Tij abaot Jisas Kraes Nomata Wanem Yu Stap Tijim

I gat fulap samting blong tijim insaed long gospel ia we i kambak, we i blong Jisas Kraes—ol prinsipol, ol komanmen, ol profesi, mo ol skripja stori. Be evriwan ia oli ol branj blong semfala tri ia, from oli gat wan stamba tingting: blong helpem evri pipol blong kam long Kraes mo kam stret evriwan tru long Hem (luk long Jerom 1:11; Moronae 10:32). Mekem se nomata wanem yu stap tijim, tingbaot yu rili stap tij abaot Jisas Kraes, mo olsem wanem blong kam olsem Hem. Tabu Spirit i save helpem yu blong lanem blong luksave ol trutok abaot Sevya mo paoa blong Hem blong pemaot man long wanwan gospel prinsipol, komanmen, mo ol tijing blong profet (luk long Jekob 7:10–11).

?Yu yu stap tij abaot sakrifaes? Tingting blong lukluk wetem olgeta we oli stap lan, olsem wanem ol sakrifaes we yumi mekem oli poenem sol blong yumi long “bigfala mo las sakrifaes” blong Sevya (Alma 34:10). ?Yu stap tij abaot fasin blong stap wan? Tingting blong tokbaot fasin blong stap wan we Jisas Kraes i winim wetem Papa blong Hem mo long invitesen blong Hem long yumi, blong yumi stap wan wetem Tufala (luk long Jon 17). Luk long evri gospel topik olsem wan janis blong tij mo lan abaot Jisas Kraes.

Evri komanmen oli givim janis ia. No lukluk nomo long ol loa blong gospel—lanem tu abaot Man we i Givim Loa. Sapos yu stap toktok raon long Tok blong Waes mo stop long wanem samting blong mekem mo no mekem blong stap helti, yu mestem janis ia blong tingting hevi long olsem wanem Jisas Kraes i kea bigwan long yumi—tugeta hemia long saed blong gudlaef blong spirit mo bodi—mekem se Hem i givim long yumi loa ia. Lukluk nomo long olsem wanem Sevya i wantem tumas blong blesem yumi wetem paoa blong Hem blong helpem yumi laef folem ol loa blong Hem. Evri komanmen we Hem i givim i soemaot wan samting abaot maen, mo tingting, mo hat blong Hem—!faenem glad ia taem yumi stap lukaotem hemia tugeta!

Tokbaot Bigwan Eksampol blong Jisas Kraes

Yumi save putum Jisas Kraes long medel blong ol tijing blong yumi mo luksave mo tokbaot se Hem nao i stret eksampol blong evri gospel prinsipol. Olsem ol disaepol, yumi no folem ol prinsipol nomo—yumi folem Jisas Kraes. Taem yumi lukluk nomo long gudfala eksampol blong Sevya, Tabu Spirit bae i testifae abaot Hem mo givim insperesen long yumi blong folem Hem.

Traem blong pikjarem blong wan smol taem se yu stap tijim prinsipol blong stap strong kasem en. Toktok raon long olsem wanem Sevya i wan eksampol blong stap strong kasem en i save karem ol blesing blong bigfala respek long Hem. ?Wanem nao olgeta we yu stap tijim oli filim aot long eksampol blong Hem?

Sevya i wan gudfala eksampol blong yumi evriwan. Hem I Hilim Olgeta Evriwan, i kam long Michael Malm

Tijim abaot Ol Taetol, Ol Rol, mo Ol Fasin blong Jisas Kraes

Jisas Kraes i gat fulap taetol we oli stap long olgeta skripja. Wanwan long yumi i lukluk long wan long ol rol blong Hem insaed long plan blong God mo i tijim yumi abaot ol tabu fasin blong Hem. Yu maet tingting blong lukaotem wetem olgeta we oli stap lan, ol taetol olsem Smol Sipsip blong God, Man blong Toktok long Bihaf,Stamba blong Bilif blong Yumi, mo Laet blong Wol i tijim yumi abaot Jisas Kraes. Mo, taem yu helpem olgeta we oli stap lan blong oli kam blong save moa abaot Sevya, i go moa long wanem Hem i talem mo mekem, i go kasem huia Hem mo wanem rol Hem i wantem plei insaed long laef blong yumi. Taem yufala i stap lan tugeta abaot fasin mo kwaliti blong Sevya, bae Tabu Spirit bae i mekem yu save moa abaot lav blong Hem, mo gat moa lav long Hem.

Lukaotem Ol Simbol we Oli Testifae abaot Jisas Kraes.

“Evri samting” Lod i talemaot, “mi bin krietem mo oli stap blong testifae abaot mi,” (Moses 6:63; luk tu long 2 Nifae 11:4). Wetem trutok i stap long maen, yumi lanem blong luk fulap simbol insaed long olgeta skripja we i testifae abaot Sevya. Ol simbol ia, sam long olgeta i gat bred, wota mo laet. Taem yumi andastanem se ol samting ia oli save komperem wetem Sevya, oli save tijim yumi abaot paoa mo fasin blong Hem. Yu save faenem sem stori long laef blong Sevya insaed long laef blong ol profet blong yumi mo ol narafala man mo woman we oli fetful we oli tokbaot olgeta insaed long olgeta skripja. Lukaotem ol simbol blong trutok abaot Sevya long ol narafala ples we yu no lukluk long hem.