Pene 3

Te Faafariuraa i roto i te roaraa o te Oraraa : Te Tamau-noa-raa i te Haere i Mua i roto i te mau Parau Tumu o te Parau Mau

« E ti‘a i ta tatou haapa‘oraa ia ô roa i roto ia tatou iho, ei tufaa no to tatou huru o te ore roa e nehenehe ia iriti-ê-hia’tu ».

No roto mai i te oraraa o Lorenzo Snow

Ua bapetizohia e ua haamauhia o Lorenzo Snow i te ava‘e Tiunu 1836. Ma te haamana‘o i te tupuraa o to’na iteraa papû, ua parau oia i muri mai : « Ua ti‘aturi au e tei ia ratou ra [te Feia Mo‘a i te mau Mahana Hopea nei] te haapa‘oraa mau, e ua tomo atu vau i roto i te Ekalesia. I taua taime ra, ua riro ïa to’u faafariuraa ei hoê tufaa ohipa no te pae feruriraa noa ».¹ Ua haamana‘o oia, « Ua mauruuru maitai au i to’u raveraa i te mea ta’u i faariro ei mea paari no‘u i taua mau taime ra ».² Noa’tu e ua oaoa oia no te hoê taime i teie iteraa, aita râ i maoro roa ua hiaai oia i te tahi faaiteraa taa ê a te Varua Maitai. Ua parau oia, « Aita ta’u e faaiteraa, ua ti‘a’i râ vau i te hoê ».³

« Aita teie faaiteiteraa i tae mai i muri noa a‘e i to’u bapetizoraa, mai ta’u i mana‘o », ua haamana‘o a‘era oia. « Tera râ, noa’tu ua faataimehia, i to’u râ fariiraa i te reira, ua hau ïa te tupuraa o te reira i te maitai, i te papû e te maere i ta’u iho i ti‘aturi puai na. I te hoê mahana i roto i ta’u mau tuatapaparaa, e piti aore râ e toru hepetoma i muri a‘e i to’u bapetizoraahia, ua haamata vau i te feruri e aita i noaa ia’u te hoê iteraa no te parau mau o te ohipa—e aita ho‘i au i ite i te tupuraa o te fafauraa : ‘O tei haapa‘o i to’u ra hinaaro e ite ïa i ta’u e haapii’ ; [a hi‘o Ioane 7:17] e ua haamata vau i te taiâ rahi.

« Ua vaiiho vau i ta’u mau buka i te hiti, ua faaru‘e i te fare e ua hahaere atu na roto i te faaapu i raro a‘e i te mana faahepo o te hoê mana‘o oto e te hepohepo, e e au ra ua haatihia vau e te hoê mana‘o ino o te ore e noaa i te faaau. Ua matau vau i te hopea o te mahana, ia haere atu no te pure huna i roto i te hoê uru raau, i piha‘iho noa i to’u vahi faaearaa, i teie râ taime aita vau i hinaaro ia na reira.

« Ua reva ê atu te varua no te pure e e au ra ua riro te ra‘i mai te veo i ni‘a a‘e i to’u upoo. I te pae hopea, i to’u iteraa e ua tae i te hora i matauhia no te pure huna, ua faaoti a‘era vau eita vau e haapae i ta’u mau peu no te pae ahiahi, e, no te haamana i teie raveraa, ua tuturi au mai ta’u i matau i te rave, e i te vahi i matauhia, aita râ e iteraa mai ta’u i matau i te ite.

« Aita i maoro roa i to’u hamâmâraa i to’u vaha no te faaitoito i te pure, ua faaroo a‘era vau i te hoê haruru, i ni‘a noa a‘e i to’u upoo mai te ahehe o te mau ahu tirita, e i reira iho ua pou maira te Varua o te Atua i ni‘a iho ia’u, ma te tapo‘i i te taatoaraa o to’u tino, ma te faaî ia’u mai ni‘a mai i to’u upoo e tae noa’tu i te mau manimani o to’u na avae, e Auê ïa te popou e te oaoa o ta’u i ite ! Aore roa e reo e nehenehe e faaite i te taui ta‘ueraa tei tupu, mai roto mai i te pouri rahi o te feruriraa e o te varua, e tae atu i roto i te ananana o te maramarama e te ite, mai tei faaitehia i to’u iteraa i taua taime ra. I reira to’u fariiraa i te hoê iteraa papû maitai roa e te ora nei te Atua, e o Iesu Mesia te Tamaiti a te Atua, e ua faaho‘ihia mai te Autahu‘araa Mo‘a e te îraa o te evanelia.

