Te Oraraa e te Tau Taviniraa a Lorenzo Snow

I te hoê mahana i te matahiti 1835, e 21 matahiti to Lorenzo Snow i taua taime ra, ua horo atu oia na ni‘a i ta’na puaarehenua, mai te nohoraa o to’na na metua, no te haere atu i te Fare haapiiraa teitei no Oberlin i Oberlin, Ohio. Aita oia i ite e i roto i teie tere poto, e ite ïa oia i te hoê ohipa o te taui i te tereraa o to’na oraraa.

I to’na hororaa’tu na ni‘a i te poromu i roto i to’na oire no Mantua, Ohio, ua farerei oia i te hoê taata o te horo atoa ra na ni‘a i te puaarehenua. Ua faatoro‘ahia iho nei teie taata, o David W. Patten te i‘oa, ei Aposetolo no te Fatu ra o Iesu Mesia. Te ho‘i ra oia i te vahi o te Feia Mo‘a i te mau Mahana Hopea nei i Ketelani, Ohio, i muri a‘e i te taviniraa i te hoê misioni. Ua tere amui na taata e piti nei e 50 kilometera te atea. I muri mai ua faati‘a o Lorenzo Snow :

« Ua tae ta maua aparauraa i ni‘a i te haapa‘oraa faaroo e te haapiiraa hohonu a te taata, e no to’u apî e no te mea ho‘i e ua noaa ia’u te tahi mau ite rahi, i te haamataraa ua hinaaro ïa vau i te haafaufaa ore i to’na mau mana‘o, no te mea i te tahi taime aita oia i faaohipa ti‘a i te tarame ; tera râ, a haamaramarama mai ai râ oia ma te anaanatae e te haehaa i to’u feruriraa no ni‘a i te opuaraa no te faaoraraa, e au ra aita i noaa ia’u i te pato‘i i te ite e e taata oia no te Atua e e parau mau to’na iteraa papû ».¹

I te taime a farerei ai o Lorenzo Snow ia Elder Patten, e ere oia i te melo no te Ekalesia a Iesu Mesia i te Feia Mo‘a i te mau Mahana Hopea Nei, tera râ ua matau oia i te tahi o te mau haapiiraa a te Ekalesia. Ua haere a‘ena te peropheta Iosepha Semita i te fare o te utuafare Snow, e ua bapetizohia te metua vahine o Lorenzo e to’na nau tuahine o Leonora e o Eliza e ua haamauhia ei melo no te Ekalesia. Are‘a râ, mai ta Lorenzo iho i parau, « te rave ra oia i te tahi atu mau ohipa » i taua taime ra, e « tei rapae au roa taua mau mea ra i [to’na] feruriraa ».² Ua haamata te reira i te taui a paraparau ai oia ia Elder Patten. Ua parau oia no ni‘a i teie ohipa tei tupu, « Na teie i taui i to’u oraraa ».³ Ua faaite oia mai te hea to’na huru i roto i te aparauraa :

« Ua putapû to’u aau. Ua ite papû oia i te reira, no te mea te ohipa hopea ta’na i parau mai ia’u i muri a‘e i te faaiteraa i to’na iteraa papû, ua ti‘a ïa ia’u ia haere atu i te Fatu ra hou a haere ai au e taoto i te pô no te ani ia’na no‘u iho. Ua na reira vau e te hopearaa o te reira teie ïa ; mai te mahana mai i farerei ai au i teie Aposetolo rahi, ua faarahihia e ua faateitei-roa-hia ïa ta’u mau opuaraa ».

Ua riro « te aau mau o Elder Patten, to’na anaanatae e to’na mana varua » ⁴ ei haamaitairaa tei vai maoro i ni‘a i te hoê taata apî o te tavini mai ho‘i i te hoê mahana ei hoê Aposetolo iho. E ua arata‘i taua aparauraa ra i te tahi atu mau ohipa tei tupu o tei faaineine ia Lorenzo Snow ia riro ei Peresideni no Te Ekalesia a Iesu Mesia i te Feia Mo‘a i te mau Mahana Hopea Nei, te auvaha parau a te Atua i ni‘a i te fenua nei.

Te Paariraa i roto i te hoê Utuafare Faaroo e te Rave Puairaa i te Ohipa.

E piti na utuafare puai tei î i te faaroo e te peu faaroo rahi, tei apitihia a faaipoipo ai o Oliver Snow ia Rosetta Leonora Pettibone i te 6 no me 1800. E mau huaai te tane e te vahine faaipoipo no te tahi mau taata matamua no Europa mai tei faaea i te Fenua Marite—e mau taata pererina Peretane tei ratere mai na ni‘a i te Moana Atelenetita i te mau matahiti 1600 no te horo i te hamani-ino-raa i te pae faaroo. Ua faaea o Oliver e Rosetta i te mau matahiti matamua o to raua oraraa faaipoipo i te tufaa fenua no Massachusetts, i reira ta raua na tamahine o Leonora Abigail e Eliza Roxcy te fanauraahia. I muri iho ua haere atu ratou i Mantua, Ohio, tei riro i taua taime ra te hoê o te mau puhaparaa i te tufaa too‘a o te râ roa i te Fenua Marite. O ratou te ahuru-ma-hoê-raa o te utuafare tei haere atu i taua area ra. I Mantua, e piti faahou â tamahine, o Amanda Percy e Melissa, tei fanauhia i roto i te utuafare. Ua fanauhia o Lorenzo, te pae o te tamarii e te tamaroa matamua a Oliver e Rosetta, i te 3 no eperera 1814. I muri mai ia’na e piti â na taea‘e tei fanauhia mai : O Lucius Augustus e Samuel Pearce.⁵

No ta raua mau peu utuafare, ua haapii Oliver e Rosetta i ta raua mau tamarii i te faufaa rahi no te faaroo, te rave puai i te ohipa, e te haapiiraa. A faaite ai raua i te mau aamu no te mau fifi ta raua i faaruru no te haamau i to raua utuafare, ua haapii mai ta raua mau tamarii i te haavî i te mana‘o haaparuparu e ia mauruuru i te mau haamaitairaa a te Atua i roto i to ratou oraraa. Ua papa‘i o Eliza : « E nehenehe mau roa ia matou ia parau no ni‘a i to matou nau metua, e mea mâ to raua parau-ti‘a, e ua ti‘aturihia raua i roto i te mau auraa sotiare atoa e i roto i te mau imiimiraa faufaa i roto i te oraraa ; e ua haapii maite raua i ta raua mau tamarii ia noaa te mau peu no te rave i te ohipa, no te tarani e no te ture morare etaeta ».⁶ Ua faaite o Lorenzo i to’na mauruuru no te mea ua aupuru noa to’na na metua ia’na « ma te maitai e te here ».⁷

A tupu ai o Lorenzo i te paari, ua haa itoito oia i roto i te mau ohipa pae tino e te pae feruriraa. E mea pinepine to’na metua tane i rapae au i te utuafare, i te tavini i te mau taata « no te ohipa no te huiraatira ». Mai te mea aita o Oliver i te fare ; na Lorenzo ïa, te tamaroa paari a‘e, e haapa‘o i te faaapu—te hoê hopoi‘a ta’na i haapa‘o maitai e i rave manuia maitai. Aita ana‘e o Lorenzo e rave ra i te ohipa, te tai‘o ra ia oia. Ua parau o Eliza, « Ta’na buka o to’na ïa hoa tamau ».⁸

Ua parau o Eliza a haamana‘o ai oia i te tupuraa o te huru o Lorenzo, « Mai to’na na‘ina‘iraa, ua faaiteite [oia] i te itoito e te mana‘o papû tei tapa‘o i to’na haereraa i mua i roto i te oraraa i muri mai ».⁹

Te Haavîraa i te mau Hinaaro Taure‘are‘a

Ua faaitoito o Oliver e Rosetta Snow ia tuatapapa-mau-hia te parau no te faaroo. Ua faati‘a raua i ta raua mau tamarii ia tuatapapa i te mau ekalesia huru rau, ma te iriti i to ratou fare i « te mau taata maitai e te maramarama no te mau haapa‘oraa faaroo atoa ». Noa’tu teie faaitoitoraa, aita o Lorenzo « i tau‘a rii aore râ i tau‘a noa’tu i te parau no te haapa‘oraa faaroo, e aita te reira i nava‘i no te faaoti i te amui atu i te hoê faaroo ».¹⁰ Ta’na moemoea ia riro ïa oia ei faatere i te nuu faehau, e e ua puai a‘e teie moemoea i te tahi atu mau hiaai i roto i to’na oraraa, e ua papa‘i te papa‘i ve‘a o Orson F. Whitney, « e ere no te mea ua au oia i te tama‘i, no te mea râ ua au roa oia i te mana‘o ia farii i te hanahana i roto i te hoê toro‘a faehau ».¹¹ Aita râ i maoro roa ua mono oia i teie hinaaro na roto i te tahi atu. Ua faaru‘e oia i te utuafare e ua haere i te Fare Haapiiraa Teitei no Oberlin i piha‘iho noa ia nehenehe ia’na ia tutava i te « hoê haapiiraa teitei ».¹²

I to’na haapiiraa i Oberlin, ua tupu mai i roto ia Lorenzo te hoê anaanataeraa apî no te haapa‘oraa faaroo. Tei raro a‘e noa ra â oia i te mana no ta’na aparauraa e o Elder Patten, e aita oia i tuatapapa noa i te mau haapiiraa no te evanelia tei faaho‘ihia mai ua faaite atoa’tu râ oia i te reira i te tahi atu mau piahi no Oberlin—e tae noa’tu i te mau taata e haapii ra no te riro mai ei mau orometua a‘o. I roto i te hoê rata i to’na tuahine Eliza, tei amui atu i te Feia Mo‘a i Ketelani, ua papa‘i oia : « E mea manuia roa vau i te parururaa i te faaroo Momoni i rotopu i te mau orometua a‘o e te mau taata e faaineine ra ia riro ei orometua, e te haapapû atu nei au ia oe i te reira. E parau mau e aita vau i faafariu mai i te tahi, e aita atoa ho‘i au iho nei, tera râ ua fatata te tahi o ratou i te parau mai e ua ite ratou i te tahi [paari] i roto i ta outou mau haapiiraa. No te iriti ê atu i te mana‘o hape no ni‘a i te Faaroo Momoni i roto i te feruriraa o te hoê piahi no Oberlin e ere ïa te hoê ohipa ohie no te rave ».

I roto i teie â rata, ua pahono o Lorenzo i te hoê aniraa ta’na i farii na roto mai ia Eliza. Ua faanaho oia e ia faaea o Lorenzo ia’na ra i Ketelani no te haapii i te reo Hebera i roto i te hoê piha tei roto te peropheta Iosepha Semita e te tahi mau melo no te Pŭpŭ no te Tino Ahuru ma Piti Aposetolo. Ua na ô oia : « Te oaoa nei au i te iteraa e te oaoa rahi nei oe i Ketelani ; noa’tu e aita vau i anaanatae i te haere i te vahi tei reira oe ; mai te mea râ e hoê â te mau rave‘a ia noaa te haapiiraa, te mana‘o nei au e ua fatata roa vau i te hinaaro ia tamata i te haere atu i reira. Hau atu i te mau mea atoa e anaanatae ïa vau e peneia‘e e noaa ia’u te tahi maitai i te faaroo atu i taua mau haapiiraa ra tei porohia o ta’u ho‘i i faaitoito e mea maoro i teie nei i te parururaa e te tururaa i ŏ nei i Oberlin nei ».

Noa’tu e ua putapû te aau o Lorenzo i te mau haapiiraa a te Ekalesia a Iesu Mesia i te Feia Mo‘a i te mau Mahana Hopea Nei, ua feaa oia i te amui atu i te Ekalesia. Ua anaanatae râ oia. I roto i ta’na rata ia Eliza, ua ani oia e rave rahi uiraa no ni‘a i te Ekalesia. Ua parau oia e ua titauhia i te mau piahi no Oberlin o te faaineine ra ia riro ei mau orometua a‘o ia « horo‘a e hitu matahiti aore râ hau atu no te haapiiraa paari hou a faatiahia‘i ratou ia parau i te mau Edene e te vai nei te hoê Atua i te Ra‘i, mai te hoê auvaha ture o te ti‘a ia farii i te tahi mau aravihi hou e nehenehe ai e noaa ia’na te parau faati‘a no te paraparau ». Ua parau râ oia i to’na tuahine, « No te pororaa i ta outou mau haapiiraa tumu, i to’u mana‘oraa, te ti‘aturi rahi nei to oe mau taata i ni‘a i te tautururaa a te ra‘i hau atu i te mea ta outou e nehenehe e haapii i te fare haapiiraa teitei ». Ua faaite oia i te hinaaro ia taa e nahea ra te Varua e ohipa ai, ma te ani mai te mea e nehenehe i te Varua Maitai e horo‘ahia i te mau taata « i teie tau o te ao nei ». Ua ani oia mai te mea e nehenehe i te mau taata ia farii i te Varua Maitai, « e horo‘a anei te Atua i te mau taime atoa i te reira na roto i te tahi atu taata ? »¹³ Te auraa, ua hinaaro oia ia ite e mea titauhia nei te mana autahu‘araa no te farii i te Varua Maitai.

