Anaa na nga mga Kapanguhaan sa Simbahan ug mga Solusyon

Ikonsiderar ang mosunod nga mga kapanguhaan ug mga solusyon samtang maghimo kamo sa inyong plano sa YSA. Alang sa matag kapanguhaan sa ubos, ang giya gihatag kon unsa ka paspas makapasibo ang mga sakop sa komitiba sa YSA alang sa pagpahiangay niini nga mga solusyon.

Mga Yunit sa Simbahan

Ang mga yunit sa simbahan (mga branch, mga district, mga ward, ug mga stake) mohatag og mga oportunidad sa mga young single adult sa pag-apil sa buhat sa kaluwasan ug kahimayaan (tan-awa sa Mga Taga-Efeso 4:11–13). Niini nga mga yunit, ang mga young single adult magpundok kanunay aron sa pagsimba sa Dios, pagpalambo sa hugot nga pagto diha ni Jesukristo, pagdawat sa mga ordinansa, pakighalubilo, ug pagkaplag og kalig-on atol sa espirituwal ug temporal nga mga hagit (tan-awa sa Moroni 6:4–6).

Kon kamo naapil sa usa ka yunit sa YSA, tan-awa sa “Mga Yunit sa YSA” alang sa mga ideya nga mahimo ninyong ikonsiderar.

Posibleng mga Pangutana nga Pagahisgotan

• Sa unsang paagi nga ang mga yunit sa Simbahan diha sa atong dapit nagsuporta sa mga young single adult?

• Sa unsang paagi nga atong mapalambo ang kasinatian sa YSA diha sa atong mga yunit sa Simbahan?

• Makahimo ba kita og dugang pa aron magkasuod ang mga young single adult diha sa atong mga ward ngadto sa mga young single adult diha sa stake o rehiyon?

• Aduna ba kitay usa ka dapit diin ang mga young single adult mahimong magpundok (usa ka meetinghouse o institute building)?

• Aduna bay mga oportunidad ang mga young single adult alang sa makahuloganong pagserbisyo diha sa atong mga yunit sa Simbahan?

Piho nga mga Lagda

• Hinumdomi ang kapasidad, kalig-on, ug impluwensya sa mga young single adult ug ang epekto nga mahimo nila diha sa mga yunit sa Simbahan. Ang mga young single adult makaserbisyo sa kadaghanan sa mga calling (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 14.0).

• Ikonsiderar ang nagkalainlaing indibidwal nga mga panginahanglan ug mga kasinatian sa mga young single adult ug kon unsaon pagsuporta niadtong daw mibati nga nalahi diha sa yunit sa ilang ward.

• Siguroha nga ang tanang young single adult nailhan ug naatiman.

Posible nga mga Opsiyon alang sa Pagkonsiderar ug Pagpalambo

• Ikonsiderar ang mga paagi sa paghiusa sa mga young single adult diha sa ikaduhang oras nga mga kasinatian (tan-awa sa “Ikaduhang Oras”).

• Awhaga ug pakigtambayayong sa lokal nga mga lider nga iapil ang mga young single adult diha sa pagserbisyo ug pagpalig-on sa mga yunit diin sila nagsimba (tan-awa sa “Mga Calling sa Simbahan”).

• Pagmugna og kasinatian nga gidesinyo aron sa pagdani sa mga young single adult nga sa kasamtangan anaa sa ward o stake. Pananglitan:

  • Usa ka ward diha sa stake nga gitudlo aron matambongan sa mga young single adult

  • Sinemana nga mga kalihokan

  • Usa ka binulan nga panagtigom alang sa pagpamatuod

  • Sinemana o binulan nga mga oportunidad sa pagserbisyo

  • Usa ka lokal nga dapit nga kapundokan (tan-awa sa “Establishing a YSA Gathering Place,” ChurchofJesusChrist.org)

• Pakigtambayayong sa lokal nga mga lider sa pagsugyot sa pagmugna og usa ka yunit sa YSA kon sa inyong pamati mao kana ang labing maayo nga paagi sa paglig-on sa mga young single adult sa inyong dapit (tan-awa sa “YSA nga mga Yunit”).

