Te tatarahaparaa

« Ia haamata faahou ana‘e tatou i teie nei mahana, e ia parau ana‘e i teie nei, ma to tatou aau ato‘a e, e faaru‘e tatou i ta tatou mau hara e e vai parau-ti‘a tatou ».

No roto mai i te oraraa o Iosepha Semita

I te 14 no tiunu 1828, ua faaru‘e o Martin Harris i te oire no Harmony, Pennsylvania, ma te ta‘ita’i atu i na api 116 matamua tei papa‘i-rima-hia no roto mai i te mau api auro no te faaite atu i te tahi o te mau melo no to’na utuafare i Palmyra, New York. I te mahana ihoa i muri mai, ua fanauhia mai te tamarii matamua a Iosepha e Emma, te hoê tamaroa tei topahia e raua i te i‘oa ra o Alvin. Ua pohe te aiû i taua ihoa mahana ra, e te ea o Emma te haere iti noa ra ua haafatata mai te pohe ia’na. Ua papa‘i te metua vahine o te peropheta i muri iho; « no te tahi taime, e au ra ua rurutaina o [Emma] i te poheraa o ta’na aiû iti. E au ra aita i papû roa to’na huru no te hoê taime e i roto i te area e piti hepetoma aita roa‘e ta’na tane faaipoipo i taoto i te hoê noa‘e hora i roto i te hau haape‘ape‘a-ore-hia. I te hopea o taua taime ra, no te rahi o to’na mana‘o tapitapi no ni‘a i te mau api, i opua ai oia, no te mea hoi e ua maitai rii mai ta’na vahine i teie nei, e ia noaa mai te tahi puai i ta’na vahine, e haere oia i New York no te faaafaro i te parau no na 116 api tei papa‘i-rima-hia ».

I te ava‘e tiurai, na ni‘a i te mana‘o o Emma, ua vaiiho te peropheta ia Emma i roto i te rima o te metua vahine no ta’na vahine, e ua tere atu na ni‘a i te pereoo hutihia e te mau puaahorofenua i te nohoraa o to’na na metua i Manchester, New York. Fatata te 200 kilometera te roa o te tere o te peropheta e ua titauhia e piti aore râ e toru mahana no te tere. No to’na hepohepo no te faaru‘eraa o ta’na tamaiti fanau tahi, te pe‘ape‘a no ta’na vahine faaipoipo, te tapitapi rahi o te mana‘o no na 116 api tei papa‘i-rima-hia, aita o Iosepha i tamaa e i taoto noa‘e i te taato‘araa o te tere. Ua ite te tahi horopatete, o oia ana‘e te tahi atu horopatete, i te huru paruparu o te peropheta e ua onoono i te apee atu ia’na ma te haere avae noa e 32 kilometera mai te tape‘araa peroo e tae atu i te nohoraa o te mau Semita. No te 6 kilometera e te afa hopea no te haereraa, te haamana‘o ra te metua vahine o te peropheta, « ua ti‘a i te taata ĕê ia arata‘i ia Iosepha ma te tape‘a i to’na rima, no te rohirohi rahi eita to’na tino e maraa faahou i te amo ia’na e e vare‘a oia i te taoto a ti‘a noa’i oia i ni‘a i to’na na avae ».² I to’na ihoa taeraa’tu i te fare o to’na na metua, ua tono te peropheta i te tahi taata ia haere e tii ia Martin Harris.

Ua tae atu o Martin i te fare no Semita mâ i te avatea, ma te huru hepohepo e te hi‘oraa ati. Ua parau oia, aita te mau api ia’na ra, e aita oia i ite tei hea roa te reira. I to’na faarooraa i te reira parau, ua tuo o Iosepha: « Auê, To‘u Atua e, to‘u Atua e… Ua mo‘e te mau mea ato‘a, ua mo‘e. Eaha ïa ta‘u e rave? Ua hara vau. O vau hoi tei tamata i te riri o te Atua no te aniraa ia’na i te mea o ta‘u i ore e ti‘a i te ani atu… Nahea ïa vau ia haere atu i mua i te Fatu? Eaha ïa te faahaparaa ta te melahi o te Teitei Roa ra e tuu mai i ni‘a iho ia‘u? »

A tere noa’i te mahana, ua haere noa te peropheta na roto i te fare o to’na na metua ma te hepohepo rahi, « na roto i teta‘iraa e te otoraa ». I te po‘ipo‘i a‘e ua hoi atu oia i Harmony, i reira, mai ta’na i parau, « ua haamata vau i te faahaehaa ia‘u na roto i te pure u‘ana i mua i te Fatu… mai te mea e nehenehe ta‘u e farii i te aroha no ŏ mai ia’na ra e ia faaorehia te mau mea ato‘a ta‘u i rave tei ore i tano i to’na ra hinaaro ».³

