Vahe 7
Siosefa Sāmita, ko ha Meʻangāue ʻi he Toʻukupu ʻo e ʻEikí
“Naʻe hoko ʻa Siosefa Sāmita, ko e Palōfita ʻo e ngaahi ʻaho kimui ní, ko ha meʻangāue ʻi he toʻukupu ʻo e ʻEikí ʻi hono fakaava ʻo ha kuonga fakakosipeli foʻou ʻo e ongoongoleleí, ko e fakaʻosi mo e maʻongoʻonga taha ʻo e ngaahi kuonga fakakosipeli kotoa ʻo e ongoongoleleí.”
Mei he Moʻui ʻa ʻEselā Tafu Penisoní
Ko e taimi naʻe hoko ai ʻa ʻEletā ʻEselā Tafu Penisoni ko ha faifekau taimi kakato ʻi ʻIngilani he konga kimuʻa ʻo e 1920 tupú, naʻá ne foua mo hono ngaahi hoá ʻa e meʻa naʻá ne ui ko e “fakafepaki lahi ki he Siasí.” Naʻá ne fakamatala kimui ʻo pehē:
“Naʻe mafola ʻi Pilitānia Lahi kotoa ʻa e ngaahi nusipepá, ngaahi makasiní, pea naʻa mo e ngaahi heleʻuhilá.” Koeʻuhí ko e lahi fau ʻa e fakatangá, naʻe taʻofi leva ha ngaahi founga ʻo e ngāue fakafaifekaú, hangē ko e ngaahi malanga ʻi he halá mo e tufa tohitufá. Naʻá ne pehē, “Ka ʻi he fakatokelau ʻo ʻIngilaní, ʻa ia ne mau ngāue aí, naʻe ʻi ai haʻamau kulupu ʻo ha kakai ʻi he Kolo Saute Silá ʻa ia ne nau mātuʻaki faivelenga mo līʻoa pea mo fai-mateaki, pea ne nau fakaafeʻi au mo hoku hoá ke ma ō ange ʻo lea ʻi heʻenau houalotu sākalamēnití. ʻOku ʻikai ke tui Naʻa nau pehē ʻko ha tokolahi homau ngaahi kaungāʻapí ki he ngaahi loi ʻoku pākí. Kapau te mo ō mai, te mau fakafonu ʻa e kiʻi falelotú.ʻ
“Pea ko ia, ne ma tali ʻenau fakaafé peá ma kamata teuteu mo kamata ako ki he hē mei he moʻoní. Ko ha kaveinga ia naʻá ku saiʻia ai, pea naʻá ku fakakaukau ʻoku nau fie maʻu ia; pea naʻá ku ngāue mo ako, peá u pehē te u lava ʻo lea ʻi ha miniti ʻe hongofulu mā nima ʻi he kaveingá ni.
“Ne ma ō ki he kiʻi falelotú pea naʻe ʻosi fonu. Naʻe fiefia ʻa e tokotaha kotoa. Pea ʻi he ʻosi ʻa e polokalama fakaavá ne lea leva hoku hoá, peá u lea mo au ʻi ha tuʻunga tauʻatāina kuo teʻeki ai ke u maʻu ʻi heʻeku moʻuí. Pea ʻi heʻeku tangutu ki lalo mo sio ki heʻeku uasí, kuó u lea ʻi ha miniti ʻe uofulu mā nima, pea naʻe ʻikai haʻaku lave ʻe taha ki he hē mei he moʻoní, naʻe ʻikai ke u teitei fakakaukau ki he hē mei he moʻoní. Naʻá ku lea kau kia Siosefa Sāmita, pea naʻá ku fakamoʻoni ko ha palōfita ia ʻa e ʻOtuá pea naʻá ku ʻiloʻi ia. Naʻá ku lea kau ki he maʻu ʻo e Tohi ʻa Molomoná ko ha fakamoʻoni foʻou kia Kalaisi, pea ne u fai ha fakamoʻoni. Ko e taimi naʻá ku fakatokangaʻi ai ʻa e meʻa ne hokó, naʻe ʻikai ke u mataʻofi hoku loʻimatá.
“Naʻe haʻu ha tokolahi ʻo e Kāingalotú ʻi he ʻosi ʻa e houalotú ʻo fakahaaʻi ʻenau houngaʻia ʻi he meʻa ne u lea ʻaki kau kia Siosefa Sāmitá. Naʻa nau pehē, ʻKo e Tokolahi ʻo homau ngaahi kaungāʻapí kuo nau pehē, “Te tau lava ʻo tali e meʻa kotoa fekauʻaki mo e Siasí tukukehe pē ʻa Siosefa Sāmitá.ʻ” Pea ko ha niʻihi ʻo e ngaahi kaungāʻapi tatau pē ne nau ō mai ʻo pehē, ʻʻOku mau mateuteu he taimí ni. ʻOku mau mateuteu he pooni. Kuo mau maʻu ʻa e fakamoʻoni ko Siosefa Sāmitá ko ha palōfita ʻa e ʻOtuá.ʻ”1
Naʻe hokohoko atu ʻa Palesiteni Penisoni ke kumi ha ngaahi faingamālie ʻi heʻene moʻuí kotoa ke vahevahe ai ʻa ʻene fakamoʻoni ki he uiuiʻi ʻo Siosefa Sāmitá. Hangē ko ʻení, ko e taimi naʻe hoko ai ko e sekelitali ʻo ʻAmelika ʻi he ngoué, naʻe fakaafeʻi ia ʻe ha kautaha letiō ke ne fili ha potufolofola ʻoku manako taha ai ke lau ʻo fakamafola, pea naʻá ne fili ha konga ʻo e Siosefa Sāmita— Hisitōliá ʻi he Mataʻitofe Mahuʻingá.2
Kae mahulu haké, naʻá ne fai maʻu pe ha fakamoʻoni fefeka mo mālohi ki hono Kāingalotú. Naʻá ne fakahā, “Ko Siosefa Sāmitá ko ha palōfita ia ʻa e ʻOtua Moʻuí, ko e taha ʻo e kau palōfita maʻongoʻonga taha kuo faifaiangé pea moʻui ʻi he funga māmaní. Ko e meʻangāue ia ʻi he toʻukupu ʻo e ʻOtuá ʻi hono ʻomai e kuonga fakakosipeli maʻongoʻongá ni, ko e maʻongoʻonga taha mo e fakamuimui taha ʻi he teuteu ki he hāʻele ʻangaua mai ʻa e ʻEikí.”3
Ko e pōpoaki ʻo e ʻUluaki Mata-meʻa-hā-maí naʻe “fakataumuʻa ki he kotoa ʻo e fānau ʻa ʻetau Tamaí ʻoku nofo ʻi he funga ʻo e māmaní.”
Ngaahi Akonaki ʻa ʻEselā Tafu Penisoní
1
Naʻe hoko e ʻUluaki Mata-Meʻa-Hā-Mai ʻa Siosefa Sāmitá ko e meʻa maʻongoʻonga taha ia kuo hoko he māmaní talu mei he Toetuʻu ʻa Sīsū Kalaisí.
Naʻe hoko ʻa Siosefa Sāmita ʻi heʻene kei talavoú ko ha taha fekumi ki he moʻoní. Naʻe tupu ʻi he vālau he ngaahi siasi ne lolotonga tuʻú ʻa ʻene fehuʻi ki he ʻOtuá pe ko e fē ʻiate kinautolu naʻe moʻoní. Naʻá ne pehē ʻi he tali ʻo e lotu ko iá, naʻe hā mai ha pou maama ngingila. Ko ʻene fakamatalá ʻeni:
…ʻI he nofo mai ʻa e māmá ʻiate aú, naʻá ku sio ki he Tangata ʻe toko ua, ʻa ia ko hona ngingilá mo e nāunaú ʻoku ʻikai faʻa lava ke mafakamatalaʻi, ʻokú na tuʻu mai ʻi ʻolunga ʻiate au ʻi he ʻataá. Naʻe folofola mai ʻa e toko taha kiate au, ʻo ne ui au ʻaki hoku hingoá, ʻo ne tuhu ki he tokotahá ʻo pehē—Ko Hoku ʻAlo ʻOfaʻangá ʻeni. Fanongo kiate Ia!” (SS—Hisitōliá 1:17.)
