Pene 4

Haapuaihia e te Mana o te Varua Maitai

« A faaoti i to outou mana‘o ia ora ma te haehaa e i te hoê huru oraraa ia riro noa te Varua o te Fatu ei hoa no outou ».

No roto mai i te oraraa o Lorenzo Snow

I roto i ta’na a‘oraa matamua i te amuiraa rahi ei Peresideni no te Ekalesia, ua haapii o Lorenzo Snow, « Te ti‘aturi nei tatou i ni‘a i te Varua o te Fatu no te tauturu ia tatou e no te faaite ia tatou i tera taime e tera taime te mea e titauhia ia tatou ia rave i roto i te mau huru taa ê o te oraraa e haati nei ia tatou ».¹ Aore paha i nehenehe i te peresideni Snow i te faahiti i taua parau ra i to’na vai oraraa ahani e aita e piti o to’na mau hoa i ti‘aturi i ni‘a i te Varua o te Fatu i roto i te hoê huru ohipa taa ê tei tupu e 34 matahiti na mua’tu.

I te matahiti 1864, ua tere atu o Elder Lorenzo Snow e o Ezra T. Benson no te Pŭpŭ no te Tino Ahuru ma Piti Aposetolo no te hoê misioni i te mau taa motu no Hawaii. Ua apee e 3 misionare ia raua : o Elders Joseph F. Smith, William Cluff, and Alma L. Smith. I to ratou tutauraa i to ratou pahi i te pae tahatahi no te motu no Maui, ua pa‘uma paatoa ratou eiaha râ o Joseph F. Smith i ni‘a i te hoê poti na‘ina‘i a‘e no te haere i tatahi. A fatata atu ai ratou i te motu, ua ta‘iri mai te mau are teitei, e aita i noaa i te taata faahoro poti i te arata‘i i te poti. Ua taahuri te poti, e ua taorahia te taatoaraa o te mau horopatete i roto i te miti. Aita i maoro roa ua puhâ mai te mau taata atoa aita râ o Elder Snow. Ua horo atu te hoê pŭpŭ taata no te motu no te tauturu, ma te rave atu ia William Cluff e Alma L. Smith i roto i te hoê poti poito no te ma‘imi i to ratou hoa. Ua faati‘a o Elder Cluff:

« Te mea matamua ta’u i ite no te taea‘e Snow o to’na ïa rouru i te painuraa i ni‘a i te miti i te hoê hopea o te poti tei taahuri. I to matou hutiraa mai ia’na i roto i to matou poti, ua parau atu maua i te feia poti ia tere haavitiviti atu i te pae tatahi. Ua etaeta to’na tino, e e au ra ua pohe oia.

Te parahi ra maua te taea‘e A. L. Smith i piha‘iho te tahi e te tahi. Ua faatarava maua i te taea‘e Snow i ni‘a i to maua na huha, e, i roto te tere no te haere atu i te pae tatahi, ua faatahinu hau noa maua ia’na e ua ani i te Fatu ia faaherehere i to’na ora, ia nehenehe ia’na ia ho‘i atu i to’na utuafare e i te fare.

« I to matou tapaeraa i te pae tatahi, ua amo atu matou ia’na i te atea rii i te vahi tei reira te tahi mau paero rarahi te taravaraa i ni‘a i te one tatahi. Ma te huri ia’na i ni‘a i to’na opu, ua faatarava maua ia’na i ni‘a i te hoê o te mau paero, e ua tura‘ira‘i ia’na i mua e i muri e tae noa’tu i te taime ua manuia maua i te faahaere mai i rapae‘au te miti ta’na i momi…

« I muri a‘e i te tahi taime to maua rohiraa no te faaora mai ia’na, aore roa hoê a‘e tapa‘o e e ora mai oia, ua parau te feia e ti‘a noa ra na reira e aita’tu e ohipa e nehenehe e ravehia no’na. Aita râ maua i mana‘o e faaru‘e ia’na, e ua pure noa maua e ua utuutu noa ia’na, ma te hoê ti‘aturiraa papû e e faaroo e e pahono mai te Fatu i ta maua mau pure.

