Pene 18

Te Faatereraa o te Ekalesia e te Taviniraa ma te Ore e Imi i To’na iho Maitai

« E mau tavini matou no outou i roto i te Fatu e te hinaaro nei matou i to outou maitai e te maitai o te taata atoa ».

No roto mai i te oraraa o Lorenzo Snow

Mai te ava‘e no atopa 1840 e tae atu i te ava‘e Tenuare 1843, ua peresideni o Lorenzo Snow i ni‘a i te Ekalesia i Ronedona, Fenua Peretane, e te mau vahi tapiri mai. Ua hi‘opo‘a oia i te mau faatere autahu‘araa i reira, ma te haapii tino roa’tu ia ratou i te tahi mau taime e te tahi mau taime na roto ïa i te papa‘iraa’tu i te mau rata ia ratou no te tauturu ia ratou. Na mua noa a‘e i te hoperaa o ta’na misioni i te Fenua Peretane, ua papa‘i oia i na « Peresibutero Faatere e piti no te mau Amaa no Ronedona », tei tavini mai te mau peresideni amaa e tavini nei i teie mahana. I roto i ta’na rata ua faati‘a oia i te hoê ohipa tei tupu ia’na e te tahi atu faatere amaa i roto i taua area ra.

Ua faahiti o Elder Snow i teie no ni‘a i teie taata faatere « hapa ore ». E taata « rave puai teie taata i te ohipa no te faatupu i te misioni a te Ekalesia » e e aravihi to’na i te haapapûraa « e te ti‘a ra te taata tata‘itahi i ni‘a i to’na ti‘araa e te rave ra oia i ta’na ra hopoi‘a ». Mea itoito oia, « i te rave puairaa i te ohipa hau atu i te tahi atu mau taata ». Noa’tu râ te mau hi‘oraa haapa‘o maitai na rapae atu o teie taata, e au ra o oia te tumu o te mau pe‘ape‘a tamau o te amaa. Ua tamata o Elder Snow i te tahi taime ia ite i te tumu no te mau pe‘ape‘a, e ua faahapa rii oia i te mau melo o te amaa no te oreraa e turu i to ratou taata faatere. I muri iho ua haamata oia i te ui e penei a‘e paha « te vai ra i roto i teie taata faatere te hoê huru huna o ta’na i ore i ite e tei ore atoa i itehia i mua i te taata » o te faatupu râ i te mau fifi i roto i te amaa. Ua faati‘a o Elder Snow :

« No reira ua pure au e ia horo‘a mai te Fatu ia’u i te hoê varua ite i roto i teie fifi. Ua pahonohia mai ta’u pure ; ua ite au e te vai nei i roto i teie taea‘e te hoê varua huna afahia no te faateiteiraa ia’na iho o te arata‘i ra ia’na i roto i ta’na mau ohipa e rave rahi. E tono atu oia i te hoê taea‘e no te rave i te hoê ohipa, e hinaaro huna râ to’na ia farii oia iho i te hanahana no te reira ohipa ; e mai te mea aita te ohipa i ravehia, e faahapa ïa oia i te taata haapa‘o ore, eiaha no te mea aita te ohipa a te Fatu i manuïa maitai e aore râ ua ere te taea‘e i te hoê haamaitairaa, no te mea râ ua faaite mai taua taata ra i to’na faatura ore no te oreraa e haapa‘o i ta’na parau. I te [hoê] taime i to te tahi mau taata bapetizoraahia e te hoê taea‘e, ua oaoa roa to’na aau eiaha no te mea ua afa‘ihia mai taua mau taata ra i roto i te fafauraa, no te mea râ ua ravehia te reira i raro a‘e i ta’na faatereraa, ma te hinaaro huna e eiaha roa te hoê a‘e taata i raro a‘e i ta’na faatereraa ia farii i te hanahana rahi maoti râ ia tu‘atihia’tu to’na iho ra i‘oa i taua taata ra.

