Pene 43: « Ia riro na oia e hoê peropheta a te Atua »: Te faaite papû nei te mau taata tei ora i te tau o Iosepha Semita no ni‘a i ta’na misioni ei peropheta

Pene 43

« Ia riro na oia e hoê peropheta a te Atua »: Te faaite papû nei te mau taata tei ora i te tau o Iosepha Semita no ni‘a i ta’na misioni ei peropheta

« Ua hinaaro vau i te tuo, alleluia, i te taime ato‘a, ia feruri ana‘e vau e ua ite au ia Iosepha Semita, te peropheta » (Brigham Young)

No roto mai i te oraraa o Iosepha Semita

I Nauvoo, ua putuputu pinepine amui te feia mo‘a no te faaroo i te peropheta Iosepha Semita ia a‘o atu ia ratou. No te mea hoi aita e fare rahi i Nauvoo no te farii i te taato‘araa o te feia mo‘a, ua a‘o pinepine te peropheta i rapae au. Ua a‘o pinepine oia i roto i te hoê uru raau i te hiti o te râ o te hiero, i reira e nehenehe ai e amui mai e mau tauasini taata.Ua hamanihia te hoê tahua teitei no te feia faatere no te Ekalesia e te feia a‘o, e ua parahi noa te amuiraa i raro i ni‘a i te matie aore râ i ni‘a i te mau tapu raau aore râ te mau apaapa ofa‘i. Ua a‘o ato‘a te peropheta i te tahi ê atu mau vahi i Nauvoo, i roto i te hiero tei ore i oti i te patuhia e i roto i te mau fare o te taata. Ua faaite mai te hoê ratere i Nauvoo i te omuaraa o te matahiti 1843 i to’na iteraa i te mau rururaa tei faaterehia « i ni‘a i te tahua o te niu o te hiero, e e mea pinepine te peropheta i te a‘o i reira ».¹

Ia a‘o ana‘e te peropheta i rapae au, e pinepine oia i te haamata i ta’na mau a‘oraa ma te ani i te feia mo‘a ia pure e ia tamarûhia te mata‘i aore râ te ua e tae noa’tu ua hope ta’na a‘oraa. I te hoê amuiraa tei tupu i Nauvoo i te 8 no eperera 1843, ua haamata te peropheta i te hoê a‘oraa i te na-ô-raa e: « e toru ta‘u aniraa i te amuiraa: A tahi o teie ïa, ia faaohipa te feia ato‘a e faaroo to ratou e ia pure i te Fatu ia tamarû i te mata‘i; no te puai o te mata‘i i teie taime, eita e nehenehe ta‘u e paraparau roa ma te ore e tuino rahi i to‘u nei ea; te piti ia farii ïa vau i ta outou mau pure ia haapuai te fatu i to‘u mau mahaha, ia nehenehe ia outou paato‘a ia faaroo mai; e te toru, ia pure ïa outou ia vai mai te Varua Maitai i ni‘a iho ia‘u, ia nehenehe ia‘u ia parau atu i taua mau mea ra o tei riro e parau mau ».²

E mea faufaa rahi roa no te mau melo no te Ekalesia te mau taime tei faataahia ia a‘o te peropheta, e i te tahi mau taime ua a‘o oia i te mau amuiraa e rave rahi tauasini taata. Te haamana‘o ra o Parley P. Pratt, « aita roa e taata tei faaroo ia’na i rohirohia noa‘e i ta’na a‘oraa », « ua ite au ia’na i te tape‘araa i te hoê amuiraa taata tei ineine e tei anaanatae i te faaroo e rave rahi mau hora, i roto i te to‘eto‘e aore râ te mahana, te ua aore râ te mata‘i, a ata ai ratou i te hoê taime e a heva ai ratou i te tahi atu taime ».³ Ua haamana‘o o Alvah J. Alexander, e tamarii rii oia i te mau matahiti i Nauvoo, « aore e faaoaoaraa aore râ e hauti o te faanaatae ia‘u maori râ ia faaroo ia’na ia a‘o mai ».⁴

Ua haamana‘o o Amasa Potter e tei reira oia a a‘o ai te peropheta Iosepha Semita i te hoê a‘oraa puai i te hoê naho‘a rahi o te feia mo‘a i Nauvoo:

« I to [te peropheta] paraparauraa fatata e toru ahuru minuti ua tae mai ra te hoê mata‘i puai e te vero. No te me‘ume‘u o te repo puehu aita i nehenehe ia matou i te ite te tahi i te tahi i te atea, e te haere ra te tahi mau taata a pii ai o Iosepha ia ratou ia faaea e ia haere atu ta ratou mau pure i te Atua Mana Hope e ia faaea te mau mata‘i i te pupuhi e ia faaea te ua i te topa, e e ti‘a ia na reira hia. Tau na minuti noa ua faaea te mata‘i e te ua e ua vai hau noa te natura mai te hoê po‘ipo‘i i te tau ve‘ave‘a. Ua vahi te vero e ua haere atu i te apatoerau e te apato‘a o te oire, e ua nehenehe ia matou ia ite i te atea te mau raau e te mau raau rii e farara ra i te mata‘i, i te vahi i reira matou e mea hau roa ïa no te maororaa hoê hora, e i roto i taua taime ra ua porohia te hoê o te mau a‘oraa faahiahia roa‘e na roto mai i te vaha o te peropheta no ni‘a i te tumu parau rahi no te feia i pohe ».⁵

Ua faaite te feia mo‘a tei faaroo i te peropheta Iosepha Semita ia a‘o i te mau iteraa papû puai e tei haamana‘o maitaihia no ta’na misioni ei peropheta. E rave rahi tei papa‘i i to ratou mau haamana‘oraa i te mau a‘oraa ta ratou i faaroo ia’na i te horo‘araa e te mau mea ta ratou i rave e ona, no te mea ua hinaaro ratou i te mau u‘i i muri mai ia ratou ia ite, mai ta ratou i ite, e ua riro mau o Iosepha Semita ei peropheta na te Atua.

Te mau iteraa papû no Iosepha Semita

Mai te feia mo‘a matamua, e nehenehe ta tatou e ite e o Iosepha Semita te peropheta ïa na roto ia’na te Fatu i faahoi mai ai te îraa o te evanelia

Brigham Young, te piti o te peresideni o te Ekalesia: « Ua hinaaro vau i te tuo, alleluia, i te mau taime ato‘a, ia feruri ana‘e vau e ua ite au ia Iosepha Semita, te peropheta ta te Fatu i faati‘a mai e i faatoro‘a, e ta’na i horo‘a’tu i te mau taviri e te mana no te paturaa i te basileia a te Atua i ni‘a i te fenua nei e te tururaa i te reira. Ua horo‘ahia teie mau taviri i teie nunaa, e e mana to tatou ia tamau i te ohipa ta Iosepha i haamata ».⁶

Eliza R. Snow, te peresideni rahi o te sotaiete tauturu mai te matahiti 1866 e tae atu i te matahiti 1887: « No te tumu o te parau mau e te parau-ti‘a—i roto i te mau mea ato‘a e haamaitai i to’na taata tupu, ua vai paari noa to’na parau-ti‘a mai te mau pou o te ra‘i. Ua ite oia e ua pii te Atua ia’na i te ohipa, e aita te mau mana amui ato‘a o te fenua e no hade i manuia i te haamarirau aore râ i te hahi ia’na i ta’na ohipa. Na roto i te tautururaa a te Atua e to’na mau taea‘e, ua haamau oia i te niu no te ohipa rahi roa‘e tei haamauhia e te taata nei—te hoê ohipa tei toro atu eiaha ana‘e i te feia ora ato‘a, e i te mau u‘i a muri atu, i te feia i pohe ato‘a râ.

« Ua faaruru oia ma te măta‘u ore e te puai i te mau peu tumu hape, te mau faaroo hape, te mau haapa‘oraa faaroo, te faahua e te ite ore o te ao nei—ua vai ti‘a noa râ oia i te mau parau tumu ato‘a tei heheuhia mai te ra‘i mai—ua vai ti‘a noa oia i to’na mau taea‘e e i te Atua, ua taati oia i to’na iteraa papû i to’na ra toto ».⁷

Bathsheba W. Smith, te peresideni rahi no te sotaiete tauturu mai te matahiti 1901 e tae atu i te matahiti 1910: « Ua ite au ia’na mai ta’na i parau—e hoê peropheta mau na te Atua, e ua faahoi mai te Fatu na roto ia’na te evanelia mure ore e te mau oro‘a e te mau horo‘araa ato‘a e arata‘i ia tatou i roto i te basileia tiretiera ».⁸

Wilford Woodruff, te maha o te peresideni o te Ekalesia: « Ua mana‘o vau te oaoa rahi roa i te mea ta‘u i ite i roto i te taea‘e Iosepha, no te mea i roto i ta’na ohipa i mua i te taata e i roto i to’na utuafare ua ta’ita’i noa oia i te Varua o te Atua Mana Hope, e ua faaite mai oia i te maitai rahi o te varua tei ore i itehia e au i roto i te tahi ê atu taata ».⁹

