Punaoa ma Vaifofo a le Ekalesia o I Ai Nei

Mafaufau i punaoa ma vaifofo nei a o e fausia lau fuafuaga o TNM. Mo punaoa taitasi o loo i lalo, e tuuina atu le taitaiga i le tele o le fetuutuunai o sui auai o le komiti a TNM mo le fetuunaia o nei vaifofo.

Iunite a le Ekalesia

O iunite o le Ekalesia (paranesi, itu, uarota, ma siteki) e maua ai avanoa mo talavou nofofua matutua e tapuai ai ma auai i le galuega o le faaolataga ma le faaeaga (tagai Efeso 4:11–13). I nei iunite, e potopoto soo le autalavou nofofua matutua e tapuai i le Atua, atiina ae le faatuatua ia Iesu Keriso, maua sauniga, fegalegaleai, ma maua le malosi i le taimi o luitau faaleagaga ma faaletino (tagai Moronae 6:4–6).

Afai e te auai i se iunite a TNM, tagai i le “Iunite a TNM” mo ni manatu e mafai ona e mafaufau i ai.

O Ni Fesili e Mafai Ona Faaaoga mo Talanoaga

• O faapefea ona lagolagoina e iunite o le Ekalesia i la tatou eria ia talavou nofofua matutua?

• E mafai faapefea ona tatou faaleleia le aafiaga o TNM i a tatou iunite o le Ekalesia?

• E mafai ona tatou faia nisi mea e faafesootai ai talavou nofofua matutua i a tatou uarota i talavou nofofua matutua i le siteki po o le eria?

• O i ai so tatou nofoaga e mafai ona faapotopoto ai talavou nofofua matutua (o se falelotu po o le inisitituti)?

• Pe o maua e talavou nofofua matutua ni avanoa mo auaunaga anoa i a tatou iunite o le Ekalesia?

Taiala Patino

• Manatua le gafatia, malosi, ma le faatosinaga a talavou nofofua matutua ma le aafiaga e mafai ona latou maua i iunite o le Ekalesia. E mafai e talavou nofofua matutua ona auauna atu i le tele o valaauga (tagai Tusitaulima Aoao: Auauna atu i Le Ekalesia a Iesu Keriso o le Au Paia o Aso e Gata Ai, 14.0).

• Mafaufau i manaoga ma aafiaga eseese o talavou nofofua matutua ma le auala e lagolago ai i latou atonu e lagonaina le faaesea i se iunite o le faataatiaga faafaafanua.

• Ia mautinoa ua iloa ma faafaileleina talavou nofofua matutua uma.

Filifiliga e Ono I Ai mo le Iloiloina ma le Atinaega

• Mafaufau i ni auala e aumai faatasi ai talavou nofofua matutua i aafiaga o le itula lona lua (tagai “Itula Lona Lua”).

• Uunaia ma galulue faatasi ma taitai i le lotoifale e faaauai talavou nofofua matutua i le auauna atu ma le faamalolosia o iunite o loo latou tapuai ai (tagai “Valaauga o le Ekalesia”).

• Fatu se aafiaga ua mamanuina e faatosina mai ai talavou nofofua matutua i le taimi nei i le uarota po o le siteki. Mo se faataitaiga:

  • O se tasi o uarota i le siteki ua atofaina mo talavou nofofua matutua e auai

  • Gaoioiga faalevaiaso

  • O se sauniga molimau faalemasina

  • Avanoa faalevaiaso pe faalemasina o auaunaga

  • O se nofoaga e faapotopoto ai i le lotoifale (tagai “Faatuina o se Nofoaga e Faapotopoto ai TNM,” ChurchofJesusChrist.org)

• Galulue ma taitai i le lotoifale e fautua atu le faavaeina o se iunite a TNM pe afai e te lagona o le auala sili lena e faamalosia ai talavou nofofua matutua i la outou eria (tagai “Iunite a TNM”).