Naʻe ʻeke ʻe Siosefa ki he toko taha fika uá, ʻa ia ko Sīsū Kalaisi, ko e fē ʻi he ngaahi siasi faka-Kalisitiané naʻe totonú. Naʻe fakahā ange kiate ia kuo pau ke ʻoua naʻa kau ki ha taha ʻo kinautolu, he naʻe ʻikai ha taha ʻe tonu.4
Ko e taimi ʻoku hāʻele mai ai ʻa e ʻOtua ko e Tamaí mo Hono ʻAlo ko Sīsū Kalaisí ki māmaní, ʻo hangē ko ia naʻá Na fakahoko ʻi he 1820 ʻi Heʻene hā ki he palōfita kei talavou ko Siosefa Sāmitá, ʻoku ʻikai ko ha meʻa ia ʻoku fekauʻaki pē mo ha kakai tokosiʻi. Ko ha pōpoaki mo ha fakahā ia naʻe fakataumuʻa ki he kotoa ʻo e fānau ʻa ʻetau Tamaí ʻoku nofo ʻi he funga ʻo e māmaní. Ko e meʻa mahuʻinga taha ia kuo hoko ʻi he māmaní talu mei he toetuʻu ʻa e ʻEikí. ʻOku ou fakakaukau ʻi he taimi ʻe niʻihi ʻoku tau fuʻu ofi ki ai ʻo ʻikai ai ke tau fakahoungaʻi kakato hono ʻaongá mo hono mahuʻingá pea mo hono kāfakafá.5
Ko e ʻuluaki mata-meʻa-hā-mai ʻa e Palōfita ko Siosefa Sāmitá ko e teolosia tefito ia ki he Siasí.6
Ko e moʻoni mahino taha ne maʻu mei he aʻusia ʻa e Palōfitá ʻi he 1820 ko e moʻui ʻa e ʻOtuá pea mo e foʻi moʻoni naʻe ʻosi toetuʻu moʻoni ʻa Sīsū Kalaisí. Naʻá ne mamata kiate Kinaua ko ha ongo Tangata māvahevahe, kehekehe, mo nāunauʻia naʻá Na folofola kiate ia ʻo hangē ko e lea ʻa ha tangata ʻe taha ki he tahá.7
ʻOku ou fakamālō ʻi he loto fakatōkilalo koeʻuhí ko e ʻilo ʻoku ou maʻu kuo toe hāʻele mai ʻa e ʻOtua ko e Tamaí mo Hono ʻAlo ko Sīsū Kalaisí, ko e ongo tangata nāunauʻia, ʻi he kuonga fakakosipeli ko ʻení; naʻá Na hā moʻoni ki he palōfita kei talavoú. … Ko e hāsino nāunauʻia taha ʻeni ʻa e ʻOtua ko e Tamaí mo e Aló ʻoku tau maʻu hono lekōtí.8
2
Naʻe maʻu ʻe Siosefa Sāmita ha fakahā foʻou mo e ʻaʻahi mai ʻa e kau ʻāngeló, ʻo tatau mo e kikite ʻi he Fuakava Foʻoú.
ʻOku angamaheni ʻaki ke mahino ko e tui ʻa e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻoku makatuʻunga ia ʻi he tala ko Siosefa Sāmitá ko ha palōfita ʻa e ʻOtuá, pea naʻá ne fakahā foki ʻa e hoko mai ʻa e Tohi ʻa Molomoná naʻe tuʻunga ia ʻi he ʻaʻahi mai ʻa e kau ʻāngeló kiate ia ʻi he vahaʻa ʻo e taʻu 1823 mo e 1827.
Naʻe fakafekiki ha kakai ʻe niʻihi ʻi heʻenau ʻilo e tala ko ʻení, tokua ʻoku ngali vale ke kei ʻaʻahi mai ha kau ʻāngelo ki māmani ʻi he kuonga ʻo onopōní.
ʻOku ʻi he Tohi Tapú ʻa e fakamoʻoni naʻe tataki ʻe he ʻOtuá ʻa e ngaahi ngāue ʻo Hono siasí he māmaní ʻi ha taʻu ʻe fā-afe tupu, ʻaki ʻa e fakahā, pea kapau naʻe fie maʻu, ʻaki ha ngaahi tokoni fakalangi.
Naʻe kikiteʻi ʻe Sione ʻi he Fuakava Foʻoú ʻi heʻene fakamatalaʻi ʻa e ngaahi tūkunga ʻo e ngaahi meʻa ʻe hoko ʻi he ngaahi ʻaho fakaʻosí kimuʻa pea hāʻele ʻangaua mai ʻa Sīsū Kalaisí, ʻe maʻu ʻe māmani ha fakatokanga kuo ofi ʻa e houa ʻo e fakamaau ʻa e ʻOtuá. ʻE fou mai ʻa e fakatokanga ko iá ʻi ha ʻāngelo mei he langí te ne fakahā ʻa e “ongoongolelei taʻengatá.” Fanongo ki heʻene ngaahi leá:
“Pea ne u mamata ki he ʻāngelo kehe ʻe taha ʻoku puna ʻi he loto langí, kuo ʻiate ia ʻa e ongoongolelei taʻengatá ke malanga ʻaki kiate kinautolu ʻoku nofo ʻi he māmaní, pea ki he puleʻanga kotoa pē, mo e faʻahinga, mo e lea, mo e kakai,
“ʻO ne pehē ʻaki ʻa e leʻo lahi, Manavahē ki he ʻOtuá, pea ʻatu ʻa e fakamālō kiate ia; he kuo hokosia ʻa e feituʻu laʻā ʻo ʻene fakamāú: pea hū kiate ia naʻá ne ngaohi ʻa e langí mo e māmaní, pea mo e tahí, mo e ngaahi matavai ʻo e ngaahi vaí.” (Fakahā 14:6–7.)
Kapau ʻoku tali ʻe ha taha ʻa e fakamoʻoni ʻa Sione ko e Fakahaá, ʻoku totonu ke ʻamanaki ki ha fakahā foʻou mo ha ʻaʻahi mai ʻa ha kau talafekau fakalangi ki māmani.
