Te oraraa e te tau faatereraa o Iosepha Semita

Ua rahi a‘e ta Iosepha Semita, te peropheta e te hi‘o a te Fatu, i rave, maori râ ia Iesu ana‘e, no te faaoraraa i te taata nei i roto i teie nei ao, i tei ravehia e te hoe taata ê atu o tei ora na i ni‘a iho i te reira » (PH&PF 135:3). Te faaite nei teie faahitiraa parau maere roa i te parau no te hoê taata tei piihia e te Atua i te 14raa o to’na matahiti e o tei ora noa e tae noa’tu i te 38raa o to’na matahiti. I roto i te area taime mai te fanauraa o Iosepha Semita i Vermont i te ava‘e titema 1805 e tae noa’tu i to’na poheraa ri‘ari‘a i Illinois i te ava‘e tiunu 1844, ua tupu te mau mea faahiahia. Ua fâ mai te Atua te Metua e Ta’na Tamaiti, o Iesu Mesia, ia’na, e ua haapii hau atu â ia’na no ni‘a i te natura o te Atua mai tei ore â i itehia i roto i te mau u‘i ato‘a. Ua tuu atu te mau peropheta e te mau aposetolo no mutaa iho ra i ni‘a ia Iosepha te mana no te autahu‘araa mo‘a, a faariro atu ai ia’na ei ite apî no te Atua, tei haamanahia i roto i teie nei tau tuuraa hopea no te evanelia. Ua heheuhia mai na roto i te peropheta te hoê niiniiraa faito-ore-hia no te ite e te haapiiraa, mai te Buka a Moromona, te Parau Haapiiraa e te mau Parau Fafau, e te Poe Tao‘a Rahi. Na roto ia’na, ua faanahonahofaahou- hia mai te Ekalesia mau a te Fatu i ni‘a i te fenua nei.

I teie nei mahana, te tamau noa ra te ohipa tei haamatahia e Iosepha Semita i te haere i mua na te ao taato‘a nei. Ua faaite te peresideni Wilford Woodruff i to’na iteraa no ni‘a i te peropheta Iosepha Semita: « Ua riro oia e hoê peropheta na te Atua, e ua haamau oia i te niu no te ohipa e te tau tuuraa evanelia rahi roa‘e tei haamauhia i ni‘a i te fenua nei ».¹

Tupuna e te tamarii-rii-raa

E taata Marite no te ono o te u‘i o Iosepha Semita, ua tere mai to’na mau tupuna mai te fenua Peretane mai e tae atu i Amerika i te mau matahiti 1600. Ua faahoho‘a te mau tupuna o te peropheta i te mau huru tei itehia i roto i te mau u‘i matamua no te mau Marite: ua ti‘aturi ratou i ta te Atua arata‘iraa ia ratou, e e hi‘oraa puai to ratou no ni‘a i te ohipa, e ua tavini itoito ratou i to ratou mau utuafare e to ratou fenua ai‘a.

Ua faaipoipohia te mau metua o Iosepha Semita, o Iosepha Semita, Metua, e Lucy Mack Semita i te matahiti 1796 i Tunbridge, Vermont. E tane e e vahine rave itoito raua i te ohipa e i te măta‘u i te Atua e ua haamata i to raua oraraa faaipoipohia i roto i te mau tau maitai i te pae imiraa faufaa. Ua ere râ o Iosepha metua i ta’na faaapu matamua e ua farii i te mau topatariraa i te pae faufaa i te mau matahiti i muri mai. Ua faahepohia te utuafare Semita i te taui haere to ratou nohoraa e rave rahi mau taime a tamata ai to ratou metua tane i te imi i te ora na roto i te faaapuraa i ni‘a i te mau aivi uru raau no New England, na roto i te raveraa i te ohipa i roto i te tahi atu mau faaapu, te faatereraa i te hoê fare toa, aore râ te haapiiraa i te fare haapiiraa.

Ua fanauhia o Iosepha Semita, Tamaiti, i te 23 no titema 1805, in Sharon, Vermont, te paeraa o na ahuru ma hoê tamarii. Ua piihia oia i te i‘oa o to’na metua tane. Teie te mau tamarii i roto i te utuafare Semita, mai te au i te fanauraa: (te hoê tamaiti aita e i‘oa (tei pohe i muri iho te fanauraa), Alvin, Hyrum, Sophronia, Iosepha, Samuel, Ephraim (tei ora i raro mai te piti hepetoma), William, Katharine, Don Carlos, e Lucy.²

Ua matara mai te tapa‘o no te huru faahiahia o te peropheta i te omua-roa-raa o to’na oraraa. Te ora ra te mau Semita i West Lebanon, New Hampshire, a roohia’i te mau taata e rave rahi i roto i te oire i te hoê mai fiva aau, e te mau tamarii Semita ato‘a. A ora mai ai te tahi atu mau tamarii ma te fifi ore, ua roohia o Iosepha, e hitu matahiti to’na i tera taime, i te hoê ma‘i haapê rahi i roto i to’na avae aui. Ua faati‘a te taote Nathan Smith no te fare haapiiraa taote no Dartmouth i piha‘i iho i te oire no Hanover, New Hampshire, i te rave i te hoê rave‘a apî no te tapûraa no te tamata i te faaora mai i te avae o te tamaiti. A faaineine ai te taote Smith e to’na mau hoa taote no te tapûraa, ua ani Iosepha i to’na metua vahine ia haere atu i rapae au i te piha ia ore oia ia ite i to’na mauiui. Ua pato‘i oia i te ava no te haapohe i te mauiui e ma te ti‘aturi noa i te tauahiraa hau o to’na metua tane, ua faaoromai itoito noa o Iosepha a patia ai te taote tapû i te hoê apoo e a iriti atu ai te tahi tuhaa no to’na ivi avae. Ua manuia te tapûraa, noa- ’tu e ua haere noa o Iosepha i te mau matahiti i muri mai ma te mau turu tootoo e ma te faaite mai i te tahi haereraa hapepa i te toe‘a o to’na oraraa.

I te matahiti 1816, i muri a‘e i te faarururaa i te mau topatariraa i te pae faaapu, ua arata‘i o Iosepha Semita metua i to’na utuafare mai Norwich, Vermont haere atu i Palmyra, New York, ma te ti‘aturi e e mea ruperupe a‘e to ratou oraraa. « No to matou huru vêvê », ua haamana‘o te peropheta i te mau matahiti i muri mai, « ua faahepohia [matou) ia rave puai i te ohipa no te tururaa i te hoê utuafare rahi… e ua titauhia te reira i te mau melo ato‘a no te utuafare o te nehenehe e rave i te ohipa no te tauturu i te utuafare, no reira ua faaerehia matou i te maitai o te hoê haapiiraa. Ua nava‘i noa i te parau e, e mea iti to‘u ite i te tai‘o, te papa‘i, e te mau ture matamua no te numeraraa ».³

Te orama matamua

Ua papa‘i o Iosepha Semita no ni‘a i to’na haapii oi‘oiraa « Ua fanauhia vau… e na metua maitai tei rave i te mau mea ato‘a e nehenehe ia raua no te haapii mai ia‘u i roto i te haapa‘oraa keritetiano.⁴ Area râ, mai te tahi ê atu mau Keritetiano e rave rahi, ua ite te mau metua o Iosepha e aita te tahi o te mau parau tumu no te evanelia tei haapiihia e Iesu e Ta’na mau aposetolo e vai nei i roto i te mau ekalesia no to’na ra tau. I roto i te vahi no Palmyra i te matahiti 1820, te tamata ra te mau faaroo Keritetiano huru rau i te titau i te faafariu i te mau taata. Ua amui atu te metua vahine o Iosepha, e piti o to’na na taea‘e, e to’na tuaana vahine i te ekalesia Perebiteriana no to ratou ra oire, area o Iosepha, e to’na metua tane e to’na taea‘e Alvin, aita ïa i amui atu i te hoê ekalesia. Noa’tu e e tamarii noa â oia, ua haapeapea rahi roa o Iosepha no ni‘a i to’na ti‘araa i mua i te Atua e no ni‘a i te aehuehu e vai nei i rotopu i te mau faaroo huru rau.