Ua ite o Elder Snow e mai te mea e manuïa te hoê melo no te amaa i te hoê ohipa e aita râ oia i pee i te a‘o a te taata faatere i roto i te mau mea atoa, e « mana‘o nounou ïa to te faatere… i hunahia i muri mai i te parau faati‘a ». Ua parau oia : « Ua hunahia teie varua ; aita to’na mau hotu i itehia, e itehia râ mai te mea e hi‘opo‘a-maitai-hia ; o te hoê ïa ino tei haa i roto ia’na e o te haamou ia’na i te hopearaa. Ua faahaere mai te reira ino i ni‘a iho ia’na te fifi i te faatereraa i te mau ohipa no to’na ti‘araa ; e ua faatupu atoa te reira i te hoê tumu no te au ore tamau i roto i to’na iho feruriraa. Ua anaanatae oia i te tura‘i i te ohipa a te Atua, i roto noa râ i te hoê huru ia ite-maitai-hia to’na iho rima i roto i te mau mea atoa. Ua itoito oia i te horo‘a i te mau arata‘iraa maitai, ua ara maitai râ oia ia tuu i te taatoaraa o to’na i‘oa i te hopea o te reira mau arata‘iraa ».

Aita o Elder Snow i papa‘i i teie rata no te faahapa i teie taata faatere. Te tumu no to’na papa‘iraa i teie rata no te tauturu ïa i te tahi atu mau taata faatere—e nehenehe i te varua te‘ote‘o ta’na i faaite « e ite-mata-hia, e iteahia, e e apĕhia » i rotopu ia ratou. Ua faaara oia e e rave rahi mau taata « tei ti‘aturi mau e aita teie varua no te faateitei i roto ia ratou, e na roto râ i to ratou hi‘opo‘a-maite-raa i to ratou mau hinaaro tei faaûru ia ratou i roto i to ratou ra huru, ua ite i to ratou maere e te tura‘i ra teie varua ia ratou ia rave i ta ratou mau peu e rave rahi ».

I muri a‘e i to’na faaiteraa i teie faaararaa, ua a‘o oia : « No te riro mai ta te Atua e hinaaro ia tatou ia riro mai, e ti‘a ïa ia tatou ia haamatau i to tatou mau feruriraa ia oaoa ia ite ana‘e tatou ia vetahi ê ia haamaitaihia mai ia tatou iho ; ia oaoa ia ite ana‘e tatou ia faateiteihia te parau no Ziona na roto i te mau rave‘a ta te Atua i horo‘a i te tahi atu mau taata ; e ia tapiri i to tatou mau aau ia ore te mana‘o faahinaaro ia tomo mai i roto ia pii-ana‘e-hia te hoê taata paruparu a‘e ia tatou iho i te hoê ti‘araa hanahana a‘e ; ia oaoa i te faarahiraa i te hoê ti‘araa ha‘iha‘i e tae noa’tu i te taime e piihia‘i i te hoê ti‘araa teitei a‘e ; ia mauruuru i te raveraa i te mau mea ha‘iha‘i e ia ore e titau i te hanahana no te raveraa i te mau mea rarahi ». Ua faaau oia i te Ekalesia i te hoê fare rahi, e te mau Feia Mo‘a tata‘itahi ei tufaa no taua fare ra, ma te parau e e ti‘a ia tatou « ia faahaehaa ia tatou i te mau taime e haapotohia‘i, e tara‘ihia‘i, e paohia‘i, e tapupuhia‘i tatou no te faatano atu ia tatou i te vahi e ti‘a ia tatou ia parahi i roto i te fare varua ».

