Kau Taautaha Lalahi Kei Talavoú
Ngaahi Maʻuʻanga Tokoni mo e Ngaahi Founga Fakaleleiʻi Lolotonga ʻa e Siasí

“Ngaahi Maʻuʻanga Tokoni mo e Ngaahi Founga Fakaleleiʻi Lolotonga ʻa e Siasí,” Ko Hono Fakamālohia ʻo e Kau Taautaha Lalahi Kei Talavoú (2022)

ʻĪmisi
hiva ʻa e kakaí

Ngaahi Maʻuʻanga Tokoni mo e Ngaahi Founga Fakaleleiʻi Lolotonga ʻa e Siasí

Fakakaukau ki he ngaahi maʻuʻanga tokoni mo e ngaahi founga fakaleleiʻi ko ʻení ʻi hoʻo faʻu hoʻo palani ki he YSA. Ki he maʻuʻanga tokoni takitaha ʻi laló, ʻoku ʻoatu ha fakahinohino ki hono lahi ʻo e feliliuaki ʻoku lava fakahoko ʻe he kau mēmipa ʻo e kōmiti YSA ki hono fakafeʻungaʻi ʻo e ngaahi founga fakaleleiʻi ko ʻení.

Ngaahi ʻIuniti ʻo e Siasí

ʻOku ʻomi ʻe he ngaahi ʻiuniti ʻo e Siasí (ngaahi koló, vahefonuá, uōtí, mo e ngaahi siteikí) ha ngaahi faingamālie ki he kau taautaha lalahi kei talavoú ke nau moihū mo kau ʻi he ngāue ʻo e fakamoʻuí mo e hakeakiʻí (vakai, ʻEfesō 4:11–13). ʻI he ngaahi ʻiuniti ko ʻení, ʻoku fakataha maʻu pē ʻa e kau taautaha lalahi kei talavoú ke moihū ki he ʻOtuá, fakatupulaki ʻa e tui kia Sīsū Kalaisí, maʻu ʻa e ngaahi ouaú, feohi, mo maʻu ha mālohi lolotonga e ngaahi pole fakalaumālie mo fakatuʻasinó (vakai, Molonai 6:4–6).

Kapau ʻokú ke kau ki ha ʻiuniti ʻo e YSA, vakai ki he “Ngaahi ʻIuniti ʻo e YSA” ki ha ngaahi fakakaukau te ke lava ʻo fakakaukauʻi.

Ngaahi Fehuʻi ʻe Ala Aleaʻí

  • ʻOku poupouʻi fēfē ʻe he ngaahi ʻiuniti ʻo e Siasí ʻi homou feituʻú ʻa e kau taautaha lalahi kei talavoú?

  • ʻE founga fēfē haʻatau fakaleleiʻi e aʻusia ʻa e YSA ʻi hotau ngaahi ʻiuniti ʻi he Siasí?

  • Te tau lava nai ʻo fai ha meʻa lahi ange ke fakafehokotaki ʻa e kau taautaha lalahi kei talavou ʻi hotau ngaahi uōtí ki he kau taautaha lalahi kei talavou ʻi he siteikí pe vahefonuá?

  • ʻOku ʻi ai nai haʻatau feituʻu ʻe lava ke fakataha ki ai e kau taautaha lalahi kei talavoú (ko ha ʻapisiasi pe fale ʻinisititiuti)?

  • ʻOku maʻu nai ʻe he kau taautaha lalahi kei talavoú ha ngaahi faingamālie ke fai ai ha ngāue tokoni ʻuhingamālie ʻi hotau ngaahi ʻiuniti faka-Siasí?

Ngaahi Fakahinohino Paú

  • Manatuʻi ʻa e ivi malava, mālohi, mo e ivi tākiekina ʻo e kau taautaha lalahi kei talavoú pea mo e ʻaonga ʻe lava ke nau fakahoko ʻi he ngaahi ʻiuniti ʻo e Siasí. ʻE lava ke ngāue ʻa e kau taautaha lalahi kei talavoú ʻi he lahi taha ʻo e ngaahi uiuiʻí (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 14.0).

  • Fakakaukau ki he ngaahi fiemaʻu mo e ngaahi aʻusia kehekehe ʻa e kau taautaha lalahi kei talavoú mo e founga ke poupouʻi ai ʻa kinautolu ʻoku lava ke nau ongoʻi liʻekina ʻi ha ʻiuniti fakasiokālafí.

  • Fakapapauʻi ʻoku ʻiloʻi mo lehilehiʻi kotoa ʻa e kau taautaha lalahi kei talavoú.

Ngaahi Meʻa ʻe Malava ke Fili Mei Ai ʻi hono Fakakaukauʻi mo Fakatupulakí

  • Fakakaukauʻi ha ngaahi founga ke fakatahatahaʻi ai ʻa e kau taautaha lalahi kei talavoú ʻi ha ngaahi aʻusia ʻi he houa hono uá (vakai, “Houa Hono Uá”).

  • Poupouʻi pea ngāue mo e kau taki fakalotofonuá ke fakakau mai e kau taautaha lalahi kei talavoú ʻi hono tokoniʻi mo fakamālohia e ngaahi ʻiuniti ʻoku nau lotu aí (vakai, “Ngaahi Uiuiʻi Faka-Siasí”).

  • Faʻu ha aʻusia naʻe fakataumuʻa ke ne tohoakiʻi ʻa e kau taautaha lalahi kei talavou ʻoku lolotonga ʻi he uōtí pe siteikí. Hangē ko ʻení:

    • Ko ha uooti ʻe taha ʻi he siteikí kuo vahe ke kau mai ki ai ʻa e kau taautaha lalahi kei talavoú

    • Ngaahi ʻekitivitī fakauiké

    • Ko ha houalotu fakamoʻoni fakamāhina

    • Ngaahi faingamālie ngāue tokoni fakauike pe fakamāhina

    • Ko ha feituʻu tānakiʻanga fakalotofonua (vakai, “Ko Hono Fokotuʻu ha Feituʻu Tānakiʻanga ki he YSA,” ChurchofJesusChrist.org)

  • Ngāue mo e kau taki fakalotofonuá ke fokotuʻu ha ʻiuniti ki he YSA kapau ʻokú ke ongoʻi ko e founga lelei taha ia ke fakamālohia ai e kau taautaha lalahi kei talavou ʻi homou feituʻú (vakai, “Ngaahi ʻIuniti ʻa e YSA”).