Ua au roa o Lorenzo i te mau hoaraa e te haapiiraa tei noaa ia’na i te Fare Haapiiraa Teitei no Oberlin, ua rahi atoa râ to’na mauruuru ore i te mau haapiiraa faaroo i reira. I te pae hopea, ua faaru‘e oia i te fare haapiiraa teitei e ua farii i te aniraa a to’na tuahine ia haapii i te reo Hebera i Ketelani. Ua parau oia e ua haere noa oia i te piha haapiiraa reo Hebera ia nehenehe ia’na ia faaineine no te haere atu i te hoê fare haapiiraa teitei i te pae hitiaa o te râ no te Fenua Marite.¹⁴ Are‘a râ ua ite o Eliza e taa ê noa’tu i te haapiiraa i te reo Hebera, « e rave rahi te mau mea ta’na i haapii mai, e ua î to’na aau i te faaroo ora no te Evanelia mure ore ».¹⁵ Aita i maoro roa ua ite oia i te mau pahonoraa i te mau uiraa ta’na i ani i te Fare Haapiiraa Teitei no Oberlin, e i te ava‘e Tiunu 1836 ua bapetizohia oia e Elder John Boynton, te hoê o te mau melo matamua no te Pŭpŭ no te Tino Ahuru ma Piti Aposetolo i roto i teie tau tuuraa evanelia. Ua haamau-atoa-hia oia ei melo no Te Ekalesia a Iesu Mesia i te Feia Mo‘a i te Mau Mahana Hopea Nei.

Fatata e piti hepetoma i muri mai ua ani te hoê hoa ia’na, « E te taea‘e Snow, ua farii anei oe i te Varua Maitai mai to oe bapetizoraahia ? » Ua haamana‘o oia, « Ua fatata taua uiraa ra i te faaî ia’u i te mana‘o ‘ârepurepu e te mauruuru ore. Noa’tu e ua farii paha vau i te mau mea atoa ta’u i hinaaro, aita râ vau i farii i te mea ta’u i tia‘i »—oia ho‘i, e noa’tu ua haamauhia oia, aita râ oia i farii i te hoê faaiteraa taa ê a te Varua Maitai. Ua parau oia « aita vau i mauruuru eiaha no te mea ta’u i rave, ia’u iho nei râ. Ua haere atu vau i te hoê ahiahi e taua mana‘o ra i te hoê vahi i matauhia e au no te pure i te Fatu ». Ua tuturi oia no te pure e ua farii oia i te reira ihoâ taime i te hoê pahonoraa i ta’na mau pure. Ua parau oia i muri mai « Eita roa te reira e tumâhia i roto i to’u nei feruriraa a tamau noa’i au i te haamana‘o … Ua farii au i te hoê iteraa maitai roa e te vai nei te hoê Atua, e o Iesu, tei pohe i ni‘a ia Kalavaria, Ta’na ïa Tamaiti, e ua farii o Iosepha te peropheta i te mana ta’na i parau hua e tei ia’na ra. E ore roa e nehenehe i te hoê reo e faahiti i te mauruuru e te hanahana o taua faaiteraa ra ! Ua ho‘i au i te fare. I teie nei, ua nehenehe ia’u ia faaite i to te ao taatoa e ua ite au, na roto i te iteraa papû, e ua faaho‘ihia mai te Evanelia a te Tamaiti a te Atua, e o Iosepha Semita te hoê ïa Peropheta na te Atua, tei faati‘ahia ia parau na roto i To’na ra i‘oa ».¹⁶

Ma te haapuaihia i teie ohipa tei tupu ia’na, ua faaineine o Lorenzo ia’na ia riro ei misionare. Mai ta to’na tuahine o Eliza i parau, ua arata‘i to’na faafariuraa ia’na i te hoê tauiraa i roto i to’na mau hinaaro e ua « iriti i te hoê ao apî i mua ia’na ». Ua parau oia, « Aita oia i ô atu i roto i te nuu faehau o te fenua nei, ua tomo atu râ oia i teie nei i ni‘a i te tahua aroraa no te riro mai ei aito e te mau nuu no te ra‘i ».¹⁷

Te Faarururaa i te mau Tamataraa ei Misionare Rave Tamau

Ua haamata o Lorenzo Snow i ta’na taviniraa misionare i te tufaa fenua no Ohio i te tau tupuraa raau no te matahiti 1837. Mai ta’na faaotiraa ia amui atu i te Ekalesia, ua titau atoa ta’na faaotiraa ia tavini ei misionare rave tamau e ia taui oia i to’na mau mana‘o e ta’na mau opuaraa. Ua papa‘i oia i roto i ta’na buka aamu, « I te matahii 1837 ua haapae roa vau i te taatoaraa o to’u mau mana‘o auhia ».¹⁸ Ua faaore oia i ta’na opuaraa ia tutava i te « hoê haapiiraa no te mau reo » i te hoê fare haapiiraa teitei i te tufaa hitiaa o te râ o te Fenua Marite.¹⁹ Ua farii atoa oia e tere ma te pute ore aore râ ma te parau tipeeraa—oia ho‘i, ia haere ma te moni ore, ma te ti‘aturiraa i te maitai o vetahi no te horo‘a i te maa e te vahi ta‘otoraa. E fifi taa ê mau teie no’na no te mea i to’na apîraa, ua ite oia i te mau taime atoa e e mea faufaa rahi na’na iho e aufau i to’na mau hinaaro, ma te faaohipa i te moni ta’na i tauturu i to’na metua tane ia noaa i roto i te faaapu utuafare. Ua parau oia : « Aita vau i matau i te ti‘aturi i ni‘a i te hoê noa a‘e taata no te maa e te vahi ta‘otoraa. Mai te mea e tere atea vau, e haapapû ïa to’u metua tane e e haere atu vau e te moni e nava‘i no ta’u mau haamau‘araa. E i teie nei, no te haere atu e ani i te tahi mea no te amu e te hoê vahi no te tuu i to’u upoo, e mea fifi roa ïa no‘u, e mea taa ê roa i te ohipa tei haapiihia ia’u ».²⁰ No te mea noa e ua farii oia i te « hoê iteraa papû e ua titau te Atua i te reira », ua « faaoti oia i te na reira ».²¹

Ua tae atu te tahi o te mau metua tane fetii, te mau metua vahine fetii, te mau taea‘e e vahine fetii, e te mau hoa o Elder Snow i te mau rururaa matamua ta’na i faatere ei misionare. Ua parau oia i te haamana‘oraa i te taime matamua a poro ai oia : « E mea mamahu roa vau i taua taime ra, e… e ohipa fifi roa na’u ia ti‘a’tu i ni‘a i reira e ia poro atu i to’u mau fetii e te mau taata tupu tei tae mai. Te haamana‘o nei au e ua pure au i te taatoaraa o te mahana na mua‘e i te pô e a‘o ai au. Ua haere atu vau i rapae au o vau ana‘e e ua ani i te Fatu ia horo‘a mai ia’u te tahi mea no te parau. Ua parau mai to’u metua vahine fetii i muri iho e ua fatata oia i te rurutaina a ite ai oia ia’u i te ti‘araa no te a‘o, ua hamama râ vau i to’u vaha, e te mea ta’u i parau aita roa’tu vau i ite, ua parau mai râ to’u metua vahine fetii e e mea maitai roa ta’u a‘oraa fatata e 45 minuti te roa ».²² Ma te mauruuru ua haamana‘o oia : « Ua ti‘aturi au e ua ite au i te haapapûraa e e faaûru mai e e horo‘a mai te hoê Varua no te faaûruraa i te parau i roto i to’u vaha. Ua imi au na roto i te pure e te haapaeraa maa—ua faahaehaa vau ia’u iho i mua i te Fatu, ma te piiraa Ia’na i roto i te pure u‘ana ia horo‘a mai i te mana e te faaûruraa a te Autahu‘araa mo‘a ; e a ti‘a’i au i mua i taua amuiraa ra, ua parahi puai mai te Varua Maitai i ni‘a iho ia’u, ma te faaî i to’u feruriraa i te maramarama e te faaiteraa mai i te mau mana‘o e te reo tano no te horo‘a atu i te reira ».²³ Na mua a‘e oia i faaru‘e atu ai i taua tufaa oire ra, ua bapetizo e ua haamau oia i te hoê metua tane fetii, te hoê metua vahine fetii e e rave rahi mau taea‘e fetii e te tahi mau hoa.²⁴

I muri a‘e i to’na faaiteraa i te evanelia i to’na utuafare e i to’na mau hoa, ua tamau o Elder Snow i ta’na mau ohipa misionare i roto i te tahi atu mau oire, ma te taviniraa fatata hoê matahiti. Ua faaite oia, « I roto i teie misioni, ua tere atu vau i roto e rave rau mau tufaa oire o te Tufaa Fenua no Ohio, e i roto i taua area taime ra ua bapetizo vau e rave rahi mau taata tei faaea haapa‘o noa i te parau mau ».²⁵

Aita o Lorenzo Snow i maoro roa i te fare i muri mai i ta’na misioni matamua ua hinaaro oia i te poro faahou i te evanelia. Ua parau oia, « Ua puai roa te mana‘o no to’u piiraa misionare i roto i to’u feruriraa e ua hinaaro roa vau e ho‘i faahou atu ».²⁶ Ua poro oia i te reira taime i te evanelia tei faaho‘i-hia-mai i te mau tufaa fenua no Missouri, Kentucky e Illinois e faahou â i Ohio.

Ua inoino roa te tahi mau taata ia Elder Snow e te poro‘i ta’na i faaite. Ei hi‘oraa, ua faati‘a oia i te hoê ohipa tei tupu i ni‘a ia’na i Kentucky i te taime a haaputuputu ai te hoê pŭpŭ taata i roto i te fare o te hoê taata no te faaroo ia’na ia a‘o. I muri a‘e i ta’na a‘oraa, ua faaroo oia e ua opua te tahi mau taata i te taparahi ia’na i muri noa a‘e i to’na faaru‘eraa i taua vahi ra. Ua haamana‘o oia i teie « i ropu i te tura‘iraa te taata i te tahi e te tahi i roto i te fare, ua tape‘a hape mai te rima o te hoê o te mau taata i ni‘a i te hoê o te mau pute o to’u pereue, tei haape‘ape‘a ho‘i ia’na ». E i to’na tape‘araa i te tahi mea paari i roto i te pute o Elder Snow, ua faaara ‘oi‘oi oia i to’na mau hoa e e pupuhi ta te misionare. Ua papa‘i o Elder Snow i muri iho, « Ua nava‘i te reira—no te mau taata i te faaru‘e i ta ratou mau opuaraa ino ». Ua parau faahou mai o Elder Snow ma te ataata, « Te pupuhi tei mana‘ohia e tei haape‘ape‘a i to ratou mana‘o e tei paruru ia’u, o ta’u ïa Bibilia iti, te hoê tao‘a aroha ta te Patereareha herehia i horo‘a mai na’u, o Iosepha Semita, [Metua] »²⁷

Ua farii poupou te tahi atu mau taata ia Elder Snow e ua farii i te poro‘i ta’na i faaite atu. I te hoê puhaparaa no Missouri ua haapii oia e pae na taata tei bapetizohia i te ropuraa o te tau to‘eto‘e. Ua ti‘a ia Elder Snow e te tahi atu mau taata ia tapû i te pape paari o te hoê tahora ia nehenehe ia’na ia rave i te oro‘a. Noa’tu te to‘eto‘e, ua « ti‘a mai te tahi o te mau taata faafariûhia mai raro mai i te pape, ma te pa‘ipa‘i i to ratou rima, e ma te arue i te Atua ».²⁸

Ua tupu na misioni matamua e piti a Elder Snow mai te tau tupuraa râau o te matahiti 1837 e tae atu i te ava‘e Me 1840. Te faataa nei te mau tufaa o ta’na mau rata i teie mau taime i roto i te taviniraa i te Fatu : « Ua tere au e ua poro vau i te toe‘a o te tau to‘eto‘e [no te matahiti 1838–39]… na roto i te tahi manuïaraa taa ê, i te tahi mau taime ua farii maitaihia mai ma te tura rahi e ua faaroohia te poro‘i ma te anaanatae rahi e, i te tahi atu mau taime, ua parau inohia mai e ua faainohia mai ; aita râ vau i te hoê noa a‘e taime i hamani-ino-hia hau atu ia Iesu, o ta’u ho‘i e pee nei ».²⁹ « Ia hi‘o ana‘e au i muri i te mau ohipa tei tupu o ta’u i ratere mai… te maere nei au e te maere noa nei â vau ».³⁰ « Tei piha‘iho te Fatu ia’u e ua haamaitai-rahi-hia vau i te raveraa i ta’u mau ohipa fifi ».³¹

Te Misioni i te Fenua Peretane

I te omuaraa no te ava‘e Me 1840, ua amui atu o Lorenzo Snow i te Feia Mo‘a i Nauvoo, Illinois, aita râ oia i faaea maoro atu i reira. Ua piihia oia ia tere atu na ni‘a i te Moana Atelenitita e ia tavini i te hoê misioni i te Fenua Peretane e ua faaru‘e atu oia ia Nauvoo i taua ihoâ ava‘e ra. Hou oia a faaru‘e mai ai, ua rave oia i te taime no te haere e farerei i te mau utuafare o na Aposetolo e iva o tei tae na mua’tu ia’na i te Fenua Peretane no te tavini.

