Komiti a Talavou Nofofua Matutua

O Le Faamoemoega o le Komiti a Talavou Nofofua Matutua a le Siteki

I le avea ai ma se tasi o le komiti a talavou nofofua matutua a le siteki (TNM), ua valaauina oe e fesoasoani i talavou nofofua matutua i lau siteki ia lagonaina le alofa o le Tama Faalelagi ma Lona Alo o Iesu Keriso ma mulimuli ia i La’ua. E La te malamalama i o tatou manaoga ma tulaga ma o le a feiloai ia i tatou taitoatasi i le mea o tatou i ai a o La’ua fesoasoani ia i tatou ia latalata atili atu ia i La’ua e ala i feagaiga. Ua valaauina oe e taitaia lenei galuega e suia ai le olaga.

E mafai ona e faia lenei mea e ala i le fesili soo ia te oe lava:

• E faapefea ona tatou fesoasoani i talavou nofofua matutua e faamalosia lo latou sootaga i le Faaola e ala i feagaiga ma sauniga?

• E faapefea ona tatou auauna atu i talavou nofofua matutua uma—e aofia ai i latou o e lagona e le fetaui i latou, leai se lagolago faaagafesootai, pe tauivi ma lo latou faatuatua?

• E faapefea ona tatou faateleina lagona o le taliaina ma le faamalosia o sootaga i le va o talavou nofofua matutua?

• E faapefea ona tatou taulimaina lelei manaoga o talavou nofofua matutua uma?

A o e auauna atu i lau komiti o le TNM a le siteki, o le a e mulimuli i mataupu faavae ma aiaiga faavae o loo maua i le Tusitaulima Aoao: Auauna atu i Le Ekalesia a Iesu Keriso o le Au Paia o Aso e Gata Ai, aemaise lava mataupu 1–4 ma le mataupu 14. E mafai foi ona e maua mai punaoa o loo maua i le TM Faalevaiaso.

O Le Galuega a Komiti a Talavou Nofofua Matutua a le Siteki

O mea uma e te faia o se taitai talavou nofofua matutua e tatau ona taialaina e le Agaga Paia. O le mea aupito sili ona taua e mafai ona e faia a o auauna ai i le komiti a le TNM o le mulimuli lea i le Agaga o le Alii. Saili le taitaiga mai le Agaga Paia a o e mulimuli i lenei faagasologa faigofie e tolu laasaga:

1. Faalogo i Talavou Nofofua Matutua. I le avea ai ma se taitai o TNM, o le a e aapa atu i talavou nofofua matutua uma ma aoao mai e uiga i o latou olaga, sini, ma manaoga. Saili ia malamalama e aunoa ma le faamasino atu po o le taumafai e fautua atu. Mulimuli i le faataitaiga a Iesu Keriso e ala i le auauna muamua atu a o lei aoao atu pe valaaulia (tagai Mataio 14:15–21; Mareko 8:22–26; Luka 8:26–36).

2. Fefautuaai Faatasi ma Fetuunai Fofo. A o e aumaia ma oe mea na e aoaoina mai le faalogologo i talavou nofofua matutua, faalogo ma le toto’a i isi sui auai o le komiti ma galulue faatasi ia malamalama i manaoga ma faailoa mai ni vaifofo aoga.

3. Faatino Fofo. O le taimi lava e te faamatalaina ai fofo ma atiina ae se fuafuaga, o le a e faatinoina loa le fuafuaga. A o e galue i musumusuga, taulai atu i manaoga, galulue faatasi ma le komiti i le lotogatasi, ma saili fautuaga mai le au peresitene o le siteki ma isi taitai o le siteki, o le a taitaia oe e le Alii. O le a e vaaia malosiaga ma vaivaiga o lau fuafuaga, ma o le a mafai ona e fetuunai pe a manaomia.