Tij wetem Spirit

Taem we Sevya i givim komanmen long Josef Smit mo Sidni Rigdon blong prijim gospel blong Hem, Hem i bin promesem tufala se: “Bae mi sendem Tabu Spirit i kam blong testifae long saed blong evri samting we bambae yutufala i talemaot” (Doktrin mo Ol Kavenan 100:8; luk tu long Doktrin mo Ol Kavenan 42:15–17; 50:17–22). Semfala promes ia, i stap go long olgeta we oli stap tijim gospel, mo i semmak long yu tu. Taem yu stap tijim gospel blong Jisas Kraes, yu save gat Tabu Spirit wetem yu blong i lidim yu mo blong i testifae abaot ol trutok long maen mo hat blong olgeta we yu stap tijim (luk long Doktrin mo Ol Kavenan 8:2). Yu no stap yuwan taem yu stap tij, “bambae i no yufala nomo i tok, be Tabu Spirit bambae i tok tru long maot blong yufala” (Mak 13;11).

Tabu Spirit i wan tru tija. I no gat wan tija long wol ia, i nomata oli gat skil o eksperiens ia, i save tekem ples blong Hem long rol ia blong witnes long trutok ia, blong i testifae abaot Kraes, mo i jenisim hat. Be evri tija oli save kam ol tul blong helpem ol pikinini blong God blong lanem samting tru long Tabu Spirit.

Tij wetem Spirit

• Rere yuwan long saed blong spirit.

• Yu mas oltaem rere blong ansa long ol nid blong olgeta we oli stap lan.

• Givim janis ia blong olgeta we oli stap lan blong Tabu Spirit i tijim olgeta.

• Helpem olgeta we oli stap lan blong lukaotem, luksave, mo folem revelesen blong olgetawan.

• Serem testemoni plante taem,mo invaetem olgeta we oli stap lan blong oli serem ol filing, eksperiens mo testemoni blong olgeta.

Sevya I Mekem Hemwan I Rere long Saed blong Spirit blong Tij

Blong rere from misin blong Hem, Jisas i spendem 40 dei long waelples “blong stap wetem God” (Josef Smit Translesen, Matiu 4:1 [insaed long Matiu 4:1, futnot b]). Be rere blong Hem long saed blong spirit i stat longtaem finis. Taem Setan i traem temtem Hem, Hem i save yusum “ol toktok blong laef” we Hem i holemtaet from “stret aoa ia” taem Hem i bin nidim olgeta (Doktrin mo Ol Kavenan 84:85). Tingbaot ol traehad blong yuwan blong yu rere yuwan long saed blong spirit. ?Wanem yu lanem aot long Matiu 4:1–11 abaot olsem wanem yu save folem eksampol blong Sevya taem yu stap rere long saed blong spirit?

Spirit nao i stret tija mo tru stamba ia blong jenisim laef. Gospel tijing we i gat paoa i no nidim nomo blong yu rere long wan lesen, be yu rere yuwan long saed blong spirit bifo yu tij. Be taem yu rere gud long yuwan long saed blong spirit, bambae yu save lisingud mo folem rod we Spirit i stap soem long yu taem yu stap tij. Wei blong invaetem Tabu Spirit long tijing blong yu i blong invaetem Hem i kam insaed long laef blong yu. Hemia i tekem tu blong traehad blong folem eksampol blong Sevya mo laef folem gospel blong Hem wetem ful hat blong yu. Mo from se i no gat wan long yumi i mekem ol samting ia stret evriwan, hemia i minim blong yumi sakem sin evri dei.

Ol Kwestin blong Tingting Hevi long Olgeta: ?Hem i minim wanem long yu blong yu rere long yuwan long saed blong spirit blong yu tij? ?Wanem nao yu filim insperesen blong mekem blong kam gud moa blong rere long yuwan long saed blong spirit? ?Olsem wanem nao yu tingting long rere long saed long spirit i save mekem wan samting i defren long wei we yu tij?