Mga Lakang nga Pagahimoon

1. Aprobahan ang mga kausaban pinaagi sa tukma nga mga komitiba sa mga lider.

2. Magmugna og usa ka plano aron ipahibalo ang mga kausaban ngadto sa mga young single adult nga nag-apil sa mga yunit sa ilang ward.

Mga Yunit sa YSA

Ang mga ynuit sa YSA maghatag og mga oportunidad sa mga young single adult sa pagsimba og dungan ug pag-apil sa buhat sa kaluwasan ug kahimayaan uban sa isigka-Santos diha sa susama nga yugto sa kinabuhi (tan-awa sa Mga Taga-Efeso 4:13). Niini nga mga yunit, ang mga young single adult magpundok kanunay aron sa pagsimba sa Dios, pagpalambo sa hugot nga pagto diha ni Jesukristo, pagdawat sa mga ordinansa, pakighalubilo, ug pagkaplag og kalig-on atol sa espirituwal ug temporal nga mga hagit (tan-awa sa Moroni 6:4–6).

Posibleng mga Pangutana nga Pagahisgotan

• Unsa ang mga benepisyo ug mga hagit sa pagbaton og usa ka yunit sa YSA?

• Nganong ang mga young single adult mipili man nga motambong o dili motambong sa usa ka yunit sa YSA?

• Unsaon man nato sa pagpalambo ang kasinatian sa atong yunit sa YSA?

• Unsaon nato sa pagpaapil sa mga young single adult nga nagtambong sa mga yunit sa ilang ward diha sa mga kalihokan sa mga yunit sa YSA?

• Unsaon nato sa pagsiguro nga ang mga kalihokan diha sa mga yunit sa ilang ward ug sa mga yunit sa YSA dili magkompetensiya?

Piho nga mga Lagda

• Ayaw paghimo og usa ka bag-ong mga yunit sa YSA kon wala ang mosunod nga proseso sa pagtugot alang sa bag-ong mga yunit (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 37.2). Kon ang usa ka yunit sa YSA kinahanglang himoon, pakigtambayayong sa inyong presidente sa stake.

Posible nga mga Opsiyon alang sa Pagkonsiderar ug Pagpalambo

• I-transisyon ang mga young single adult isip usa ka grupo (pananglitan, pagka Enero 1) imbes sa mga adlawng natawhan.

• Mag-establisar og hinusa nga mga yunit alang sa mga minyo ug wala pa maminyo nga mga young adult (komon kaayo diha sa kahimtang sa unibersidad).

Mga Lakang nga Pagahimoon

Pakigtambayayong sa mga lider sa stake sa:

1. Pagtino sa mga utlanan sa kasamtangan nga mga yunit ug kon sa unsang paagi nga ang gitinguha nga mga kausaban mahimong makaapekto niini.

2. Pagkompleto sa pag-assess sa mga miyembro sa naapektohan nga mga yunit.

3. Pagkompleto sa paghan-ay sa gidaghanon aron sa pagsiguro nga mabalanse ang mga miyembro sa matag yunit.

4. Pagkompleto sa porma sa Aplikasyon sa Pag-organisar sa Ward o Branch alang sa tanang gisugyot nga mga kausaban (makita diha sa Leader and Clerk Resources).

Mga Calling sa Simbahan

Ang mga young single adult dako kaayo og matabang sa gingharian sa Dios. Sila nagdala usab og talagsaong mga panglantaw ug mga kasinatian nga makapanalangin ug makapalig-on sa tanang miyembro sa Simbahan. Sila makaserbisyo sa bisan unsa nga calling diha sa stake gawas sa pagkahimong bishop, presidente sa stake, o patriyarka sa stake.

Posibleng mga Pangutana nga Pagahisgotan

• Unsa nga bag-o ug makahuloganon nga mga calling o mga buluhaton ang magtugot sa mga young single adult sa pag-apil diha sa buhat sa kaluwasan ug kahimayaan?

• Sa unsang paagi nga kita makatabang sa mga young single adult nga mobati nga gikinahanglan diha sa mga calling nga anaa nila?

• Asa man ang mga young single adult nga sa kasamtangan wala kaayo magamit?

• Unsa nga mga matang sa mga calling, mga buluhaton, o mga oportunidad sa pagserbisyo nga lagmit dawaton niadtong wala moapil?

