« ជំនាញ ៖ អញ្ជើញសិស្សឲ្យកំណត់ និងប្រើការអញ្ជើញ និងការសន្យាមកពីការអញ្ជើញផ្ទាល់ខ្លួនឲ្យចូលរៀនថ្នាក់សិក្ខាសាលា ឬការអញ្ជើញផ្ទាល់ខ្លួនឲ្យចូលរៀនថ្នាក់វិទ្យាស្ថានរបស់ប្រធាន ណិលសុន ទុកជាការណែនាំដល់ពួកគេក្នុងការដាក់គោលដៅសិក្សាព្រះគម្ពីរផ្ទាល់ខ្លួនដ៏មានអត្ថន័យ » ធនធានផ្តល់ការគាំទ្រ និងការបំពាក់បំប៉នដល់គ្រូបង្រៀន ( ឆ្នាំ២០២៤ )

គោលដៅនៃការសិក្សាព្រះគម្ពីរ

ជំនាញ ៖ អញ្ជើញសិស្សឲ្យកំណត់ និងប្រើការអញ្ជើញ និងការសន្យាមកពីការអញ្ជើញផ្ទាល់ខ្លួនឲ្យចូលរៀនថ្នាក់សិក្ខាសាលា ឬការអញ្ជើញផ្ទាល់ខ្លួនឲ្យចូលរៀនថ្នាក់វិទ្យាស្ថានរបស់ប្រធាន ណិលសុន ទុកជាការណែនាំដល់ពួកគេក្នុងការដាក់គោលដៅសិក្សាព្រះគម្ពីរផ្ទាល់ខ្លួនដ៏មានអត្ថន័យ ។

តើអ្វីជាការយល់ដឹង ឬសមត្ថភាពដំបូងរបស់ខ្ញុំ ? ( ការវាយតម្លៃ ) ៖

តើអ្នកធ្លាប់បានប្រើ ឬតើអ្នកអាចប្រើ ការអញ្ជើញផ្ទាល់ខ្លួនឲ្យចូលរៀនថ្នាក់សិក្ខាសាលា ឬ ថ្នាក់វិទ្យាស្ថាន មកពីប្រធាន ណិលសុន ដើម្បីជួយសិស្សរបស់អ្នកឲ្យដាក់គោលដៅសិក្សាព្រះគម្ពីរដ៏មានអត្ថន័យដោយរបៀបណា ?

តើវាគឺជាអ្វី ហើយហេតុអ្វីបានជាវាសំខាន់ ? ( កំណត់និយមន័យ ) ៖

តាមរយៈព្យាការីរបស់ទ្រង់ ព្រះអម្ចាស់បានបង្រៀនម្តងហើយម្តងទៀតអំពីសារៈសំខាន់នៃការសិក្សាព្រះបន្ទូលរបស់ទ្រង់ ។ ការជួយសិស្សឲ្យស្គាល់ការអញ្ជើញ និងពរជ័យដែលបានសន្យាដោយពួកព្យាការីពីបុរាណ និងសម័យទំនើបអាចជួយពួកគេឲ្យទទួលស្គាល់នូវពរជ័យដែលពួកគេចង់បាន និងបង្កើនបំណងប្រាថ្នារបស់ពួកគេក្នុងការសិក្សាព្រះគម្ពីរ ។ វិធីមួយដើម្បីធ្វើបែបនេះ គឺត្រូវអញ្ជើញសិស្សឲ្យកំណត់ និងប្រើការអញ្ជើញ និងការសន្យានៃការសិក្សាព្រះគម្ពីរដែលបានផ្តល់ដោយប្រធាន ណិលសុន នៅក្នុងការអញ្ជើញផ្ទាល់ខ្លួនរបស់លោកឲ្យចូលរៀនថ្នាក់សិក្ខាសាលា ( រ័សុល អិម ណិលសុន « ការអញ្ជើញផ្ទាល់ខ្លួនឲ្យចូលរៀនថ្នាក់សិក្ខាសាលា » នៅលើគេហទំព័រ ChurchofJesusChrist.org ) ឬការអញ្ជើញផ្ទាល់ខ្លួនឲ្យចូលរៀនថ្នាក់វិទ្យាស្ថាន ( រ័សុល អិម ណិលសុន « ការអញ្ជើញផ្ទាល់ខ្លួនឲ្យចូលរៀនថ្នាក់វិទ្យាស្ថាន » នៅលើគេហទំព័រ ChurchofJesusChrist.org ) ហើយប្រើវាជាការណែនាំក្នុងការដាក់គោលដៅសិក្សាព្រះគម្ពីរផ្ទាល់ខ្លួនដ៏មានអត្ថន័យ ។ បន្ទាប់ពីរំឭកសិស្សថា ផ្នែកដ៏សំខាន់នៃបទពិសោធន៍ថ្នាក់សិក្ខាសាលា ឬថ្នាក់វិទ្យាស្ថានរបស់ពួកគេគឺត្រូវដាក់គោលដៅ និងធ្វើកិច្ចការឆ្ពោះទៅរកគោលដៅនៃការសិក្សាព្រះគម្ពីរផ្ទាល់ខ្លួនដ៏មានអត្ថន័យហើយ នោះអ្នកអាច

