« តែងតែត្រៀមខ្លួនរួចជាស្រេចជានិច្ច ដើម្បីឆ្លើយតបទៅនឹងការបំផុសគំនិតខាងវិញ្ញាណអំពីសេចក្តីត្រូវការរបស់សិស្ស » ជំនាញអភិវឌ្ឍន៍គ្រូបង្រៀន ៖ បង្រៀនដោយព្រះវិញ្ញាណ ( ឆ្នាំ២០២៣ )
« តែងតែត្រៀមខ្លួនរួចជាស្រេចជានិច្ច ដើម្បីឆ្លើយតបទៅនឹងការបំផុសគំនិតខាងវិញ្ញាណអំពីសេចក្តីត្រូវការរបស់សិស្ស » ជំនាញអភិវឌ្ឍន៍គ្រូបង្រៀន ៖ បង្រៀនដោយព្រះវិញ្ញាណ
គោលការណ៍ទាំងឡាយនៃការបង្រៀនដូចជាព្រះគ្រីស្ទ ៖ បង្រៀនដោយព្រះវិញ្ញាណ
តែងតែត្រៀមខ្លួនរួចជាស្រេចជានិច្ច ដើម្បីឆ្លើយតបទៅនឹងការបំផុសគំនិតខាងវិញ្ញាណអំពីសេចក្តីត្រូវការរបស់សិស្ស ។
ជំនាញ
សួរសំណួរដើម្បីវាយតម្លៃការរៀនសូត្រមុននឹងបន្តមេរៀនទៀត ។
កំណត់និយមន័យ
ការបង្រៀនតាមរបៀបរបស់ព្រះអង្គសង្គ្រោះ អញ្ជើញយើងឲ្យពិចារណានូវសំណួរដូចតទៅនេះ ៖ « តើសិស្សដែលអ្នកបង្រៀនដឹងទេថា អ្នកចាប់អារម្មណ៍លើការរៀនសូត្ររបស់ពួកគេ ជាជាងការខំបញ្ចប់មេរៀនតែមួយមុខ ? » គ្រូបង្រៀនអាចបង្ហាញថា ពួកគេចាប់អារម្មណ៍លើការសិក្សារបស់សិស្ស ដោយការសួរសំណួរឲ្យច្បាស់លាស់ មុនពេលបន្តទៅផ្នែកបន្ទាប់ទៀតនៃមេរៀន ។ ដើម្បីធ្វើដូច្នេះបាន គ្រូបង្រៀនត្រូវចំណាយពេលមួយនាទីបន្ទាប់ពីបានពិភាក្សាពីគោលការណ៍ ប្រធានបទ ឬសំណួរមួយហើយ ដើម្បីសួរសំណួរបញ្ជាក់អំពីអ្វីដែលសិស្សកំពុងយល់ ។ ឧទាហរណ៍មួយចំនួននៃសំណួរទាំងនេះរួមមាន ៖
-
តើអ្នកកំពុងតែរៀនអ្វីខ្លះ ?
-
តើអ្នកនៅតែមានសំណួរអ្វីខ្លះអំពីអ្វីដែលយើងកំពុងតែរៀននេះ ?
-
តើមានអ្វីផ្សេងទៀតដែលអ្នកកំពុងតែមានចម្ងល់ដែរឬទេ ?
-
តើមានការយល់ច្រឡំ ឬមិនច្បាស់ចំពោះការណ៍ទាំងនេះដែរឬទេ ?
សំណួរទាំងនេះវាយតម្លៃអំពីការរៀនសូត្រ និងការយល់ដឹងរបស់សិស្ស ហើយមិនគួរសួរតាមរបៀបមួយដែលអាចធ្វើឲ្យពួកគេអាម៉ាស់នោះឡើយ ។ ការសួរសំណួរទាំងនេះយាងព្រះវិញ្ញាណបរិសុទ្ធឲ្យជួយគ្រូបង្រៀនម្នាក់ដឹងអំពីរបៀបឆ្លើយតបចំពោះសេចក្ដីត្រូវការរបស់សិស្ស ។
គំរូ និងការអនុវត្តខាងក្រោមនេះគឺជាឧទាហរណ៍ទូទៅ ។ ការបំពាក់បំប៉ននឹងកាន់តែមានប្រសិទ្ធភាព ប្រសិនបើគំរូ និងឱកាសអនុវត្តត្រូវបានផ្សារភ្ជាប់ទៅនឹងមេរៀនបន្ទាប់ ដែលនឹងត្រូវបានបង្រៀននៅក្នុងកម្មវិធីសិក្សា ។
គំរូ
-
បន្ទាប់ពីការពិភាក្សាអំពីសេចក្ដីជំនឿហើយ បងស្រី រ៉ូប៊ីនសុន ផ្អាកបន្តិច ហើយសួរថា ៖ « មុននឹងយើងបន្តទៅបណ្តុំបទគម្ពីរបន្ទាប់ តើមានអ្វីផ្សេងទៀតដែលប្អូនៗកំពុងឆ្ងល់អំពីសេចក្ដីជំនឿដែរឬទេ ? »
-
បន្ទាប់ពីសិក្សាព្រះគម្ពីរអំពីការយាងមកជាលើកទីពីរ បងប្រុស មូន បានសួរថា « តើប្អូនៗនឹងពិពណ៌នានូវអ្វីដែលប្អូនៗកំពុងរៀនអំពីការយាងមកជាលើកទីពីរដោយរបៀបណា ? »
សូមចុចនៅត្រង់នេះដើម្បីមើលវីដេអូអំពីគំរូនេះ ។
អនុវត្ត
-
តើសំណួរអ្វីដែលអ្នកអាចសួរបាន ដើម្បីវាយតម្លៃអំពីការយល់ដឹងរបស់សិស្សបន្ទាប់ពីការពិភាក្សាអំពីវិវរណៈនៅក្នុង គោលលទ្ធិ និងសេចក្តីសញ្ញា ៨:២–៣ ?