Piho nga mga Lagda

• Likayi ang pagmugna og mga calling nga dili makahuloganon. Ang “makahuloganon” mangahulogan og lainlaing mga butang ngadto sa lainlaing mga tawo, apan ang tanan kinahanglang mobati nga sila gikinahanglan kon asa sila nagserbisyo.

• Sugdi pinaagi sa pagpokus diha sa mga calling sa ward ug stake nga makabenepisyo gikan sa impluwensya sa mga young single adult.

• Diha sa mga yunit sa YSA, tawaga ang mga young single adult ngadto sa kadaghanan nga mga posisyon sa pagpangulo (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 37.2.2, 37.3.2).

Posible nga mga Opsiyon alang sa Pagkonsiderar ug Pagpalambo

• Awhaga ang mga lider sa pagkonsiderar sa mga young single adult kon mangita og mga tawo nga makaserbisyo sa usa ka calling, lakip na sa mga calling sa pagpangulo.

• Siguroha nga ang matag young single adult adunay buluhaton sa pagpangalagad.

• Ikonsiderar ang nagkalainlaing mga oportunidad alang sa mga young single adult sa pagserbisyo diha sa templo, pag-apil sa buhat sa family history, ug sa pagpaambit sa ebanghelyo ngadto sa uban.

• Ikonsiderar ang mga calling ug mga buluhaton nga makapalugway sa impluwensya sa mga young single adult ngadto sa mas halapad nga komunidad.

Ikaduhang Oras

Ang ikaduhang oras sa miting sa Dominggo kinahanglang makatabang sa mga young single adult nga mapalig-on ang ilang hugot nga pagtuo diha sa Langitnong Amahan ug ni Jesukristo, mapalambo ang ilang pagsabot sa ebanghelyo, ug mobati nga nahisakop ug adunay koneksyon, ug makadayeg sa kamahinungdanon sa ebanghelyo diha sa ilang kinabuhi.

Posibleng mga Pangutana nga Pagahisgotan

• Unsa ang mas gusto nga mga resulta alang sa ikaduhang oras nga mga kasinatian? Unsa nga mga kasinatian niini nga mga miting sa Simbahan ang labing epektibong makapatuman niini nga mga resulta?

• Unsa ang mga panginahanglan sa mga young single adult nga mahimong matubag diha sa ikaduhang oras nga mga miting?

• Unsa ang mga hagit sa atong kasamtangang ikaduhang oras nga kasinatian?

• Unsaon nato nga makahimo og kasinatian sa ikaduhang oras nga madanihon ug maapilan sa tanang young single adult (dili igsapayan ang kalig-on sa hugot nga pagtuo, estilo sa pagkat-on, o kasinatian sa kinabuhi)?

Piho nga mga Lagda

• Gamita ang sama nga kurikulom sa kasulatan ug doktrina nga gigamit sa ubang mga miyembro sa Simbahan.

• Ipadayon ang luwas nga palibot diin ang tanan giawhag sa pakighalubilo ug pag-apil.

• Siguroha nga ang mga miyembro adunay nagkalainlaing mga opsiyon sa magtutudlo ug klase.

• Sunda ang giaprobahan nga sundanan sa miting sa Simbahan (gisagol nga mga grupo alang sa Sunday School nga mga semana ug ang korum sa mga elder ug Relief Society sa gisangon nga mga semana).

• Ikonsiderar kon sa unsang paagi nga ang potensiyal nga mga kausaban makaapekto sa mga young single adult nga anaa sa mga yunit sa ilang ward ug sa YSA.

Posible nga mga Opsiyon alang sa Pagkonsiderar ug Pagpalambo

• Paghimo og mas gagmay nga mga klase nga gipahiangay aron sa pagsuporta sa lainlaing mga estilo sa pagkat-on, pag-awhag og mahinungdanon nga mga diskusyon ug mga kasinatian sa pagpaambit, ug pagmugna og makahuloganong sosyal nga mga koneksyon. Ang mga ehemplo naglakip sa mosunod:

  • Mga klase nga nagpokus sa pagserbisyo

  • Mga klase nga nagpokus sa musika

  • Mga klase nga nagpokus sa multimedia

• Paghimo og virtual o hybrid nga mga klase aron kadtong dili personal nga makatambong makaapil gihapon sa pagkat-on sa ebanghelyo.

