Ուսուցանեք Հիսուս Քրիստոսի մասին՝ անկախ նրանից, թե ինչ եք ուսուցանում

Հիսուս Քրիստոսի վերականգնված ավետարանում ուսուցանելու շատ բաներ կան՝ սկզբունքներ, պատվիրաններ, մարգարեություններ և սուրբ գրությունների պատմություններ: Բայց դրանք բոլորը նույն ծառի ճյուղերն են, քանի որ դրանք բոլորն ունեն մեկ նպատակ. օգնել բոլոր մարդկանց գալ դեպի Քրիստոսը և կատարելագործվել Նրանում (տես Հարոմ 1․11, Մորոնի 10․32)։ Այսպիսով՝ անկախ նրանից, թե ինչ եք ուսուցանում, հիշեք, որ դուք իսկապես սովորեցնում եք Հիսուս Քրիստոսի մասին և այն մասին, թե ինչպես դառնալ Նրա նման: Սուրբ Հոգին կօգնի ձեզ սովորել, թե ինչպես հասկանաք Փրկչի և Նրա քավիչ զորության մասին ճշմարտությունները՝ ավետարանի յուրաքանչյուր սկզբունքի, պատվիրանի և մարգարեական ուսմունքի մեջ (տես Հակոբ 7.10–11):

Դուք ուսուցանո՞ւմ եք զոհաբերության մասին: Կարող եք սովորողների հետ ուսումնասիրել, թե ինչպես են մեր կատարած զոհաբերությունները մեր հոգիներին ուղղորդում դեպի Փրկչի «մեծ և վերջին զոհաբերությունը» (Ալմա 34.10): Դուք ուսուցանո՞ւմ եք միասնություն մասին: Կարող եք քննարկել այն միասնությունը, որը Հիսուս Քրիստոսը ձեռք բերեց Իր Հոր հետ, և Նրա հրավերը, որ մենք մեկ լինենք Նրանց հետ (տես Հովհաննես 17): Ավետարանի յուրաքանչյուր թեմա դիտարկեք որպես Հիսուս Քրիստոսի մասին ուսուցանելու և սովորելու հնարավորություն:

Յուրաքանչյուր պատվիրան նույնպես տալիս է այդ հնարավորությունը: Մի կենտրոնացեք միայն ավետարանի օրենքների վրա, սովորեք նաև Օրենսդիրի մասին: Եթե դուք քննարկում եք Իմաստության Խոսքը և կանգ առնում առողջ ապրելակերպի կարելիների և չի կարելիների վրա, ապա բաց կթողնեք խորհելու հնարավորությունն այն մասին, թե Հիսուս Քրիստոսը որքան շատ պետք է հոգար մեր և՛ հոգևոր, և՛ ֆիզիկական բարեկեցության մասին, որպեսզի մեզ տար այս օրենքը: Կենտրոնացեք, թե որքան պատրաստակամ է Փրկիչը, որ ցանկանում է օրհնել մեզ Իր զորությամբ՝ օգնելով մեզ ապրել Ի՛ր օրենքներով: Յուրաքանչյուր պատվիրան, որը Նա տալիս է մեզ, ինչ-որ բան է բացահայտում Նրա մտքի, կամքի և սրտի մասին. ուրախություն գտեք՝ միասին բացահայտելով դա:

Կարևորեք Հիսուս Քրիստոսի օրինակը

Մենք կարող ենք Հիսուս Քրիստոսին դնել ուսուցման և ուսման կենտրոնում՝ գիտակցելով և կարևորելով, որ Նա ավետարանի բոլոր սկզբունքների կատարյալ օրինակն է: Մենք՝ որպես աշակերտներ, պարզապես չենք հետևում սկզբունքներին, մենք հետևում ենք Հիսուս Քրիստոսին: Երբ մենք կենտրոնանանք Փրկչի կատարյալ օրինակի վրա, Սուրբ Հոգին կվկայի Նրա մասին և կոգեշնչի մեզ հետևել Նրան:

Մի պահ պատկերացրեք, որ դուք ուսուցանում եք մինչև վերջ համբերելու սկզբունքը։ Քննարկումն այն մասին, թե ինչպես է Փրկիչը մինչև վերջ համբերելու օրինակ ծառայել, կարող է Նրա հանդեպ գորովալից ակնածանքի զգացում առաջացնել: Նրա օրինակից ի՞նչ կարող են սովորել և զգալ այն մարդիկ, ում ուսուցանում եք:

Փրկիչը կատարյալ օրինակ ծառայեց բոլորիս համար: Նա բժշկեց նրանց բոլորին, Մայքլ Մալմ

Ուսուցանեք Հիսուս Քրիստոսի տիտղոսների, դերերի և հատկանիշների մասին

Հիսուս Քրիստոսը սուրբ գրություններում շատ տիտղոսներ ունի: Յուրաքանչյուրն արտացոլում է Աստծո ծրագրում Նրա դերերից մեկը և մեզ ուսուցանում է Նրա աստվածային հատկանիշների մասին: Դուք կարող եք սովորողների հետ ուսումնասիրել, թե ինչ են մեզ սովորեցնում Հիսուս Քրիստոսի մասին տիտղոսները, ինչպիսիք են՝ Աստծո Գառը, Բարեխոսը, մեր հավատքի Կատարողը և Աշխարհի Լույսը: Բացի այդ, օգնելով սովորողներին ավելին իմանալ Փրկչի մասին, ասեք ավելին քան այն, ինչ Նա ասաց և արեց, և պատմեք այն մասին, թե ով է Նա, և ինչպիսի դեր է Նա ցանկանում խաղալ մեր կյանքում: Երբ դուք միասին սովորեք Փրկչի բնավորության և հատկանիշների մասին, Սուրբ Հոգին կամրապնդի ձեր հասկացողությունը և սերը Նրա հանդեպ:

Գտեք խորհրդանիշներ, որոնք վկայում են Հիսուս Քրիստոսի մասին

«Բոլոր բաները»,- հայտարարեց Տերը,- «ստեղծվել և արարվել են իմ մասին վկայելու համար» (Մովսես 6.63, տես նաև 2 Նեփի 11.4): Այդ ճշմարտությունը նկատի ունենալով՝ մենք կարող ենք սովորել, թե ինչպես սուրբ գրություններում տեսնենք բազմաթիվ խորհրդանիշներ, որոնք վկայում են Փրկչի մասին: Այս խորհրդանիշները ներառում են այնպիսի բաներ, ինչպիսիք են հացը, ջուրը և լույսը: Երբ մենք հասկանանք, թե ինչպես են այս առարկաները կապված Փրկչի հետ, նրանք մեզ կսովորեցնեն Նրա զորության և հատկանիշների մասին: Դուք, նույնիսկ, կարող եք զուգահեռներ անցկացնել Փրկչի կյանքի և սուրբ գրություններում արձանագրված մարգարեների և այլ հավատարիմ տղամարդկանց ու կանանց կյանքի միջև: Փնտրելով խորհրդանիշներ՝ դուք Փրկչի մասին կբացահայտեք ճշմարտություններ այն հատվածներում, որոնք դուք այլ կերպ կարող էիք անտեսել: