Pene 33
Te mau horo‘araa a te Varua no te faaoraraa, no te mau reo, no te tohuraa, e te iteraa i te mau Varua
« Aore roa e nehenehe i te taata ia riro ei tavini na Iesu Mesia maori râ e iteraa papû to’na no Iesu; e o teie ïa te varua no te tohuraa ».
No roto mai i te oraraa o Iosepha Semita
I te mau ava‘e matamua no te matahiti 1839, i muri iho i to ratou taponiraa no te hoê tau poto i Quincy, Illinois, ua haamata te mau feia mo‘a i te nuu e 50 maile i apatoerau no te pae fenua no Commerce, Illinois. I muri iho i to’na oraraa mai i to’na tape‘a-raa-hia i Missouri, ua haamata te perophera i te hoo mai i te mau fenua i roto e atitia‘e i te mau tuhaa fenua no Commerce, ei vahi haaputuputuraa no na tauatini o tei ti‘avaruhia i Missouri e o te hinaaro nei i te hoê vahi no te faatupu faahou i to ratou oraraa. I te ava‘e tiurai 1839, e rave rahi hanere feia mo‘a tei puhapa i roto i te mau fare ie e te mau pereoo i te pae hitiaa o te râ o te anavai no Mississipi no Commerce, i reira ra, ua itehia e te tahi te hoê vahi nohoraa i roto i te mau fare faaru‘ehia a te mau faehau i tera’tu pae o te anavai i Montrose, Iowa. I roto i taua fare apî râ, ua rave te feia mo‘a i te ohipa no te tamâ e no te haamarō i te fenua vari i piha‘iho i te anavai. Rave rahi mau melo no te Ekalesia o tei patiahia e te naonao e ua roo-maitai-hia ratou i te ma‘i mariri, e te tahi atu mau ma‘i. Ua pohe te tahi o te feia mo‘a, e ua fatata te tahi i te pohe. Ua rave o Iosepha e Emma Semita e rave rahi i roto i to raua fare raau no te utuutu e ua vaiiho te peropheta i to’na ra ro‘i e ua haere atu i rapae au no te taoto i roto i te hoê fare ie.
I te 22 no tiurai, i roto i te ma‘i tei arepurepu roa te rahiraa o feia mo‘a i ite i te mea ta Elder Wilford Woodruff i pii « hoê mahana no te mana o te Atua ».1 Ua ti‘a mai te peropheta i taua po‘ipo‘i ra, ua pii atura i te Atua na roto i te pure, e, ma tei îhia i te Varua o te Fatu, ua faatahinu atura oia i te feia ma‘i i roto i to’na ra fare, i rapae au i te fare i roto i te aua, e na te anavai atu. Ua haere atura oia na roto i te anavai e haere atura i te fare o Brigham Young i Montrose no te faatahinu ia’na. I reira, ma te apeehia e Sidney Rigdon, Brigham Young e te tahi atu mau melo no te Tino Ahuru ma Piti, ua tamau oia i ta’na misioni no te aroha i rotopu i te tahi ê atu feia mo‘a no Iowa. Ua haamana‘o o Elder Woodruff i te hoê mau faaoraraa ma‘i faahiahia roa no taua mahana ra:
« Ua haere atura matou na roto i te oti‘a o te oire e tomo atura i roto i te fare o te taea‘e [Elijah] Fordham. Te pohe mârû noa ra te taea‘e Fordham e hoê hora i teie nei, e ua tia‘i matou ua riro te mau minuti ato‘a ei minuti hopea. Ua ite au i te mana o te Atua i te taeraa mai i ni‘a i to’na peropheta. I to matou tomoraa’tu i roto i te fare, ua haere ti‘atu te taea‘e Iosepha i te taea‘e Fordham ra, e ua rave ihora ia’na na te rima atau… Ua ite oia e ua pouri rii te mata o te taea‘e Fordham, e ua faaea noa oia ma te paraparau ore e te taa ore.
« I muri a‘e i to’na raveraa i to’na rima, ua hi‘o a‘era [te peropheta] i te hoho‘a mata o te taata e pohe ra e parau atura: « E te taea‘e Fordham, ua ite anei oe ia‘u?’ I te haamataraa aita oia i pahono mai; ua nehenehe râ ia matou paato‘a ia ite i te mana o te Varua o te Atua i te parahiraa i ni‘a iho ia’na.