I Kam long Ol Skripja: Esra 7:10; Luk 6:12; Alma 17:2–3, 9; Doktrin mo Ol Kavenan 11:21; 42:13–14

Sevya Hem I Rere Oltaem blong Ansa long Ol Nid blong Ol Nara Man

Jaeras, wan man blong rul long haos blong prea, i foldaon long leg blong Jisas, mo i askem strong Hem blong i helpem pikinini gel blong hem we i stap rere blong i ded. Jisas mo ol disaepol blong Hem oli kam mo muvum ol man aot long rod blong go long haos blong Jaeras, taem Jisas i stop blong wokbaot. “?Hu i tajem mi?” Hem i askem. Kwestin ia bae i luk se i defren smol—long medel blong fulap man; ?hu nao i no stap tajem Hem? Be Sevya i i save se long medel blong ol man ia, i gat wan i kam long Hem wetem wan spesifik nid mo wetem fet blong kasem hiling we Jisas i stap givim. Bae i gat taem yet blong go luk pikinini gel blong Jaeras. Be fastaem, Hem i talem long woman ia we i tajem ol klos blong Hem se: “Dota blong mi, bilif blong yu i mekem yu yu gud bakegen. Yu go, yu nomo wari bakegen” (luk long Luk 8:41–48).

Olsem wan tija, samtaem bae yu faenem se bae yu hariap blong tijim evri samting we yu rere blong tijim. Hemia bae hem i impoten, be mekemsua se yu no hariap blong no lukluk long nid blong wan we yu stap tijim. Antap long fasin blong askem Spirit i lidim yu long taem we yu stap rere blong tij, yu mas lukaotem tu blong Spirit i lidim yu long taem we yu stap tij. Traem blong luksave ol nid, ol kwestin, mo ol samting we olgeta we oli stap lan oli intres long hem. Tabu Spirit i save helpem yu blong save olsem wanem olgeta we oli stap lan, oli kasem mo andastanem wanem yu stap tijim. Samtaem bae Hem i talem long yu blong jenisim plan blong tij blong yu. Eksampol, samtaem bae yu filim blong spendem moa taem bitim we yu plan from blong tijim wan topik, o blong yu lego sam toktok storian blong save tijim, naoia, wan samting we i moa impoten long olgeta we oli stap lan.

Ol kwestin blong Tingting Hevi long Olgeta: ?Wetaem yu filim se wan mama, papa o wan narafala tija i save long ol nid blong yu olsem wan we i stap lan? ?Olgeta we yu stap tijim olgeta, oli save se yu intres moa long wanem oli stap lanem bitim we yu intres blong flatem wan lesen? ?Olsem wanem nao yu save talemaot gud moa wanem yu intres long hem?

I Kam long Ol Skripja: 1 Pita 3:15; Alma 32:1–9; 40:1; 41:1; 42:1

Sevya I Givim Janis long Ol Pipol blong Tabu Spirit Nao I Tijim Olgeta.

I had long taem blong Jisas blong oli andastanem huia hem i Hem [Jisas], be i bin gat plante tingting i stap. “Sam man oli stap talem se yu yu Jon Baptaes,” ol disaepol blong Hem oli talem, “sam oli stap talem se yu yu Profet Elaeja. Mo sam narafala man oli stap talem se yu yu Profet Jeremaea, no wan long ol profet bifo.” Be afta Jisas i askem wan kwestin we i invaetem ol disaepol blong Hem blong putum long saed ol tingting blong narafala man mo lukluk insaed long hat blong olgeta: “?Be yufala, yufala i stap tokbaot mi, se mi hu?” Hem i bin wantem olgeta blong faenem ansa blong olgetawan “we i no man we i soemaot samting” be i kam long “Papa blong mi long heven.” Hemia i kaen witnes ia nao—revelesen blong yuwan we i kam long Tabu Spirit —we i mekem Pita i talem: “Yu yu Mesaea ia. Yu yu Pikinini blong God ia we i laef, i stap we i stap” (luk long Matiu 16:13–17).