Ko ʻemau fakamoʻoni molumalú naʻe hā ʻa e ʻāngelo talafekaú ni ki he Palōfita ko Siosefa Sāmitá ʻi he kamataʻanga ʻo e senituli tahahivá. Ko e ongoongo ko ʻeni naʻe hā ha ʻāngelo ʻa e ʻOtuá ki ha palōfita ʻi hotau kuongá ʻoku fenāpasi kakato pē ia mo e ngaahi kikite ʻo e Fuakava Foʻoú pea ʻoku totonu ke ne maʻu e tokanga ʻa e taha kotoa pē ʻoku fekumi fakamātoato ki he moʻoní.9
Naʻe hā ha ʻāngelo ki he Palōfita ko Siosefa Sāmitá ʻi he efiafi ʻo e ʻaho 21 ʻo Sepitema 1823. Ko e hingoa ʻo e ʻāngeló ko Molonai. Ko ia ʻa e tokotaha fakamuimui ʻo ha kau palōfita tokolahi he kuonga muʻá ʻo ha ongo sivilaise lalahi ʻe ua naʻe nofo … ʻi he Konitinēniti ʻo ʻAmeliká ʻi he ngaahi senituli kuo hilí.10
Naʻe haʻu ʻa Molonai kia Siosefa Sāmita ko e fakahoko ʻo e kikité.
3
Ko e Tohi ʻa Molomoná ko e fakamoʻoni taupotu taha pē ia ʻo e ui ʻo Siosefa Sāmita ko e palōfitá.
Ko hono pulusi ʻo e lekooti fakafolofola, ko e Tohi ʻa Molomoná ʻa e fakamoʻoni taupotu taha ʻokú ne poupouʻi ʻa e pehē ko Siosefa Sāmitá ko ha tangata lea ia maʻá e ʻOtua Māfimafí.
Ko e Tohi ʻa Molomoná ko ha lekooti ia ʻo e kakai naʻa nau nofoʻi he kuonga muʻá ʻa e konitinēniti ko ʻAmeliká pea ʻoku lekooti ai ʻa e ʻaʻahi mo e ngāue ʻa Sīsū Kalaisi ki he kakai ʻi he konitinēniti ko ʻení hili ʻEne hāʻele hake mei Selusalemá. Ko e tefitoʻi taumuʻa ʻo e lekōtí ke fakalotoʻi ʻa e toʻu tangata kimuí ko Sīsū ʻa e Kalaisí, ko e ʻAlo ʻo e ʻOtuá. ʻOku hoko leva ai ʻa e Tohi ʻa Molomoná, ko ha fakamoʻoni ʻe taha, fakataha mo e Tohi Tapú, ki he fakalangi ʻo Sīsū Kalaisí.
Naʻe maʻu ʻe Siosefa Sāmita ʻa e lekooti fakakuonga muʻa ko ʻení mei ha talafekau fakalangi, ʻo hangē ko e kikiteʻi ʻe Sioné. Naʻe hā kiate ia ʻa e ʻāngelo ko ʻení mo fakahā ʻa e tukuʻanga ʻo e ngaahi lekooti fakakuonga muʻá ʻa ia naʻe tohitongi ʻi ha ngaahi peleti ukamea pea tanu ʻi ha maluʻiʻanga ko e maka. Naʻe ʻoange ki he palōfita kei talavoú ʻa e ngaahi peletí ʻi hono taimi totonu, fakataha mo e founga naʻe liliu ʻaki kinautolú. Naʻe toki pulusi leva ʻa e tohí ki māmani ko ha folofola kuo fakatapui.
ʻIkai ngata aí, ʻoku ʻi he tohí ʻa e “ongoongolelei taʻengatá” ʻo tatau mo e fakamoʻoni ʻa Sioné.” ʻOku malangaʻi ia he taimí ni heʻetau kau faifekaú ki māmani.
ʻOku mau fakaafeʻi koe ke ke siviʻi e moʻoni ʻo ʻemau fakamoʻoni ki he tupuʻanga ʻo e Tohi ʻa Molomoná. Te ke lava ʻo fai ʻeni ʻaki haʻo lau ia mo kole ki heʻetau Tamai Hēvaní pe ʻoku moʻoni ʻa e ngaahi meʻá ni. ʻOku ou palōmesi atu, kapau ʻokú ke fakamātoato, te ke maʻu ha fakamoʻoni ki hono moʻoní ʻi he Laumālie Māʻoniʻoní. ʻOku fakamoʻoni ha lauimiliona, ʻi he fakamātoato mo e loto moʻoni, ʻoku nau ʻiloʻi ʻoku mei he ʻOtuá ia.11
Kapau ʻoku moʻoni ʻa e Tohi ʻa Molomoná, ta ko Sīsū ʻa e Kalaisí, ko ʻEne palōfita ʻa Siosefa Sāmita, ʻoku moʻoni ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, pea ʻoku tataki ia he ʻahó ni ʻe ha palōfita ʻokú ne maʻu fakahā.12
4
Naʻe toe fokotuʻu ʻe he ʻOtuá Hono puleʻangá ʻi māmani ʻo fou he Palōfita ko Siosefa Sāmitá.
