei he fakakaukau ʻa e tokotaha kehé. Hangē ko ʻení, mahalo pē ko e tokotaha ʻoku kolosi ʻi muʻa ʻi he niʻihi kehé ʻi he halá ʻe tōmui ki haʻane fakataha. ʻOku ola lelei ʻa e maʻu ʻo e mahinó mo e ʻofa faka-Kalaisí ʻi hono taʻofi hano taliʻi ʻaki e ʻitá. ʻE lava foki ke fai ʻe he niʻihi fakafoʻituituí ʻa e ongo foʻi fehuʻi ko ʻení kiate kinautolu pē:
-
“Ko e hā ha fakamoʻoni ʻoku tonu ʻeku ngaahi fakakaukau ʻoku ʻikai ke leleí?”
-
“Ko e hā ha fakamoʻoni ko e ngaahi fakakaukau ko ʻení ʻoku ʻikai tonu?”
ʻI he fai ʻe he niʻihi fakafoʻituituí ʻa e ongo fehuʻi ko ʻení kiate kinautolú, ʻoku angamaheni ʻaki ʻenau maʻu ha kiʻi fakamoʻoni siʻisiʻi pē ke poupouʻi ʻa e fakamatala ʻoku ʻikai ke leleí mo ha fakamoʻoni mahuʻinga ko e fakamatala ʻoku ʻikai ke lelei kau ki ha ngaahi meʻa ʻoku hoko ʻoku ʻikai ke tonu. ʻI he taimi ʻoku fakafuofuaʻi mo fakatonutonu ai ʻe he niʻihi fakafoʻituituí ʻenau fakakaukaú ʻi he founga ko ʻení, ʻoku nau fakahehema ke fiemālie hifo mo tali lelei ange e niʻihi kehé.
ʻOku kei fie maʻu pē ʻa e niʻihi fakafoʻituituí ke fekumi ki ha ngaahi founga lelei ange ʻo ʻikai ko e ʻitá ki hono tali e ngaahi meʻa ʻoku tātātaha ʻene hokó hangē ko e tonu ʻa e fakamatala ʻoku ʻikai ke leleí. Kapau ʻoku ʻikai ke ʻaonga ʻa e ngaahi feinga ke fakaleleiʻi e ngaahi palopalemá, ʻe lava ke muimui ʻa e fakafoʻituituí ki he akonaki ʻa e Fakamoʻuí ke “ʻofa ki homou ngaahi filí, tāpuakiʻi ʻa kinautolu ʻoku kapeʻi ʻa kimoutolú, fai lelei kiate kinautolu ʻoku fehiʻa kiate kimoutolú, pea hūfia ʻa kinautolu ʻoku fai kovi mo fakatanga kiate kimoutolú” (Mātiu 5:44).
ʻE lava ʻa e niʻihi fakafoʻituituí ʻo fakakaukau ki he ngaahi tūkunga faingataʻá ko ha ngaahi palopalema ʻoku fie maʻu ke fakaleleiʻi pe ko e ngaahi faingamālie, ʻo ʻikai ko ha ngaahi meʻa fakamanamana ʻoku fie maʻu ki ai ha tali fakaofo. Naʻe fokotuʻu mai ʻe Leimoni Novako ʻo e ʻUnivēsiti ʻo Kalefōniá ʻi ʻAiviné ʻa hono fakaʻaongaʻi ʻo e ngaahi fakamatala kuo hiki tatau ke tuʻusi ʻaki ʻa e ngaahi fakakaukau ʻoku fakatupu ʻitá.8 ʻOku kau he ngaahi fakamatala ko iá ʻa e: “He ʻikai ke u maʻu ha meʻa he ʻitá. Kapau te u ʻita, te u totongi ki ha meʻa ʻoku ʻikai ke u fie maʻu.” ʻOku lava ke toutou lau ʻe he husepānití mo e uaifí ʻa e ngaahi fakamatala ko ʻení ʻi hona ʻatamaí ʻi he taimi ʻoku ʻikai ke na ʻita aí koeʻuhí ke na lava pē ʻo maʻu ʻa e ngaahi fakamatalá ni ʻi he taimi ʻoku fie maʻu aí.