I te pae hopea ua faaûruhia maua ia tuu i to maua vaha i ni‘a iho i to’na e ia tutava i te faahaere i te mata‘i i roto i to’na mau mahaha ma te pupuhi e ma te huti mai te mata‘i i rapae‘au e ma te pee maite i te hutiraa aho tei matauhia. Ua tamau noa maua i te na reira e tae noa’tu i te taime ua manuia maua i te paumu i te mata‘i i roto i to’na mau mahaha. I muri mai, ua ite maua i te tahi mau tapa‘o rii e te ho‘i maira te ora. Ua riro te hoê amoraa mata iti, o tei vai araara noa na ho‘i e au ra e ua pohe, e te hoê oroororaa marû roa i roto i te arapo‘a, ei mau tapa‘o matamua no te ho‘iraa mai te puai. Ua tupu noa teie mau tapa‘o i te rahi, e tae noa’tu ua ara roa mai oia ».

I to’na haamana‘oraa i teie nei ohipa tei tupu, ua ite o Elder William Cluff no te aha oia e o Elder Alma L. Smith i nehenehe ai i te faaora i te ora o Elder Snow. Ua parau oia, « Aita maua i rave noa i te mea i matauhia i roto i taua huru ati ra, i te mea atoa râ ta te Varua i muhumuhu mai ia maua ».² [A hi‘o i te mana‘o tauturu 1 i te api 89.]

Te mau haapiiraa a Lorenzo Snow

Na roto i te horo‘araa a te Varua Maitai, e arata‘ihia tatou i te parau mau atoa e e haapuaihia tatou i roto i to tatou faaroo.

Te [vai] nei te hoê haamaitairaa tei tu‘atihia i ni‘a ana‘e i te haapa‘oraa i te evanelia, o te horo‘araa ïa a te Varua Maitai … Ua parau te Faaora, o tei ite papû maitai a‘e i te natura e te huru o teie horo‘araa e, te feia tei farii i te reira e arata‘i ïa oia ia ratou i roto i te mau parau mau atoa e e faaite ia ratou i te mau mea e tupu a muri atu [a hi‘o Ioane 16:13]. Mea hau a‘e to’na rahi i taua varua ra no ô mai i te Atua ra, tei faaî i te rahiraa o te mau vahi atoa e tei haamaramarama i te mau taata atoa e haere mai i roto i te ao nei [a hi‘o PH&PF 84:46]; e arata‘i te horo‘araa a te Varua Maitai ia ratou i roto i te mau parau mau atoa, e e faaite ia ratou i te mau mea e tupu a muri atu.

Hau atu â, ua parau te Aposetolo Paulo no ni‘a i te mau maitai o teie varua : « Ua horo‘ahia ta te Varua faaite i te taata atoa, ia maitai paatoa. Ta te tahi ra, o te faaroo ïa ». [A hi‘o 1 Korinetia 12:7, 9–.] E ere te hoê faaroo matau-noa-hia, mai ta te tahi mau taata e mana‘o nei i teie mahana ; te hoê râ faaroo o te faati‘a i te feia tei mau i te reira ia vavahihia, ia taorahia i roto i te mau apoo liona, i roto i te mau umu u‘ana, e ia faaoroma‘i i te mau huru hamani-ino-raa atoa. Teie te huru faaroo ta te Varua Maitai i horo‘a i te feia tei mau i te reira, o tei faati‘a i te taata tei mau i te reira ia ti‘a i roto i te mau fifi atoa, ia faaruru atu i te mau pato‘iraa atoa e ia horo‘a i to’na iho ora, mai te mea e titauhia, no te ohipa ta’na i amui atu. Te vai ra te hoê mana faaûru puai i roto i teie faaroo, tei horo‘ahia mai e te Fatu na roto i te Varua Maitai, te ore e nehenehe i te tahi ê atu parau tumu ia horo‘a. Ua horo‘ahia i te tahi te faaroo, ta te tahi ra, o te ite ïa [a hi‘o 1 Korinetia 12:8], eiaha taua mea ra o te noaa na roto i te tai‘oraa noa i te mau buka, te ite râ no ô mai i te Mana Hope ra. Tei ni‘a ia ratou te hoê ture tei faaûru ia ratou, e mea mau, tei horo‘a ia ratou te hoê iteraa no te ohipa ta ratou i amui atu. Ua ite ratou na roto i te heheuraa no ô mai i te Atua ra e te tumu ta ratou i haapa‘o e mea mau ïa, ua heheuhia mai te reira ia ratou na roto i te hoê rave‘a e ore roa e nehenehe ia ratou ia marô atu, e ua ite ratou no ratou iho. No reira ua haamauhia ratou… i ni‘a i te niu o te heheuraa.³