Ngaahi Sitepu ke Fakahokó

  1. Fakangofua e ngaahi liliú ʻo fakafou ʻi he ngaahi kōmiti fakatakimuʻa totonú.

  2. Faʻu ha palani ke fakafeʻiloaki ʻaki ha ngaahi liliu ki he kau taautaha lalahi kei talavou ʻoku kau ʻi he ngaahi ʻiuniti fakasiokālafí.

ʻĪmisi
ko e fefine ʻoku talanoa ki ha kau tangata

Ngaahi ʻIuniti ʻa e YSA

ʻOku ʻomi ʻe he ngaahi ʻiuniti ʻa e YSA ha ngaahi faingamālie ki he kau taautaha lalahi kei talavoú ke nau lotu fakataha mo kau ʻi he ngāue ʻo e fakamoʻuí mo e hakeakiʻí ʻi he lotolotonga ʻo e kaungā Kāingalotú ʻoku nau ʻi ha tuʻunga tatau ʻo e moʻuí (vakai, ʻEfesō 4:13). ʻI he ngaahi ʻiuniti ko ʻení, ʻoku fakataha maʻu pē ʻa e kau taautaha lalahi kei talavoú ke moihū ki he ʻOtuá, fakatupulaki ʻa e tui kia Sīsū Kalaisí, maʻu ʻa e ngaahi ouaú, feohi, mo maʻu ha mālohi lolotonga e ngaahi pole fakalaumālie mo fakatuʻasinó (vakai, Molonai 6:4–6).

Ngaahi Fehuʻi ʻe Ala Aleaʻí

  • Ko e hā ʻa e ngaahi lelei mo e ngaahi pole ‘i hono maʻu ha ʻiuniti ʻa e YSA?

  • Ko e hā ʻoku fili ai ʻa e kau taautaha lalahi kei talavoú ke kau pe ʻikai kau ki ha ʻiuniti ʻa e YSA?

  • Te tau fakaleleiʻi fēfē ʻa e aʻusia ʻi heʻetau ʻiuniti ʻa e YSA?

  • Te tau fakakau fēfē ʻa e kau taautaha lalahi kei talavou ʻoku kau ki he ngaahi ʻiuniti fakasiokālafi ʻi he ngaahi ʻekitivitī ʻa e ngaahi ʻiuniti ʻa e YSA?

  • Te tau fakapapauʻi fēfē ʻoku ʻikai feʻauhi ʻa e ngaahi ʻekitivitī ʻi he ngaahi ʻiuniti fakasiokālafí mo e ngaahi ʻiuniti ʻa e YSA?

Ngaahi Fakahinohino Paú

  • ʻOua naʻá ke faʻu ha ʻiuniti foʻou ʻa e YSA ʻo ʻikai muimui ki he founga fakangofua ki he ngaahi ʻiuniti foʻoú (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 37.2). Kapau ʻoku fiemaʻu ke fokotuʻu ha ʻiuniti ʻa e YSA, ngāue mo hoʻo palesiteni fakasiteikí.

Ngaahi Meʻa ʻe Malava ke Fili Mei Ai ʻi hono Fakakaukauʻi mo Fakatupulakí

  • Fehikitaki fakakulupu ʻa e kau taautaha lalahi kei talavoú (hangē ko ʻení, ʻi he ʻaho 1 ʻo Sānualí) kae ʻikai fakahiki ʻi he ngaahi ʻaho fāʻeleʻí.

  • Fokotuʻu ha ngaahi ʻiuniti kuo fakatahaʻi maʻá e kakai lalahi kei talavou ʻosi malí mo e kau taautaha lalahi kei talavoú (ʻoku lahi taha hono fokotuʻú ʻi ha ʻunivēsiti).

Ngaahi Sitepu ke Fakahokó

Ngāue mo e kau takimuʻa fakasiteikí ke:

  1. ʻIloʻi ʻa e ngaahi ngataʻanga ʻo e ngaahi ʻiuniti lolotongá pea mo e founga ʻe ala uesia ai kinautolu ʻe he ngaahi liliu ʻoku fiemaʻú.

  2. Fakakakato ha fakafuofuaʻi ʻo e tuʻunga mēmipasipi ʻo e ngaahi ʻiuniti ʻoku uesiá.

  3. Fakakakato ha fuʻu ʻakau ki he tokolahi ʻo e kakaí ke fakapapauʻi ʻoku palanisi e kau mēmipa ʻi he ʻiuniti takitaha.

  4. Fakafonu ʻa e foomu Kole ke Fokotuʻu ha Uooti pe Kolo ki he ngaahi liliu kotoa pē ʻoku fokotuʻu maí (maʻu ʻi he Ngaahi Maʻuʻanga Tokoni ʻa e Takí mo e Kalaké).

ʻĪmisi
ko e tangata ʻokú ne akoʻi ha kalasi

Ngaahi Uiuiʻi Faka-Siasí

ʻE lava ke tokoni lahi ʻa e kau taautaha lalahi kei talavoú ki he puleʻanga ʻo e ʻOtuá. ʻOku nau ʻomi foki ha ngaahi fakakaukau mo ha ngaahi aʻusia makehe te ne lava ʻo tāpuekina mo fakamālohia e kāingalotu kotoa ʻo e Siasí. Te nau lava ʻo ngāue ʻi ha faʻahinga uiuiʻi pē ʻi he siteikí tuku kehe pē ʻa e pīsopé, palesiteni fakasiteikí, pe pēteliake fakasiteikí.

Ngaahi Fehuʻi ʻe Ala Aleaʻí

  • Ko e hā ha ngaahi uiuiʻi foʻou mo mahuʻingamālie te ne fakaʻatā ʻa e kau taautaha lalahi kei talavoú ke nau kau ʻi he ngāue ʻo e fakamoʻuí mo e hakeakiʻí?

  • Te tau tokoniʻi fēfē ʻa e kau taautaha lalahi kei talavoú ke nau ongoʻi ʻoku fiemaʻu kinautolu ʻi honau ngaahi uiuiʻí?