Mavahe mei he Ngaahi Tūkunga Fakatupu ʻItá
ʻI he fakalalahi e ʻitá pea tupu mai e ngaahi kemikale ʻi he sinó, ʻoku holo e malava ke fakaʻuhingá mo mapuleʻi e ʻulungāangá. ʻE ala tokoni ki he niʻihi fakafoʻituituí ke fakakaukau loto ki ha meʻafua māfana ʻokú ne fua e tuʻunga ʻo e ʻitá. Kapau ʻe ʻikai ke nau lava ʻo mapuleʻi ʻi he tikilī ʻe 80, te nau lava ʻo ako ke mavahe mei he tūkunga ko iá kimuʻa ʻoku teʻeki ke fuʻu velá. Kapau ʻoku fie maʻu ke nau mavahe mei ha tūkunga ʻoku nau ʻi ai, te nau lava ʻo fakahā ki he tokotaha ko eé, “ʻOku ou ʻita. ʻOku fie maʻu ha taimi ke u mokomoko ai.”
ʻOku tokoni ha fakaʻilonga kuo tomuʻa fokotuʻutuʻu ke taʻofi ʻa e fealeaʻakí, hangē ko e fakaʻilonga T (Taimi mālōlō) ʻa ē ʻoku fakaʻaongaʻi ʻi he ngaahi polokalama sipotí. Kuo pau ke felotoi e ongo meʻa malí fakatouʻosi ke na fakaʻapaʻapaʻi ʻa e fakaʻilongá ʻi he taimi pē ʻoku hiki aí. ʻE ola lelei ʻa e taimi mālōloó kapau ʻe lava e ongomeʻa malí ʻo alea ke toki fakaʻosi ʻa e fealeaʻakí ʻamui ange. Lolotonga e taimi mālōloó, ʻe lava ke fokotuʻu ʻe he uaifí pe husepānití ha taimi ke toe fai ai ʻena fealeaʻakí, ʻo hangē ko ha hili ha miniti ʻe 30 pe houa ʻe ua pe ʻi he ʻaho hono hokó.
ʻIloʻi ʻa e Ngaahi ʻEkitivitī ʻOku Nau Fakafiemālieʻi Koé
ʻOku lava ʻe ha ngaahi ʻekitivitī lahi ʻo tokoniʻi e niʻihi fakafoʻituituí ke nau ongoʻi fiemālie ʻi he taimi ʻoku kamata ai ke nau ʻitá. ʻOku kau ʻi he ngaahi ʻekitivitī fakafiemālié ʻa e fakakaukau lotó, ngāué, lelé, kaukau tahí, fanongo ki he mūsiká, lau ha tohi, pe lotu. ʻOku totonu ke tokangaʻi ʻe he husepānití mo e uaifí ke ʻoua ʻe fakahaaʻi ʻena ʻitá pe tukuakiʻi e meʻa ne hokó pe ko e meʻa ne hoko fakataha mo iá. Kapau te na tukuakiʻi pe fakahaaʻi, ʻe toe lahi ange ai ʻena ʻitá. Kapau te na toutou fakakaukau ki he meʻa ne hokó, ʻe ngalingali ke hokohoko atu ʻena fakalahiʻi e meʻa totonu naʻe hokó. Ko kinautolu ʻoku nau fakahaaʻi ʻoku nau fai ʻa e meʻa tataú, ʻo nau fakatonuhiaʻi honau ʻatamaí ʻa hono fakahaaʻi ʻanga fītaʻa ʻo ʻenau ʻitá.
