Mifatoha amin’i Jesoa Kristy: Mampianara momba an’i Jesoa Kristy na inona na inona ampianarinao

Ampianaro ny momba ireo anarana fiantsoana an’i Jesoa Kristy sy ireo anjara asany ary ireo toetra ananany.

Fahaiza-manao

Mamoròna fanontaniana mampikaroka mba hanampiana ny mpianatra hamantatra ny anjara asan’i Jesoa Kristy, ireo anarana fiantsoana Azy, ireo fanehoana Azy an’ohatra, ireo toetra nananany, ary ireo toetoetrany.

Mamaritra

Rehefa mikatsaka ny hanampy ny mpianatra isika mba hanao fikarohana momba an’i Jesoa Kristy ao amin’ny soratra masina, dia afaka ny hahafantatra sy hitia Azy izy ireo. Fomba iray hamoronana fanontaniana mampikaroka iray izay manampy ny mpianatra hamantatra ny anjara asan’i Jesoa Kristy, ny anarana fiantsoana Azy, ny fanehoana Azy an’ohatra, ny toetra nananany, na ny toetoetrany ny fampidirana izao manaraka izao ao anatin’ny fanontanianao: (1) ilay andinin-tsoratra masina, (2) ny zavatra tianao hotadiavin’ny mpianatra (anjara asan’i Jesoa Kristy, ny anarana fiantsoana Azy, ny fanehoana Azy an’ohatra, ny toetra nananany, na ny toetoetrany), ary (3) ny fomba ahitan’ny mpianatra ireo zavatra ireo avy amin’ny ezaka ataony manokana. Tokony hapetraka ireo fanontaniana ireo alohan’ny hanasanao ny mpianatra hamaky ilay andinin-tsoratra masina mba hahatonga ny mpianatra ho vonona ny hamantatra ny zavatra azon’izy ireo ianarana momba an’i Jesoa Kristy.

Ireo lamina hakan-tahaka sy fanazaran-tena etsy ambany dia ohatra ankapobeny. Hahomby kokoa ny fanofanana raha toa ka mifandray amin’ireo lesona manaraka izay horesadresahina ao amin’ny fandaharam-pampianarana ny lamina hakan-tahaka sy ny fanazaran-tena.

Lamina hakan-tahaka

Diniho ireto fanontaniana manaraka ireto, dia jereo tsara ny fomba hampidiran’izany ny andinin-tsoratra masina, ny zavatra hotadiavin’ny mpianatra, ary ny fomba ahitan’ny mpianatra izany avy amin’ny ezaka ataony manokana:

• Rehefa mamaky ilay tantaran’ilay Samaritana tsara fanahy ao amin’ny Lioka 10:25–37 ianareo, dia inona no toetran’ Andriamanitra ananan’i Jesoa Kristy izay hitanareo?

• Rehefa mandalina ny Fotopampianarana sy Fanekempihavanana 29:1–8 ianareo dia mitadiava anarana fiantsoana sy anjara asan’i Jesoa Kristy telo samy hafa izay toa mifanaraka tsara amin’izay ilainareo amin’izao fotoana izao eo amin’ny fiainanareo.

• Rehefa mamaky ny Asan’ny Apostoly 3:1–7 ianareo dia inona no tsikaritrareo momba an’i Petera ka mampahatsiahy anareo an’i Jesoa Kristy?

Tsindrio eto raha hijery horonan-tsary maneho io lamina hakan-tahaka io.

Manazatra tena

Vakio ireto andinin-tsoratra masina manaraka ireto, dia manorata fanontaniana fikarohana ho an’ny andininy tsirairay izay manampy ny mpianatra hahita ny anjara asan’i Jesoa Kristy, ireo anarana fiantsoana Azy, ireo fanehoana Azy an’ohatra, ireo toetra nananany, ary ireo toetoetrany.

• Genesisy 45:3–5

• Fotopampianarana sy Fanekempihavanana 45:7–9

• 1 Nefia 3:1–7

Mifanakalo hevitra na misaintsaina

• Inona no zavatra nianaranao avy amin’io zavatra niainana io mikasika ny fahatongavana ho mpampianatra tahaka an’i Kristy?

• Ahoana no hanampian’izany ny mpianatsika sy ny fifanakalozan-kevitra ataontsika ao an-dakilasy mba hifantoka kokoa amin’i Jesoa Kristy?

Mampiditra fahalalana

• Rehefa mampiasa ny zavatra nianaranao mandritra ny fanazaran-tena ianao dia eritrereto ireo toe-javatra iainana sy ireo zavatra ilain’ireo mpianatrao eo am-pandalinanao mba hanomanana ny lesonao amin’ity herinandro ity. Manorata fanontaniana mampikaroka iray miaraka amin’ny andinin-tsoratra masina iray ao amin’ny lesonao izay hanampy ny mpianatra hahita ny anjara asan’i Jesoa Kristy, ireo anarana fiantsoana Azy, fanehoana Azy an’ohatra, ireo toetra nananany, ary ireo toetoetrany mba hanampiana azy ireo hifantoka Aminy. Soraty ireo fanontaniana tonga ao an-tsainao ary raha manana fotoana ianao, dia manaova fanazaran-tena mametraka ireo fanontaniana ireo amin’olona alohan’ny hametrahanao izany ao an-dakilasy. Hanampy anao izany mba hanatsara ny fanontanianao alohan’ny hampiasanao izany amin’ny mpianatrao.

Te hianatra misimisy kokoa ve ianao?

