Ituro ang Doktrina

Magtuon sa mga katotohanang humahantong sa pagbabalik-loob at nagpapalakas ng pananampalataya kay Jesucristo.

Kasanayan: Magtanong ng mga bagay na makatutulong sa mga estudyante na matukoy at mabigyang-diin ang mga alituntunin na nagpapabalik-loob.

Ipaliwanag

Sinabi ni Pangulong Henry B. Eyring ng Unang Panguluhan, “Ang alituntuning nakapagpapabago ng kalooban ay ang yaong humahantong sa pagsunod sa kagustuhan ng Diyos” (“Converting Principles” [mensahe sa an evening with Elder L. Tom Perry, Peb. 2, 1996], 1. Ang isang paraan para matulungan ang mga estudyante na matukoy at maihayag ang mga alituntuning nagpapabalik-loob ay magtanong sa kanila ng isang tanong na naghihikayat sa kanila na maghanap ng mga parirala na tutulong sa atin na mapalakas ang ating pananampalataya at pagsunod sa kalooban ng Diyos. Ang isa pang paraan para matulungan silang matukoy at maihayag ang mga alituntuning nagpapabalik-loob ay magbigay ng mga follow-up na tanong matapos magbahagi ang isang estudyante ng kuwento, karanasan, o paliwanag. Ang mga follow-up na tanong ay nag-aanyaya sa mga estudyante na ipahayag ang kanilang mga komento sa simpleng paraan na nagpapalakas ng pananampalataya kay Cristo at ng kahandaang sundin ang kalooban ng Diyos.

Ipakita

Mga tanong sa pagsasaliksik:

1. Habang sinasaliksik mo ang Doktrina at mga Tipan 121:41–46, anong mga parirala ang nakikita mo na makahihikayat sa iyo na sundin at manampalataya sa kalooban ng Diyos?

2. Habang binabasa mo ang Josue 1:5–9, ano ang nakikita mo na tumutulong sa iyo na naising gawin ang kalooban ng Diyos?

3. Anong mga katotohanan ang nakikita mo sa Mateo 7:7–12 na makatutulong na mapalakas ang iyong pananampalataya kay Jesucristo at sumunod sa Kanya?

Ang mga tanong ding ito ay maaaring baguhin nang bahagya upang makabuo ng mga follow-up na tanong upang matulungan ang mga estudyante na maipahayag ang isang alituntunin ng pagbabalik-loob.

Karanasan ng estudyante: Ibinahagi ni Maria ang isang karanasan kung saan ang pagtatanong sa panalangin ay humantong sa sagot na ayaw niya.

Tanong ng guro: “Sa isang parirala, ano ang natutuhan mo mula sa karanasang iyon na makatutulong sa iba na manampalataya kay Jesucristo at sundin ang Kanyang patnubay?”

Paliwanag ng estudyante: Ibinahagi ni Kyle ang isang napakaganda ngunit mahabang paliwanag tungkol sa natutuhan niya sa kanyang pag-aaral ng mga banal na kasulatan kagabi.

Tanong ng guro: “Sa isang simpleng pahayag, ano ang natutuhan mo na tutulong sa inyo na mas mapalapit sa Ama sa Langit at kay Jesucristo?”

Kuwento ng estudyante: Ikinuwento ni Katana kung paano niya sinunod ang batas ng ikapu kahit mahirap ito.

Tanong ng guro: “Sa isang pangungusap, anong bahagi ng karanasang iyon ang makatutulong sa iyo na patuloy na manampalataya kay Cristo kapag mahirap sumunod sa Kanya?”

Mag-klik dito upang mapanood ang video tungkol dito.

Magpraktis

Magsulat ng mga tanong sa pagsasaliksik para sa mga sumusunod na talata sa banal na kasulatan:

• Santiago 1:5–6

• 2 Nephi 32:8–9

• Joseph Smith—Kasaysayan 1:11–13

Magsulat ng follow-up na tanong para sa bawat sitwasyon para matulungan ang mga estudyante na maipahayag ang isang alituntunin na nagpapabalik-loob:

• Ibinahagi ni Elena ang isang magandang personal na karanasan sa pagsunod sa pahiwatig ng Espiritu.

• Nagbigay si Chris ng magandang paliwanag tungkol sa natutuhan niya mula sa kuwento nina David at Goliath.

• Ibinahagi ni Mele ang isang personal na kuwento ng pagbaling kay Jesucristo nang pumanaw ang isang kapamilya.

Talakayin o Pagnilayan

• Ano ang natututuhan mo tungkol sa pagtulong sa mga estudyante na magtuon sa mga alituntunin na nagpapabalik-loob?

• Paano makatutulong ang gawaing ito sa mga estudyante na maituro ang doktrina na matatagpuan sa salita ng Diyos?

Isama

Sa training na ito nagpraktis ka ng dalawang kasanayan na tutulong sa mag-aaral na matukoy at malinaw na maipahayag ang mga alituntunin na nagpapabalik-loob: mga nagsasaliksik na tanong at mga follow-up na tanong. Habang iniisip mo ang iyong mga estudyante, pumili ng isang kasanayang gagamitin mo na magiging lubos na kapaki-pakinabang sa kanila. Sa linggong ito, habang inihahanda mo ang bawat talata mula sa mga banal na kasulatan, patuloy na itanong sa iyong sarili, “Paano ko matutulungan ang mag-aaral na matukoy at maipahayag ang isang alituntunin na nagpapabalik-loob?” Maaari mong isulat ang tanong na iyan bilang paalala habang naghahanda ka.

Pagkatapos mong isulat ang isang tanong na makatutulong sa estudyante na matukoy o maipahayag ang isang alituntunin na nagpapabalik-loob, subukang isipin kung paano ito sasagutin ng mga estudyante. Kung nakikita mo sa isipan mo na sasagutin nila ito gamit ang isang alituntunin na nagpapabalik-loob, huwag nang baguhin ito. Kung nakikita mo sa isipan mo na nahihirapan ang mga estudyante na magbigay ng alituntunin na nagpapabalik-loob, baguhin ang tanong para makatulong ito na maisakatuparan ang layunin nito.

Gusto Mo Bang May Matutuhan Pa?

• David A. Bednar, “Ang mga Alituntunin ng Aking Ebanghelyo,” pangkalahatang kumperensya, Abr. 2021

• Henry B. Eyring, “The Power of Teaching Doctrine,” pangkalahatang kumperensya, Abr. 1999