« ជំនាញ ៖ លើកទឹកចិត្តសិស្សឲ្យចែកចាយតាមរយៈការអញ្ជើញពួកគេឲ្យឆ្លើយតបនឹងសំណួររបស់មិត្តរួមថ្នាក់របស់ពួកគេ » ធនធានផ្តល់ការគាំទ្រ និងការបំពាក់បំប៉នដល់គ្រូបង្រៀន ( ឆ្នាំ២០២៤ )

អញ្ជើញឲ្យរៀនសូត្រដោយឧស្សាហ៍ព្យាយាម

ជំនាញ ៖ លើកទឹកចិត្តសិស្សឲ្យចែកចាយតាមរយៈការអញ្ជើញពួកគេឲ្យឆ្លើយតបនឹងសំណួររបស់មិត្តរួមថ្នាក់របស់ពួកគេ ។

តើអ្វីជាការយល់ដឹង ឬសមត្ថភាពដំបូងរបស់ខ្ញុំ ? ( ការវាយតម្លៃ )

តើអ្នកអញ្ជើញសិស្សរបស់អ្នកឲ្យឆ្លើយតបទៅនឹងសំណួររបស់មិត្តរួមថ្នាក់ញឹកញាប់ប៉ុនណា ?

តើវាគឺជាអ្វី ហើយហេតុអ្វីបានជាវាសំខាន់ ? ( កំណត់និយមន័យ ) ៖

ការអញ្ជើញសិស្សឲ្យឆ្លើយតបទៅនឹងសំណួររបស់មិត្តរួមថ្នាក់របស់ពួកគេអាចលើកទឹកចិត្តពួកគេឲ្យចែកចាយ ផ្ដល់ឱកាសដើម្បីអនុវត្តសេចក្ដីជំនឿរបស់ខ្លួន និងត្រូវបានបង្រៀនដោយព្រះវិញ្ញាណបរិសុទ្ធ ។ ពេលសិស្សម្នាក់លើកឡើងពីសំណួរមួយ នោះគ្រូបង្រៀនម្នាក់អាចអញ្ជើញសិស្សផ្សេងទៀតឲ្យឆ្លើយតបបាន ដោយសួរសំណួរដូចជា ៖

តើមាននរណាម្នាក់អាចឆ្លើយតបទៅនឹងសំណួរដែល ហូសេ បានសួរឬទេ ?
សិស្សទាំងអស់គ្នា តើប្អូនៗនឹងឆ្លើយសំណួរនេះយ៉ាងដូចម្ដេច ?
តើមាននរណាម្នាក់ក្នុងថ្នាក់មានគំនិត ឬការយល់ដឹងអ្វីខ្លះអំពីសំណួរនេះដែរឬទេ ?

តើនរណា ឬតើអ្វីទៅដែលផ្ដល់នូវការពន្យល់ដ៏ល្អមួយអំពីការណ៍នេះ ? ( គំរូ ) ៖

ក្នុងអំឡុងពេលពិភាក្សាអំពីមូលហេតុដែលនីហ្វៃបានសម្លាប់ឡាបាន់ មានសិស្សម្នាក់បានលើកសំណួរឡើងថា « តើការសម្លាប់ពុំមែនជាការរំលោភបំពានលើបទបញ្ញត្តិរបស់ព្រះកុំឲ្យសម្លាប់មនុស្សឲ្យសោះទេឬអី ? » គ្រូបង្រៀនបានឆ្លើយតបដោយនិយាយថា ៖ « អរគុណប្អូន ដែលបានសួរសំណួរនេះ ។ តើមាននរណាម្នាក់ក្នុងថ្នាក់មានគំនិត ឬការយល់ដឹងអ្វីខ្លះអំពីសំណួរនេះដែរឬទេ ? » គ្រូបង្រៀនផ្អាកបន្តិច និងអនុញ្ញាតឲ្យសិស្សលើកដៃឆ្លើយតប ។

តើខ្ញុំអាចហាត់រៀនប្រើជំនាញនេះ ឬអនុវត្តតាមគោលការណ៍នេះដោយរបៀបណា ? ( អនុវត្ត ) ៖

សូមសរសេរសំណួរមួយដែលអ្នកអាចស្នើសុំឲ្យសិស្សឆ្លើយតបចំពោះសំណួរពីសិស្សដូចខាងក្រោម ៖

តើការទទួលនឹមរបស់ទ្រង់លើកមកដាក់លើខ្លួនយើងមានន័យយ៉ាងណា ?
តើខ្ញុំអាចទទួលទាននូវព្រះបន្ទូលទាំងឡាយនៃព្រះគ្រីស្ទដោយរបៀបណា ?

ជញ្ជឹងគិត ឬពិភាក្សា ៖

តើអ្នកកំពុងរៀនអ្វីខ្លះ នៅពេលដែលអ្នកបង្កើតសំណួរ ដែលអញ្ជើញសិស្សរបស់អ្នកឲ្យឆ្លើយតបទៅនឹងសំណួររបស់មិត្តរួមថ្នាក់របស់ពួកគេ ?
តើអ្នកមានអារម្មណ៍ថា ការឲ្យសិស្សឆ្លើយតបនឹងសំណួររបស់មិត្តរួមថ្នាក់ នឹងបង្កើនឲ្យមានការរៀនសូត្រសម្រាប់សិស្សរបស់អ្នកកាន់តែខ្លាំងប៉ុនណាដែរ ?

តើខ្ញុំនឹងរួមបញ្ចូលចំណុចនេះនៅពេលណា និងដោយរបៀបណា ?

ពេលសិស្សសួរសំណួរនៅសប្តាហ៍នេះ សូមប្រើអ្វីដែលអ្នកបានរៀនដើម្បីអញ្ជើញសិស្សឲ្យឆ្លើយតបតាមដែលសមរម្យ ។