« Ua parau faahou atura o [Iosepha]: ‘Elijah, ua ite anei oe ia‘u?’ Ma te parau rii mârû noa, ua pahono maira te taea‘e Fordham, ‘e!’ ua parau atura te peropheta? ‘Te vaira anei to oe faaroo ia faaorahia oe?’
« E mea huru papû rii te pahonoraa i na mua’tu: ‘Te măta‘u nei au e ua taere roa. Ahani oe i na mua rii mai, te mana‘o nei au e, e ora paha vau.’ E hoho‘a to’na mai to te hoê taata a tahi ra a ara mai ai mai te taoto mai. Te taoto no te pohe. Ua parau a‘era o Iosepha: ‘Te ti‘aturi ra anei oe e o Iesu te Mesia? ‘Oia, e te taea‘e Iosepha’ o ta’na ïa pahonoraa.
« I reira ua parau te peropheta a te Atua ma te reo puai, mai te hanahana o te Atuaraa: ‘E Elijah, te faaue nei au, i te i‘oa o Iesu no Nazareta, a ti‘a mai i ni‘a e ia ora oe!’
« E ere te mau parau a te peropheta mai te mau parau a te taata, mai te reo râ o te Atua. E au ra ia‘u nei e ua aueue te fare mai raro mai i te niu. Ua ou‘a a‘era o Elijah Fordham mai ni‘a mai i to’na ro‘i mai te hoê taata tei faati‘ahia mai te pohe mai. Ua araara faahou to’na hoho‘a mata, e ua itehia te ora i roto i te mau mea ato‘a ta’na i rave. Mea puohuhia to’na na ava‘e i te mau puohu ahu tapirihia e te raau rapaau. Ua tu‘e a‘era oia i taua mau puohu raau tapiri ra, haapurara ihora i te raau, e ani ihora i to’na ahu e oomo ihora i te reira. Ua ani oia no te hoê au‘a faraoa e te û, e ua amu ihora; i muri mai ua oomo i to’na taupoo e ua pee maira ia matou na ni‘a i te purumu, no te haere e farerei i te tahi atu o tei ma‘ihia ».2
I te tau fifi mau, ua ite te feia mo‘a i te niniiraa o te horo‘araa no te faaora i ni‘a i te peropheta.
Te mau haapiiraa a Iosepha Semita
E nehenehe te feia ma‘i e faaorahia na roto i te faaroo e te faaohiparaa i te mana autahu‘araa mai te au i te hinaaro o te Fatu
« E aha te tapa‘o no te faaoraraa i te feia ma‘i? Te tuuraa rima o te tapa‘o ïa aore râ te rave‘a ïa tei faaitehia mai e Iakobo, e te peu a te feia mo‘a i mutaa iho mai tei faauehia e te Fatu, e eita e nehenehe e noaa ia tatou te haamaitairaa na roto i te peeraa’tu i te tahi ê atu rave‘a maori râ te e‘a tei faaitehia mai e te Fatu [a hi‘o Iakobo 5:14–15]».3
I te ava‘e tiurai 1839, i to te feia mo‘a haereraa i Commerce, Illinois, e e rave rahi te feia ma‘i i rotopu ia ratou, ua papa‘i Iosepha Semita: « E rave rahi te ma‘i tei haamata i te itehia i rotopu i te mau taea‘e, e i roto ato‘a i te huiraatira no taua oire ra, no reira, ua ravehia teie nei hepetoma e te hepetoma i muri iho no te hahaere i te feia ma‘i e no te faatahinu ia ratou; ua nava‘i to te tahi faaroo e ua faaorahia ratou; aita to vetahi ê…
« Sabati 28—Ua tupu te pureraa mai tei matauhia… Ua paraparau vau e ua a‘o i te mau melo tata‘itahi no te Ekalesia ia faaafaro i to ratou mau utuafare, ia tamâ i roto i te au‘a, e ia putuputu i te sabati i mua nei no te rave i te oro‘a, ia nehenehe ia matou e te Atua, na roto i to matou haapa‘oraa i te mau oro‘a, ia arai i te taata haamou, e ia faaorahia te feia ma‘i. Ua haere au i te taato‘araa o teie nei hepetoma i rotopu i te feia ma‘i, e te noaa faahou mai nei to ratou puai e te tino maitai ».4
« E rave rahi o te feia parau-ti‘a tei roohia i te ma‘i, i te ma‘i pohe e te tahi atu â… no te paruparu o te tino, e ua faaorahia â i roto i te basileia o te Atua. No reira e ere i te mea maitai ia parau e ua hara teie taata e tera taata no te mea ua roohia ratou i te ma‘i aore râ i te pohe, no te mea ua haavîhia te tino i te pohe; e ua parau te Faaora, ‘eiaha e faaino, ia ore outou ia faainohia mai’ [A hi‘o Mataio 7:1].».5