ឲ្យសិស្សអាន ឬមើល ការអញ្ជើញផ្ទាល់ខ្លួនឲ្យចូលរៀនថ្នាក់សិក្ខាសាលា ឬ ថ្នាក់វិទ្យាស្ថាន មកពីប្រធាន ណិលសុន ហើយស្វែងរកការអញ្ជើញ និងពរជ័យនានាដែលទាក់ទងទៅនឹងការសិក្សាព្រះគម្ពីរ
ឲ្យសិស្សចែកចាយនូវអ្វីដែលពួកគេរកឃើញ និង
អញ្ជើញសិស្សឲ្យស្វែងរកការដឹកនាំនៃព្រះវិញ្ញាណ ដើម្បីដឹងពីគោលដៅផ្ទាល់ខ្លួនរបស់ពួកគេ ដែលនឹងជួយពួកគេឲ្យខិតខំទទួលបានពរជ័យដែលបានសន្យាដែលពួកគេប្រាថ្នាចង់បាន ។

តើនរណា ឬតើអ្វីទៅដែលផ្ដល់នូវការពន្យល់ដ៏ល្អមួយអំពីការណ៍នេះ ? ( គំរូ ) ៖

បន្ទាប់ពីបានរំឭកសិស្សរបស់គាត់ថា ការណ៍មួយដ៍សំខាន់ និងមានអានុភាព ដែលពួកគេអាចទទួលបានចេញពីបទពិសោធន៍នៃថ្នាក់សិក្ខាសាលារបស់ពួកគេ គឺការបង្កើតទម្លាប់សិក្សាព្រះគម្ពីរហើយ បងប្រុស មេយើរ បានសង្កត់ធ្ងន់លើសារៈសំខាន់នៃការដាក់គោលដៅសិក្សាព្រះគម្ពីរ ។ បន្ទាប់មក គាត់បានឲ្យសិស្សរបស់គាត់នូវច្បាប់ចម្លងនៃអត្ថបទពី ការអញ្ជើញផ្ទាល់ខ្លួនឲ្យចូលរៀនថ្នាក់សិក្ខាសាលា មកពីប្រធាន ណិលសុន ។ គាត់អញ្ជើញពួកគេឲ្យស្វែងរក និងគូសចំណាំការអញ្ជើញ និងពរជ័យនានាដែលទាក់ទងទៅនឹងការសិក្សាព្រះគម្ពីរ កាលដែលពួកគេមើលវីដេអូនៃសារលិខិតនោះ ។ ក្រោយចប់វីដេអូនេះ បងប្រុស មេយើរ សុំឲ្យសិស្សរបស់គាត់ចែកចាយនូវអ្វីដែលពួកគេបានគូសសម្គាល់ និងការអញ្ជើញ ឬការសន្យាដែលលេចធ្លោចំពោះពួកគេ ។ បន្ទាប់មក គាត់អញ្ជើញពួកគេឲ្យចំណាយពេលមួយថ្ងៃ ឬពីរថ្ងៃបន្ទាប់ ដើម្បីស្វែងរកការដឹកនាំពីព្រះវិញ្ញាណប្រកបដោយការអធិស្ឋាន ដើម្បីដឹងពីគោលដៅអ្វីដែលពួកគេអាចដាក់ក្នុងការសិក្សាព្រះគម្ពីរផ្ទាល់ខ្លួន ដែលនឹងជួយពួកគេឲ្យខិតខំទទួលបាននូវពរជ័យ( ទាំងឡាយ )ដែលបានសន្យា ដែលពួកគេចង់បាន ។