  • Ko e fē ʻa e feituʻu ʻoku lolotonga fakaʻaongaʻi siʻisiʻi ai ʻa e kau taautaha lalahi kei talavoú?

  • Ko e hā e faʻahinga uiuiʻi, ngāue, pe ngaahi faingamālie ngāue tokoni ʻe meimei tali lelei taha ʻe kinautolu ʻoku ʻikai kau maí?

Ngaahi Fakahinohino Paú

  • Fakaʻehiʻehi mei hono fokotuʻu ha ngaahi uiuiʻi ʻoku ʻikai mahuʻingamālié. ʻE ʻuhinga ʻa e “ʻuhingamālié” ki ha ngaahi meʻa kehekehe ki he kakai kehekehe, ka ʻoku totonu ke ongoʻi ʻe he taha kotoa ʻoku fiemaʻu kinautolu ʻi he feituʻu ʻoku nau ngāue aí.

  • Kamata ʻaki haʻo tokanga taha ki he ngaahi uiuiʻi fakauooti mo fakasiteiki ʻe ala ʻaonga ki ai e ivi tākiekina ʻo e kau taautaha lalahi kei talavoú.

  • ʻI he ngaahi ʻiuniti YSA, ui ʻa e kau taautaha lalahi kei talavoú ki he lahi taha ʻo e ngaahi tuʻunga fakatakimuʻá (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 37.2.2, 37.3.2).

Ngaahi Meʻa ʻe Malava ke Fili Mei Ai ʻi hono Fakakaukauʻi mo Fakatupulakí

  • Poupouʻi ʻa e kau takí ke nau fakakaukauʻi ʻa e kau taautaha lalahi kei talavoú ʻi he taimi te nau ʻilo ai ha kakai te nau lava ʻo ngāue ʻi ha uiuiʻi, kau ai mo ha ngaahi uiuiʻi fakatakimuʻa.

  • Fakapapauʻi ʻoku ʻi ai ha ngāue fakaetauhi ʻa e kau taautaha lalahi kei talavou kotoa pē.

  • Fakakaukau ki ha ngaahi faingamālie kehekehe maʻá e kau taautaha lalahi kei talavoú ke nau ngāue ʻi he temipalé, kau ʻi he ngāue hisitōlia fakafāmilí, pea vahevahe ʻa e ongoongoleleí mo e niʻihi kehé.

  • Fakakaukau ki he ngaahi uiuiʻi mo e ngaahi ngāue te nau lava ʻo fakaaʻu atu e ivi tākiekina e kau taautaha lalahi kei talavoú ki he tukui koló.

ʻĪmisi
ko e fefine ʻokú ne akoʻi ha kalasi

Houa Hono Uá

ʻOku totonu ke tokoni ʻa e houa hono ua ʻo e fakatahaʻanga ʻo e Sāpaté ki he kau taautaha lalahi kei talavoú ke langaki ʻenau tui ki he Tamai Hēvaní mo Sīsū Kalaisí, fakatupulaki ʻenau mahino ki he ongoongoleleí, ongoʻi ʻoku nau kau mo fehokotaki, pea houngaʻia ʻi he ʻaonga taau ʻa e ongoongoleleí ki heʻenau moʻuí.

Ngaahi Fehuʻi ʻe Ala Aleaʻí

  • Ko e hā ʻa e ngaahi ola ʻoku fiemaʻu ke hoko ʻi he ngaahi aʻusia ʻi he houa hono uá? Ko e hā ha ngaahi aʻusia ʻi he ngaahi fakatahaʻanga ko ʻeni ʻa e Siasí te ne aʻusia lelei taha ʻa e ngaahi ola ko ʻení?

  • Ko e hā ʻa e ngaahi fiemaʻu ʻa e kau taautaha lalahi kei talavoú ʻe lava ke feau ʻi he ngaahi fakataha ʻi he houa hono uá?

  • Ko e hā ʻa e ngaahi pole ki heʻetau ʻausia ʻi he houa hono uá?

  • ʻE founga fēfē haʻatau fokotuʻu ha aʻusia ʻi he houa hono uá ʻokú ne tohoakiʻi e tokangá mo lava ke maʻu ʻe he kau taautaha lalahi kei talavou kotoa pē (tatau ai pē pe ko e hā e mālohinga ʻo e tuí, founga akó, pe aʻusia ʻi he moʻuí)?

Ngaahi Fakahinohino Paú

  • Fakaʻaongaʻi e naunau fakalēsoni fakafolofola mo fakatokāteline tatau ʻoku fakaʻaongaʻi ʻe he kāingalotu kehe ʻo e Siasí.

  • Tauhi ha ʻātakai malu ʻa ia ʻe poupouʻi ai e tokotaha kotoa ke fengāueʻaki mo kau mai.

  • Fakapapauʻi ʻoku ʻi ai ha faiako mo ha kalasi kehekehe ke fili mei ai e kau mēmipá.

  • Muimui ʻi he sīpinga ʻo e fakataha kuo fakangofua ʻe he Siasí (ngaahi kulupu ʻoku tuifio ki he ngaahi uike Lautohi Faka-Sāpaté pea mo e kōlomu ʻo e kaumātuʻá mo e Fineʻofá ʻi he ngaahi uike kuo vahe atú).

  • Fakakaukau pe ʻe uesia fēfē ʻe he ngaahi liliu ʻe ala hokó ʻa e kau taautaha lalahi kei talavou ʻi he ongo ʻiuniti fakasiokālafi mo e YSA fakatouʻosi.

Ngaahi Meʻa ʻe Malava ke Fili Mei Ai ʻi hono Fakakaukauʻi mo Fakatupulakí

  • ʻAi ha fanga kiʻi kalasi iiki ange ke nau poupouʻi ʻa e ngaahi founga kehekehe ʻo e akó, poupouʻi ʻa e fealēleaʻaki ʻoku mahuʻingá mo e vahevahe ʻo e ngaahi aʻusiá, pea faʻu ha ngaahi fetuʻutaki fakasōsiale ʻoku mahuʻingamālié. ʻE lava ke kau ʻi he ngaahi sīpingá ʻa e ngaahi meʻá ni:

    • Ngaahi kalasi ʻoku fakatefito ʻi he ngāue tokoní

    • Ngaahi kalasi ʻoku fakatefito ʻi he mūsiká

    • Ngaahi kalasi ʻoku fakatefito ʻi he ngaahi mītia kehekehé

  • Fakahoko ha ngaahi kalasi fakaʻinitaneti pe fakatou ʻi ai tonu mo ʻi he ʻinitanetí koeʻuhí ke kei lava pē ʻa kinautolu ʻoku ʻikai lava ʻo maʻulotu tonú ʻo kau atu ki hono ako ʻo e ongoongoleleí.