ʻE lava ke muimui ʻa e kakai fakafoʻituituí ki he faleʻi ʻa Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá ke mapuleʻi ʻenau ʻitá, ʻa ia naʻá ne fokotuʻu mai ke fetongi e ngaahi fakakaukau ʻoku ʻikai ke fie maʻú ʻaki e ngaahi mūsika toputapú: “ʻI he kamata ʻa e mūsiká pea aʻu e ngaahi leá ki hoʻo fakakaukaú, ʻe puli atu leva e [ngaahi fakakaukau] taʻe tāú. Te ne liliu kotoa ʻa e anga fakataimi hoʻo fakakaukaú. Koeʻuhí ʻoku fakatupu langaki moʻui mo maʻa [ʻa e mūsiká] ʻe mole atu leva ʻa e ngaahi fakakaukau naʻe ʻuluaki ʻi aí. He lolotonga ʻoku tau fili ʻa e angamaʻá, ʻe ʻikai fakataha ia mo e ʻulí, ko e koví ʻe ʻikai te ne matuʻuaki ʻe ia ʻa e māmá.”9
Vahevahe e Ngaahi Ongo Tukulotoʻi Peé
ʻOku faʻa fakahaaʻi e ʻitá ʻi he ongoʻi mamahí, manavaheé, maá, pe fakafisingaʻí. ʻOku fakatuotuai ha niʻihi fakafoʻituitui ke vahevahe e ngaahi ongó ni, ʻo nau manavasiʻi naʻa hā mei ai ʻoku nau vaivai pe ʻikai lava ʻo fai ha meʻa. Ka ʻi heʻenau vahevahe e ngaahi ongo ʻoku tukulotoʻi peé, ʻoku nau ʻiloʻi ai ʻoku faingofua ange ke fakaleleiʻi e ngaahi meʻa ʻoku nau fepakipaki aí. ʻE siʻisiʻi ange ai ha tulitonuhia ʻa e kakai kehé ka nau vēkeveke ange ke fakaleleiʻi e ngaahi palopalemá.
Ko e ngaahi ongo ko iá ʻoku toitoi mai he ʻitá, hangē ko e mamahí mo e manavasiʻí, ʻoku faʻa fakalaveaʻi ngofua pea fekauʻaki vāofi mo e ongo ʻa ha taha ki hono mahuʻingá mo ʻene leleí. ʻOku tui ʻa e kakai tokolahi ʻoku sai ange ke te ʻita ʻi hano fakahaaʻi e ngaahi ongo fakaeloto ko iá. Neongo ia, ʻi he taimi ʻoku vahevahe moʻoni ai ʻe he kakaí ʻa e anga hono uesia kinautolu ʻe he ngaahi tōʻonga ʻa e niʻihi kehé, ʻoku nau faʻa ʻilo ʻoku tali ʻaki ʻe he niʻihi kehé ʻi ha founga lelei ange pea lelei ange hono fakaleleiʻi e fepakipaki ko iá. ʻOku faʻa mole ʻa e ʻitá pea mālohi ange ʻa e vā fetuʻutakí, ʻo hangē ko ia ʻoku hā ʻi he sīpinga ko ʻení:
Ko Peti Mo Maʻake
ʻI he taimi naʻe kau ai ʻa Peti ki ha ngaahi fakataha mavahe mei ʻapí, naʻá ne manavasiʻi ki he tali ʻita ʻa Maʻaké. Hili hono fai ʻe Maʻake ʻa e kalasi Ko Hono Fakamālohia ʻo e Nofo-malí, naʻá ne kamata vahevahe ʻa e ngaahi ongo naʻá ne tukulotoʻí fekauʻaki mo ʻene ʻitá. Naʻá ne fakahā ange, “ʻOku ou manavasiʻi naʻa faifai pea kamata haʻo vā fetuʻutaki mo ha taha kehe, peá ke liʻaki au, hangē ko e meʻa naʻe fai ʻe heʻeku faʻeé ki heʻeku tamaí.” Naʻe tali ʻe Peti ʻaki ʻene fakapapauʻi ange kia Maʻake ʻene anganofo kakato kiate iá. Naʻe ongoʻi fiemālie ʻa Maʻake, peá ne poupouʻi ia ʻi he ngaahi ʻekitivitī hoko maí.