Daniel D. McArthur, te hoê melo matamua no te Ekalesia tei arata‘i i muri iho i te hoê o te mau pŭpŭ pereoo huti matamua i te oire no Roto Miti: « Teie to‘u iteraa papû, e peropheta mau oia no te Atua ora; e rahi noa’tu â to‘u faarooraa i ta’na mau parau e to‘u iteraa i ta’na mau ohipa e rahi noa’tu â ïa to‘u papûraa e ua ite mau oia i te Atua te Metua e Ta’na Tamaiti o Iesu Mesia, e te mau melahi mo‘a ato‘a a te Atua… E au ra ia‘u i te mau taime ato‘a e mai te mea ua ite au i te tahi mea i ni‘a i te fenua nei, ua ite papû ïa vau e e peropheta oia ».¹⁰

Alexander McRae, te hoê o te mau taata tei tape‘ahia i roto i te fare auri no Liberty e o Iosepha Semita: « O tera ïa to matou ti‘aturiraa ia [Iosepha Semita] ei peropheta, e ia parau ana‘e oia e « te parau mai nei te Fatu », ua ti‘aturi matou e na reira ihoa mai ta’na i parau; e rahi noa’tu â to matou tamataraa i ta’na parau, e rahi noa’tu â ïa to matou ti‘aturiraa ia’na, no te mea aita matou i ite i te hoê noa‘e taime i te manuia-ore-raa o ta’na parau ».¹¹

Lyman O. Littlefield, te hoê melo no te puhaparaa no Ziona: Ua horomiihia te mau puai ato‘a o to’na varua i roto i te ohipa hanahana o te mau mahana hopea nei ta’na i piihia e to’na Fatu Mo‘a ».¹²

Mary Alice Cannon Lambert,te hoê vahine Peretane faafariuhia tei tere atu i Nauvoo i te matahiti 1843: « Ua ite au ia Iosepha Semita i te taime matamua i te tau mahanahana no te matahiti 1843. I te taime a tapae atu ai te pahi ta matou i rave no te tere atu na ni‘a i te anavai no Mississipi, e rave rahi o te mau taea‘e faatere tei tae mai no te farerei i te feia mo‘a tei tere mai na ni‘a i te pahi. I rotopu i taua mau taea‘e ra o te peropheta Iosepha Semita ïa. Ua ite au ia’na i te taime a vai ai to‘u na mata i ni‘a iho ia’na, e i taua taime ra ua farii au i to‘u iteraa papû e e peropheta oia na te Atua… Aita Oia i faaitehia mai ia‘u. Ua ite au ia’na i rotopu i te mau taata ato‘a, e, noa’tu e e tamarii rii au (hoê ahuru ma maha noa to‘u matahiti) ua ite au e ua ite mata vau i te hoê peropheta a te Atua ».¹³

Angus M. Cannon, e melo no te Ekalesia tei ora na i Nauvoo ei taure‘are‘a e tei riro i muri iho ei hoê peresideni tītī i te oire no Roto Miti: « Te haamana‘o nei au i te hoê ihoa râ taime taaê i te taea‘e Iosepha a paraparau ai oia i te hoê amuiraa i te feia mo‘a, i te tau mahanahana no te matahiti 1844. Ua tupu te reira i raro a‘e i te tahi mau tumu raau rahi, i roto i te hoê afaa i te pae apato‘a o te hiero, piri atu i te aroa purumu Parley. Te a‘o ra oia no ni‘a i to te Atua haamauraa i Ta’na Ekalesia, ua faanaho oia e hoê ana‘e taata tei faati‘ahia, e te Atua, no te farii i te mau heheuraa o te vai mana i ni‘a i te Ekalesia… E i taua taime ato‘a ra to‘u faarooraa i te peropheta i te parauraa e ua farii oia i te autahu‘araa a Melehizedeka i raro a‘e i te faatereraa a Petero, Iakobo e Ioane.

« Ua apee noa te mau mana‘o tei fariihia e to‘u nei feruriraa apî no te mau parau faaurûhia e Iosepha Semita ia‘u i roto i te taato‘araa o to‘u nei oraraa i muri iho; e ia haapouri ana‘e te pouri i to‘u nei feruriraa, e tae ora mai to’na iteraa papû i mua ia‘u, no te horo‘a mai ia‘u te faaiteraa e ua faati‘ahia e ua faateremau-hia te Ekalesia a Iesu Mesia i te Feia Mo‘a i te mau Mahana Hopea nei e te mana e te mana faatere o te Atua ».¹⁴

Hyrum Smith, te taea‘e o te peropheta e te patereareha o te Ekalesia: « I vai na te mau peropheta na mua’tu, ua mau râ Iosepha i te varua e te mana o te mau peropheta ato‘a ».¹⁵

Ua riro o Iosepha Semita ei hi‘oraa ta tatou e nehenehe e pee no te faatupuraa i te hoê huru mai to te Mesia ra.