Te tumu no te horo‘araa ia parau i te mau parau ĕê no te haapii ïa i te evanelia ia vetahi ê
Ua a‘o te peropheta i te hoê amuiraa a te mau peresibutero i te matahiti 1834: I reira ua horo‘a mai o Iosepha Semita i te hoê tatararaa no te horo‘araa ia parau i te parau ĕê, oia hoi ua haamau-taa-ê-hia no te pororaa i te Evanelia i te tahi atu mau fenua e mau reo, aita râ i horo‘ahia no te faatereraa a te Ekalesia ».6
« No te horo‘araa ia parau i te parau ĕê, te taato‘araa o te mea ta matou e nehenehe e parau, o teie ïa, i teie nei vahi, ua farii matou i te reira mai ta te feia i mutaa ihora i farii: area râ, te hinaaro nei matou e ia ara outou oi haavârehia outou… E mea papû roa e e faaturorirori Satane i to outou mana‘o no ni‘a i te horo-‘araa ia parau i te parau ĕê, ia ore outou e haapa‘o maitai; eita e nehenehe ia outou ia tapiri roa’tu ia’na, aore râ ia ore e faarahi i te pure. Ia horo‘a mai te Fatu ia outou te paari i roto i te mau mea ato‘a ».7
« Ua tai‘o vau i te pene 13 no Korinetia 1 [i te hoê rururaa tei tupu i te 26 no titema 1841], e te hoê tuhaa ato‘a no te pene 14, e ua ite au e e mea titauhia te horo‘araa ia parau i te parau ĕê i roto i te Ekalesia; … te horo‘araa ia parau i te parau ĕê na roto i te mana o te Varua Maitai i roto i te Ekalesia, no te maitai ïa o te mau tavini a te Atua no te poro i te feia ti‘aturi ore, mai tei tupu i te mahana Penetekose ».8
« Ua horo‘ahia te mau horo‘araa ia parau i te parau ĕê no te pororaa ïa i roto i te feia aita to ratou reo e taahia; mai tei tupu i te mahana Penetekote, e te tahi atu, e aita i titauhia ia haapiitaa-ê-hia te mau reo ĕê i to te Ekalesia, no te mea e nehenehe i te taata o tei farii i te Varua Maitai ia parau i te mau mea a te Atua i roto i to’na iho reo e ia parau i roto i te tahi ê atu reo; no te mea na roto i te faarooraa i te parau a te Atua e noaa’i te faaroo, eiaha râ na roto i te mau tapa‘o ».9
« Eiaha e tuatapapa rahi roa i te parau no te horo‘araa ia parau i te mau parau ĕê, eiaha e parau i te parau ĕê maori râ ia vai mai te hoê taata iriti parau i reira, te opuaraa hopea no te parau ĕê o te paraparau ïa i te feia ĕê, e mai te mea e hinaaro mau te mau taata i te faaiteite i to ratou ite, ia parau ïa ratou i te mau taata ĕê na roto i to ratou iho reo. E faaohipa-roa-hia te mau horo‘araa a te Atua i to ratou iho vahi, ia faaohipahia râ ratou na roto i te rave‘a tei ore i opuahia e te Atua, e riro mai ïa ratou ei ati, ei haavâreraa e ei ati eiaha râ ei haamaitairaa ».10
« Te vai ato‘a nei to tatou mau taea‘e e mau tuahine e e horo-‘araa havare to ratou ia parau i te parau ĕê; e parau ïa ratou na roto i te hoê reo eita e taahia, e te huru ê, e e faahuru-ê-hia to ratou mau tino… no reira, aore roa e mea huru ê i roto i te Varua o te Atua ».11
« Eiaha e parau na roto i te horo‘araa ia parau i te parau ĕê ma te taa ore, aore râ ma te iriti-ore-hia. E nehenehe ato‘a i te diabolo ia parau i te parau ĕê; e tae mai te enemi e ta’na ato‘a opuaraa; e nehenehe ta’na e faahema i te mau huru taata ato‘a; e nehenehe e parau mai na roto i te reo Peretane aore râ i te reo Purutia. Eiaha roa te hoê e parau i te parau ĕê maori râ e iriti oia, maori râ na roto i te faati‘araa a te taata tei tuuhia no te peresideni; i reira e nehenehe ïa ta’na e ite aore râ e iriti, aore râ e nehenehe i te tahi ê atu taata ia na reira ».12
