Faalogo i Talavou Nofofua Matutua

Ina ia fesoasoani i isi ia lagona le alofaina, e tatau ona e fesoasoani ia latou lagona ua faalogo atu. Na aoao mai Elder Jeffrey R. Holland o le Korama a Aposetolo e Toasefululua e faapea: “Ia moni. Ia aapa atu i ai ma le faamaoni. Ia fesili i na uo po o le a le mea e sili ona taua ia te i latou. O le a le mea latou te faapelepele i ai, ma o le foi le mea e latou te manatu e taua? Ona e faalogo lea. … Afai tatou te faalogo ma le alofa, e le tatau ona tatou tau manatunatu pe o le a le tala e fai. O le a tuuina mai ia i tatou—e ala i le Agaga faapea ma a tatou uo” (“Molimau Ia te Au,” Liahona, Me 2001, 15).

E toatele talavou matutua o loo tauivi ma lo latou faatuatua. O nisi e i ai fesili ma masalosaloga; o nisi e le lagonaina e manaomia i latou pe auai i le Ekalesia. O se laasaga muamua ma le taua e fesoasoani ai i talavou nofofua matutua o le aapa atu lea ma faalogo. I le avea ai ma tagata o le Ekalesia, tatou te manaomia meaalofa, musumusuga, ma vaaiga a tagata uma. Tatou te manaomia le tasi ma le isi.

Ae tou te lei amata fefautuaai o se komiti e uiga i vaifofo e taulima ai manaoga o talavou nofofua matutua, saili muamua ia malamalama ia i latou, e aofia ai latou o e atonu o loo tautevateva i lo latou faatuatua ma molimau. A o e faia, o le a e alofa foi ia i latou. Faalogo e aunoa ma le faaitu’au ma aunoa ma se faamasinoga. O talavou nofofua matutua tou te feiloai e tatau ona lagonaina le faalogoina, faaaloalogia, malamalama, ma le alofaina.

I le taimi o lau auaunaga i le komiti a le TNM, e tatau ona e faalogo atu i TNM mai le tele o talaaga ma tulaga e mafai ai. O le mea moni, e tatau ona avea lenei mea ma se faiga faifai pea.

Punaoa e fesoasoani ia te oe e faalogo ai i TNM:

• Mataupu Faavae mo le Faalogo Atu

• Fai se Fuafuaga e Faalogo

Mataupu Faavae mo le Faalogo Atu

• Fatu se nofoaga e toafimalie ma faasamasamanoa ma uunaia ai talanoaga e masani ma tatala. Mafaufau i mea e pei o lou leo, le auala e te laei ai, ma le mea e te faia ai le talanoaga.

• Ia iloa i latou—lo latou faatuatua, o latou faamoemoega, o latou tauiviga. O le lelei o lou iloaina o i latou, o le tele foi lea o faamatalaga o le a e maua e taiala ai ou mafaufauga ma uunaiga faaleagaga.

• Fai atu fesili e tatala ai faamatalaga e valaaulia ai TNM e faasoa mai o latou manatu, lagona, faamoemoega, ma luitau (tagai “Fai se Fuafuaga o le Faalogo”). Faalogo atili nai lo lou talanoa.

• Ia aofia ai TNM o itupa eseese, tausaga, talaaga, ma tulaga, ma le fua eseese o le toaaga mai i le Lotu. O le tele o eseesega o TNM tou te feiloai i ai, o le lelei foi lena. Vaai pe latou te iloa isi e mafai ona faasoa mai ni vaaiga e ese atu.

• Afai e faaalia ni tauiviga po o ni le fiafia, aua nei faamasinoina, faasa’o, uunai malosi, pe taumafai e “faaleleia” le TNM e te talanoa ai. Faalogo ma le faaaloalo, agalelei, ma le agaalofa. Toe fai atu mea na e faalogo i ai e faamaonia ai ua sa’o lou malamalama, ma fesili pe i ai nisi mea. Faafetai atu ia i latou mo lo latou faamaoni ma faailoa atu ia i latou e te amanaiaina.

• E tusa lava pe amata ona e faatinoina ni vaifofo, faaalu se taimi e aapa atu ai ma faalogo i TNM ina ia malamalama pe o faapefea ona aafia o latou aafiaga i fofo.

• Ia faaeteete i le vaai atu i le aafiaga o se tagata e toatasi o se auala o lagonaina e tagata uma. Afai tou te feiloai ma se vaega, ia mautinoa ua faalogo atu i tagata uma ma e le puleaina e se tagata se toatasi pe toalua le talanoaga (tagai Mataupu Faavae ma Feagaiga 88:122).

Fai se Fuafuaga e Faalogo

O Ai e Te Manao e Talanoa i Ai?

Aapa atu i talavou nofofua matutua e i ai tulaga eseese, aafiaga, vaaiga faalelotu, tulaga eseese o le toaaga mai i le Lotu ma isi mea faapena.

O Le A Se Mea O Le A E Talanoaina?

O autu e talanoaina e mafai ona aofia ai mea nei:

• O anafea, o fea, ma pe faapefea ona tatou lagonaina le sili ona fesootai atu i le Atua

• O luitau tatou te ono feagai ma tapuaiga i lenei taimi i o tatou olaga

• O le taua talafeagai o le talalelei i o tatou olaga

• Aisea ua tuua ai e uo po o aiga le Ekalesia

• Auala e fesoasoani ai i isi ia iloa e manaomia i latou ma e faatauaina a latou saofaga

• O le talalelei a Iesu Keriso ma le ala o le tausia o feagaiga o le a fesoasoani ia i tatou e faatotonugalemu ai o tatou olaga ia Iesu Keriso.

• Amioga ma taleni o le a fesoasoani i o tatou nuu ia avea atili e faapei o Keriso

• O autu o le talalelei ma tulaga faatauaina tatou te lagona atonu e sili ona aoga i la tatou augatupulaga

• O gaoioiga ma aafiaga e mafai ona fesoasoani ia i tatou uma e faalatalata atili atu ai ia Keriso ma le tasi ma le isi, i aso Sa ma i le aluga o le vaiaso

Pe o Afea O Le A e Faalogo Ai?

Mafaufau i faalogoga mo vaitaimi pupuu ma taimi uumi, ma le faalogo faifai pea. Faatasi ai ma se faatagaga mai le tagata o loo e talanoa i ai, faamaumau pe tusi ni faamatalaga i mea o loo e aoaoina ina ia mafai ai ona e faasoa atu i fonotaga a le komiti i le lumanai. Filifili se taimi o le a le faanatinatia ai le talanoaga.

E Faapefea Ona E Faalogo?

O le faalogo e sili ona tupu i se faatulagaga lea e faatagaina ai ona talanoa faamaoni ma tatala. E mafai ona e faalogo atu i ni vaega po o le taitoatasi. E mafai ona e faalogo atu i se fale, i le lotu, po o soo se isi lava mea e toafimalie ma faaitiitia ai mea faalavefau.