Ol pipol we yu tijim olgeta oli nidim blong gat wan witnes long saed blong spirit, blong stap laef long saed blong spirit long ol las dei ia. Yu no save givim long olgeta, be yu save invaetem olgeta, leftemap tingting, givim insperesen, mo tijim olgeta blong lukaotem. Yu save mekem i klia—tru long ol toktok mo ol aksen blong yu—olsem wanem Tabu Spirit i impoten blong stap lanem gospel. Traem tingting long hemia, eksampol: ples we yu stap long hem blong tij mo leftemap tingting. Wan samting i simpol olsem wei blong putum ol jea long wan rum, o wei we yu welkamem mo storian wetem olgeta we oli stap lan, i invaetem Spirit blong olgeta we oli stap lan oli gat wan eksperiens. Yu save invaetem olgeta we oli stap lan blong oli rere long olgetawan blong oli lan, semmak olsem we yu yu stap rere long saed blong spirit blong tij. Askem olgeta blong tekem responsabiliti blong spirit ia we oli karem i kam. Mo yu save givim sam janis ia long olgeta blong filim Spirit ia we i testifae abaot Jisas Kraes mo gospel blong Hem. Bae witnes ia i kam “ston” blong olgeta, mo “paoa blong ded bambae i no naf blong winim [olgeta]” (Matiu 16:18).

Ol Kwestin blong Tingting Hevi long Olgeta: “?Wanem nao yu luk se i mekem Spirit i stap long ples we yu tijim gospel long hem?” ?Wanem nao i karemaot Spirit? ?Wanem nao i helpem ol pipol we yu stap tijim blong oli save lanem samting aot long Spirit? Tingbaot ples we bae yu tij long hem evri taem. ?Yu filim olsem wanem taem yu stap long ples ia? ?Olsem wanem nao bae yu save mekem Spirit i stap?

I Kam long Ol Skripja: Luk 24:31–32; Jon 14:26; 16:13–15; Moronae 10:4–5; Doktrin mo Ol Kavenan 42:16–17; 50:13–24

Taem yumi stap tij, yumi save invaetem olgeta we oli stap lan blong oli lukaotem witnes blong olgeta long saed blong spirit abaot trutok.

Sevya I Helpem Ol Narafalawan blong Lukaotem, Luksave, mo Tekem Aksen folem Revelesen blong Olgetawan

Lod i wantem yumi toktok long yumi—mo Hem i wantem yumi blong save se Hem i stap toktok wetem yumi. Long 1829, wan skul tija we i gat 22 yia we nem blong hem i Oliva Kaodri, i stap lanem abaot gud mo stret doktrin ia se eniwan i save kasem revelesen blong hemwan. Be hem i askem ol kwestin we i semmak we plante long yumi i stap askem: “?Lod ia i rili stap traem blong toktok long mi? ?Mo olsem wanem nao mi save wanem Hem i stap talem?” Blong ansarem ol kwestin ia, Jisas Kraes i invaetem Oliva Kaodri blong tingtingbak long wan praevet taem long lukaot samting long saed blong spirit. ?Olsem wanem? “?Mi no bin givim wan filing blong pis long maen blong yu long saed blong poen ia?” Hem i askem (luk long Doktrin mo Ol Kavenan 6:21–24). Afta long hemia, Hem i tijim Oliva abaot ol narafala wei we Spirit i save toktok long hem (luk long Doktrin mo Ol Kavenan 8:2–3; 9:7–9; luk tu long Doktrin mo Ol Kavenan 11:12–14).

Yumi stap laef long wan wol we, ol samting long saed blong spirit yumi no luksave, be yumi evriwan i nidim help blong haremsave voes blong Spirit. Bae yumi save filim Spirit be yumi no luksave. Mo yumi evriwan i save lanem moa abaot olsem wanem blong lukaotem Spirit, luksave wanem Hem i save mekem, mo tekem aksen long wanem Hem i talem long yumi. Taem yu stap tij, helpem olgeta we oli stap lan blong faenemaot ol wei we Spirit i save toktok long yumi—mo olsem wanem Hem i toktok long olgeta. Wan long ol bigfala presen, we yu, olsem tija, i save givim, hem i blong helpem olgeta we yu stap tijim blong oli kam antap long ful laef blong lukaotem revelesen blong olgetawan.