« Mai te mea te vai nei ta outou te hoê ohipa no te heheu mai, ia na roto ïa i to outou iho reo, eiaha e faaohipa rahi i te horo‘araa ia parau i te parau ĕê, oi imi ai te diabolo i te faahema i te taata hara ore e te taata ara ore. E nehenehe ta outou e parau i te parau ĕê no to outou iho maitai, e faariro râ vau teie ei ture, e ia haapiihia na roto i te horo‘araa ia parau i te parau ĕê, eita ïa te reira e fariihia ei haapiiraa ».13
Noa’tu hoê ana‘e taata e parau ei peropheta o te Ekalesia, e faati‘a te varua no te tohuraa i te taata ato‘a ia faaite i te parau no Iesu Mesia
« Aore roa e taata e riro ei tavini no Iesu Mesia ma te oreraa e riro ei peropheta. Aore roa e nehenehe i te taata ia riro ei tavini na Iesu Mesia maori râ e iteraa papû to’na no Iesu; e teie ïa te varua no te tohuraa.[hi‘o Apokalupo 19:10] »14
« Te parau nei o Ioane te heheu parau, e o te parau hoi ia Iesu ra, o te varua ïa o te tohu [a hi‘o Apokalupo 19:10]. I teie nei, mai te mea te vai ra to te hoê taata te parau ia Iesu, aita anei ia’na ra te varua tohu? E mai te mea e varua tohu to’na, te ani nei au, e ere anei oia i te peropheta? E mai te mea e peropheta oia, eita anei oia e farii i te heheuraa? E te taata ato‘a o te ore e farii i te heheuraa no’na iho e ti‘a ïa ia’na ia faahapahia, no te mea te parau ia Iesu ra, o te varua tohu ïa. No te mea te parau nei te Mesia, e ani e roaa ïa ia outou; e mai te mea e farii noa’tu oia i te hoê mea, te ani nei au, e ere anei te reira i te heheuraa? E mai te mea aita to te hoê taata e parau no Iesu aore râ te varua o te Atua, e ere ïa oia no’na, oia hoi no te Mesia. E mai te mea e ere oia i te reira, e ti‘a ïa ia’na ia faahapahia ».15
Ua papa‘i te hoê ratere i Nauvoo i te mea ta Iosepha Semita i haapii i roto i te hoê aparauraa: « Ua parau te peropheta Iosepha e… no te riro ei tavini no Iesu, e ti‘a i te taata ia faaite i te parau no Iesu; e no te parau i te parau no Iesu, e ti‘a i te taata ia farii i te varua no te tohu, no te mea, mai te au i te parau a Ioane, te parau hoi ia Iesu o te varua ïa no te tohu.
« Mai te mea e parau hua te hoê taata e e tavini oia no Iesu e aita ana e varua no te tohu, e mea papû roa ia e e ite haavare oia, no te mea aita oia i mau i taua horo‘araa ra o te faatano ia’na no taua toro‘a ra; e te vahi huru ê i rotopu ia [Iosepha Semita] e te mau orometua no teie nei u‘i o teie ïa, te parau nei oia e ua mau oia i taua varua no te tohu o te faati‘a ia’na ia parau i te parau o Iesu e te Evanelia no te faaora; e te huna nei te mau orometua i taua varua ra, oia hoi te varua no te tohu, e na te reira hoi e nehenehe e faariro ia ratou ei mau ite mau aore râ ei mau taata ite no te Fatu o Iesu, ma te parau e e mau tavini mau ratou no te faaora ».16
« E tae mai te ti‘aturi na roto i te faarooraa i te parau a te Atua, na roto i te parau faaite a te mau tavini o te Atua; e apeehia taua parau faaite i te mau taime ato‘a e te varua no te tohu e no te heheuraa ».17
Na te horo‘a o te ite i te mau varua e faati‘a i te feia haapa‘o ia faataa i te mana o te mau varua maitai e o te mau varua ino
I te mau mahana matamua a faahoihia mai ai te Ekalesia, ua rave te mau melo no te Ekalesia, e te mau melo ato‘a no te tahi ê atu mau pŭpŭ faaroo i raro a‘e i te mana o te mau varua ino aore râ te mau varua haavare, ma te ti‘aturi e tei raro a‘e ratou i te mana o te Varua Maitai. Ua haapii te peropheta Iosepha Semita: « Na te tahi mau ohipa tei tupu i rotopu ia tatou nei i faariro ei ohipa faufaa rahi na‘u ia parau i te tahi parau no ni‘a i te mau varua o te tura‘i nei i te mau taata.
