kulupu ʻoku tuʻu ʻi ha matātahi

Kōmiti ʻa e Taautaha Lalahi kei Talavoú

Ko e Taumuʻa ʻo e Kōmiti Fakasiteiki ʻa e Kau Taautaha Lalahi kei Talavoú

ʻI hoʻo hoko ko ha mēmipa ʻo e kōmiti fakasiteiki ʻa e taautaha lalahi kei talavoú (YSA), ʻoku uiuiʻi koe ke ke tokoni ki he kau taautaha lalahi kei talavou ʻi hoʻo siteikí ke nau ongoʻi e ʻofa ʻa e Tamai Hēvaní mo Hono ʻAlo ko Sīsū Kalaisí pea muimui kiate Kinaua. ʻOku mahino kiate Kinaua ʻetau ngaahi fiemaʻú mo e ngaahi tūkungá pea te Na poupouʻi kitautolu takitaha ʻi he tuʻunga ʻoku tau ʻi aí ʻi Heʻena tokoniʻi kitautolu ke tau ofi ange kiate Kinaua ʻo fakafou ʻi he ngaahi fuakavá. ʻOku uiuiʻi koe ke ke tataki e ngāue liliu moʻui ko ʻení.

Te ke lava ʻo fai ʻeni ʻaki haʻo toutou fehuʻi maʻu pē kiate koe:

• Te tau tokoniʻi fēfē ʻa e kau taautaha lalahi kei talavoú ke fakamālohia ʻenau fehokotaki mo e Fakamoʻuí ʻo fakafou ʻi he ngaahi fuakavá mo e ngaahi ouaú?

• Te tau tokoniʻi fēfē ʻa e kau taautaha lalahi kei talavou kotoa pē—kau ai ʻa kinautolu ʻoku nau ongoʻi ʻoku ʻikai ke nau feʻunga mo iá, ʻikai ha poupou fakasōsiale, pe fefaʻuhi mo ʻenau tuí?

• Te tau fakatupulaki fēfē ʻa e ongoʻi kau maí mo fakamālohia e ngaahi vā fetuʻutaki ʻi he kau taautaha lalahi kei talavoú?

• ʻE founga fēfē haʻatau feau lelei ange ʻa e ngaahi fiemaʻu ʻa e kau taautaha lalahi kei talavou kotoa pē?

ʻI hoʻo ngāue ʻi he kōmiti YSA homou siteikí, te ke muimui ai ki he ngaahi tefitoʻi moʻoni mo e ngaahi tuʻutuʻuni ʻoku maʻu ʻi he Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, tautautefito ki he vahe 1–4 mo e vahe 14. Te ke lava foki ʻo maʻu mei he ngaahi maʻuʻanga tokoni ʻoku maʻu ʻi he YA Fakauiké.

ko ha fefine ʻoku lotu

Ko e Ngāue ʻa e Ngaahi Kōmiti Fakasiteiki ʻa e Taautaha Lalahi kei Talavoú

Ko e meʻa kotoa pē ʻokú ke fai ʻi hoʻo hoko ko ha taki ʻo e taautaha lalahi kei talavoú, ʻoku totonu ke tataki ia ʻe he Laumālie Māʻoniʻoní. Ko e meʻa mahuʻinga taha te ke lava ʻo fai lolotonga hoʻo ngāue ʻi he kōmiti YSA ko e muimui ki he Laumālie ʻo e ʻEikí. Fekumi ki ha fakahinohino mei he Laumālie Māʻoniʻoní ʻi hoʻo muimui ki he founga faingofua ko ʻeni ʻe tolú:

1. Fakafanongo ki he Kau Taautaha Lalahi Kei Talavoú. ʻI hoʻo hoko ko e taki ʻo e YSA, te ke tokoni ai ki he kau taautaha lalahi kei talavou kotoa pē mo ako fekauʻaki mo ʻenau moʻuí, ngaahi taumuʻá, mo ʻenau ngaahi fiemaʻú. Feinga ke ke maʻu ha mahino kae ʻoua ʻe fakamaauʻi pe feinga ke fai ha faleʻi. Muimui ki he sīpinga ʻa Sīsū Kalaisí ʻaki hoʻo ʻuluaki tokoni kimuʻa pea toki faiako pe fakaafe (vakai, Mātiu 14:15–21; Maʻake 8:22–26; Luke 8:26–36).

2. Fealēleaʻaki Fakataha pea Fakafeʻungaʻi e Ngaahi Founga Fakaleleiʻí. ʻI hoʻo foki mai mo e meʻa ʻokú ke ako mei he fanongo ki he kau taautaha lalahi kei talavoú, fakafanongo fakalelei ki he kau mēmipa kehe ʻo e kōmití pea ngāue fakataha ke maʻu ha mahino ki he ngaahi fiemaʻú mo ʻiloʻi ha ngaahi founga lelei ke fakaleleiʻi ʻaki.

3. Fakahoko e Ngaahi Founga Fakaleleiʻí. Ko hoʻo fakamatalaʻi pē ʻa e ngaahi founga fakaleleiʻí mo faʻu ha palaní, te ke fakahoko leva ʻa e palaní. ʻI hoʻo ngāueʻi ʻa e ueʻi fakalaumālié, tokanga taha ki he ngaahi fiemaʻú, ngāue fakataha mo e kōmití ʻi he uouangataha, mo kumi faleʻi mei he palesitenisī fakasiteikí mo e kau taki kehe ʻo e siteikí, ʻe tataki koe ʻe he ʻEikí. Te ke fakatokangaʻi ʻa e ngaahi mālohinga mo e vaivaiʻanga ʻo hoʻo palaní, pea te ke lava ʻo liliu ʻo ka fiemaʻu.