Ua parau o Petero i to’na a‘oraa i te nunaa, « E tatarahapa e ia bapetizohia outou atoa i roto i te i‘oa o Iesu Mesia ia matara te hara, e horo‘ahia mai ïa te Varua Maitai ia outou. No outou ho‘i tei parauhia maira, e no to outou tamarii, e no te feia atoa ho‘i i te atea ê ra, ta te Fatu ta to tatou Atua e parau atu ». [Te Ohipa 2:38–39.] Teie horo‘araa a te Varua Maitai o te hoê ïa ture taa ê atu i te mau mea atoa ta tatou e ite nei i roto i te ao no te faaroo. E hoê ïa ture no te maramarama, e no te heheuraa. O te hoê ïa ture o te heheu mai i te mau mea i tahito ra, no teie mahana e no te tau i mua nei, e teie mau horo‘araa a te Varua Maitai ua ti‘a ïa ia fariihia na roto i te haapa‘oraa i te mau titauraa a te evanelia mai tei porohia i taua mau mahana ra e mai tei porohia i teie mau mahana e te mau Peresibutero no te Ekalesia a Iesu Mesia i te Feia Mo‘a i te Mau Mahana Hopea Nei. Tei ni‘a i teie păpă to ratou faaroo i te haamauraahia ; mai teie atu vahi ua farii ratou i te hoê iteraa no te haapiiraa ta ratou i farii, e ua parau te Faaora ia tatou e « e ore roa ratou e noaa i te uputa o hade ». [A hi‘o 3 Nephi 11:39.]…

Te niu i patuhia‘i te Ekalesia a Iesu Mesia i te Feia Mo‘a i te Mau Mahana Hopea Nei o te păpă ïa no te heheuraa—i ni‘a i taua păpă ra o ta Iesu i parau e e patu ïa Oia i Ta’na Ekalesia, e e ore roa ïa e noaa i te uputa o hade [a hi‘o Mataio 16:17–18]. Aita tatou i farii i teie iteraa na roto i te i‘o e te toto, aita tatou i farii i teie iteraa no ô mai i te taata ra, aita tatou i farii i te reira na roto i te tai‘oraa i te Bibilia… aore râ te Buka a Moromona, ua farii râ tatou i te reira na roto i te mau raveraa a te Varua Maitai, o te haapii i te mau mea a te Atua, te mau mea no mutaa ihora, no teie mahana e no ananahi, o te reira ho‘i te mau mea a te Atua, ma te haamaramarama maitai i te reira ia tatou. Eita e nehenehe ta outou e haru i teie ite na roto atu ia matou na roto i te tape‘araa i roto i te fare auri aore râ na roto i te tahi atu huru hamani-ino-raa. E mau maite ïa matou i te reira e tae noa’tu i te pohe.⁴ [A hi‘o i te mana‘o tauturu 2 i te api 89.]

E nehenehe i te Feia Mo‘a tata‘itahi i te mau Mahana Hopea nei e farii i te Varua Maitai ei hoê hoa no te horo‘a mai i te mana‘o tauturu.

Te vai nei te hoê rave‘a e nehenehe ai i te mau taata ia tape‘a mâ noa i to ratou feruriraa i mua i te Atua e te taata, e taua rave‘a ra o te faaherehereraa ïa i roto ia ratou te Varua o te Atua, oia ho‘i te varua no te heheuraa i te mau tane atoa e i te mau vahine atoa. E heheu atu ïa Oia ia ratou, e tae noa’tu i roto i te mau mea ohie roa, te mea ta ratou e ti‘a ia rave, na roto i te horo‘araa ia ratou te mau mana‘o tauturu. E ti‘a ia tatou ia tamata i te haapii mai i te natura o teie Varua, ia nehenehe ia tatou ia taa i to’na mau mana‘o tauturu, e i reira e nehenehe ïa ia tatou ia rave i te mea ti‘a i te mau taime atoa. E haamaitairaa rahi taa ê ïa teie no te Feia Mo‘a atoa i te mau Mahana Hopea nei. Ua ite tatou e e ti‘araa to tatou i te farii i te mau faaiteraa a te Varua i te mau mahana atoa no to tatou mau oraraa.