Parley P. Pratt, e melo no te Pŭpŭ no te Tino Ahuru ma Piti Aposetolo mai te matahiti 1835 e tae atu i te matahiti 1857: « E taata rahi te peresideni Iosepha Semita e te paututu maitai, te puai e te itoito; e iri uouo, e rouru pupure, e mata ninamu, mea iti roa te huruhuru taa, e hi‘oraa taaê mau no’na iho… E hoho‘a mata marû, au maitai, o te faaiteite mai i te maramarama e te maitai; amuihia’tu e te hoê hi‘oraa anaanatae e te hoê mata ataata, aore râ oaoa, e aore roa e faaheporaa aore râ faahuaraa i te tura; e te vai nei te tahi mea tei tu‘atihia i te hi‘oraa oaoa, tamau e te hohonu o to’na mata, mai te mea ra e te tomo atu nei outou i roto i te vahi mo‘emo‘e roa o te aau taata, e hi‘o atu i roto i te mure-ore-raa, e tomo atu i roto i te mau ra‘i, e e taa i te mau ao ato‘a. Ua mau oia i te hoê huru taata hanahana, măta‘u ore, e te ti‘amâ; e mea ohie e e mea au roa ta’na mau peu; e mea ri‘ari‘a ta’na faahaparaa mai te liona; e oti‘a ore to’na maitai mai te moana; e mea aano to’na ite ».¹⁶

John Needman, te hoê melo Peretane faafariuhia i te omuaraa o te Ekalesia: « E taata rahi o Iosepha Semita, te hoê taata e parau tumu ta’na, te hoê taata parau-ti‘a; e ere te taata faahua paieti ore, e taata paieti mau râ. Oia mau te marua nei te tahi i roto i to ratou faaroo no te mea e taata parau-ti‘a oia, o te parau i te parau mau, e taata oaoa, e na te reira i faarahi atu â i to‘u here ia’na ».¹⁷

Emmeline B. Wells, te peresideni rahi no te sotaiete tauturu mai te matahiti 1910 e tae atu i te matahiti 1921: « Te faaite nei au i to‘u iteraa papû e o oia te taata rahi roa‘e e te peropheta rahi roa‘e e te hi‘oraa rahi roa‘e no teie u‘i; te rahi roa‘e, aita vau i măta‘u i te parau i te reira, mai te tau o te Faaora. To’na hanahana i to’na hoho‘a mata e mea faahiahia mau. E mana‘o outou e e mea rahi a‘e e mea aano a‘e oia i to’na iho huru mau. Penei a‘e e rave rahi o outou tei ite i te mau taata mai teie huru hi‘oraa ia ti‘a e ia haere ana‘e ratou. Teie ïa te huru e te peropheta Iosepha. Aita e hoho‘a no’na e vai nei ta‘u i ite, o te faaau atu i te nehenehe e te hanahana o to’na huru ».¹⁸

Mary Alice Cannon Lambert: « Eita e nehenehe ia parauhia te here o te feia mo‘a ia’na. E hinaaro ratou e horo‘a na roto i to ratou iho hinaaro i to ratou ora no’na. Mai te mea e faaarahia e e a‘o mai oia, e vaihohia ïa te mau ohipa ato‘a i te hiti ia nehenehe ia ratou ia faaroo i ta’na mau parau. E ere oia i te hoê taata mai te mau taata ato‘a. Ua ite te feia mo‘a e te feia hara ato‘a i te hoê mana e te hoê puai ta’na e ta‘ita‘i nei na muri ia’na. Eita e nehenehe ia farerei ia’na e ia ore e haamaitaihia e te puai e te mana no to’na huru taata ».¹⁹

John M. Bernhisel, e taote tei faaea i te fare o Iosepha e Emma i Nauvoo e rave rahi mau ava‘e i te matahiti 1843 e 1844: « E taata o Iosepha Semita ma te mana puai i te pae feruriraa, e tei mau i te puai e te huru taata papû, te taaraa hohonu i te mau mea, e te hoê ite hohonu o te natura taata. E taata o te rave i te haavâraa ma te hau, e orama tei faaanohia, e tei ite-rahi-hia e to’na here i te parau-ti‘a. E taata hamani maitai o te imi i te mau rave‘a ia oaoa oe, o te horo‘a i to’na taime e te maitai, o te au i te taata e te oaoa, e tei mau i te hoê huru taata o te feruri e o te tuatapapa i te mau mea. E taata parau-ti‘a, o te ore e huna i to’na mana‘o, te măta‘u ore e te ti‘amâ, e aore e huna [hi‘oraa haavare] mai te mau taata ato‘a ta outou e nehenehe e ite… Ei orometua no te pae faaroo, mai te taata ato‘a, e mea here-rahi-hia oia e teie nunaa taata ».²⁰