ʻOku fie maʻu ke fakaʻaongaʻi ʻe he niʻihi fakafoʻituituí ʻa e fakaʻutoʻuta leleí ʻi hono vahevahe e ngaahi ongo ʻoku tukulotoʻí. Hangē ko ʻení, ʻe ala fakafepakiʻi ʻe ha taha ha tokotaha ʻoku fiefia hono fakatupu e tautea fakaelotó pe fakatuʻasinó. Mahalo ʻe hoko hono vahevahe ʻo e mamahi ʻo ha tahá ko hano poupouʻi ke toe lahi ange e ngaohikoviá. Neongo ia, ʻoku ʻi ai ha ngaahi founga lelei ange ʻo e talí kae ʻikai ko e fakafepaki ʻaki e ʻitá. Ko e akonaki ʻa e Fakamoʻuí ʻa ia kuo ʻosi fakahā atú ke “ʻofa ki homou ngaahi filí” (Mātiu 5:44) . ʻI he ngaahi meʻa ʻe niʻihi, ʻoku lelei taha pē ke ke mavahe mei ha fakakikihi.
Fekumi ki ha Liliu Fakalaumālie
ʻOku kau ʻi he feinga ke haʻu kia Kalaisí ha liliu fakalaumālie ʻoku iku ki he ʻulungāanga melinó mo e ʻofá. Naʻe fakamatalaʻi ʻe ʻEletā Māvini J. ʻEsitoni ʻo e Kōlomu ʻo e Toko Hongofulu Mā Uá ko e taimi ʻoku tau ului moʻoni aí, “ko e founga ʻoku tau fai ki he niʻihi kehé ʻe lahi ange ʻene fonu ʻi he faʻa kātakí, angaʻofá, tali angavaivaí, pea mo ha holi ke fai ha ngāue lelei ʻi heʻenau moʻuí.”10
ʻOku fakamatala ʻa e Tohi ʻa Molomoná ki ha “fuʻu liliu lahi” ʻi he lotó ʻa ia ʻoku maʻu ʻi he uluí mo e anga fakaeākongá–ko ha ʻulungāanga ke “fai lelei maʻu ai pē” (Mōsaia 5:2). ʻOku fakamatalaʻi ʻe Paula ʻa e ngaahi fua ʻo e Laumālié ko e “ʻofa, mo e fiefia, mo e melino, mo e kātaki fuoloa, mo e angavaivai, mo e angalelei mo e tui mo e angamalū, mo e taʻe konā” (Kalētia 5:22–23). Naʻe talaʻofa ʻa Palesiteni ʻEselā Tafu Penisoni ʻoku hoko e liliú ʻi he muimui ki he Fakamoʻuí: “ʻI hoʻo fili ke muimui kia Kalaisí, ʻokú ke fili ke ke liliu. … ʻE lava nai ke liliu e loto ʻo e tangatá? ʻIo! ʻOku hoko ia he ʻaho kotoa pē ʻi he ngāue fakafaifekau maʻongoʻonga ʻa e Siasí. Ko e taha ia ʻo e ngaahi mana fakaonopooni ʻa Kalaisi ʻoku mafola lahi tahá. Kapau kuo teʻeki ai hoko ia kiate koe–ʻoku totonu ke hoko.”11