Te haere mai nei te mau taata ia’u nei ma te hinaaro rahi i te farii i te mana‘o tauturu no ni‘a i te tahi tumu parau. Aita i titauhia ia ratou ia haere noa mai ia’u nei (no te tahi mau tumu, oia ïa, e mea ti‘a roa ïa), no te mea tei roto ia ratou te Varua no te faatupu i te maitai e no te faatupu i te mau opuaraa a te Atua … E ere i te mea titau-noa-hia ia ratou ia haere atu i te peresideni o te Ekalesia, aore râ i Te Tino Ahuru ma Piti Aposetolo, aore râ i te mau Peresibutero no Iseraela, no te farii i te mana‘o tauturu ; tei roto ia ratou ra te reira ; te vai nei te hoê hoa o tei ite papû maitai eaha te mea e parau atu ia ratou. Mai te taime i farii ai tatou i te Evanelia, i haere ai tatou i raro i te pape no te bapetizoraa e i muri iho i te tuuraa rima i ni‘a iho ia tatou no te horo‘araa o te Varua Maitai, ua noaa ia tatou te hoê hoa, mai te mea eita tatou e ti‘avaru ê atu ia’na na roto i te ohipa hape. Taua hoa ra o te Varua Mo‘a ïa, te Varua Maitai, o te farii i te mau mea a te Atua e o te faaite mai te reira ia tatou. Teie te rave‘a rahi ta te Fatu i faataa no tatou, ia nehenehe ia tatou ia ite i te maramarama, e ia ore ia haere tamau noa i roto i te pouri.⁵ [A hi‘o i te mana‘o tauturu 5 i te api 90.]

E nehenehe ta te Varua Maitai e afa‘i mai i te oaoa e te mana‘o hau ia tatou.

Ua haamau te Fatu i te tahi mau hinaaro e mau mana‘o tumu i roto i to tatou mau ouma, mai te reira atoa i te mau taata atoa, e te taatoaraa o te utufare taata. Ua tanuhia e ua natihia i roto i to ratou hamaniraa te tahi mau hinaaro e mau rave‘a no te faaoaoaraa, te mau hinaaro no te tahi mau mea tei faanahohia i roto i to ratou natura no te faatupu i to tatou hau e te oraraa maitai, no te pahono i to ratou mau mana‘o e no te faatupu i to ratou oaoa, tera râ nahea e noaa ai te fana‘oraa i taua mau rave‘a e mau hinaaro ra ta to te ao nei e ore e ite aore râ e maramarama, ua horo‘a mai ïa te Fatu ia tatou te rave‘a no te maramarama i taua mau mea ra na roto i te haapa‘oraa e te haereraa i roto i te maramarama o te Varua Mo‘a e te fariiraa i te parau mau.⁶

E haamaitairaa taa ê ïa na te Feia Mo‘a i te mau Mahana Hopea nei ia ora i roto i te Evanelia i te hoê oraraa e nehenehe ai ia ratou ia ite e ua fariihia ratou e te Atua. Oia mau, i te tahi mau taime, te rave nei tatou i te mau mea e haamâhia e tatou ia feruri ana‘e tatou no ni‘a i te reira mau mea, e tatarahapa râ tatou i te reira i roto i to tatou aau e e faaoti tatou eiaha e na reira faahou. O teie ana‘e ta te Fatu e ani ia tatou, e te mau tane e te mau vahine o te ora mai te reira te huru, e ora ïa ratou ma te faahapa-ore-hia. E ite ratou i te parau-ti‘a e te oaoa i roto i te Varua Maitai.⁷

Mai te mea e tape‘a tatou i te maramarama o te Varua i roto ia tatou, e nehenehe ïa ia tatou ia haere i roto i te evanelia ia nehenehe ia tatou ia fana‘o mau i te hau e te oaoa i roto i teie ao ; e a haere ai tatou i mua, ma te tutava i te hau e te oaoa e vai ra i ni‘a i to tatou haerea, i te hopearaa, e farii ïa tatou i te mana‘o hau o te ore roa e nehenehe i te hoê taata ia fana‘o maori râ o ratou ana‘e tei î i te Varua Mo‘a.⁸ [A hi‘o i te mana‘o tauturu 3 i te api 89.]

E hinaaro tatou i te tautururaa a te Varua Maitai a faaoroma‘i ai tatou i te mau tamataraa, a rave faaoti ai tatou i ta tatou mau ohipa, e a faaineine ai tatou no te hanahana tiretiera.