I to’na farereiraa i te utuafare o Brigham Young, ua ite oia e aita e materia no te oroîraa i te mau area raau o to ratou fare raau, ma te vaiiho noa ia ratou ia faaruru i te « mata‘i e te vero ». Ua rohirohi roa te tuahine Young no te mea no ho‘i noa mai ra oia i te ma‘imiraa ma te manuia ore i te puaatoro ū a te utuafare. Noa’tu to’na mau huru oraraa fifi, ua parau oia ia Elder Snow, « Ua ite oe i to’u huru oraraa, e parau râ oe ia’na [ta’u tane faaipoipo] eiaha e haape‘ape‘a, aore râ eiaha roa’tu e haape‘ape‘a mai no‘u—te hinaaro nei au e ia faaea oia i ta’na vahi ohiparaa e tae noa’tu e ua faaoti oia i ta’na misioni ma te hanahana ». Ua putapû roa o Elder Snow i te « huru vĕvĕ rahi » o te tuahine Young, ua hinaaro oia e tauturu : « E mea iti roa ta’u moni—eita ho‘i e nava‘i no te hoê i ni‘a i te ahuru o to’u tere i ta’u vahi ohiparaa, e aita ho‘i e rave‘a ê atu e noaa ai te toe‘a o te moni, e ua piri roa mai te taime e reva’tu ai au. Ua tatara mai au mai roto mai i to’u pute te hoê tufaa no ta’u moni… aita râ oia i farii i te reira ; e a onoono puai ai au e ia rave oia i te moni, e a tamau noa’i oia i te pato‘i—peneia‘e e mea opua-rii-hia, e mea hape noa’tu, ua topa te moni i ni‘a i te tahua fare, e ua topa atu i roto i te mau area o te mau apaapa raau, e na te reira i faahope i te mărôraa, e ma te aroha hopea’tu ia’na ua vaiiho e na’na e ohi i te moni mai ta’na e hinaaro ».³²

Mai Illinois, ua tere atu o Elder Snow i New York, i reira ua pa‘uma atu oia i ni‘a i te hoê pahi no te fano atu na te Moana Atelenitita. I roto i na 42 mahana o te tereraa na te moana, ua faaruru te pahi e toru na vero puai roa. Ma te haatihia e te mau horopatete mata‘u rahi e o te heva ra, ua faaea hau noa o Elder Snow, ma te ti‘aturi e e paruru te Atua ia’na. I to te pahi tapaeraa’tu i Liverpool, i te fenua Peretane, ua « î te aau o Elder Snow i te mauruuru rahi Ia’na tei faaherehere e tei turu i te mau taata Ta’na i pii e i tono ei mau tavini no te faaoraraa i te mau fenua no te ao nei ».³³

I muri a‘e i to’na taviniraa ei misionare i te Fenua Peretane fatata e maha ava‘e te maoro, ua farii o Elder Snow i te tahi atu â hopoi‘a. Ua ma‘itihia oia ia tavini ei peresideni no te Amuiraa no Lonedona, te hoê piiraa mai te peresideni mataeinaa i teie mahana. Ua tamau oia i te poro i te evanelia, e ua hi‘opo‘a atoa oia i te ohipa a te mau faatere autahu‘araa, mai te mau peresideni amaa i roto i taua tufaa oire ra. I roto i ta’na taviniraa i roto i teie ti‘araa faatere, ua faaite pinepine oia i te parau ia Elder Parley P. Pratt, hoê melo no te Pŭpŭ no te Tino Ahuru ma Piti Aposetolo e e peresideni ho‘i no te misioni. Ua papa‘i oia no ni‘a i te mau taata e rave rahi « tei ani e nahea e noaa’i ia ratou te ora », e no te hoê piha, tei « î roa, e eita te taata e ô faahou mai » no te hoê pureraa i te Sabati, e no te « oaoa i te bapetizoraa i te [mau taata faafariuhia mai] i roto i te nănă a to tatou Fatu e Faaora o Iesu Mesia ». Ma te anaanatae e te mana‘o tae no ni‘a i te ohipa, ua parau oia, « Noa’tu te haatiraa a te mau huru ino atoa, te haamata nei o Ziona i te maraa mai, e, te ti‘aturi nei au, eita e maoro roa e riro mai ïa ei lamepa anaana i roto i teie oire ».³⁴

Ua tupu rahi te Amuiraa no Lonedona i raro a‘e i te peresideniraa a Elder Snow. A oaoa ai o Elder Snow i teie manuïaraa, te fifi atoa ra oia no ni‘a i te mau hopoi‘a no te faatereraa. I roto i te hoê rata ia Elder Heber C. Kimball no te Pŭpŭ no te Tino Ahuru ma Piti Aposetolo ua ite oia e ua arata‘i teie mau titauraa ia’na ia « rave i ta’na mau hopoi‘a faatere na roto i te tahi raveraa ê atu i ravehia e ana na mua’tu ».³⁵ Ua parau oia ia Elder Kimball: « Ua parau oe e o Elder [Wilford] Woodruff e e riro te reira ei vahi haapiiraa no te iteraa, o tei tupu a‘e na … Mai te taime a haere mai ai au i ŏ nei, ua tamau noa te tahi mea apî i te tupu i rotopu i te Feia Mo‘a. Aita e maoro roa e tupu mai te hoê mea i ni‘a’tu i te tahi atu mea ». Ua faaite oia i te hoê parau mau ta’na i haapii ‘oi‘oi mai i roto i ta’na mau hopoi‘a apî: « Aita i nehenehe ia’u i te faaruru atu i te mau fifi, [maori râ] ua tauturu rahi mai te Atua ia’u ».³⁶ Ua faaite oia i te hoê â mana‘o i roto i te hoê rata ia Elder George A. Smith no te Pŭpŭ no te Tino Ahuru ma Piti Aposetolo : « Te mea iti ta’u i rave e ere ïa na’u nei na te Atua râ. Te hoê mea ta’u i haapii maitai i roto i ta’u ohipa a tutava ai au i te faananea i to’u ti‘araa ei orometua haapii i Iseraela ra, teie ïa, na roto mai ia’u iho aita vau i ite i te hoê mea e aore râ e rave i te tahi mea. Ua ite maramarama atoa vau e aita te Feia Mo‘a e nehenehe e ruperupe maori râ ia haapa‘o oia i te mau arata‘iraa e te a‘o a te mau taata tei tuuhia no te peresideni i roto i te Ekalesia. Te ti‘aturi nei au e ia haapa‘o noa vau i ta’na mau ture, e tape‘a e e turu mai te Fatu o Iehova ia’u i roto i to’u ti‘araa … Ia haere au ma te haehaa i mua ia’na, e e horo‘a mai ïa oia ia’u te mana no te a‘o na roto i te parau-ti‘a e te varua no te heheuraa ».³⁷

Taa ê noa’tu i te pororaa i te evanelia e te taviniraa ei peresideni no te Amuiraa no Lonedona, ua papa‘i o Elder Snow i te hoê ve‘a faaroo, e aore râ buka iti, no te tauturu i te mau misionare ia haamaramarama maitai i te evanelia tei faaho‘ihia mai. Teie ve‘a iti, tei piihia The Only Way to Be Saved [Te Hoê Ana‘e E‘a e Faaorahia‘i] ua iritihia ïa i muri mai i roto i te mau reo e rave rahi e ua faaohipahia i te taatoaraa o te afaraa o te 19raa o te tenetere.

Ua tavini o Elder Snow i te Fenua Peretane e tae roa’tu i te ava‘e tenuare 1843. Hou oia a faaru‘e atu ai, ua faaoti oia i te hoê ohipa ta’na i farii mai roto mai i te peresideni Brigham Young. I te hiti o te hoê api i roto i ta’na buka aamu, ua papa‘i oia i teie ana‘e parau no ni‘a i teie ohipa : « Ua horo‘ahia e piti Buka a Moromona i te Arii Vahine Victoria e te Tamaiti Hui Arii Albert na ni‘a i te aniraa a te peresideni B. Young ».³⁸

A faaru‘e atu ai o Elder Snow i te Fenua Peretane, ua arata‘i oia i te hoê pŭpŭ no te Feia Mo‘a Peretane i te mau Mahana Hopea nei e haere ra e faaea i Nauvoo. Ua papa‘i oia i roto i ta’na buka aamu : « Ua haapa‘o vau i te hoê pŭpŭ e piti hanere e pae ahuru taata, e rave rahi o ratou e mau hoa piri ïa no‘u tei tomo mai i roto i te fafauraa na roto i ta’u mau haapiiraa. Te ohipa ta’u e rave nei i teie nei te tere-faahou-raa na ni‘a i te moana ma te haatihia e te mau hoa, e ohipa ïa e faahinaaro-rahi-hia ia faaauhia i te huru tei ti‘ahia e au ana‘e ra e piti matahiti e te afa na mua’tu ».³⁹ Ua faaite mai te mau mea ta Elder Snow i rave i ni‘a i te pahi ra o Swanton i to’na aravihi i te faatereraa e to’na faaroo i te Atua. Ua iritihia mai teie aamu mai roto mai i ta’na buka aamu :

« Ua haaputuputu mai au i te [Feia Mo‘a] e ua farii paatoa ratou e ia faanaho vau ia ratou i roto i te mau pŭpŭ e te mau pŭpŭ iti, ma te faataa i te mau faatere maitai no te pŭpŭ tata‘itahi, e ua haamau i te mau faatureraa no te faatereraa i te pŭpŭ. Ua ite au e te vai ra e rave rahi mau Tahu‘a Rahi, e toru ahuru Peresibutero i rotopu ia matou, e no to’u iteraa i te hinaaro natura o te mau Peresibutero e rave rahi ia rave ana‘e ratou i te tahi noa mea iti e ti‘a ia itehia te reira no to ratou roo, e mai te mea eita ratou e nehenehe i te rave na roto i te hoê rave‘a e tamata ïa ratou na te tahi rave‘a ê atu, no reira ua faaoti au e mea maitai a‘e ia faataa e nahea ratou i te rave i ta ratou hopoi‘a ; no reira ua ma‘iti au e rave rahi mau taata no te hoê ohipa aore râ te tahi atu ohipa e e hopoi‘a ïa na ratou paatoa ia rave i ta ratou ohipa. Ua haaputuputu te taatoaraa o te pŭpŭ i te mau ahiahi atoa o te hepetoma [no] te mau pure. E a‘o matou e piti taime i te hepetoma ; te mau pureraa i te mau Sabati e te amuraa i te oro‘a.

« E au râ to matou tapena, o ta’u ho‘i i hinaaro i te faahoa maitai atu, eita i te mea au roa ia matou e e taata mamahu ho‘i … Ua nehenehe ohie roa ia’u ia ite e e mea hape roa to’na feruriraa no ni‘a ia matou—Tei tua matou fatata e piti hepetoma, aore ho‘i e ohipa fifi i tupu hau atu i te mea e tupu i ni‘a i te moana, a tupu ai teie ohipa.