Naʻe ako ʻaki ʻe ʻEletā L. Uitinī Keleitoni ʻo e Kau Fitungofulú ʻoku lava ke tokoni ʻa e ʻaukaí kiate kinautolu ʻoku fekumi ke liliu honau natula tefitó: “Kuo pau ke tau manatuʻi ʻoku hanga ʻe he ʻaukai fakamātoató ʻo fakatupulaki ʻa e tui mālohí. ʻOku mātuʻaki mahuʻinga ʻeni ʻi heʻetau fekumi faivelenga ke fakaleleiʻi hotau ngaahi vaivai fakafoʻituitui ʻoku faingataʻa ke ikunaʻí, ʻa ia ʻoku ‘ʻikai ʻalu ki tuʻa [ia] ka ʻi he lotú mo e ʻaukaí’ (Mātiu 17:21; vakai foki, Maʻake 9:29).”12
Fakaʻehiʻehi mei Haʻane Toe Hoko
Ko e fakaʻehiʻehi mei haʻane toe hokó ko e founga ia ʻo hono veuveuki e siakale ʻo e ʻitá ʻaki hono liliu e ngaahi fakakaukaú mo e ʻulungāangá pea mo hono fakaʻaongaʻi e ngaahi founga kehe ʻoku ʻilo ʻe he tokotaha ko ia ke taʻotaʻofi ʻakí. ʻOku ʻomi ʻe he ngaahi founga taʻotaʻofí ha ngaahi meʻa ke fetongiʻaki ʻa e kamakamata ʻa e ʻitá. Ko e fakaʻehiʻehi mei haʻane toe hokó mo e ngaahi founga taʻotaʻofí ʻoku kau ai ʻa e tokoni mei he fāmilí, ngaahi kaungāmeʻá, kaungāngāué, pīsopé, pe faiako ʻi ha kalasi. ʻOku ngāue lelei taha pē ʻa e fakaʻehiʻehi mei he fakaholomuí lolotonga e ongo ʻuluaki konga ʻo e siakale ʻo e ʻitá: ʻa e ongo konga ʻo e fakangalingali ʻoku lelei pē e meʻa kotoá, mo e langaki haké. ʻOku ako ʻa e tokotahá ke ne fakatokangaʻi mo tali ki he ngaahi moʻoniʻi meʻa ʻoku fakatuʻutāmakí (ngaahi meʻa ʻoku hoko pe ngaahi ongo ʻokú ne fakatupu e ʻitá) ʻi ha ngaahi founga ʻoku nau veuveuki ai ʻa e siakalé mo fakaʻehiʻehi mei haʻane toe hoko.
Konga ʻo e Fakangalingali ʻoku Sai Peé
ʻOku fakatokangaʻi ʻe he tokotahá ʻene palopalema ʻitá ka ʻokú ne mapuleʻi ia ʻi ha founga lelei. ʻOkú ne ʻiloʻi e ngaahi meʻa ʻoku fakatupu ʻitá peá ne fakaʻaongaʻi ha ngaahi founga ke mapuleʻi ʻaki ia pe hao mei ai, hangē ko e fakaʻehiʻehi mei he ngaahi tuʻunga fakatuʻutāmaki ʻoku māʻolungá, mālōlō, pea ʻalu ʻo ʻeva. ʻOku ngāue mālohi ʻa e tokotahá ke fakaleleiʻi ʻa e ngaahi fekeʻikeʻi mo e ngaahi palopalema ʻoku iku ki he ʻitá.13