Ua faahapa u‘ana te Fatu i te peropheta no te măta‘uraa i te taata hau atu i te Atua iho, ua haapapû maira te Fatu e e nehenehe ta’na e faaore i te hara a Iosepha. Ua parau te Fatu « o Iosepha oe, e ua ma‘itihia oe ia rave hoi i te ohipa a te Fatu, na roto râ i te haapa‘o ore, ia ore oe ia ara maitai e hi‘a ïa oe. A haamana‘o ra e, e aroha to te Atua; no reira, a tatarahapa i ta oe ohipa au ore i te faaueraa ta‘u i horo‘a’tu ia oe na, e ua vai â to oe ma‘itiraa ia oe na, e ua vai â to oe ma‘itiraa i reira, e ua parau-faahou-hia hoi i te ohipa » (PH&PF 3:9–10).

No te hoê tau, ua rave te Fatu i te Urima e te Tumima e te mau api mai roto atu ia Iosepha. Area râ e faahoi-faahou-hia mai teie mau mea ia’na. « Ua oaoa te melahi a faahoi mai ai oia i te Urima e te Tumima ia‘u », te haamana‘o ra te peropheta, « ua parau oia e ua mauruuru te Atua no to‘u haapa‘o-maitai-raa e to‘u haehaa, ua here oia ia‘u no to‘u tatarahaparaa e to‘u itoito i te pure, e i te mea hoi e ua rave maitai au i ta‘u hopoi‘a, i nehenehe ai ia‘u ia haamata faahou i te ohipa no te iritiraa.⁴ A nuu atu ai o Iosepha i mua i roto i te ohipa rahi i mua ia’na, ua faaitoitohia oia i teie nei e te mau mana‘o maitai e ua faaore mai te Fatu i ta’na mau hara e ua farii oia i te hoê faaotiraa faaapîhia no te rave i To’na ra hinaaro.

Te mau haapiiraa a Iosepha Semita

Na roto i te tatarahaparaa i ta tatou mau hara, e haafatata’tu tatou i te Atua e e rahi atu â to tatou riroraa mai Ia’na ra te huru

Ua papa‘i o Wilford Woodruff, a tavini ai oia ei melo no te Tino Ahuru ma Piti Aposetolo: « Ua ti‘a mai o Iosepha te Hi‘o i roto i te puai o te Atua; ua faahapa e ua tiavaru i te ino i mua i te taata, i te i‘oa o te Atua… Ua hinaaro oia i te parau i te tahi na parau e au i te huru o te mau taata tei haaputuputu mai e ua parau ihora e:

« E paraparau vau ma te mana o te autahu‘araa i te i‘oa o te Atua… Noa’tu e te parau hua nei teie nei amuiraa taata e e feia mo‘a ratou, te ti‘a atu nei râ vau i mua i te mau huru e te mau ti‘araa taata ato‘a. Mai te mea e hinaaro outou e haere i te vahi tei reira te Atua, e ti‘a ïa ia outou ia riro mai te Atua ra te huru, aore râ ia mau i te mau parau tumu e mauhia nei e te Atua, no te mea ia ore outou e haafatata’tu i te Atua na roto i te parau tumu, te faatea ê atu ra ïa tatou Ia’na e te haere ti‘a’tu ïa tatou i te diabolo ra. Oia ïa, te ti‘a atu nei au i rotopu i te mau huru taata ato‘a.

« A imi na i to outou mau aau, e ia hi‘o atu mai te mea ua riro outou mai te Atua ra te huru. Ua imi au i to‘u nei aau, e ua hinaaro vau i te tatarahapa i te taato‘araa o ta‘u mau hara.