Jesse N. Semita, te hoê fetii no Iosepha Semita: « Ua riro mau [te peropheta] mai te taata tei riro mau mai te Atua ra te huru ta‘u i ite… Ua ite au na roto i to’na huru natura eita e nehenehe ia’na ia haavare e ia huna, ua mau oia i te huru taata maitai e te hanahana roa‘e. Ua ite au e ia faaea vau i piha‘iho ia’na e e nehenehe ta’na e ite i to‘u mau mana‘o. Ua ite au e ua riro mau oia i te mau mea ato‘a ta’na i parau ».²¹

William Clayton, te hoê melo Peretane faafariuhia tei tavini ei papa‘i parau no Iosepha Semita: « Ia rahi noa’tu â to‘u parahiraa i piha‘iho ia’na, e rahi noa’tu â ïa to‘u here ia’na; e ia rahi noa’tu â to‘u ite no ni‘a ia’na, e rahi noa’tu â ïa to‘u ti‘aturiraa ia’na ».²²

Joseph F. Smith, te ono o te peresideni o te Ekalesia: « Ua î oia i te huru natura hanahana e te mâ roa‘e, o tei faaite-pinepine-hia mai na roto i te mau faaarearearaa maitai—te hautiraa i te popo, te taputoraa e to’na mau taea‘e e te aroraa ia ratou na roto i te hauti, e te faaoaoaraa ia’na iho; e ere oia i te taata etaeta e te faahua, e te hoho‘a mata haapa‘o maitai eita e nehenehe ia’na ia ata, no te mea aita e oaoa i roto i to’na aau. Ua î ra oia i te oaoa; ua î oia i te poupou; ua î oia i te here, e te tahi atu mau huru hanahana o te faariro i te mau taata ei mau taata faahiahia e te maitai, e te ohie e te hara ore i te hoê â taime, ia nehenehe ia’na ia pou atu i te huru haehaa roa‘e o te huru oraraa; e mana to’na, na roto i te maitai o te Atua, ia haaro‘aro‘a ato‘a i te mau opuaraa a te Mana Hope. O tera ïa te huru o te peropheta Iosepha Semita ».²³

Ei peropheta na roto ia’na i faahoihia mai ai te evanelia, ua haapii Iosepha Semita i te opuaraa a te Atua no te faaoraraa ma te maramarama e te puai

Brigham Young: « No te maitai o te hanahana o te huru taata o te taea‘e Iosepha Semita i nehenehe ai ia’na ia tatara i te mau mea o te ra‘i i te ite o te taata nei. Ia poro ana‘e oia i te nunaa— ia heheu i te mau mea a te Atua, te hinaaro o te Atua, te opuaraa no te faaoraraa, te mau opuaraa a Iehova, to tatou auraa e ona e te mau taata ato‘a no te ra‘i—e faahaere oia i ta’na mau haapiiraa i te aravihi o te tane, te vahine, te tamarii tata‘itahi, ma te haamaramarama maitai i ta’na mau haapiiraa mai te hoê e‘a faataamaitai-hia. Na teie faanahoraa i faaite i te mau taata ato‘a tei faaroo i to’na reo, i to’na mana e to’na puai no te ra‘i, no te mea aita’tu e taata ê atu e nehenehe i te haapii mai ia’na te huru, e aita e taata e nehenehe ia heheu i te mau mea a te Atua, maori râ na roto i te mau heheuraa a Iesu Mesia ».²⁴

Howard Coray, te hoê papa‘i parau no Iosepha Semita: « Ua tuatapapa vau i te Evanelia mai tei heheuhia mai e Iosepha Semita e ua feruri au mai te mea e nehenehe i te hoê taata o te ore e tauturuhia e te Varua a te Atua ia heheu mai i taua huru faanahoraa ra no te faaoraraa e te faateiteiraa no te taata. Ta‘u faaotiraa eita ïa. Ua parahi au e ua faaroo vau i ta’na pororaa i Nauvoo e rave rahi mau taime a rave-ê-hia’tu ai au e to’na aravihi i te paraparau—te mana o te parau—te paraparauraa mai ta‘u i ore i faaroo noa‘e i te hoê taata ê i te paraparauraa ».²⁵