Konga ki hono Langaki Haké mo hono Fakaʻaongaʻi ʻo e Ngaahi Meʻa ke Taʻotaʻofi ʻAkí
ʻOku fakaʻaongaʻi ʻe he tokotahá ʻa e ngaahi founga foʻou naʻá ne faʻifaʻitaki ki ai ke fakangatangata ʻaki e lahi mo e mālohi ʻo e ʻitá. ʻOkú ne fakatonutonu mo fetongi e ngaahi fakakaukau ʻoku ʻikai leleí ʻaki e ngaahi fakamatala lelei (“Te u lava pē ʻo fai ʻeni” pe “Te u lava ʻo fakaleleiʻi e palopalemá ni.”). ʻOkú ne fakahaaʻi ʻa e ngaahi ongo fakamamahi ʻo e ʻitá mo fakatokangaʻi ko e ngaahi ongo angamaheni ʻeni. ʻOku taʻofi ʻe he tokotahá ʻa e ngaahi ʻulungāanga ʻe lava ke maʻunimā iá, kau ai e fakakaukau loto ki hono faʻifaʻitaki ha ʻulungāanga mo palani ke fakahaaʻi e ngaahi ongo ʻitá. ʻOkú ne fakamatalaʻi ʻa e ngaahi palopalemá pe, kapau ʻoku ʻikai lava ke liliu ʻa e tūkungá, ʻokú ne tohi ʻo fakamatalaʻi ia. ʻOku tukuange ai ʻe he tokotahá hono iví ʻi he ngaahi ʻekitivitī fakatuʻasinó mo langaki ʻene falala kiate iá ʻaki ʻene fai ha meʻa ʻokú ne fiefia ai. ʻOku fāifeinga ʻa e tokotahá ki he fanauʻi foʻou fakalaumālié. 14
Ko e Melino ʻo e ʻOtuá
Naʻe tohi ʻe he ʻAposetolo ko Paulá kau ki he “melino ʻo e ʻOtuá, ʻa ia ʻoku lahi hake ʻaupito ʻi he faʻa ʻiloá” (Filipai 4:7). ʻOku ʻilo ʻe kinautolu kuo nau fefaʻuhi mo e ʻitá pea ikunaʻi lelei iá ʻa e ʻataʻatā ʻi heʻenau ongoʻi e melinó mo e tauʻatāina mei he ongó ni. ʻO hangē ko hono fakamatalaʻi ʻe ha tokotaha, “Ne u anga ʻaki ʻeku luelue pē mo ongoʻi hangē ne u fie maʻu ke fakamamahiʻi e taha kotoa pē ne u sio ki aí. Ne puleʻi ʻe he ʻitá ʻeku moʻuí. ʻI heʻeku fakaʻaongaʻi e ngaahi tefitoʻi moʻoni ʻo e ongoongoleleí pea ʻi heʻeku ako ke fakakaukau ʻi ha founga kehé pea vakai ki he niʻihi kehé ʻi ha founga ne lelei angé, ne mole ʻeku ʻitá. ʻOku ou lava ʻo fiefia he taimí ni he feohi mo e niʻihi kehé. Kuó u foki ki heʻeku moʻui kimuʻá.”
“Ko hai te ne lava ʻo fakafuofuaʻi ʻa e ngaahi kafo kuo hokó, honau lolotó mo e mamahí, ʻi he ngaahi lea taʻeʻofa mo palakū kuo puʻaki ʻi he ʻitá?”