-
សូមមើលមេរៀនបន្ទាប់នៅក្នុងកម្មវិធីសិក្សា ។ សូមសរសេរសំណួរមួយចំនួនដែលអ្នកអាចសួរបាន ដើម្បីវាយតម្លៃការយល់ដឹងរបស់សិស្សអំពីប្រធានបទមួយ មុនពេលបន្តទៅមុខទៀត ។
ពិភាក្សា ឬជញ្ជឹងគិត
-
តើសំណួរបែបនេះអាចជួយអ្នកឲ្យត្រៀមខ្លួនរួចជាស្រេច ដើម្បីឆ្លើយតបទៅនឹងការបំផុសគំនិតខាងវិញ្ញាណអំពីសេចក្តីត្រូវការរបស់សិស្សដោយរបៀបណា ?
រួមបញ្ចូល
-
នៅពីរសប្តាហ៍បន្ទាប់ទៀត សូមសួរសំណួរដើម្បីវាយតម្លៃការរៀនសូត្ររបស់សិស្ស មុននឹងបន្តមេរៀនទៅមុខទៀត ។ សូមយកចិត្តទុកដាក់ចំពោះការឆ្លើយតប និងការបំផុសគំនិតរបស់សិស្សអំពីព្រះវិញ្ញាណបរិសុទ្ធ នៅពេលអ្នកបញ្ចូលជំនាញនេះទៅក្នុងបទពិសោធន៍ក្នុងថ្នាក់ ។
តើចង់បានបន្ថែមទៀតទេ ?
-
« An Evening with Elder David A. Bednar » ( ជំនួបជាមួយនឹងអ្នកមានសិទ្ធិអំណាចទូទៅ ថ្ងៃទី៧ ខែកុម្ភៈ ឆ្នាំ២០២០ ) នៅលើគេហទំព័រ ChurchofJesusChrist.org
ជំនាញ
ស្តាប់ និងសង្កេតមើលសិស្សដើម្បីសួរសំណួរតាមដាន ។
កំណត់និយមន័យ
គ្រូបង្រៀនដែលសួរសំណួរតាមដានដ៏មានប្រសិទ្ធភាព សង្កេតមើលសិស្សរបស់ខ្លួនដោយប្រុងប្រយ័ត្ននៅក្នុងថ្នាក់ ហើយស្តាប់យ៉ាងយកចិត្តទុកដាក់ចំពោះចម្លើយ និងសំណួររបស់ពួកគេ ។ វិធីមួយចំនួនដើម្បីរៀបចំសំណួរតាមដានគឺ ៖
-
ស្តាប់ដោយយកចិត្តទុកដាក់ ដោយផ្តោតទៅលើអ្វីដែលសិស្សកំពុងនិយាយ រួមទាំងការបញ្ចេញអារម្មណ៍ និងសំឡេងផងដែរ ។
-
សង្កេតមើលទឹកមុខ កាយវិការ ឬអ្វីដែលសិស្សកំពុងធ្វើ ។
-
នៅពេលស្តាប់ និងសង្កេតមើល សូមសួរខ្លួនឯងថា « តើខ្ញុំចង់ដឹងអ្វីបន្ថែមទៀតទាក់ទងទៅនឹងការអធិប្បាយ សំនួរ ឬសិស្សទាំងនេះ ? » បន្ទាប់មក សូមសួរសិស្សអំពីអ្វីដែលអ្នកចង់ដឹង ។
សំណួរតាមដានអាចចាប់ផ្តើមដោយ « សូមប្រាប់ខ្ញុំបន្ថែមទៀតអំពី … » ឬ « គ្រូបានកត់សម្គាល់ឃើញការរំជួលចិត្តខ្លះៗ ពេលប្អូនចែកចាយ ។ តើប្អូនអាចជួយខ្ញុំឲ្យយល់ពីអារម្មណ៍របស់ប្អូនបានទេ ? » ចំណុចនេះអនុញ្ញាតឲ្យគ្រូបង្រៀននៅតែផ្តោតអារម្មណ៍ទៅលើសិស្ស ហើយផ្តល់ឱកាសឲ្យសិស្សចូលរួមចំណែកក្នុងកម្រិតកាន់តែជ្រាលជ្រៅ ។ បន្ថែមពីនេះទៀត វាអញ្ជើញវិវរណៈមកពីព្រះវិញ្ញាណសម្រាប់ទាំងសិស្ស និងគ្រូបង្រៀន ។