  • Fai ha fakamamafa makehe ʻi he Sāpate nimá ʻi he ngaahi tefito ʻoku ʻaonga-taau mo e kau taautaha lalahi kei talavou fakalotofonuá. ʻE lava ke kau ʻi he ngaahi sīpingá ʻa e ngaahi meʻá ni:

    • Ngaahi tefito mo e ngaahi pole faingataʻa ʻe ala hokó

    • Moʻui fakafalala pē kiate kitá

    • Fakaakeake mei he maʻunimaá

Fakangofua e ngaahi liliu ki he ngaahi fakataha ʻi he houa hono uá ʻo fakafou ʻi he ngaahi fakataha alēlea fakatakimuʻa totonú pea faʻu ha palani ke fakafeʻiloaki ʻaki e ngaahi liliú ki he kau taautaha lalahi kei talavoú.

ʻĪmisi
kau tangata ʻoku ako

ʻInisititiuti

ʻOku ʻomi ʻe he polokalama ʻinisititiuti fakalotú ha ngaahi faingamālie ki he kau taautaha lalahi kei talavoú ke nau fakahoko ai e fakaafe ʻa e Fakamoʻuí ke “feakoʻiʻaki ʻiate kimoutolu ʻa e tokāteline ʻo e puleʻangá” (Tokāteline mo e Ngaahi Fuakava 88:77) ʻo fakafou ʻi he ngaahi kalasi ako ʻo e ongoongoleleí ʻi he lolotonga e uiké.

Ko e ʻinisititiutí ko ha polokalama ʻoku fakatefito ʻia Kalaisi, fakatefito ʻi he folofolá, mo tukutaha ʻi he tokotaha akó ʻoku fakataumuʻa ke tokoniʻi kinautolu ʻoku kaú ke nau ʻunuʻunu ke ofi ange ki he ʻOtuá, fakamālohia ʻenau tui kia Kalaisí mo ʻEne ongoongolelei kuo fakafoki maí, pea fakalakalaka ʻi he hala ʻo e fuakavá (vakai, Sosiua 1:8; Sione 5:39; 2 Nīfai 31:21).

Ngaahi Fehuʻi ʻe Ala Aleaʻí

  • Ko e hā kuo akoʻi ʻe he kau taki ʻo e Siasí fekauʻaki mo e mahuʻinga ʻo e ʻinisititiutí mo hono ako ʻo e ongoongoleleí?

  • Ko e hā ha ngaahi aʻusia ʻoku maʻu ʻe he kau taautaha lalahi kei talavou fakalotofonuá ʻi he ʻinisititiutí?

  • ʻE lava fēfē ke fulihi e polokalama ʻinisititiutí ke toe mahuʻingamālie mo lava ke maʻu ange ʻe he kau taautaha lalahi kei talavou fakalotofonuá?

  • ʻOku tau ʻiloʻi nai ʻetau kau ngāue fakalotofonua ʻi he Seminelí mo e ʻInisititiuti Fakalotú (S&I)? Ko e hā ha konga te nau ala fakahoko ʻi heʻetau ngaahi fakataha ʻa e kōmiti YSA?

Ngaahi Fakahinohino Paú

  • ʻOku poupouʻi ʻa e kau taautaha lalahi kei talavou kotoa pē ʻi he taʻu 18–30 ke nau kau atu ʻi he ngaahi kalasi ʻinisititiutí, tatau ai pē pe ʻoku nau ako pe ʻikai.

  • ʻOku fokotuʻu ʻa e ngaahi polokalama ʻinisititiuti fakalotú ʻi he malumalu ʻo e fakahinohino ʻa e kau taki lakanga fakataulaʻeikí mo e kau ngāue ʻa e S&I ke feau e ngaahi fiemaʻu ʻa e kau taautaha lalahi kei talavoú.

  • ʻE lava ke fokotuʻu ʻe he kau palesiteni fakasiteikí ha ngaahi kalasi ʻinisititiuti fakasiteiki ʻi he ngaahi feituʻu ʻoku ʻikai lava ke maʻu ai e ngaahi kalasi faka-ʻapiakó.

  • ʻOku meimei ke nofotaha ʻa e ngaahi polokalama ʻinisititiuti ʻa e siteikí ʻi he ngaahi fiemaʻu ʻa e kau taautaha lalahi kei talavou ʻoku ʻikai ko ha fānau ako ʻunivēsití. ʻOku nau fakamamafaʻi ʻa e maʻuakó mo e akó kae ʻikai ko e maʻu ha māká.

  • ʻE lava ke fakakakato ʻe he kau akó ʻa e ngaahi fiemaʻu ki he kalasí ke ʻosi mei he ʻinisititiutí pe maʻu ha maaka ʻe hiki ki ha ʻunivēsiti ʻa e Siasí.

  • Mahalo naʻa fiemaʻu ʻe ha kau taautaha lalahi kei talavou ʻe niʻihi ke nau maʻu ha tipiloma ʻosi mei he ʻinisititiutí, pea ʻikai fiemaʻu ia ʻe ha niʻihi. ʻOku totonu ke tākiekina ʻe he ngaahi fiemaʻu ʻa e kau taautaha lalahi kei talavoú, kae ʻikai ko e ngaahi fiemaʻu ki he fakaʻosi akó, ʻa e tuʻunga ʻo e polokalama ʻinisititiutí ʻi homou feituʻú.

Ngaahi Meʻa ʻe Malava ke Fili Mei Ai ʻi hono Fakakaukauʻi mo Fakatupulakí

  • ʻE lava ke fakataha ʻa e ngaahi siteikí ke fakahoko fakavahaʻa siteiki ʻa e ngaahi kalasi ʻinisititiutí.

