Te mau buka tei faaohipahia i roto i teie buka

E rave rahi te mau buka no roto mai i te reira te mau haapiiraa a te peropheta Iosepha Semita i te iriti-raa-hia mai, mai te History of the Church [Aamu o te Ekalesia]. Ua horo‘ahia teie mau buka i muri nei no te tauturu ia outou ia taa maitai i teie nei mau buka.

Te mau buka no reira mai te mau haapiiraa a te peropheta

Ua iritihia mai te mau haapiiraa a te peropheta Iosepha Semita i roto i teie buka na roto mai i teie mau huru vahi i muri nei.

Te mau A‘oraa. Te faahiti rahi nei teie buka i te mau a‘oraa tei horo‘ahia e te peropheta Iosepha Semita. Te huru i papa‘ihia’i teie mau a‘oraa e mea huru ê roa ïa i te huru i papa‘ihia te mau a‘oraa i muri iho a te mau peresideni o te Ekalesia. Ua faaohipa te mau eresideni o te Ekalesia i muri mai ia Iosepha Semita i te mau papa‘i parau no te papa‘i ma haapoto noa i ta ratou mau a‘oraa i te mau melo no te Ekalesia. A vai ai te mau rave‘a uira no te papa‘i, mai te mau matini haruharuraa reo e te mau hoho‘a teata, ua faaohipahia ïa te reira mau rave‘a no te haruharu i te mau parau papû a te feia faatere no te Ekalesia.

I roto râ i te oraraa o Iosepha Semita, aita te papa‘i-haapotoraa i faaohipa-rahi-hia. No reira, aita te mau a‘oraa ta’na i horo‘a i papa‘i papû maitaihia na roto i te papa‘iraa haapoto, e te mau papa‘i parau, te feia faatere no te Ekalesia, e te tahi ê atu mau melo no te Ekalesia. Fatata te mau a‘oraa a Iosepha Semita ua horo‘ahia i te reira ihoa taime, aita e a‘oraa faaineinehia, no te reira te mau papa‘iraa tei ravehia e te feia tei faaroo ia’na o te reira ïa ana‘e te mau papa‘iraa no te a‘oraa. Noa’tu e te vai nei te tahi mau faaiteraa roa no ta’na mau a‘oraa, te rahiraa o ratou e mau haapotoraa ïa no te mau parau poro‘i tei horo‘ahia e te peropheta. Aita râ hoi e papa‘iraa no te mau a‘oraa e rave rahi tei horo‘ahia e te peropheta. Hau atu i te 250 a‘oraa tei mana‘ohia e ua horo‘a oia, ua noaa noa na roto i te mau faaiteraa e te mau papa‘iraa tei ravehia e te mau papa‘i parau e 50 noa i te hanere o te mau a‘oraa tei horo‘ahia.

Te mau papa‘iraa i roto i te ve‘a. Te tahi o te mau haapiiraa a te peropheta i roto i teie buka no roto mai ïa i te mau papa‘iraa ta Iosepha Semita i faataa ia piahia i roto i te mau ve‘a a te Ekalesia, mai te Evening and Morning Star, Latter Day Saints’ Messenger and Advocate, Elders’ Journal, and Times and Seasons.¹ Ua papa‘i aore râ ua haapapa‘i o Iosepha Semita i te tahi mau parau no te nene‘iraa. Ua faaue pinepine ato‘a oia i te hoê papa‘i parau, aore râ te tahi melo no te Peresideniraa Matamua, aore râ te tahi taata ti‘aturihia no te papa‘i i te hoê parau no ni‘a i te tahi mau tumu parau taa ê ta’na e hinaaro ia tuatapapahia. E farii ïa te peropheta i muri iho i te parau, ma te fariiraa i te reira ei mana‘o no’na, e no te nene‘i i te reira i raro a‘e i to’na ra i‘oa. Ei hi‘oraa, te faahiti nei teie buka e rave rahi mau faahitiraa parau a te papa‘i ve‘a faatere tei nene‘ihia i roto i te Times and Seasons i te matahiti 1842. I roto i te hoê area taime e va‘u ava‘e i taua matahiti ra, mai te ava‘e Fepuare e tae atu i te ava‘e Atopa, ua riro na oia ei papa‘i ve‘a faatere no teie ve‘a e ua nene‘i pinepine oia i te mau papa‘iraa i raro a‘e i te i‘oa o « Ed ». Noa’tu e ua tauturu te tahi atu mau taata i te papa‘iraa e rave rahi o teie mau papa‘iraa, ua farii te peropheta ia ratou e ua nene‘i i te reira i raro a‘e i to’na i‘oa.