Joseph L. Robinson, te hoê tauturu i roto i te hoê episekoporaa i Nauvoo: «E mea maoro to matou ti‘aturiraa e to matou ite-maitai-raa e ua riro mau o Iosepha Semita e hoê peropheta mau e te haehaa a te Atua, i teie nei râ te ite nei to matou mau mata e te faaroo nei to matou mau tari‘a i to’na reo mai te reo o te mau patiri puai o te ra‘i, e to’na ra reo e reo marû ïa e te haapii e te faateitei. Te vai nei te puai e te hanahana i roto i ta’na mau parau e ta’na a‘oraa tei ore roa i itehia e matou i roto i te hoê taata na mua’tu, no te mea e peropheta puai oia, te hoê taata mo‘a a te Atua. Ua haapii-mau-hia oia i roto i te mau mea no te basileia o te Atua e ua î rahi oia i te Varua Maitai, tei riro ei hoa tamau no’na ».²⁶

Orson Spencer, the hoê orometua Bapetizo tei tomo atu i roto i te Ekalesia i te matahiti 1841: « I roto i te haapiiraa e mea ite roa o Semita tane i te mau papa‘iraa mo‘a. Aita roa‘e vau i ite ia’na i te hunaraa aore râ i te faafaufaa oreraa i te hoê noa‘e parau mau a te Faufaa Tahito e te Faufaa Apî; ua ite noa râ vau ia’na i te tatararaa e te parururaa ia ratou na roto i te hoê rave‘a aravihi. Ma te faatahinuhia e te Atua, no te haapii e no te haamaitai i te Ekalesia, e mea titauhia ia’na ia ite nahea ia faanahonaho i te mau mea i hinaarohia no te faahaere mai i te mau mea apî e te mea tahito, mai te hoê papa‘i parau tei haapii-maitai-hia. E au ra te faarahi atu â ra oia i teie toro‘a e te ti‘araa aposetolo; na roto i ta’na tatararaa te ora faahou mai nei te mau peropheta tahito, ua ravehia te nehenehe e te puai o ta ratou mau heheuraa no te hohora ia ratou ma te anaanatae rahi no te feia ato‘a o te faaroo ».²⁷

Jonah R. Ball, e melo no te Ekalesia tei ora i Nauvoo: « Ua haere au i te pureraa. Ua faaroo vau i te peropheta i te pororaa i ni‘a i te tahua no te hiero. E rave rahi tauasini tei faaroo ia’na. Aita e hape. Aita e numeraraa aore râ e marôraa te huru a tatara mai ai oia i te mau papa‘iraa mo‘a. No roto mai ta’na papa‘iraa i te pene matamua no 2 Petero. Ua haamaramarama mai oia i te reira mai te mahana i te avatea ra ».²⁸

William Clayton: « Ua farii matou i te haamaitairaa no te aparau ia Iosepha Semita tamaiti, e ua oaoa matou i piha‘iho ia’na… E taata… feruriraa paari oia e ua rahi to’na maramarama, e a faaroo ai outou i ta’na paraparauraa e farii outou i te maramarama o te faaaano i to outou feruriraa e te faatupu i to outou aau te oaoa. E mea maitai roa oia e ua oaoa oia i te haapiiraa i te feia mo‘a vêvê. E nehenehe ta‘u e paraparau ohie atu ia’na mai ta‘u e paraparau ia outou, e no ni‘a i te hinaaro i te horo‘a i te haapiiraa ua parau oia, « ua farii hua vau i te reira e e horo‘a hua vau i te reira. Ua ineine oia i te pahono i te mau uiraa ato‘a ta‘u i horo‘a’tu ia’na e e oaoa oia ia ui matou ia’na i te mau uiraa. E au ra e e mea ite oia i te mau papa‘iraa mo‘a, e na roto i te paraparauraa no ni‘a i te mau huru tumu parau ato‘a, e heheuhia mai taua huru maramarama ra e taua huru nehenehe ra o tei ore roa i itehia e au na mua’tu. Ahani ua ti‘a ia‘u ia haere mai mai te fenua Peretane no te paraparau noa ia’na no na mau mahana noa, e ti‘a ïa ia‘u ia parau e ua hoona-mau-hia to‘u nei taime ».²⁹

Mercy Fielding Thompson, te hoê melo Peretane faafariuhia e ua tavini na ta’na tane o Robert B. Thompson ei papa‘i parau no Iosepha Semita: « Ua faaroo vau… i ta’na mau tatararaa maramarama e te aravihi i te mau uiraa hohonu e te fifi. E au ra ia’na e mea ohie roa te mau mea ato‘a ia taahia, e no reira i nehenehe ai ia’na ia tatara ohie teie mau mea ia vetahi ê e aita â vau i faaroo i te tahi ê atu taata i te na reira raa ».³⁰

Mai te feia mo‘a matamua, e nehenehe ta tatou e haaputu i te mau parau a Iosepha Semita e ia ora i te mau parau tumu ta’na i haapii