Kuo lotua ʻe he ngaahi siasi faka-Kalisitiane he māmaní ʻo lauisenituli ke hoko mai ʻa e puleʻanga ʻo e ʻOtuá [vakai, Mātiu 6:10]. ʻOku mau fakahā fakamātoato pea ki he kakaí: kuo hokosia ʻa e ʻaho ko iá!13
Naʻe hanga ʻe ha lotu ʻa ha kiʻi tamasiʻi taʻu hongofulu mā fā, ʻi he Vao ʻAkau Tapú, ʻo fakaava ha kuonga fakakosipeli foʻou ʻo e ongoongoleleí.14
Kuo toe fokotuʻu ʻe he ʻOtuá Hono puleʻangá ʻi māmani ko e fakahoko ʻo e kikite. …
… Naʻe uiuiʻi ʻa Siosefa Sāmita ʻe he ʻOtuá ke ne toe fokotuʻu ʻa e puleʻanga ko iá—Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku ou fakamoʻoni naʻá ne fakahoko ʻa e ngāué ni, naʻá ne fakatoka ʻa e fakavaʻé pea naʻá ne tuku ki he Siasí ʻa e ngaahi kī mo e ngaahi mālohi ke hoko atu ʻa e ngāue maʻongoʻonga ʻo e ngaahi ʻaho kimui ní, ʻa ia naʻe kamata ʻi he tuʻutuʻuni ʻa e ʻOtua Māfimafí.15
Naʻe hā kia Siosefa Sāmita mo ha kakai kehe, kau ai ʻa Sione ko e Papitaisó mo Pita, Sēmisi, mo Sione ʻo nau fakanofo ia ʻaki ʻa e mafai ke ngāue ʻi he huafa ʻo e ʻOtuá (vakai, SS—Hisitōlia 1:68–72; T&F 27:5–13). Naʻe fakafoki mai ʻa e siasi mo e puleʻanga ʻo e ʻOtuá ʻi he ngaahi ʻaho kimui ní, ʻa ia ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, fakataha mo e ngaahi meʻafoaki, ngaahi mālohi, ngaahi tokāteline, ngaahi tuʻunga, mo e ngaahi tāpuaki kotoa pē ʻo e Siasí ʻi he ngaahi ʻaho kimuʻá. (Vakai, T&F 65; 115:3–4.)16
Naʻe fekauʻi ʻa e Palōfita ko Siosefa Sāmitá ke laka atu ko e meʻangāue ʻi he toʻukupu ʻo e ʻOtuá pea fokotuʻu ʻa e Siasí, ke fakamafola ki māmani ko ha fakamoʻoni ʻe taha ki he fakalangi ʻo Sīsū Kalaisí, mo e Tohi ʻa Molomoná ʻa ia naʻe toʻo mei he ngaahi lekooti toputapú. …
ʻOku fakataumuʻa ʻa e fakafoki mai ʻo e ongoongoleleí, ʻa e fakafoki mai ʻo e māmá mo e moʻoní, ke ʻaonga pea mo tāpuakiʻi ʻa e fānau kotoa ʻa e ʻOtuá. Ko ia, ʻoku ō atu ʻetau kau faifekaú ki māmani ʻi he loto-fakatōkilalo mo e fakafetaʻi ke fakahā naʻe hoko ha hē mei he moʻoní, ka ʻi he angalelei ʻa e ʻOtuá, kuo toe fakaava ʻa e ngaahi langí pea fakahā ʻa e ongoongoleleí ki he tangatá ʻo fou ʻia Siosefa Sāmita, ko e Palōfitá.17
5
Naʻe faimateaki mo moʻoni ʻa Siosefa Sāmita ʻo aʻu ki he maté.