I roto i ta’na tai‘oraa i te mau papa‘iraa mo‘a, ua putapû roa o Iosepha e 14 matahiti i te hoê irava i roto i te buka a Iakobo: « Te ere ra râ te hoê o outou i te ite, e ani oia i te Atua ra, o tei horo‘a hua mai i te maitai i te taata ato‘a ra, ma te pato‘i ore; e e horo‘ahia mai ta’na » (Iakobo 1:5). Ma te faauruhia e teie nei fafauraa a te Fatu, ua haere atu o Iosepha i roto i te uru raau i piha‘i iho i to’na nohoraa no te pure i te hoê mahana o te tau mahanahana i te matahiti 1820. Ma te tuturi i raro ua pûpû atu oia i te hinaaro o to’na aau i mua i te Atua. Aita i maoro roa ua haruhia oia e te mau mana no te poiri ta‘ota‘o tei faati-roa ia’na e tei faari‘ari‘a ia’na e e haamou-roa-hia oia. I reira, ei pahonoraa i ta’na pure u‘ana, ua vetea te mau ra‘i e ua tuuhia oia e to’na enemi tei ore i ite matahia’tu. I roto i te hoê pou maramarama tei hau i te anaana i to te mahana, ua ite oia e piti na taata, te ti‘araa i ni‘a‘e ia’na i roto i te reva. Ua parau maira te hoê, ma te faahiti i te i‘oa o te tamaiti, « O Ta‘u Tamaiti Here teie. A faaroo Ia’na! » (Iosepha Semita—Aamu 1:17).

I roto i teie nei orama hanahana, ua fâ mai te Atua te Metua e Ta’na Tamaiti, o Iesu Mesia ia Iosepha te tamaiti apî. Ua paraparau Iosepha e te Faaora, tei parau mai ia’na eiaha roa e amui atu i te hoê o te mau ekalesia no to’na ra tau, no te mea « e mea hape ana‘e ratou » e « e mea ino rahi ta ratou mau haapa‘oraa i mua ia’na… te haapii ra ratou i te parau i tuuhia mai e te taata ana‘e ei parau mau. E huru paieti to ratou, ua huna râ ratou i te mana mau no te reira » (Iosepha Semita–Aamu 1:19). Ua fafau-ato‘a-hia Iosepha « e faaitehia mai te îraa o te Evanelia [ia’na] i te tahi tau i mua »⁵ I muri a‘e i te mau tenetere no te pouri, ua heheuhia te parau a te Atua e te ora mau ra o te Atua te Metua e Ta’na Tamaiti, o Iesu Mesia, i to te ao nei na roto i teie nei farii apî e te mâ.

Te mau tere farerei a Moroni

Ua ma‘iri e toru matahiti, e i roto i taua area taime ra ua haavahavahahia e ua faoohia te parau a Iosepha Semita e ua ite mau oia i te Atua e te mau taata i roto i to’na oire. Te uiui nei te peropheta apî, e 17 matahiti to’na i teie nei, eaha râ te tupu mai ia’na. I te pô no te 21 no tetepa 1823, ua pure oia ma te aau tae ia arata‘ihia oia e ia faaorehia to’na « mau hara e mau hapehape » no to’na apîraa (Iosepha Semita—Aamu 1:29). Ei pahonoraa i ta’na pure, ua î to’na piha taotoraa pirihao i te maramarama, e ua fâ mai te hoê ve‘a no te ra‘i mai tei piihia o Moroni. Te haamana‘o ra o Iosepha e « ua parau oia e e melahi oia na te Atua tei tonohia mai no te afa‘i mai i te parau oaoa e ua fatata te fafauraa ta te Atua i rave e to Iseraela no mutaa iho i te faatupuhia, e e haamata oi‘oi noa te ohipa faaineineraa no te tae-piti-raa mai o te Mesia; e ua tae i te taime e ia porohia te Evanelia i roto i to’na îraa ato‘a ma te puai, i te mau nunaa ato‘a e e faaineinehia te hoê nunaa no te faatereraa mileniuma. Ua faaitehia mai ia‘u e ua maitihia vau ei mauihaa i roto i te rima o te Atua no te faatupu i te tahi o Ta’na mau opuaraa i roto i teie tau tuuraa evanelia hanahana ».⁶

Ua parau ato‘a’tu o Moroni ia Iosepha e ua tanuhia te mau papa‘iraa tahito tei haaputuputuhia, tei ootihia i ni‘a i te mau api auro e te mau peropheta no mutaa ihora, i ni‘a i te hoê aivi piri noa i to’na vahi nohoraa. Te faaite nei teie nei mau papa‘iraa mo‘a i te aamu no te hoê nunaa ta te Atua i arata‘i mai Ierusalema mai e tae atu i te tuhaa tooa o te râ e 600 matahiti hou te fanauraa o Iesu. O Moroni te peropheta hopea i rotopu i teie nei nunaa tei tanu i te papaa parau, ta te Atua i fafau e faahaere mai i te mau mahana hopea nei. E na Iosepha Semita e iriti i teie buka mo‘a i roto i te reo Peretane.

I roto i na matahiti e maha i muri mai, ua titauhia ia Iosepha ia farerei atu ia Moroni i te aivi i te 22 no tetepa ato‘a no te farii i te tahi atu â iteraa e te mau arata‘iraa. Ua titauhia teie nei mau matahiti faaineineraa e haamaitairaa ia’na ia nehenehe ia’na ia iriti te mau papa‘iraa tahito. Ua ti‘a ia’na ia faaineine no teie hopoi‘a no te faatupuraa i te hoê ohipa e te opuaraaa o taua ohipa ra o te faaite papûraa ïa « i te Ati Iuda e te Etene ato‘a hoi e, o Iesu, o te Mesia ïa, te Atua Mure ore, o te faaite ia’na iho i te mau fenua ato‘a ra » (Api Omuaraa no te Buka a Moromona)

Haamauraa i te basileia o te Atua i ni‘a i te fenua nei

Ua haamata te iritiraa o te Buka a Moromona

A tia‘i noa’i oia no te farii i te mau api auro, ua tauturu o Iosepha Semita i te atuatu i te mau hinaaro pae tino o to’na utuafare. I te matahiti 1825, ua haere atu oia i Harmony, Pennsylvania, no te rave i te ohipa na Josiah Stowell. I reira ua tarahu oia i te piha ta‘otoraa i te utuafare no Isaac e Elizabeth Hale e ua farerei atu i ta raua tamahine o Emma, te hoê orometua haapii tamarii roa, rouru ereere. I te 18 no Tenuare 1827, ua faaipoipohia o Iosepha e Emma i roto Baindridge apato‘a, New York. Noa’tu ua tamatahia to raua faaipoiporaa na roto i te poheraa o ta raua mau tamarii, te mau fifi i te pae faufaa, e to Iosepha mau atearaa pinepine i te utuafare no te raveraa i ta’na mau hopoi‘a, ua here noa o Iosepha e o Emma te tahi i te tahi.

I te 22 no tetepa 1827, e maha matahiti i muri a‘e i to’na itematamuaraa i te mau papaa parau, ua horo‘ahia’tu te reira i roto i te rima o Iosepha. Ia tae râ te mau papaa parau i roto i to’na rima, ua tutava pinepine noa te mau taata ino no to’na oire iti i te eiâ i te reira. No te aperaa i teie nei haamani-ino-raa, i te ava‘e titema 1827, ua hoi atu o Iosepha e Emma i Harmony, i reira te mau metua o Emma i te oraraa. I muri a‘e i to raua faaearaa i reira, ua haamata o Iosepha i te iriti i te mau papaa parau.