Ua faahope o Elder Snow i te rata na teie mau parau : « Mai te mea e imi noa te peresibutero faatere ia riro mai te ti‘a ia’na ia riro mai, te faatea-ê-raa ia’na iho i te mau mana‘o nounou, e te ohipa-noa-raa no te maitai no to’na nunaa, e ia haehaa noa, e ia ore e imi ia rave rahi roa i roto i te hoê taime poto, e aore râ ia rahi roa hou oia e tapae ai i te reira faito, e ore roa ïa oia e ere i te ite e nahea i te haapa‘o maitai i to’na toro‘a, eita atoa oia e ere i te mana o te Atua no te faatupu i Ta’na mau opuaraa paari ».¹ [A hi‘o i te mana‘o tauturu 1 i te api 250.]

Te mau haapiiraa a Lorenzo Snow

Ua horo‘a te Fatu i te feia faatere i roto i Ta’na Ekalesia i te hoê faaueraa hanahana : « A faaamu i tau mau mamoe ».

Ia feruri te taata tata‘itahi o te ti‘a nei i ni‘a i te hoê toro‘a, i ni‘a ho‘i ia’na te Atua i horo‘a‘i i to’na autahu‘araa mo‘a e te hanahana, i te mea ta te Faaora i parau i na Ahuru ma Piti Aposetolo hou noa a‘e a haere atu ai oia i mua i to’na ra Metua—« A faaamu i tau mau mamoe ». [Ioane 21:16–17.] E ua tamau oia i te parau i te reira e tae noa’tu ua oto ta’na mau aposetolo no te mea ua tamau noa oia i te pii ia ratou mai teie te huru. Ua parau râ oia—« A faaamu i tau mau mamoe ». Oia ho‘i, « A haere ma to outou aau atoa, a haapa‘o maitai i ta’u ohipa. Teie mau taata i roto i te ao nei e mau taea‘e e e mau tuahine ïa no‘u. Te mana‘ona‘o puai nei au ia ratou. A atuatu maitai i to’u nunaa. A faaamu i ta’u nănă. A haere e poro i te evanelia. E horo‘a vau i te utu‘a maitai na outou no ta outou mau tusia atoa. Eiaha e mana‘o e nehenehe ta outou e rave i te hoê tusia rahi no te faatupuraa i teie ohipa ». Ua pii oia ia ratou na roto i te puai o to’na aau ia rave i teie ohipa. E i teie nei te pii nei au i te taatoaraa tei mau i teie autahu‘araa, te mau peresideni faatere o te tĭtĭ, e te mau Episekopo, e te Apooraa Teitei ia haere e ia faaamu i te nănă. A tau‘a ia ratou … A haa no ratou, e eiaha e tape‘a i to outou mau mana‘o e to outou mau ite no to outou iho maitai. I reira te Atua e horo‘a ai ia outou te heheuraa i ni‘a i te heheuraa, te faaûruraa i ni‘a i te faaûruraa, e e haapii ai ia outou e nahea ia haamaitai i te Feia Mo‘a i roto i te mau mea no to ratou oraraa pae tino e pae varua.² [A hi‘o i te mana‘o tauturu 2 i te api 250.]

Ua piihia te feia faatere e te mau orometua haapii ia pee i te hi‘oraa o te Faaora ia tavini ma te here, eiaha râ ia faateitei ia ratou iho.

No te aha te [hoê] taata i piihia‘i no te peresideni i ni‘a i te hoê nunaa ? Ia noaa anei te hoê mana e ia faaohipa i muri iho i taua mana ra no to’na iho faateiteiraa ? Aita, ua piihia râ oia no te ohipa i ni‘a i taua ti‘araa ra mai ta te Tamaiti a te Atua i rave a horo‘ahia‘i te autahu‘araa ia’na, ia ti‘a ia’na ia rave i te mau faatusiaraa. No’na iho ? Aita, no te maitai râ o te nunaa ta’na e peresideni ra. E titauhia anei oia ia pûpû ia’na iho i ni‘a i te satauro mai te Faaora i na reira ? Aita, ia riro mai râ oia ei tavini no to’na mau taea‘e, eiaha râ to ratou fatu, e ia haa no to ratou maitai e te oraraa maitai. E ere no te faaohipa i te mana tei fariihia no te haamaitai ia’na iho, to’na utuafare e to’na mau fetii e to’na iho mau hoa, ia faariro râ i te mau taata atoa ei mau taea‘e no’na, tei mau amui i te mau ti‘araa e ona, no reira, ia tutava i te haamaitai aifaito maitai i te taatoaraa mai te au i ta ratou mau taleni e to ratou parau-ti‘a, e ia na reira ana‘e oia e faatupu ïa oia i roto ia’na iho i taua mana‘o metua ra tei vai noa na i roto i te aau o te Metua…