  • ʻE lava pē ke saiʻia ʻa e kau taautaha lalahi kei talavoú ʻi ha “pō ʻinisititiuti” ʻa ia ʻe fakahoko fakataha ai ʻa e ngaahi kalasí mo ha maʻu meʻatokoni pe ha ʻekitivitī fakasōsiale.

  • Fakakaukau ki he founga ʻe lava ke fakakau ai ʻa e ʻinisititiutí ki ha feituʻu tānakiʻanga ʻa e YSA fakalotofonuá.

  • Vakaiʻi e ngaahi fulihi ki he ngaahi kalasi ʻinisititiutí, hangē ko e ʻahó mo e taimí, lōloa ʻo e ngaahi kalasí, lahi ʻo e uike ʻoku fakahoko ai ha kalasi, ngaahi ako ʻi ha ngaahi tefito makehe, mo e ngaahi meʻa pehē.

Ngaahi Sitepu ke Fakahokó

  1. Fakafanongo ki he kau taautaha lalahi kei talavoú ke maʻu ha mahino ki he meʻa kuo nau aʻusia ʻi he ʻinisititiutí pea mo e founga ʻe lava ke toe lelei ange aí.

  2. Ngāue vāofi mo e kau palesitenisī fakasiteikí mo e kau ngāue fakalotofonua ʻo e S&I ke fokotuʻutuʻu pe liliu ha polokalama ʻinisititiuti te ne feau lelei taha e ngaahi fiemaʻu ʻa e kau taautaha lalahi kei talavou ʻi homou feituʻú.

ʻĪmisi
kakai ʻoku ngāue ʻi ha ngoue

Ngāue Tokoni

ʻOku totonu ke maʻu ʻe he kau taautaha lalahi kei talavoú ha ngaahi faingamālie ʻi lokiako mo tuʻa ke “femoʻuekina … ʻi ha ngāue lelei” (Tokāteline mo e Ngaahi Fuakava 58:27) pea fakahoko ha faikehekehe moʻoni ʻi he ngaahi ngāue ʻoku nau manako aí.

Ngaahi Fehuʻi ʻe Ala Aleaʻí

  • ʻE lava fēfē ke fakaʻaongaʻi ʻa e JustServe ke tokoni ki he kau taautaha lalahi kei talavou ʻi hotau feituʻú ke nau ʻiloʻi ha ngaahi faingamālie ngāue tokoni mahuʻinga? (Fakaʻaongaʻi ʻa e fakafehokotakiʻanga ko ʻení ke fetuʻutaki ki ha fakafofonga JustServe ʻi hoʻomou feituʻú.)

  • ʻE lava fēfē ʻe he ngaahi faingamālie ngāue tokoni ʻuhingamālié ʻo tākiekina lelei e kau taautaha lalahi kei talavoú?

  • Ko e hā ʻa e ngaahi pole ʻo hono kumi ha ngaahi faingamālie ngāue tokoni ʻoku mahuʻingamālié?

  • Ko e hā ha faʻahinga faingamālie ngāue tokoni ʻe lava ke ne tākiekina lahi taha hotau tukui kolo fakalotofonuá?

  • Ko e hā ha ngaahi kulupu te tau lava ʻo ngāue fakataha mo kinautolú?

  • Te tau lava fēfē ʻo tokoni ke langaki ha ngaahi vā fetuʻutaki ʻi heʻetau ngāué?

Ngaahi Fakahinohino Paú

  • Fakaʻehiʻehi mei he ngaahi faingamālie ngāue tokoni ʻoku ʻikai mahuʻingamālié (ʻikai feʻunga ʻa e ngāué ke fakakau kotoa kinautolu).

  • Tuku ki he kau taautaha lalahi kei talavoú ke nau fili ʻa e ngaahi faingamālie ngāue tokoní ʻi he lahi taha ʻe lavá.

  • Fakapapauʻi ʻoku taki e ngāué ʻe he kau taautaha lalahi kei talavoú.

Ngaahi Meʻa ʻe Malava ke Fili Mei Ai ʻi hono Fakakaukauʻi mo Fakatupulakí

  • Fakaʻaongaʻi pe fakalahi atu ki he ngaahi maʻuʻanga tokoni lolotonga ʻa e Siasí mo e koló, hangē ko e JustServe, ngaahi kalasi moʻui fakafalala pē kiate kitá, ko e polokalama fakaakeake mei he maʻunimaá, ngāue fakatemipalé mo e hisitōlia fakafāmilí, pe EnglishConnect.

  • Ngāue fakataha mo e ngaahi uooti, kolo, mo e ngaahi siteiki kehé ʻi he ngaahi ngāué.

  • Ngāue fakataha mo ha ngaahi kautaha fakalotu, puleʻanga, pe ʻikai fakatupu paʻanga kehe ʻi he ngaahi polokalama fakakolo lalahi ʻoku lolotonga fakahokó.

  • Tokoniʻi e koló ʻi ha polokalama foʻou (hangē ko hono langa ʻo ha peito ngaohi supo).

  • Fakalahi e ngaahi faingamālie ki he kau faifekau ngāue taimi kakató pe kau faifekau ngāue tokoni fakataimí.

  • Fakalahi e ngaahi uiuiʻi ʻoku fakatefito he ngāue tokoní (vakai, “Ngaahi Uiuiʻi Faka-Siasí”).

  • Fokotuʻutuʻu lelei e ngaahi ngāue ʻoku lolotonga faí (hangē ko hono akoʻi, fakahinohinoʻi, pe ngāue fakamāhina ʻi ha pangikē meʻakai).

ʻĪmisi
kulupu ʻoku tuʻu ʻi muʻa ʻi ha temipale

Ko e Ngāue mo e Moihū ʻi he Temipalé

Naʻe akonaki ʻa Palesiteni Nalesoni ʻo pehē, “ʻOku fakalahi ʻa e tupulaki lelei fakalaumālié ʻi heʻetau moihū ʻi he temipalé. … ʻOku ou kōlenga atu ke mou fehangahangai mo e ngaahi founga ʻa e māmaní ʻaki homou nofotaha ʻi he ngaahi tāpuaki taʻengata ʻo e temipalé. ʻOku ʻomi ʻe hoʻo taimi ʻi he temipalé ha ngaahi tāpuaki ki ʻitāniti” (“Ko e Taimí ʻEni,” Liahona, Mē 2022, 126).