« Ua roohia te tuati o te tapena, te hoê taure‘are‘a Purusia, i te hoê ati tei fatata i te rave atu i to’na ora. E taure‘are‘a mâ, te haapa‘o maitai e te ti‘aturihia, tei rave i te ohipa i piha‘iho i te tapena e rave rahi mau tere, ua manuïa rahi oia i te here o te tapena, te mau ofitie e te mau mâtarô; e mea piri roa te Feia Mo‘a ia’na. No teie ati ua tupu te mana‘o e e pohe oia… ua tae mai te hoê mana‘o oto rahi e te mihi i roto i te taatoaraa o te pahi.

« Ua tahe mai te toto na roto mai i to’na vaha, apeehia e te hopii puai e te ma‘i iriti. I te pae hopea, i muri a‘e i te tamataraahia e rave rahi mau raau ma te manuïa ore, ua ore te ti‘aturiraa e e ora mai oia. Ua ani te tapena i te mau mâtarô hou a haere atu ai i to ratou mau ro‘i ia haere tata‘itahi atu i roto i te piha no te aroharaa hopea ia’na ; tei ravehia ma te ti‘aturi ore e e ora oia e tae noa’tu i te po‘ipo‘i a‘e. E rave rahi mau mata tei rari i te mau roimata a haere mai ai ratou mai roto mai i te piha.

« Ua faaite atu te tuahine Martin ia’na [te hoê o te Feia Mo‘a i te mau Mahana Hopea nei i ni‘a i te pahi] a parahi ai oia ana‘e ra i te hiti o to’na ro‘i, ua faaite atu oia ia’na i to’na hinaaro e ia anihia vau ia faatahinu ia’na e peneia‘e e ora mai oia. Ua farii poupou oia i te reira. Te ta‘oto ra vau i ni‘a i to’u ro‘i a tae mai ai te parau poro‘i, e ua fatata i te ahuru ma piti i te tuiraa pô. Ua ti‘a oioi a‘era vau e ua haere atu i te piha, [e] ua farerei atu i te tapena piti, o tei haere iho nei e hi‘o ia’na. I muri noa iho i to’na iteraa ia’u, ua farerei atu oia i te hoê taea‘e Staines e ua parau atu ia’na e te haere ra o Snow Tane e tuu i to’na rima i ni‘a i te tuati. ‘Atira,’ ua parau oia (ma te reo oto), ‘Aita e faufaa ; ua hope teie nei te mau mea atoa no teie nei hoa iti’.‘Oh’, ua parau mai ra Elder Staines, ‘e nehenehe ta te Fatu e faaora ia’na na roto i te tuuraa rima’… ‘Te mana‘o nei oe i te reira ?’ pahono mai ra te mâtarô ma te ohie o to’na aau.

« I to’u haereraa’tu ua farerei au i te tapena i te uputa o te piha, e au ra ua heva na oia. Ua parau mai ra oia, ‘Te oaoa nei au e ua tae mai oe, e Snow Tane, noa’tu e aita e faufaa, no te mea ua fatata te tuati i te pohe’. Ua tomo atu vau i roto i to’na piha e ua parahi i piha‘iho i to’na ro‘i. E mea poto roa to’na hutiraa aho e e au ra e te pohe ra oia. Aita i nehenehe ia’na ia parau puai mai, ua faaite mai râ oia e e ti‘a ia’u ia haamaitai ia’na. Ua itehia e e vahine ta’na e e piti tamarii i Hamburg, Helemani, o te ti‘aturi nei i ni‘a ia’na no to ratou oraraa. E ua pe‘ape‘a roa oia no ratou.

« Ua tuu atu vau i to’u na rima i ni‘a i to’na upoo, e aita i maoro to’u haamaitairaa ia’na, ua ti‘a mai oia ma te parahi, ua pa‘ipa‘i i to’na na rima, ma te arueraa i te Fatu no to’na faaoraraahia ; i muri noa mai ua ti‘a mai oia i ni‘a mai to’na roi mai [e] ua haere atu i rapae au i te piha e ua haere atu i te tahua pahi.

« I te po‘ipo‘i a‘e ua maere roa te mau taata atoa i te iteraa’tu ia’na e mea oraora oia, e ua maere i te iteraa ia’na i te haereraa e rave i ta’na ohipa mai tei matauhia. Ua parau te taatoaraa o te mau mâtarô e e semeio te reira ; ua ite te Feia Mo‘a i te reira, ua oaoa e ua arue i te Fatu ; ua ti‘aturi papû te tapena e ua mauruuru rahi roa oia, e ua ati maira to’na aau i to matou mai taua taime mai ra. Ua horo‘a oia ia matou te mau maitai taa ê atoa e nehenehe ia’na ia horo‘a, e ua haapa‘o tamau oia i to matou mau hinaaro ; ua haere mai i ta matou mau rururaa atoa, ua hoo e ua tai‘o i ta matou mau buka. Ua na reira atoa te mau mâtarô, e i to’u faaru‘eraa’tu ia ratou i New Orleans [Louisiana], ua fafau mai ratou ia’u e e bapetizohia ratou. Ua farii au i te hoê rata fatata e hoê matahiti i muri mai na te raatira mâtarô tei faaite mai ia’u e ua… faatupu ratou i ta ratou fafauraa. Ua faaite atoa mai te tapena i ta’na opuaraa ia farii i te evanelia i te tahi taime i mua nei e ia ora i rotopu i te Feia Mo‘a. Ua bapetizohia te tuati i to matou tapaeraa’tu i New Orleans; e i to’u faaru‘eraa’tu ia’na ua horo‘a mai oia i te hoê Bibilia ei tao‘a aroha na’u, ta’u e tape‘a nei i teie nei ».⁴⁰

Ua papa‘i o Elder Snow : « E rave rahi mâtarô tei ta‘i a faaru‘e atu ai matou i te Swanton. Oia mau, ua noaa te mau mana‘o hanahana ia matou paatoa ».⁴¹ Mai New Orleans, ua pa‘uma atu o Elder Snow e to’na mau hoa Feia Mo‘a i ni‘a i te hoê pahi e ua tere atu na ni‘a i te Anavai no Mississipi. Ua tae atu ratou i Nauvoo i te 12 no eperera 1843.

Te Tamau-noa-raa i te Haapa‘o i te Ohipa a te Fatu

I muri a‘e i te taviniraa ei misionare rave tamau no te rahiraa o na matahiti e hitu, ua ite o Lorenzo Snow i te tauiraa i te hoê taime i roto i to’na mau taime taa ê no te taviniraa. I te tau to‘eto‘e no te matahiti 1843–44, ua horo‘a te feia faatere no te hoê fare haapiiraa te hoê ohipa na’na ei orometua haapii. Ua farii oia i teie horo‘araa, noa’tu e ua ite oia e e rave rahi piahi o te « te‘ote‘o nei, ia hamani ino i te mau orometua haapii e ia vavahi i te mau fare haapiiraa ». Ua faaoti oia e te rave‘a e noaahia ai te faatura o te mau piahi o te faaturaraa’tu ïa ia ratou. Ua faati‘a to’na tuahine o Eliza : « Ua paraparau atu oia i taua mau tamaroa ra mai te mea ra e mau taata tura ratou … Ua haa taa ê oia no te faaô atu i roto ia ratou to’na anaanatae no ratou » e to’na hinaaro ia « tauturu ia ratou i te faahaereraa i ta ratou haapiiraa i mua … Na roto i tei rave‘a, na roto i te maitai e te taparuraa, ua mărû to ratou mau mana‘o—ua noaa ia’na to ratou ti‘aturiraa e na roto i te mau tutavaraa tamau e te faaoroma‘i, ua riro mai te feia apî huehue ei mau piahi faatura ; e hou te hopearaa o te tau haapiiraa, ma te haereraa maerehia i mua, ua riro mai ratou ei feia haapii maitai ».⁴²

I te matahiti 1844 ua farii oia i te hoê piiraa apî i roto i te Ekalesia. Ua ma‘itihia oia ia tere atu i Ohio no te hi‘opo‘a i te hoê faanahoraa ohipa no te ma‘iti ia Iosepha Semita ei peresideni no te Fenua Marite. Aita te peropheta i mauruuru i te huru i ravehia i ni‘a i te Feia Mo‘a i te mau Mahana Hopea nei e te faatereraa hau no te Fenua Marite, e ua papa‘i oia i te mau taata e horo ra ei peresideni ia faaite mai i to ratou huru no ni‘a i te Ekalesia. No to’na mauruuru ore i ta ratou mau pahonoraa, ua faaoti oia i te horo ona iho no te peresideniraa.

Ua ma‘iti te Pŭpŭ no te Tino Ahuru ma Piti Aposetolo ia Lorenzo Snow e te tahi atu mau taata ia « faatupu i te hoê faanahoraa politita na te tufaa fenua atoa o Ohio no te tururaa ia Iosepha no te peresideniraa ».⁴³ No te raveraa i te reira ohipa, ua faaite ratou i te mau taata i te mau rave‘a i ofatihia‘i te mau ti‘araa o te Feia Mo‘a i mua i te păpă ture o te fenua. Ua parau o Lorenzo e « e taime faahiahia te reira no’na ».⁴⁴ Ua pato‘i u‘ana te tahi mau taata e ia horo te peropheta, e te tahi ua mana‘o ïa e e nehenehe ta Iosepha Semita e arata‘i i te fenua no te manuïaraa e te ruperuperaa.

Ua haamana‘o o Lorenzo Snow, « I roto i teie mau mârôraa, ua hope ta‘ue noa to’u haereraa i mua na roto i te hoê parau faaite tei haapapûhia no te taparahi-pohe-raa-hia te peropheta e to’na taea‘e o Hairamu ».⁴⁵ Ua ho‘i oia i Nauvoo « ma te aau oto ».⁴⁶

Noa’tu i roto i teie taime ati, ua haa itoito te Feia Mo‘a i te paturaa i te basileia o te Atua. Mai ta Lorenzo i parau i muri iho, « I raro a‘e i te arata‘iraa a te Mana Hope, ua haere te basileia i mua ».⁴⁷ Ua tamau ratou i te poro i te evanelia e i te haapuai te tahi i te tahi, e ua haa amui ratou no te faaoti i te paturaa i te hoê hiero i roto i to ratou oire.

I to’na amuiraa’tu i te Feia Mo‘a i Nauvoo, ua faaoti o Lorenzo Snow e e ore roa oia e faaipoipo, ua ma‘iti râ oia i te horo‘a i to’na ora i te pororaa i te evanelia. Ua parau to’na tuahine o Eliza i muri mai, « Te horo‘araa i to’na taime, ta’na mau taleni e ta’na mau mea atoa no te taviniraa o to’na ïa hinaaro rahi roa ». Ua mana‘o oia e « faaiti mai te oraraa utuafare i to’na faufaa » i roto i te ohipa a te Fatu.⁴⁸

Ua haamata te mau hi‘oraa o Lorenzo no ni‘a i te faaipoiporaa e te utuafare i te taui i te matahiti 1843 a paraparau ai oia ona ana‘e i te peropheta Iosepha Semita i te hiti o te Anavai Mississipi. Ua faaite te peropheta i to’na iteraa papû no ni‘a i te heheuraa ta’na i farii no te faaipoiporaa i te vahine rau. Ua parau oia ia Lorenzo, « E iriti te Fatu i te hoê rave‘a no oe ia farii e ia haapa‘o i te ture no te Faaipoiporaa Tiretiera ».⁴⁹ Na roto i teie a‘o, ua haamata o Lorenzo i te taa e e faaueraa na te Atua te faaipoiporaa e e tufaa faufaa rahi no te opuaraa oaoa a te Metua i te Ao ra.

I te matahiti 1845, ua tomo atu o Lorenzo Snow i roto i te faaipoiporaa i te vahine rau, mai tei ravehia i roto i te Ekalesia, ma te faaipoiporaa ia Charlotte Squires e Mary Adaline Goddard. Ua taatihia oia i te tahi atu mau vahine i muri mai. Ua riro to’na haapa‘oraa i ta’na mau vahine e ta’na mau tamarii ei tufaa no to’na haapa‘oraa i te ohipa a te Fatu.

Ua tamau te Feia Mo‘a i te patu i te basileia o te Atua i Nauvoo, ua tamau noa râ atoa te hamani-ino-raa. I te ava‘e Febuare 1846, i te tau to‘eto‘e, ua faahepo te mau taata ino ia ratou ia faaru‘e i to ratou mau fare e to ratou hiero. Ua haamata ratou i te hoê tere atea roa i te too‘a o te râ no te hoê utuafare apî.