Ol Kwestin blong Tingting Hevi long Olgeta: ?From wanem hem i impoten blong yu lanem olsem wanem yu kasem revelesen blong yuwan? ?I gat wan man i helpem yu blong andastanem olsem wanem blong lukaotem mo luksave revelesen? ?Olsem wanem yu save leftemap tingting blong olgeta yu tijim blong oli lukaotem, luksave, mo tekem aksen folem revelesen we i kam long Tabu Spirit?

I Kam long Ol Skripja: Galesia 5:22–23; Alma 5:45–47; Doktrin mo Ol Kavenan 42:61; 121:33; Josef Smit—Histri 1:8–20

Sevya I Serem Testemoni long Olgeta we Hem I Tijim Olgeta

Long wan taem long tijing mo givhan blong Hem, Sevya i lukaotem blong givim kamfot long fren blong Hem Mata, we brata blong hem i jes ded. Hem i serem wan simpol testemoni blong trutok we i no save finis: “Brata blong yu bambae i laef bakegen” (Jon 11:23). Witnes blong Hem i mekem Mata i serem testemoni blong hemwan: “Mi mi save we bambae long Lasdei, hem i save laef bakegen, long taem ya we olgeta man bambae oli laef bakegen” (Jon 11:24). Luksave olsem wanem paten ia i ripit long Jon 11:25–27. ?Wanem nao i tajem yu abaot eksampol blong Sevya? ?From wanem blong serem ol trutok blong gospel i impoten pat blong tijing blong yu?

Testemoni blong yu i save givim strong tingting long olgeta we yu stap tijim. Hem i no nid blong toktok blong yu i flas, o i longfala. Mo i no nid blong i stat wetem: “Mi wantem serem testemoni blong mi.” Jes serem wanem yu save tru long paoa blong Tabu Spirit. Wan testemoni i gat moa paoa taem we yumi talem long fasin blong tok stret mo fasin blong talem wetem ful hat. Serem testemoni blong yu oltaem abaot Sevya, gospel blong Hem, mo paoa blong Hem long laef blong yu, mo leftemap tingting blong olgeta we yu stap tijim blong mekem sem samting. Mo tingbaot se, samtaem,witnes we i gat moa paoa i no kamaot long tija be long olgeta we oli stap lan.

Ol Kwestin blong Tingting Hevi long Olgeta: Lukaotem ol eksampol insaed long olgeta skripja we i soemaot wan man i serem wan strong testemoni. ?Wanem nao yu lanem aot long eksampol ia? ?Wetaem nao yu kasem blesing tru long testemoni blong wan narafala man? ?Olsem wanem nao, taem yu serem testemoni blong yu, i save helpem olgeta we yu tijim? ?Olsem wanem hem i jenisim tingting blong yu?

I Kam long Ol Skripja: Ol Wok 2:32–38; Mosaea 5:1–3; Alma 5:45–48; 18:24–42; 22:12–18; Doktrin mo Ol Kavenan 46:13–14; 62:3

Sam long Ol Wei we Yu Save Praktisim Wanem Yu Stap Lanem.

• Askem olgeta we oli stap lan blong serem wanem Tabu Spirit i tijim olgeta taem oli bin stadi long toktok blong God.

• Rere gud blong yu save kasem ol samting long saed blong spirit taem yu stap tij.

• Raetemdaon ol tingting we oli kam long maen blong yu tru long Spirit taem yu stap rere.

• Givim janis long ol memba blong klas blong oli stap kwaet mo tingting hevi long wanem Spirit i stap tijim olgeta.

• Yusum ol tabu miusik mo ol pikja blong invaetem Tabu Spirit.

• Lisin long ol toktok blong Tabu Spirit taem yu stap plan mo tij, mo blong wantem jenisim ol plan blong yu.

• Givim janis long olgeta we oli stap lan blong oli serem testemoni blong olgeta long wanem oli stap lanem.

• Helpem ol narawan blong oli luksave wetaem Spirit i stap.

• Stap laef folem ol trutok we yu stap tijim, blong mekem se yu save testifae abaot olgeta.

• Folem wanem Spirit i talem long yu blong tijim long ol taem we i nid blong i hapen we yu no plan from.