Naʻe hoko fakataha mo e fuofua tupulaki ʻa e Siasí ha laumālie ʻo e fakafepaki mo e fakatanga. Ko e fē pē ha feituʻu naʻe tō ai ʻa e “tengaʻi mūsitá,” naʻe fai e feinga ke taʻofi ʻene tupú.18
Naʻe tuʻu maʻu ʻa e kiʻi tamasiʻi taʻu hongofulu mā faá ʻo fehangahangai mo māmani. Naʻe ʻafioʻi ʻe he ʻOtuá Hono fohá ʻi he taimi naʻe fili aí. Naʻá Ne ʻafioʻi ʻe faimateaki mo moʻoni ʻo aʻu ki he maté.19
Naʻe manukiʻi lahi ʻe ha niʻihi ʻa e fakamoʻoni [ʻa Siosefa Sāmitá] mo kamata ke fai ha ngaahi talanoa loi pea mo fakatanga kiate ia. Naʻe ʻikai fie fakaʻikaiʻi ʻe he palōfita kei talavoú ni ʻa ʻene fakamatalá, ka naʻá ne taukapoʻi ia ʻo hangē ko e ʻAposetolo ko Paula ʻo e kuonga muʻá, ʻaki e ngaahi lea ko ʻení:
“He kuó u mamata ki ha meʻa-hā-mai; naʻá ku ʻiloʻi ia, peá u ʻiloʻi ʻoku ʻafioʻi ia ʻe he ʻOtuá, pea ʻe ʻikai te u lava ʻo fakaʻikaiʻi ia, pea ʻe ʻikai foki te u toʻa ke fai pehē; kae kehe naʻá ku ʻiloʻi kapau te u fai pehē te u fakatupu houhau ai ki he ʻOtuá, pea moʻua ki he tauteá.” SS—Hisitōlia 1:25.)20
Naʻe ʻalu loto fiemālie pē ʻa Siosefa Sāmita ko e Palōfitá ki hono mateʻangá. Naʻá ne fakamaʻu ʻa ʻene fakamoʻoní ʻaki ʻene moʻuí —mo hono totó. Naʻá ne pehē ʻi heʻene vakai mai ʻi he ʻaho fakamamahi ko ia ʻi Nāvū, ʻIlinoisí, ki hono koló mo e kakai naʻe ʻofa aí, ʻi heʻene fononga atu ki he Fale Fakapōpula Kātesí pea ki hono fakapōngí: “Ko e feituʻu fakaʻofoʻofa taha ʻeni mo e kakai lelei taha ʻi he lalo langí; hala ke nau lavelaveʻiloa ki he ngaahi faingataʻa ʻoku tuʻunuku mai kiate kinautolú” [History of the Church, 6:554].
Naʻe pehē ki mui ʻe he Palōfitá ʻi he ongoʻi, ka ʻi he nonga mo e lototoʻa, “ʻOku ou ʻalu ʻo hangē ko e lami ke tāmateʻi, ka ʻoku nonga hoku lotó ʻo hangē ko e pongipongi malū ʻi he faʻahitaʻu māfaná. ʻOku ou maʻu ʻa e konisēnisi ʻoku ʻataʻatā mei he faihala ki he ʻOtuá, pea ki he kakai kotoa pē. Kapau te nau toʻo ʻeku moʻuí te u mate ko e tangata taʻe-halaia, pea ʻe tangi hoku totó mei he kelekelé ke sāuni, pea ʻe pehē ʻo kau kiate au, ʻNaʻe fakapoongi ia ʻi he anga-fītaʻaʻ” [History of the Church, 6:555].21
Ko ia naʻe fakaʻosi ʻe he Palōfita ko Siosefa Sāmitá ʻa ʻene moʻui he māmaní mo fakakakato ʻa e konga fakamatelie ʻo hono misiona fakalangi ne fokotuʻú. Naʻá ne fakamahinoʻi he ʻikai ngata ʻa e misiona fakamatelie ko ʻení kae ʻoua kuo kakato moʻoni. Naʻe tomuʻa fakanofo moʻoni ʻa Siosefa ki hono misiona maʻongoʻongá, ʻo hangē ko e misiona ʻo e Fakamoʻuí, “ko e lami ʻa ia naʻe tāmateʻi talu mei he fakatupu ʻo māmaní” [vakai, Fakahā 13:8]. 22
6
ʻOku tuʻu ʻa Siosefa Sāmita he ʻahó ni ko e ʻulu ʻo e kuonga fakakosipeli fakaʻosi mo maʻongoʻonga taha ʻo e ngaahi kuonga fakakosipelí kotoa.