I te haamataraa o te matahiti 1828, ua farii o Martin Harris, te hoê taata faaapu ona no Palmyra, i te hoê iteraa papû no te ohipa a te Fatu i te mau mahana hopea nei e ua tere atu oia i Harmony no te tauturu ia Iosepha i te iritiraa. I te ava‘e tiunu no taua matahiti ra, te ohipa a Iosepha no te iritiraa o te hopearaa no te 116 api papa‘i rimahia. Ua ani pinepine o Martin i te peropheta te parau faati‘a ia afa‘i te mau papa‘iraa i to’na utuafare i Palmyra no te faaite atu i te tahi mau melo no te utuafare. Ua taparu te perophetea i te Fatu e ua parauhia oia aita, ua ani râ oia i te Fatu e piti faahou â taime e i muri iho ua faati‘ahia o Martin ia rave i te mau papa‘iraa. A vai ai te mau papa‘iraa i Palmyra, ua mo‘e te reira, e aita roa i ite-faahou-hia mai. Ua rave ê atu te Fatu i te Urima e te Tumima e te mau api mai roto atu i te peropheta no te hoê tau, ma te vaiiho mai ia’na ia faahaehaa e ia tatarahapa. I roto i te hoê heheuraa no ô mai i te Fatu, ua haapii o Iosepha e mea ti‘a ia’na ia măta‘u noa i te Atua hau atu i te taata nei (PH&PF 3). I muri iho, noa’tu e 22 ana‘e to’na matahiti, ua riro to’na oraraa ei hi‘oraa no te paieti mau i te peeraa i te mau faaueraa ato‘a a te Fatu.

I te 5 no eperera 1829, ua tae mai o Oliver Cowdery, te hoê orometua haapii tamarii, e hoê matahiti apî a‘e to’na ia Iosepha, i te fare o Iosepha i Harmony. Ei pahonoraa i te pure, ua farii oia i te hoê iteraa papû e e parau mau te ohipa a te peropheta. E piti mahana i muri mai, ua haamata faahou te ohipa no te iritiraa, na Iosepha e tai‘o e na Oliver e papa‘i.

Faahoiraahia mai te autahu‘araa a te Atua.

A iriti ai o Iosepha e o Oliver i te Buka a Moromona, ua tai‘o raua i te aamu no to te Faaora haereraa’tu e farerei i te mau Ati Nephi i mutaa ihora. I te pae hopea, ua faaoti raua i te ani i te arata‘iraa a te Fatu no ni‘a i te bapetizoraa. I te 15 no me, ua haere raua i te hiti pape no te anavai no Susquehanna, i piha‘i iho i te nohoraa o Iosepha i Harmony, no te pure. Ma to raua maere rahi, ua fâ mai te hoê ve‘a no te ra‘i ia raua, ma te faaite mai e o Ioane Bapetizo oia. Ua horo‘a oia ia raua te autahu‘araa a Aarona e ua haapii ia raua ia bapetizo e ia faatoro‘a te tahi i te tahi. I muri iho, mai tei fafauhia e Ioane Bapetizo, ua fâ ato‘a mai te mau aposetolo tahito o Petero, Iakobo e Ioane ia Iosepha e Oliver e ua horo‘a’tu ia raua te autahu‘araa a Melehizedeka e ua faatoro‘a ia raua ei aposetolo.

Hou teie nei mau farereiraa, ua noaa ia Iosepha e Oliver te ite e te faaroo. I muri iho râ i te mau fâraa mai o te mau ve‘a no te ra‘i, ua mau ato‘a raua i te mana—te mana autahu‘araa e te mana o te Atua o te titauhia no te haamau i Ta’na Ekalesia e no te rave i te mau oro‘a no te faaoraraa.

Te nene‘iraa o te Buka a Moromona e te faati‘araa i te Ekalesia

I roto i te area no te ava‘e eperera e me 1829, ua haere noa i te rahi te taupupu o te ohipa iritiraa a te peropheta i to’na iho fare i Harmony, na roto i te mau hamani-ino-raa. E no reira, ua reva’tu o Iosepha raua o Oliver no te tahi maa taime i te oire pû no Fayette, New York, no te faaoti i te iritiraa, i te fare o Peter Whitmer metua. Ua oti a‘era te iritiraa i te ava‘e tiunu, e piti ava‘e hau i muri a‘e i to Olive haamataraa i te ohipa papa‘i parau no te peropheta. I te ava‘e atete, ua faaau o Iosepha i te taata nene‘i o Egbert B. Grandin i Palmyra, no te nene‘i i te buka. Ua horo‘a tarahu o Martin Harris i to’na fare faaapu ia Grandin tane ei haapapûraa i te aufauraa i te nene‘iraa, e i muri a‘e, ua hoo oia 151 acre o to’na fare faaapu no te aufau pee roa i te tarahu. Ua hoohia te Buka a Moromona i te taata i roto i te fare toa a Grandin i te 26 no mati 1830.

I te 6 no eperera 1830, hoê ahuru ma hoê noa iho mahana i muri a‘e i te hoo-raa-hia te Buka a Moromona, ua tairuru mai te hoê pŭpŭ e 60 taata i roto i te fare raau o Peter Whitmer metua, i Fayette, New York. I reira to Iosepha Semita faati‘araa na roto i te mana te Ekalesia, tei topahia i muri iho na roto i te heheuraa Te Ekalesia a Iesu Mesia i te Feia Mo‘a i te mau Mahana Hopea nei (a hi‘o PH&PF 115:4). E oro‘a oaoa te reira, na roto i te niniiraa rahi o te Varua. Ua faaterehia te oro‘a, ua bapetizohia te feia faaroo, e ua horo‘ahia te horo‘araa a te Varua Maitai, e ua faatoro‘ahia te mau tane i te autahu‘araa. I roto i te hoê heheuraa tei fariihia i roto i te rururaa, ua ma‘iti te Fatu ia Iosepha Semita ei faatere no te Ekalesia: « ei hi‘o, ei iriti parau, ei peropheta, ei aposetolo hoi no Iesu Mesia, ei peresibutero no te Ekalesia na roto i te hinaaro o te Atua te Metua, e te aroha o to oe Fatu o Iesu Mesia » (PH&PF 21:1). Ua faati‘a-faahou-hia te Ekalesia a Iesu Mesia i ni‘a i te fenua nei.

Ketelani, Ohio: Tupuraa o te EkalesiaS

A faaite anaanatae ai te mau melo no te Ekalesia i te parau mau ta ratou i ite, ua tupu oi‘oi noa te Ekalesia faati‘a-apî-hia i te rahi. Aita i maoro roa, ua faati‘ahia te mau amaa i roto i te mau oire no Fayette, Manchester, e Colesville i te tuhaa fenua no New York. I te ava‘e tetepa 1830, i muri noa iho i to Iosepha raua o Emma Semita haereraa’tu mai Harmony, Pennsylvania, haere atu i Fayette, ua heheu maira te Fatu i te peropheta e, e mea ti‘a i te mau misionare « ia haere i rotopu i te mau Ati Lamana » e ora ra i te hiti tooa o te râ no Missouri (PH&PF 28:8). Ua arata‘i te tere o te mau misionare ia ratou na roto i te tuhaa fenua no Ketelani, Ohio, i reira to ratou farereiraa i te hoê pŭpŭ taata faaroo e imi ra i te parau mau e ua faafariuhia mai na 130 taata o ratou, e o Sidney Rigdon ato‘a to roto, tei riro i muri mai ei melo no te Peresideniraa Matamua. Ua nuu te pŭpŭ o te feia mo‘a i te rahi i Ketelani, i te hanereraa a faaite ai te mau melo i te evanelia i te feia ato‘a e haati ra ia ratou.

A tupu ai te Ekalesia i te rahi i New York, ua tupu ato‘a te pato- ‘iraa i te Ekalesia i te rahi. I te ava‘e Titema 1830, ua farii te peropheta i te hoê heheuraa no te faaue i te mau melo no te Ekalesia ia « haere atu i Ohio » (PH&PF 37:1), hau atu i te 400 kilometera i te atea. I roto i te mau ava‘e i muri iho, ua hoo atu te rahiraa o te Feia Mo‘a no New York i to ratou mau fenua, e te rahiraa o te taime, na roto i te pau rahi, e ua rave i te mau tusia i titauhia no te haaputuputu i Ketelani, Ohio. O Iosepha e Emma Semita te mau taata matamua tei hamata i te haere i Ohio, e ua tae atu i Ketelani i te area no te 1 no fepuare 1831

E piti vahi haaputuputuraa no te feia mo‘a.