Te vai nei e rave rahi mau mea faufaa rahi tei titauhia ia tatou, e e rave rahi te mau mea ta tatou e nehenehe e rave, na roto i te tautururaa a te Varua o te Fatu, o tei mana‘ohia ho‘i e ore roa e nehenehe ia tatou i te faaoti.⁹

Te hinaaro nei au e faahaamana‘o i to’u mau taea‘e e mau tuahine e… te ti‘aturi nei tatou no to tatou haamaramaramaraa e te ite i ni‘a i te Varua o te Atua, tei roto ia tatou, mai te mea e atuatu maitaihia, te hoê varua no te faaûruraa, no te heheuraa, no te faaite maramarama mai ia tatou te mana‘o e te hinaaro o te Atua, te haapiiraa i ta tatou mau ohipa e mau titauraa, e te mea tei titauhia ia tatou … Te hinaaro nei tatou i te tautururaa. E faahapahia tatou ia rave i te mea o te arata‘i ia tatou i roto i te pe‘ape‘a e te pouri, e taua mau mea ra o te ore e haamaitai ia tatou, na roto râ i te tautururaa a taua faaô ra ta te Fatu ia fafau i to’na Feia Mo‘a, e mai te mea e haapa‘o maitai tatou i te faaroo i ta’na mau faaiteraa, e e taa ia tatou te natura no to’na reo, e nehenehe ïa ta tatou e ape e rave rahi pe‘ape‘a e te fifi u‘ana.¹⁰

Te ti‘aturi rahi nei tatou i ni‘a i te varua no te faaûruraa, e mai te mea ua vai mai te hoê taime, mai to Adamu parahiraa i roto i te Ô i Edene, i hinaaro-rahi-hau-hia ai te Varua o te Atua i teie iho taime, aita ïa vau i ite. Te titau nei te mau tapa‘o no te mau tau, e te tae rûraa mai o te mau mea no te tamata i te aau o te Feia Mo‘a i te mau Mahana Hopea nei e to ratou parau-ti‘a, ia imi maite tatou i teie nei i te Varua o te Atua, e te tautururaa a te Atua, no te mea e hinaaro-mau-hia te reira i roto i te mau mea o te tae rû mai nei i teie nei. Ua ite tatou e ua hinaaro tatou i te reira i mutaa ihora. E nehenehe ohie noa ia tatou ia ite e mai te mea aita tatou i farii i te Varua o te Atua no te arata‘i ia tatou na roto i te mau mea e rave rahi tei tupu o ta tatou i faaruru, aita ïa i ti‘a ia tatou ia vai i roto i te oaoaraa no ta tatou opuaraa no te faateiteiraa e te hanahana, e e ere ïa to tatou mau huru oraraa i te mea maitai roa. E mai te mea ua hinaaro tatou i te Varua Mo‘a i mutaa ihora, e nehenehe ïa ia tatou ia ite mau e e hinaarohia te reira i te mau mahana i mua nei.¹¹

E ti‘a ia tatou ia taa maitai—e te mana‘o nei au e te na reira nei tatou—e te ohipa i haere mai ai tatou i teie nei oraraa no te rave, eita ïa te reira e nehenehe i te ravehia no te hanahana o te Atua aore râ no to tatou iho mauruururaa mai te mea e ravehia na roto noa i to tatou iho ite natura. E ti‘aturi tatou i ni‘a i te Varua o te Fatu no te tauturu ia tatou e no te faaite ia tatou i tera taime e tera taime i te mea e titauhia ia tatou ia rave i roto i te mau huru oraraa taa ê e nehenehe e haati ia tatou.¹²

E mea maamaa ia titau i te Feia Mo‘a i te mau Mahana Hopea nei i teie nei mau mahana ia haapa‘o i te ture tiretiera, te ture no ô mai i te Atua ra, e ta’na mau opuaraa no te faateitei i te nunaa i mua i to’na aro, maori râ ua paturuhia ratou e te hoê mana [no te ra‘i mai.] Te fafau nei te evanelia i teie. Te fafau nei te reira i te horo‘araa a te Varua Maitai, ma to’na huru hanahana, e tei ore roa e fana‘ohia e te tahi ê atu pŭpŭ taata, e mai ta te Faaora i parau ia tatou, e arata‘i ïa te Varua i te feia tei mau i te reira i roto i te parau mau atoa, e e faaûru ia ratou, e e horo‘a ia ratou te hoê iteraa no ni‘a ia Iesu ; te hoê iteraa no ni‘a i te Metua, e no te mau mea no te ao tiretiera ; e e faaûru oia i te feia tei mau i te reira i te hoê iteraa no te mau mea e tae mai, e te mau mea tahito ; e e faaûru ia ratou e tae noa’tu i te hoê faito e fana‘o ai ratou i te mau horo‘araa no te ra‘i mai—te horo‘araa no te mau reo e te tohuraa, no te tuuraa i te rima i ni‘a i te feia ma‘i, ia ora ratou.