Te mau Rata. Te faahiti nei teie buka e rave rahi mau rata tei papa‘ihia aore râ tei parauhia e Iosepha Semita. Te faahiti ato‘a nei teie buka i te mau rata tei faati‘ahia e tei tarimahia e Iosepha Semita e tei faaineine tuhaahia aore râ i te taato‘araa na te tahi atu mau taata i raro a‘e i ta’na arata‘iraa.

Te mau buka aamu. Ua riro te mau buka aamu a te peropheta ei tuhaa rahi no ta’na mau haapiiraa. Noa’tu e e mea rahi ta’na mau buka aamu, aita râ oia i papa‘i pinepine i roto i te reira. Ua faaue oia e ia papa‘ihia ta’na mau buka aamu e te mau papa‘i parau, i raro a‘e i ta’na hi‘opo‘araa, ma te faati‘a ia’na ia haatumu i ni‘a i te mau hopoi‘a faufaa rahi no to’na piiraa. Hou i to’na taparahi-raa-hia ua parau oia, « no na matahiti e toru i ma‘iri a‘enei, te vai nei ta‘u te hoê buka no te mau mea ato‘a ta‘u i rave, no te mea ua faaohipa noa vau e rave rahi mau papa‘i parau maitai, haapa‘o e te aravihi; ua apee ratou ia‘u i te mau vahi ato‘a, e ua papa‘i ratou i to‘u nei aamu, e ua papa‘i ratou i te mau mea ato‘a ta‘u i rave, te mau vahi ato‘a i reira vau, e te mau mea ta‘u i parau ».² Ua papa‘i te mau papa‘i parau a te peropheta i te mau papa‘iraa i roto i te buka aamu ma te faaohipa i te ta‘o ‘o oia’, e ‘o vau’, mai te mea ra e o Iosepha Semita iho o te papa‘i ra.

Te mau haamana‘oraa a vetahi ê. Te faahiti nei teie buka i te mau haamana‘oraa a te mau taata tei faaroo i te peropheta i te a‘oraa e tei papa‘i i muri iho i ta’na mau parau i roto i ta ratou mau buka aamu e te tahi atu mau papa‘iraa. I muri a‘e i te poheraa o te peropheta, ua tautoo te feia faatere e te mau taata papa‘i aamu no te Ekalesia i te haaputuputu e te faaherehere i taua mau papa‘iraa ra e no te papa‘i i te mau haamana‘oraa tei ore i papa‘ihia na mua-’tu no ni‘a i te peropheta. Ua faaohipahia taua mau mea râ mai te mea ua faaroo mau te taata i te mau parau ta’na i papa‘i.

Te mau papa‘iraa mo‘a. Te faahiti nei teie buka i te mau haapiiraa e te mau papa‘iraa a Iosepha Semita tei faarirohia i muri iho ei papa‘iraa mo‘a i roto i te Parau Haapiiraa e te mau Parau Fafau e te Poe Tao‘a Rahi. Tei roto i taua mau papa‘iraa mo‘a ra te mau arata‘iraa ta’na i horo‘a no ni‘a i te mau haapiiraa, te mau orama ta’na i papa‘i, e te mau rata e te tahi atu mau parau ta’na i papa‘i. Te faahiti nei teie buka i teie mau haapiiraa e papa‘iraa tei faarirohia ei mau papa‘iraa mo‘a ia horo‘a ana‘e ratou i te tahi haamaramaramaraa i te mau haapiiraa tei hohorahia i roto i teie buka.