O Laasaga e Faatino

1. Faamaonia suiga e ala i komiti taitai talafeagai.

2. Fatu se fuafuaga e faailoa atu ai suiga i talavou nofofua matutua o loo auai i iunite o le faataatiaga faafaafanua.

Iunite a TNM

O iunite a TNM e maua ai avanoa mo talavou nofofua matutua e tapuai faatasi ai ma auai i le galuega o le faaolataga ma le faaeaga i uso a Au Paia i se tulaga talitutusa i le olaga (tagai Efeso 4:13). I nei iunite, e potopoto soo talavou nofofua matutua e tapuai i le Atua, atiina ae le faatuatua ia Iesu Keriso, maua sauniga, fegalegaleai, ma maua le malosi i le taimi o luitau faaleagaga ma faaletino (tagai Moronae 6:4–6).

O Ni Fesili e Mafai Ona Faaaoga mo Talanoaga

• O a faamanuiaga ma luitau o le i ai o se iunite a TNM?

• Aisea e filifili ai talavou nofofua matutua e auai pe le auai i se iunite a TNM?

• E mafai faapefea ona tatou faaleleia aafiaga i la tatou iunite o TNM?

• E mafai faapefea ona tatou faaaofia talavou nofofua matutua o loo auai i iunite o le faataatiaga faafaafanua i gaoioiga a iunite a le TNM?

• E faapefea ona tatou faia ia mautinoa e le faatautava ia gaoioiga i iunite o le faataatiaga faafaafanua ma iunite a TNM?

Taiala Patino

• Aua nei fatuina se iunite fou a le TNM e aunoa ma le mulimuli i le faagasologa o le faamaoniga mo iunite fou (tagai Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 37.2). Afai e manaomia ona fatuina se iunite a TNM galulue faatasi ma la outou peresitene o le siteki.

Filifiliga e Ono I Ai mo le Iloiloina ma le Atinaega

• Fesuiaiga o talavou nofofua matutua o se vaega (mo se faataitaiga, i le aso 1 Ianuari) nai lo aso fanau.

• Faatulaga ni iunite tuufaatasi mo talavou matutua ua faaipoipo ma nofofua (e sili ona taatele i se faatulagaga faaleiunivesite).

O Laasaga e Faatino

Galulue faatasi ma le taitaiga faalesiteki e:

1. Faailoa tuaoi o iunite o i ai nei ma le ala e aafia ai i latou i suiga moomia.

2. Faatumu se iloiloga o le pepa faamaumau o iunite ua aafia.

3. Faatumu se gafa o le faitau aofai o tagata ina ia mautinoa ai se paleni o tagata i iunite taitasi.

4. Faatumu le fomu o le Talosaga o le Faalapotopotoga a le Uarota po o le Paranesi mo suiga uma ua fautuaina atu (o loo maua i le Punaoa mo Taitai ma Failautusi).

Valaauga o le Ekalesia

E mafai e talavou nofofua matutua ona saofaga tele atu i le malo o le Atua. Latou te aumaia foi ni vaaiga ma ni aafiaga tulaga ese lea e mafai ona faamanuiaina ma faamalolosia ai tagata uma o le Ekalesia. E mafai ona latou galulue i soo se valaauga i le siteki sei vagana ai le epikopo, peresitene o le siteki, po o le peteriaka o le siteki.

O Ni Fesili e Mafai Ona Faaaoga mo Talanoaga

• O a ni valaauga po o tofiga fou ma anoa o le a mafai ai e talavou nofofua matutua ona auai i le galuega o le faaolataga ma le faaeaga?

• E mafai faapefea ona tatou fesoasoani i talavou nofofua matutua ia lagona le manaomia i valaauga o loo ia i latou?

• O fea e le o tele ai le faaaogaina o talavou nofofua matutua i le taimi nei?

• O a ituaiga valaauga, tofitofiga, po o avanoa faaleauaunaga o le a sili ona taliaina e i latou e le o auai?

Taiala Patino

• Aloese mai le fatuina o valaauga e le anoa. O le “anoa” o le a faauigaina i ni mea eseese i tagata eseese, ae e tatau ona lagona e tagata uma e manaomia i latou i le mea latou te auauna atu ai.