I te ava‘e tiunu 1831, a tupu ai te Ekalesia i te puai i Ketelani, ua faaue te Fatu i te peropheta e te tahi atu mau taata faatere no te Ekalesia ia tere atu i Missouri. I reira Oia i te heheuraa’tu ia ratou « te fenua no to [ratou] ai‘araa » (a hi‘o PH&PF 52:5, 42–43). I te ava‘e tiunu e tiurai 1831, ua tere atu te peropeheta e te tahi atu mau taata fatata e 1.448 kilometera mai Ketelani e tae atu i te mataeinaa no Iakona, Missouri, i te pae too‘a o te râ no te fenua Marite. I muri noa iho i to’na taeraa’tu, ua farii te peropheta i te hoê heheuraa a te Fatu o te parau ra e « te fenua o Missouri… o te fenua ïa ta‘u i faataa e i haamo‘a ei haaputuputuraa no te feia mo‘a. No reira, o teie hoi te fenua i parauhia ra, e te vahi no te oire no Ziona… Te vahi i parauhia i teie nei o Inidipenideni ra o te vahi pû ïa; te vahi no te hiero ra tei te pae o te too‘a o te râ ïa » (PH&PF 57:1–3).

Ei faatupuraa i te mau tohuraa tei faahitihia e te mau peropheta tahito i roto i te Bibilia, ua haamata o Iosepha Semita e 25 matahiti i te paari i te haamau i te niu no te oire no Ziona i Amerika. I te ava‘e atete 1831, ua peresideni oia i te haamo‘araa i te fenua ei vahi haaputuputuraa e ua haamo‘a oia i te hoê vahi no te hiero. Tau taime poto noa i muri iho, ua ho‘i atu te peropheta i Ohio, i reira oia i faaitoito ai i te tahi o te mau feia haapa‘o ia haaputuputu i Missouri.

Mai te matahiti 1831 e tae atu i te matahiti 1838, ua ora te mau melo no te Ekalesia i Ohio e i Missouri ato‘a. Ua ora te peropheta, te mau melo no te Pŭpŭ no te Tino Ahuru ma Piti Aposetolo e e rave rahi mau melo no te Ekalesia i Ketelani, a haaputuputu atu ai te tahi atu mau melo i Missouri e te arata‘ihia ra ratou e to ratou mau faatere autahu‘araa i reira, i raro a‘e i te arata‘iraa a te peropheta. Ua papa‘i te mau taata faatere no te Ekalesia te tahi e te tahi i te mau rata e ua tere pinepine i rotopu ia Ketelani e Missouri. Ua faanahonahohia te hoê Tĭtĭ i Ketelani i te ava‘e fepuare 1834, e i muri iho i taua matahiti ra te hoê ato‘a Tĭtĭ i te mataeinaa no Clay, Missouri.

Te heheuraa tamau

A ora‘i oia i Ketelani, ua farii te peropheta e rave rahi mau heheuraa a te Fatu no ni‘a i te ohipa no te faahoiraa mai te evanelia i te mau mahana hopea nei. I te ava‘e noema 1831, ua faaoti te feia faatere no te Ekalesia ia nene‘ihia e rave rahi o te mau heheuraa tei haaputuhia, tei piihia te buka no te mau Faaueraa. Ua nene‘ihia teie nei buka i Inidipenideni, Missouri. Area râ i te ava‘e tiurai 1833, ua vavahihia te matini nene‘iraa e ua tutu‘ihia e rave rahi mau api tei nene‘ihia e te mau pŭpŭ taata ino. Maoti te tahi mau api no te buka tei faaorahia mai, aita roa te buka no te mau Faaueraa i noaa faahou i te mau melo no te Ekalesia. I te matahiti 1835 ua nene‘ihia te mau heheuraa tei opuahia ia tuu atu i roto i te buka no te mau Faaueraa, e tae noa’tu i te tahi atu mau heheuraa e rave rahi, i Ketelani i raro a‘e i te i‘oa Te Parau Haapiiraa e te mau Fafauraa.

A ora‘i oia i Ketelani, ua tamau ato‘a te peropheta i ta’na ohipa i ni‘a i te iritiraa a Iosepha Semita no te Bibilia, te hoê ohipa tei haamata na i te matahiti 1830 mai tei faauehia e te Fatu. E rave rahi mau mea papû e te faufaa tei iritihia’tu mai roto atu i te Bibilia i roto i te mau tenetere e rave rahi, e ua arata‘ihia te peropheta e te Varua no te faatitiaifaroraa i te papa‘iraa i roto i te Arii Iakobo o te Bibilia e no te faahoiraa mai i te parau haamaramaramaraa tei mo‘e. Ua arata‘i atu teie ohipa i te faahoi-raa-hia mai te mau parau mau faufaa rahi no te evanelia, e tae noa’tu i te mau heheuraa e rave rahi tei tuuhia’tu i roto i Te Parau Haapiiraa e te mau Parau Fafau. Noa’tu e ua opua te peropheta i te nene‘i i ta’na faatitiaifaroraa no te Bibilia, aita te mau ohipa rû mai te hamaniino- raa i faati‘a ia’na ia nene‘i i te taato‘araa o te reira i roto i to’na oraraa.

Ei tuhaa no ta’na faatitiaifaro faauruhia no te Bibilia, ua farii o Iosepha Semita i te heheuraa o tei riro i teie nei te buka a Mose e te hoê iritiraa faauruhia no Mataio 24, tei piihia i teie nei Iosepha Semita—Mataio. I te matahiti 1835, ua haamata te peropheta i te iriti i te buka a Aberahama mai roto mai i te mau papa‘iraa na roto i te reo Aiphiti tahito ta te Ekalesia i hoo mai. Ua riro te taato‘araa o teie nei mau iritiraa i muri iho ei tuhaa no te Poe Tao‘a Rahi.

I roto i te mau heheuraa ta te peropheta i farii i Ketelani, te vai ra ïa taua mau heheuraa ra tei haamau i te faatereraa o te Ekalesia. I raro a‘e i te arata‘iraa a te Fatu, ua faanahonaho o Iosepha Semita i te Peresideniraa Matamua i te matahiti 1832.⁷ Ua faanahonaho oia i te Pŭpŭ no te Tino Ahuru ma Piti Aposetolo e te hoê Pŭpŭ no te Hitu Ahuru i te matahiti 1835. Ua faanahonahohia te hoê tîtî i Ketelani i te matahiti 1834. I roto i taua area taime ra, ua haamau ato‘a oia i te mau pŭpŭ no te autahu‘araa a Aarona e a Melehizedeka no te atuatu i te mau hinaaro o te mau melo o te Ekalesia i roto i ta ratou mau paroita.

Te hiero matamua i roto i teie nei tau tuuraa Evanelia

Ei hoê o te mau tuhaa faufaa rahi roa‘e no te Faahoi-raa-hia mai, ua heheu te Fatu ia Iosepha Semita i te faufaa ia vai te mau hiero mo‘a. I te ava‘e titema 1832, ua faaue te Fatu i te feia mo‘a ia haamata i te patu i te hiero i Ketelani, Ohio. Noa’tu e ua ere te mau melo e rave rahi no te Ekalesia i te fare faaearaa maitai, te ohipa, e te maa, ua pahono anaanatae ratou i te faaueraa a te Fatu, e te peropheta i te haaraa i piha‘i iho ia ratou.

I te 27 no mati 1836, ua haamo‘a o Iosepha Semita i te hiero i roto i te hoê niiniiraa rahi o te Varua mai te au i te tau no te Penetekote. Hoê hepetoma i muri iho, i te 3 no eperera 1836, ua tupu te tahi oro‘a hau atu i te faufaa rahi i roto i te aamu no te pae faaroo. Ua fâ mai te Fatu ra o Iesu Mesia ia Iosepha Semita e o Oliver Cowdery i roto i te hiero, ma te parau mai e, « Ua farii au i teie fare nei, e e vai hoi to‘u i‘oa i ô nei; e e faite atu vau ia‘u iho i ta‘u mau taata na roto i te aroha i roto i teie fare nei » (PH&PF 110:7). Ua fâ ato‘a mai e toru na ve‘a no te mau tau tuuraa evanelia no te Faufaa Tahito—Mose, Elia, e Eliaha. Ua faahoi mai ratou i te mau taviri no te autahu‘araa e te mana tei mo‘e maoro i te fenua nei. Tei te peropheta Iosepha Semita ra i teie nei te mana no te haaputuputu ia Iseraela mai na poro e maha no te fenua nei e no te taati amui i te mau utuafare, mai teie nei e a muri noa’tu (A hi‘o PH&PF 110:11–16). Ua pee teie nei faahoi- raa-hia-mai o te mau taviri no te autahu‘araa i te hoho‘a a te Fatu no te horo‘araa i te peropheta « te parau i ni‘a i te parau, te haapiiraa i ni‘a i te haapiiraa; te hoê maa vahi iti i ô nei, e te hoe maa vahi iti i te tahi vahi » (PH&PF 128:21) e tae noa’tu ua faahoihia mai i te fenua nei te îraa no te evanelia a Iesu Mesia.

