Maminaw sa mga Young Single Adult

Sa pagtabang sa uban nga mobati nga gihigugma, kamo kinahanglan nga motabang nila nga mobati nga gipaminaw. Si Elder Jeffrey R. Holland sa Korum sa Napulog Duha ka Apostoles mitudlo: “Magmatinud-anon. Tabang sa sinserong paagi. Pangutan-a kini nga mga higala kon unsay labing importante kanila. Unsa man ang ilang gihambin, ug unsa man ang ilang gimahal pag-ayo? Ug dayon, maminaw. … Kon maminaw kita uban sa gugma, dili na kita kinahanglang maghunahuna kon unsay isulti. Ihatag ra kini kanato—pinaagi sa Espiritu ug pinaagi sa atong mga higala” (“Witnesses unto Me,” Ensign, Mayo 2001, 15).

Daghang young adult ang nakigbisog sa ilang hugot nga pagtuo. Ang uban adunay mga pangutana ug mga pagduhaduha; ang uban wala mobati nga sila gikinahanglan o nahisakop diha sa Simbahan. Ang una ug mahinungdanon nga lakang sa pagtabang sa mga young single adult mao ang pagtabang ug pagpaminaw. Isip mga miyembro sa Simbahan, nagkinahanglan kita sa mga gasa, inspirasyon, ug mga panglantaw sa tanan. Nagkinahanglan kita sa usag usa.

Sa dili pa kamo magsugod sa pagtambag isip usa ka komitiba mahitungod sa mga solusyon aron matubag ang mga panginahanglan sa mga young single adult, una pagtinguha sa pagsabot nila, lakip na niadtong tingali nagkahuyang diha sa ilang hugot nga pagtuo ug pagpamatuod. Kon buhaton ninyo kini, makakat-on usab kamo sa paghigugma nila. Maminaw nga walay pagpihig ug walay pagpanghukom. Ang mga young single adult nga inyong mahimamat kinahanglang mobati nga gipaminaw, girespeto, gisabot, ug gihigugma.

Atol sa inyong pagserbisyo diha sa komitiba sa YSA, kinahanglan kamo nga maminaw sa mga YSA gikan sa ingon ka daghang background ug mga kahimtang kutob sa mahimo. Gani, kinahanglan nga usa kini ka nagpadayon nga buluhaton.

Mga kapanguhaan aron matabangan kamo sa pagpaminaw sa mga YSA:

• Mga Baroganan alang sa Pagpaminaw

• Maghimo og Plano sa Pagpaminaw

Mga Baroganan alang sa Pagpaminaw

• Pagmugna og kahimtang nga komportable ug dili pormal ug makaawhag og panagsultihanay nga natural ug bukas. Ikonsiderar ang mga butang sama sa inyong tono, inyong paagi sa sininaan, ug kon asa kamo magsultihanay.

• Pakig-ilaila nila—ilang hugot nga pagtuo, ilang mga pangandoy, ilang mga panglimbasog. Kon mas makaila kamo kanila, mas daghang impormasyon ang inyong makuha aron magiyahan ang inyong hunahuna ug espirituhanong mga pag-aghat.

• Pangutana og mga pangutana nga dili lang matubag og oo o dili nga modapit sa mga YSA sa pagpaambit sa ilang mga hunahuna, mga pagbati, mga pangandoy, ug mga hagit (tan-awa sa “Maghimo og Plano sa Pagpaminaw”). Pagpaminaw og mas daghan kay sa inyong pagsulti.

• Paapila ang mga YSA nga adunay lainlaing mga gender, mga edad, mga background, ug mga lebel sa pagkaaktibo sa Simbahan. Kon mas daghang managlahi nga mga YSA ang inyong mahimamat, mas maayo. Tan-awa kon sila aduna bay laing mga nailhan nga mahimong mopaambit og lahi nga mga panglantaw.

• Kon mopahayag og mga panglimbasog o mga kasagmuyo, ayaw paghukom, pagkorihir, pagpamugos, o mosulay sa “pag-ayo” sa mga YSA nga inyong gikaistorya. Maminaw uban ang respeto, kamabination, ug empatiya. Isulti pag-usab ang unsay inyong nadungog aron sa pagkompirmar nga sakto ang inyong pagsabot, ug pangutana kon aduna pa bay idugang. Pasalamati sila alang sa ilang pagkamatinuoron ug pahibaloa sila nga kamo nagpakabana.

• Bisan kon magsugod kamo sa pag-implementar og mga solusyon, paggahin og oras sa pagtabang ug pagpaminaw sa mga YSA aron makasabot kon unsaon nga ang mga solusyon makaapekto sa ilang kasinatian.

• Pagmatngon mahitungod sa pagtan-aw sa kasinatian sa usa ka tawo isip mao ang gibati sa tanan. Kon makighimamat kamo sa usa ka grupo, siguroha nga ang tanan napaminaw ug ang usa o duha ka indibidwal dili maoy modominar sa panagsultihanay (tan-awa sa Doktrina ug mga Pakigsaad 88:122).

Maghimo og Plano sa Pagpaminaw

Kinsa ang Inyong Gustong Pakig-istoryahan?

Motabang sa mga young single adult nga adunay lainlaing mga background, mga kasinatian, relihiyoso nga mga panglantaw, mga lebel sa pagkaaktibo sa Simbahan, ug uban pa.

Unsa ang Inyong Hisgotan?

Mga hilisgotan nga hisgotan mahimong maglakip sa mosunod:

• Kanus-a, asa, ug unsaon nga kita mobati nga mas suod sa Dios

• Mga hagit nga tingali atong giatubang bahin sa relihiyon niini nga yugto sa atong kinabuhi

• Ang kamahinungdanon sa ebanghelyo diha sa atong kinabuhi

• Ngano nga ang mga higala o pamilya mibiya sa Simbahan

• Unsaon pagtabang sa uban nga masayod nga sila gikinahanglan ug ang ilang kontribusyon bililhon

• Ang ebanghelyo ni Jesukristo ug kon sa unsang paagi nga ang mga pakigsaad makatabang nato sa pagsentro sa atong mga kinabuhi diha ni Jesukristo.

• Kinaiya ug mga talento nga makatabang sa atong komunidad nga mahimong mas Kristohanon

• Mga hilisgotan sa ebanghelyo ug mga hiyas nga atong gibati nga labing makatabang sa atong henerasyon

• Mga kalihokan ug mga kasinatian nga makatabang natong tanan nga mas mapaduol ngadto ni Kristo ug ngadto sa usag usa, inigka-Dominggo ug atol sa semana

Kanus-a Kamo Maminaw?

Ikonsiderar ang mubo og termino nga pagpaminaw ug taas og termino, padayon nga pagpaminaw. May pagtugot gikan sa tawo nga inyong gikaistorya, irekord o isulat unsay inyong nakat-onan aron inyong mapaambit sa umaabot nga mga miting sa komitiba. Pagpili og oras nga ang panagsultihanay dili magdalidali.

Unsaon Ninyo sa Pagpaminaw?

Ang pagpaminaw mahitabo sa labing maayo diha sa usa ka kahimtang nga magtugot og matinuoron ug bukas nga diskusyon. Mahimo kamo nga maminaw diha sa mga grupo o sa tinagsa-tagsa. Mahimo kamo nga maminaw diha sa usa ka panimalay, sa simbahan, o bisan asa nga komportable ug wala kaayoy mga makabalda.