« Te vai nei i rotopu ia tatou te feia eiâ, te feia faaturi, te feia haavare, te feia faahua. Mai te mea e paraparau mai te Atua na te ra‘i mai, e faaue ïa Oia ia outou eiha e eiâ, eiaha e faaturi, eiaha e nounou, aore râ e haavare, ia haapa‘o ra i te tahi mau mea ha‘iha‘i… E ere anei te Atua i te mea maitai? E maitai ïa outou e ti‘a’i; e mai te mea e mea haapa‘o Oia, ia haapa‘o ïa outou e ti‘a’i. A amui atu i to outou faaroo te viivii ore, i te viivii ore te ite, e a imi i te mau mea maitai ato‘a. E ti‘a i te Ekalesia ia tamâhia, e te a‘o nei au no te pato‘i i te mau ino ato‘a ».⁵

« E ti‘a ia outou ia vai hara ore noa, aita ana‘e eita e nehenehe ia outou ia haere atu i mua i te Atua: e mai te mea e haere atu tatou i mua i te Atua, e ti‘a ïa ia tatou ia tape‘a mâ noa ia tatou iho, mai Ia’na iho. E mana rahi to te diabolo i te haavare; e taui oia i te mau mea ato‘a ia nehenehe ia’na ia haru atu i te mau taata e rave nei i te hinaaro o te Atua… E ti‘a ia ti‘avaru-ê-hia’tu te ino mai rotopu atu i te feia mo‘a; i reira te paruru e vahihia ai, e e tahe mai te mau haamaitairaa no te ra‘i mai—e tahe ratou mai te anavai no Mississipi ra ».⁶

« Ia ore te taata ia faaite i to’na iho parau-ti‘a, no te mea e nehenehe ta vetahi ê e hi‘o mata atu no’na; ia faî vitiviti râ oia i ta’na mau hara, e i reira ta’na mau hara e faaorehia’i, e e rahi atu â ta’na hotu ».⁷

« E ti‘a i te mau aau ato‘a ia tatarahapa e ia vai mâ noa, e e hi‘o mai te Atua ia ratou e e haamaitai oia ia ratou na roto i te hoê raveraa eita roa ratou e nehenehe e haamaitaihia na roto i te tahi ê atu raveraa ».⁸

O te hinaaro o te Atua e ia faaru‘e tatou i ta tatou mau hara e ia faatea ê tatou i te ino mai rotopu atu ia tatou

« A faaroo na, outou paato‘a tei te hopea o te fenua nei—o outou te mau tahu‘a ato‘a, te mau taata hara ato‘a, e te mau taata ato‘a. A tatarahapa! A tatarahapa! A haapa‘o i te evanelia. A fariu atu i te Atua ra ».⁹

« E haamata faahou ana‘e i teie iho mahana, e ia parau i teie nei, ma to tatou aau ato‘a, e e faaru‘e tatou i ta tatou mau hara e ia vai parau-ti‘a tatou ».¹⁰

« E fariu atu te taata ti‘aturi ore i te mau vahi ato‘a no te farii i te tauturu e tae noa’tu ua fatata to’na ra pohe, e i reira to’na ti‘aturi oreraa e ore ai, no te mea e vai mai te huru mau o te ao mure ore i ni‘a iho ia’na ma te puai mau; e ia ore te mau tautururaa e te patururaa ato‘a o te ao tahuti nei, i reira oia e ite ai i te mau parau mure ore no te tahuti ore o te varua. E ti‘a ia tatou ia faaroo i te faaararaa e eiaha e tia‘i i ni‘a i to tatou nei ro‘i pohe no te tatarahapa; mai ta tatou e ite i te aiû o te rave-ê-hia’tu e te pohe, e nehenehe ato‘a te feia apî, te feia paari, mai te aiû i te pii tauenoa-hia ia haere i roto i te oraraa a muri atu. No reira ia riro teie ei tapa‘o faaararaa i te mau taata ato‘a ia ore ia faataime i te tatarahapa, aore râ ia tia‘i i ni‘a i te ro‘i pohe, no te mea te hinaaro o te Atua ia tatarahapa ïa te taata e ia tavini i roto i te tino maitai, e i roto i te puai e te mana no to’na feruriraa, ia noaa Ta’na haamaitairaa eiaha râ e tia‘i e tae noa’tu i to’na poheraa ».¹¹

« Ua faaterehia te oro‘a no te pane e te pape i roto i te Ekalesia [i te 1 no Mati 1835]. Hou te haamaitairaa i te oro‘a, ua paraparau vau no ni‘a i te faanahoraa ti‘a no teie nei oro‘a i roto i te Ekalesia, e ua a‘o vau no ni‘a i te faufaa rahi no te raveraa i te reira ma te faati‘ahia e te Fatu e ua ani au, i to outou feruriraa eaha ïa te maororaa e nehenehe ai i te hoê taata ia amu i te oro‘a ma te parau-ti‘a ore, e eita te Fatu e iriti atu i To’na ra Varua mai teie atu taata? Eaha ïa te maororaa e haafaufaa ore ai oia i te mau mea mo‘a, e eita hoi te Fatu e tuu atu ia’na i te mau tupaipairaa a Satane e tae noa’tu i te mahana no te faaoraraa!… No reira e ti‘a i to tatou mau aau ia vai haehaa, e e ti‘a ia tatou ia tatarahapa i ta tatou mau hara e ia iriti atu te ino i roto ia tatou ».¹²