Pororaa i te Evanelia mure ore

Na roto i te taato‘araa no te tau faatereraa a te peropheta, ua faaue te Fatu ia’na ia tono i te mau misionare no te « poro haere i te evanelia i te mau taata ato‘a » (PH&PF 68:8) Ua ite te peropheta iho i te hopoi‘a teiaha no teie nei faaueraa e ua vaiiho oia i to’na nohoraa e to’na utuafare e rave rahi mau taime no te poro i te evanelia. I te mau matahiti matamua o te Ekalesia, ua piihia te mau misionare ia poro i roto i te mau tuhaa e rave rahi no te fenua Marite e i Canada.

I muri iho, i te tau ve‘ave‘a no te matahiti 1837, ua faauruhia te peropheta ia tono i te mau peresibutero i te fenua Peretane. Ua faaue te peropheta ia Heber C. Kimball, te hoê melo no te Pŭpŭ no te Tino Ahuru ma Piti Aposetolo, ia arata‘i i te hoê pŭpŭ iti misionare i roto i teie nei ohipa rahi. Ma te vaiiho i to’na utuafare fatata i roto i te veveraa, ua reva atu o Elder Kimball ma te faaroo e e arata‘i te Fatu ia’na. I roto i te area hoê matahiti, fatata e 2000 taata tei amui atu i te Ekalesia i te fenua Peretane. I muri iho, ua tono o Iosepha Semita i te mau melo no te Pŭpŭ no te Tino Ahuru ma Piti Aposetolo i te fenua Peretane no te tavini mai te matahiti 1839 e tae atu i te matahiti 1841, e ua manuïa roa ato‘a taua misioni ra. I te matahiti 1841, hau atu i te 6.000 taata o tei farii i te evanelia. Ua reva atu e rave rahi o teie mau taata faafariuhia i te Fenua Marite, o tei faaoraora e tei haapuai i te Ekalesia i roto i te mau tau fifi roa.

Faaru‘eraa ia Ketelani

Ua faaruru te feia mo‘a i Ketelani i te hamani-ino-raa fatata mai te taime mai â i tae atu ai ratou i reira, ua rahi atu â râ te pato‘iraa i te matahiti 1837 e te matahiti 1838. Ua parau te peropheta e « Mai te au i te basileia o te Atua, e haamau te diabolo i te mau taime ato‘a i to’na basileia i te hoê â taime ei pato‘iraa i te Atua » ⁸ Ua ite te peropheta i te puai no te au ore, a te mau enemi no rapae au i te Ekalesia e te mau taata taiva tei fariu ê atu ia’na. Ua faahapa-hape-hia oia i te mau ohipa ino e rave rahi, ua horohia oia i te tiribuna haavaraa i roto i te mau hororaa tivira e te mau ohipa ino ti‘a ore, e ua faahepohia ia taponi atu i te feia e imi ra i te taparahi ia’na. Ua ti‘a râ oia ma te haapa‘o e te itoito i roto i te mau aehuehuraa e te pato‘iraa tamau i te mau taime ato‘a.

I te hopearaa, ua u‘ana rahi roa te hamani-ino-raa i Ketelani. I te ava‘e Tenuare 1838, ua faahepohia te peropheta e to’na utuafare ia faaru‘e ia Ketelani e ia horo atu e imi i te parururaa i Far West, Missouri. I te hopea no te matahiti, ua pee atu te rahiraa o te Feia Mo‘a i Ketelani ia’na, ma te vaiiho i muri ia ratou to ratou mau nohoraa e to ratou hiero tei herehia e ratou.

Te feia mo‘a i Missouri

Ti‘avaruraa mai roto atu i te mataeinaa no Iakona e te taahiraa no te puhaparaa no Ziona

A tutava noa’i te feia mo‘a no Ketelani i te haapuai i te Ekalesia i te vahi e nohohia e ratou, te na reira ato‘a ra te tahi atu mau melo e rave rahi i te mataeinaa no Jackson, Missouri. Ua haamata te feia mo‘a i te mau mahana hopea nei i te faaea i roto i te mataeinaa i te tau ve‘ave‘a no te matahiti 1831. E piti matahiti i muri iho, fatata e 1.200 Feia Mo‘a tei numerahia, aore râ te hoê i ni‘a i te toru o te huiraatira i reira.

Ua haafifi te tae-rahi-raa mai o te Feia Mo‘a i te mau taata tei faaea maoro i te reira tuhaa fenua. Ua măta‘u te mau taata no Missouri o te riro atu te mana politita i roto i te rima o te taata tei tae apî mai, e te rahiraa o teie mau taata tae apî mai e mau taata ïa no te tuhaa apatoerau no te Fenua Marite e tei ore i turu i te peu faatîtîraa taata a to te mau tuhaa fenua apato‘a. E mana‘o ino ato‘a te mau taata no Missouri i te mau parau haapiiraa taa ê a te Feia Mo‘a i te mau Mahana Hopea nei—mai te ti‘aturiraa i roto i te Buka a Moromona, te heheuraa apî, e te haaputuputuraa i Ziona—e ua au ore ratou i te feia mo‘a i te mau mahana hopea nei no to ratou tapihooraa i rotopu noa ia ratou iho. Aita i maoro roa ua haamata te mau taata ino e te mau nuu no taua tuhaa fenua ra i te hamani ino i te feia mo‘a e i te ava‘e novema 1833 ua tiavaru atu ia ratou i rapae au i te mataeinaa no Jackson. Ua horo te rahiraa o te feia mo‘a i te pae apatoerau na roto i te anavai no Missouri i te mataeinaa no Clay i Missouri.

Ua pe‘ape‘a roa o Iosepha Semita no ni‘a i te oraraa hepohepo o te feia mo‘a no Missouri. I te ava‘e atete 1833 ua papa‘i oia mai Kirtland i te feia faatere no Missouri: « E te mau taea‘e e, ahani e tei ô na vau ia outou ra e rave ïa vau i te hoê tuhaa i roto i to outou mau mauiuiraa, e noa’tu e natura taata o te ape ra i te mauiui, eita roa to‘u varua e vaiiho ia outou i roto i te pohe, ia tauturu mai te Atua ia‘u. E, e a oaoa, no te mea te fatata maira hoi to tatou ora. E te Atua, a faaora na i to‘u mau taea‘e i Ziona ».⁹

I te ava‘e fepuare 1834, ua farii o Iosepha Semita i te hoê heheuraa no te faaue ia’na ia arata‘i i te hoê pŭpŭ taata mai Ketelani e haere atu i Missouri no te tauturu i te feia mo‘a e mauiui nei e ia tauturu ia faahoihia ratou i ni‘a i to ratou ra mau fenua i te mataeinaa no Iakona (a hi‘o PH&PF 103). Ei pahonoraa i te faaueraa a te Fatu, ua faanahonaho te peropheta i te hoê pŭpŭ taata tei piihia Te puhaparaa no Ziona no te haere atu i Missouri. I te ava‘e no me e no tiunu 1834, ua haere ti‘atu te pŭpŭ, tei hau atu i te 200 melo, i te pae tooa o te râ no Ohio, Indiana, Illinois, i Missouri. Ua faaruru ratou e rave rahi mau fifi, mai te ma‘i cholera. I te 22 no tiunu 1834, a fatata’tu ai te pŭpŭ i te mataeinaa no Iakona, ua farii te peropheta i te hoê heheuraa ia faaorehia te puhaparaa. Ua fafau râ te Fatu e e faaorahia o Ziona i To’na iho tau (A hi‘o PH&PF 105:9–14). I muri a‘e i te faanahonahoraa i te hoê tītī i te mataeinaa no Clay e o David Whitmer ei peresideni, ua hoi atu te peropheta i Ohio.