• Amata i le taulai atu i valaauga o uarota ma siteki e mafai ona manuia mai faatosinaga a talavou nofofua matutua.

• I iunite a TNM, valaau talavou nofofua matutua i le tele o tofiga faaletaitai (tagai Tusitaulima Aoao: Auauna atu i Le Ekalesia a Iesu Keriso o le Au Paia o Aso e Gata Ai, 37.2.2, 37.3.2).

Filifiliga e Ono I Ai mo le Iloiloina ma le Atinaega

• Uunaia taitai e mafaufau i talavou nofofua matutua pe a faailoa mai tagata e mafai ona auauna atu i se valaauga, e aofia ai valaauga faaletaitai.

• Ia mautinoa ua tofu talavou nofofua matutua ma se tofiga faaleauaunaga.

• Mafaufau i ni avanoa eseese mo talavou nofofua matutua e auauna atu ai i le malumalu, auai i galuega o talafaasolopito o aiga, ma faasoa atu le talalelei i isi.

• Mafaufau i valaauga ma tofiga e mafai ona tuuina atu le faatosinaga a talavou nofofua matutua i le nuu lautele.

Itula Lona Lua

O le itula lona lua o le poloka sauniga i le Aso Sa e tatau ona fesoasoani i talavou nofofua matutua e fausia lo latou faatuatua i le Tama Faalelagi ma Iesu Keriso, faateleina lo latou malamalama i le talalelei, lagona se lagona o le auai ma le fesootaiga, ma talisapaia le taua o le talalelei i o latou olaga.

O Ni Fesili e Mafai Ona Faaaoga mo Talanoaga

• O a taunuuga e sili ona fiafia i ai mo aafiaga o le itula lona lua? O a ni aafiaga i nei sauniga a le Ekalesia o le a sili ona ausia lelei ai nei taunuuga?

• O a ni manaoga o talavou nofofua matutua e mafai ona talanoaina i fonotaga mo le itula lona lua?

• O a luitau i o tatou aafiaga o i ai nei i le itula lona lua?

• E faapefea ona tatou fatuina se aafiaga i le itula lona lua lea e matagofie ma faigofie ona maua e talavou nofofua matutua uma (e tusa lava po o le a le malosi o le faatuatua, sitaili o le aoaoina, po o aafiaga o le olaga)?

Taiala Patino

• Faaaoga le mataupu aoaoina faatusi paia ma aoaoga faavae lava e tasi o loo faaaogaina e isi tagata o le Ekalesia.

• Faatumauina se siosiomaga saogalemu lea e uunaia ai tagata uma e fegalegaleai ma auai.

• Ia mautinoa ua i ai i tagata o le ekalesia ni filifiliga eseese o faiaoga ma vasega.

• Mulimuli i le mamanu faatagaina o sauniga a le Ekalesia (vaega fefiloi mo vaiaso o le Aoga Sa ma le korama a toeaina ma le Aualofa i vaiaso atofaina).

• Mafaufau pe faapefea e suiga e ono i ai ona aafia ai talavou nofofua matutua i iunite uma e lua o le faataatiaga faafaafanua ma TNM.

Filifiliga e Ono I Ai mo le Iloiloina ma le Atinaega

• Fai ni vasega laiti e fetuunai e lagolago ai ituaiga eseese o aoaoga, uunaia talanoaga talafeagai ma fefaasoaai aafiaga, ma fatuina ni fesootaiga anoa faaagafesootai. O faataitaiga e aofia ai mea nei:

  • Vasega e taulai atu i auaunaga

  • Vasega e taulai atu i musika

  • Vasega e taulai atu i alafaasalalau eseese

• Ia i ai ni vasega faatekinolosi pe fai faafefiloi ina ia mafai ai e i latou o e atonu e le mafai ona auai faale tagata lava ia, e mafai lava ona auai i le aoaoina o le talalelei.