Ua fafauhia i te feia tei farii i teie evanelia teie mau mana e mau horo‘araa no te ra‘i mai, e te hoê iteraa no ratou iho, ia ore ho‘i ratou ia ti‘aturi i ni‘a i te hoê taata aore râ pŭpŭ taata, no ni‘a i te parau mau o te haapa‘oraa faaroo ta ratou i farii ; ia ti‘a râ ia ratou ia farii i te hoê iteraa no ô mai i te Metua ra e no ô mai ia’na ra te haapa‘oraa faaroo, e no ô mai ia’na ra te evanelia, e te vai ra i ta’na ra tavini te ti‘araa e te mana no te faatere i taua mau oro‘a ra, ia ore roa te hoê mata‘i no te haapiiraa ia faaaueue ia ratou aore râ ia tatara-ê-atu ia ratou mai ni‘a’tu i te e‘a ta ratou e haere ra ; ia nehenehe ia ratou ia faaineinehia no te hanahana e heheuhia mai, e ia riro ratou ei feia ohipa i reira ; ia nehenehe ia ratou ia faaoroma‘i i te mau tamataraa e te mau ati o ta te Atua ho‘i e hinaaro ia tae mai i ni‘a iho ia ratou, no te faaineine hau atu â ia ratou no te hanahana tiretiera ; ia ore ratou e haere na roto i te pouri, na roto râ i te maramarama e te mana o te Atua, e ia faateiteihia ratou i ni‘a‘e i te mau mea o te ao nei, i ni‘a’tu i te mau mea e haati nei ia ratou, ia nehenehe ia ratou ia haere ti‘amâ i raro a‘e i te ao tiretiera, e i mua i te aro o te Atua e te ra‘i, ei mau taata ti‘amâ, ma te tamau noa i te e‘a ta te Varua Maitai e faataa mai no ratou, taua e‘a ra e nehenehe ai ia ratou ia faateitei ia ratou iho i te ite e te mana, e ia faaineine ia ratou iho ia farii i te hanahana ta te Atua i opua i te horo‘a i ni‘a iho ia ratou, e ia parahi i ni‘a i te ti‘araa teitei ta te Atua i opua i te tuu atu ia ratou.¹³

E ti‘a ia tatou ia ora maitai ia ite tatou e te huru o to tatou oraraa e fariihia ïa e te Atua. E ti‘a ia tatou ia taa i te reo e te mau muhumuhuraa a te Varua Mo‘a. I te mahana ia ore te ra‘i e haapourihia e te mau ata, e ite ïa tatou i te mau tao‘a e haati nei ia tatou, to ratou nehenehe e to ratou tumu. No reira te ti‘aturi nei tatou i ni‘a i te Varua o te Atua no te maramarama i ni‘a i te mau parau tumu o te parau mau e te ora. Aore roa e taata o te parau nei e Feia Mo‘a oia i te mau Mahana Hopea nei e nehenehe e fana‘o i te hoê faito no te oaoa maori râ ia ora oia e ia tuu oia ia’na iho i raro a‘e i te arata‘iraa a te ra‘i.¹⁴ [A hi‘o i te mana‘o tauturu 4 i te api 90.]

Ia ora haehaa ana‘e tatou, e tauturu ïa te Varua Maitai ia tatou i ni‘a i to tatou e‘a no te haereraa i mua.