• Paggahin og usa ka ikalima nga Dominggo nga maghatag og espesyal nga pagpasabot bahin sa mga hilisgotan nga may kalabotan sa lokal nga mga young single adult. Ang mga ehemplo naglakip sa mosunod:

  • Sigon sa hilisgotan ug potensyal nga mahagiton nga mga isyu

  • Pagbarog pinaagi sa kinaugalingong pagpaningkamot

  • Pagpaayo gikan sa pagkaadik

Aprobahan ang mga kausaban sa ikaduhang oras nga mga miting pinaagi sa tukmang mga konseho sa pagpangulo ug maghimo og plano sa pagpahibalo sa mga kausaban ngadto sa mga young single adult.

Institute

Ang programa sa institute of religion naghatag og mga oportunidad alang sa mga young single adult sa pagtuman sa imbitasyon sa Manluluwas nga “motudlo sa usag usa sa doktrina sa gingharian” (Doktrina ug mga Pakigsaad 88:77) pinaagi sa atol sa semana nga mga klase sa pagtuon sa ebanghelyo.

Ang institute usa ka programa nga nakasentro ni Kristo, gibase sa kasulatan, ug nagpokus sa tigkat-on nga gituyo aron sa pagtabang sa mga partisipante nga mas mapaduol ngadto sa Dios, malig-on ang ilang hugot nga pagtuo diha ni Kristo ug sa Iyang gipahiuli nga ebanghelyo, ug molambo subay sa dalan sa pakigsaad (tan-awa sa Josue 1:8; Juan 5:39; 2 Nephi 31:21).

Posibleng mga Pangutana nga Pagahisgotan

• Unsa ang gitudlo sa mga lider sa Simbahan mahitungod sa kaimportante sa institute ug pagkat-on sa ebanghelyo?

• Unsa ang mga matang sa mga kasinatian nga nasinati sa lokal nga mga young single adult diha sa institute?

• Sa unsang paagi nga ang programa sa institute mahimong ipahiangay nga mahimo kining mas mahinungdanon ug maapilan sa lokal nga mga young single adult?

• Nakaila ba kita sa atong lokal nga mga kawani sa Seminaries and Institutes of Religion (S&I)? Unsa ang ilang tahas diha sa atong mga miting sa komitiba sa YSA?

Piho nga mga Lagda

• Ang tanang young single adult nga nag-edad og 18–30 giawhag nga moapil sa mga klase sa institute nag-eskwela man sila o wala.

• Ang mga programa sa institute of religion giestablisar ubos sa direksyon sa mga lider sa pagkapari ug mga kawani sa S&I aron matubag ang mga panginahanglan sa mga young single adult.

• Ang mga presidente sa stake mahimong moestablisar og nakabase sa stake nga mga klase sa institute diha sa mga dapit diin walay nakabase sa kampus nga mga klase.

• Ang nakabase sa stake nga mga programa sa institute sa kinatibuk-an nagpokus sa mga panginahanglan sa mga young single adult nga dili mga estudyante sa kolehiyo. Sila mohatag og gibug-aton sa pagtambong ug pagkat-on kaysa pagbaton og grado.

• Ang mga estudyante mahimong mokompleto sa mga kinahanglanon sa kurso aron makagradwar sa institute o makabaton og grado nga mabalhin ngadto sa usa ka unibersidad sa Simbahan.

• Ang ubang mga young single adult tingali nangandoy nga makabaton og diploma sa paggradwar sa institute, ug ang uban tingali wala. Ang mga panginahanglan sa mga young single adult, dili sa mga kinahanglanon sa paggradwar, kinahanglang moimpluwensya kon unsa ang programa sa institute diha sa inyong dapit.

Posible nga mga Opsiyon alang sa Pagkonsiderar ug Pagpalambo

• Ang mga stake mahimong maghiusa aron sa pagtanyag og mga klase sa institute diha sa multistake nga lebel.

• Ang mga young single adult tingali mainteresado sa “gabii sa institute” diin ang mga klase giparesan og pagkaon o sosyal nga kalihokan.

• Ikonsiderar kon unsaon nga ang institute mahimong isagol ngadto sa usa ka dapit nga pundokanan sa lokal nga YSA.

• Pag-usisa og mga pagpahiangay ngadto sa mga klase sa institute, sama sa adlaw ug oras, gidugayon sa klase, gidaghanon sa mga semana nga ipahigayon ang klase, mga workshop bahin sa espesyal nga mga hilisgotan, ug uban pa.

