Aduna bay Bisan Unsa nga mga Restriksyon sa mga Tulumanon sa Haya ug Lubong alang sa Tawo nga Namatay pinaagi sa Paghikog?

Kon ang usa ka indibidwal mamatay pinaagi sa paghikog, kinahanglang mohatag kita sa samang respeto ngadto sa ilang lawas, ug ngadto sa nahabilin nga mga sakop sa pamilya, nga atong ihatag ngadto ni bisan kinsa. Ang Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw nagtudlo: “Ang mga lider kinahanglang motambag ug mohupay sa mga sakop sa pamilya sa tawo nga naghikog. Ang pamilya, sa pagkonsulta sa bishop, motino sa lugar ug matang sa tulumanon sa haya alang sa tawo. Ang mga pasilidad sa Simbahan mahimong gamiton. Kon ang tawo natugahan [endowed], mahimo siyang ilubong nga magsul-ob sa sinina alang sa templo” (Kinatibuk-ang Tamdanan nga Basahon, 38.6.18).

Si Presidente M. Russell Ballard gihangyo nga mamulong diha sa haya sa usa ka higala nga namatay pinaagi sa paghikog. Miingon siya: “Tungod kay nakaila ko sa tawo ug nasayud sa mga sirkumstansya, ug nakasiksik sa doktrina kalabut niini nga hilisgutan, aduna akoy lisud nga mga higayon sa pag-andam sa akong pakigpulong. … Ang kalinaw miabut lamang kanako sa dihang nakaamgo ko nga ang Ginoo lamang ang makapahamtang og makiangayon nga paghukom. Siya lamang ang aduna sa tanang detalye, ug Siya lamang ang nasayud sa tuyo sa kasingkasing sa akong higala. Nahiangay ako sa ideya nga ang tibuok kinabuhi nga kamaayo ug pagserbisyo sa uban siguradong ikonsiderar sa Ginoo sa paghukom sa kinabuhi sa usa ka tawo” (“Suicide: Some Things We Know, and Some We Do Not,” Ensign, Okt. 1987, 7).

Mga Kapanguhaan sa Simbahan ug sa Komunidad

(Ang ubang mga kapanguhaan nga gilista sa ubos wala gihimo, wala gimintenar, o wala gikontrolar sa Ang Simbahan ni Jesukristo sa mga Santos sa Ulahing mga Adlaw. Kini nga mga materyal gituyo aron magsilbing dugang nga makatabang nga mga kapanguhaan samtang magtuon ka niini nga hilisgutan. Ang Simbahan wala moendorso og bisan unsang sulod [content] nga wala mahisubay sa mga doktrina ug mga pagtulun-an niini.)

• “Mga Haya ug Ubang mga Tulumanon sa Panahon sa Kamatayon,” Kinatibuk-ang Tamdanan nga Basahon, 29.6.