Ua faaite-papû-roa-hia na roto mai i te mau papa‘iraa a te mau Aposetolo [ i roto i te Faufaa Apî], e i vai na te mau varua haavare e rave rahi i to ratou ra tau, e ‘ua haere atu na to te ao’ e ua titauhia te maramarama ta te Atua ana‘e e nehenehe e horo‘a no te ite i te mau varua haavare, e no te faaite e na te Atua te mau varua [a hi‘o 1 Ioane 4:1–4]. Ua pouri rahi roa te ao nei no ni‘a i teie nei mea, e no te aha ïa e huru ê ai ratou—‘no te mea aore roa te hoê e ite i te mau mea a te Atua maori râ na roto i te Varua o te Atua’ [A hi‘o 1 Korinetia 2:11]…
« E au ra i vai noa na, i roto i te mau tau ato‘a, te hoê ereraa i te maramarama no ni‘a i teie nei tumu parau. Ua faaiteitehia mai te mau varua huru rau ato‘a, i te mau tau ato‘a, e fatata i rotopu i te mau taata ato‘a… E varua ato‘a to ratou, e faatere nianatura ato‘a to ratou, e te taato‘araa te faahiti nei ratou e to ratou varua no ô mai i te Atua râ. O vai te ti‘a ia tatara i te parau aro? Te parau nei o Ioane [1 Ioane 4;1], « A tamata i te mau varua » o vai râ te rave i te reira? Te feia ite, te feia tei ite i te orero, te taata feruri, te taata paari, te taata a‘o parau—e feia ite ore ana‘e ratou… O vai te nehenehe e huti atu i roto i te maramarama o te ao e o te faatupu i te mau parau aro i hunahia no ni‘a i te mau varua haavare tei faaiteite-pinepine-hia mai i mua i te feia mo‘a i te mau mahana hopea nei? Te pahono nei matou e aore roa e taata e nehenehe e rave i te reira mai te mea aita e autahu‘araa, e aita i farii i te hoê ite no te mau ture e faatere nei i te mau varua; no te mea ‘aore roa e taata e ite i te mau ohipa a te Atua, maori râ na roto ïa i te Varua o te Atua,’ no reira aore ïa e taata e ite i te varua o te diabolo e to’na ra mana e to’na ra puai, maori râ ia mau oia i te maramarama tei hau atu i te maramarama taata, e tei hohora mai na roto i te rave‘a o te autahu‘araa i te mau raveraa moemoe a ta’na ra mau mauihaa…
« E ti‘a i te taata ia ite i te mau huru varua hou e nehenehe ai ia’na ia huti atu i roto i te maramarama teie nei mana no hade e e hohora’tu i to te ao nei i to’na mau huru hoho‘a ato‘a no te haamou i te mau varua, te mau huru hoho‘a diabolo e te ri‘ari‘a; no te mea aore e mamae rahi atu e vai i te mau tamarii a te taata maori râ ia riro i raro a‘e i te mana o te hoê varua haavare a mana‘o ai ratou e tei ia ratou râ te Varua o te Atua. Ua ite e rave rahi mau tauasini taata i te mana o to’na ra puai ri‘ari‘a e te mau huru ino o te tupu mai…
« Mai ta matou i ite na mua’tu, te fifi rahi o te ite ore ïa i te natura o te mau varua, i te mau ture e faatere nei ia ratou, e te mau tapa‘o no te ite ia ratou; mai te mea e titauhia te Varua o te Atua no te ite i te mau mea a te Atua; e nehenehe noa te varua o te diabolo e itehia na roto i taua rave‘a ra, e e riro te reira ei hopea e ia ore te tahi taata aore râ te mau taata e farii i te hoê faaiteraa, aore râ heheuraa no ô mai i te Atua ra, o te hohora mai ia ratou te tereraa o te varua, e vai noa ïa ratou e a muri noa’tu i roto i te ite oreraa i teie