Leksiyon sa mga Hamtong: Leksiyon sa Pagbansay sa mga Ginikanan alang sa Teknolohiya

I. Pasiuna

Isip mga ginikanan, gusto nato ang labing maayo alang sa atong mga anak, ug naglakip kana sa pagtudlo kanila kon unsaon sa pagsinati sa digital nga kalibotan sa luwas nga paagi. Niini nga leksiyon, atong hisgotan kon unsaon nato sa pagtabang ang mga bata sa pagkontrol sa ilang paggamit sa teknolohiya, aron dili kini mokontrolar kanila. Makakat-on kita og praktikal nga mga pamaagi ug mga teknik nga makatabang sa paggiya sa mga bata sa paggamit sa teknolohiya sa husto nga katuyoan ug sa positibo nga paagi.

II. Ang mga Benepisyo ug Gasto sa Teknolohiya

Mga Benepisyo

Ang Simbahan naggamit og teknolohiya aron sa pagpakigbahin og impormasyon sa tibuok kalibotan ug sa pagpakaylap sa ebanghelyo.
Ang teknolohiya naghatag kanato og kahigayonan sa pag-ambit sa tibuok kalibotan nga hiniusang kahibalo ug makaarang ra gayod sa atong bulsa.

Gasto

Ang gasto sa teknolohiya mao ang atong panahon ug atensiyon, o mas grabe pa, ang pag-usik-usik sa kahigayonan ug mga panalangin.
Kon dili kita magmabinantayon, mahimong mapahisalaag kita pinaagi sa butang nga dili takos sa atong atensiyon, o gani mopasimang kanato gikan sa atong mga pakigsaad ug mga maayong gawi.

Mga Taga-Filipos 4:8

Sa kataposan, mga igsoon, bisan unsang butang tinuod, bisan unsang butang dungganan, bisan unsang butang matarong, bisan unsang butang ulay, bisan unsang butang hiligugmaon, bisan unsay butang maayong pamation, kon aduna may kahalangdon, kon aduna may pagkadalaygon, palandonga ninyo kining mga butanga.

III. Mga Hagit sa Teknolohiya

Ang mga tigtuon, siyensiya, ug disenyo nakakat-on og mga teknik sa pagtabang sa mga tawo aron makuha ang ilang atensiyon sa mas taas nga panahon ug mobati nga nakontento. Sama ra kini sa industriya sa pagkaon. Ang siyensiya nakatabang sa mga negosyo sa pag-imbento og pagkaon sa pagkab-ot sa “punto sa kalipayan” o diin ang pagkaon labing lamian. Sayop ba nimo kon murag kanunay kang ganahan nga pun-an pa og kausa?

Nan, oo … ug dili. Ang teknolohiya adunay iyang kaugalingong “punto sa kalipayan,” ug mogiya kini sa atong mga emosyon ug sa mga kemikal sa lawas aron mosustener niini. Mapildi ka ba kon lisod para kanimo ang paghunong sa paggamit sa teknolohiya? Ikaw ba huyang lang sa espirituwal? Dili. Ang pagpahimulos sa paggamit sa teknolohiya normal kaayo, apan ang pagkontrolar sa imong paggamit sa teknolohiya mahimong tinuoray nga panlimbasog. Nakigharong ka sa siyensiya, mga kemikal sa utok, ug sa dili palupig nga mga industriya nga nagtinguha sa imong atensiyon—ug dili kini patas nga pakigbugno.

Importante ang pagsabot nga ang mga hamtong nakigharong usab sa teknolohiya sama sa mga bata. Mahimo usab nga masangit kita sa “punto sa kalipayan” sa teknolohiya ug dili na makamatikod sa oras, sama sa mga batan-on ug sa mga bata.

Ang “Punto sa Kalipayan” sa Teknolohiya

Ang teknolohiya usa ka himan nga naghatag nato og kahigayonan sa pag-ambit sa tibuok kalibotan nga hiniusang kahibalo ug magamit alang sa maayo.
Kon mas daghang pagtagad ang atong ihatag sa teknolohiya, mas daghan ang mabayran sa mga tigmugna sa teknolohiya.
Ang mga tigtuon ug mga tigdesinyo mogamit ug mga teknik aron padayon kitang moapil ug makontento sa teknolohiya, susama sa “punto sa kalipayan” sa industriya sa pagkaon.
Ang Langitnong Amahan ug ang atong Manluluwas nakasabot sa atong mga panlimbasog sa teknolohiya ug mopalig-on kanato.

