« ជំនាញ ៖ សួរសំណួរដែលជួយសិស្សឲ្យឃើញភាពជាប់ទាក់ទងគ្នា ទៅនឹងគោលការណ៍នៃដំណឹងល្អ » ធនធានផ្តល់ការគាំទ្រ និងការបំពាក់បំប៉នដល់គ្រូបង្រៀន ( ឆ្នាំ២០២៤ )

អញ្ជើញឲ្យរៀនសូត្រដោយឧស្សាហ៍ព្យាយាម

ជំនាញ ៖ សួរសំណួរដែលជួយសិស្សឲ្យឃើញភាពជាប់ទាក់ទងគ្នា ទៅនឹងគោលការណ៍នៃដំណឹងល្អ ។

តើអ្វីជាការយល់ដឹង ឬសមត្ថភាពដំបូងរបស់ខ្ញុំ ? ( ការវាយតម្លៃ )

សូមសរសេរសំណួរមួយដែលជួយបង្កើនសមត្ថភាពរបស់សិស្សឲ្យមើលឃើញភាពជាប់ទាក់ទងគ្នា ទៅនឹងការថ្វាយបង្គំក្នុងព្រះវិហារបរិសុទ្ធ ។

តើវាគឺជាអ្វី ហើយហេតុអ្វីបានជាវាសំខាន់ ? ( កំណត់និយមន័យ ) ៖

ការសួរសំណួរដែលជួយសិស្សឲ្យមើលឃើញភាពជាប់ទាក់ទងគ្នាទៅនឹងគោលការណ៍នៃដំណឹងល្អ អាចជួយពួកគេឲ្យឃើញពីមូលហេតុដែលថា សេចក្ដីពិតដែលពួកគេកំពុងរៀននោះគឺសំខាន់ចំពោះពួកគេ ។ នៅពេលអ្នករៀបចំមេរៀន ចូរពិចារណាអំពីតម្រូវការរបស់មនុស្សដែលអ្នកបង្រៀន ហើយគិតអំពីរបៀបដែលសេចក្តីពិតនៅក្នុងព្រះគម្ពីរអាចមានអត្ថន័យ និងមានប្រយោជន៍នៅក្នុងកាលៈទេសៈរបស់ពួកគេ ។ របៀបមួយដែលអ្នកអាចជួយសិស្សឲ្យឃើញភាពជាប់ទាក់ទងគ្នាទៅនឹងសេចក្តីពិត ដែលពួកគេកំពុងស្វែងរក គឺតាមរយៈការសួរសំណួរបែបនេះ ៖

តើការណ៍នេះអាចជួយអ្នកជាមួយអ្វីដែលអ្នកកំពុងមានបទពិសោធន៍នាពេលឥឡូវនេះបានដោយរបៀបណា ?
ហេតុអ្វីបានជាវាសំខាន់សម្រាប់អ្នកដើម្បីដឹងរឿងនេះ ?
តើការណ៍នេះអាចធ្វើឲ្យមានភាពខុសគ្នាអ្វីខ្លះនៅក្នុងជីវិតរបស់អ្នក ?

( ការបង្រៀនតាមរបៀបរបស់ព្រះអង្គសង្រ្គោះ [ ឆ្នាំ២០១៦ ] ទំព័រ ២៣ ) ។

តើនរណា ឬតើអ្វីទៅដែលផ្ដល់នូវការពន្យល់ដ៏ល្អមួយអំពីការណ៍នេះ ? ( គំរូ ) ៖

នៅពេលដែលបងស្រី ឡាហ្វគីន រៀបចំបទពិសោធន៍រៀនសូត្រមួយស្តីពីគោលការណ៍នៃការអភ័យទោស នោះគាត់គិតថា តើគោលការណ៍នេះអាចមានប្រយោជន៍យ៉ាងណាចំពោះកាលៈទេសៈរបស់សិស្សគាត់ ហើយរៀបចំសំណួរខាងក្រោមនេះ ៖

« តើការសុំ ឬការទទួលបានការអភ័យទោស ជួយអ្នកជាមួយនឹងរឿងមួយចំនួនដែលអ្នកកំពុងជួបប្រទះនាសព្វថ្ងៃនេះដោយរបៀបណា ? »

តើខ្ញុំអាចហាត់រៀនប្រើជំនាញនេះ ឬអនុវត្តតាមគោលការណ៍នេះដោយរបៀបណា ? ( អនុវត្ត )

សូមសរសេរសំណួរមួយដែលជួយបង្កើនសមត្ថភាពរបស់សិស្សឲ្យមើលឃើញភាពជាប់ទាក់ទងគ្នាទៅនឹងគោលការណ៍ដូចខាងក្រោម ៖

ការស្តាប់ និងការធ្វើតាមការបំផុសគំនិតពីព្រះវិញ្ញាណបរិសុទ្ធ
ការទុកចិត្តលើព្រះអម្ចាស់
ការអធិស្ឋានជារៀងរាល់ថ្ងៃ

ជញ្ជឹងគិត ឬពិភាក្សា ៖

តើអ្វីជាអត្ថប្រយោជន៍ដែលអ្នកឃើញនៅក្នុងបទពិសោធន៍របស់សិស្ស នៅពេលអ្នកធ្វើឲ្យគោលការណ៍ទាំងនោះជាប់ទាក់ទងនឹងពួកគេ ?

តើខ្ញុំនឹងរួមបញ្ចូលចំណុចនេះនៅពេលណា និងដោយរបៀបណា ?

នៅពេលអ្នកត្រៀមខ្លួនសម្រាប់មេរៀនខាងមុខ សូមស្វែងរកវិធីដែលអ្នកអាចសួរសំណួរដែលជួយសិស្សឲ្យមើលឃើញភាពជាប់ទាក់ទងគ្នានេះ ។