• Tuuina atu se faamamafa faapitoa o le Aso Sa lona lima i autu e faatatau i talavou nofofua matutua i le lotoifale. O faataitaiga e aofia ai mea nei:

  • Faafitauli tau autu o taimi nei ma faigata e ono i ai

  • Ola tutoatasi

  • Toe faaleleia o vaisu

Faamaonia suiga i fonotaga mo le itula lona lua e ala i aufono talafeagai faaleautaitai ma fatu se fuafuaga e faalauiloa atu ai suiga i talavou nofofua matutua.

Inisitituti

O le polokalama o le inisitituti o mataupu faalelotu e maua ai avanoa mo talavou nofofua matutua e faataunuu ai le valaaulia a le Faaola e “aoao i le tasi mataupu faavae o le malo” (Mataupu Faavae ma Feagaiga 88:77) e ala i vasega suesue o le talalelei i aso o le vaiaso.

O le inisitituti o se polokalama e faatotonugalemu ia Keriso, faavae i tusitusiga paia, ma taulai atu i tagata aoao ua faamoemoe e fesoasoani i tagata auai ia latalata atili atu i le Atua, faamalosia lo latou faatuatua ia Keriso ma Lana talalelei toefuataiina, ma alualu i luma i luga o le ala o feagaiga (tagai Iosua 1:8; Ioane 5:39; 2 Nifae 31:21).

O Ni Fesili e Mafai Ona Faaaoga mo Talanoaga

• O a mea ua aoao mai e taitai o le Ekalesia e uiga i le taua o le inisitituti ma le aoaoina o le talalelei?

• O a ituaiga o aafiaga o i ai talavou nofofua matutua i le lotoifale i le inisitituti?

• E mafai faapefea ona fetuunai le polokalama inisitituti ina ia sili atu ai ona talafeagai ma faigofie ona maua e talavou nofofua matutua i le lotoifale?

• O tatou iloa ea a tatou tagata faigaluega o Seminare ma Inisitituti o Mataupu Faalelotu a le (S&I) i le lotoifale? O le a se vaega e mafai ona latou faia i a tatou fonotaga a le komiti o le TNM?

Taiala Patino

• O talavou nofofua matutua uma ua ta’i 18–30, e tatau ona faamalosiauina e auai i vasega inisitituti, e tusa pe o aooga pe leai foi.

• O polokalama a le inisitituti o mataupu faalelotu ua faavaeina i lalo o le taitaiga a taitai perisitua ma le aufaigaluega a le S&I e taulima ai manaoga o talavou nofofua matutua.

• E mafai e peresitene o siteki ona faatuina ni vasega inisitituti e faavae i siteki i eria e le o maua ai vasega e faavae i le lotoa.

• O polokalama inisitituti e faavae i siteki e masani lava ona taulai atu i manaoga o talavou nofofua matutua e le o ni tagata aoga i le kolisi. Latou te faamamafaina le auai ma le aoaoina nai lo le mauaina o togi.

• E mafai e tagata aoga ona faamaea tulaga manaomia o kosi e faauu ai mai le inisitituti pe maua ai se togi o le a siitia atu ai i se iunivesite a le Ekalesia.

• Atonu e mananao nisi o talavou nofofua matutua e maua se tipiloma o le faauuga o le inisitituti, ae o isi atonu e leai. O manaoga o talavou nofofua matutua, ae le o tulaga manaomia o faauuga, e tatau ona tosina ai foliga o le polokalama inisitituti i la outou eria.

Filifiliga e Ono I Ai mo le Iloiloina ma le Atinaega

• E mafai ona tuufaatasi siteki e ofoina atu vasega inisitituti i se tulaga o siteki tuufaatasi.

• Atonu e fiafia talavou nofofua matutua i se “po o le inisitituti” lea e fai paga ai vasega ma se taumafataga po o se gaoioiga faaagafesootai.

• Mafaufau pe mafai faapefea ona aofia le inisitituti i se nofoaga e faapotopoto ai TNM i le lotoifale.

• Saili fetuunaiga i vasega inisitituti, e pei o le aso ma le taimi, umi o vasega, numera o vaiaso e faia ai se vasega, mafutaga faaleaoaoga i autu faapitoa, ma isi mea faapena.