Te Tautururaa i te Feia Mo‘a ia Haaputuputu i roto i te Afaa no Roto Miti

Noa’tu e ua faaru‘e atu o Lorenzo Snow e to’na utuafare i te oire no Nauvoo e te toe‘a o te Feia Mo‘a, aita râ ratou i tae i te Afaa no Roto Miti e tae noa’tu ua hau i te hoê matahiti i muri a‘e i te pŭpŭ matamua o te mau pionie. Mai te rahiraa o te mau pionie matamua Feia Mo‘a i te mau Mahana Hopea nei, ua faaea ratou i roto i te mau puhaparaa no te hoê tau poto na ni‘a i te arati‘a. Ua faaea o Lorenzo e to’na utuafare no te hoê taime poto i te hoê puhaparaa i Iowa tei topahia te i‘oa o Garden Grove, i reira to ratou paturaa i te mau fare raau no te Feia Mo‘a e pee mai ia ratou i muri iho. Mai reira ua haere atu ratou i te hoê puhaparaa tei topahia te i‘oa Te Mou‘a Pisega, i Iowa atoa.

I te Mou‘a Pisega ra, ua haa o Lorenzo e to’na utuafare e te tahi atu Feia Mo‘a, no te faanava‘i-faahou-raa i to ratou mau hinaaro e te mau hinaaro o te mau taata o te hinaaro i te pee atu ia ratou i to ratou tere i te Afaa no Roto Miti. Ua patu ratou i te mau fare raau e ua tanu e ua faaapu i te mau maa, ma te ite e na vetahi ê ïa e ooti i te auhuneraa. I roto i te tahi tufaa o to ratou taime i te Mou‘a Pisega, ua piihia o Lorenzo ia peresideni i te puhaparaa. A roohia‘i te mau taata i te oto, te ma‘i e te pohe, e tae noa’tu i to’na iho utuafare, ua haa itoito oia no te tauturu i te mau taata ia ite i te ti‘aturiraa, ia haapuai te tahi e te tahi, e ia haapa‘o noa i te mau faaueraa a te Fatu.⁵⁰

I te tau tupuraa râau no te matahiti 1848, ua faaue te peresideni Brigham Young ia Lorenzo Snow ia faaru‘e atu i te Mou‘a Pisega e ia tere i te Afaa no Roto Miti. Ua horo‘a-faahou-hia ia Lorenzo te hoê ti‘araa faatere, teie taime e tapena no te mau pŭpŭ o te mau pionie. Ua tae te mau pŭpŭ i roto i te Afaa no Roto Miti i te ava‘e no tetepa 1848.

Taviniraa ei Melo no te Pŭpŭ no te Tino Ahuru ma Piti Aposetolo.

I te 12 no febuare 1849, ua farii o Lorenzo Snow i te hoê poro‘i e e ti‘a ia’na ia tae atu i te hoê apooraa a te Pŭpŭ no te Tino Ahuru ma Piti Aposetolo. Ua faaea oioi oia i te reira ihoâ taime i te ohipa ta’na e rave ra e ua haere ti‘a’tu i te apooraa, tei hamata a‘ena. I to’na haereraa, ua ui oia no te aha oia i piihia‘i i mua i te Pŭpŭ no te Tino Ahuru ma Piti. Ua pe‘ape‘a oia—ua faahapahia anei oia i te raveraa i te ohipa hape ? No to’na ite e ua haapa‘o oia i ta’na hopoi‘a, ua vaiiho oia i taua mana‘o pe‘ape‘a ra i te hiti. Aita râ i nehenehe ia’na ia ite eaha râ to mua ia’na. I to’na taeraa’tu, ua maere oia i te iteraa e ua piihia oia ia tavini ei melo no te pŭpŭ. I roto i taua iho apooraa ra, ua faatoro‘ahia oia e e toru atu mau taea‘e—o Elder Charles C. Rich, o Elder Franklin D. Richards, e o Elder Erastus Snow, te hoê taea‘e fetii atea—ei mau Aposetolo.⁵¹

Ua faataa te faatoro‘araa o Lorenzo Snow i te ti‘araa aposetolo i te toe‘araa o to’na oraraa. Ua haamaitai to’na piiraa ei hoê o te mau « ite taa ê no te i‘oa o te Mesia (PH&PF 107:23) i te mau mea atoa ta’na i rave. Ua faaite oia i muri mai i to’na mau mana‘o no ni‘a i te mau hopoi‘a tata‘itahi a te hoê Aposetolo :

« A tahi, e ti‘a ia vai mai i te hoê Aposetolo te hoê iteraa no te Ra‘i, na roto i te heheuraa no ô mai i te Atua ra, e te ora nei Iesu—e o Oia te Tamaiti a te Atua ora.

« Te piti, e ti‘a ia’na ia faati‘ahia e te Atua ia fafau atu i te Varua Maitai ; te hoê parau tumu hanahana o te heheu i te mau mea a te Atua, o te faaite i To’na hinaaro e Ta’na mau opuaraa, o te arata‘i atu i te parau mau atoa, e o te faaite i te mau mea e tae mai, mai tei faaitehia e te Faaora.

« Te toru, e haamanahia oia e te mana o te Atua ia faatere i te mau oro‘a mo‘a no te Evanelia, tei haapapûhia’tu i te taata tata‘itahi na roto i te hoê iteraa no te Ra‘i mai. Te mau tauasini taata e ora nei i teie taime i roto i teie mau afaa, tei farii i teie mau oro‘a na roto i ta’u pororaa, e mau ite ora ïa ratou no te parau mau o teie faahitiraa parau ».⁵²

Taa ê noa’tu i te hopoi‘a tata‘itahi o to’na piiraa, e iteraa papû to Elder Snow no te auraa ia riro ei melo no te Pŭpŭ no te Tino Ahuru ma Piti Aposetolo : « Ua faaoti matou, na Ahuru ma Piti, ia horo‘a i ta matou mau mea atoa o te faahahi ê atu ia matou i te e‘a no te hopoi‘a, ia nehenehe ia matou ei hoê mai te peresideniraa [Matamua] i hoê, e ia nati amuihia matou e te parau tumu o te here o te nati i te Tamaiti a te Atua i te Metua ».⁵³

Ma teie iteraa no ni‘a i to’na iho piiraa e te misioni a te Pŭpŭ no te Tino Ahuru ma Piti Aposetolo, ua horo‘a o Elder Lorenzo Snow i to’na ora no te tauturu i te paturaa i te basileia o te Atua i ni‘a i te fenua nei. Ua pahono oia i te piiraa ia tavini na roto i te mau rave‘a huru rau e rave rahi e i te mau vahi huru rau e rave rahi.

Te Misioni no Italia

I roto i te amuiraa rahi no atopa 1849 ua piihia o Elder Snow ia haamau i te hoê misioni i Italia. Noa’tu e aita oia i matau i te fenua e te mau peu ta‘ere e te mau reo, aita oia i feaa i te farii i te piiraa. Iti mai i te piti hepetoma i muri a‘e i te amuiraa, ua ineine oia i te haere, ma te faanaho maitai i te tautururaa no ta’na mau vahine e ta’na mau tamarii i to’na haere-ê-raa’tu.

E a tere atu ai oia e te tahi atu mau misionare i te tufaa hitiaa o te râ o te Fenua Marite, i reira ho‘i ratou i te pa‘umaraa i ni‘a i te hoê pahi no te tere atu na ni‘a i te Mona Atelenitita, ua fariu to’na mau mana‘o i to’na utuafare e i te mau taata ta’na e fatata atu i te tavini. I roto i te hoê rata i to’na tuahine Eliza ua papa‘i oia : « E rave rahi mau mana‘o fifi e haape‘ape‘a nei i to’u feruriraa … Te atea ê atu ra matou i te auri ovahine puai—UTUAFARE ! ua ite râ matou e te ohipa ta matou e rave nei o te afa‘iraa ïa i te maramarama i te mau taata e parahi nei i roto i te pouri, e i roto i te Peho ra o te Mărû Pohe, e ua î to matou mau aau i te here, e ua tamarôhia to matou mau roimata ».⁵⁴

Ua tae atu o Elder Snow e to’na mau hoa i Genoa, Italia, i te ava‘e tiurai 1850. Ua nehenehe ia ratou ia ite e e haere taere noa te ohipa a te Fatu i mua. Ua papa‘i o Elder Snow : « O vau ana‘e e e taata ĕê vau i roto i teie oire rahi, e 12875 kilometera te atea i to’u utuafare here, haatihia e te hoê nunaa e aita ho‘i au i matau i ta ratou mau peu e to ratou mau huru taa ê. Ua haere mai au no te haamaramarama i to ratou mau feruriraa, e no te haapii ia ratou i te mau parau tumu no te parau-ti‘a ; aita râ vau i ite i te rave‘a e nehenehe ai ia rave faaotihia teie fâ. E au ra e aita roa’tu e rave‘a e tupu ai te reira ». No to’na pe‘ape‘a i te mau « ohipa maamaa… te ino, te pouri ta‘ota‘o, e te faaroo hape » o te nunaa i piihia’tu oia no te tavini, ua papa‘i oia : « Te ani nei au i to’u Metua i te Ao ra ia hi‘o aroha mai i teie nunaa. E te Fatu e, ia riro mai ratou e mau tao‘a no To oe aroha, ia ore ratou paatoa ia pohe. A faaore mai i ta ratou mau hara, e ia itehia vau i rotopu ia ratou, ia ite ratou ia Oe, e ia ite ratou e ua tono mai Oe ia’u no te haamau i To oe Basileia … Te vai ra anei te tahi o ta Oe i ma‘iti i rotopu i teie nunaa ta oe i tono mai ia’u ? A aratai ia’u i taua mau taata ra, e ia faahanahahia to Oe ra i‘oa na roto ia Iesu ta Oe Tamaiti ».⁵⁵

Ua ite o Elder Snow i teie mau « taata tei ma‘itihia » i rotopu i te hoê pŭpŭ taata tei piihia te mau « Vaudois ». Ua ora te mau « Vaudois » i roto i te hoê peho i te tufaa fenua no Piedmont, i raro noa’tu i te tufaa apatoa no te oti‘a Italia e Helevetia i te hitiaa o te râ o te oti‘a Italia e Farani. Ua hamani-ino-hia to ratou mau tupuna e ua ti‘avaruhia mai tera vahi i tera vahi no te mea ua ti‘aturi ratou i te mana o te mau Aposetolo tahito e ua hinaaro ratou ia pee i te mau haapiiraa a te mau Aposetolo eiaha râ i te amui atu i te mau haapa‘oraa faaroo no taua tau ra.

I roto i te hoê rata i te peresideni Brigham Young, ua papa‘i o Elder Snow e ua mauiui te mau « Vaudois » na roto i te mau tau o te « ite ore e te hamani-ino-raa » e « ua vai aueue ore noa ratou, fatata, mai te păpă tei ta‘irihia e te are miti i roto i te moana vero ». Are‘a râ na mua noa a‘e i to te mau misionare Feia Mo‘a i te mau Mahana Hopea nei taeraa’tu i Italia, ua haamata te mau « Vaudois » i te fana‘o i te « hoê tau hau rahi », e e au ra e ti‘amâraa rahi to ratou i te pae faaroo i te tahi atu mau taata i Italia. Ua parau oia, « No reira, ua iritihia te e‘a tau taime poto noa hou te haamataraa o te misioni, e aita e tufaa ê atu i Italia e faaterehia ra e taua mau ture maitai ra ».