« Ua riro ei hoê bapetizoraa hope roa—te hoê utuhiraa papû maitai i roto i te parau tumu e aore râ materia no te ra‘i mai, oia ho‘i te Varua Maitai ; e te papûraa o ta’na mau ohipa i ni‘a i te mau tufaa atoa o to’u nei tino, ua hau a‘e ïa i te utuhiraa i roto i te pape ; ua ti‘avaru e a muri noa’tu i te mau mana‘o feaa e te taiâ i roto i te feruriraa e te haamana‘oraa i te mea tei horo‘ahia mai ia tatou na roto i te aai, e ua riro mau te ‘Aiû no Betelehema’ te Tamaiti a te Atua ; e i teie nei ua heheuhia Oia i te mau tamarii a te taata, e te faaite nei Oia i te ite, mai te tau o te mau aposetolo. Ua mauruuru maitai roa vau, mai tei ti‘a ia’u ia na reira, no te mea ua tupu hope roa te mau mea hau atu i ta’u i mana‘o e o ta’u ho‘i e nehenehe e parau ma te taiâ ore.

Aita e nehenehe ia’u ia parau te roaraa o to’u faaearaa i roto i teie oaoaraa e teie maramarama hanahana, e rave rahi râ mau minuti no te mea tumu no te ra‘i mai, tei faaî e tei haati ia’u, i te haamata marû-noa-raa i te mo‘e atu. I to’u ti‘araa mai, ma to’u aau tei î i te mauruuru i te Atua o te ore roa e noaa i te parau, ua ite au—ua taa ia’u e ua tuu mai oia i ni‘a iho ia’u te mea ta te hoê noa Taata Mana Hope e nehenehe e horo‘a—tei hau atu i te faufaa i te mau tao‘a e te mau hanahana ta to te ao nei e nehenehe e horo‘a ».⁴

Ua tape‘a noa o Lorenzo Snow i te iteraa ta’na i farii i taua mahana ra, e ua haa itoito oia i te faarahi i to’na iteraa varua e i te tauturu ia vetahi ê ia na reira atoa. Ua parau oia e, « mai taua taime ra, ua tamata vau i te ora i te hoê oraraa ia ore ia ere i To’na Varua Mo‘a, ia arata‘i-tamau-hia râ e te reira Varua, ma te tamata i te haapae i to’u mana‘o nounou e te mau hiaairaa hape, e ia tutava noa i te rave i Ta’na ohipa ».⁵ Ua parau oia, « A tamau noa’i te haamana‘oraa e te feruriraa i te haapapû i to’na terona, eita roa’tu ïa vau e faati‘a i te iteraa papû e te iteraa puai tei faaitehia ia’u ia vai mamû noa ».⁶ [A hi‘o i te mana‘o tauturu 1 i te api 75.]

Te mau haapiiraa a Lorenzo Snow

Te noaaraa te hoê iteraa papû o te hoê ïa haamataraa maitai no te Feia Mo‘a i te mau Mahana Hopea nei.

E mea faahiahia e te hanahana te niu i ni‘a i te reira i haamau ai tatou i to tatou faaroo. Ua ite au iho i te reira. Maa taime noa i muri a‘e i to’u riroraa ei melo no teie Ekalesia, ua manuïa vau i te fariiraa i te ite hau atu i te maitai e te vai ra te hoê Atua, e te vai ra te hoê Tamaiti, o Iesu Mesia, e ua itehia o Iosepha Semita e te Atua ei peropheta Na’na. O te hoê ïa iteraa e ore roa e nehenehe ta te taata e faaite. Ua tae mai te reira na roto i te hoê heheuraa no ô mai i te Mana Hope ra. O te hoê ïa haamataraa maitai no te hoê Feia Mo‘a i te mau Mahana Hopea nei, te tahi mea ta te mau taata atoa, o te hinaaro mau nei ia haere i mua i roto i teie e‘a, e hinaaro i te hoê taime aore râ i te tahi atu taime. E tae mai ïa te reira i te mau taime e hinaaro ai oia i te puai, e e tae mai ïa taua puai ra na roto i te hoê iteraa e te e‘a ta’na e haere ra e arata‘i ïa ia’na ia farii i to’na mau hinaaro teitei e te maitai roa a‘e.⁷