• Chad H Webb, “Miresaka an’i Kristy isika, mifaly amin’i Kristy isika” (Fampitana ny fivoriam-piofanana fanao isan-taona ho an’ny Seminera sy Institiota Fianarana ny Filazantsara, ny 12 jona 2018), broadcasts.ChurchofJesusChrist.org

Fahaiza-manao

Mametraha fanontaniana izay mamela ny mpianatra hamantatra ireo anjara asa afaka ananan’i Jesoa Kristy eo amin’ny fiainan’izy ireo.

Mamaritra

Afaka mifantoka amin’i Jesoa Kristy ny mpampianatra amin’ny alalan’ny fametrahana fanontaniana izay mamela ny mpianatra hamantatra ny anjara asa azony ananana eo amin’ny fiainan’izy ireo. Ireo fanontaniana ireo dia azo ampiasaina mba hanasana ireo mpianatra hijery ny anjara asan’i Jesoa Kristy mialoha na aorian’ny famakiana andinin-tsoratra masina iray na ny tenin’ireo mpaminany. Ireo fanontaniana ireo dia tokony hampitodika ny mpianatra amin’ny loharano iray, asao izy ireo hikaroka anjara asa iray izay azon’ny Mpamonjy ananan’ny Mpamonjy eo amin’ny fiainan’izy ireo, ary ampio izy ireo hisaintsaina ny fomba mety hampiharana izany amin’izy ireo. Rehefa manome fahafahana ireo mpianatra hamantatra ny anjara asa azon’ny Mpamonjy sahanina eo amin’ny fiainan’izy ireo ny mpampianatra dia hanampy azy ireo ny Fanahy Masina hahita ny halehiben’ny lanjan’i Jesoa Kristy eo amin’ny toe-javatra iainany amin’izao fotoana izao, ary haniry ny hanamafy ny fiarahana miasa Aminy izy ireo rehefa miatrika olana manokana.

Ireo lamina hakan-tahaka sy fanazaran-tena etsy ambany dia ohatra ankapobeny. Hahomby kokoa ny fanofanana raha toa ka mifandray amin’ireo lesona manaraka izay horesadresahina ao amin’ny fandaharam-pampianarana ny lamina hakan-tahaka sy ny fanazaran-tena.

Lamina hakan-tahaka

Ireto misy ohatra vitsivitsy amin’ireo fanontaniana azonao apetraka mba hanasana ireo mpianatra hamantatra ny anjara asa mety hananan’i Jesoa Kristy eo amin’ny fiainan’izy ireo:

• Raha miainga avy amin’ireo fampanantenana avy amin’ny Loholona Kearon ireo dia inona no anjara asa azon’i Jesoa Kristy sahanina eo amin’ny fiainanao ary afaka ny ho azonao amin’izao fotoana izao?

• Ahoana no ahafahana mampihatra ny anjara asa nananan’i Jesoa Kristy teo amin’ny fiainan’i Nefia (1 Nefia 7:16–18) amin’ny toe-javatra misy anao amin’izao fotoana izao?

Tsindrio eto raha hijery horonan-tsary maneho io lamina hakan-tahaka io.

Manazatra tena

Manorata fanontaniana iray izay hanampy ny mpianatra hamantatra ireo anjara asa sahanin’i Jesoa Kristy eo amin’ny fiainan’izy ireo ho an’ireto toe-javatra manaraka ireto:

• Mizara ity soratra masina ity ny mpianatra iray: “Tsy mba te hiverina Amiko va ianareo sy hibebaka amin’ny fahotanareo, ary hiova fo hahazoako manasitrana anareo?” (3 Nefia 9:13).

• Mizara ity teny nambaran’ny Filoha Russell M. Nelson manaraka ity ianao: “Rehefa miezaka miaina ireo lalàna ambony kokoa an’i Jesoa Kristy isika dia manomboka miova ny fontsika sy ny toetrantsika. Ny Mpamonjy dia mankahery antsika ao anatin’ity tontolo lavo ity amin’ny alalan’ny fanomezana antsika fiantrana, fanetrentena, fahalalahan-tanana, hatsaram-panahy, fifehezan-tena, fiadanana, ary fitsaharana” (“Mandresy izao tontolo izao ka mahita fiadanana,” Liahona, nôv. 2022, 97).

• Ohatra iray avy amin’ny lesona manaraka.

Mifanakalo hevitra na misaintsaina

• Inona no zavatra nianaranao rehefa nampihatra ireo fanontaniana ireo ianao?

Mampiditra fahalalana

• Ampiharo ao anatin’ny lesona manaraka ao anatin’ny herinandro vitsivitsy manaraka io fahaiza-manao io amin’ny alalan’ny fametrahana fanontaniana izay mamela ny mpianatra hahita ny anjara asa sahanin’i Jesoa Kristy eo amin’ny fiainan’izy ireo. Makà fotoana vitsy hizarana amin’ny mpiandraikitra anao ny vokatra ateraky ny fampiharana io fahaiza-manao io. Ifanakalozy hevitra ny fomba hanatsaran-javatra.

Te hianatra misimisy kokoa ve ianao?

• “Ampianaro ny momba ireo anarana fiantsoana an’i Jesoa Kristy sy ireo anjara asany ary ireo toetra nananany,” ao amin’ny “Mampianara mikasika an’i Jesoa Kristy na inona na inona ampianarinao,”Mampianatra araka ny fomban’ny Mpamonjy (2022), Médiathèque de l’évangile

• Chad H Webb, “Miresaka an’i Kristy isika, mifaly amin’i Kristy isika” (Fampitana ny fivoriam-piofanana fanao isan-taona ho an’ny Seminera sy Institiota Fianarana ny Filazantsara, ny 12 jona 2018), Mediathéque de l’évangile