No to’na hinaaro ia faarahi i to’na ite no ni‘a i teie nunaa taata, ua haere atu o Elder Snow i te hoê fare vairaa buka no te imi i te hoê buka no ni‘a ia ratou. Ua faatia oia : « Ua faaite mai te taata haapa‘o buka o ta’u i ani atu e te vai nei teie buka ta’u i ani, ua rave-ê-hia’tu râ. Aita â oia i faaoti atura i ta’na parau i tomo mai ai te hoê vahine e te buka. Ua parau oia, ‘E mea faahiahia roa, ua ani iho nei teie taata i taua buka ra.Ua ite a‘era vau e ua ineine teie nunaa taata i te farii i te pororaa matamua o te Evanelia i Italia ».⁵⁶

Ua oaoa roa o Elder Snow e to’na mau hoa i te poro i te evanelia i te tufaa fenua no Piedmont, ua ite râ ratou e e ti‘a ia ratou ia haere ma te haapa‘o maitai, ma te faatupuraa i te mau hoaraa e te faaiteraa i te taata e nehenehe ia ratou e ti‘aturihia. I to ratou iteraa e ua haamau ratou i te mau auraa maitai e te nunaa, ua pa‘uma ratou i te hoê mou‘a i piha‘iho noa mai, « ua arue i te Atua no te ra‘i », na roto i te himene e ua pûpû i te hoê pure haamo‘araa i te fenua no Italia no te ohipa misionare. Ua faaite atoa ratou i to ratou itoito i te ohipa, e ua horo‘a o Elder Snow i te mau haamaitairaa autahu‘araa i to’na mau hoa no te tauturu ia ratou i roto i ta ratou mau hopoi‘a. Ma te faaûruhia e te ohipa tei tupu ia ratou i ni‘a i te mou‘a, ua pii o Elder Snow i taua vahi ra te Mou‘a Brigham.⁵⁷

Noa’tu i muri mai i teie ohipa tei tupu, ua fafata e piti ava‘e tei ma‘iri hou a faaite ai te tahi taata i te hinaaro ia tomo mai i roto i te Ekalesia. I te 27 no atopa 1850 ua oaoa te mau misionare i te iteraa i te pae hopea te bapetizoraa e te haamauraa matamua i Italia.⁵⁸ Ua faaite o Elder Snow i muri mai : « E mea taere e e mea paari roa te ohipa i ŏ nei … Noa’tu râ te reira, ua haamauhia te Ekalesia. Ua tanuhia te tumu raau e te toro ra to’na mau a’a ».⁵⁹

I te hoê pô ua moemoeahia o Elder Snow e na te reira i tauturu ia’na ia taa i te natura no ta’na misioni i Italia. I roto i te moemoea, te tai‘a ra oia e to’na mau hoa. Ua parau oia, « Ua oaoa matou i te iteraa’tu i te mau i‘a rarahi e te nehenehe i ni‘a i te pape, na te mau vahi atoa i hoê vahi atea ». « Ua ite matou e rave rahi mau taata o te tuu ra i ta ratou mau upe‘a e ta ratou mau reni hî; e au ra râ e ua faaea noa ratou, are‘a râ matou, te haere tamau noa ra ïa i mua. I to’u haereraa i mua’tu i te hoê o ratou, ua ite au i te hoê i‘a tei amu i ta’u matau, e ua mana‘o a‘era vau e ua inoino paha teie taata no to’u haruraa i te i‘a, mai te mea ra e, no roto atu i to’na rima ; are‘a râ, ua haere atu râ matou e ua ho‘i mai i tatahi. I reira ua huti au i ta’u reni, e aita vau i maere rii e i haamâ rii no te na‘ina‘i o ta’u i‘a. Ua mana‘o vau e e mea huru ê roa, e i roto i te rahiraa i‘a rahi e te maitai, ua noaa noa ïa ia’u te hoê i‘a na‘ina‘i roa. Ua ore râ to’u mau mana‘o mauruuru ore atoa a ite ai au e e mea maitai roa te huru o teie i‘a na‘ina‘i ».⁶⁰

Ua riro te moemoea a Elder Snow ei tohuraa. Aita oia i ite i te hoê numera rahi o te mau taata tei faafariuhia i Italia, e, mai ta te tahi atu misionare i parau i muri mai, e te mau taata tei farii i te evanelia e « ere ïa te feia tao‘a e te hanahana ».⁶¹ Ua riro râ o Elder Snow e to’na mau hoa ei mau mauhaa i roto i te rima o te Fatu i te faahaereraa mai i te mau taata maitai e te haapa‘o maitai i roto i te basileia o te Atua—te mau taata tei faaite i to ratou mauruuru no te mea ua « haamata ratou i te haere na ni‘a i te e‘a no te hoê oraraa apî e te mure ore ».⁶² E ei hotu no te faatereraa a Elder Snow, ua iritihia te Buka a Moromona na roto i te reo Italia.

Fatata e hoê tenetere e te afa i muri mai, ua paraparau te tahi atu Aposetolo, o Elder James E. Faust, no ni‘a i te mau tane e te mau vahine tei tomo i roto i te Ekalesia no te ohipa a Elder Snow e to’na mau hoa : « E tei roto te tahi i te mau pŭpŭ pereoo huti matamua no te haere mai i te Afaa no Roto Miti … E rave rahi o to ratou mau huaai tei atuatu i te mau ô vine no te ekalesia tei faaho‘i-apî-hia mai e o te tauturu taa ê nei i te ekalesia na te ao taatoa nei, ma te ti‘aturi, mai to ratou mau tupuna, e ua mau te mau Aposetolo i te mau taviri e ore roa e tutae auri ».⁶³

Te Faarahiraa i te Ekalesia.

Ua tavini o Elder Snow i muri mai i te tahi atu mau misioni, ma te faananea i to’na piiraa ei melo no te Pŭpŭ no te Tino Ahuru ma Piti Aposetolo ia rave i te ohipa « i raro a‘e i te faatereraa a te peresideniraa [Matamua] o te Ekalesia … i te faarahiraa i te ekalesia, e i te faaauraa i te mau ohipa no te reira i roto i te mau nunaa atoa » (PH&PF 107:33).

I te matahiti 1853 ua pii te peresideni Brigham Young ia Lorenzo Snow ia arata‘i i te tahi mau utuafare i te hoê puhaparaa i te tufaa apato‘erau no Box Elder i Utah. E mea na‘ina‘i te puhaparaa e vai ra e te nahonaho ore e te haamata ra i te topatari. Ua haere ‘oi‘oi atu o Elder Snow no te rave i te ohipa, ma te faanaho i te mau taata mai te au i te mau parau tumu no te ture no te haamo‘araa mai tei haapiihia e te peropheta Iosepha Semita. Ua haamau te mau taata i te hoê oire itoito e te oraora, ta Elder Snow i pii o Brigham City no te faahanahana i te peresideni Young. Na roto i te haa amuiraa e te tururaa te tahi i te tahi, ua haamau te huiraatira i te hoê faanahoraa haapiiraa, te mau fare hamaniraa tauhaa, te hoê faanahoraa faataheraa pape, te hoê taiete tapihooraa, e tae noa’tu i te hoê taiete teata taata ora. Noa’tu e aita ratou i ora i te taatoaraa o te ture no te haamo‘araa, ua arata‘ihia râ ratou e te mau parau tumu no te reira ture, e ua faaite ratou eaha ta te hoê nunaa taata e nehenehe e faatupu na roto i te hoêraa e te rave-puai-raa i te ohipa. Ua papa‘i te tamahine a te peresideni Snow o Leslie e, « Aita e feia faatau i Brigham City ». « Ua vai mai te hoê tau ohiparaa e te ruperupe e ore roa paha e aifaitohia i roto i te aamu no te tahi atu puhaparaa i roto i te tufaa fenua ».⁶⁴

Ua ora o Elder Snow e to’na utuafare i Brigham City e rave rahi mau matahiti. Ua peresideni oia i te Feia Mo‘a i reira, ma te faaru‘e i tera e tera taime no te tavini i te mau misioni poto i te tahi atu vahi. I te matahiti 1864, ua haere atu oia fatata e toru ava‘e, e tavini i te hoê misioni poto i te mau Taa Motu no Hawaii. Ua haere atu oia na muri ia Elder Ezra T. Benson, e melo atoa no te Pŭpŭ no te Tino Ahuru ma Piti Aposetolo, e te mau Elders Joseph F. Smith, Alma Smith, e William W. Cluff.⁶⁵ I te matahiti 1872–73, ua apee atu o Elder Snow e te tahi atu mau taata i te peresideni George A. Smith, Tauturu Matamua i roto i te Peresideniraa Matamua, i roto i te hoê tere faati e iva ava‘e i te mau tufaa fenua no Europa e i te Hitiaa o te Râ i Ropu, e tae noa’tu i te hoê tere i te Fenua Mo‘a. Ua tere ratou na ni‘a i te aniraa a te peresideni Young, tei ti‘aturi e e tauturu to ratou huru parau-ti‘a ia faaineine i te tahi atu mau fenua ia farii i te evanelia tei faaho‘ihia mai.⁶⁶ I te matahii 1885, ua piihia o Elder Snow ia farerei e rave rahi pŭpŭ Inidia Marite i te pae Apato‘erau Too‘a o te râ o te Fenua Marite e i te tufaa fenua no Wyoming. Ma te haamata i te ava‘e Atete e tei hope i te ava‘e Atopa, ua haamau oia i te mau misioni i reira e ua faanaho i te feia faatere no te Ekalesia no te tauturu i te mau taata tei bapetizohia e tei haamauhia.

Te Ohipa Hiero

Ua parau te peresideni Heber J. Grant, te hitu o te peresideni o te Ekalesia, e ua « horo‘a te peresideni Lorenzo Snow i to’na ora e rave rahi matahiti no te raveraa i te ohipa i roto i te Hiero ».⁶⁷ Ua haamata teie here i te ohipa no te hiero i te mau mahana matamua i faafariuhia mai ai te peresideni Snow e ua tupu i te rahi i roto i ta’na taviniraa ei Aposetolo. Ua haere atu oia i te mau rururaa i roto i te Hiero no Ketelani i muri noa a‘e i to’na bapetizoraahia e to’na haamauraahia. I muri mai ua farii oia ma te anaanatae i te hoê piiraa ia ohi i te mau ô no te paturaa i te hiero i Nauvoo. Ia oti te Hiero no Nauvoo i te patuhia, ua tavini oia ei taata faatere oro‘a i reira, i te tautururaa i te Feia Mo‘a i te mau Mahana Hopea nei ia farii i te oro‘a e te mau oro‘a taatiraa hou to ratou revaraa’tu i te pae Too‘a o te Râ o te Fenua Marite. Ua tamau noa e ua rahi ta’na mau hopoi‘a i roto i te hiero a piihia‘i oia ia tavini ei Aposetolo. Ua a‘o oia i roto i te mau oro‘a haamo‘araa no te Hiero no Logan Utah. I muri a‘e i to te peresideni Wilford Woodruff haamo‘araa i te Hiero no Manti Utah, ua tai‘o te peresideni Snow i te pure haamo‘araa i roto i te mau oro‘a i te mau mahana i muri mai. I te taime a tuuhia‘i te ofa‘i tapo‘i i ni‘a i te tira teitei roa a‘e no te Hiero no Roto Miti, ua arata‘i oia i te hoê nahoa rahi i roto i te Tuoraa Hosana. I muri a‘e i te haamo‘araahia te Hiero no Roto Miti, ua tavini oia ei peresideni matamua no te reira hiero.

I te 80raa o te mahana fanauraa o te peresideni Snow, ua papa‘i te hoê ve‘a i teie parau faahanahanaraa : « I te tufaa hopea o to’na oraraa, te rave noa ra â [oia] i te ohipa ma te itoito maitai no te fâ rahi o ta’na i horo‘a’tu i to’na mau matahiti matamua, te tamau noa ra â oia i te rave i roto i te mau patu mo‘a o te Hiero te mau ohipa hanahana ta’na ho‘i e to’na mau hoa ohipa i horo‘a ia ratou iho—e mau ohipa faufaa rahi roa no teie ao tei roohia i te hara e te pohe ».⁶⁸

Te Utuuturaa i te mau Taata Tata‘itahi

A tere ai te peresideni Snow mai tera vahi i tera’tu vahi, i te haapiiraa i te mau nahoa rahi, ua rave oia i te taime no te utuutu i te mau taata tata‘itahi e te mau utuafare. Ei hi‘oraa, i te ava‘e Mati 1891, a tavini ai oia ei Peresideni no te Pŭpŭ no te Tino Ahuru ma Piti Aposetolo, ua a‘o oia i te hoê amuiraa i Brigham City. I ropu i ta’na a‘oraa, ua tuuhia mai te hoê parau i ni‘a i te purupiti. Ua parau te hoê taata tei ite mata’tu e ua « faaea oia i ta’na a‘oraa, ua tai‘o i te parau e ua faaite atu i muri iho i te Feia Mo‘a e e piiraa teie no te haere atu e farerei i te tahi mau taata i roto i te oto rahi ». Ua ani oia e eiaha e inoino mai e ua faatea atu i te purupiti.

