« ជំនាញ ៖ ការប្រើប្រាស់ការធ្វើការជាក្រុមក្នុងថ្នាក់ប្រកបដោយប្រសិទ្ធភាព » ធនធានផ្តល់ការគាំទ្រ និងការបំពាក់បំប៉នដល់គ្រូបង្រៀន ( ឆ្នាំ២០២៤ )

អញ្ជើញឲ្យរៀនសូត្រដោយឧស្សាហ៍ព្យាយាម

ជំនាញ ៖ ការប្រើប្រាស់ការធ្វើការជាក្រុមក្នុងថ្នាក់ប្រកបដោយប្រសិទ្ធភាព ។

តើអ្វីជាការយល់ដឹង ឬសមត្ថភាពដំបូងរបស់ខ្ញុំ ? ( ការវាយតម្លៃ )

តើអ្នកអញ្ជើញសិស្សរបស់អ្នកឲ្យចូលរួមក្នុងការធ្វើការជាក្រុមញឹកញាប់ប៉ុនណា ?
តើអ្នកធ្វើអ្វីខ្លះដើម្បីជួយពួកគេឲ្យមានបទពិសោធន៍ដ៏ជោគជ័យមួយ ?

តើវាគឺជាអ្វី ហើយហេតុអ្វីបានជាវាសំខាន់ ? ( កំណត់និយមន័យ ) ៖

ការធ្វើការជាក្រុមដែលមានប្រសិទ្ធភាពនៅក្នុងថ្នាក់កើតមានឡើង នៅពេលដែលសិស្សធ្វើការជាមួយគ្នា ជាក្រុមតូចៗដើម្បីស្វែងរក ពិភាក្សា និងធ្វើឲ្យការយល់ដឹងរបស់ពួកគេអំពីគោលការណ៍នៃដំណឹងល្អមានកាន់តែស៊ីជម្រៅ ។ ដោយការចូលរួមក្នុងការធ្វើការជាក្រុម សិស្សអាចបង្កើនសមត្ថភាពរបស់ខ្លួនក្នុងការពន្យល់ ចែកចាយ និងធ្វើជាសាក្សីអំពីសេចក្ដីពិតនៃដំណឹងល្អដល់គ្នាទៅវិញទៅមក ។ សូមពិចារណាអំពីសេចក្ដីណែនាំខាងក្រោមនេះ នៅពេលអ្នកបង្កើតសកម្មភាពធ្វើការជាក្រុម ៖

បង្កើតក្រុម ។
ផ្តល់នូវគោលបំណងច្បាស់លាស់ ( ប្រាប់ពីមូលហេតុដែលអ្នកចង់ឲ្យពួកគេប្រមូលផ្តុំគ្នា និងរយៈពេលដែលពួកគេមាន ) ។
ចែកចាយនូវអ្វីដែលពួកគេត្រូវធ្វើ ។
ចាត់តាំងតួនាទី និងការទទួលខុសត្រូវនៅក្នុងក្រុម ។
លើកទឹកចិត្តឲ្យមានការប្រាស្រ័យទាក់ទងគ្នា ។
ដើរជុំវិញក្រុមដើម្បីតាមដានការរីកចម្រើន ផ្ដល់សេចក្តីណែនាំ និងធានាថាសិស្សមានកិច្ចការធ្វើ ។
នៅពេលទទួលបានការអញ្ជើញ ក្រុមទាំងឡាយចែកចាយនូវអ្វីដែលពួកគេបានរៀនជាមួយនឹងសិស្សក្នុងថ្នាក់ទាំងមូល ។

ចំណាំ ៖ នេះគឺជាជំនាញដ៏ធំមួយដែលបានបង្កប់ជំនាញតូចៗជាច្រើន ។ វាអាចមានប្រយោជន៍ក្នុងការហាត់រៀនជំហាននីមួយៗនៃជំហានទាំងប្រាំពីរនេះ ។

តើនរណា ឬតើអ្វីទៅដែលផ្ដល់នូវការពន្យល់ដ៏ល្អមួយអំពីការណ៍នេះ ? ( គំរូ ) ៖

បងស្រី ចូនស៍ ចង់ជួយសិស្សរបស់គាត់ឲ្យប្រមូលផ្តុំគ្នានៅក្នុងក្រុមតូចៗដើម្បីពិភាក្សាអំពី ម៉ាថាយ ១១:២៨–៣០ ។ គាត់រៀបចំថ្នាក់ជាបីក្រុមតូចៗ ដោយក្រុមនីមួយៗមានសិស្សបួននាក់ ហើយសុំឲ្យសិស្សម្នាក់ក្នុងក្រុមនីមួយៗធ្វើជាអ្នកដឹកនាំ ។ គាត់បានឲ្យក្រដាសមួយសន្លឹកដល់ក្រុមនីមួយៗ ដោយមានការណែនាំ ហើយប្រាប់ពួកគេថា ពួកគេមានពេលប្រាំមួយនាទី ។ បងស្រី ចូនស៍ លើកទឹកចិត្តសិស្សឲ្យចែកចាយដោយបើកចំហជាមួយគ្នា ។ នៅពេលដែលគាត់ដើរជុំវិញថ្នាក់ គាត់អាចដឹងថា តើសិស្សកំពុងធ្វើតាមការណែនាំឬអត់ ហើយគាត់ធ្វើការកែតម្រូវនៅកន្លែងដែលចាំបាច់ ។

តើខ្ញុំអាចហាត់រៀនប្រើជំនាញនេះ ឬអនុវត្តតាមគោលការណ៍នេះដោយរបៀបណា ? ( អនុវត្ត ) ៖

សូមមើលមេរៀនបន្ទាប់ទៀត ហើយស្វែងរកកន្លែងដែលអ្នកចង់ឲ្យសិស្សរបស់អ្នកធ្វើការជាក្រុម ។ សូមមើលបញ្ជីឈ្មោះសិស្សរបស់អ្នក ហើយបែងចែកសិស្សរបស់អ្នកទៅជាក្រុម ។ សូមកំណត់គោលបំណងនៃសកម្មភាពជាក្រុម តើនរណាជាអ្នកដឹកនាំក្រុម និងអ្វីដែលអ្នកចង់ឲ្យពួកគេធ្វើ ។

ជញ្ជឹងគិត ឬពិភាក្សា ៖

តើអ្នកកំពុងរៀនអ្វីខ្លះ ដែលអាចជួយអ្នកឲ្យបង្កើនប្រសិទ្ធិភាពនៃការធ្វើការជាក្រុមក្នុងថ្នាក់របស់អ្នក ?

តើខ្ញុំនឹងរួមបញ្ចូលចំណុចនេះនៅពេលណា និងដោយរបៀបណា ?

ដោយប្រើសកម្មភាពដែលអ្នកបានរៀបរាប់ខាងលើ ឬខណៈពេលកំពុងរៀបចំមេរៀនផ្សេងបន្ទាប់ទៀត សូមកំណត់កន្លែងដែលអ្នកអាចប្រើជំនាញនេះ ។ សូមបន្តប្រើសេចក្តីណែនាំខាងលើនេះ នៅពេលដែលអ្នករៀបចំសកម្មភាពធ្វើការជាក្រុមនៅក្នុងមេរៀនរបស់អ្នកឲ្យបានញឹកញាប់តាមដែលសមរម្យ ។