Olsem ol tija blong gospel blong Jisas Kraes, yumi helpem ol narawan blong oli andastanem mo dipen long ol tijing, paoa, mo lav blong Hem.

Helpem Olgeta we Oli Stap Lan Oli Kam long Jisas Kraes

I no gat wan samting yu mekem olsem wan tija bae i blesem olgeta we oli stap lan moa bitim we yu helpem olgeta oli save abaot Papa long Heven mo Jisas Kraes mo filim lav blong Olgeta (luk long Jon 17:3). Tingting long sam long ol eksperiens we i helpem yu blong kam blong lavem Papa long Heven mo Jisas Kraes. ?Wanem nao yu yu bin mekem blong lanem abaot fasin, paoa mo lav blong Tufala? ?Olsem wanem nao lav blong yu long Papa long Heven mo Jisas Kraes i karem glad i kam long yu? Afta, tingting long wanem lav mo paoa blong Tufala i save mekem long wanwan man yu tijim. (Luk long Alma 26:16; Moses 5:11.)

Ful stamba tingting blong yumi long laef ia, hem i blong kam moa olsem Papa long Heven mo gobak mo stap wetem Hem. Long wei ia, yu save winim gol ia blong kam long Jisas Kraes (luk long Jon 14:6). Hemia from wanem, olsem we profet Nifae i tijim “mifala i tokbaot Kraes, mifala i glad long Kraes” (2 Nifae 25:26).

Evri pikinini blong God i nidim laet mo trutok we i kam long Sevya mo save jusum blong folem o no. Blong stap wan tija blong gospel blong Jisas Kraes, i minim se blong helpem ol narawan oli andastanem mo dipen long tijing blong Hem, paoa blong pemaot man, mo stret lav blong Hem. Tingting long, olsem wanem ol tingting ia we oli kam afta, oli save helpem yu blong givim insperesen long ol narawan blong kam blong save moa abaot Jisas Kraes mo blong folem Hem.

Helpem Olgeta we Oli Stap Lan blong Luksave Lav, Paoa,mo Sore blong Lod insaed long Laef blong Olgeta

Hem i gud blong save abaot lav, paoa, mo sore blong Sevya, be yumi nidim blong gat eksperiens long olgeta samting ia. Taem yumi save luk insaed long ol skripja olsem wanem Hem i blesem mo hilim ol pipol, hemia helpem yumi mekem fet blong yumi i kam moa antap blong Hem i save blesem mo hilim yumi. Eksampol: blong stap lanem abaot eksperiens blong Daniel i no finis evriwan sapos i no givim yumi insperesen ia blong trastem Lod taem yumi stap fesem ol hol blong laeon blong yumiwan.

Taem yu helpem olgeta we oli stap lan blong luksave “fulap sore” blong Lod (1 Nifae 1:20), tugeta insaed long ol skripja mo long eksperiens blong olgetawan, oli filim mo save se Lod i stap wetem olgeta mo stanap wetem olgeta wetem lav ( luk long Doktrin mo Ol Kavenan 68:6). Bae oli luk mo filim stret lav mo sore ia blong Lod long nid blong olgetawan mo long wanem situesen oli stap long hem.

Ol tija oli save helpem olgeta we oli stap lan blong gat wan eksperiens blong lav, paoa mo sore blong Sevya.

Helpem Olgeta we Oli Stap Lan blong Oli Mekem Rilesensip blong Olgeta wetem Papa long Heven mo Jisas Kraes I Kam Strong Moa

Stamba tingting blong tijim mo lanem abaot Jisas Kraes i blong helpem wanwan man, woman blong kam moa kolosap long Hem mo Papa blong yumi long Heven. Helpem ol pipol we yu stap tijim blong oli neva lusum lukluk blong olgeta long stamba tingting ia. Leftemap tingting blong olgeta blong oli mekem rilesensip blong olgeta wetem Papa long Heven mo Jisas Kraes i kam strong moa taem oli stap stadi olgeta skripja, sakem sin oltaem, toktok wetem Papa tru long prea, mo testifae abaot Papa mo Pikinini blong Hem. Tijim olgeta we oli stap lan tru long toktok mo eksampol long olsem wanem we, taem oli stap mekem mo kipim ol kavenan, i fasem yumi long Tufala. Helpem olgeta blong andastanem olsem wanem Tufala i lavem yumi. Mekem fet blong olgeta se, Jisas Kraes, tru long paoa blong Atonmen blong Hem we i stret gud, i rod ia nomo blong gobak long Papa blong yumi. Givim janis long olgeta we oli stap lan blong kasem wan witnes long Tabu Spirit, “we i testifae abaot Papa mo Pikinini” (Moses 5:9).

Helpem Olgeta we Oli Stap Lan blong Traehad blong Kam Moa Olsem Jisas Kraes

Be, long en, blong stap lanem abaot Jisas Kraes i givim yumi insperesen ia blong kam moa olsem Hem. Be blong kam olsem Hem i hapen nomo sapos yumi tekem aksen wetem fet, tugeta insaed mo aotsaed long klas, mekem ol gudfala joes blong folem eksampol blong Hem mo gladhat blong Hem. Invaetem olgeta we oli stap lan blong lukaotem help blong Tabu Spirit blong i lukaotem ol wei blong oli save kam moa olsem Sevya. Lukaotem blong givim gaed mo sapot olsem olgeta we i stap lan blong mekem yumi traehad blong kam moa olsem Hem long laef ia.

Jekob i tijim se “evri samting we God i bin givim stat long taem we wol i bin stat,” oli save tijim yumi abaot Jisas Kraes (2 Nifae 11:4). Tijing blong yu i wan long ol samting ia. Putum Jisas Kraes long medel blong wanwan tijing mo eksperiens blong stap lan. Taem we yu mo olgeta we oli stap lan, “i tokbaot Kraes,… glad long Kraes, … prij abaot Kraes” (2 Nifae 25:26), Tabu Spirit i save planem wan witnes abaot Sevya insaed long maen mo hat blong wanwan man mo woman. Taem yu stap helpem olgeta we oli stap lan blong kam blong save moa olgetawan abaot Papa long Heven mo Jisas Kraes, bae i luk olsem se bae oli tanem olgeta i go long Tufala blong kasem help, hop, mo hiling truaot long laef blong olgeta.