Te mau taea‘e e te mau tuahine, te vai ra te tahi mau mea e ti‘a ia outou e ia’u nei ia feruri. Ua tae i te taime e titauhia‘i i te mau tane e i te mau vahine atoa ia ite no ratou iho i te niu te ti‘ahia’tu e ratou. E ti‘a ia tatou paatoa ia tutava i te haafatata’tu i te Fatu. E mea titauhia ia tatou ia haere rii i mua e ia farii i te hoê iteraa hope roa no taua mau mea ra o te ti‘a ia tatou ia maramarama maitai a‘e. E haamaitairaa taa ê te reira no te Feia Mo‘a atoa i te mau Mahana Hopea nei.⁷ [A hi‘o i te mana‘o tauturu 2 i te api 76.]

E nehenehe ta tatou e faarahi i to tatou faaroo e to tatou iteraa pae varua.

E nehenehe ta te mau tane e te mau vahine e faarahi i to ratou ite pae varua ; ia nehenehe ia ratou ia tupu maitai a‘e a paari noa ai ratou.⁹

Te ite nei au e te haere nei te Feia Mo‘a i te mau Mahana Hopea nei i mua ; e te farii nei ratou i te hoê haapiiraa. Te maraa noa’tura â tatou. Te haere nei tatou i mua i te hoê huru e te hoê ao teitei a‘e e i te hoê ti‘araa teitei a‘e, e te farii nei tatou i te hoê haapiiraa e aita ta te paari o te ao e ta’na mau titauraa e mau haapiiraa e mau parau tumu hape e mana i ni‘a i te Feia Mo‘a i te mau Mahana Hopea nei, no te mea te ti‘a nei ratou i ni‘a’tu i te mau haapiiraa e te mau mana‘o o te mau ohipa tei hamanihia e te taata e te tupu nei ratou i te rahi i roto i te mau mea no te parau mau o te faateitei i te feruriraa, o te faateitei i te iteraa, e o te haamau ia ratou iho i roto i te mau parau tumu mau no te oraraa e te hanahana. Ua î to tatou aau i teie nei mau parau mau e eita e nehenehe ia tatou ia parau i te mahana e aore râ te hora i faarahihia‘i to tatou faaroo, ua ite râ tatou, ia hi‘o ana‘e tatou i muri i te roaraa o te hepetoma i ma‘iri, te ava‘e e aore râ te matahiti, e ua rahi to tatou faaroo e to tatou ite no ni‘a i te faaroo e te mana o te Atua ; ua ite tatou e ua piri atu tatou i to tatou Atua e ua ite tatou e ua hoê tatou e te Atua to tatou Metua.¹⁰ [A hi‘o i te mana‘o tauturu 3 i te api 76.]

Mai te mea e hinaaro tatou i te faarahi i to tatou faaroo e to tatou ite pae varua, e ti‘a ïa ia tatou ia faaitoito rahi ia tatou iho.

E ti‘a i te taata tata‘itahi ia haapii i te ti‘a i ni‘a i to’na iho ite ; eita e nehenehe ia’na ia ti‘aturi i ni‘a i to’na taata tupu ; e ti‘a i te taata tata‘itahi ia vai ti‘amâ; e ti‘a ia’na ia ti‘aturi i to’na Atua no’na iho. Tei ia’na ra te faaotiraa ia hi‘o e mai te mea e tape‘a oia i te mau fifi e e haavî oia i te mau haafifiraa o te huehia i ni‘a i te e‘a no te ora no te haamarirau i to’na haereraa i mua. E nehenehe i te hoê taata ia farii i te haamaramaramaraa na roto i te mau ohiparaa a te Varua Mo‘a, e e haafatata’tu oia i te Atua e e faarahi oia i to’na faaroo mai te au i to’na iho itoito.¹¹