Noa’tu e, aita i noaa mai i te puhaparaa no Ziona te mau fenua o te feia mo‘a, ua riro râ te reira ei haapiipiiraa faufaa rahi no te mau taata faatere no te Ekalesia no a muri a‘e, no te mea ua haapii te mau taata i roto i taua pŭpŭ ra i te mau parau tumu no te faatereraa parau-ti‘a na roto i te hi‘oraa o te peropheta e ta’na mau haapiiraa. I roto i te hoê putuputuraa a te mau melo no te puhaparaa no Ziona e te tahi atu mau melo no te Ekalesia tei tupu i Ketelani i te 14 no fepuare 1835, ua faanahonaho te peropheta i te Pŭpŭ no te Tino Ahuru ma Piti Aposetolo. E piti hepetoma i muri iho, ua faanahonaho oia i te hoê pŭpŭ no te Hitu Ahuru. Ua riro na e iva o na melo no te Pŭpŭ no te Tino Ahuru ma Piti Aposetolo e te taato‘araa o te mau melo no te pŭpŭ o te Hitu Ahuru ei melo no te puhaparaa no Ziona.

Te haamauraa i te pae apatoerau no Missouri

E rave rahi mau melo no te Ekalesia tei ora i te mataeinaa no Clay, Missouri tae roa’tu i te matahiti 1836, i to te feia no taua mataeinaa ra parauraa e eita ratou e paruru i te mau melo no te Ekalesia. No reira ua haamata te feia mo‘a i te faanuu atu i te pae apatoerau no Missouri, e ua faaea te rahiraa o ratou i roto i te mataeinaa no Caldwell, te hoê mataeinaa apî tei faanahonahohia e te apooraa iriti ture no te tuhaa fenua no te farii i te feia mo‘a i te mau mahana hopea nei tei faatea-ê-hia. I te matahiti 1838 ua amuihia’tu ratou e te tahi pŭpŭ rahi o te feia mo‘a tei faahepohia ia faaru‘e i te oire no Ketelani. Ua tae atu te peropheta e to’na ra utuafare i taua ava‘e mati ra i Far West, te vahi nohoraa o te feia mo‘a i te mau mahana hopea nei o te tupu noa’tura i te rahi i roto i te mataeinaa no Caldwell, e ua haamau oia i te pû o te Ekalesia i reira. I te ava‘e Eperera ua faaue te Fatu ia Iosepha Semita ia patu i te hoê hiero i Far West (a hi‘o PH&PF 115:7–16).

Te mea pe‘ape‘a râ, mea poto roa te oraraa hau o te feia mo‘a i te tuhaa apatoerau no Missouri. I te tau haapoheraa raau, ua hamani ino e ua aro faahou te mau taata iino e te mau nuu faehau i te feia mo‘a i te mau mahana hopea nei. A tahoo ai e a paruru ai te mau melo no te Ekalesia ia ratou iho, ua tape‘ahia o Iosepha Semita e te tahi atu mau taata faatere no te Ekalesia na roto i te mau haavareraa i te hau fenua. I te ava‘e novema ua tape- ‘ahia ratou i te fare auri i Inidenipeni e i Richmond, Missouri; e i te 1 no titema, ua afa‘ihia ratou i te fare tape‘araa no Liberty, Missouri. I taua tau to‘eto‘e ra, ua mauiui te peropheta e to’na mau hoa i roto i te oraraa ati mau. Ua tape‘ahia ratou i te fare auri—i roto i te hoê piha i raro i te fare—e vahi pouri, to‘eto‘e, e te reporepo—e ua horo‘ahia mai te mau maa iino e aita ratou e nehenehe e amu maoti râ na roto i te poia. Ua faaite te peropheta i to’na oraraa e te oraraa o te feia mo‘a mai te « hoê tamataraa no to tatou faaroo mai to Aberahama ra ».¹⁰

A tape‘ahia’i te peropheta i te fare auri, tauasini feia mo‘a i te mau mahana hopea nei tei faahepohia e tae noa’tu i to te peropheta iho utuafare, ia faaru‘e i to ratou mau nohoraa i Missouri i roto i te tau to‘eto‘e e te tau mahanahana no te matahiti 1838–1839. I te 7 no mati 1839, ua papa‘i o Emma ia Iosepha mai Quincy, Illinois atu: « Aore roa e taata maori râ o te Atua ana‘e tei ite i te mau feruriraa no to‘u nei mana‘o e te mau iteraa o to‘u aau a faaru‘e ai au i to tatou fare e to tatou nohoraa e te rahiraa o te mau mea ato‘a ta taua i fatu maori râ ta taua mau tamarii, e ua haere atu vau i rapae au i te tuhaa fenua no Missouri, ma te vaiiho ia oe ia tape‘ahia i roto i taua fare tape‘araa o oe ana‘e ra ».¹¹ I raro a‘e i te faatereraa a Brigham Young e a te tahi atu feia faatere no te Ekalesia, ua arata‘ihia te feia mo‘a i te hitiaa o te râ i Illinois.

Te mau matahiti i Nauvoo

Taata faatere herehia e To’na Nunaa.

I te ava‘e eperera 1839, ua afa‘i-ê-hia’tu te peropheta e to’na mau hoa mai te fare tape‘araa no Liberty e haere atu i Gallatin, Missouri na roto i te taui-raa-hia te vahi haavaraa. A taui faahou ai te feia mau auri i to ratou ra fare tape‘araa, mai Gallatin e tae atu i Columbia, Missouri, ua faati‘a te mau taata tia‘i ia ratou ia horo atu i rapae au i to ratou vahi tape‘araa tano ore. Ua haere atu ratou i Quincy, Illinois, i reira te rahiraa o te mau melo no te Ekalesia i haaputuputu ai i muri a‘e i to ratou hororaa mai Missouri atu. Aita i maoro roa, i raro a‘e i te arata‘iraa a te peropheta, ua haamata te Feia Mo‘a i te patu i te nohoraa e 80 kilometera i te pae apatoerau no Commerce, Illinois, te hoê oire iti i te hiti o te anavai no Mississipi. Ua horo‘a o Iosepha i te i‘oa o te oire o Nauvoo, i te mau matahiti i muri iho ua haaputuputu atu te mau melo e te mau melo faafariu-apî-hia i Nauvoo mai te fenua Marite mai, Canada, e Peretane, ma te faariro i te reira tuhaa fenua ei tuhaa fenua taata roa‘e i Illinois.

Ua faati‘a o Iosepha e Emma i to raua nohoraa i te pae anavai i roto i te hoê fare raau na‘ina‘i, o tei riro ei piha toro‘a no te peropheta i te mau mahana matamua no Nauvoo. Ua faaapu oia no te imi i te ora e ua faatere oia i te hoê fare toa i muri iho. No te mea râ, ua titau rahi ta’na ohipa i roto i te Ekalesia e ta’na mau hopoi‘a tivira i to’na taime, ua ite te peropheta e, e mea fifi roa no te haapa‘o i te mau hinaaro pae tino o to’na utuafare. I te ava‘e atopa 1841 teie ïa ta’na mau faufaa tei tabulahia mai « o Charley ruau (hoê puaahorofenua) tei horo‘ahia ia’na i Ketelani, e piti na ria, e piti na raoro ruau e e maha raoro apî, te hoê puaatoro ruau o ta te hoê taea‘e i Missouri i horo‘a na’na, ta’na Major ruau (hoê uri)… e te tahi maa parahiraa e iri amuraa no te fare ».¹²

I te hopea ava‘e no te matahiti 1843 ua faanuu atu te peropheta e to’na utuafare i te tahi atu pae o te puromu i roto i te hoê fare tahua piti apî tei piihia te Mansion House. I taua taime ra e maha ta Iosepha e Emma tamarii e ora ra: No huna noa’tu ra raua e ono o ta raua mau tamarii here, e e fanauhia mai â hoê faahou i muri mai i te pohe o Iosepha. Teie te i‘oa o na tamarii hoê ahuru ma hoê; o Alvin, fanauhia i te matahiti 1828, e o tei pohe i muri noa mai i to’na fanauraa; e na maehaa o Thadeus e o Louisa, fanauhia i te matahiti 1831, o tei pohe i muri noa mai i to raua fanau-raa-hia; e na maehaa faaamu o Joseph e o Julia, fanauhia ia John e ia Julia Murdock i te matahiti 1831 e ua horo‘ahia’tu na Iosepha e na Emma i muri mai i te pohe o te Tuahine Murdock i muri mai i te fanauraa (Ua pohe Joseph 11 ava‘e i te matahiti 1832)¹³; Ua fanauhia mai Joseph III i te matahiti 1832; Frederick, i te matahiti 1836; Alexander, fanauhia i te matahiti 1838; Don Carlos, fanauhia i te matahiti 1840, o tei pohe i te rae‘a-raa-hia to’na 14 ava‘e; te hoê ato‘a tamaiti i te matahiti 1842 o tei pohe i taua iho mahana; E o David, fanauhia i te matahiti 1844, fatata e pae ava‘e i muri iho i te maratiri o to’na metua tane.