ʻI he fakataha ʻa e kau taautaha lalahi kei talavoú ʻi he temipalé, te nau ongoʻi ʻa e ʻamanaki lelei, melino, mo e ʻofa, pea te nau maʻu ʻa e maama ʻoku nau fiemaʻu ke ikunaʻi ʻaki e ngaahi faingataʻa ʻoku nau fehangahangai mo iá.

Ngaahi Fehuʻi ʻe Ala Aleaʻí

  • ʻE tokoni fēfē ʻa e moihū mo e ngāue tokoni ʻi he temipalé ki he kau taautaha lalahi kei talavoú ʻi he ngaahi pole ʻoku nau fehangahangai mo iá?

  • Ko e hā ʻokú ne taʻofi ʻa e kau taautaha lalahi kei talavoú mei he moihū mo e ngāue ʻi he temipalé? ʻE founga fēfē haʻatau tokoní?

  • Ko e hā te tau lava ʻo akoʻi ke tokoni ki he kau taautaha lalahi kei talavoú ke nau maʻu ha mālohi lahi ange ʻi heʻenau moʻuí ʻi heʻenau moihū mo ngāue ʻi he temipalé?

  • Te tau teuteuʻi fēfē ʻa e kau taautaha lalahi kei talavoú ke nau maʻu e ngaahi fuakava ʻo e temipalé mo nofo maʻu ʻi he hala ʻo e fuakavá?

  • Te tau poupouʻi fēfē ʻa e kau taautaha lalahi kei talavoú ke nau fakataha mai ʻo ngāue ʻi he temipalé?

  • Te tau tokoniʻi fēfē ʻa e kau taautaha lalahi kei talavoú ke nau ʻai ʻa e hisitōlia fakafāmilí ko ha konga ʻo ʻenau ngāue fakatemipalé?

Ngaahi Fakahinohino Paú

  • Vakai ki he Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 25.5, 26–27 ki he ngaahi tuʻutuʻuni fekauʻaki mo e ʻalu ki he temipalé mo e ngaahi uiuiʻi ʻi he temipalé. Fakatokangaʻi ange ʻe lava e kau taautaha lalahi kei talavoú ʻo “talanoa mo e pīsopé fekauʻaki mo e faingmālie ke ngāue” ko ha kau ngāue temipale (25.5.1).

  • ʻI he taimi ʻoku faʻu ai ha ngaahi palani ke ʻalu ki he temipalé, fakakaukau ki he founga ke tokoniʻi ai ʻa e kau taautaha lalahi kei talavoú ke nau teuteu ke maʻu ha aʻusia lelei ʻi he temipalé.

  • ʻI he taimi ʻokú ke palani ai ha ʻekitivitī YSA ki he temipalé, fakapapauʻi kimuʻa hoʻo ʻapoinimení ki he temipalé pea fakahā ange ha ngaahi meʻa makehe ʻe ala fiemaʻu ʻe hoʻo kulupú.

Ngaahi Meʻa ʻe Malava ke Fili Mei Ai ʻi hono Fakakaukauʻi mo Fakatupulakí

  • Fakakaukau ke fokotuʻutuʻu ha kalasi teuteu ki he temipalé maʻá e kau taautaha lalahi kei talavou ʻoku teuteu ke maʻu honau ʻenitaumení pe teuteu ke nau silá.

  • Fokotuʻutuʻu ha aʻusia angamaheni ʻi he temipalé maʻá e kau taautaha lalahi kei talavoú ke nau kau atu ki ai. Kuo akoʻi mai ʻe Palesiteni Lāsolo M. Nalesoni, “Fetuʻutaki maʻu pē mo e ʻEikí—ʻo ʻalu ki Hono fale māʻoniʻoní—pea tauhi pau maʻu pē taimi ko iá ʻi he fiefia” (“Ko e Hoko ko ha Kāingalotu Faʻifaʻitakiʻangá,” Liahona, Nōvema 2018, 114).

  • Palani ha ngaahi tefito ki he fakataha lotú, ngaahi tefito ki he houalotu sākalamēnití, ngaahi tefito ʻi he efiafi fakafāmili ʻi ʻapí, pe ngaahi ʻekitivitī fekauʻaki mo e temipalé pe hisitōlia fakafāmilí.

  • Fealēleaʻaki mo e kau taki lakanga fakataulaʻeiki fakalotofonuá, kau ai ʻa e palesitenisī fakatemipalé, fekauʻaki mo ha ngaahi founga ʻe lava ke kau mālohi ange ai ʻa e kau taautaha lalahi kei talavoú ʻi he ngāue fakatemipale mo e hisitōlia fakafāmili fakalotofonuá.

  • Palani ha ngaahi founga ke fakahā ai ki he kau taautaha lalahi kei talavoú ha ngaahi faingamālie ke nau hoko ko ha kau ngāue ouau pe kau ngāue tokoni ʻi he temipalé.

ʻĪmisi
kulupu ʻoku nau faitaaʻi pē ʻe nautolu kinautolu

Ngaahi Konifelenisi ‘a e YSA

Ko e ngaahi konifelenisi ʻa e YSA ko ha ngaahi ʻekitivitī fili pē, mo lalahi maʻá e kau taautaha lalahi kei talavoú ʻoku fakahoko ʻi he malumalu ʻo e fakahinohino ʻa e Palesitenisī Fakaʻēliá. ʻE lava ke fakatefito ha konifelenisi ʻa e YSA ʻi ha kaveinga kuo fili ʻe ha kōmiti palani ʻa e YSA mo e kau taki fakalotofonuá. ʻOku totonu ke kau ai ha ngaahi fakataha lotu, ngaahi fakataha ako, ngāue tokoni, mo ha ngaahi ʻekitivitī kuo fokotuʻutuʻu ke tokoni ʻi hono fakamālohia ʻo e tui kia Sīsū Kalaisí mo ohi mai ha ongoʻi feohi mo e kau taautaha lalahi kei talavou kehé.