Eita roa e nehenehe ia haere i mua i roto i te mau parau tumu no te parau mau e ia faarahi i te ite no te ra‘i, [maori râ] ia faaohipa tatou i to tatou mau aravihi i te pae feruriraa e ia faaitoito-au-maitai tatou ia tatou iho. Ua ite tatou i te hoê hi‘oraa tei papa‘ihia i roto i Te Parau Haapiiraa e te mau Parau Fafau no te taa-ore-raa o Olive Kaudere i teie parau tumu. Ua fafau te Fatu ia’na i te horo‘araa no te iriti i te mau păpăă parau tahito. Mai ia tatou e rave rahi i teie mahana, aita oia i maramarama no ni‘a i te faaohiparaa i teie horo‘araa. Ua mana‘o oia e te mea tei titauhia ia’na ia rave, noa’tu ua fafauhia’tu teie horo‘araa ia’na e te Atua, o te vaiihoraa ïa i to’na feruriraa ia tia‘i noa ma te ohipa ore e tae noa’tu i te taime e ohipa-ta‘ue-noa mai ai te reira. A tuuhia’tu ai taua mau păpăă parau ra i mua ia’na, aita e ite i faaitehia mai, ua vai piri noa ratou, mai to ratou ihoâ huru, mai te mea râ e aita e mana i tae mai i ni‘a iho ia’na no te iriti.

Noa’tu e ua horo‘ahia’tu te horo‘araa no te iriti, aita i noaa ia’na i te faahaere i te ohipa, no te mea noa aita oia i faaitoito ia’na iho i mua i te Atua e te mana‘o i te faarahi i te horo‘araa i roto ia’na ; e ua mauruuru ore oia, na roto i to’na maitai e te aroha, ua haamaramarama atu te Fatu ia’na i to’na hape, ma te faaohipa i te parau i muri nei—

« Inaha, aita ho‘i oe i ite na ; ua mana‘o noa oe e e horo‘a noa vau i te reira ia oe, ma to oe mana‘o ore maori râ ia ani noa mai ia’u nei ; are‘a râ; inaha, te parau atu nei au ia oe e, ia imi maite oe i te reira i roto i to oe aau e tia‘i ei reira oe e ani mai ai ia’u e ua tia anei, e mai te mea ua tia ra e faatupu ïa vau i te ahu i roto i to oe ouma », e te tahi atu â. [A hi‘o PH&PF 9.]

Mai te reira atoa ia tatou iho nei, no te mau mea ta tatou e rave nei. Mai te mea te hinaaro nei tatou i te haamaitai, i te haere ‘oi‘oi i mua i roto i te ohipa e vai ra i mua ia tatou nei, e i te farii i te pae hopea i taua mau horo‘araa e mau hanahana ra, e i te tapae atu i te ti‘araa teitei ta tatou e tutava nei, e ti‘a ïa ia tatou ia mana‘o e ia feruri, e ti‘a ïa ia tatou ia faaitoito ia tatou iho, e tae noa’tu i to hoperaa o to tatou aravihi.¹²

E ti‘a ia tatou ia… titau i te Varua no tatou iho, e ia ore e haere noa na roto i te maramarama o vetahi ê; e ti‘a ia tatou ia faaô mai Ia’na i roto i ta tatou mau faanahoraa pae varua…

Te hoê taata o te opua i te haapii i te fata‘i i te vivo no te taime matamua e ite ïa oia i te hoê fifi i te faata‘iraa i te mau nota, e no te faata‘i tano i te hoê pehe e titauhia ïa te hoê itoito e te faaoroma‘i rahi. E ti‘a ia’na ia tamau noa, ia faafaea, ia ho‘i faahou i muri e ia haamata apî faahou, i muri mai râ i te hoê taime e nehenehe ïa ia’na, na roto i te faaitoito rahi ia faata‘i maitai i taua pehe ra. I muri a‘e, ia piihia oia ia ha‘uti i taua pehe ra, aita ïa e titauraa ia haamana‘o i te vahi e tuu ai i te mau rimarima, e ha‘uti ohie noa ia oia. E ere i te mea ohie i te haamataraa ; e ti‘a ia vai mai te faaoroma‘i rahi e te ohipa, hou a riro ai ei mea ohie i te ha‘uti.

Mai te reira atoa te huru no ni‘a i te mau mea a te Atua. E ti‘a ia tatou ia faaitoito rahi ia tatou iho e ia haere i mua te tahi maa vahi iti i te taime hoê, no te faaô roa i te ture no te ohiparaa i roto ia tatou iho, ia ohie noa i te rave i taua mau mea ra tei titauhia ia tatou.¹³ [A hi‘o i te mana‘o tauturu 4 i te api 76.]