Mga Lakang nga Pagahimoon

1. Maminaw sa mga young single adult aron makasabot kon unsay ilang kasinatian sa institute ug kon unsaon nga mapalambo kini.

2. Pakigtambabayong sa mga kapangulohan sa stake ug sa lokal nga mga kawani sa S&I sa pag-organisar o pagpahiangay sa usa ka programa sa institute nga labing makatubag sa mga panginahanglan sa mga young single adult sa inyong dapit.

Pagserbisyo

Ang mga young single adult kinahanglang makadawat og pormal ug dili pormal nga mga oportunidad nga “matinguhaon nga moapil diha sa usa ka maayo nga katuyoan” (Doktrina ug mga Pakigsaad 58:27) ug mohimo og tinuod nga kalainan diha sa mga kawsa nga ganahan kaayo nila.

Posibleng mga Pangutana nga Pagahisgotan

• Sa unsang paagi nga ang JustServe magamit sa pagtabang sa mga young single adult sa atong dapit sa pag-ila og makahuloganong mga oportunidad sa pagserbsiyo? (Gamita kini nga link sa pagkontak sa representante sa JustServe diha sa inyong dapit.)

• Sa unsang paagi nga ang makahuloganong pagserbisyo makaapekto sa positibong paagi sa mga young single adult?

• Unsa ang mga hagit sa pagpangita og makahuloganong mga oportunidad sa pagserbsiyo?

• Unsa nga mga matang sa mga oportunidad sa pagserbisyo ang labing makaapekto sa atong lokal nga mga komunidad?

• Unsa nga mga grupo ang atong ikatambayayong?

• Sa unsang paagi nga kita makatabang sa pagpalig-on sa mga relasyon samtang kita nagserbisyo?

Piho nga mga Lagda

• Likayi ang mga oportunidad sa pagserbisyo nga dili makahuloganon (walay igong trabahoon aron makaapil ang tanan).

• Tugoti ang mga young single adult sa pagpili og mga oportunidad sa pagserbisyo kanunay kutob sa mahimo.

• Siguroha nga ang mga young single adult ang mangulo sa paningkamot.

Posible nga mga Opsiyon alang sa Pagkonsiderar ug Pagpalambo

• Mogamit o mopalapad sa anaa na nga mga kapanguhaan sa Simbahan ug komunidad, sama sa JustServe, mga kurso sa pagbarog pinaagi sa kinaugalingong pagpaningkamot, sa programa sa pagpaayo gikan sa pagkaadik, buhat sa templo ug family history, o EnglishConnect.

• Makig-uban sa laing mga ward, mga branch, ug mga stake diha sa mga proyekto.

• Makig-uban sa laing mga organisasyon sa relihiyon, mga gobyerno, o dili pangnegosyo diha sa dagkong anaa na nga mga inisyatiba sa komunidad.

• Motabang sa komunidad pinaagi bag-ong dagko nga inisyatiba (sama sa pagtukod og soup kitchen).

• Mopalapad og mga oportunidad alang sa full-time o part-time nga pangserbisyo nga mga misyonaryo.

• Mopalapad sa mga calling nga nagbase sa pagserbisyo (tan-awa sa “Mga Calling sa Simbahan”).

• Himoong pormal ang nagpadayon nga mga proyekto (sama sa pagtudlo, pagbansay, o binulan nga pagpuli-puli og serbisyo diha sa usa ka food bank).

Pagserbisyo ug Pagsimba diha sa Templo

Si Presidente Nelson mitudlo, “Ang positibo nga espirituhanong paglambo mosaka samtang kita mosimba diha sa templo. … Ako mohangyo kaninyo sa pagbatok sa kalibotanon nga mga paagi pinaagi sa pagpunting sa mahangtoron nga mga panalangin sa templo. Ang inyong panahon didto magdala og mga panalangin alang sa kahangtoran” (“Karon Mao ang Panahon,” Liahona, Mayo 2022, 126).

Kon ang mga young single adult magpundok diha sa templo, bation nila ang paglaom, kalinaw, ug gugma, ug madawat nila ang kahayag nga ilang kinahanglanon sa pagbuntog sa mga hagit nga ilang giatubang.