Ngaahi Fehuʻi ʻe Ala Aleaʻí

  • ʻOku tokolahi feʻunga nai e kau taautaha lalahi kei talavou ʻi he feituʻú ke fakahoko ha konifelenisi lelei?

  • Ko e hā ha ngaahi lelei ʻo hono faʻu ha konifelenisi ʻa e YSA?

  • Ko e hā ʻa e ngaahi pole ki hono fakahoko ha konifelenisi ʻa e YSA?

  • ʻE lava nai ke fakaʻatā ʻa e konifelenisí ki he kau taautaha lalahi kei talavou ʻi tuʻa ʻi he feituʻu fakalotofonuá?

  • Ko e hā mo ha toe ngaahi meʻa kehe ʻe tokoni ke tau ʻiloʻi pe ko ha founga fakaleleiʻi ʻeni ʻoku totonu ke tau ngāue ki ai?

Ngaahi Fakahinohino Paú

  • Maʻu ha fakangofua mei he Palesitenisī Fakaʻēliá ke fokotuʻu ha konifelenisi ʻa e YSA.

  • Fokotuʻu ha kōmiti palani ki he konifelenisi ʻa e YSA.

  • Tuku ki he kōmiti palani ʻa e YSA mo e kau taki fakalotofonuá ke nau takimuʻa ʻi hono fokotuʻutuʻu mo fakahoko ʻa e konifelenisí.

  • Fili ha feituʻu lelei ke fakahoko ai ʻa e konifelenisí.

  • Fakakau ai ha ngaahi aʻusia ʻokú ne fakatupulaki e fengāueʻaki ʻa e kau taautaha lalahi kei talavoú mo langaki e tui kia Sīsū Kalaisí.

  • Fakapapauʻi ʻoku felāveʻi ʻa e ngaahi tefito ki he ngaahi fakataha akó mo e ngaahi fakataha lotú mo e kakai YSA fakalotofonuá.

  • Fanongonongo kei taimi ʻa e konifelenisí ki he kau taautaha lalahi kei talavoú ke nau fokotuʻutuʻu ha founga ke nau kau atu ki ai.

  • Tuku ha taimi ʻatā he lolotonga ʻo e konifelenisí ke fai ai ha fakalaulauloto mo ha feohi angamaheni pē.

ʻI he taimi ʻoku fili ai ʻe he Kau Palesitenisī Fakaʻēliá ke fakahoko ha konifelenisi ʻa e YSA, fakaʻaongaʻi ʻa e Ngaahi Fakahinohino ki he Konifelenisi ʻa e Taautaha Lalahi Kei Talavoú ke tokoni ki he ngaahi ngāue ki hono palaní.

ʻĪmisi
tangata mo ha fefine

Ngaahi Fakataha Lotu ʻa e YSA

Ko e ngaahi fakataha lotu ʻa e YSA ko ha ngaahi meʻa fili pē ia ʻe fakahoko ʻo fakatatau mo e fakahinohino ʻa ha pīsope, palesiteni fakasiteiki, pe Palesitenisī Fakaʻēlia. ʻOku meimei ke kau ʻi he ngaahi fakataha lotu ʻa e YSA ha lotu, himi pe hiva kuo fili, pea mo ha pōpoaki ʻoku fakatefito ʻi he ongoongoleleí ʻe ha fakafoʻituitui pe niʻihi fakafoʻituitui kuo fili.

Ngaahi Fehuʻi ʻe Ala Aleaʻí

  • Ko e hā ha ngaahi lelei ʻe ala maʻu ʻi hono fakahoko ha ngaahi fakataha lotú?

  • Ko e hā ‘a e ngaahi polé?

  • Ko e hā e ngaahi fiemaʻu ʻa e kau taautaha lalahi kei talavou ʻi hotau feituʻú ʻe lava ke akoʻi ʻi ha fakataha lotu?

  • ʻOku totonu nai ke fakahangatonu, fakamafola, pe fakatouʻosi ʻa e fakataha lotú?

  • Ko e hā e fokotuʻutuʻu (hangē ko ha lea, fealēleaʻaki, pe pēnolo) ʻe ʻaonga taha ki he pōpoakí mo e niʻihi ʻoku fakataumuʻa ki ai e talanoá?

  • ʻE lava fēfē ke fakaʻatā ʻa e ngaahi fakataha lotú ki he tokotaha kotoa pē, kau ai ʻa kinautolu ʻoku lea fakafonua kehé mo kinautolu ʻoku faingataʻaʻia fakaesinó?

Ngaahi Fakahinohino Paú

  • ʻI he taimi ʻoku palani ai ha fakataha lotú, fakakaukau ki he ngaahi meʻa ʻoku manako aí, ngaahi fiemaʻú, mo e ngaahi meʻa ʻoku aʻusia ʻe he kau taautaha lalahi kei talavou ʻi he ʻēliá.

  • ʻOku totonu ke hoko ʻa e kau taautaha lalahi kei talavoú ko e kau fokotuʻutuʻu mo e kau taki ʻo e fakataha lotú.

  • ʻOku totonu ke poupouʻi mo tokoniʻi ʻe he kau palesitenisī fakasiteikí, kau pīsopelikí, mo e kau taki kehé ʻa e aʻusia ko iá kimuʻa mo e hili hono fakahokó.

  • ʻE lava ke fakahoko ʻa e ngaahi fakataha lotú ʻi ha uooti, fakasiteiki, pe fakavahaʻa siteiki.