2 Mga Taga-Corinto 12:9

Apan siya nag-ingon kanako, Ang akong grasya igo alang kanimo, kay ang akong gahom ginahingpit diha sa kahuyang. Labi pang igakalipay ko hinuon ang pagpasigarbo tungod sa akong mga kahuyang aron ang gahom ni Kristo magapandong kanako.

Pagbuntog sa “Punto sa Kalipayan”

Ang teknolohiya adunay iyang kaugalingong “punto sa kalipayan” ug mogiya sa atong mga emosyon ug sa mga kemikal sa lawas.
Normal lamang ang pagpakigbisog sa teknolohiya. Nakigharong kita sa siyensiya, mga kemikal sa utok, ug sa dili palupig nga mga industriya nga nagtinguha sa atong atensiyon.
Mahimo natong kontrolon ang atong paggamit sa teknolohiya pinaagi sa pagpangutana sa atong kaugalingon og mga pangutana nga may katuyoan, paghimo og plano, ug paghunong kon gikinahanglan.
Ang pagkamahunahunaon unsay sulod sa atong basahon ug ang pagmugna og mga dapit sa atong balay nga didto gidili ang paggamit og mga device makatabang usab nato sa pagbuntog sa “punto sa kalipayan” sa teknolohiya.

Mateo 26:41

Pagtukaw ug pag-ampo kamo aron dili kamo mahidalin-as ngadto sa panulay; sa pagkatinuod matinguhaon ang espiritu apan maluya ang lawas.

Isip mga ginikanan makahatag kita og panig-ingnan alang sa atong mga anak pinaagi sa pagkamanggihunahunaon sa atong kaugalingong paggamit sa teknolohiya. Ang pagsabot kon asa kutob ang atong paggamit sa teknolohiya ug ang paghimo og mga lakang sa pagbuntog sa tentasyon sa sobrang paggamit o pagpatuyang og gamit niini makamugna og maayong relasyon sa teknolohiya alang sa atong kaugalingon ug sa atong mga pamilya. Hinumdomi, kita ang mokontrolar sa teknolohiya, dili kay kini ang mokontrolar kanato.

IV. Pagkontrol sa Paggamit sa Teknolohiya

A. Katuyoan: Paggamit sa teknolohiya nga adunay tumong sa pagkat-on ug pagmugna.

Mga Taga-Colosas 3:23

Bisan unsa ang inyong pagabuhaton, buhata kini sa kinasingkasing, nga ingon sa nangalagad kamo sa Ginoo, ug dili sa tawo.

Pangutan-a ang imong kaugalingon og mga pangutana sama sa “Nganong gigamit nako ang akong device karon?” ug “Nalipay ba ko sa akong gibuhat?”

Ang mga praktikal nga sugyot alang sa tinuyo nga paggamit sa teknolohiya naglakip sa pagpadala og usa ka positibong mensahe, pagpaminaw sa malinawon nga musika, ug paghimo og imong kaugalingong sulod [content]. Unsa pa nga mga gamit ang imong mailhan?

B. Plano: Pagplano daan alang sa mas maayong mga pagpili.

Mga Panultihon 16:3

Itugyan ang imong mga buhat ngadto sa Ginoo, ug ang imong mga laraw malig-on.

Pangutan-a ang imong kaugalingon og mga pangutana sama sa “Unsa ang akong plano sa paggamit sa akong device?” ug “Unsa nga ilhanan ang akong gipakita sa Dios kon giunsa nako paggamit ang akong panahon?”

Ang praktikal nga mga sugyot alang sa pagplano daan sa mas maayong mga pagpili naglakip sa paghatag og inadlaw nga limit sa imong kaugalingon sa oras sa screen, pagsunod ug pagkontak lamang sa suod nga pamilya ug mga higala, pagtakda og mga lugar sa balay nga didto gidili ang paggamit og device, pagbutang og charging station sa pamilya, ug paggamit og filter. Unsa pay ubang mga estratehiya nga makatabang kanimo ug sa imong mga anak sa paghimo og mas maayong mga pagpili bahin sa paggamit sa teknolohiya?

C. Hunong: Moundang una kon gikinahanglan.

Mga Salmo 46:10

Humilom kamo ug ilhon ninyo nga ako mao ang Dios.

Pangutan-a ang imong kaugalingon og sama sa “Naglikay ba ko sa sulod nga nahibal-an nako nga dili husto o walay mapuslanong tuyo?” ug “Nabati ba nako nga ang Espiritu mibiya?”

Ang praktikal nga mga sugyot sa pagpahulay og kadali gikan sa teknolohiya naglakip sa paghipos sa imong device ug sa pagpalayo, pag-ampo alang sa kalig-on, ug pagpakigsulti og tawo. Sa unsang paagi nga makaundang una ang imong pamilya gikan sa teknolohiya kon gikinahanglan?