ʻOku ou ʻilo ko e Siosefa Sāmita ko iá, neongo naʻe fakapoongi ko ha maʻata ki he moʻoní, ka ʻoku kei moʻui pea ko e taki ia ʻo e kuonga fakakosipeli ko ʻení—ko e tuʻukimuʻa taha ʻo e ngaahi kuonga fakakosipeli kotoa ʻo e ongoongoleleí—te ne kei tuʻu ai pē ʻo aʻu ki ʻitāniti ka hoko maí.23
Ko e pōpoaki ʻa Siosefa Sāmitá—ʻa e pōpoaki ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻa e pōpoaki ʻo e Tui Faka-Māmongá—ko e pōpoaki mahuʻinga taha ia ʻi he māmani ko ʻení. Pea ʻe kei hoko ai pē ʻa Siosefa Sāmita ko e Palōfita, ʻa ia ʻoku moʻui he ʻahó ni, ko ha konga mahuʻinga ʻi hono tataki ʻi he māmaní.24
Koeʻuhí ke mahino ʻa e kāfakafa ʻo e misiona ʻi māmani ʻo e Palōfitá, kuo pau ke tau fakakaukauʻi ia ʻo tatau mo ʻitāniti. Naʻe kau ia ʻi he tokolahi “naʻe ngali ʻeiki mo lahi” naʻe fakamatalaʻi ʻe ʻĒpalahame ʻo peheni:
“Ko ʻeni, kuo fakahā mai ʻe he ʻEikí kiate au, ʻa ia ko ʻĒpalahame, ʻa e fānau fakalaumālie ʻa ia naʻe fakatupu ʻi he teʻeki ai ke ʻi ai ʻa e māmaní; pea naʻe ʻi he lotolotonga ʻo kinautolú ni kotoa pē ʻa e tokolahi naʻe ngali ʻeiki mo lahi;
“Pea naʻe ʻafio ʻa e ʻOtuá ki he ngaahi laumālié ni kuo nau lelei, pea naʻá ne tuʻu ʻi honau lotolotongá, ʻo ne folofola: Te u fakanofo ʻa kinautolú ni ko ʻeku kau pule; he naʻá ne tuʻu ʻi he haʻohaʻonga ʻo kinautolu ʻa ia ko e ngaahi laumālie, pea naʻá ne ʻafio kuo nau lelei; peá ne folofola mai kiate au: ʻE ʻĒpalahame, ko e toko taha koe ʻo kinautolu; naʻe fili koe ʻi he teʻeki ai ke fanauʻi koé.” (ʻĒpalahame 3:22–23.)
Naʻe pehē mo Siosefa Sāmita. Naʻe ʻi ai mo ia foki. Naʻe tangutu mo ia ʻo fealēleaʻaki mo e kakai ngali ʻeiki mo leleí. ʻOku ʻikai ha toe fehuʻia naʻe tokoni ʻi hono palani mo fakahoko ʻa e ngāue maʻongoʻonga ʻa e ʻEikí, ʻi heʻene maʻu ha tuʻunga lāngilangi māʻolungá, ke “fakahoko ʻa e moʻui taʻe-faʻamate mo e moʻui taʻengata ʻa e tangatá,” ʻa e fakamoʻui ʻo e fānau kotoa ʻa ʻetau Tamaí [vakai, Mōsese 1:39]. Kuo fakahoko ʻe hono misioná, mo pau ke ne faitokonia ʻa e taha kotoa kuo ʻosi haʻu ki māmaní, pea mo kinautolu kotoa kuo nofo ʻi he māmaní, pea mo e lauimiliona ʻoku teʻeki fāʻeleʻi maí.
Naʻe fakamatalaʻi ʻe he Palōfita ko Siosefa Sāmitá ʻa e foʻi moʻoni taʻengata ko ʻení ʻaki e ngaahi lea ko ʻení: “Ko e tangata kotoa pē kuo ʻi ai hano fatongia ke ngāue ki he kakai ʻo e māmaní naʻe tomuʻa fakanofo ia ki he taumuʻa ko iá ʻi he fakataha lahi ʻi he langí ʻi he teʻeki ai ke ʻi ai ʻa e māmaní. ʻOku ou tui naʻe fakanofo au ki he fatongia ko ʻení ʻi he fakataha lahi ko iá. Ko e fakamoʻoni ia ʻoku ou fie maʻú ko e tamaioʻeiki au ʻa e ʻOtuá, pea ko e kakaí ni ko Hono kakai” [vakai, History of the Church, 6:364]. …
Ko e ngāue maʻongoʻonga taha ʻi he māmani ko ʻení pe ʻi he maama kahaʻú ʻoku fekauʻaki hangatonu ia mo e ngāue pea mo e misiona ʻo Siosefa Sāmitá—ko ha tangata ʻo e kahaʻú, ko e palōfita ʻa e ʻOtuá. Ko e ngāue ko iá ko e fakamoʻui mo e moʻui taʻengata ʻa e tangatá. Koeʻuhí ko e taumuʻa maʻongoʻonga ko iá, naʻe fakatupu ai ʻa e māmani ko ʻení, ui mo e kau palōfita ʻa e ʻOtuá, fekauʻi mai mo e kau talafekau fakalangí, pea naʻa mo e ʻOtuá ʻi ha ngaahi meʻa toputapu mo mahuʻingá, ʻa ia ko e Tamai ʻa kitautolu kotoa peé, ne afeitaulalo ke hāʻele mai ki māmani ʻo fakafeʻiloaki Hono ʻAlo ʻOfaʻangá.