Te aamu o te Ekalesia

E rave rahi te mau a‘oraa e te mau papa‘iraa a te peropheta Iosepha Semita i roto i teie buka tei faahitihia mai roto mai i te Aamu no te Ekalesia a Iesu Mesia i te Feia Mo‘a i te mau Mahana Hopea nei., tei faahitihia i roto i teie buka mai te Aamu no te Ekalesia.³ Te faaite nei na buka e ono matamua no te Aamu no te Ekalesia i te aamu o te Ekalesia a Iesu Mesia i te feia mo‘a i te mau mahana hopea nei mai to’na haamataraa e tae noa’tu i te poheraa o Iosepha Semita. Te faaite mai nei teie aamu te mau oro‘a e te mau ohipa tei tupu tei tu‘atihia i te oraraa e te ohipa a Iosepha Semita. O te hoê ïa o te mau vahi faufaa rahi roa no te haamaramaramaraa no ni‘a i te aamu no ni‘a i te oraraa e te mau haapiiraa a te peropheta e te tupuraa o te Ekalesia i te haamataraa.

Ua haamata o Iosepha Semita i te faaineine i te aamu o tei riro mai i te hopea te Aamu no te Ekalesia i te tau mahanahana no te matahiti 1838 no te pato‘i atu i te mau parau hape o te nene‘ihia i roto i te mau ve‘a e te tahi atu mau vahi. Ua riro te faahoperaa i to’na aamu ei haape‘ape‘araa rahi no’na. I te matahiti 1843 ua parau oia, « te vai nei te tahi mau tumu parau e pe‘ape‘a rahi nei ia‘u no ni‘a i to‘u nei aamu, o tei riro hoi ei ohipa fifi roa ».⁴

Ua haamauhia te Aamu no te Ekalesia i ni‘a iho i te mau haamana‘oraa, te mau buka aamu e te tahi atu mau buka a te peropheta. Te faaite nei te reira i te hoê faaiteraa no te mau ohipa ta te peropheta i rave i te mau mahana ato‘a e te mau oro‘a faufaa rahi i roto i te aamu o te Ekalesia. Tei roto ato‘a i te reira te mau faaiteraa no ni‘a i te mau a‘oraa a te peropheta, te mau hoho‘a no te mau heheuraa ta’na i farii, te mau papa‘iraa no roto mai i te mau ve‘a a te Ekalesia, te mau minuti no te mau amuiraa e te tahi ê atu mau papa‘iraa.

Ua ohipa noa o Iosepha Semita i te faaineineraa e te tai‘o faahouraa i to’na aamu e tae noa’tu i to’na poheraa. Ua faatere râ oia i te taato‘araa o te ohipa tei ravehia e vetahi ê, i raro a‘e i ta’na hi‘opo‘araa. Te mau tumu no te reira o to’na ïa hinaaro tamau ia parau aore râ ia papa‘ihia i to’na mau mana‘o, eiaha râ no te papa‘iraa i te reira, e te mau titauraa tamau o ta’na ohipa. Te faaite nei te aamu o te peropheta i te 5 no tiurai 1839 e « te tai‘o nei au e ia papa‘ihia te aamu, te parau nei au e te tai‘o nei au, no te mea e mea varavara vau i te faaohipa i te peni tara ».⁵

I te ava‘e tiunu 1844 ua papa‘ihia te aamu e tae atu i te 5 no atete 1838. I roto i te fare tape‘araa no Carthage, hou noa‘e a pohe ai oia, ua faaue te peropheta ia Willard Richards, to’na papa‘i parau tumu i taua taime ra, ia tamau noa i te opuaraa ia papa‘i i te aamu.⁶ Ua tamau noa te taea‘e Richards e te tahi atu mau taata tei piri i te peropheta i te papa‘i i te aamu mai tei faauehia e tae noa’tu i te poheraa o te taea‘e Richards i te matahiti 1854. I reira ua ravehia aore râ ua faaterehia te papa‘iraa i te aamu e te taea‘e George A. Smith, te hoê fetii e te hoê hoa piri no te peropheta, tei faatoro‘ahia ei aposetolo i te matahiti 1839 e o tei riro mai ei papa‘i aamu no te Ekalesia i te matahiti 1854. E rave rahi atu mau taata tei rave i te ohipa i roto i te piha toro‘a no te taata papa‘i aamu no te Ekalesia e tei tauturu ato‘a i te papa‘iraa.