O Laasaga e Faatino

1. Faalogo i talavou nofofua matutua ia malamalama i o latou aafiaga i le inisitituti ma pe faapefea ona faaleleia.

2. Galulue vavalalata ma au peresitene o siteki ma le aufaigaluega a le S&I i le lotoifale e faatulaga pe fetuunai se polokalama o le inisitituti lea e sili ona fetaui ma manaoga o talavou nofofua matutua i la outou eria.

Auauna atu

E tatau i talavou nofofua matutua ona maua ni avanoa aloaia ma tulaga masani e “auai ma le naunautai i se faamoemoega lelei” (Mataupu Faavae ma Feagaiga 58:27) ma faia se eseesega moni i mafuaaga latou te fiafia ai.

O Ni Fesili e Mafai Ona Faaaoga mo Talanoaga

• E mafai faapefea ona faaaoga le JustServe e fesoasoani ai i talavou nofofua matutua i la tatou eria ia iloa avanoa anoa faaleauaunaga? (Faaaoga le sootaga lenei e faafesootai ai se sui o le JustServe i la outou eria.)

• E mafai faapefea e avanoa anoa o auaunaga ona aafia lelei ai talavou nofofua matutua?

• O a luitau i le mauaina o avanoa anoa e auauna atu ai?

• O a ituaiga o avanoa faaleauaunaga e mafai ona sili ona aafia ai o tatou nuu i le lotoifale?

• O a vaega e mafai ona tatou galulue faatasi ai ma latou?

• E mafai faapefea ona tatou fesoasoani e fausia sootaga a o tatou auauna atu?

Taiala Patino

• Aloese mai avanoa faaleauaunaga e le anoa (e le lava galuega e faaauai ai tagata uma).

• Faataga talavou nofofua matutua e filifili avanoa o auaunaga i le tele e mafai ai.

• Ia mautinoa e taitai e talavou nofofua matutua le taumafaiga.

Filifiliga e Ono I Ai mo le Iloiloina ma le Atinaega

• Faaaoga pe faalautele i luga o punaoa o loo i ai a le Ekalesia ma le nuu, e pei o le JustServe, kosi o le ola tutoatasi, le polokalama o le toe faaleleia o olaga mai vaisu, galuega o malumalu ma talafaasolopito o aiga, po o le EnglishConnect.

• Faipaaga ma isi uarota, paranesi, ma siteki i galuega faatino.

• Faipaaga ma isi faalapotopotoga faalelotu, malo, po o faatinoga e le faamoemoe e maua ni polofiti i ta’imua tetele o loo i ai i nuu.

• Fesoasoani i le nuu i se ta’imua fou (e pei o le fausiaina o se umukuka supo).

• Faalautele avanoa mo faifeautalai faamisiona po o faifeautalai faamisiona mo se vaitaimi.

• Faalautele valaauga e faavae i auaunaga (tagai “Valaauga i le Ekalesia”).

• Faatulaga ni galuega faatino faifai pea (e pei o le aoaoina, faufautua, po o sifi faalemasina i se fale autu o meaai).

Auauna Atu ma Tapuai i le Malumalu

Na aoao mai Peresitene Nelson, “E faateleina le malosiaga lelei faleagaga lelei pe a tatou tapuai i totonu o le malumalu. … Ou te augani atu ia te outou ia faatoilaloina ala faalelalolagi e ala i le taulai atu i faamanuiaga e faavavau o le malumalu. O lou taimi iina e aumaia ai faamanuiaga mo le faavavau” (“O Le Taimi Lenei,” Liahona, Me 2022, 126).

A o potopoto le autalavou nofofua matutua i le malumalu, o le a latou lagonaina le faamoemoe, filemu, ma le alofa, ma o le a latou maua le malamalama latou te manaomia e faatoilalo ai luitau latou te feagai.

O Ni Fesili e Mafai Ona Faaaoga mo Talanoaga

• E mafai faapefea e tapuaiga ma auaunaga i le malumalu ona fesoasoani i talavou nofofua matutua i luitau latou te feagai?

• O le a se mea e taofia ai talavou nofofua matutua mai le tapuai ma le auauna atu i le malumalu? E mafai faapefea ona tatou fesoasoani atu?