mau parau tumu; no te mea te mana‘o nei au e mai te mea eita e nehenehe i te hoê taata ia taa i teie mau mea maori râ na roto i te Varua o te Atua, eita ïa e ti‘a i te hoê ahuru tauasini taata ia ite ato‘a; eita ato‘a e noaa te paari i te taata ite, te reo o te taata aravihi i te parau, te mana no te puai. E e tae ia tatou i te pae hopea o teie faaotiraa, noa’tu e aha to tatou mana‘o no ni‘a i te heheuraa, e ia ore ana‘e te reira eita ïa e nehenehe ia tatou ia ite aore râ ia taa i te mau mea a te Atua, aore râ a te diabolo; e noa’tu râ te hinaaro ore o to te ao ia ite i teie nei ture, e mea papû ïa na roto i te mau faaroo e te mau mana‘o huru rau e rave rahi no ni‘a i teie parau tumu e aita roa ratou e taata i te hoê mea no teie parau tumu, e e mea papû roa ato‘a e ia ore te hoê faaiteraa no te ra‘i mai e vai noa ia ratou i roto i te ite ore…
E ti‘a i te hoê taata ia farii i te horo‘araa i te ite i te mau varua, mai ta matou i parau na na mua’tu, no te taa i teie mau mea, e nahea e ti‘a’i ia noaa ia’na teie horo‘araa mai te mea aita e mau horo‘araa a te Varua? E nahea teie mau horo‘araa e nehenehe ai e noaa mai te mea aita e heheuraa? ‘Ua reva’tu te Mesia i te ra‘i, e ua horo‘a oia i te mau horo‘araa i te taata; e ua haapa‘o Oia i te tahi pae ei aposetolo, e te tahi pae ei peropheta, e te tahi pae ei haapii evanelia, e te tahi pae ei tia‘i e ei orometua’ [a hi‘o Ephesia 4:8,11]. E nahea te mau aposetolo, te mau peropheta, te mau tia‘i, te mau orometua e te mau haapii evanelia i ma‘itihia’i? Na roto i te tohuraa (heheuraa) e na roto i te tuuraa rima—na roto i te hoê aparauraa e te ra‘i, e te hoê oro‘a tei faataahia e te ra‘i—na roto i te rave‘a o te autahu‘araa, tei faanahonahohia mai te au i te haapa‘oraa a te Atua, na roto i te faataaraa a te ra‘i. I mau na te mau aposetolo i mutaa ihora i te mau taviri no teie autahu‘araa—no te mau parau aro no te basileia o te Atua, no reira i nehenehe ai ia ratou ia tatara e ia hohora mai i te mau mea ato‘a no ni‘a i te faatereraa o te Ekalesia, te oraraa maitai o te sotaiete, te fâ o te taata no a muri atu, e te ti‘amâraa, te puai e te mana o te mau varua; no te mea e nehenehe ta ratou e haavî i te mau varua mai te au i to ratou ra hinaaro, ia faaue ia ratou ia haere ê atu i te i‘oa o Iesu, e ia ite i ta ratou mau ohipa ino e te mo‘emo‘e a tamata ai ratou i te haavare i te Ekalesia na roto i te raveraa i te hoê hoho‘a faaroo haavare e te aroraa i te maitai o te Ekalesia e te haaparareraa o te parau mau…
« …Ua haamaitaihia to tatou Faaora, te mau aposetolo e tae noa’tu i te mau melo no te Ekalesia i teie horo‘araa, no te mea ua parau o Paulo, ‘ta te tahi o te parau ĕê ïa, e ta te tahi o te faaite parau ĕê ïa, ta te tahi o te rave tapa‘o ïa, ta te tahi o te tohu ïa, ta te tahi o te ite varua ïa’ [A hi‘o 1 Korinetia 12:10]. No roto mai teie mau horo‘araa ato‘a i te hoê â Varua o te Atua, e e mau horo‘araa ïa a te Atua… Aita roa e taata aore râ e pŭpŭ taata e nehenehe e ite i te varua mau e te varua haavare mai te mea aita ratou e mau ra i te mau mana haamauhia, i te autahu‘araa e te iteraa varua ».18