« E ere te tatarahaparaa te hoê mea e nehenehe e hautihia i te mau mahana ato‘a. E ere te ofatiraa i te ture i te mau mahana ato‘a e te tatarahaparaa i te mau mahana ato‘a e mea e auhia i mua i te aro o te Atua ».¹³

Ua papa‘i te peropheta Iosepha Semita i teie nei parau i muri nei i to’na ra taea‘e o William Semita i muri a‘e i to William ririraa’tu ia’na e to’na mărôraa’tu ia’na: « [Ua paraparau atu vau ia oe ma te hoê opuaraa taa ê i te faaara, faaitoito, a‘o e ia faaora ia oe ia ore oe e topa’tu i roto i te mau fifi e te mau oto, ta‘u i ite atea ia oe i te toparaa’tu, na roto i te fariiraa i taua varua ino ra, ta oe e parau nei to oe mau hiaai, o te ti‘a ia oe ia tape‘a e ia haavî e ia tuu atu i raro i to oe na avae; e ia ore oe e na reira, eita ia oe e nehenehe ia faaorahia, i to‘u hi‘oraa, i roto i te basileia o te Atua. Te titau nei te Atua ia horomiihia te hinaaro o Ta’na mau poieteraa i roto i To’na ra hinaaro ».¹⁴

Te hinaaro nei te Metua i te Ao ra ia faaore i te hapa a te feia o te tatarahapa e ia hoi atu ia’na ma te aau mau

I te matahiti 1835, ua farii Iosepha Semita i te hoê rata na Harvey Whitlock, tei taiva i te Ekalesia e tei hinaaro ia faahoihia mai oia i roto i te Ekalesia. Ua pahono atu te peropheta: « Ua farii au i ta oe rata no te 28 no tetepa 1835, e ua tapiti vau i te tai‘oraa i te reira, e ua faatupu mai te reira te tahi mau mana‘o e mea maitai a‘e ia ferurihia i te faaitehia; ua nava‘i ra ia‘u ia parau atu e ua matara te mau uputa o to‘u nei aau—Aita i noaa ia‘u i te tape‘a i teta‘i. Te haamauruuru nei au i te Atua no te mea ua tae te mana‘o i roto i to oe aau ia tamata i te hoi atu i te Fatu ra, e i to’na ra nunaa, mai te mea e na reirahia e niinii atu Oia i to’na aroha i ni‘a iho ia oe. Ua ani au i te Fatu no ni‘a i to oe ti‘araa; teie te mau parau tei tae mai ia‘u nei:

« Heheuraa ia Havery Whitlock.

« ‘Amene, te parau mai ra te Fatu ia oe—A vaiiho i to‘u tavini o Harvey, ia hoi faahou mai ia‘u, e i roto i ta‘u nei Ekalesia, e ia faaru‘e i te mau hara ato‘a ta’na i hara ia‘u nei, e ia tamau noa mai teie taime atu i te hoê oraraa ti‘a e te viivii ore, e ia vai noa i raro a‘e i te arata‘iraa a te mau taata ta‘u i ma‘iti ei mau pou e e mau upoo no ta‘u nei Ekalesia. E inaha, te parau maira te Fatu to outou Atua, e ua tumahia ta’na mau hara i raro i te ra‘i, e e haamo‘ehia’tu te reira i rotopu i te taata nei, e eita e tae mai i to‘u nei mau taria, eita ato‘a e papa‘ihia ei faahaamana‘oraa no te ohipa ta’na i rave, e faateitei râ vau ia’na i ni‘a, mai roto atu i te vari hohonu, e e faaiteiteihia oia i ni‘a i te mau vahi teitei, e e tai‘ohia oia ei mea tiamâ no te ti‘a atu i rotopu i te mau hui arii, e e faarirohia râ oia mai te hoê o‘e anaana i roto i ta‘u piha o‘e no te haama‘iri i te mau vahi haapûraa no te ino i rotopu i te mau taata e faateitei nei ia ratou iho, ua mârô ratou ia‘u e ta‘u i faatahinu ra i te mau mahana hopea nei. No reira, ia faaineine oi‘oi oia ia’na iho no te haere atu ia oe ra, i Ketelani. E ia faaroo oia i ta oe a‘o mai teie atu taime, e faahoihia ïa oia i to’na ti‘araa matamua, e e faaora-mau-hia oia mai te Fatu to outou Atua e ora ra. Amene.