V. Diskusyon sa Grupo

Karon nga nahisgotan na nato ang pipila ka praktikal nga pamaagi sa pagdumala sa teknolohiya, atong ablihan ang diskusyon ngadto sa grupo. Gusto kong makadungog gikan ninyong tanan mahitungod sa inyong mga kasinatian sa teknolohiya ug giunsa ninyo pagdumala kini sa inyong kinabuhi.

Unsa ang labing dagko nga hagit nga inyong giatubang sa pagdumala sa teknolohiya sa inyong panimalay?
Unsang mga hiyas ang gusto ninyong isilsil sa inyong mga anak bahin sa paggamit sa teknolohiya?
Sa unsang paagi ang teknolohiya nakaapekto sa mga relasyon ug komunikasyon sa inyong pamilya?
Sa unsang mga paagi nga gigamit ninyo ang teknolohiya isip usa ka pamilya? Sa unsang paagi kini nakabenepisyo o nakadaot sa kalidad sa inyong panahon nga magkauban?
Unsaon ninyo pagbalanse sa mga benepisyo ug mga disbentaha sa paggamit sa teknolohiya sa adlaw-adlaw nga kinabuhi sa inyong pamilya?
Unsa ang nakita ninyo nga papel sa teknolohiya sa edukasyon sa inyong anak? Unsaon ninyo pagseguro nga gamiton nila kini sa epektibong paagi?
Unsa ang epekto sa teknolohiya sa mental nga kahimsog sa inyong anak? Unsa ang mga lakang nga inyong buhaton aron mamenosan ang bisan unsang negatibo nga mga epekto?
Unsa ang mga limitasyon nga inyong gitakda sa paggamit og teknolohiya sa inyong panimalay? Unsaon ninyo sa pagpatuman niini?
Unsaon ninyo sa pagpakita og panig-ingnan sa maayong paggamit sa teknolohiya alang sa inyong mga anak?
Unsa nga mga kapanguhaan o suporta ang inyong gikinahanglan aron epektibong madumala ang teknolohiya sa inyong panimalay?
Unsa ang nahimong epekto sa teknolohiya sa akong relasyon ngadto sa akong mga anak?
Unsa ang pipila ka posibleng mga risgo nga nalanggikit sa paggamit sa teknolohiya diha sa panimalay? Sa unsang paagi ninyo mamenosan ang maong mga risgo?
Unsa nga mga hiyas ang gusto ninyong isilsil sa inyong mga anak bahin sa paggamit sa teknolohiya? Unsaon ninyo sa pagpakita niana nga mga hiyas sa inyong kaugalingon mismo?
Unsaon ninyo paghimo og plano sa teknolohiya alang sa inyong pamilya nga igo nga mapahiuyon sa mga pagbag-o ug mga hagit, apan maghatag gihapon og kahan-ay ug mga limitasyon?
Sa unsang paagi ninyo magamit ang teknolohiya isip himan sa pagpauswag sa pagkat-on ug paglambo sa inyong mga anak imbes nga tinubdan lang sa kalingawan o pagkalinga?

VI. Mga Sugyot alang sa Pagtudlo mahitungod sa Paggamit sa Teknolohiya sa Panimalay

Sugdi pinaagi sa paghisgot sa papel sa teknolohiya sa atong kinabuhi ug sa unsang paagi kini makaapekto sa pamatasan ug emosyon.

A. Ipasabot ang kaimportante sa pagdumala sa teknolohiya

Ipakigbahin kon sa unsang paagi ang teknolohiya mahimong himan alang sa kaayohan, apan mahimo usab kini nga problema kon kini ang magkontrol kanato. Ipasabot nga importante ang pagkontrol sa paggamit sa teknolohiya aron dili kini ang mokontrol kanato.

B. Itudlo ang praktikal nga mga sugyot alang sa pagdumala sa teknolohiya

Rebyoha ang matag sugyot sa pagdumala sa teknolohiya nga gilista diha sa mga notasyon sa artikulo (katuyoan, plano, ug paghunong). Ipasabot kon sa unsang paagi ang matag sugyot makatabang nila sa pagkontrolar sa paggamit sa teknolohiya.

C. Pagpahunahunaa og mga paagi nga magamit ang mga baroganan sa panimalay

Hisgoti ang lain-laing mga sitwasyon diin ang teknolohiya mahimong problema, sama sa paggahin og sobrang oras sa social media o pagdula og mga video game sa daghang oras sa walay hunong.