« Te haere nei te mau varua haavare na te fenua ato‘a. E tupu mai te mau faaiteraa rahi o te mau varua, te mea haavare e te mea mau… E ere te mau varua ato‘a, aore râ te mau orama ato‘a, na te Atua… Te horo‘araa no te ite varua e horo‘ahia ïa i te peresibutero faatere. A pure no’na ia noaa ia’na teie horo‘araa ».19
Te mau mana‘o tauturu no te tuatapaparaa e te haapiiraa
A feruri i teie nei mau mana‘o a tuatapapa ai outou i te pene aore râ a faaineine ai outou i te haapii. No te tahi atu tauturu, a hi‘o i te mau api vii–xiv
-
A tai‘o faahou i te aamu i te mau api 433–36. Nahea e nehenehe ai i teie aamu ia tauturu i te mau taata tei mau i te autahu‘araa a Melehizedeka ia faaineine i te faatahinu i te feia ma‘i? Nahea te reira e nehenehe ai e tauturu ia tatou ia hinaaro ana‘e tatou i te hoê haamaitairaa no te autahu‘araa? I to outou feruriraa no te aha e e mea faufaa rahi no te taea‘e Fordham ia faaite i to’na faaroo ia Iesu Mesia i taua taime ra?
-
A tai‘o faahou i te mau haapiiraa a te peropheta Iosepha i te mau api. E aha te mau mea ta outou i ite o tei tauturu ia outou ia taa i te mana o te autahu‘araa i roto i te faaoraraa i te feia ma‘i? E aha te mau parau tumu e ti‘a ia arata‘i ia tatou ia faaite i te mau mea ta tatou i rave no te faaoraraa i tei ma‘i? No te aha aita te tahi mau taata i faaorahia, noa’tu e ua faaohipa ratou i te faaroo e ua farii ratou i te mau haamaitairaa o te autahu‘araa?
-
Ua parau o Iosepha Semita e « ua haamau-taa-ê-hia te horo‘araa ia parau i te parau ĕê no te pororaa i te Evanelia i te tahi ê atu mau fenua e mau reo » (a hi‘o i te mau api 437–39). Nahea teie horo‘araa i tauturu ai i te haaparareraa i te evanelia na te ao taato‘a nei? Nahea to outou aore râ te tahi taata ta outou i matau i te fariiraa i te horo‘araa ia parau i te mau parau ĕê no te tauturu i te poro i te evanelia?
-
A tai‘o faahou i te mau haapiiraa a te peropheta no ni‘a i te varua tohu (te mau api 439–40). E aha te auraa no outou ia ite e e nehenehe i te melo tata’itahi no te Ekalesia ia farii i te varua tohu?
-
A tai‘o faahou i te mau haapiiraa a te peropheta no ni‘a i te horo‘araa i te ite varua [te mau api 440–43. E aha te horo‘araa no te ite varua? Nahea ta tatou e nehenehe ai ia ape ia ore tatou e haavârehia e te mau mana ino? Nahea to tatou peropheta i teie nei mahana e te tahi ê atu feia faatere no te Ekalesia e tauturu ai ia tatou ia ite i te mau mana ino?
Te mau papa‘iraa mo‘a: 1 Korinetia 12:1–31; 14:1–6, 22–28; Iakobo 5:14–15; Moroni 10:8–17; PH&PF 46:1–33; 50:1–36, 40–44; 52:14–19
I te 22 no tiurai 1839, ua ti‘a mai o Elijah Fordham mai te « taoto o te pohe » mai, i muri a‘e i to Iosepha Semita tomoraa mai i roto i to’na fare e a parau mai ai e, « Elijah, te faaue atu nei au ia oe, na roto i te i‘oa o te Iesu no Nazareta, ia ti‘a i ni‘a e hope roa! »
« Te horo‘araa no te mau reo na roto i te mana o te Varua Mo‘a i roto i te Ekalesia, e faana‘oraa ia no te mau tavini o te Atua no te poro i tei ti‘aturi ore ».