« No reira te ite nei oe, e to‘u taea‘e here e, te hinaaro o to tatou Metua i te Ao ra i te faaore i ta oe mau hara, e ia faahoi faahou i te maitai i te feia ato‘a o te hinaaro i te faahaehaa ia ratou iho i mua Ia’na, e ia faî i ta ratou mau hara, e ia faaru‘e i te reira, e ia hoi faahou atu Ia’na ma te aau mau, ma te haavare ore, no te tavini Ia’na e tae noa’tu i te hopea [a hi‘o 2 Nephi 31:13].

« Eiaha e maere e ia pou mai te Fatu no te paraparau mai te ra‘i mai, e ia horo‘atu ia oe te mau arata‘iraa e nehenehe ia oe ia haapii i ta oe hopoi‘a. Ua faaroo oia i ta oe mau pure e ua ite mata oia i to oe haehaa, e te toro nei oia i te rima no te aroha metua tane no to oe hoiraa mai; te oaoa nei te mau melahi ia oe, e te hinaaro nei te feia mo‘a i te farii faahou ia oe i rotopu ia ratou ».¹⁵

« Aita roa‘e te hoê taime i riro ai te varua e mea paari roa no te haafatata’tu i te Atua. Ua fatata’tu te mau taata ato‘a i te aroha o te faaore i te hara, o ratou tei ore i rave i te hara matara ore ».¹⁶

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ a faaineine ai outou i te haapii. No te tahi atu tauturu, a hi‘o i te mau api vii–xiv

A tai‘o ai outou i te aamu no te huru o te peropheta i te mo‘eraa o na api 116 (te mau api [81–83], eaha te mau hi‘oraa ta outou i farii no ni‘a ia Iosepha Semita? Eaha ta outou i haapii na roto i to’na hi‘oraa no ni‘a i te tatarahaparaa?
A tai‘o faahou i te tuhaa e haamata i te api [83]. A feruri hohonu ai outou i te mau haapiiraa i roto i teie nei pene, a rave na i te taime no te hi‘opo‘a i to outou aau, mai ta te peropheta i a‘o mai. A feruri i te mea e ti‘a ia outou ia rave—e te mea e ti‘a ia outou ia faaea i te rave—ia riro hau atu mai te Atua ra te huru.
A feruri i te mau faaararaa a Iosepha Semita no ni‘a i te faataimeraa i to tatou tatarahaparaa (te mau api 84–85) Eaha te tahi mau hopearaa no te faataimeraa i te tatarahaparaa?
A tuatapapa i te a‘oraa a te peropheta Iosepha no ni‘a i te fariuraa i te Atua ra e te faahaehaaraa ia tatou iho i mua Ia’na (te mau api 84–88). No teaha te tatarahaparaa e ore ai e hope mai te mea aita e haehaaraa? I to outou feruriraa eaha te auraa ia « hoi atu i i te [Atua] ra ma te aau mau »? (api 87).
A tai‘o i te heheuraa ta Iosepha Semita i farii no Harvey Whitlock, ma te hi‘o atu i te mau fafauraa a te Fatu mai te mea e tatarahapa mau te taea‘e ra Whitlock (api 87). Eaha to outou mau mana‘o aore râ mau ite a feruri hohonu ai outou « i te hinaaro o to tatou Metua i te Ao ra ia faaore i ta tatou mau hara, e i faahoi faahou ia tatou i te maitai »?

Te mau papa‘iraa mo‘a:2 Korinetia 7:9–10; Mosia 4:10–12; Alama 34:31–38; PH&PF 1:31–33; 58:42–43

Christ in Gethsemane — Ua tupu mau â te tatarahapa na roto i te tusia taraehara a te Faaora, o Iesu Mesia. Ua parau te peropheta Iosepha Semita e « A imi i roto i to outou aau ia ite e ua riro mau anei outou mai te Atua ra te huru », « ua imi au i roto i to‘u iho nei, e te ite nei au e, e mea ti‘a ia‘u ia tatarahapa i te taato‘araa o ta‘u mau hara».

prodigal son returning — Mai te tamaiti tei haere i te fenua roa ua farii popouhia oia e to’na metua tane, te hinaaro nei to tatou Metua i te Ao ra i te « faaore i te mau hara, e ia faahoi mai no te haafaufaa i te feia o te hinaaro nei i te faahaehaa ia ratou i mua Ia’na ».