Posibleng mga Pangutana nga Pagahisgotan

• Sa unsang paagi nga ang pagsimba ug pagserbisyo diha sa templo makatabang sa mga young single adult sa mga hagit nga ilang giatubang?

• Unsay makapugong sa mga young single adult sa pagsimba ug pagserbisyo diha sa templo? Sa unsang paagi kita makatabang?

• Unsa ang atong ikatudlo aron matabangan ang mga young single adult nga makakaplag og dugang nga kalig-on sa ilang kinabuhi pinaagi sa pagsimba ug pagserbisyo diha sa templo?

• Sa unsang paagi nga kita makatabang sa mga young single adult nga makadawat sa mga pakigsaad sa templo ug magpabilin diha sa dalan sa pakigsaad?

• Sa unsang paagi nga kita makaawhag sa mga young single adult sa pagpundok ug pagserbisyo diha sa templo?

• Sa unsang paagi nga kita makatabang sa mga young single adult nga ang family history mahimong kabahin sa ilang buhat sa templo?

Piho nga mga Lagda

• Konsultaha ang Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 25.5, 26–27 alang sa mga palisiya mahitungod sa pagtambong sa templo ug mga calling sa templo. Hinumdomi nga ang mga young single adult mahimong “moduol sa bishop mahitungod sa pagserbisyo” isip mga worker sa templo (25.5.1).

• Kon maghimo og mga plano sa pagtambong sa templo, ikonsiderar kon unsaon pagtabang sa mga young single adult sa pag-andam nga makabaton og maayong kasinatian diha sa templo.

• Kon magplano og kalihokan sa YSA didto sa templo, ikompirmar daan ang inyong appointment ngadto sa templo ug pahibaloa sila bahin sa bisan unsang espesyal nga mga panginahanglan sa inyong grupo.

Posible nga mga Opsiyon alang sa Pagkonsiderar ug Pagpalambo

• Ikonsiderar ang pag-organisar og klase sa pagpangandam alang sa templo alang sa mga young single adult nga nag-andam sa pagdawat sa pagtuga ug pagsilyo.

• Pag-organisar og regular nga kasinatian sa templo nga apilan sa mga young single adult. Si Presidente Russell M. Nelson nagtudlo, “Paghimo og regular nga pakigkita sa Ginoo—moadto sa Iyang balaan nga balay—dayon tumanon kanang pakigkita nga hingpit ug malipayon” (“Ang Mahimong Labing Dalaygon nga mga Santos sa Ulahing mga Adlaw,” Liahona, Nob. 2018, 114).

• Pagplano og mga hilisgotan sa debosyonal, mga hilisgotan sa panagtigom alang sa sakramento, mga hilisgotan sa home evening, o mga kalihokan kalabot sa templo o family history.

• Pakigtambag sa lokal nga mga lider sa pagkapari, lakip na sa kapangulohan sa templo, mahitungod sa mga paagi nga ang mga single adult mahimong mas aktibong moapil sa buhat sa lokal nga templo ug family history.

• Pagplano og mga paagi sa pagpahibalo sa mga young single adult bahin sa mga oportunidad sa pagserbisyo isip mga ordinance worker o mga boluntaryo diha sa templo.

Mga Komperensiya sa YSA

Ang mga komperensiya sa YSA opsiyonal, dinagko nga mga kalihokan alang sa young single adult nga gipahigayon ubos sa direksyon sa Kapangulohan sa Area. Ang usa ka komperensiya sa YSA mahimong gibase sa usa ka tema nga gipili sa tigplano nga komitiba sa YSA ug sa lokal nga mga lider. Kini kinahanglang maglakip og mga debosyonal, mga workshop, pagserbisyo, ug mga kalihokan nga gidesinyo aron sa pagtabang sa paglig-on sa hugot nga pagtuo diha ni Jesukristo ug pagpasiugda og pagbati nga usa ka komunidad uban sa laing mga young single adult.

Posibleng mga Pangutana nga Pagahisgotan

• Aduna bay igong interesado nga mga young single adult diha sa dapit aron sa pagpahigayon og epektibong komperensiya?

• Unsa kaha ang mga kaayohan sa paghimo og usa ka komperensiya sa YSA?

• Unsa ang mga hagit sa pagpasiugda og komperensiya sa YSA?