A tuatapapa hohonu ai tatou i te mau mea a te Atua e a haapa‘o noa ai tatou, e riro ïa ta tatou haapa‘oraa faaroo ei tufaa no to tatou oraraa.

Te vai nei te hoê fifi ia mauruuru ana‘e tatou i te hoê haereraa i mua papa‘u noa, ma te haere i mua na ni‘a ê noa. Te parau nei tatou i te parau no te haereraa na roto i te maramarama o te Varua e te iteraa i te reira i ni‘a iho ia tatou, te rave râ anei tatou i teie mau mea ? E ti‘a ia tatou ia tuatapapa hohonu i te mau mea a te Atua, ia haamau i to tatou niu i ni‘a i te păpă, e tae noa’tu i te taime ua tae tatou i taua pape ora ra o te riro mai ei hoê pape pihaa mure ore i roto ia tatou.¹⁴

Te vai nei te mau tane i rotopu ia tatou e ua parahi puai mai te Varua o te Mana Hope i ni‘a iho ia ratou i te hoê taime, mea maitai e mea mâ ho‘i to ratou mau mana‘o i te hoê taime mai to te mau melahi, e tei rave i te mau fafauraa i te Atua e e tavini ratou Ia’na e e haapa‘o i Ta’na mau faaueraa i roto i te mau huru atoa o te oraraa … Eaha’tura râ te huru o te tahi o taua mau Peresibutero ra i teie nei ? Aita to ratou e iteraa papû faahou i teie mahana. Ua faatumuhia to ratou mau hinaaro i ni‘a i te mau mea o teie nei ao ta te Fatu ho‘i i faati‘a ia ratou ia farii, e te tia‘i nei ratou i teie nei ia piihia ratou, e i te rahiraa o te mau taime ia piihia ratou, e haapa‘o hau a‘e ratou i te hoê hinaaro i te tape‘a i to ratou ti‘araa e toro‘a, eiaha râ i te here mau no te ohipa i piihia‘i ratou.

Teie ïa te huru o te mau taata atoa, noa’tu eaha to ratou huru maitai i te haamataraa, o te faati‘a i to ratou mau mana‘o e to ratou mau hinaaro ia pee i to te ao e ta’na mau peu, e o te hoê ïa te reira faaiteraa papû e marô-ore-hia e ia na reira ana‘e te mau taata ua here ïa ratou i te ao hau atu i te Fatu e Ta’na ohipa i ni‘a i te fenua nei. No te mea ho‘i e ua farii tatou i te maramarama o te Evanelia mure ore, e ua fana‘o tatou i te mau mea maitai no te basileia, e e mau huaai ho‘i tatou no Iseraela e e mau fatu ho‘i tatou no te mau fafauraa rahi e te hanahana, e ti‘a ïa ia tatou ia haa ma te faaroo e te itoito no te faatupu i te mea ta te Atua i opua ia rave na roto atu ia tatou ; e ti‘a ia tatou ia riro ei mau tane e ei mau vahine faaroo e te mana e ia rave i te mau ohipa maitai atoa, e ia ite ana‘e tatou i to tatou iho haapa‘o ore aore râ tau‘a ore, e nava‘i ia te reira no te faaite ia tatou ia faaafaro ia tatou iho e ia ho‘i faahou i te e‘a no te ohipa.¹⁵

Aita’tu e ohipa hau atu i te maamaa maori râ ïa te mana‘o o te hoê taata ia iriti-ê-atu i ta’na haapa‘oraa faaroo mai te hoê pereue aore râ te hoê ahu. Aita e ohipa mai te reira te huru mai te hoê taata e iriti-ê-ra i ta’na haapa‘oraa faaroo maori râ te iriti-ê-ra oia ia’na iho. E ti‘a i ta tatou haapa‘oraa faaroo ia ô roa i roto ia tatou iho, te hoê tufaa o tatou iho o te ore roa e nehenehe e iriti-ê-hia. Mai te mea te vai ra te hoê taata e iriti-ê-ra i ta’na haapa‘oraa faaroo, i te taime e na reira ai oia tei ni‘a ïa oia i te fenua o ta’na i ore i matau, te horo‘a ra oia ia’na iho i te mau mana no te pouri, aita oia e ti‘a ra i ni‘a i to’na iho fenua, aita ta’na e ohipa i reira. Te mana‘o o te mau Peresibutero no Iseraela e tuhi ra, e haavare ra e e ta‘ero ra tei raro roa ïa ratou ; e ti‘a ia ratou ia ti‘a na ni‘a’tu i taua mau mea ra. E faaore na tatou i te mau ino atoa e e ora na tatou i te mau parau atoa o te na roto mai i te vaha o te Atua ra [a hi‘o PH&PF 98:11]. E rave na tatou i te mau ohipa atoa tei faataahia na tatou ma te hinaaro mau e te itoito e ia vai tamau noa mai te varua o to tatou Atua, te maramarama no te parau mau e te mau heheuraa a Iesu Mesia ia tatou nei.¹⁶

A faaea noa i ni‘a i te pahi o Ziona. Mai te mea e tapiri mai te mau poti na piha‘iho, ma te faaite mai i te mau peni nehenehe e ma te horo‘a mai i te mau fafauraa faahiahia, eiaha e pou i rapae au i te pahi no te haere atu i ni‘a i te tahi atu poti ; a faaea noa râ i ni‘a i te pahi. Mai te mea e ua faainohia outou e te hoê o taua mau taata ra i ni‘a i te pahi, tei ore i mau i te varua tano, a haamana‘o e e mea maitai noa te pahi iho. Eita e ti‘a ia tatou i faati‘a i to tatou mau feruriraa ia riri no te tahi mea ta te mau taata i ni‘a i te pahi e rave paha i ni‘a iho ia tatou ; e mea maitai roa te pahi, e e mea maitai roa te mau ofitie, e e maitai ïa tatou mai te mea e faaea noa tatou i ni‘a i te pahi. E nehenehe ta’u e haapapû atu ia outou e e arata‘i ti‘a’tu te pahi ia outou i te fenua no te hanahana.¹⁷

E [faaiteite atu] ïa vau i te hoê hoho‘a no te faatupuraa e te faahaereraa i teie varua i roto ia tatou, e te haapa‘o maitai-roa-raa ia ore tatou e hahi ê atu i te taime fifi. A tuu i te hoê totoma i roto i te hoê paero vinita e e mea iti roa te ohipa e tupu i ni‘a i te reira i te hora matamua, e i roto atoa i na 12 hora matamua. A hi‘opo‘a i te reira e e ite ïa outou e e tei ni‘a noa i te pa’a te tauiraa, no te mea e titauhia te hoê taime roa no te faaavaava i te reira. Te hoê taata o te bapetizohia i roto i teie ekalesia e tupu ïa te hoê tauiraa i ni‘a iho ia’na, eiaha râ te tauiraa no te haapaari ia’na i te reira iho taime. Eita te reira e haamau i te ture no te ti‘a e no te ohipa i roto ia’na i roto i na 12 aore râ 24 hora matamua ; e ti‘a ia’na ia vai noa i roto i te ekalesia, mai te totoma i roto i te vinita, e tae noa’tu ua î oia i te varua tano, e tae noa’tu ua paari oia i roto i te ‘Momoni’, i roto i te ture a te Atua ; e ti‘a i taua mau mea ra ia ô roa i roto i to tatou iho mau huru

… Te mau taea‘e e te mau tuahine, te… vaiiho nei au i teie tumu parau ia outou ia haapa‘o-maite-hia, ia hi‘opo‘a e ia feruri outou, ma te pure i te Fatu te Atua o to tatou mau metua ia ninii mai oia i To’na Varua i ni‘a i To’na nunaa. O outou ta te Fatu i ma‘iti no te faahanahana Ia’na i mua i To’na ra aro, e ia haamaitai mai te Fatu ia outou e ia faaî ia outou i To’na Varua, e ia maramarama to outou mau mata no te ite i te mau mea no to outou faaoraraa. E mai te mea te vai ra te hoê tane e aore râ te hoê vahine tei ore â i ara maitai, ia tae ‘oi‘oi mai ïa te taime e nehenehe ai i te Varua e te mana o te Varua Maitai ia parahi mai i ni‘a iho ia ratou, ia haapii oia ia ratou i te mau mea no mutaa ihora, no teie mahana e no te tau i muri nei, e na roto i te tautururaa a te Fatu, ia faatupu i te parau-ti‘a e te parau tumu o te parau mau i roto ia ratou iho, ia ti‘a ho‘i ia ratou ia faaineine no te mau tau fifi o te tamataraa o te tae mai.¹⁸ [A hi‘o i te mana‘o tauturu 5 i te api 76.]