Te hoê ohipa faufaa rahi a te feia papa‘i no te Aamu no te Ekalesia o te tai‘oraa e te faaineineraa i te mau papa‘iraa no te tuu atu i roto i te aamu. Ta ratou ohipa o te raveraa ïa i te tahi mau tauiraa ha‘iha‘i fatata i roto i te mau papa‘iraa ato‘a tei tuuhia i roto i te Aamu no te Ekalesia. Ua faaafaro te feia papa‘i i te mau ta‘o tei papa‘i-hape-hia e ua faatano i te faatomaraa, te papa‘iraa na roto i te reta rahi, e te tarame. I te tahi mau taime, ua rave ato‘a te feia papa‘i i te aamu i te tahi atu mau tauiraa i te mau papa‘iraa matamua. Ua vahihia teie mau tauiraa i roto i na tuhaa e toru:

Te amuiraa i te mau faati‘araa. E rave rahi te mau a‘oraa a Iosepha Semita tei papa‘ihia e hau atu i te hoê taata papa‘i. I te tahi mau taime, ua amui te feia papa‘i no te aamu no te Ekalesia e piti aore râ hau atu o te mau faaiteraa no te hoê noa a‘oraa i roto i te hoê iritiraa parau ohie.
Te tauiraa i te mau faaiteraa mai te toru o te taata i te taata matamua. Ua papa‘ihia te mau faaiteraa no te mau haapiiraa e te mau ohipa a te peropheta i roto i te toruraa o te taata. Ua papa‘ihia teie nei mau faaiteraa e ta’na mau papa‘i parau, ua ravehia râ te tahi mau faaiteraa mai roto atu i te mau papa‘iraa a te tahi atu mau taata tei matau i te peropheta e na roto mai i te mau papa‘iraa i roto i te ve‘a. A rave ai te feia papa‘i no te Aamu no te Ekalesia i te ohipa, ua papa‘i ratou i te aamu i te taata matamua, mai te mea ra e te papa‘i ra te peropheta iho. Ua titauhia te reira ia ravehia te mau faaiteraa na roto i te tauiraa i te toruraa o te taata i te taata matamua.
Te apitiraa aore râ te tauiraa i te mau ta‘o aore râ te mau irava parau. E rave rahi mau papa‘iraa tei ravehia no te mau a‘oraa a te peropheta e mea poto, hope ore, aore râ aita e tu‘atiraa. I te tahi mau taime, ua hamani faahou te mau taata papa‘i aamu a te Ekalesia i te mau a‘oraa a te peropheta tei faaniuhia i te mau papa‘iraa o te vai nei, na roto ato‘a i te raveraa mai i to ratou mau haamana‘oraa e mau iteraa e te peropheta. Ua titau teie ohipa i te tahi mau taime ia apitihia aore râ ia tauihia te mau ta‘o aore râ te mau irava parau no te faaî i te mau area e no te haamaramarama i te auraa.

Ua ravehia te taato‘araa o te mau buka e te mau papa‘iraa o te Aamu no te Ekalesia i raro a‘e i te hi‘opo‘araa e te tai‘o-faahouraa a te mau aposetolo. Ua tai‘ohia te aamu i te mau melo no te Peresideniraa Matamua, mai te peresideni Brigham Young, e i te Pŭpŭ no te Tino Ahuru ma Piti Aposetolo, te tahi o ratou tei matau maitai i te peropheta e tei faaroo i te mau a‘oraa matamua. Ua farii teie feia faatere i te papa‘iraa hou te nene‘iraa ei aamu no te Ekalesia no te area taime i faahitihia.