• O le a se mea e mafai ona tatou aoao atu e fesoasoani ai i talavou nofofua matutua ia maua le mana sili atu i o latou olaga e ala i le tapuai ma auauna atu i le malumalu?

• E mafai faapefea ona tatou saunia talavou nofofua matutua ia maua feagaiga o le malumalu ma tumau ai i luga o le ala o feagaiga?

• E mafai faapefea ona tatou uunaia talavou nofofua matutua e faapotopoto ma auauna atu i le malumalu?

• E mafai faapefea ona tatou fesoasoani i talavou nofofua matutua ia avea talafaasolopito o aiga o se vaega o a latou galuega faalemalumalu?

Taiala Patino

• Feutagai ma le Tusitaulima Aoao: Auauna atu i Le Ekalesia a Iesu Keriso o le Au Paia o Aso e Gata Ai, 25.5, 26–27 mo aiaiga faavae e uiga i le auai i le malumalu ma valaauga i le malumalu. Manatua e mafai e talavou nofofua matutua ona “talanoa atu i le epikopo e uiga i le auauna atu” o ni tagata faigaluega o le malumalu (25.5.1).

• Pe a faia ni fuafuaga e auai i le malumalu, mafaufau pe faapefea ona fesoasoani i talavou nofofua matutua ia saunia ia maua se aafiaga lelei i le malumalu.

• Pe a fuafuaina se gaoioiga a TNM i le malumalu, ia vave faamaonia lou taimi faatulagaina ma le malumalu ma faailoa atu ia i latou soo se manaoga faapitoa atonu o i ai i lau vaega.

Filifiliga e Ono I Ai mo le Iloiloina ma le Atinaega

• Mafaufau e faatulaga se vasega sauniuni mo le malumalu mo talavou nofofua matutua o e o loo sauniuni mo le mauaina o o latou faaeega paia pe faamauina.

• Faatulaga se aafiaga masani o le malumalu mo talavou nofofua matutua e auai ai. Na aoao mai Peresitene Russell M. Nelson, e “fai sou taimi faatulagaina ma le Alii—ia i ai i totonu o Lona maota paia—ona tausia lea o lena taimi faatulagaina ma le sa’olele atoatoa ma le olioli” (“Avea ma Faataitaiga Lelei o le Au Paia o Aso e Gata Ai,” Liahona, Nov. 2018, 114).

• Fuafua ni autu o faigalotu, autu o sauniga faamanatuga, autu o afiafi faaleaiga, po o gaoioiga e faatatau i le malumalu po o talafaasolopito o aiga.

• Fefautuaai ma taitai perisitua i le lotoifale, e aofia ai le au peresitene o le malumalu, e uiga i auala e mafai ai e talavou nofofua matutua ona auai ma le mataalia atili i galuega faalemalumalu ma talafaasolopito o aiga i le lotoifale.

• Fuafua ni auala e faailoa atu ai i talavou nofofua matutua ia avanoa e auauna atu ai o ni tagata fai sauniga po o ni volenitia i le malumalu.

Konafesi a TNM

O konafesi a TNM e tuu i le faitalia, o gaoioiga tetele mo talavou nofofua matutua e faia i lalo o le taitaiga a le Au Peresitene o le Eria. O se konafesi a TNM e mafai ona faavae i luga o se autu e filifilia e se komiti o fuafuaga a TNM ma le au taitai i le lotoifale. E tatau ona aofia ai faigalotu, mafutaga faaleaoaoga, auaunaga, ma gaoioiga ua mamanuina e fesoasoani e faamalosia ai le faatuatua ia Iesu Keriso ma uunaia ai se lagona o le nuu faatasi ma isi talavou nofofua matutua.

O Ni Fesili e Mafai Ona Faaaoga mo Talanoaga

• Pe o lava ni talavou nofofua matutua e fiafia i ai i le eria e faia se konafesi mataalia?

• O a ni faamanuiaga o le fatuina o se konafesi a TNM?

• O a luitau i le talimalo i se konafesi a le TNM?

