kulupu ʻoku fepōtalanoaʻaki

Fakafanongo ki he Kau Taautaha Lalahi Kei Talavoú

Ke tokoniʻi e niʻihi kehé ke nau ongoʻi ʻoku ʻofaʻi kinautolú, ʻoku fiemaʻu ke ke tokoniʻi kinautolu ke nau ongoʻi ʻoku fanongo ange ha taha. Naʻe akoʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá: “Ke ke loto-moʻoni. Feohi fakamātoato mo kinautolu. Fehuʻi ki he ngaahi kaumeʻa ko ʻení pe ko e hā ʻa e meʻa ʻoku mahuʻinga taha kiate kinautolú. Ko e hā ʻa e meʻa ʻoku nau mataʻikoloa ʻakí, pea ko e hā ʻa e meʻa ʻoku pelepelengesi taha kiate kinautolú? Hili ia peá ke fakafanongo. … Kapau te tau fakafanongo ʻi he ʻofá, ʻe ʻikai fiemaʻu ke tau fifili pe ko e hā te tau lea ʻakí. ʻE fakahā mai ia kiate kitautolu—ʻe he Laumālié pea mo hotau ngaahi kaumeʻá” (“Witnesses unto Me,” Ensign, May 2001, 15).

ʻOku fefaʻuhi ha kakai lalahi kei talavou tokolahi mo ʻenau tuí. ʻOku ʻi ai ha niʻihi ʻoku ʻi ai haʻanau ngaahi fehuʻi mo e veiveiua; ʻoku ʻikai ongoʻi ʻe ha niʻihi ʻoku fiemaʻu kinautolu pe te nau kau ʻi he Siasí. Ko ha sitepu ʻuluaki mo mātuʻaki mahuʻinga ki hono tokoniʻi ʻo e kau taautaha lalahi kei talavoú ko e tokoni mo fakafanongó. ʻI heʻetau hoko ko e kāingalotu ʻo e Siasí, ʻoku tau fiemaʻu ʻa e ngaahi meʻafoaki, ueʻi fakalaumālie, mo e ngaahi fakakaukau ʻa e tokotaha kotoa pē. ʻOku fiemaʻu ke tau fetokoniʻaki.

Kimuʻa pea kamata hoʻomou fealēleaʻaki fakakōmiti fekauʻaki mo e ngaahi founga ke feau ʻaki e ngaahi fiemaʻu ʻa e kau taautaha lalahi kei talavoú, tomuʻa feinga ke maʻu ha mahino kiate kinautolu, kau ai ʻa kinautolu ʻoku ngali veiveiua ʻenau tuí mo ʻenau fakamoʻoní. ʻI hoʻomou fai iá, te mou ʻofa foki ʻiate kinautolu. Fakafanongo ʻo ʻikai filifilimānako mo ʻikai ha fakamaau. ʻOku totonu ke ongoʻi ʻe he kau taautaha lalahi kei talavou ʻokú ke feʻiloaki mo iá ʻoku ongoʻi, fakaʻapaʻapaʻi, mahino, mo ʻofaʻi kinautolu.

Lolotonga hoʻo ngāue ʻi he kōmiti YSA, ʻoku totonu ke ke fanongo ki he kau YSA mei he ngaahi puipuituʻa mo e ngaahi tūkunga lahi taha ʻe ala lavá. Ko hono moʻoní, ʻoku totonu ke hoko maʻu pē ʻeni.

Ngaahi maʻuʻanga tokoni ke tokoni atu ke ke fakafanongo ki he kau YSA:

• Ngaahi Tefitoʻi Moʻoni ki he Fakafanongó

• Faʻu ha Palani Fakafanongo

kulupu ʻoku nau tangutu ʻi he ngaahi sitepú

Ngaahi Tefitoʻi Moʻoni ki he Fakafanongó

• Faʻu ha ʻātakai ʻoku fakafiemālie mo faingofua pea poupouʻi ai ʻa e fepōtalanoaʻaki ʻoku fakanatula mo tauʻatāiná. Fakakaukau ki he ngaahi meʻa hangē ko e tō ho leʻó, anga hoʻo teuteú, mo e feituʻu ʻokú ke fakahoko ai e fepōtalanoaʻakí.

• Feinga ke ʻiloʻi kinautolu—ʻenau tuí, ʻenau ʻamanakí, mo honau ngaahi faingataʻaʻiá. Ko e lelei ange hoʻo ʻiloʻi kinautolú, ko e lahi ange ia e fakamatala te ke maʻu ke tataki ʻaki hoʻo fakakaukaú mo e ngaahi ueʻi fakalaumālié.

• Fai ha ngaahi fehuʻi tali tauʻatāina ʻoku nau fakaafeʻi ʻa e kau YSA ke nau vahevahe ʻenau ngaahi fakakaukaú, ongó, ʻamanakí, mo e ngaahi faingataʻá (vakai, “Faʻu ha Palani Fakafanongo”). Fakafanongo ʻo lahi ange ʻi he meʻa ʻokú ke lea ʻakí.

• Fakakau ai ʻa e kau YSA ʻo e tuʻunga tangata pe fefine, taʻu motuʻa, puipuituʻa, mo e ngaahi tuʻunga mālohi kehekehe ʻi he Siasí. Ko e lahi ange e kehekehe ʻa e kau YSA ʻokú ke fetaulaki mo iá, ko e lelei angé ia. Vakai pe ʻoku nau ʻilo ha niʻihi kehe te nau lava ʻo vahevahe ha ngaahi fakakaukau kehekehe.