គំរូ
-
ហ័ន ចែកចាយបទពិសោធន៍មួយអំពីការអធិស្ឋានមួយដែលគ្រួសាររបស់គាត់បានទូលសូម ។ ដោយផ្អែកលើសំឡេងក្តុកកួលរបស់គាត់ ការអធិស្ឋាននោះហាក់ដូចជាមានន័យខ្លាំងណាស់ចំពោះគាត់ ។ ពេលបងស្រី រីវើរ៉ា ស្តាប់ឮហើយ គាត់សួរខ្លួនឯងថា « តើខ្ញុំចង់ដឹងអ្វីបន្ថែមទៀតអំពីបទពិសោធន៍នេះ ? » បងស្រី រីវើរ៉ា ចង់ដឹងថាតើគាត់រៀនអ្វីអំពីព្រះវរបិតាសួគ៌ ដូច្នេះបងស្រីបានសួរថា « ហ័ន តើប្អូនបានរៀនអ្វីខ្លះអំពីព្រះវរបិតាសួគ៌ចេញពីបទពិសោធន៍របស់ប្អូនជាមួយនឹងការអធិស្ឋាន ? »
សូមចុចនៅត្រង់នេះដើម្បីមើលវីដេអូអំពីគំរូនេះ ។
អនុវត្ត
ពេលអ្នកអានមតិយោបល់ខាងក្រោមមកពីសិស្ស សូមសួរខ្លួនឯងថា « តើខ្ញុំចង់ដឹងអ្វីបន្ថែមទៀត ? » សូមសរសេរសំណួរតាមដាន ដែលអ្នកអាចសួរសិស្សម្នាក់នេះបាន ។
-
សិស្សម្នាក់និយាយដោយក្តីរំភើបថា « កាលពីថ្ងៃមុន ខ្ញុំកំពុងអានបទគម្ពីរ ហើយបានរកឃើញឃ្លាមួយដែលខ្ញុំពិតជាត្រូវការស្តាប់ឮខ្លាំងណាស់ » ។
-
ដោយមានការខកចិត្តបន្តិចលើផ្ទៃមុខរបស់នាង សិស្សម្នាក់បានសួរថា « តើខ្ញុំអាចដឹងបានដោយរបៀបណាថា តើពេលណាវាជាគំនិតរបស់ខ្ញុំផ្ទាល់ ឬពេលណាជាព្រះវិញ្ញាណបរិសុទ្ធកំពុងមានបន្ទូលទៅ ? »
-
សិស្សម្នាក់និយាយថា « បទគម្ពីរនេះរំឭកខ្ញុំអំពីអ្វីដែលប្រធាន ណិលសុន បានមានប្រសាសន៍អំពីការធ្វើជាអ្នកដែលផ្សះផ្សាគេ » ។
ពិភាក្សា ឬជញ្ជឹងគិត
-
ហេតុអ្វីបានជាការស្ដាប់ និងការសង្កេតមើលមានសារៈសំខាន់ នៅពេលសួរសំណួរតាមដាន ?
-
ហេតុអ្វីបានជាការសួរសំណួរតាមដានជាផ្នែកដ៏សំខាន់មួយនៃបទពិសោធន៍ការរៀនសូត្រ ?
រួមបញ្ចូល
-
សូមបង្កើតផែនការមួយដែលអាចជួយអ្នកឲ្យបន្តស្តាប់ និងសង្កេតមើលដើម្បីសួរសំណួរតាមដាន ។
តើចង់បានបន្ថែមទៀតទេ ?
-
ដេវីឌ អេ បែដណា និង ឆាដ អេច វិប « Discussion » ( ជំនួបជាមួយនឹងអ្នកមានសិទ្ធិអំណាចទូទៅ ថ្ងៃទី៧ ខែកុម្ភៈ ឆ្នាំ២០២០ ) បណ្ណាល័យដំណឹងល្អ