• Pe mafai ona avanoa le konafesi mo talavou nofofua matutua i fafo atu o le eria i le lotoifale?

• O a nisi manatu o le a fesoasoani ia i tatou e iloa ai pe o se vaifofo lenei e tatau ona tatou galulue ai?

Taiala Patino

• Maua le faamaoniga mai le Au Peresitene o le Eria e faatulaga ai se konafesi a TNM.

• Faavae se komiti o fuafuaga mo le konafesi a TNM.

• Faataga le komiti o fuafuaga a TNM ma le taitaiga i le lotoifale e taitaia le faatulagaina ma le faatinoina o le konafesi.

• Filifili se nofoaga talafeagai e fai ai le konafesi.

• Ia aofia ai aafiaga e uunaia ai fegalegaleaiga a talavou nofofua matutua ma fausia ai le faatuatua ia Iesu Keriso.

• Ia mautinoa o autu mo mafutaga faaleaoaoga ma faigalotu e talafeagai i le faitau aofai o TNM i le lotoifale.

• Ia lava ona vave faasilasila atu le konafesi mo talavou nofofua matutua e faatulaga ai e auai.

• Faataga mo se taimi avanoa i le taimi o le konafesi mo manatunatuga ma fegalegaleaiga faasamasamanoa.

A filifili Au Peresitene o Eria e faia se konafesi a TNM, faaaoga Taiala o le Konafesi a Talavou Nofofua Matutua e fesoasoani ai i taumafaiga o le fuafuaina.

Faigalotu a TNM

O faigalotu a TNM o ni mea tutupu e tuu i le faitalia e faia i lalo o le taitaiga a se epikopo, peresitene o le siteki, po o le Au Peresitene o le Eria. O faigalotu a TNM e masani ona aofia ai se tatalo, se viiga po o se musika filifilia, ma se savali talafeagai e faatotonugalemu i le talalelei e se tagata po o ni tagata ua filifilia.

O Ni Fesili e Mafai Ona Faaaoga mo Talanoaga

• O a ni faamanuiaga o le faia o faigalotu?

• O a ni luitau?

• O a manaoga o talavou nofofua matutua i la tatou eria e mafai ona talanoaina e ala i se faigalotu?

• Pe tatau ona fai faigalotu faafesagai ai o tagata, faasalalau, po o faigalotu uma e lua?

• O le a le faatulagaga (e pei o se lauga, talanoaga, po o se vaega) o le a sili ona aoga mo le savali ma le au maimoa e taulai i ai?

• E mafai faapefea ona maua e tagata uma ia faigalotu, e aofia ai i latou o e tautatala i isi gagana ma i latou e i ai manaoga faapitoa?

Taiala Patino

• Pe a fuafuaina se faigalotu, mafaufau i mea e fiafia i ai, manaoga, ma aafiaga o talavou nofofua matutua i le eria.

• O talavou nofofua matutua e tatau ona avea ma tagata autu e faatulagaina ma taitaia le faigalotu.

• E tatau i au peresitene o siteki, au epikopo, ma isi taitai ona lagolago ma faalauiloa atu le aafiaga a o lei tupu ma pe a maea foi ona faia.

• E mafai ona faia faigalotu i se tulaga faaleuarota, faalesiteki, po o ni siteki tuufaatasi.

Filifiliga e Ono I Ai mo le Iloiloina ma le Atinaega

• Mafaufau i mamanu o faatulagaga eseese. Aua le fefe e vailiili mamanu o faatulagaga e lei faataitaia muamua i la outou eria. Mo se faataitaiga:

  • Faapotopotoina o tagata e auai faafesagai

  • Potopotoga faatekinolosi

  • Talanoaga Faalaulauafono

  • Talanoaga Faavaega

  • Savali o le sitaili o sauniga faamanatuga

  • Pese faamusika

  • Mafutaga Faaleaoaoga

• O le autu o se faigalotu e tatau ona i ai i taimi uma se vaega faaleagaga ma fesoasoani e faalatalata atili atu ai talavou nofofua matutua ia Keriso. Mo se faataitaiga, o autu e mafai ona aofia ai mea nei:

  • O le galuega o le faaolataga ma le faaeaga

  • Autu faaleaoaoga autu faavae

  • O avanoa e auauna atu ai

  • Faafitauli faigata

  • Toe faaleleia o vaisu

  • Talafaasolopito o le Ekalesia

  • Sauniuniga mo faalavelave faafuasei

  • Ola tutoatasi

  • Soifua maloloina faalemafaufau ma le malosi faalelagona

  • Saogalemu o ala o faasalalauga

  • Uiga faa-Keriso

O se Nofoaga e Faapotopoto ai TNM

E fiafia talavou nofofua matutua ma a latou uo e faapotopoto ma auai i gaoioiga lelei ma aafiaga ia e faalatalata atili atu ai i latou i le tasi ma le isi ma i le Atua. O nofoaga mo le faapotopotoina, o se nofoaga lea ua atofa (e pei o se falelotu po o se fale o le inisitituti) lea e mafai ona faapotopoto ai talavou nofofua matutua ma a latou uo e auai ai i nisi po o mea uma nei:

• Aoaoga faalelotu ma le aoaoina o le talalelei (e pei o vasega inisitituti, Sau, Mulimuli Mai ia te A’u vaega e suesue ai, talanoaga o le talalelei, po o faigalotu)

• Auaunaga ma gaoioiga faaagafesootai (e pei o auaunaga i nuu ma auaunaga alofa, e aofia ai galuega faatino o le JustServe, o siva, o mea e tutupu faaleaganuu, po o vaega o afiafi faaleaiga)

• Gaoioiga o le malumalu ma talafaasolopito o aiga, e aofia ai sauniuniga mo le malumalu

• Avanoa mo le ola tutoatasi ma avanoa faaleaoaoga (e pei o kosi o le ola tutoatasi po o le BYU–Pathway Worldwide)

• Gaoioiga a faifeautalai (e pei o le faaaumeaina po o gaoioiga sauniuni mo le misiona)

• Gaoioiga e aapa atu i nuu (tagai “Fesootai ma Nuu: Faasoa Atu Punaoa a le Ekalesia,” ChurchofJesusChrist.org)

Mo nisi faamatalaga, tagai “Faatuina o se Nofoaga e Faapotopoto ai TNM” (ChurchofJesusChrist.org).

O Ni Fesili e Mafai Ona Faaaoga mo Talanoaga

• O le a le ituaiga o fegalegaleaiga faaagafesootai o le a fesoasoani i talavou nofofua matutua e atiina ae se lagona o le auai?

• E mafai faapefea e gaoioiga faaagafesootai ona faamalosia le faatuatua ia Iesu Keriso?

• E faapefea e le faatuina o se nofoaga mo talavou nofofua matutua ona faapotopoto e faamanuia ai i latou faaleagaga ma faaleagafesootai?

Taiala Patino

• E faaaoga e se peresitene o le siteki le komiti a TNM a le siteki (tagai Tusitaulima Aoao: Auauna atu i Le Ekalesia a Iesu Keriso o le Au Paia o Aso e Gata Ai, 14.1.1.2) e faatautaia ai se nofoaga e faapotopoto ai TNM. Mo nofoaga mo le faapotopotoina e auauna atu ai i siteki e tele, e mafai e lenei komiti ona aofia ai talavou nofofua matutua mai siteki taitasi.

• O le komiti a TNM a le siteki e mulimuli i taiala a le Ekalesia mo gaoioiga (tagai Tusitaulima Aoao, mataupu 20).

• Afai e avanoa i le komiti a TNM a le siteki se fale o le inisitituti, e faatino e le faatonu o le inisitituti (po o le taitai faamaopoopo) se matafaioi autu i le lagolagoina o le nofoaga e faapotopoto ai TNM.

• O tupe e faagaoioia ma tupe faaalu o le paketi e sau mai le paketi a le siteki (po o siteki) a TNM (tagai Tusitaulima Aoao, 14.2.1.3), e faaopoopo mai i ai le paketi a le eria pe a manaomia ai.