Fitsipiky ny fampianarana tahaka ny an’i Kristy: Ampianaro ny fotopampianarana

Ampio ny mpianatra hitady sy hamantatra ary hahatakatra fahamarinana ao amin’ny soratra masina.

Fahaiza-manao

Mamoròna fanombanan-tena ho an’ny mpianatra izay hanampy azy ireo hamantatra hoe hatraiza ny fahatakaran’izy ireo sy ny fahaizany amin’izao fotoana izao mikasika ny fahaiza-manao amin’ny fandalinana soratra masina.

Mamaritra

Ny fanaovana tomban’ezaky ny tena manokana dia fomba manan-danja ianaran’ny mpianatra mampihatra fahafaha-misafidy sy handray andraikitra tanteraka amin’ny traikefa amin’ny fianaran’izy ireo. Ny fanasana matetika ny mpianatra hanombana ny fahaiza-manaony amin’ny fandalinana soratra masina dia hanampy ny mpampianatra hahafantatra ny traikefa amin’ny fianarana tokony hoforonina mba hanampiana ny mpianatra ho lasa mizaka tena amin’ny fandalinany soratra masina. Miseho amin’ny endrika maro ireo fanombantombanana ireo, toy ny maridrefy, fehezan-teny tsy misy valiny eny na tsia, na fanomezana isa ny tena. Izy ireny dia mamela ny mpampianatra hanampy ny mpianatra (1) hanombantombana ny traikefan’izy ireo amin’ny fandalinany soratra masina amin’izao fotoana izao, (2) hamantatra ny fanatsarana izay tian’izy ireo atao, ary avy eo dia (3) hisafidy fahaiza-manao hoenti-mandalina izay hitondra mankany amin’ny vokatra irin’izy ireo ho azo.

Lamina hakan-tahaka

Ireto manaraka ireto dia lamina hakan-tahaka samy hafa hanombanan-tena mikasika ny fahaiza-manao amin’ny fandalinana soratra masina:

• Amina maridrefy 1 hatramin’ny 10, hatraiza ny fatokian-tena ananako momba ny fahitana an’i Jesoa Kristy ao amin’ny toko rehetra?

• Mety hahay kokoa hitady an’i Jesoa Kristy ao amin’ny toko rehetra angamba aho raha toa ka …

• Fahaiza-manao hoenti-mandalina afaka manampy ahy hahita an’i Jesoa Kristy ao amin’ny toko rehetra ny …

Tsindrio eto raha hijery horonan-tsary maneho io lamina hakan-tahaka io.

Manazatra tena

Mamoròna fanombanan-tena momba ny fahaiza-manao amin’ny fandalinana soratra masina izay ahitana ireo singa telo voatanisa ao amin’ny fizarana “Mamaritra”. Manasà olona handinika izany sy hizara ny fomba hitondran’izany vokatsoa araka ny heviny.

Mifanakalo hevitra na misaintsaina

• Inona no ianaranao momba ny maha-zava-dehibe ny fanampiana ny mpianatra hanombana ny fahaiza-manaony manokana amin’ny fandalinana soratra masina?

• Rehefa ampiana hanombana ny fahaiza-manaony amin’ny fandalinana soratra masina ny mpianatra dia ahoana no ahafahan’izany mampitombo ny fahafahan’izy ireo hanana traikefa manan-danja kokoa amin’ny tenin’ Andriamanitra?

Mampiditra fahalalana

• Asao ny mpianatra hanombana samirery ny fahaiza-manaony amin’ny fandalinany manokana ny soratra masina isan-kerinandro manomboka izao ka hatramin’ny fiafaran’ny taom-pianarana.

• ChurchofJesusChrist.org

Fahaiza-manao

Hevero ireo fanontaniana amin’ny fitsapam-pahaizana mba hisafidianana amim-pahamalinana ireo haino vaky jery, tantaran’ny tena manokana, ary lesona ampiasana zavatra azo tsapain-tanana.

Mamaritra

Nampitandrina ireo mpampianatra seminera sy institiota ny Loholona Neil L. Andersen hoe “mitandrema tsara rehefa misafidy haino vaky jery sy tantara avy amin’ny tena manokana ary lesona ampiasana zavatra azo tsapain-tanana. Raha ampiasaina amin’ny fomba mahomby izany dia afaka mampitsiry fahalianana sy tanjaka. Fa raha antitranterina mihoatra ny tokony ho izy kosa izany dia mety hanelingelina ny fampianaranareo. Lasa ilay fomba fampianarana indray no mibahan-toerana kokoa noho ilay hafatra” (“Ny herin’i Jesoa Kristy sy ny fotopampianarana madio” [lahateny natao tamin’ireo mpampianatra ny filazantsara ao amin’ny Departemantan’ny Fampianarana an’ny Fiangonana, 11 jona 2023], Médiathèque de l’Évangile). Afaka mihaino io torohevitra io ny mpampianatra amin’ny alalan’ny fandinihana ireo fanontaniana amin’ny fanombanana izay manampy azy ireo hamaritra tsara ny safidin’izy ireo. Ireto manaraka ireto dia ohatra amin’ireo fanontaniana azonao apetraka amin’ny tenanao:

1. Manampy zava-mahaliana sy fahatakarana tsy mibahan-toerana ny zavatra ampianarina ve izany?

2. Hanampy ny mpianatra hahatakatra ny votoatin’ny lesona ve izany?

3. Handany fotoana be loatra ve izany?

4. Mampifandray ny mpianatra amin’ny Mpamonjy sy ny hafatra ve izany sa mitarika anay ho amin’ny zavatra hafa?

Rehefa miato mandritra ny fanomanana lesona ny mpampianatra mba hisaintsainana ny zavatra tian’izy ireo hampiasaina amin’ny alalan’ny haino vaky jery, na tantara, na lesona ampiasana zavatra azo tsapain-tanana, dia hanampy azy ireo hitandrina ny Fanahy Masina ary tsy hampivaona amin’izay kasain’ny hafatra ampitaina.

Ireo lamina hakan-tahaka sy fanazaran-tena etsy ambany dia ohatra ankapobeny. Hahomby kokoa ny fanofanana raha toa ka mifandray amin’ireo lesona manaraka izay horesadresahina ao amin’ny fandaharam-pampianarana ny lamina hakan-tahaka sy ny fanazaran-tena.

Lamina hakan-tahaka

• Manomana lesona momba ny Almà 5 Rahavavy Treu. Te hizara lesona ampiasana zavatra azo tsapain-tanana izy. Rehefa mamolavola ilay sahanasa izy ary manangona ireo fitaovana dia mametraka ity fanontaniana manaraka ity amin’ny tenany: “Hampifandray ny mpianatra amin’ny Mpamonjy ve ity lesona ampiasana zavatra azo tsapain-tanana ity sy ilay hafatra sa mitarika anay ho amin’ny zavatra hafa?” Nanapa-kevitra izy fa hampifandray ireo mpianatra amin’i Jesoa Kristy izany dia nampidiriny tao amin’ny drafitry ny lesony.

Tsindrio eto raha hijery horonan-tsary maneho io lamina hakan-tahaka io.

Manazatra tena

• Miomana hampianatra ny fitsipiky ny vavaka ianao. Manana horonan-tsary novokarin’ny Fiangonana momba ny vavaka tianao hozaraina ianao. Inona avy ireo fanontaniana azonao eritreretina mba hanapahana hevitra raha toa ka hampiasa io horonan-tsary io ianao na tsia? Mampiasà iray na maromaro amin’ireo fanontaniana etsy ambony na ny iray amin’ireo fanontaniana noforoninao mba hanapahana hevitra raha toa ka hampiasa ilay horonan-tsary ianao na tsia.

• Ho an’ny lesona manaraka dia fantaro hoe aiza no mety hampiasanao haino vaky jery sy tantaran’ny tena manokana ary lesona ampiasana zavatra azo tsapain-tanana. Inona avy ireo fanontaniana azonao heverina mba hanapahana hevitra ny amin’izay zavatra tokony hampiasaina?

Mifanakalo hevitra na misaintsaina

• Inona no zavatra nianaranao na tsapanao rehefa nampihatra io fahaiza-manao io ianao?

• Inona no mety hiova eo amin’ny traikefa amin’ny fianarana raha maka fotoana hanombanana ny fampiasanao ireo haino vaky jery sy tantara ary lesona ampiasana zavatra azo tsapain-tanana?

Mampiditra fahalalana

• Isaky ny manomana lesona ianao dia makà fotoana hiatoana sy hieritreretana ireo tanjonao amin’ny fampiasana haino vaky jery sy tantaran’ny tena manokana ary lesona ampiasana zavatra azo tsapain-tanana. Aoka ianao ho vonona ny hanova zavatra sy hampifanaraka izany amin’ny toe-javatra misy rehefa tarihin’ny Fanahy.

Te hianatra misimisy kokoa ve ianao?

• Neil L. Andersen, “Ny herin’i Jesoa Kristy sy ny fotopampianarana madio” [lahateny natao tamin’ireo mpampianatra ny filazantsara ao amin’ny Departemantan’ny Fampianarana an’ny Fiangonana, 11 jona 2023], Médiathèque de l’évangile