Pagpahunahuna og mga paagi nga magamit ang mga baroganan sa pagdumala sa teknolohiya niini nga mga senaryo, sama sa pagtakda og adlaw-adlaw nga mga limitasyon, paghimo og mga dapit diin didto gidili ang paggamit og device, o moundang una kon gikinahanglan.

D. Pag-awhag og bukas nga komunikasyon ug pagdawat og responsibilidad

Ipasabot nga importante ang bukas nga pag-istoryahanay mahitungod sa paggamit og teknolohiya sa pamilya ug sa paghimo nga ang matag usa may tulubagon sa paggamit sa teknolohiya.

Pagtakda og mga ekspektasyon ug mga patakaran alang sa paggamit sa teknolohiya sa panimalay ug awhaga ang tanan nga magtinabangay sa pagsunod niini.

E. Suknaa ug susiha

Suknaa ang imong mga anak matag karon ug unya aron makita kung unsa ang ilang nahimo sa pagdumala sa teknolohiya. Awhaga sila sa pagpangayo og tabang kon nagkinahanglan sila niini ug magmatinguhaon sa pagtanyag og suporta ug giya kon gikinahanglan.

F. Sumbanan sa maayong panig-ingnan sa paggamit sa teknolohiya

Ipasabot ang mahinungdanong papel sa mga ginikanan sa paghatag og sumbanan sa maayong paggamit sa teknolohiya. Nagpasabot kini nga nasayod sila sa paggamit sa ilang kaugalingong teknolohiya ug pagpakita og maayong panig-ingnan. Mahimong ipakita sa mga ginikanan ngadto sa mga bata nga malingaw sila sa teknolohiya nga wala kini magkontrol sa ilang kinabuhi ug ang paggamit sa teknolohiya mahimong balanse sa ubang importanteng mga kalihokan ug relasyon.

G. Gamita ang positibong pagpatuman

Hisgoti kon sa unsang paagi ang positibong pagpatuman magamit sa pag-establisar ug pagpalig-on sa maayong mga gawi ug pamatasan. Kon ang mga bata maningkamot sa pagkontrol sa ilang paggamit sa teknolohiya ug mogamit niini sa responsable nga paagi, importante ang pagdayeg ug pagdasig kanila.

H. Himoa kini nga usa ka pamilya nga paningkamot

Awhaga ang tanan sa pamilya nga magtinabangay sa paghimo og maayong relasyon sa teknolohiya. Ang pagdumala sa teknolohiya dili lamang usa ka indibiduwal nga paningkamot, apan pamilya nga paningkamot. Posibling maglakip kini sa paghimo og mga lagda sa pamilya ug mga limitasyon sa paggamit sa teknolohiya, pagpangita og alternatibong mga kalihokan nga buhaton isip usa ka pamilya, ug pagpahigayon og bukas ug matinud-anong komunikasyon mahitungod sa mga hagit ug mga kalamposan sa paggamit sa teknolohiya sa responsable nga paagi.

I. Pagmapailobon ug pagmasinabtanon

Magplano uban sa mga ginikanan kon unsaon nila sa pag-usab ang mga gawi ug kinaiya sa paggamit sa teknolohiya. Tabangi sila sa pagsabot nga magkinahanglan kini og panahon ug paningkamot. Importante nga magmapailobon ug magmasinabtanon samtang ang mga bata maningkamot sa pagkontrol sa ilang paggamit sa teknolohiya. Makatanyag sila og suporta ug giya samtang magpadayon, ug magsaulog sa ginagmayng mga kadaogan samtang ang mga bata mouswag ngadto sa mas maayong relasyon sa teknolohiya.

VII. Panapos

Ang teknolohiya usa ka milagroso nga himan, apan mahimo usab kini nga palas-anon kon dili nato kini gamiton sa maayong katuyoan. Pinaagi sa pagkontrol sa atong paggamit sa teknolohiya ug paggiya sa mga bata sa pagbuhat niini, atong maseguro nga dili kini mokontrol kanato. Hinumdomi ang paggamit sa teknolohiya sa mapuslanong paagi aron sa pagkat-on ug pagmugna, pagplano daan alang sa mas maayong mga pagpili, ug undang una kon gikinahanglan. Ato usab nga hinumdoman ang mga kasulatan nga nag-awhag kanato sa pagtutok sa mga butang nga tinuod, matinuoron, makiangayon, putli, matahom, ug maayo og dungog. Sa pagbuhat niini, makatabang kita sa mga bata sa paggamit sa teknolohiya nga luwas ug positibo.