តើខ្ញុំអាចហាត់រៀនប្រើជំនាញនេះ ឬអនុវត្តតាមគោលការណ៍នេះដោយរបៀបណា ? ( អនុវត្ត ) ៖

សូមសសេរឃ្លានីមួយៗដូចខាងក្រោមនេះ ៖

សំណួរ គំនិត ឬពាក្យដកស្រង់ដែលអ្នកអាចប្រើដើម្បីរំឭកសិស្សរបស់អ្នកអំពីសារៈសំខាន់នៃការដាក់គោលដៅ និងការធ្វើកិច្ចការឆ្ពោះទៅរកគោលដៅនៃការសិក្សាព្រះគម្ពីរផ្ទាល់ខ្លួន ។
ការអញ្ជើញមួយដែលអ្នកអាចប្រើដើម្បីជួយសិស្សរបស់អ្នកឲ្យស្គាល់ការអញ្ជើញ និងការសន្យាដែលទាក់ទងទៅនឹងការសិក្សាព្រះគម្ពីរ នៅពេលដែលពួកគេមើលសារលិខិតរបស់ប្រធាន ណិលសុន ឡើងវិញ ។
ការអញ្ជើញ ឬសកម្មភាពដែលអ្នកអាចប្រើដើម្បីជួយសិស្សរបស់អ្នកឲ្យចែកចាយ និងពិភាក្សាអំពីអ្វីដែលពួកគេបានរៀន ។
ការអញ្ជើញឲ្យស្វែងរកការដឹកនាំពីព្រះវិញ្ញាណនៅក្នុងការដាក់គោលដៅសិក្សាព្រះគម្ពីរផ្ទាល់ខ្លួនរបស់ពួកគេ ។

ជញ្ជឹងគិត ឬពិភាក្សា ៖

តើអ្នកបានរៀនអ្វីខ្លះ នៅពេលអ្នកបង្កើតការអញ្ជើញខាងលើ ?
តើអ្នកមានអារម្មណ៍ថា ការផ្តល់ឱកាសឲ្យសិស្សរបស់អ្នកមើលសារលិខិតរបស់ប្រធាន ណិលសុន តាមវិធីនេះអាចមានឥទ្ធិពលយ៉ាងណាទៅលើពួកគេ ?

តើខ្ញុំនឹងរួមបញ្ចូលចំណុចនេះនៅពេលណា និងដោយរបៀបណា ?

នៅសប្តាហ៍ខាងមុខនេះ សូមប្រើសកម្មភាពដែលអ្នកបានបង្កើត ( ឬសកម្មភាពមួយដែលស្រដៀងគ្នា ) ដើម្បីជួយសិស្សរបស់អ្នកឲ្យដាក់គោលដៅសិក្សាព្រះគម្ពីរដ៏មានអត្ថន័យ ។ ( ការណ៍នេះអាចងាយសម្របសម្រួល ដើម្បីលើកទឹកចិត្តសិស្សឲ្យឆ្លុះបញ្ចាំង វាយតម្លៃ ឬលើកទឹកចិត្តពួកគេឲ្យធ្វើកិច្ចការឆ្ពោះទៅរកគោលដៅដែលពួកគេបានដាក់រួចហើយ ) ។