I te ava‘e atete 1856 ua hope te aamu e tae noa’tu te taime o te poheraa o Iosepha Semita. Ua tatuhaahia te nene‘iraa o te aamu i roto i te mau ve‘a a te Ekalesia i te 19raa o te tenetere mai te « Aamu o Iosepha Semita »⁷ I muri iho, ua hi‘opo‘ahia te papa‘iraa e te taea‘e B.H. Roberts, e melo oia no te Peresideniraa no te mau Hitu Ahuru, e tei nene‘ihia i roto i te area matahiti 1902 e 1912 i roto e ono buka. Ua topahia te i‘oa Te Aamu no te Ekalesia a Iesu Mesia i te Feia Mo‘a i te mau Mahana Hopea nei.

Ua faaite te mau taata tei papa‘i i te aamu i te tanoraa o te ohipa. Ua parau te taea‘e George A. Smith; « Ua haapa‘o maitaihia e ia faaitehia te mau mana‘o mai te au i te huru parau a te peropheta, e i to‘u iteraa aita roa te mana‘o i taui noa‘e, no te mea ua faaroo vau iho i te rahiraa o ta’na mau a‘oraa, ua piri roa vau ia’na, ua haamana‘o maitai vau i ta’na mau haapiiraa, e ua matau roa vau i ta’na mau parau tumu e to’na mau hinaaro ».⁸

Ua parau te taea‘e George A. Smith e te taea‘e Wilford Woodruff: « Tei mua i to te ao nei te aamu o Iosepha Semita, e te mauruuru nei matou e aita roa‘e te hoê aamu hau atu i te afaro i teie i nene-‘ihia. Ua faatitiaifaro-maitai-hia te reira, ua haapa‘o maitaihia te mau mea ato‘a e te feia papa‘i aamu e te mau papa‘i parau tei rave i teie ohipa. Ua riro ratou ei mau mata e e mau tari‘a no te mau ohipa ato‘a tei papa‘ihia i roto i teie aamu, e ua faaitehia mai te rahiraa o te reira mai te au i to ratou tupuraa, e, i te mau vahi ato‘a aita ratou i reira, ua farerei atu ratou i te mau taata tei tae atu i reira. Hau atu i te reira, mai te poheraa o te peropheta Iosepha, ua hi‘opo‘a-faahou-hia te aamu i raro a‘e i te hi‘opo‘araa etaeta a te peresideni Brigham Young e ua fariihia e ana.

« No reira, te faaite nei matou i to matou iteraa papû i to te ao ato‘a nei, e tae atu hoi teie mau parau ia ratou ra, e e mea mau te aamu o Iosepha Semita, e o te hoê ïa o te mau aamu afaro roa‘e tei papa‘ihia ».⁹

I roto i teie buka, ua faahitihia te mau a‘oraa e te mau papa‘iraa a te peropheta Iosepha Semita mai roto mai i te Aamu no te Ekalesia mai te mea aita te a‘oraa aore râ te papa‘iraa matamua i tuuhia’tu i roto. Ia faahiti ana‘e teie buka i te mau parau no roto mai i te Aamu no te Ekalesia, tei roto i te mau parau i te hopea te haamaramaramaraa no ni‘a i te a‘oraa aore râ te papa‘iraa matamua, mai te mau i‘oa o te feia tei papa‘i i te mau a‘oraa a te peropheta. E faaite ato‘a mai te mau parau i te pae hopea i te taime a faaohipa ai te feia papa‘i i te Aamu no te Ekalesia i to ratou mau haamana‘oraa e te mau ohipa tei tupu ia ratou e ia Iosepha Semita no te taui i te mau ta‘o aore râ te mau irava parau i roto i te faaiteraa matamua. Ua faaitehia taua mau apitiraa aore râ tauiraa i te taime ana‘e e faahuru ê ai ratou i te auraa no te faahitiraa parau. Aita te mau tauiraa i roto i te papa‘iraa i tapa‘ohia.

Te buka tei piihia Iosepha Semita—Te aamu, mai tei papa‘ihia i roto i te Poe Tao‘a Rahi, o te hoê ïa iritiraa no roto mai i na pene matamua e pae no te buka matamua no te Aamu no te Ekalesia.