Ia ite te mau taata o te poro nei i rotopu i [te] Feia Mo‘a no te aha te Autahu‘araa i tuuhia’tu ai i ni‘a iho ia ratou ; ia ite maitai ratou no te aha ratou i faataahia‘i no te faaî i tera e tera ti‘araa, oia ïa, ia haa ratou mai te au i te hinaaro o to tatou Fatu, ei tavini no te taatoaraa, ia haapii ratou i te haapa‘o e i te atuatu ma te aau aroha i te mau hinaaro o te taatoaraa mai ta ratou e na reira ia ratou iho … I reira ïa ratou e ô atu ai i roto i te varua o na faaueraa rahi e piti ta te Faaora i parau « te ture atoa e te mau peropheta », oia ho‘i, te hereraa i te Fatu ma to tatou aau atoa, to tatou mana‘o atoa e to tatou puai atoa e i to tatou taata tupu mai ia tatou iho [a hi‘o Mataio 22:37–40].³

A faaoti i te hoê pure hou [a haapii ai], e o teie ïa : A ani i te Fatu ia parau outou i te tahi mea i roto i ta outou mau haapiiraa o te haamaitai i te feia ta outou e paraparau atu. Eiaha e haape‘ape‘a mai te mea e horo‘a mai anei aore râ eita, taua mea ra ta outou e parau atu, i te hanahana ia outou iho, a haamana‘o noa râ e ua piihia outou no te paraparau atu i te mau taata e te hinaaro nei ratou i te farii i te tahi mea o te haamaitai ia ratou. E nehenehe i te reira e tae mai na roto ana‘e mai i te Fatu. Eiaha e haape‘ape‘a mai te mea… e parau mai paha te mau taata o te faaroo ia outou e e mea nehenehe ta outou paraparauraa. Eiaha roa e tau‘a i te reira, a iriti ê râ te mau mana‘o nounou e vai ra i roto i to outou feruriraa ia nehenehe i te Fatu ia faaite mai ia outou te tahi mea o te haamaitai i te nunaa.¹⁵ [A hi‘o i te mana‘o tauturu 3 i te api 250.]

E mauruuru te feia faatere paari i te mau taleni o vetahi ê e e horo‘a ratou i te taata te mau rave‘a no te tavini.

No te mea ho‘i e ua herehia te [hoê taata faatere] e te mau taata, e e roo maitai ho‘i to’na i rotopu ia ratou no to’na parau-ti‘a e to’na haavare ore, e no to’na huru ia haa no te maitai o te Atua e o te nunaa, ma te hinaaro i te rave i te mau tusia atoa e titauhia ia’na, tei ia’na ra ïa to ratou ti‘aturiraa, e ia farii oia i taua huru ti‘aturiraa mo‘a ra, eaha ïa ta’na e nehenehe e rave no te haamaha i te mau mana‘o o te taata, oia ho‘i te hinaaro i te haereraa i mua ? Ia pii ïa i taua taata ra no te tauturu ia’na i to’na mau taeae tei aravihi roa, ma te vaiihoraa ia ratou ia amo atoa i ta’na mau hopoi‘a. No te mea e ite ïa outou, i te rahiraa o te taime, e ua operehia te taleni i te mau taata e rave rahi e e mea varavara te taatoaraa i te hoê ana‘e ra taata ; e te hinaaro noa ra teie taleni i te rave‘a ia faaohipahia oia. E parau paha oia i te hoê taata, « E te taea‘e o Mea e o Mea, e mea maitai a‘e oe ia’u no te faaî i teie e aore râ i tera ti‘araa » ; e aore râ, i te tahi atu taata, « O oe te taata tano maitai no teie tufaa ohipa » ; e na reira noa oia e tae noa’tu ua noaa ia’na i te amui mai i te mau taleni a te mau taata atoa, e eita te reira e faaiti mai i te ti‘aturiraa o te taata i ni‘a ia’na, e faarahihia’tu râ.¹⁰ [A hi‘o i te mana‘o tauturu 4 i te api 250.]