A faaoti i to outou mana‘o ia ora ma te haehaa e i te hoê oraraa ia vai noa mai te Varua o te Fatu ei hoa no outou, no te horo‘a i taua mau mana‘o tauturu ra ia outou mai tera taime e tera taime mai tei hinaarohia i roto i te mau huru oraraa taa ê e tuuhia‘i outou…

Eaha te roaraa o to’u oraraa, aita vau i ite, e aita roa’tu vau e haape‘ape‘a no te reira. Te hinaaro nei au, e te hoê ïa o te mea o ta outou e ti‘a ia hinaaro atoa, ia farii i taua haehaa ra, e taua marû ra e taua ohie ra, no te oaoa i te varua no te heheuraa. E haamaitairaa taa ê no outou, no outou tata‘itahi, ia farii i te varua no te heheuraa ia ite papû eaha te mea e ti‘a ia outou ia rave. E haamaitairaa taa ê no outou ia farii rahi i te reira mai te haamaitairaa taa ê no‘u ia ite eaha te rave ananahi, ia tae mai ananahi, no te maitai o te Ekalesia taatoa.¹⁵

E ti‘a ia tatou ia tutava, ma to tatou puai atoa, ia haamo‘e i te mau mea atoa o te ao nei o te haamauiui e o te haape‘ape‘a ia tatou, e ia faatumu i to tatou feruriraa i ni‘a i te Fatu, ma te farii maite i To’na Varua Mo‘a ia nehenehe ia tatou ia farii i taua iteraa ra e mau mana‘o tauturu ra o te tauturu ia tatou i ni‘a i to tatou e‘a no te haereraa i mua.¹⁶ [A hi‘o i te mana‘o tauturu 5 i raro nei.]

Te mau Mana‘o Tauturu no te Tuatapaparaa e te Haapiiraa

A feruri i teie nei mau mana‘o a tuatapapa ai outou i te pene e aore râ, a faaineine ai outou i te haapii. No te tahi atu mau tautururaa, a hi‘o i te mau api vii–xi.

A tai‘o faahou ai outou i te aamu i te mau api 79–81, a feruri i te mau taime ua haamaitaihia outou no te mea ua pee te tahi atu taata i te mau muhumuhuraa a te Varua Maitai. A feruri atoa i te mau taime ua pee outou i te hoê muhumuhuraa a te Varua no te tauturu i te tahi taata ê.
A tai‘o i te tuhaa e haamata i te api 81. Eaha to outou mana‘o i te auraa o te « haamauhia… i ni‘a i te păpă no te heheuraa » ? (No te tahi mau hi‘oraa, a hi‘o i te mau api 81–84.) Nahea te heheuraa no te taata tata‘itahi e nehenehe ai e horo‘a ia tatou te puai no te « ti‘a’tu i ropu i te mau fifi atoa » e « ia ape i te mau pato‘iraa atoa » ?
Ua parau te peresideni Snow e e nehenehe ta te Varua Maitai e tauturu ia tatou ia « fana‘o i te hau e te oaoa i roto i teie ao » (api 88). Eaha te taime i tauturu ai te Varua Maitai ia outou ia oaoa e ia ite i te hau ? Eaha te tahi mau rave‘a ê atu e nehenehe ai ta te Varua Maitai e tauturu ia tatou ? (No te tahi mau hi‘oraa, a hi‘o i te mau api 88–89.)
A tuatapapa ai outou i te tufaa e haamata i te api 88, a feruri e nahea to outou haapiiraa mai ia ite i te mau muhumuhuraa a te Varua Maitai. Nahea e nehenehe ai ia outou ia tauturu i te hoê melo no te utuafare aore râ te hoê hoa ia haapii mai ia ite i te mau muhumuhuraa a te Varua ?
Te vai nei e piti faahitiraa i roto i teie pene no ni‘a i te Varua Maitai ei hoa (te mau api 86 e 88.) I to outou mana‘oraa eaha tatou e hinaaro ai i te haehaa e te ohie no te farii i te Varua Maitai ei hoa no tatou ?

Te mau Papa‘iraa Mo‘a : Luka 12:12 ; Ioane 14:26–27 ; Roma 14:17 ; 1 Korinetia 12:4–11 ; Galatia 5:22–25 ; 1 Nephi 10:17–19 ; 2 Nephi 32:5

Tauturu haapiiraa : « No te faaitoito i te aparauraa, a faaohipa i te mau uiraa i roto i te pene tata‘itahi … E nehenehe atoa ta outou e hamani i ta outou iho mau uiraa no te feia ihoa râ ta outou e haapii ra » (no roto mai i te api vi o teie buka).

Te ohipa misionare matamua i te mau Taa motu no Hawaii.

I to Elder Lorenzo Snow taviniraa i te hoê misioni i te mau Taa Motu no Hawaii, ua faaorahia to’na ora na roto i te haamaitairaa faaûruhia a to’na mau hoa.

« E ti‘araa to tatou ia farii i te mau faaiteraa a te Varua i te mau mahana atoa o to tatou nei oraraa ».