Emmeline B. Wells: « Ua ti‘aturi vau e ua ite vau i roto i te peropheta Iosepha Semita te mana varua rahi tei afa‘i mai i te oaoa e te tamahanahanaraa i te feia mo‘a… No te puai rahi o te mana o te Atua i vai i ni‘a iho ia’na e au ra ua faahuru-ê-hia oia e rave rahi mau taime. E mea marû ta’na parau e au mai to te tamarii rii ra te huru ia faafaaea ana‘e oia; e ia a‘o oia i te taata, tei here ia’na e au ra e haamoriraa te reira, eita e noaa ia faahitihia te hanahana o to’na hoho‘a mata. I te tahi atu mau taime ê e au ra te ueue nei te puai rahi o to’na huru, hau atu i to’na reo (e mea aravihi roa i to‘u hi‘oraa) i te vahi i reira matou i te ti‘araa e te o nei te reira mana i roto i te hohonuraa o te feia o te faaroo ra ia’na, e ua papû ia‘u i taua taime e ua ineine ratou i te horo‘a i to ratou ora no te paruru ia’na. Ua faaroo noa vau ma te faahiahia i te mau taime ato‘a i ta’na mau parau ato‘a—te peropheta tei maitihia e te Atua i teie nei tau tuuraa hopea ».³¹

Lorenzo Snow, te pae o te peresideni o te Ekalesia: « Te taime matamua i ite ai au i te peropheta Iosepha i to‘u ïa apîraa [fatata e 17 matahiti to‘u]. Te a‘o ra oia i te hoê amuiraa na‘ina‘i. Ua parau atu oia ia ratou no te mau tere farerei a te melahi ia’na… Ua au te taata i te faarooraa ia’na, no te mea ua î oia i te heheuraa… Mai te au i te fafauraa a te Atua, o ratou o tei farii i te mau parau tumu ta’na i haapii ua farii ïa i te hoê iteraa papû no to ratou parau mau no ŏ mai i te Fatu ra ».³²

Edward Stevenson, e melo no te Hitu Ahuru mai te matahiti 1844 e tae atu i te matahiti 1897: « Ua ite matamua vau ia’na i te matahiti 1834 i Ponti‘ac [Michigan] e na te mana‘o ta’na i haaputapû i to‘u feruriraa i taua taime ra i tura‘i ia‘u i teie nei ma te oaoa rahi i te faaaite i to‘u farereiraa ia’na i to‘u mau hoa e rave rahi. Te here no’na, ei peropheta mau na te Atua, ua vai noa ïa i roto i to‘u nei feruriraa e e ore roa e iriti-ê-hia’tu, e ua vai noa te reira ia‘u nei mai taua taime ra, noa’tu ua fatata e ono ahuru matahiti i teie nei. I taua iho matahiti ra, 1834, i rotopu i te mau amuiraa rahi e rave rahi, ua faaite papû te peropheta ma te puai rahi no ni‘a i te tere o te Metua e te Tamaiti, e to’na paraparauraa ia raua. Aita vau i ite noa‘e i taua huru puai na mua’tu mai tei faaitehia mai ia‘u i taua mau taime ra ».³³

Mary Ann Stearns Winters, te hoê meti‘a hoovai tamahine a Elder Parley P. Pratt: « Ua ti‘a vau i piha‘iho i te peropheta a poro ai oia i te mau Inidia i te uru raau i te hiero. Ua faaturama te Varua Mo‘a i to’na hoho‘a mata e ua anaana mai te hoê hei hinuhinu e haati ra ia’na, e ua putapû te aau o te feia ato‘a tei faaroo ia’na e ta’na mau parau…

« Ua ite au i te mau tino pohe o te mau taea‘e Iosepha e o Hyrrum a vai tarava ai raua i te fare faaearaa i muri a‘e i to raua faahoi-raa-hia mai i Carthage, e ua ite au i te tahi o te mau ahu ta raua i oomo, tei tafetafeta i to raua toto. Ua ite au e e mau taata raua na te Atua, te peropheta e te patereareha, te parau mau e te haapa‘o maitai. Ia riro tatou ei feia parau-ti‘a no te farerei ia raua i roto i te ao a muri atu! »³⁴