Te rave‘a maitai no te arata‘i e mea na roto ïa i te haehaa, te hi‘oraa maitai e te haapa‘oraa i te maitai o vetahi ê.

Te faatereraa faahepo e ere ïa i te faatereraa tano no te faatere i te Feia Mo‘a, a tutava râ i te faatere na roto i te varua o te haehaa, te paari e te au maitai, e ia haapii eiaha noa na roto i te haapiiraa na roto atoa râ i te faaohiparaa. Noa’tu e haapii te hoê taata ma te puai o te hoê melahi, e mea puai a‘e e e mea manuïa a‘e râ te haapiiraa a te hoê taata e haapii na roto i te mau peu maitai, te mau hi‘oraa maitai, te mau ohipa, e o te faaite tamau noa i te anaanatae no te maitai o te nunaa.⁶

Mai te mea e haapa‘o maitai e e vai hoê outou mai te Peresideniraa Matamua e te Tino Ahuru ma Piti te huru e e pee mai outou ia matou mai ta matou e pee nei i te Mesia, e maitai ïa te mau mea atoa no outou. Ua faaoti matou ia rave i ta matou hopoi‘a e ia tavini i te Fatu e ia haa no te maitai o To’na nunaa e no te faatupuraa i Ta’na ohipa. E mau tavini matou no outou i roto i te Fatu e te hinaaro nei matou i to outou maitai e te maitai o te taata atoa.

Aita te Fatu i ma‘iti i te rahi e te ite o te ao nei no te rave i Ta’na ohipa i ni‘a i te fenua nei. E ere ratou te mau taata tei haapiipiihia i roto i te mau fare haapiiraa teitei e te mau fare haapiiraa faaroo no te ite, e mau taata haehaa râ tei horo‘a i to ratou puai i Ta’na ohipa o Ta’na ho‘i i ma‘iti no te haapa‘o i te mau ohipa o Ta’na Ekalesia, e mau taata tei hinaaro ia arata‘ihia e te Varua Mo‘a, e o te titau i te horo‘a i te hanahana Ia’na, e ua ite ratou e eita e nehenehe ia ratou ia rave i te tahi mea na roto ia ratou iho. E nehenehe ta’u e haapapû atu, e te mau taea‘e e te mau tuahine, e aita to’u e hinaaro te‘ote‘o i te amo i te hopoi‘a e vai nei i ni‘a ia’u i teie nei. Ahari, ua nehenehe ia’u ia ape i te reira ma te tura eita roa ïa vau e itehia i ni‘a i teie ti‘araa i teie taime. Aita roa a‘e au i ani i te reira ti‘araa, aita atoa vau i ani i te tautururaa a te hoê o to’u mau taea‘e ia nehenehe ia’u ia tae i ni‘a i teie ti‘araa, ua heheu mai râ te Fatu ia’u e i to’u mau taea‘e e teie ïa To’na hinaaaro, e aita vau e hinaaro i te ape i te hoê hopoi‘a e aore râ ia pato‘i i te hoê ti‘araa ta te Fatu e ani ia’u ia faaî.⁷

E tutava ïa vau i te haapa‘o i to outou maitai e te maitai o te basileia o te Atua. E tavini ïa vau ia outou mai te au i to’u ite e to’u maramarama, no te imiraa i to outou maitai e te maitai o te Mana Hope. E na reira ïa vau, o te Fatu ho‘i to’u tauturu.⁸ [A hi‘o i te mana‘o tauturu 5 i raro nei.]