I Nauvoo, i roto i to’na faatereraa ato‘a, e mea au na te peropheta e parahi i rotopu i te feia mo‘a. Ua parau oia no ni‘a i te oire e to’na huiraatira, « teie te vahi nenenehe roa‘e e te taata maitai roa‘e i raro a‘e i te ra‘i nei ».¹⁴ I to ratou pae, ua here te Feia Mo‘a ia’na e ua ite ratou e e hoa oia no ratou, ma te pii pinepine atu ia’na « te taea‘e Iosepha ». Ua parau te hoê taata faafariuhia e « te vai nei te hoê mana i roto i to’na huru o te huti nei ia’na ra te mau taata ato‘a tei matau ia’na ».¹⁵ « aita oia e faahua nei i te riro ei taata aore to’na e paruparu e te hapahapa » ta te hoê ïa taata e noho ra i Nauvoo i papa‘i. « E taata oia eita e nehenehe ia outou ia ore e au ia’na… aita ato‘a oia e te‘ote‘o no to’na hanahana mai ta te mau taata e rave rahi e mana‘o ra, e hoa râ oia no te mau taata maitai ato‘a ».¹⁶ Ua papa‘i o William Clayton, te hoê taata Peretane tei faafariuhia, i to’na utuafare mai Nauvoo atu no ni‘a i te peropheta i te na-ô-raa e, « oia mau ua hinaaro vau ia riro mai taua huru taata ra ».¹⁷

Ua horo‘a te peropheta e rave rahi mau a‘oraa i Nauvoo, e e mea au roa na te mau melo no te Ekalesia ia faaroo ia’na, no te mea ua haapii oia ma te puai i te mau parau mau i heheuhia no te evanelia. Ua haamana‘o o Angus M. Cannon e: « Aita roa‘e au i faaroo ia’na i te a‘oraa ma te ore e faaanaanatae i to‘u tino taato‘a e o te tura‘i i to‘u aau ato‘a ia faahanahana i te Fatu ».¹⁸ Ua parau o Brigham Young e: « Aita roa‘e au i ma‘iri i te hoê taime no te haere atu na muri i te peropheta Iosepha e no te faaroo atu ia’na ia a‘o i mua i te taata aore râ i te vahi mo‘emo‘e, ia nehenehe ia‘u ia apo mai i te maramarama no roto mai i te puna no reira mai hoi ta’na a‘oraa, ia nehenehe ia‘u ia farii i te reira e ia faahaere mai i te reira i te taime hinaarohia… Ua hau atu te faufaa no taua mau taime ra i te mau tao‘a ato‘a o te ao nei ».¹⁹

Ua haere te aravihi o Iosepha Semita i rapae au i ta’na mau hopoi‘a i te pae faaroo. I Nauvoo ua faao te peropheta i roto i te mau ohipa tivira, te ture, te imiimiraa faufaa, te haapiiraa e te nuu faehau. Ua hinaaro oia ia horo‘a te oire no Nauvoo i te mau maitai ato‘a e te mau rave‘a ato‘a no te nuuraa i mua i te pae ta‘ere e te pae tivira o to’na huiraatira. I te ava‘e tenuare 1844, no te mea hoi e aita oia i mauruuru i to te feia faatere no te tuhaa fenua e no te hau Marite oreraa i faatitiaifaro i te mau ti‘araa taata e te mau fenua tei faaerehia i te feia mo‘a i Missouri, ua faaite o Iosepha Semita e te horo nei oia no te ma‘itiraa no te peresideniraa no te Hau Marite. Noa’tu e ua ite te mau taata hi‘opo‘a e rave rahi e aita ona e manuia i te ma‘itiraa, ua riro râ to’na hororaa ei faaiteraa i te huiraatira no ni‘a i te ofati-raa-hia i ni‘a i te hoê faito huru rahi te mau ti‘araa taata haamanahia o te feia mo‘a. Ua parau te peropheta i te hoê taime e « e ti‘araa aifaito to te mau taata ato‘a ia amu i te maa hotu o te tumu raau rahi no te ti‘amâraa o te nunaa ».²⁰

Ia mo‘a to Iehova: Te paturaa i te hoê hiero i te Atua i Nauvoo

A faahepohia’i te feia mo‘a ia faaru‘e i te oire no Ketelani, ua vaiiho ratou i muri te hiero ta ratou i rohi no te patu. Tera râ e farii fahou â ratou i te hoê hiero mo‘a i rotopu ia ratou, no te mea ua faaue te Fatu ia ratou ia haamata i te patu i te hoê hiero i Nauvoo. Ua haamata te ohipa i te tau haapoheraa raau no te matahiti 1840, e ua tuuhia te mau ofa‘i tihi i te 6 no eperera 1841 i roto i te hoê oro‘a tei peresidenihia e te peropheta. Ua riro te paturaa i te hiero no Nauvoo te hoê o te mau opuaraa paturaa fare o tei hau i te faufaa rahi i te pae tooa o te râ o te fenua Marite. Ua titau te paturaa i te hiero i te feia mo‘a ia rave i te mau faatusiaraa rahi mau, e no te rahi hoi te taata o te tae mai i roto i te oire apî, e mea vêvê te rahiraa o te mau melo no te Ekalesia.

Ua haamata te peropheta i te haapii i te parau haapiiraa no te bapetizoraa i te feia pohe i te 15 no atete 1840. No te mea hoi e no haamata noa’tu ra te paturaa o te hiero, ua haamata ïa te Feia Mo‘a i te rave i te mau bapetizoraa no te feia pohe i roto i te mau anavai e te mau tahora pape e vai ra i reira. I te ava‘e tenuare 1841, ua heheu te Fatu e faahaere-noa-hia teie raveraa e tae noa- ’tu i te taime e ravehia ai te mau bapetizoraa i roto i te hiero (a hi‘o PH&PF 124:29–31). I roto i te tau ve‘ave‘a e te tau haapoheraa raau no te matahiti 1841, ua patu te Feia Mo‘a i te hoê vahi bapetizoraa raau, no te hoê taime poto noa, i roto i te niu o tei heru-apî-hia o te hiero. Ua haamatahia te mau bapetizoraa no te feia pohe i roto i teie nei vahi i te 21 no Novema 1841.

I te matahiti 1841 ua ravehia te mau taatiraa matamua o te mau tane e te mau vahine e i te matahiti 1843 ua tai‘o te peropheta i te heheuraa o te faaite ra i te natura mure ore no te fafauraa no te faaipoiporaa (a hi‘o PH&PF 132). Ua faaitehia o te peropheta ana‘e te mau parau tumu no teie heheuraa i te matahiti 1831.²¹ Mai tei faauehia e te Atua, ua haapii ato‘a oia i te parau haapiiraa no te faaipoipoiraa vahine rau.