Ngaahi Meʻa ʻe Malava ke Fili Mei Ai ʻi hono Fakakaukauʻi mo Fakatupulakí

  • Fakakaukau ki ha ngaahi founga kehekehe. ʻOua naʻá ke manavasiʻi ke vakaiʻi e ngaahi founga kuo teʻeki ʻahiʻahiʻi kimuʻa ʻi hoʻomou feituʻú. Hangē ko ʻení:

    • Tānaki fakataha ʻo e niʻihí tonu

    • Tānaki fakataha ʻi he ʻinitanetí

    • Ngaahi fealēleaʻaki fakapēnoló

    • Ngaahi fealēleaʻaki fakakulupú

    • Ngaahi pōpoaki ʻi he sīpinga ʻo e pōpoaki ʻoku fakahoko ʻi he houalotu sākalamēnití

    • Ngaahi foʻi hivá

    • Ngaahi akó

  • ʻOku totonu ke ʻi ai maʻu pē ha konga fakalaumālie ʻo e tefito ʻo e fakataha lotú mo tokoni ke ʻomi e kau taautaha lalahi kei talavoú ke ofi ange kia Kalaisi. Hangē ko ʻení, ʻe lava ke kau ʻi he ngaahi tefitó ʻa e ngaahi meʻa ko ʻení:

    • Ko e ngāue ʻo e fakamoʻuí mo e hakeakiʻí

    • Ngaahi tefito fakatokāteliné

    • Ngaahi faingamālie ke ngāue tokoní

    • Ngaahi palopalema mohu faingataʻá

    • Fakaakeake mei he maʻunimaá

    • Hisitōlia ʻo e Siasí

    • Mateuteu ki ha meʻa Fakatuʻupakē

    • Moʻui fakafalala pē kiate kitá

    • Moʻui lelei fakaeʻatamaí mo e loto-vilitaki fakaelotó

    • Malu ʻi he Mītiá

    • Ngaahi ʻulungaanga faka-Kalaisí

ʻĪmisi
kulupu ʻoku tangutu fuopotopoto

Ko ha Feituʻu Tānakiʻanga ʻa e YSA

ʻOku manako ʻa e kau taautaha lalahi kei talavoú mo honau ngaahi kaungāmeʻá ke nau fakataha mai ʻo kau ʻi he ngaahi ʻekitivitī mo e ngaahi aʻusia lelei ʻokú ne ʻomi kinautolu ke nau vāofi ange ki he niʻihi kehé mo e ʻOtuá. Ko e feituʻu tānakiʻangá ko ha feituʻu ia (ʻi ha ʻapisiasi ʻoku lolotonga ngāue ʻaki pe fale ʻinisititiuti) ʻa ia ʻoku fakataumuʻa ʻe lava ke fakataha ki ai ʻa e kau taautaha lalahi kei talavoú mo honau ngaahi kaungāmeʻá ke nau kau ʻi he niʻihi pe kotoa ʻo e ngaahi meʻa ko ʻení:

  • Ako fakalotú mo hono ako ʻo e ongoongoleleí (hangē ko e ngaahi kalasi ʻinisititiutí, ngaahi kulupu ako ʻo e Haʻu, ʻo Muimui ʻIate Aú, ngaahi fealēleaʻaki ʻi he ongoongoleleí, pe ngaahi fakataha lotú)

  • Ngaahi ʻekitivitī ngāue tokoní mo fakasōsialé (hangē ko e tokoni ʻofa fakaetangatá mo e fakakoló, kau ai e ngaahi ngāue JustServe, hulohula, polokalama fakafonua, pe ngaahi kulupu efiafi fakafāmili ʻi ʻapí)

  • Ngaahi ʻekitivitī ʻo e temipalé mo e hisitōlia fakafāmilí, kau ai ʻa e teuteu ki he temipalé

  • Moʻui fakafalala pē kiate kitá mo e ngaahi faingamālie fakaakó (hangē ko e ngaahi kalasi moʻui fakafalala pē kiate kitá pe BYU–Pathway Fakaemāmani Lahí)

  • Ngaahi ʻekitivitī ngāue fakafaifekaú (hangē ko e fakafeohí pe ngaahi ʻekitivitī teuteu ngāue fakafaifekaú)

  • Ngaahi ʻekitivitī tokoni fakakoló (vakai, “Fehokotaki mo e Tukui Koló: Vahevahe e Ngaahi Maʻuʻanga Tokoni ʻa e Siasí,” ChurchofJesusChrist.org)

Ke maʻu ha fakamatala lahi ange, vakai, “Ko Hono Fokotuʻu ha Feituʻu Tānakiʻanga ki he YSA” (ChurchofJesusChrist.org).

Ngaahi Fehuʻi ʻe Ala Aleaʻí

  • Ko e hā ha faʻahinga feohi fakasōsiale ʻe tokoni ki he kau taautaha lalahi kei talavoú ke nau fakatupulaki ha ongoʻi ʻoku nau kau maí?

  • ʻE lava fēfē ʻa e ngaahi ʻekitivitī fakasōsialé ʻo fakamālohia ʻa e tui kia Sīsū Kalaisí?

  • ʻE founga fēfē hono tāpuekina fakalaumālie mo fakasōsiale ʻa e kau taautaha lalahi kei talavoú ʻi hono fokotuʻu ha feituʻu ke nau fakataha ki aí?

Ngaahi Fakahinohino Paú

  • ʻE fakaʻaongaʻi ʻe ha palesiteni fakasiteiki ʻa e kōmiti YSA ʻa e siteikí (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 14.1.1.2) ke fokotuʻu ha feituʻu tānakiʻanga ʻa e YSA. Ki he ngaahi feituʻu tānakiʻanga ʻoku fakaʻaongaʻi ʻe ha ngaahi siteiki lahí, ʻe lava ke fakakau ʻi he kōmiti ko ʻení ha kau taautaha lalahi kei talavou mei he siteiki takitaha.

  • ʻOku muimui ʻa e kōmiti YSA fakasiteikí ki he ngaahi fakahinohino ʻa e Siasí ki he ngaahi ʻekitivitií (vakai, Tohi Tuʻutuʻuni Fakakātoá, vahe 20).

  • Kapau ʻoku lava ʻa e kōmiti YSA fakasiteikí ʻo fakaʻaongaʻi ha fale ʻo e ʻinisititiutí, ʻe fakahoko leva ʻe he talēkita ʻo e ʻinisititiutí (pe kouʻotineitá) ha fatongia mahuʻinga ʻi hono poupouʻi ʻo e feituʻu tānakiʻanga ʻa e YSA.

  • ʻOku maʻu ʻa e paʻanga ngāué mo e ngaahi fakamole fakapatisetí mei he patiseti ʻa e YSA ʻi he siteikí (pe ngaahi siteikí) (vakai, Tohi Tuʻutuʻuni Fakakātoá, 14.2.1.3), ʻo fakalahi atu ʻe he patiseti fakaʻēliá ʻo ka fiemaʻu.

Paaki