Palesiteni Gordon B. Hinckley
Ko Hono ʻIloʻi Hoku Siakale ʻItá
Fakamatalaʻi ʻa e ngaahi tuʻunga angamaheni ʻoku nau fakatupu hoʻo ʻitá (hangē ko ʻení, ʻoku fakakikihi hoku hoá mo au; kuo tōtuʻa e toho e paʻanga mei he ʻakauni pangikeé; ʻoku moveuveu ʻa e falé):
Fakamatalaʻi ʻa e ngaahi fakakaukau pe ngaahi ʻuhinga lelei ʻoku nau tafunaki hoʻo ʻitá (hangē ko ʻení, ʻoku tokanga pē hoku hoá kiate ia pē; ʻoku ʻikai pē fai ʻe hoku husepānití ia ha meʻa):
Fakamatalaʻi ʻa e ngaahi ongo tukulotoʻi ʻoku tupu mei ai hoʻo ʻitá (hangē ko ʻení, taʻe fakaʻapaʻapaʻi, ngāue ʻaki pe tukunoaʻi pē koe):
Fakamatalaʻi ha ngaahi fakaʻilonga ʻokú ne fakahaaʻi ʻokú ke ʻita (hangē ko ʻení, ngaʻungaʻu e ʻaofinimá, vave tā e mafú, ongoʻi hohaʻa, ʻiteʻita):
Fakamatalaʻi ʻa e meʻa ʻokú ke fai ke tafunaki hoʻo ʻitá (hangē ko ʻení, fakakaukau pē ki he fehālākí, ʻikai ke fie talanoa ki ai, inu kava mālohi):
Fakamatalaʻi ʻa e anga hoʻo fakahaaʻi hoʻo ʻitá (fakakau ai ho ʻulungāanga kovi tahá):
Fakamatalaʻi hoʻo ngaahi fakakaukaú, ngaahi ongó, ngaahi ʻulungāangá hili hoʻo fakahaaʻi hoʻo ʻitá (hangē ko ʻení, tauʻatāina, ongoʻi halaia, loto mamahi, fakatomala):
Sīpinga Lekooti ʻo e ʻItá
|
Fakamatala naʻe Kole Atú |
Tūkunga A |
Tūkunga E | ||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|
|
ʻAhó mo e meʻa pe ko e tokotaha naʻá ne fakatupú: |
10/19 Fakakikihi mo e husepānití. |
10/20 ʻUlungāanga kovi e fānaú. | ||||||||||||||||||
|
Mālohi ʻo ʻeku ʻitá: |
Siʻisiʻi pē |
Fuʻu tōtuʻa |
Siʻisiʻi pē |
Fuʻu tōtuʻa | ||||||||||||||||
|
1 |
2 |
3 |
4 |
5 |
6 |
7 |
8 |
9 |
10 |
1 |
2 |
3 |
4 |
5 |
6 |
7 |
8 |
9 |
10 | |
|
Ngaahi fakakaukau ʻoku nau tafunaki ʻeku ʻitá: |
ʻOkú ne angakovi. ʻOku ʻikai ke tokanga ia kiate au. |
ʻOku ʻikai pē teitei fanongo mai e fānaú. ʻOku ʻikai ke nau fakaʻapaʻapaʻi au. | ||||||||||||||||||
|
Ngaahi ongo ʻoku tukulotoʻi ʻi heʻeku ʻitá: |
ʻIkai ke ʻofaʻi, tukunoaʻi, taʻefakahoungaʻi. |
Fakaʻaongaʻi, tukunoaʻi. | ||||||||||||||||||
|
Ko e founga ʻoku ou fai ki heʻeku ʻitá: |
Kaikailaʻi ia. Ui ia ko e tokotaha angakovi. |
Talaange fakalelei kiate kinautolu ke nau ō ki honau lokí kae ʻoua leva kuo nau lava ʻo angalelei. | ||||||||||||||||||
|
Talanoa pē kiate kita ʻi heʻete fekuki mo e ʻitá: |
ʻOku totonu ke tauteaʻi ia. ʻOkú ne fakamamahiʻi au. Ko ʻeku sāuni pē e meʻa naʻá ne fai maí. |
Ko e fānau pē kinautolu. Naʻe ʻikai ke nau feinga ke fakafepakiʻi au. | ||||||||||||||||||
|
Ko e ola lelei hono mapuleʻi ʻeku ʻitá: |
Halaʻatā |
Lahi |
Halaʻatā |
Lahi | ||||||||||||||||
|
1 |
2 |
3 |
4 |
5 |
6 |
7 |
8 |
9 |
10 |
1 |
2 |
3 |
4 |
5 |
6 |
7 |
8 |
9 |
10 | |
|
Ko e meʻa ne ngalingali ke tokoní: |
Naʻe ʻikai tokoni ha meʻa ne u fai. Ko e meʻa ne u faí naʻá ne toe ʻai ke kovi ange. |
Kiʻi mālōlō. Ne u ʻalu ʻo ʻeva, hili iá peá u toki talanoa mo e fānaú. | ||||||||||||||||||
|
Fūfuuʻi, fakahaaʻi, pe fakaleleiʻi e ʻitá: |
Ngaahi ongo kuo fūfuuʻi hili ʻeku ʻitá. |
Talanoa kau ki heʻeku taʻefiemālié. | ||||||||||||||||||
|
Ko e meʻa te u fai lelei ange he kahaʻú: |
ʻIkai ke u fai ha meʻa. Loto mokomoko kimuʻa ke u leá. |
Halaʻatā. Ne u fai lelei ia he taimi ko ʻení. | ||||||||||||||||||
Toʻo mei he Murray Cullen and Robert E. Freeman-Longo, Men and Anger: Understanding and Managing Your Anger (Holyoke, Massachusettes: NEARI Press, 2004), 33–34. ISBN# 1-929657-12-9.