Te mau Mana‘o Tauturu no te Tuatapaparaa e te Haapiiraa

A feruri i teie nei mau mana‘o a tuatapapa ai outou i te pene e aore râ, a faaineine ai outou i te haapii. No te tahi atu mau tautururaa, a hi‘o i te mau api vii–xi.

A hi‘o faahou i te ohipa tei tupu ia Lorenzo Snow tei papa‘ihia i te mau api 65,67,68. Nahea to outou iteraa papû i riro ai ei iteraa mau no outou ? A feruri i te faaite i to outou aamu i te hoê melo no te utuafare e aore râ i te hoê hoa, mai te tahi taata ta outou i tavini ei taea‘e hahaere e aore râ ei tuahine hahaere.
Ua parau te peresideni Snow e te noaaraa te hoê iteraa papû o te « hoê ïa haamataraa maitai roa no te Feia Mo‘a i te mau Mahana Hopea nei » (api 69). No te aha te hoê iteraa papû i riro ai ei hoê noa vahi haamataraa—e ere ho‘i te hoê tapaeraa hopea ?
I roto i te tufaa e haamata i raro i te api 70, ua faaite te peresideni Snow i te taa-ê-raa i rotopu i te haapiiraa a to te ao nei e te haapiiraa « teitei a‘e » ta te Fatu e horo‘a nei. Nahea tatou e nehenehe ai i te titau i teie nei « haapiiraa teitei a‘e » ? Eaha te mau haamaitairaa tei tae mai ia outou i to outou na-reira-raa ?
A tai‘o i te tuhaa e haamata i te api 70. Eaha te taime i hinaaro ai outou i te « ti‘a’tu i ni‘a i to [outou] iho ite » ? Eaha ta te mau metua e te mau orometua haapii e nehenehe e rave no te tauturu i te mau tamarii e te feia apî ia ti‘a’tu i ni‘a i to ratou iho ite ?
A tai‘o faahou i te a‘o a te peresideni Snow i te tufaa hopea o te pene (te mau api 72,74). Eaha to outou mana‘o no te auraa ia « tuatapapa hohonu i te mau mea a te Atua » ? Eaha to outou mana‘o no te auraa ia « faaô roa i ta tatou haapa‘oraa faaroo i roto ia tatou iho » ?

Te mau Papa‘iraa Mo‘a : 2 Nephi 31:20 ; Mosia 5:1–4, 15 ; Alama 12:9–10 ; 3 Nephi 9:20 ; Moroni 10:5 ; PH&PF 50:24

Tauturu haapiiraa : « E rave rahi te mau haapiiraa e haapiihia nei i roto i te Ekalesia ma te huru etaeta mai te au i te hoê a‘oraa. Eita tatou e pahono maitai i teie mau a‘oraa i roto i te mau piha haapiiraa. Te na reira nei tatou i roto i te pureraa oro‘a e i roto i te mau amuiraa, are‘a râ te haapiiraa, e piti ïa pae ia nehenehe ia outou ia ui i te mau uiraa. E nehenehe ta outou e tuu ohie noa i te mau uiraa i roto i te hoê piha haapiiraa » (Boyd K. Packer, « Principles of Teaching and Learning », Ensign, Tiunu 2007, 87).

« E ti‘a ia tatou ia tuatapapa hohonu i te mau mea a te Atua, ia haamau i to tatou niu i ni‘a i te păpă, e tae noa’tu i te taime ua tae tatou i taua pape ora ra o te riro mai ei hoê pape pihaa mure ore i roto ia tatou ».

I muri noa iho i to’na bapetizoraa e to’na haamauraa, ua farii o Lorenzo Snow i te hoê faaiteraa hau a te Varua Maitai tei taui i to’na oraraa.

« E nehenehe ta te mau tane e te mau vahine ia faarahi i to ratou ite pae varua ; e nehenehe ta ratou e tupu maitai a‘e a paari noa ai ratou ».