• Kapau ʻoku fakahaaʻi ʻa e ngaahi faingataʻá pe loto-foʻí, ʻoua naʻá ke fakamaau, fakatonutonu, teke mālohi pe feinga ke “fakaleleiʻi” ʻa e kau YSA ʻokú ke talanoa ki aí. Fakafanongo ʻi he fakaʻapaʻapa, angaʻofa, mo e manavaʻofa. Toe lea mai ʻaki ʻa e meʻa kuó ke fanongo aí ke fakapapauʻi ʻoku tonu hoʻo mahinó, pea fehuʻi ange pe ʻoku toe ʻi ai ha meʻa lahi ange. Fakamālō ange ʻi heʻenau faitotonú pea ʻai ke nau ʻiloʻi ʻokú ke tokanga.

• Naʻa mo e taimi ʻokú ke kamata fakahoko ai ha ngaahi solovaʻangá, tuku ha taimi ke ke feohi mo fakafanongo ki he kau YSA ke mahino ʻa e founga ʻoku uesia ai ʻe he ngaahi founga fakaleleiʻí ʻenau aʻusiá.

• Tokanga ke ke vakai ki he aʻusia ʻa ha toko taha ʻo hangē ko e ongo ʻoku maʻu ʻe he tokotaha kotoa pē. Kapau te mou fakataha mo ha kulupu, fakapapauʻi ʻoku fanongoa kotoa kinautolu pea ʻoku ʻikai ke puleʻi ʻe ha toko taha pe toko ua pē ʻa e fepōtalanoaʻakí (vakai, Tokāteline mo e Ngaahi Fuakava 88:122).

ko ha fefine ʻokú ne hiki ha tohinoa

Faʻu ha Palani Fakafanongo

Ko Hai ʻOkú Ke Loto ke Talanoa Ki Aí?

Fakakau mai ʻa e kau taautaha lalahi kei talavou ʻoku ʻi ai honau puipuituʻa kehekehe, ngaahi aʻusia, ngaahi fakakaukau fakalotu, ngaahi tuʻunga ʻo e mālohi ʻi he Siasí, mo e ngaahi meʻa peheé.

Ko e Hā ʻa e Meʻa Te Ke Aleaʻí?

‘E ala kau e ngaahi meʻá ni ʻi he ngaahi kaveinga ke aleaʻí:

• Taimi, feituʻu, mo e founga ʻoku tau ongoʻi fehokotaki taha ai mo e ʻOtuá

• Ngaahi pole te tau ala fehangahangai mo kinautolu ʻi he tui fakalotú ʻi he tuʻunga ko ʻeni ʻo ʻetau moʻuí

• Ko e ʻaonga taau ʻo e ongoongoleleí ʻi heʻetau moʻuí

• ʻUhinga kuo mavahe ai e ngaahi kaungāmeʻá pe fāmilí mei he Siasí

• Founga ke tokoniʻi ai e niʻihi kehé ke nau ʻiloʻi ʻoku fiemaʻu kinautolú pea ʻoku fakamahuʻingaʻi ʻenau ngaahi tokoní

• Ko e ongoongolelei ʻo Sīsū Kalaisí mo e founga ʻe tokoni ai hono tauhi ʻo e ngaahi fuakavá ke fakatefito ʻetau moʻuí ʻia Sīsū Kalaisí.

• ʻUlungaanga mo e ngaahi talēniti ʻe tokoni ke anga faka-Kalaisi ange hotau koló

• Ngaahi tefito mo e ngaahi tuʻunga ʻulungaanga mahuʻinga ʻo e ongoongoleleí ʻoku tau ongoʻi e ala ʻaonga lahi taha ki hotau toʻu tangatá

• Ngaahi ʻekitivitī mo e ngaahi aʻusia ʻe lava ʻo tokoni ke tau ʻunu kotoa ʻo ofi ange kia Kalaisi mo e niʻihi kehé, ʻi he Sāpaté mo e lolotonga ʻo e uiké fakatouʻosi

Ko e Taimi Fē Te Ke Fakafanongo Aí?

Fakakaukau ki he fakafanongo taimi nounoú mo e fakafanongo taimi lōloa, ʻoku hokohoko atu peé. Kapau ʻe fakangofua ʻe he tokotaha ʻokú ke talanoa mo iá, lekooti pe hiki ha fanga kiʻi fakamatala ki he meʻa ʻokú ke akó koeʻuhí ke ke lava ʻo vahevahe ia ʻi he ngaahi fakataha ʻa e kōmití ʻi he kahaʻú. Fili ha taimi he ʻikai fakavaveʻi ai ʻa e fepōtalanoaʻakí.

ʻE Founga Fēfē Hoʻo Fakafanongó?

ʻOku lelei taha ʻa e fakafanongó ʻi ha ʻātakai ʻoku fakaʻatā ai ʻa e fealēleaʻaki moʻoni mo tauʻatāiná. Te ke lava ʻo fakafanongo fakakulupu pe fakataautaha. Te ke lava ʻo fakafanongo ʻi ha ʻapi, ʻi he lotú, pe ʻi ha toe feituʻu pē ʻoku fakafiemālie mo fakasiʻisiʻi ai e ngaahi meʻa ʻokú ne tohoakiʻi e tokangá.