Naʻe ʻikai ngata pē kau ʻa e Palōfita ko Siosefa Sāmitá ʻi he “tokolahi naʻe ngali ʻeiki mo leleí,” ka naʻá ne foaki mo hokohoko atu ke tokanga ki he ngaahi meʻa mahuʻinga ʻi heni ʻi māmani mei ʻolunga ʻo aʻu mai ki he ʻahó ni. He ʻi he ʻao ʻo e ʻEiki ko e ʻOtua ʻo e māmani ko ʻení, ʻi he malumalu ʻo e Tamaí, ko e polokalama kātoa pē taha ʻa ia ʻoku fakahoko ai ʻe he Palōfita ko Siosefá ha konga mahuʻinga, ʻo fakafou kotoa ʻi he lakanga fakataulaʻeiki taʻengatá mo e mafai ʻo e ʻOtuá.25
ʻOku ou fakamoʻoni atu naʻe hoko ʻa Siosefa Sāmita pea ʻoku hoko ko e palōfita ʻa e ʻOtuá, ko e taha ʻo e kau palōfita maʻongoʻonga moʻoni ʻo e kuonga kotoa, ko ha tangata ʻo e kahaʻú, ko ha tangata angalelei, ko ha tangata loto-toʻa, ko ha tangata anga fakalaumālie moʻoni, ko ha palōfita anga faka-ʻOtua ʻa e ʻEikí, ko ha taha ngali ʻeiki mo maʻongoʻonga moʻoni ʻo e kuonga kotoa pē.26
ʻIo, naʻe hoko ʻa Siosefa Sāmita, ko e Palōfita ʻo e ngaahi ʻaho kimui ní, ko ha meʻangāue ʻi he toʻukupu ʻo e ʻEikí ʻi hono fakaava ʻo ha kuonga fakakosipeli foʻou ʻo e ongoongoleleí, ko e fakaʻosi mo e maʻongoʻonga taha ʻo e ngaahi kuonga fakakosipeli kotoa ʻo e ongoongoleleí.27
Ngaahi Fokotuʻu ki Hono Ako mo Akoʻí
Ngaahi fehuʻi
-
ʻOkú ke pehē ko e hā ʻoku hoko ai ʻa e ʻUluaki Mata-meʻa-hā-mai ʻa Siosefa Sāmitá ko e “meʻa maʻongoʻonga taha ia kuo hoko … talu mei he Toetuʻu ʻa e ʻEikí”? (Vakai, konga 1.) Ko e hā ha ngaahi founga kuo tokoniʻi ai ʻe he meʻá ni hoʻo moʻuí?
-
ʻOku tokoniʻi fēfē koe ʻe he ʻilo naʻe kikiteʻi ʻe Sione ko e Fakahaá ʻa e ʻaʻahi ʻa Molonai kia Siosefa Sāmita? (Vakai, konga 2.)
-
Naʻe pehē ʻe Palesiteni Penisoni ko e Tohi ʻa Molomoná ko e “fakamoʻoni taupotu taha pē ia ʻo e ui ʻo Siosefa Sāmita ko e palōfitá (vakai, konga 3). Kuo tokoniʻi fēfē ʻe hoʻo ako e Tohi ʻa Molomoná ʻa hoʻo fakamoʻoni ki he misiona ʻo Siosefa Sāmitá?
-
Fakalaulauloto ki he fakalea ʻo e fakamoʻoni ʻa Palesiteni Penisoní ʻi he konga 4. Ko e hā ha ngaahi tāpuaki kuó ke maʻu mo ho fāmilí koeʻuhí ko hono Toe Fakafoki Mai ʻo e ongoongoleleí?
-
Ko e hā ʻokú ke ako mei he konga 5 fekauʻaki mo e fehangahangai mo e fakatangá? Ko e hā te tau lava ʻo ako mei he sīpinga ʻa Siosefa Sāmitá, ʻa ia te ne tokoniʻi kitautolu ʻi he taimi ʻoku fakafepakiʻi ai ʻe he kakaí ʻetau ngaahi fakamoʻoní?
-
Naʻe pehē ʻe Palesiteni Penisoni fekauʻaki mo e tomuʻa fakanofo ʻo Siosefa Samitá, “Kuo fakahoko ʻe hono misioná, mo pau ke ne faitokonia ʻa e taha kotoa kuo ʻosi haʻu ki māmani, pea mo kinautolu kotoa kuo nofo ʻi he māmaní, pea mo e lauimiliona ʻoku teʻeki fāʻeleʻi maí.” (konga 6). Kuo tokoniʻi fēfē ʻe he misiona ʻo Siosefa Sāmitá ʻa kinautolu kotoa kuo moʻui ʻi he māmaní? Kuó ne tokoniʻi fakafoʻituitui fēfē koe?
Ngaahi Potufolofola Fekauʻakí
ʻIsaia 29:13–14; 2 Nīfai 3:3–15; 3 Nīfai 21:9–11; T&F5:9–10; 135; Siosefa Sāmita—Hisitōlia
Tokoni Fakafaiako
“Kole ki he kau akó ke nau vahevahe ʻa e meʻa ne nau ako mei heʻenau ako fakatāutaha ʻo e vahé. Mahalo ʻe tokoni ke fetuʻutaki ki ha niʻihi ʻo e kalasí he lolotonga e uiké ʻo kole ange ke nau haʻu mateuteu ke vahevahe ʻa e meʻa kuo nau akó” (peesi vii ʻi he tohí ni).