No te mea hoi te hiero e hope i te patuhia no te tahi taime noa, ua ma‘iti o Iosepha Semita i te faatere i te oro‘a hiero i rapae au i te mau papa‘i mo‘a o te hiero. I te 4 no Me 1842, i te piha teitei o ta’na fare toa piriti uteute i Nauvoo, ua faatere te peropheta i te mau oro‘a matamua no te hiero i te hoê pupu iti o te mau taea‘e, e tei roto ato‘a o Brigham Young. Aita te peropheta i ora no te ite i te hopearaa o te paturaa no te hiero no Nauvoo. Tera râ i te mau matahiti 1845 e 1846 e rave rahi tauasini feia mo‘a tei farii i te oro‘a hiero na roto mai ia Brigham Young e ua farii te tahi i teie nei mau haamaitairaa na roto mai i te peropheta.

Ua tae te tau faatereraa a Iosepha Semita i te hopea.

A oaoa noa’i te feia mo‘a i te oraraa hau i Nauvoo, ua rahi noa- ’tu â te hamani-ino-raa i ni‘a i te peropheta, e ua ite oia e te fatata ra ta’na misioni i ni‘a i te fenua i te hope. I roto i te hoê rururaa e ore roa e mo‘ehia i te ava‘e mati 1844, ua faaue te peropheta i te Pŭpŭ no te Tino Ahuru Ma Piti Aposetolo ia faatere i te Ekalesia i muri a‘e i to’na poheraa, ma te faataa atu e tei ia ratou ra te mau taviri e te mana ato‘a e titauhia no te rave i te reira. Ua parau o Wilford Woodruff, e melo no te Pŭpŭ no te Tino Ahuru ma Piti Aposetolo i taua taime ra: « Te faaite nei au i to‘u iteraa papû e i te omuaraa no te tau mahanahana no te matahiti 1844, i Nauvoo, ua haaputuputu te peropheta Iosepha Semita i te mau aposetolo e ua horo‘a oia ia ratou i te mau oro‘a no te Ekalesia e te basileia o te Atua. E te mau taviri e te mau mana ato‘a ta te Atua i tuu i ni‘a iho ia’na, ua taati oia i te reira i ni‘a i to matou nei upoo, e ua parau oia ia matou e, e ti‘a ia matou ia faaetaeta i to matou mau tapono e ia amo i teie basileia, ia ore matou e faahapahia… Ua teatea to’na hoho‘a mata mai te tapau te huru, e ua tapo‘ihia oia e te hoê mana tei ore roa i itehia e au na mua’tu i roto i te hoê taata i te tino nei ».²² I muri a‘e i te poheraa o te peropheta, ua vai mai te hopoi‘a no te Ekalesia e te basileia o te Atua i ni‘a i te fenua nei i ni‘a i te Pŭpŭ no te Tino Ahuru ma Piti Aposetolo.

I te ava‘e tiunu 1844 ua tae mai te hoê faahaparaa hape no te faatupu i te arepurepu i ni‘a i te peropheta. Noa’tu e ua faaorehia teie nei faahaparaa i Nauvoo, ua onoono râ te tavana rahi no Illinois, o Thomas Ford, ia haavahia o Iosepha no taua faahaparaa ra i Carthage, Illinois, te pû no te mataeinaa no Hancock. I to te peropheta e to’na tuaane Hyrum taeraa’tu i Carthage, ua matara raua i te faahaparaa matamua no te aufauraa i te tahi tino moni, tera râ ua faahapahia i muri mai no te haavareraa i te tuhaa fenua no Illinois, e ua tape‘ahia i roto i te fare auri no te oire.

I te avatea ve‘ave‘a e te haumi no te 27 no tiunu 1844, ua tomo atu te mau taata iino ma te hoho‘a mata tei faaereerehia i roto i te fare tape‘araa e ua taparahi pohe roa ia Iosepha e o Hyrum Smith. Fatata e toru hora i muri iho, ua faatae o Willard Richards e o John Taylor,i roto ato‘a na hoi raua i te fare tape‘araa e na taata toopiti tei taparahi-pohe-hia, i te hoê parau poro‘i oto i to Nauvoo: « Fare tape‘araa no Carthage, Hora 8:05 i te pô, 27 no tiunu 1844, Ua pohe o Iosepha e o Hyrum… Ua rave-vitiviti-hia teie taparahiraa taata ».²³ I te 38raa o to’na matahiti, ua taati te peropheta Iosepha Semita i to’na iteraa papû i to’na ra toto. Ua hope ta’na ohipa i roto i te tahuti nei, ua haamauhia te Ekalesia e te basileia o te Atua no te taime hopea i ni‘a i te fenua nei, ua taparahi-pohe-hia o Iosepha Semita na te mau ofa‘i pupuhi a te feia taparahi taata. Teie ta te Fatu iho i parau no ni‘a i te peropheta Iosepha Semita: « O[Iosepha Semita] ta‘u i tiaoro atu na roto i ta‘u mau melahi, ta‘u mau tavini tauturu, e na roto i to‘u iho re‘o mai roto mai i te ra‘i, ia faatupu mai i ta‘u ohipa; o te reira niu ra ta’na hoi i patu, e ua haapa‘o maitai hoi; e ua rave au ia’na ia‘u iho nei. E rave rahi tei maere no to’na poheraa; area râ ua titauhia ïa ia taati atu oia i ta’na faaite i to’na toto, ia faaturahia mai oia e ia faahapahia’tu hoi te feia parau ti‘a ore » (PH&PF 136:37–39).

Iosepha Semita, e peropheta rahi, e hi‘o, e e heheu parau no te mau mahana hopea nei, te hoê tavini itoito e te haapa‘o maitai a te Atua Teitei Roa ra. Ua faaite te peresideni Brigham Young; « Aita vau e mana‘o nei e, te ora nei te hoê taata i ni‘a i te fenua o tei mâtau maitai ia’na hau atu ia‘u nei; e te faaite papû nei au i te parau e, taa‘e atu ia Iesu Mesia, aita e taata maitai atu tei ora aore râ o te ora nei i ni‘a iho i teie nei fenua. O vau to’na ite ».²⁴

log home — I te taime o te orama matamua, te ora ra Iosepha Semita e to’na utuafare i roto i te hoê fare raau i Palmyra, i New York.

map of Palmyra — I roto i te oire no Palmyra, New York, rave rahi mau ohipa faufaa tei tupu i roto i te aamu o te Ekalesia i reira, oia’toa te orama matamua e to Moroni mau farereiraa ia Iosepha Semita.

Sacred Grove — Te uru raau mo‘a i te matahiti 1907. I te tau faatupuraa raau o te matahiti 1820, ua haere Iosepha Semita tamaiti i roto i te uru raau piri mai i to’na fare no te pure ia arata‘ihia e te Fatu.

Peter Whitmer Sr. home — Te hoho‘a fare o Peter Whitmer Metua i Fayette, New York. Ua faati‘ahia teie fare tei hamani-faahou-hia i ni‘a i te vahi i reira te peropheta faanahonahoraa i te Ekalesia i te 6 no Eperera 1830.

Church history sites — E mau vahi faufaa no te aamu o te Ekalesia i mutaa ihora e no te oraraa o te peropheta Iosepha Semita.

Kirtland Temple — Te hiero no Kirtland i te matahiti 1900. Ua patuhia teie hiero na roto i te faatusiaraa a te feia mo‘a area râ, ua faaru‘ehia i muri mai i te mau hamani-ino-raa o tei tu‘aruhia mai Kirtland atu.

Liberty Jail — Te fare tape‘araa no Liberty, i reira te peropheta Iosepha Semita i tape‘ahia’i i te tau to‘eto‘e no te matahiti 1838–39.

Te Mansion House i Nauvoo. Ua nuu atu te peropheta Iosepha Semita e to’na utuafare i reira i te ava‘e Atete 1843.

Nauvoo Temple — Te hiero no Nauvoo i te ropuraa o te matahiti 1840. Ua taninahia te hiero i te matahiti 1848 i muri mai i to te feia mo‘a faahepo-raa-hia ia faru‘e i Nauvoo e ua vai te tahi mau tuhaa o te mau patu tei haamouhia e te hoê mata‘i puahiohio, e o tei hahuhia i muri mai.

Carthage Jail — Te fare tape‘araa no Carthage, i reira te peropheta Iosepha Semita e to’na ra taea‘e Hyrum i maratirihia’i i te 27 no Tiunu 1844.