Wilford Woodruff, tei faaite mai i roto i te a‘oraa i te 6 no eperera 1837: « Ua ti‘a mai te peresideni Iosepha Semita, tamaiti, i ni‘a e ua a‘o atu i te amuiraa e toru hora te maoro, ma te ahuhia e te mana, te varua e te hoho‘a o te Atua. Ua faaite hua mai oia i to’na feruriraa e to’na mau mana‘o i roto i te fare o to’na mau hoa. Ua hohora mai oia e rave rahi mau mea faufaa rahi roa i te feruriraa o te mau peresibutero no Iseraela. Ahani e nehenehe te reira e papa-‘ihia i ni‘a i te păpă o to matou aau mai te peni auri ia vai noa e a muri noa’tu ia nehenehe ia matou ia faaohipa i te reira i roto i to matou oraraa [a hi‘o Ioba 19:23–24]. Teie puna vai no te maramarama, te parau tumu, e te viivii ore o te pihaa’tu mai roto atu i te aau e i te vaha o te peropheta Iosepha, mai to Enoha tei î te aau i te mau mea mure ore—te parau nei au, mai te au i taua mau mea ra i tupu tei faaitehia na roto i te puai no te faa‘ere i te ti‘aturi-ore e te feaa i roto i te feruriraa o te feia e faaroo ra, no te mea eita taua huru reo, taua mana‘o, taua parau tumu, e taua varua ra e nehenehe e tahe mai roto ai i te pouri. E peropheta Iosepha Semita tamaiti na te Atua tei faati‘ahia mai no te faaora ia Iseraela e parau mau te reira mai to‘u nei aau e ahu nei i roto ia‘u ».³⁵

Brigham Young: « Mai te taime to‘u ite-matamua-raa i te peropheta Iosepha aita roa’tu vau i haamo‘e noa‘e i te hoê parau na roto mai ia’na no ni‘a i te basileia. E teie te taviri no te ite tei mauhia e au nei i teie nei mahana, oia hoi, ua faaroo vau i te mau parau a Iosepha, e ua haaputuputu vau i te reira mau parau i roto i to‘u nei aau, ua tuu atu ia ratou i te hiti, ma te ani i to‘u Metua i te i‘oa o ta’na Tamaiti o Iesu ia faahaere mai ia ratou i roto i to‘u feruriraa ia hinaarohia ana‘e. Ua haaputuputu vau i te mau mea a te Atua, e teie te taviri i mauhia e au nei i teie mahana. Ua anaanatae vau i te haapii na roto mai ia Iosepha e te Varua o te Atua ».³⁶

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ a faaineine ai outou i te haapii. No te tahi atu tauturu, a hi‘o i te mau api vii–xiv

A tai‘o i te mau iteraa papû no ni‘a i te peropheta Iosepha Semita i te mau api 562–64. Eaha tei haaputapû ia outou no ni‘a i teie mau iteraa papû? Eaha te niu o to outou iho iteraa papû no Iosepha Semita? Nahea i noaa’i ia outou teie iteraa papû? E hinaaro paha outou i te papa‘i i to outou iteraa papû i roto i ta outou buka aamu aore râ ia faaite atu i te reira i to outou utuafare.
Te vai nei i roto i te mau api 565–67 te mau faahitiraa parau o te faaite i te hoho‘a mata o Iosepha Semita, to’na hi‘oraa, e to’na huru taata. Nahea teie mau faahitiraa parau e haamaitai ai i to outou mau mana‘o no ni‘a ia Iosepha Semita? A feruri e nahea outou e nehenehe ai e faatupu i te tahi o teie mau huru.
A tuatapapa i te mau iteraa papû no ni‘a i te huru e nahea te peropheta Iosepha i haapii ai i te evanelia e a tatara ai oia i te mau papa‘iraa mo‘a (te mau api 567–70). Nahea teie mau iteraa papû e tauturu ai ia tatou a tuatapapa ai e a haapii ai tatou i te evanelia?
A tai‘o faahou i te tuhaa hopea no teie pene (te mau api 570–72). Nahea e nehenehe ai ia outou ia pee i te mau hi‘oraa a Wilford Woodruff e Brigham Young i roto i ta outou tuatapaparaa i teie buka? Nahea ta outou e nehenehe ai e pee i to raua mau hi‘oraa a tuatapapa‘i outou i te mau haapiiraa a te mau peropheta ora? I to outou feruriraa eaha te auraa ia faati‘a i te parau mau ia « papa‘ihia i ni‘a i to outou mau aau e te peni auri »?

Te mau papa‘iraa mo‘a:2 Nephi 3:6–19; PH&PF 24:1–9; 124:1

Joseph Smith teaching — Ua parau o Lorenzo Snow «Ua here te nunaa i te faarooraa i [te peropheta Iosepha Semita, no te mea ua î oia i te heheuraa », mai te au i te fafauraa a te Fatu, o ratou o tei farii i te mau parau tumu ta’na i haapii ua farii ïa ratou i te hoê iteraa no to ratou parau mau no ŏ mai i te Fatu ra.