Na te hoê taata o Jacob Jensen no Brigham City taua nota ra. Te parau ra teie nota iti e ua pohe o Ella te tamahine a Jacob i taua mahana ra i muri a‘e e rave rahi mau hepetoma i te aroraa i te fiva rahi. Ua papa‘i te taea‘e Jensen i te nota iti no te faaite noa’tu i te peresideni Snow i te pohe e no te ani atu ia’na ia faanaho i te hunaraa. Ua hinaaro râ te peresideni Snow i te farerei i te utuafare i te reira ihoâ taime, noa’tu e e titauhia ia’na ia haapoto i ta’na a‘oraa e ia vaiiho i te hoê rururaa o ta’na ho‘i e peresideni ra. Hou ra a faaru‘e atu ai te peresideni Snow i te amuiraa, ua ani oia ia Rudger Clawson, te peresideni no te Tĭtĭ no Box Elder i taua taime ra ia apee atu ia’na.

Ua faati‘a o Jacob Jensen i te mea tei tupu i to te peresideni Snow e te peresideni Clawson taeraa’tu i to’na fare :

« I muri a‘e i to’na ti‘araa’tu i piha‘iho i te ro‘i o Ella hoê aore râ e piti minuti te maoro, ua ani te peresideni Snow mai te mea te vai ra ta matou hinu faatahinuhia i roto i te fare. Ua maere rahi roa vau, ua parau râ vau « e », e ua tii atu i te hinu na’na. Ua horo‘a’tu oia i te mohina hinu i te taea‘e Clawson e ua ani ia’na ia faatahinu ia Ella. Ua riro [te peresideni Snow] ei vaha no te haamauraa i te faatahinuraa.

« I roto i te faatahinuraa ua putapû taa ê roa vau i te tahi o te mau parau ta’na i faaohipa e o ta’u e nehenehe e haamana‘o maitai i teie nei. Ua parau oia : ‘E Ella e, te faaue nei au ia oe, i te i‘oa o te Fatu, o Iesu Mesia, ia ho‘i mai e ia ora, aita ta oe misioni i hope. E ora ïa oe no te rave i te hoê misioni faahiahia’.

« Ua parau oia e e ora oia no te haapa‘o i te hoê utuafare rahi e e riro oia ei tamahanahanaraa no to’na mau metua e to’na mau hoa. Te haamana‘o maitai nei au i teie mau parau…

« I muri a‘e i to te peresideni Snow faaotiraa i te haamaitairaa, ua fariu atu oia i ni‘a i ta’u vahine faaipoipo e ia’u nei ma te parau e : ‘Teie nei eiaha e oto aore râ e mauiui faahou. E maitai te mau mea atoa. E mea rahi ta maua te taea‘e Clawson ohipa e e ti‘a ia maua ia haere atu, eita e nehenehe ta maua e faaea mai, a faaoroma‘i noa orua e a tia‘i, eiaha e oto, no te mea e afaro te mau mea atoa’…

« Ua faaea noa o Ella mai te reira te huru hau atu i te hoê hora i muri a‘e i to te peresideni Snow haamaitairaa ia’na e hau atu i te toru hora i muri a‘e i to’na poheraa. Te parahi ra maua i reira i te hiti o te ro‘i, to’na metua vahine e o vau nei, i araara mai ai to’na na mata. Ua hi‘o atu oia i te piha, ua ite mai ia matou i te parahiraa i reira, ua imi noa râ oia i te tahi atu taata, e te mea matamua ta’na i parau : ‘Tei hea oia ? Tei hea oia ?’ Ua ani maua, ‘O vai ? Tei hea o vai ?’ ‘Te taea‘e Snow’, ua pahono mai ra oia. ‘Ua pii mai oia ia’u ia ho‘i mai’ ».⁶⁹

I to’na faaearaa i roto i te ao varua, no te hau e te oaoa ta Ella i ite aita ïa oia i hinaaro i te ho‘i mai. Ua faaroo râ oia i te reo o te peresideni Snow. Mai taua mahana ra, ua tamahanahana oia i te mau melo no te utuafare e te mau hoa, ma te tautururaa ia ratou ia taa e aita i titauhia ia ratou ia mihi i to ratou mau taata tei herehia e ratou e tei pohe.⁷⁰ I muri mai ua faaipoipo oia, ua fanau e va‘u tamarii e ua tavini itoito i roto i to’na mau piiraa i roto i te Ekalesia.⁷¹

Te Arata‘iraa i te Ekalesia ei Peropheta, ei Hi‘o e ei Heheu Parau na te Fatu

I te 2 no tetepa 1898, ua pohe te peresideni Wilford Woodruff i muri a‘e i te taviniraa ei Peresideni no te Ekalesia hau atu i te iva matahiti. Tei Brigham City te peresideni Lorenzo, o te tavini ra i taua taime ra ei Peresideni no te Pŭpŭ no te Tino Ahuru ma Piti Aposetolo, i to’na faarooraa i te parau apî. Ua pa‘uma ‘oi‘oi atu oia i ni‘a i te hoê pereoo auahi no te tere atu i te Oire no Roto Miti, ma te ite e tei ni‘a te hopoi‘a no te faatereraa i te Ekalesia i teie nei i te Pŭpŭ no te Tino Ahuru ma Piti Aposetolo.

No to’na mana‘oraa e aita oia i aravihi maitai ua ineine râ i te pee i te hinaaro o te Fatu, ua haere atu te peresideni Snow i te Hiero no Roto Miti e ua pure. Ei pahonoraa i ta’na pure, ua haere roa mai te Fatu iho e farerei ia’na. Ua faaite papû te peresideni Snow i muri mai e ua « ite mau oia i te Faaora… i roto i te Hiero, e ua parau mata’tu oia Ia’na ». Ua parau te Fatu ia’na ia faanaho ‘oi‘oi noa i te faaapîraa i te Peresideniraa Matamua, eiaha ia tia‘i mai tei ravehia i te taime a pohe ai te mau peresideni o te Ekalesia na mua’tu.⁷² Ua paturuhia te peresideni Snow e te Pŭpŭ no te Tino Ahuru ma Piti Aposetolo ei Peresideni no te Ekalesia i te 13 no tetepa 1898, e ua haamata oia i te taviniraa ei Peresideni. Ua paturuhia oia e te mau melo o te Ekalesia i te 9 no atopa e ua faataahia oia te paeraa o te peresideni o te Ekalesi i te 10 no atopa.

Na roto i te hi‘oraa o te peresideni Snow e na roto i te mau heheuraa ta’na i farii, ua ite te Feia Mo‘a i te mau Mahana Hopea nei ia’na ei peropheta no ratou. Ua faatura atoa te mau taata no te tahi ê atu mau faaroo ia’na ei taata mau na te Atua.

Te mau Auraa e te Feia Mo‘a i te mau Mahana Hopea nei

Ua peresideni pinepine te peresideni Snow i te mau amuiraa tĭtĭ i te taime a riro ai oia ei Peresideni no te Ekalesia. Ia farerei oia i te Feia Mo‘a, e faaite oia i to’na here e to’na faatura ia ratou. Ua faaite mai ta’na mau parau e ta’na mau ohipa e a ite ai oia i te mo‘araa o to’na piiraa, aita râ oia i tuu atu ia’na iho na ni‘a‘e i te mau taata ta’na e tavini ra.

I te hoê amuiraa tĭtĭ, ua tae atu te peresideni Snow i te hoê tufaa rururaa taa ê na te mau tamarii o te tĭtĭ. Ua anihia te mau tamarii ia faanaho i te hoê reni nahonaho ia nehenehe ia ratou ia tapiri tata‘itahi atu i te peropheta e ia aroha rima’tu ia’na. Hou râ ratou i na reira ai, ua ti‘a mai oia e ua parau mai : « Ia aroha rima ana‘e au ia outou te hinaaro nei au e ia hi‘o mai outou i to’u hoho‘a mata, ia haamana‘o noa outou ia’u. Teie nei râ eita vau i te mea maitai atu i te tahi atu mau taata, ua tuu mai râ te Fatu i ni‘a iho ia’u te mau hopoi‘a rahi. Mai te taime ua faaite mai te Fatu Ia’na iho ia’u nei, na roto i te rave‘a maitai roa tei matauhia e Ana, ua tutava vau i te rave i te mau hopoi‘a atoa tei vai mai i ni‘a ia’u. No te ti‘araa teitei ta’u e mau nei i hinaaro ai au e ia haamana‘o outou ia’u, ia haamana‘o e ua aroha rima outou i te peresideni o te Ekalesia. Te ti‘aturi nei au e eita ïa outou e haamo‘e i te pure no‘u e no to’u na tauturu, te mau peresideni Cannon e Smith e no te mau Aposetolo ».⁷³

Ua faaite mai te tamaiti a te peresideni Snow o LeRoi i teie aamu no ni‘a i te hoê amuiraa tĭtĭ i Richfield, Utah : « Ua tae atu te peresideni Lorenzo Snow e o Francis M. Lyman [ no te Pŭpŭ no te Tino Ahuru ma Piti Aposetolo] i te hoê amuiraa tĭtĭ i Richfield. I muri a‘e i te himene matamua ua ani te peresideni tĭtĭ i te taea‘e Lyman o vai te ti‘a ia’na ia pii no te horo‘a i te pure matamua. Ua parau a‘era te taea‘e Lyman: « A ani i te peresideni Snow’, oia ho‘i ia ani i te peresideni Snow o vai te ti‘a ia horo‘a i te pure. Aita râ, ua ani te peresideni tĭtĭ i te peresideni Snow ia horo‘a i te pure. Ua farii maitai mai te peresideni Snow e hou oia a haamata ai i te pure ua faaite oia i to’na oaoa i te piiraahia e ua parau e e mea huru roa te taime i teie nei e atahi ra a horo‘a-faahou-hia’i ia’na teie ohipa oaoa. Ua parauhia e ua pûpû atu oia i te hoê pure faahiahia ».⁷⁴

Te mau Auraa e te mau Taata no te Tahi ê atu mau Faaroo

Ua tae roa te maitai o te peresideni Snow i rapae atu i to’na mau hoa Feia Mo‘a i te mau Mahana Hopea nei. Ia farerei ana‘e te mau taata no te tahi ê atu mau faaroo ia’na, e faatura ratou ia’na e te Ekalesia ta’na e ti‘a ra. Ua mata‘ita‘i te Metua W. D. Cornell, te hoê orometua no te tahi ê atu ekalesia, i te Oire no Roto Miti e ua farii oia i te haamaitairaa taa ê ia paraparau atu i te peresideni Snow. Ua papa‘i oia :

« Ua arata‘ihia’tu vau i mua i to’na aro hanahana e to’na papa‘i parau maitai e te aravihi, e ua ite au ia’u iho i te aroha-rima-raa’tu i te hoê o te mau taata hau atu i te au e te here ta’u i farerei—te hoê taata tei ite taa ê i te faaore i te taiaraa atoa i mua i to’na ra aro—te hoê taata aravihi i te parau, e te maramarama, o tei faati‘a ia’na ia farii poupou atu ia oe i mua i to’na aro.