• Ang komperensiya makapaapil ba sa mga young single adult sa gawas sa lokal nga dapit?

• Unsa ang uban pang mga konsiderasyon nga makatabang nato nga mahibalo kon kini mao ba ang solusyon nga kinahanglan natong buhaton?

Piho nga mga Lagda

• Modawat og pagtugot gikan sa Kapangulohan sa Area aron sa pag-organisar og usa ka komperensiya sa YSA.

• Moestablisar og usa ka tigplano nga komitiba sa komperensiya sa YSA.

• Motugot sa tigplano nga komitiba sa YSA ug sa lokal nga mga lider nga maoy mangulo sa pag-organisar ug pag-implementar sa komperensiya.

• Mopili og tukmang lugar aron ipahigayon ang komperensiya.

• Molakip sa mga kasinatian nga makapasiugda og pakighalubilo tali sa mga young single adult ug makapalig-on sa hugot nga pagtuo diha ni Jesukristo.

• Mosiguro nga ang mga hilisgotan alang sa mga workshop ug mga debosyonal mahinungdanon ngadto sa lokal nga populasyon sa YSA.

• Mopahibalo nang daan sa layo pa ang komperensiya aron ang mga young single adult makapahimutang aron sa pag-apil.

• Mogahin og libreng oras atol sa komperensiya alang sa pagpamalandong ug dili pormal nga pakighalubilo.

Kon ang mga Kapangulohan sa Area mopili sa pagpahigayon og komperensiya sa YSA, gamita ang Mga Lagda sa Komperensiya sa Young Single Adult aron sa pagtabang sa mga paningkamot sa pagplano.

Mga Debosyonal sa YSA

Ang mga debosyonal sa YSA mao ang opsiyonal nga mga kalihokan nga gipahigayon ubos sa direksyon sa bishop, presidente sa stake, o Kapangulohan sa Area. Ang mga debosyonal sa YSA kasagaran maglakip sa usa ka pag-ampo, usa ka himno o gipili nga musika, ug usa ka mahinungdanong mensahe nga nakasentro sa ebanghelyo pinaagi sa pinili nga indibidwal o mga indibidwal.

Posibleng mga Pangutana nga Pagahisgotan

• Unsa kaha ang mga kaayohan sa paghimo og mga debosyonal?

• Unsa ang mga hagit?

• Unsa ang mga panginahanglan sa mga young single adult sa atong dapit nga mahimong matubag pinaagi sa usa ka debosyonal?

• Kinahanglan ba nga ang debosyonal personal nga tambongan, isibya, o pareho?

• Unsa nga pamaagi (sama sa usa ka pakigpulong, diskusyon, o panel) ang labing epektibo alang sa mensahe ug gitumong nga mga tigpaminaw?

• Unsaon nga ang mga debosyonal maapilan sa tanan, lakip na niadtong lahi og pinulongan ug niadtong adunay mga kakulian sa panglawas?

Piho nga mga Lagda

• Kon magplano og usa ka debosyonal, ikonsiderar ang mga ganahan, mga panginahanglan, ug mga kasinatian sa mga young single adult diha sa dapit.

• Ang mga young single adult kinahanglang mao ang mag-unang mga tig-organisar ug mga lider sa debosyonal.

• Ang mga kapangulohan sa stake, mga bishopric, ug ang ubang mga lider kinahanglang mosuporta ug mopasiugda sa kasinatian sa dili pa ug human kini ipahigayon.

• Ang mga debosyonal mahimong ipahigayon diha sa lebel sa ward, stake, o multistake.

Posible nga mga Opsiyon alang sa Pagkonsiderar ug Pagpalambo

• Ikonsiderar ang nagkalainlaing mga pamaagi. Ayaw kahadlok nga mousisa og mga pamaagi nga wala pa masulayi kaniadto sa inyong dapit. Pananglitan:

  • Personal nga tambongan nga pagpundok

  • Virtual nga pagpundok

  • Panel nga mga diskusyon

  • Grupo nga mga diskusyon

  • Mga mensahe sama sa estilo sa panagtigom alang sa sakramento

  • Mga pasundayag sa musika

  • Mga workshop

• Ang hilisgotan sa usa ka debosyonal kinahanglang sa kanunay adunay espirituhanong bahin ug makatabang sa mga young single adult nga mas mapaduol ngadto ni Kristo. Pananglitan, ang mga hilisgotan mahimong maglakip sa mosunod:

  • Ang buhat sa kaluwasan ug kahimayaan

  • Doktrinal nga mga hilisgotan

  • Mga oportunidad sa pagserbisyo

  • Mahagiton nga mga isyu

  • Pagpaayo gikan sa pagkaadik

  • Kasaysayan sa Simbahan

  • Pagpangandam alang sa emerhensiya

  • Pagbarog pinaagi sa kinaugalingong pagpaningkamot

  • Kahimsog sa pangisip ug emosyonal nga kalig-on [emotional resilience]

  • Kasiguroan sa media

  • Kristohanong mga hiyas

Usa ka Dapit nga Kapundokan sa mga YSA

Ang mga young single adult ug ang ilang mga higala ganahan nga magpundok ug moapil diha sa nindot nga mga kalihokan ug mga kasinatian nga makapasuod sa usag usa nila ug ngadto sa Dios. Ang dapit nga kapundokan usa ka gitudlo nga lugar (diha sa usa ka anaa na nga meetinghouse o institute building) alang sa mga young single adult ug sa ilang mga higala nga magpundok ug moapil sa usa o mas daghan sa mosunod:

• Relihiyoso nga edukasyon ug pagkat-on sa ebanghelyo (sama sa institute nga mga klase, Dali, Sunod Kanako nga mga grupo sa pagtuon, mga panaghisgotan sa ebanghelyo, o mga debosyonal)

• Pagserbisyo ug sosyal nga mga kalihokan (sama sa pagserbisyo sa komunidad ug makitawhanon nga pagserbisyo, lakip na ang JustServe nga mga proyekto, mga sayaw, pang-kultura nga mga kalihokan, o home evening nga mga grupo)

• Mga kalihokan sa templo ug family history, lakip na ang pagpangandam alang sa templo

• Pagbarog pinaagi sa kinaugalingong pagpaningkamot ug mga oportunidad sa edukasyon (sama sa mga kurso bahin sa pagbarog pinaagi sa kinaugalingong pagpaningkamot o BYU–Pathway Worldwide)

• Mga kalihokan sa misyonaryo (sama sa mga kalihokan sa pagpakigdait o pagpangandam alang sa misyon)

• Mga kalihokan sa pagtabang sa komunidad (tan-awa sa “Connect with Communities: Share Church Resources,” ChurchofJesusChrist.org)

Alang sa dugang nga impormasyon, tan-awa sa “Establishing a YSA Gathering Place” (ChurchofJesusChrist.org).

Posibleng mga Pangutana nga Pagahisgotan

• Unsa nga matang sa sosyal nga inter-aksiyon ang makatabang sa mga young single adult nga mapalambo ang pagbati nga nahisakop?

• Sa unsang paagi nga ang sosyal nga mga kalihokan makapalig-on sa hugot nga pagtuo diha ni Jesukristo?

• Sa unsang paagi nga ang pag-establisar og usa ka dapit alang sa mga young single adult aron magpundok makapanalangin nila sa espirituwal ug sosyal nga paagi?

Piho nga mga Lagda

• Ang usa ka presidente sa stake mogamit sa komitiba sa YSA sa stake (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 14.1.1.2) aron sa pagdumala sa usa ka dapit nga kapundokan sa mga YSA. Alang sa mga dapit nga kapundokan nga moserbiyo og dinaghan nga mga stake, kini nga komitiba makapaapil og mga young single adult gikan sa matag stake.

• Ang komitiba sa YSA sa stake mosunod sa mga lagda sa Simbahan alang sa mga kalihokan (tan-awa sa Kinatibuk-ang Tamdanan nga Basahon, kapitulo 20).

• Kon ang komitiba sa YSA sa stake makagamit sa institute building, ang direktor sa institute (o koordinitor) adunay importanting tahas sa pagsuporta sa dapit nga kapundokan sa mga YSA.

• Ang gamiton nga mga pundo ug badyet sa mga galastohan magagikan sa badyet sa YSA sa stake (o mga stake) (tan-awa sa Kinatibuk-ang Tamdanan nga Basahon, 14.2.1.3), suportahan sa badyet sa area kon gikinahanglan.