Ang Komitiba sa Young Single Adult

Ang Katuyoan sa Komitiba sa Young Single Adult sa Stake

Isip usa ka sakop sa komitiba sa young single adult (YSA) sa stake, ikaw gitawag aron sa pagtabang sa mga young single adult sa imong stake nga mobati sa gugma sa Langitnong Amahan ug sa Iyang Anak nga si Jesukristo ug mosunod Kanila. Sila nakasabot sa atong mga panginahanglan ug mga kahimtang ug motagbo sa matag usa nato kon asa kita samtang Sila nagtabang nato nga mas mapaduol ngadto Kanila pinaagi sa pakigsaad. Ikaw gitawag sa pagdumala niining makapausab sa kinabuhi nga buhat.

Ikaw makahimo niini pinaagi sa kanunay nga pagpangutana sa imong kaugalingon:

• Unsaon nato pagtabang ang mga young single adult nga mapalig-on ang ilang kasuod ngadto sa Manluluwas pinaagi sa mga pakigsaad ug mga ordinansa?

• Unsaon nato sa pagserbisyo ang tanang young single adult—lakip na niadtong mibati nga dili mobagay, kulang og sosyal nga suporta, o nanglimbasog sa ilang hugot nga pagtuo?

• Unsaon nato sa pagpalambo ang mga pagbati nga nahisakop ug sa pagpalig-on sa mga relasyon diha sa mga young single adult?

• Unsaon nato nga mas matubag ang mga panginahanglan sa tanang young single adult?

Samtang ikaw magserbisyo diha sa imong komitiba sa YSA sa stake, sundon nimo ang mga baroganan ug mga palisiya nga makita diha sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, labi na ang mga kapitulo 1–4 ug kapitulo 14. Ikaw mahimo usab nga mokuha gikan sa mga kapanguhaan nga makita diha sa YA Matag Semana.

Ang Trabaho sa mga Komitiba sa Young Single Adult sa Stake

Ang tanan nimong buhaton isip usa ka lider sa young single adult kinahanglang pagagiyahan sa Espiritu Santo. Ang labing importante nga butang nga imong mahimo samtang magserbisyo diha sa komitiba sa YSA mao ang pagsunod sa Espiritu sa Ginoo. Pagtinguha og direksyon sa Espiritu Santo samtang sundon nimo kining yano nga tulo ka lakang nga proseso:

1. Maminaw sa mga Young Single Adult. Isip usa ka lider sa YSA, motabang ka sa tanang young single adult ug magkat-on mahitungod sa ilang mga kinabuhi, mga tumong, ug mga panginahanglan. Magtinguha sa pagsabot nga walay pagpanghukom o dili mosulay sa pagtambag. Mosunod sa ehemplo ni Jesukristo pinaagi sa pagserbisyo og una sa dili pa motudlo o modapit (tan-awa sa Mateo 14:15–21; Marcos 8:22–26; Lucas 8:26–36).

2. Magtinambagay ug Mopahiangay og mga Solusyon. Samtang imong hisgotan kon unsay imong nakat-onan gikan sa pagpaminaw sa mga young single adult, paminaw og maayo sa ubang mga sakop sa komitiba ug magtinabangay aron makasabot sa mga panginahanglan ug makakita og epektibong mga solusyon.

3. Moimplementar sa mga Solusyon. Sa higayon nga nakatino na ka og mga solusyon ug nakapalambo og usa ka plano, moimplementar ka sa plano. Samtang ikaw molihok sa inspirasyon, mopokus sa mga panginahanglan, motrabaho uban sa komitiba diha sa panaghiusa, ug magtinguha og tambag sa kapangulohan sa stake ug sa ubang mga lider sa stake, ang Ginoo mogiya nimo. Makita nimo ang mga kalig-on ug mga kahuyang sa imong plano, ug makahimo ka sa pagpahiangay kon gikinahanglan.