Te mau Mana‘o Tauturu no te Tuatapaparaa e te Haapiiraa

A feruri i teie nei mau mana‘o a tuatapapa ai outou i te pene e aore râ, a faaineine ai outou i te haapii. No te tahi atu mau tautururaa, a hi‘o i te mau api vii–xi.

Nahea te rata a Lorenzo Snow i te feia faatere i te Fenua Peretane (te mau api 243–45) e tano ai ia tatou ? Ei hi‘oraa, eaha te tupu mai ia vai mai te hoê « varua faateitei ia’na iho » i roto i to tatou mau piiraa i roto i te Ekalesia ? Nahea tatou e nehenehe ai i te faaohipa puai i to tatou mau toro‘a ma te ore e faateitei ia tatou iho ?
A tuatapapa i te tuhaa e haamata i te api 245. Nahea e nehenehe ai i te feia faatere ia « faaamu i te nănă » a te Mesia ? Eaha ta te feia faatere no te Ekalesia i rave no te « faaamu » ia outou ? Eaha te mau huru taata ta outou e faahiahia nei i roto i teie feia faatere ?
A tai‘o i te mau faaararaa a te peresideni Snow no ni‘a i te faateiteiraa ia’na iho (te mau api 246–47). I muri iho a tai‘o faahou i te taatoaraa o te piti o te paratarafa i te api 244. No te aha e tia‘i ia tatou ia hi‘opo‘a i ta tatou mau tumu a tavini ai tatou ? A feruri na roto i te pure i ta outou mau tumu no te taviniraa i roto i te Ekalesia.
A feruri i te paratarafa e haamata i te hopea o te api 248. Nahea te hoê paroisa e aore râ amaa e haamaitaihia‘i ia opere ana‘e te feia faatere i te tahi mau hopoi‘a na ni‘a i te tahi atu mau melo ? Eaha te mau hotu ta outou i ite a haa amui ai te mau melo no te Ekalesia e to ratou mau taleni e to ratou mau ite huru rau no te faatupu i te hoê â fâ ?
Ua a‘o te peresideni Snow, « Te faatereraa faahepo e ere ïa te faatereraa maitai no te faatere i te Feia Mo‘a (api 248). Eaha te tahi mau hotu o te faatereraa faahepo a te feia faatere ? a te mau metua ? Eaha te tahi mau hotu o te faatereraa haehaa ?

Te mau Papa‘iraa Mo‘a : Mataio 6:24 ; 20:25–28 ; 23:5 ; Mareko 10:42–45 ; Ioane 13:13–17 ; 2 Nephi 26:29 ; 28:30–31 ; Mosia 2:11–19 ; 3 Nephi 27:27 ; PH&PF 46:7–11 ; 50:26 ; 121:34–46

Tauturu Haapiiraa : « E tauturu te mau uiraa tei papa‘ihia i ni‘a i te tapura hou te haapiiraa i te mau piahi ia haamata i te feruri i te mau tumu parau hou a haamata ai te haapiiraa » (Te Haapiiraa, Aita e Piiraa Teitei A‘e, 93).

E pee te feia faatere haapa‘o maitai o te Ekalesia i te a‘o a te Fatu ia Petero : « A Faaamu i ta’u mau mamoe » (Ioane 21:16–17).

« E ite ïa outou, i te rahiraa o te taime, e ua operehia te taleni i te mau taata e rave rahi e e mea varavara te taatoaraa i te hoê ana‘e ra taata ».