« E taata peu maitai te peresideni Snow, i te pae feruriraa e i roto i te aau e te tino. E mea maitai ta’na parau, aita e mau parau e faatupu i te inoino, e mau parau hoa e te ite. E faaite mai ta’na mau peu i te maitai o te mau fare haapiiraa ta’na i haere atu. Te maitai o to’na ra varua e mea marû ïa mai te hoê tamarii rii. E faaitehia outou i mua ia’na. E mauruuru outou ia’na. E paraparau outou ia’na, e au outou ia’na. E farerei maoro outou ia’na, e here outou ia’na ». Ma te a‘o atu i te mau taata e tai‘o nei i ta’na mau buka, e au ra e mau mana‘o hape to ratou no ni‘a i te Ekalesia, ua parau râ te Metua Cornell: « E, e ‘Momoni oia !’ E, mai te mea e manuia noa’tu te ‘faaroo Momoni’ i te faariro i te peresideni Snow ei taata iria e te peu ino, ua rave rahi mau ïa te ohipa tei ravehia. Mai te mea ua riro na te ‘faaroo Momoni’ ei mana taui tei horo‘a i to te ao te hoê taata e varua hau, afaro mai ia’na te huru, maramarama maitai, te vai papû ra ïa te tahi mea maitai i roto i te ‘faaroo Momoni’ ».⁷⁵

Ua papa‘i atoa te hoê atu orometua, te hoê Metua Prentis, no ni‘a i te hoê farereiraa e te peresideni Snow : « Ua riro te hoho‘a mata o te faaite ra i te hoê varua e te faatere arii ra te Tamaiti Hui Arii no te Hau, o to’na ïa ite maitai roa. I roto i te hoê oraraa tei ravehia no te tuatapapa i te huru o te mau taata ua itea ia’u taua ite ra. Ua ite au i taua huru hoho‘a mata ra i teie mahana … Ua ti‘aturi au i te ite i te maramarama, te maitai, te tura, e te peu maitai e te puai tei itehia i ni‘a i te hoho‘a mata o te peresideni o te Ekalesia a Iesu Mesia i te Feia Mo‘a i te Mau Mahana Hopea Nei ; i to’u râ faaiteraahia’tu i te peresideni Lorenzo Snow, ua hitimahuta vau no te hoê taime poto roa … Ua riro to’na hoho‘a mata ei puai no te hau ; to’na aro e hoê ïa haamaitairaa no te hau. I roto i te hohonuraa hau o to’na mata e ere noa ïa te ‘fare no te pure muhu’, e fare atoa râ no te puai varua. A paraparau ai oia no ni‘a i te ‘parau papû a te mau peropheta’ e te papûraa o to’na ti‘aturiraa, e te faaroo paari tei haavî i te mau tamataraa e te mau fifi o te oraraa ati, ua mata‘ita‘i au i te ha‘uti o te mau mana‘o e ua tuatapapa vau ma te anaanatae i te mau huru faaiteraa o te parau papû mai roto mai i te mau ohipa a to’na varua ; e ua tae mai te mana‘o huru ê roa i ni‘a ia’u, e ua ‘ti‘a vau i ni‘a i te fenua mo‘a :’ e aita teie taata i rave i te ohipa no te mau faatureraa matauhia, no to’na iho maitai, aore râ no te raveraa i te tahi atu ohipa, ua rave râ oia i te ohipa na roto i te hoê huru taa ê atu i te tahi atu mau taata’… Mai te mea e nehenehe i te Ekalesia Momoni i te faatupu i taua huru ite ra, eita ïa e titau-rahi-hia te aravihi o te hoê taata papa‘i aore râ te aravihi o te hoê taata a‘o tuiroo ».⁷⁶

Te Heheuraa no ni‘a i te Tuhaa Ahuru

Ua matau-maitai-hia a‘e paha te peresideni Lorenzo Snow no te hoê heheuraa ta’na i farii no ni‘a i te ture no te tuhaa ahuru. I te ava‘e no me 1899 ua faaûruhia oia ia tere atu i St. George, Utah, e te tahi atu mau taata faatere no te Ekalesia. Noa’tu e aita oia i ite no te aha ua ti‘a ia ratou ia tere atu, ua pahono vitiviti râ oia e to’na mau taea‘e i te faaûruraa, e i roto i te area e piti hepetoma tei St. George ratou. I te 17 no me, i muri a‘e i te taeraa’tu i St. George, ua farii te peresideni Snow i te hoê heheuraa e e ti‘a ia’na ia poro i te ture no te tuhaa ahuru. I te mahana i muri mai ua parau oia i teie nei parau i te Feia Mo‘a : « Te parau a te Atua ia outou e ere ïa i te tahi mea apî; o teie noa ïa : UA TAE I TE TAIME I TEIE NEI NO TE FEIA MO‘A ATOA I TE MAU MAHANA HOPEA NEI O TE OPUA I TE FAAINEINE NO ANANAHI E O TE TAPE‘A PAPÛ I TO’NA NA AVAE I NI‘A I TE HOÊ NIU PAARI, IA RAVE I TE HINAARO O TE FATU E IA AUFAU I TA’NA TAHAA AHURU TI‘A. Tera ïa te parau a te Fatu ia outou, e o te parau ïa a te Fatu i te mau puhaparaa atoa i roto i te fenua no Ziona ».⁷⁷

I muri a‘e i to’na horo‘araa i teie parau poro‘i i St. George, ua faaite te peresideni Snow e to’na mau hoa tei tere atu na muri ia’na i te hoê â poro‘i i te mau oire no te tufaa apatoa no Utah e i roto i te tahi atu mau oire i ropu ia St. George e te Oire no Roto Miti. I te taime a ho‘i atu ai ratou i te 27 no me, ua faatupu ratou e 24 rururaa i reira to te peresideni Snow horo‘araa e 26 a‘oraa e ua aroha rima atu i na tamarii e 4.417. Ua tere ratou e 676 kilometera na ni‘a i te pereoo auahi e 494 kilometera na ni‘a i te puaarehenua e te pereoo huti.⁷⁸ Ua faaitoitohia te peresideni Snow e teie ohipa tei tupu e ua hinaaro rahi oia i te tamau i te pororaa i te ture no te tuhaa ahuru i te taatoaraa o te Ekalesia. Ua parau oia, « Te oaoa rahi nei au i te hotu o teie tere, e te mana‘o nei au i te tere atu na te mau tĭtĭ atoa i Ziona, i te mau mahana i mua nei ».⁷⁹ Ua peresideni oia e rave rahi mau amuiraa tĭtĭ, i reira oia i te fafauraa i te Feia Mo‘a e na te haapa‘oraa i teie ture e faaineine i te mau melo no te Ekalesia ia farii i te mau hamaitairaa i te pae tino e i te pae varua.⁸⁰ Ua fafau atoa oia e na te haapa‘oraa i te ture no te tuhaa ahuru e faati‘a i te Ekalesia ia matara atu i rapae au i te mau tarahu.⁸¹

Ua pahono te mau melo i roto i te Ekalesia taatoa i te a‘o a te peresideni Snow ma te itoito faaapîhia. I te matahiti 1904, ua papa‘i te taata papa‘i aamu o Orson F. Whitney, tei tavini i muri mai ei melo no te Pŭpŭ no te Tino Ahuru ma Piti Aposetolo : « Ua tupu ‘oi‘oi noa te hotu o teie ohipa. Ua tae rahi mai te mau tuhaa ahuru e te mau ô ma te vitiviti e te rahi tei ore i itehia e rave rahi mau matahiti, e ua maitai te huru o te Ekalesia na roto i te mau rave‘a e rave rahi e e ua ruperupe ta’na mau titauraa. Ua farii a‘ena te peresideni Snow i te here e te ti‘aturiraa a to’na nunaa, e ua rahi e ua puai atu â teie mau mana‘o maitai i teie nei ».⁸² Ua parau te peresideni Heber J. Grant i muri mai, e melo ho‘i oia no te Pŭpŭ no te Tino Ahuru ma Piti Aposetolo a farii ai te peresideni Snow i te heheuraa no ni‘a i te tuhaa ahuru, « Ua tae mai o Lorenzo Snow i te peresideniraa o te Ekalesia i te va‘u-ahuru-ma-pae-raa o to’na matahiti, e te mea ta’na i rave i na matahiti e toru o to’na oraraa i muri mai e mea faahiahia ïa ia hi‘ohia … I roto i na matahiti poto e toru, ua faatere teie taata, tei hau atu i te faito matahiti no te aravihi i roto i te hi‘oraa a to te ao nei, teie taata tei ore i rave a‘ena i te mau ohipa tereraa faufaa, tei horo‘a i to’na ora no te mau matahiti raveraa i te ohipa i roto i te Hiero, i te mau faufaa a te Ekalesia a te Mesia, i raro a‘e i te faaûruraa a te Atua ora, e tei taui i te mau mea atoa i te pae faufaa, i roto i na matahiti e toru, mai roto mai i te pouri i te maramarama ».⁸³

Te Faaiteraa i te Iteraa Papû i te mau Mahana Hopea no Ta’na Tau Taviniraa

I te 1 no tenuare 1901 ua tae atu te peresideni Snow i te hoê rururaa taa ê i roto i te Fare Menemene no Roto Miti no te fariiraa i te 20raa o te tenetere. Ua anihia te mau taata no te mau faaroo atoa ia tae mai. Ua faaineine te peresideni Snow i te hoê parau poro‘i no te oro‘a, aita râ i nehenehe ia’na ia tai‘o ona iho no te mea e ma‘i hota ino roa to’na. I muri a‘e i te himene matamua, te hoê pure matamua, e te hoê himene himenehia e te Pŭpŭ Himene no te Fare Menemene, ua ti‘a mai te tamaiti a te peresideni Snow o LeRoi e ua tai‘o i te parau poro‘i, tei topahia « Aroharaa i to te Ao na te peresideni Lorenzo Snow ».⁸⁴ Ua riro te mau parau hopea no te poro‘i ei faahoho‘araa no te mau mana‘o o te peresideni Snow no ni‘a i te ohipa a te Fatu :

« I roto i te va‘u-ahuru-ma-hitu-raa o to’u matahiti i ni‘a i te fenua nei, te tupu nei i roto ia’u nei te hinaaro puai no te maitai o te taata nei … Te faateitei nei au i to’u rima e te ti‘aoro nei au i te haamaitaraa o te ra‘i i ni‘a i te mau taata atoa no te fenua nei. Ia ataata mai te hihi mahana no ni‘a mai i ni‘a ia outou. Ia faatupu-hua-hia mai te mau tao‘a no te fenua e te mau hotu no te repo no to outou maitai. Ia ti‘avaru atu te maramarama o te parau mau i te pouri mai roto atu i to outou mau varua. Ia rahi mai te parau-ti‘a e ia iti mai te ino … Ia upooti‘a mai te parau-ti‘a e ia faaorehia te viivii. E ia vai mai te viretu e te viivii ore e te tura i rotopu i te taata e tae noa’tu i te taime e haavîhia ai te ino e e tamâhia ai te fenua i te ino. Ia haere atu teie mau mana‘o, mai te reo o te mau ‘Momoni’ i roto i te mau mou‘a no Utah, i te ao taatoa, e ia ite te mau taata atoa e to matou hinaaro e ta matou misioni no te haamaitai ïa e te faaora i te taatoaraa o te taata nei … Ia faahanahanahia te Atua i roto i te rê o te tupu i ni‘a i te hara e te oto e te ati e te pohe. Ia farii paatoa outou i te hau ! »⁸⁵

I te 6 no atopa 1901, ua ti‘a’tu te peresideni Snow no te a‘o atu i to’na mau hoa Feia Mo‘a i roto i te tufaa hopea no te amuiraa rahi. Ua ma‘ihia oia e rave rahi mahana, e a tae atu ai oia i te purupiti, ua parau oia, « E to’u mau taea‘e e tuahine here e, e mea maere ia’u ia tamata vau i te paraparau atu ia outou i teie avatea ». Ua faaite oia i te hoê parau poro‘i poto no ni‘a i te faatereraa i roto i te Ekalesia. I muri iho ua parau oia i te mau parau hopea ta te mau melo atoa no te Ekalesia e faaroo mai roto mai ia’na : « Ia haamaitai te Atua ia outou. Amene ».⁸⁶

E maha mahana i muri mai, ua pohe te peresideni Snow i te ma‘i hota mahaha. I muri a‘e i te oro‘a hunaraa i roto i te Fare Menemene no Roto Miti, ua hunahia to’na tino i te hoê tanuraa mai i to’na oire here o Brigham City.

Te metua tane o Lorenzo Snow, Oliver Snow

Ua bapetizohia e ua haamauhia o Lorenzo Snow i Ketelani, Ohio, i te ava‘e Tiunu 1836, e piti ava‘e i muri a‘e i te haamo‘araahia te Hiero no Ketelani, tei itehia i ŏ nei.

Elder Lorenzo Snow

E rave rahi Feia Mo‘a matamua tei tere mai Europa mai no te amui atu i te Feia Mo‘a i te Fenua Marite.

I ni‘a i te pahi Swanton, ua faaora-‘oi‘oi-hia te hoê taata tei pêpê ino roa i muri a‘e i te hoê haamaitairaa tei horo‘ahia e Elder Lorenzo Snow.

Ua tavini o Lorenzo Snow ei tapena no te mau pŭpŭ Feia Mo‘a tei tae i roto i te Afaa no Roto Miti i te matahiti1848.

Ua hamanihia te mau tiaapuiti, te mau tiaa, te mau taamu e te mau taupoo i roto i teie fare i te Oire no Brigham City, Utah.

Te Peresideniraa Matamua e te Pŭpŭ no te Tino Ahuru ma Piti Aposetolo i te matahiti 1898. Ana‘iraa i ni‘a, mai te aui e tae atu i te atau : Anthon H. Lund, John W. Taylor, John Henry Smith, Heber J. Grant, Brigham Young, Tamaiti., George Teasdale, Rudger Clawson, Marriner W. Merrill. Ana‘iraa i ropu : Francis M. Lyman, George Q. Cannon, Lorenzo Snow, Joseph F. Smith, Franklin D. Richards. Ana‘iraa i raro : Matthias F. Cowley, Abraham O. Woodruff.