Lekooti ʻo e ʻItá
|
Fakamatala naʻe Kolé |
Tūkunga A |
Tūkunga E | ||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|
|
ʻAhó mo e meʻa pe tokotaha naʻá ne fakatupú: | ||||||||||||||||||||
|
Mālohi ʻo ʻeku ʻitá: |
Siʻisiʻi pē |
Fuʻu tōtuʻa |
Siʻisiʻi pē |
Fuʻu tōtuʻa | ||||||||||||||||
|
1 |
2 |
3 |
4 |
5 |
6 |
7 |
8 |
9 |
10 |
1 |
2 |
3 |
4 |
5 |
6 |
7 |
8 |
9 |
10 | |
|
Ngaahi fakakaukau ʻoku nau tafunaki ʻeku ʻitá: | ||||||||||||||||||||
|
Ngaahi ongo ʻoku tukulotoʻi ʻi heʻeku ʻitá: | ||||||||||||||||||||
|
Ko e founga ʻoku ou fai ki heʻeku ʻitá: | ||||||||||||||||||||
|
Talanoa pē kiate kita ʻi he meʻa ke fai ki heʻete ʻitá: | ||||||||||||||||||||
|
Ko e ola lelei hono mapuleʻi ʻeku ʻitá: |
Halaʻatā |
Lahi |
Halaʻatā |
Lahi | ||||||||||||||||
|
1 |
2 |
3 |
4 |
5 |
6 |
7 |
8 |
9 |
10 |
1 |
2 |
3 |
4 |
5 |
6 |
7 |
8 |
9 |
10 | |
|
Ko e meʻa ne ngalingali ke tokoní: | ||||||||||||||||||||
|
Fūfuuʻi, fakahaaʻi, pe fakaleleiʻi e ʻitá: | ||||||||||||||||||||
|
Ko e meʻa te u fai lelei ange he kahaʻú: | ||||||||||||||||||||
Toʻo mei he Murray Cullen and Robert E. Freeman-Longo, Men and Anger: Understanding and Managing Your Anger (Holyoke, Massachusettes: NEARI Press, 2004), 33–34, 117. ISBN# 1-929657-12-9.
Ko ʻEku Palani ki he Fakaʻehiʻehi mei Haʻane Toe Hokó
Konga Angamahení
Ngaahi Meʻa Fakatupu ʻItá:
Ngaahi Founga ki Hono Lavaʻi pe Hao [mei he ʻItá]:
Ngaahi Ngāue ke Fakaleleiʻi e Ngaahi Palopalema ʻoku Fakaiku ki he ʻItá:
Konga ʻo e Kamakamata ʻa e ʻItá mo hono Fakaʻaongaʻi e Ngaahi Meʻa ke Taʻotaʻofi ʻAkí
Ngaahi Meʻa Fakatupu ʻItá:
Ngaahi Founga ki Hono Lavaʻi pe Hao [mei he ʻItá]: