« ជំនាញ ៖ ប្រើគោលបំណងមេរៀនក្នុងកម្មវិធីសិក្សាដើម្បីធ្វើឲ្យការរៀបចំមេរៀនរបស់អ្នកសាមញ្ញ និងផ្ដល់ការណែនាំអំពីការជ្រើសរើសបទពិសោធន៍រៀនសូត្រសម្រាប់សិស្សរបស់អ្នក » ធនធានផ្តល់ការគាំទ្រ និងការបំពាក់បំប៉នដល់គ្រូបង្រៀន ( ឆ្នាំ២០២៤ )

ការរៀបចំមេរៀន

ជំនាញ ៖ ប្រើគោលបំណងមេរៀនក្នុងកម្មវិធីសិក្សាដើម្បីធ្វើឲ្យការរៀបចំមេរៀនរបស់អ្នកសាមញ្ញ និងផ្ដល់ការណែនាំអំពីការជ្រើសរើសបទពិសោធន៍រៀនសូត្រសម្រាប់សិស្សរបស់អ្នក ។

តើអ្វីជាការយល់ដឹង ឬសមត្ថភាពដំបូងរបស់ខ្ញុំ ? ( ការវាយតម្លៃ ) ៖

ជាមួយនឹងគោលបំណងមេរៀនដែលបានផ្ដល់ឲ្យសម្រាប់មេរៀននីមួយៗនៅក្នុងកម្មវិធីសិក្សាថ្នាក់សិក្ខាសាលា តើចំណុចណាមួយខាងក្រោមនេះដែលតំណាងល្អបំផុតឲ្យបទពិសោធន៍របស់អ្នក ?

ខ្ញុំមិនប្រាកដថាត្រូវស្វែងរកគោលបំណងនៃមេរៀននៅកន្លែងណាទេ ។
ខ្ញុំដឹងពីកន្លែងដែលត្រូវស្វែងរកគោលបំណងមេរៀន ប៉ុន្តែមិនប្រាកដពីរបៀបប្រើប្រាស់គោលបំណងមេរៀនឲ្យបានល្អនៅក្នុងការរៀបចំរបស់ខ្ញុំទេ ។
ខ្ញុំប្រើគោលបំណងមេរៀនជាទៀងទាត់ដើម្បីជួយខ្ញុំក្នុងការរៀបចំមេរៀនរបស់ខ្ញុំ ។

តើវាគឺជាអ្វី ហើយហេតុអ្វីបានជាវាសំខាន់ ? ( កំណត់និយមន័យ ) ៖

វិធីដ៏ល្អបំផុតមួយដើម្បីធ្វើឲ្យការរៀបចំមេរៀនសាមញ្ញ និងផ្ដល់នូវបទពិសោធន៍ដែលផ្តោតទៅលើព្រះគ្រីស្ទ មានមូលដ្ឋានលើព្រះគម្ពីរ និងផ្តោតលើបទពិសោធន៍របស់សិស្សសម្រាប់សិស្សរបស់អ្នក គឺត្រូវប្រើគោលបំណងមេរៀនដើម្បីណែនាំអ្នកនៅពេលអ្នករៀបចំ ។ ការប្រើគោលបំណងមេរៀនក៏អាចជួយឲ្យអ្នកមានភាពជឿជាក់ជាងមុនក្នុងការសម្របសម្រួលនូវអ្វីដែលអ្នកដាក់បញ្ចូល ធ្វើឲ្យសាមញ្ញ ឬមិនរួមបញ្ចូលពីក្នុងកម្មវិធីសិក្សាផងដែរ ។ មេរៀននីមួយៗនៅក្នុងកម្មវិធីសិក្សាថ្នាក់សិក្ខាសាលារួមមាននូវគោលបំណងមេរៀន ។ គោលបំណងមេរៀនមាននៅក្នុងទិដ្ឋភាពទូទៅប្រចាំសប្តាហ៍ និងកថាខណ្ឌទីមួយនៃមេរៀននីមួយៗ ។ គោលបំណងមេរៀនទាំងនេះផ្អែកលើការសិក្សាដោយយកចិត្តទុកដាក់ពីបណ្តុំបទគម្ពីរ ហើយលូតលាស់ចេញពីសេចក្ដីពិតដែលមានអក្សរដិតខ្មៅដែលបានពន្យល់នៅក្នុងមេរៀននេះ ។ ពេលអ្នកសិក្សាព្រះគម្ពីរ និងឯកសារមេរៀន សូមផ្តោតសំខាន់ទៅលើគោលបំណងមេរៀនមួយនៅក្នុងការរៀបចំរបស់អ្នក ដើម្បីស្វែងរកនូវអ្វីដែលនឹងជួយបំពេញតាមគោលបំណងនោះសម្រាប់សិស្សរបស់អ្នក ។ នេះគឺជារបៀបមួយដែលអ្នកអាចធ្វើការណ៍នេះបាន ៖

ចាប់ផ្ដើមដោយការអានគោលបំណងមេរៀនសម្រាប់មេរៀនដែលអ្នកនឹងបង្រៀន ។
អានមេរៀននៅក្នុងកម្មវិធីសិក្សាដោយចងចាំពីគោលបំណងមេរៀនក្នុងចិត្ត ហើយធ្វើការវាយតម្លៃថា តើអ្នកមានអារម្មណ៍ល្អយ៉ាងណា ចំពោះសកម្មភាពនីមួយៗដែលនឹងជួយសិស្សរបស់អ្នកឲ្យបំពេញតាមគោលបំណងនោះ ។
បន្ទាប់ពីអានមេរៀននេះហើយ ចូរកំណត់ថាតើសកម្មភាពណាមួយដែលអ្នកមានអារម្មណ៍ថានឹងជួយសិស្សរបស់អ្នកបានល្អបំផុតឲ្យសម្រេចបានគោលបំណងមេរៀននេះ ។ សូមធ្វើឲ្យសកម្មភាពទាំងនោះទៅជាអាទិភាពរបស់អ្នកចំពោះអ្វីដែលអ្នករៀបចំ ហើយនឹងធ្វើឲ្យសិស្សទទួលបានបទពិសោធន៍នោះនៅក្នុងថ្នាក់ ។

តើនរណា ឬតើអ្វីទៅដែលផ្ដល់នូវការពន្យល់ដ៏ល្អមួយអំពីការណ៍នេះ ? ( គំរូ ) ៖

បងស្រី ហល ចាប់ផ្តើមរៀបចំមេរៀន គោលលទ្ធិ និងសេចក្តីសញ្ញា ១ ។ គាត់ចាប់ផ្ដើមដោយការអានកថាខណ្ឌទីមួយនៃមេរៀនដោយស្វែងរកគោលបំណងរបស់វា ។ នៅផ្នែកខាងក្រោមនៃកថាខណ្ឌនោះ គាត់ឃើញឃ្លាមួយនិយាយថា « មេរៀននេះអាចជួយសិស្សឲ្យយល់ពីមូលហេតុដែលព្រះអម្ចាស់ប្រទានការព្រមានដល់លោកិយ » ។ ពេលគាត់កំពុងអានសកម្មភាពរៀនសូត្រ ដែលអាចមានសម្រាប់មេរៀននោះ គាត់ចងចាំពីគោលបំណងមេរៀនក្នុងចិត្ត ហើយធ្វើការសម្រេចចិត្តអំពីអ្វីដែលត្រូវប្រើ ធ្វើឲ្យសាមញ្ញ ឬអ្វីដែលមិនប្រើមកពីកម្មវិធីសិក្សានៅក្នុងមេរៀនរបស់គាត់ ។ នៅពេលគាត់រៀបចំ គាត់រកឃើញផ្នែកខ្លះៗនៃមេរៀនដែលគាត់ពិតជាចង់រួមបញ្ចូល ។ ឧទាហរណ៍ ស្វ័យវាយតម្លៃដែលជាបរិបទសម្រាប់ គោលលទ្ធិ និងសេចក្ដីសញ្ញា ១ សកម្មភាពដើម្បីជួយសិស្សឲ្យស្គាល់សេចក្ដីពិតដែលមានអក្សរដិតខ្មៅ និងសកម្មភាពចុងក្រោយដែលសិស្សស្រាយបំភ្លឺអំពីការរៀនសូត្ររបស់ពួកគេ គឺជាសកម្មភាពទាំងអស់ដែលគាត់ពិតជាចង់រួមបញ្ចូលណាស់ ។ ផ្នែកដែលនៅសល់នៃមេរៀន ដែលគាត់សម្រេចចិត្តកាត់ចេញ ឬធ្វើឲ្យសាមញ្ញ អាស្រ័យលើពេលវេលាក្នុងថ្នាក់ដែលគាត់មាន ។

តើខ្ញុំអាចហាត់រៀនប្រើជំនាញនេះ ឬអនុវត្តតាមគោលការណ៍នេះដោយរបៀបណា ? ( អនុវត្ត ) ៖

ចូលទៅកាន់កម្មវិធីសិក្សាសម្រាប់មេរៀនបន្ទាប់ដែលអ្នកត្រូវរៀបចំ ។
ស្វែងរកគោលបំណងមេរៀននៅក្នុងកថាខណ្ឌទីមួយ ។
មើលត្រួសៗអំពីសកម្មភាពរៀនសូត្រដែលអាចមាន ដោយចងចាំពីគោលបំណងមេរៀនក្នុងចិត្ត ហើយធ្វើការវាយតម្លៃថា តើអ្នកមានអារម្មណ៍ល្អយ៉ាងណា ចំពោះសកម្មភាពនីមួយៗដែលនឹងជួយសិស្សរបស់អ្នកឲ្យបំពេញតាមគោលបំណងនោះ ។
សម្រេចចិត្តថា តើសកម្មភាពណាមួយដែលអ្នកមានអារម្មណ៍ថានឹងជួយសិស្សរបស់អ្នកបានល្អបំផុតឲ្យសម្រេចបានគោលបំណងមេរៀននេះ និងជាអាទិភាពរបស់អ្នក ។

ជញ្ជឹងគិត ឬពិភាក្សា ៖

តើអ្នកកំពុងរៀនអ្វីខ្លះអំពីសារៈសំខាន់នៃការចងចាំពីគោលបំណងមេរៀនក្នុងចិត្ត នៅពេលអ្នករៀបចំមេរៀនរបស់អ្នក ?
តើអ្នកគិតថា ការរក្សាគោលបំណងមេរៀននៅក្នុងចិត្តអាចបង្កើនបទពិសោធន៍រៀនសូត្រសម្រាប់សិស្សរបស់អ្នកយ៉ាងដូចម្តេច ?

តើខ្ញុំនឹងរួមបញ្ចូលចំណុចនេះនៅពេលណា និងដោយរបៀបណា ?

សម្រាប់មេរៀននីមួយៗដែលអ្នករៀបចំនៅសប្តាហ៍បន្ទាប់នេះ សូមចាប់ផ្ដើមការរៀបចំរបស់អ្នកដោយការអានគោលបំណងមេរៀន ។ នៅពេលអ្នកអានកម្មវិធីសិក្សា សូមចងចាំពីគោលបំណងមេរៀនក្នុងចិត្ត ហើយធ្វើការវាយតម្លៃថា តើអ្នកមានអារម្មណ៍ល្អយ៉ាងណា ចំពោះសកម្មភាពនីមួយៗដែលនឹងជួយសិស្សរបស់អ្នកឲ្យបំពេញតាមគោលបំណងនោះ ។ សូមដាក់អាទិភាពលើសកម្មភាពដែលវាផ្តោតសំខាន់បំផុតអំពីគោលបំណងមេរៀនសម្រាប់សិស្សរបស់អ្នក ។